ວັນອັງຄານ, 22/10/2019
ການສຳມະນາວິທະຍາສາດດ້ານທິດສະດີ ລະຫວ່າງພັກກອມມູນິດຫວຽດນາມ ແລະ ພັກກອມມູນິດຈີນ
10/9/2013 15:13' ສົ່ງ ພິມ
ພາບຫ້ອງປະຊຸມ. ພາບຂອງ: TTXVN

ຄະນະ​ຜູ້​ແທນ​ພັກ​ກອມ​ມູນິດ​ຫວຽດນາມ ນຳ​ໂດຍ​ສະຫາຍ ດິງ​ເຖຮວີ​ງ, ກຳມະການ​ກົມ​ການ​ເມືອງ, ​ເລຂາທິການ​ສູນ​ກາງ​ພັກ, ຫົວໜ້າ​ຄະນະ​ໂຄສະນາ​ອົບຮົມ​ສູນ​ກາງ, ປະທານ​ສະພາ​ທິດ​ສະ​ດີ​ສູນ​ກາງ ເປັນຫົວໜ້າຄະນະ. ຄະນະ​ຜູ້​ແທນ​ພັກ​ກອມ​ມູນິດ​ຈີນ ນຳ​ໂດຍ​ສະຫາຍ ​ເລົ່າກີເປົ່າ, ກຳມະການ​ກົມ​ການ​ເມືອງ, ​ເລຂາ​ຄະນະ​ເລຂາທິການ​ສູນ​ກາງ, ​ຫົວໜ້າ​ຄະນະ​ໂຄສະນາ​ການ​ສູງ​ກາງພັກ ເປັນຫົວໜ້າຄະນະ.

​ໃນ​ພິທີ​ໄຂ​ການ​ສຳ​ມະ​ນາ, ສະຫາຍ ດິງ​ເຖຮວີ​ງ ໄດ້​ອ່ານບົດລາຍງານແນະນຳ ທີ່​ມີ​ຫົວ​ຂໍ້ສຳຄັນ: “ກໍ່ສ້າງ​ພັກ​ກອມ​ມູນິດ​ຫວຽດນາມໃສສະອາດ ໝັ້ນຄົງ​ເຂັ້ມ​ແຂງ​ໃນ​ສະພາບ​ການ​ໃໝ່ - ພຶດຕິ​ກຳ ​ແລະ ບົດຮຽນປະສົບ​ການ”, ຊຶ່ງ​ໃນ​ນັ້ນ​ເນັ້ນ​ໜັກ​ວ່າ ພັກ​ກອມ​ມູນິດ​ຫວຽດນາມກຳນົດ​ການກໍ່ສ້າງ​ພັກ​ໃຫ້ໃສສະອາດ ໝັ້ນຄົງ​ເຂັ້ມ​ແຂງ ​ແມ່ນ​ໜ້າ​ທີ່​ຫຼັກ​ແຫຼ່ງ, ສຳຄັນ​ເປັນ​ພິ​ເສດ, ມີ​ຄວາມ​ໝາຍ​ອັນເປັນຕາ​ຍ ຕໍ່​ກັບ​ໄຊຊະນະ​ຂອງ​ພາລະກິດ​ປະຕິວັດ, ມີ​ລະດັບ​ທິດ​ສະ​ດີ ​ແລະ ພຶດຕິ​ກຳ​ອັນ​​ເລິກ​ເຊິ່ງ; ພ້ອມ​ກັນ​ນັ້ນ ​ກໍ່​ເປັນ​ບັນຫາ​ຫຍຸ້ງຍາກ ​ແລະ ສັບສົນ​ທີ່​ສຸດ.

ບົດລາຍ​ງານຢືນຢັນ ພັກ​ກອມ​ມູນິດ​ຫວຽດນາມ ​ແລະ ປະທານ​ໂຮ່ຈີ​ມິນ ຍາມ​ໃດ​ກໍ່​ເອົາ​ໃຈ​ໃສ່​ເປັນ​ສຳຄັນ​ເຖິງວຽກ​ງານກໍ່ສ້າງ​ພັກໃສສະອາດ ໝັ້ນຄົງ​ເຂັ້ມ​ແຂງ; ​ແນະນຳ​ສະພາບ​ວຽກ​ງານກໍ່ສ້າງ​ພັກ​​ໃສສະອາດ ໝັ້ນຄົງ​ເຂັ້ມ​ແຂງ; ບັນດາ​ບົດຮຽນ​ປະສົບ​ການ​ແຫ່ງ​ການກໍ່ສ້າງ​ພັກ​​ໃສສະອາດ ໝັ້ນຄົງ​ເຂັ້ມ​ແຂງ; ທິດ​ທາງ, ຈຸດໝາຍ ​ແລະ ໜ້າ​ທີ່​ກ່ຽວ​ກັບ​ການ​ເພີ່ມ​ທະວີ ການກໍ່ສ້າງ​ພັກ​ໃຫ້​​ໃສສະອາດ ໝັ້ນຄົງ​ເຂັ້ມ​ແຂງ ​ໃນ​ສະພາບ​ການ​ໃໝ່.

ບົດ​ລາຍ​ງານ​ແນະນຳ​ຂອງ​ສະຫາຍ ​ເລົ່າ​ກີ​ເປົ່າ ມີ​ຫົວ​ຂໍ້​: “ວິ​ທີເຮັດ ​ແລະ ບັນດາ​ບົດຮຽນ​ປະສົບ​ການ​ຕົ້ນຕໍ​ ກ່ຽວ​ກັບ​ການ​ກໍ່ສ້າງ​ແບບ​ແຜນ​ພັກ​ຊື່​ກົງ​ບໍລິສຸດ ຂອງພັກ​ກອມ​ມູນິດ​ຈີນ”, ຊີ້​ໃຫ້​ເຫັນ​ແຈ້ງວ່າ ແຕ່​ກ່ອນ​ມາ​ເຖິງ​ປັດຈຸບັນ ພັກ​ກອມ​ມູນິດ​ຈີນ ຍາມ​ໃດ​ກໍ​ຖືເປັນ​ສຳຄັນ​​ການ​ຮັກສາ​ລັກສະນະ​ກ້າວໜ້າ ​ແລະ ລັກສະນະ​ໃສ​ສະອາດ​ຂອງ​ພັກ. ພາຍຫຼັງ​ກອງ​ປະຊຸມ​ໃຫຍ່​ຄັ້ງ​ທີ XVIII, ຄະນະ​ນຳພາ​ໃໝ່​ຂອງພັກ​ກອມ​ມູນິດ​ຈີນ ​ໄດ້​ເອົາ​ໃຈ​ໃສ່​ເປັນ​ພິ​ເສດ​ເຖິງ​ການ​ເພີ່ມ​ທະວີ​ລະບຽບ​ວິ​ໄນ​ການ​ເມືອງ​ພາຍ​ໃນ​ພັກ, ກໍ່ສ້າງ​ແບບ​ແຜນ​​ຊື່​ກົງ​ບໍລິສຸດ ​ແລະ ຜັນ​ຂະຫຍາຍ​ແນວທາງ​ມະຫາຊົນ “​ເພື່ອ​ປະຊາຊົນ, ​ແທດ​ເໝາະ​ຕົວ​ຈິງ, ບໍລິສຸດ” ​ເພື່ອ​ຮັກສາ​ສາຍ​ພົວພັນ​​ແບບເລືອດ​ເນື້ອ​ກັບ​ປະຊາຊົນ, ຕ້ານ​ລັດ​ທິຮູບ​ການ​ນິຍົມ, ລັດທິອາດຍາ​ສິດ, ລັດທິ​ຊົມ​ໃຊ້ສ່ວນ​ຕົວ ​ແລະ ​ແບບ​ແຜນ​ຟຸມ​ເຟືອຍ; ຍູ້​ແຮງການ​ປ້ອງ​ກັນ ​ແລະ ຕ້ານ​ການສໍ້​ລາດ​ບັງ​ຫຼວງ, ກໍ່ສ້າງ​ລະບົບ​ການ​ລົງ​ໂທດ ​ແລະ ປ້ອງ​ກັນ​ການ​ສໍ້​ລາດ​ບັງ​ຫຼວງ; ສົມທົບ​ວຽກ​ງານ​ການ​ອົບຮົມ​ສຶກສາ, ກໍ່ສ້າງ​ການຈັດ​ຕັ້ງ​ກົດ​ຂໍ້​ບັງຄັບ ກັບ​ວຽກ​ງານ​ຕິດຕາມ​ກວດກາ, ດັດ​ແກ້, ປະຕິບັດ​ວິ​ໄນລົງ​ໂທດຕໍ່​ການ​ສໍ້​ລາດ​ບັງ​ຫຼວງ.

ບັນດາ​ຜູ້​ແທນ​ຂອງ​ຄະນະ​ຜູ້​ແທນ​ທັງ​ສອງ ​ໄດ້​ສົນທະນາ ​ແລກປ່ຽນ​ຄວາມ​ຄິດ​ຄວາມ​ເຫັນ​ນຳ​ກັນ ກ່ຽວ​ກັບ​ຫົວ​ຂໍ້​ສະ​ເພາະ​ຕ່າງໆ ​ເຊັ່ນ “ກໍ່ສ້າງ​ແບບ​ແຜນ”, “ກໍ່ສ້າງ​ລະບອບ”, “ຕິດຕາມ​ກວດກາ, ຜູກ​ມັດ​ອຳນາດ”, “ສິ່ງ​ແວດ​ລ້ອມ​ສັງຄົມ”; ສຸມ​ໃສ່​ລົງ​ເລິກ​ໄຈ້​ແຍກ​ດ້ານ​ຕ່າງໆ ຂອງ​ວຽກ​ງານ​ກໍ່ສ້າງ​ພັກ​ໃສ​ສະອາດ ໝັ້ນຄົງ​ເຂັ້ມ​ແຂງ; ປ້ອງ​ກັນ, ຕ້ານ​ການ​ສໍ້​ລາດ​ບັງ​ຫຼວງ; ​ແນະນຳ​ທັດສະນະ, ​ແຜນ​ນະ​ໂຍບາຍ, ນະ​ໂຍບາຍ, ວິທີ​ເຮັດ​ທີ່​ດີ, ບົດຮຽນ​ປະສົບ​ການ​ຂອງ​ແຕ່ລະ​ຝ່າຍ ​ເພື່ອ​ຄົ້ນຄວ້າ​ທາ​ບທາມ ຮ່ຳຮຽນ​ຊຶ່ງ​ກັນ​ແລະ​ກັນ.

​ໃນ​ພິທີ​ອັດ​ການ​ສຳ​ມະ​ນາ, ສອງ​ຝ່າຍ​ຢືນຢັນ​ວ່າ ການ​ສຳ​ມະ​ນາ​ວິທະຍາສາດ​ດ້ານ​ທິດ​ສະ​ດີ​ຄັ້ງ​ທີ​ເກົ້າ​ລະຫວ່າງ​ສອງ​ພັກ​ໄດ້​ສຳ​ເລັດ​ຜົນ​ຢ່າງ​ດີ​ງານ; ຕີ​ລາຄາ​ສູງ​ຜົນສຳ​ເລັດ​ຂອງ​ການ​ສຳ​ມະ​ນາ​ວິດ​ທະຍາ​ສາດ​ດ້ານ​ທິດ​ສະ​ດີ​ຄັ້ງ​ນີ້ ຕໍ່​ກັບທິດ​ສະ​ດີ ​ແລະ ພຶດຕິ​ກຳ​ວຽກ​ງານ​ກໍ່ສ້າງ​ພັກ​ຂອງ​ແຕ່​ລະ​ພັກ; ປະກອບສ່ວນ​ກໍ່ສ້າງພັກ​ກອມ​ມູນິດ​ຫວຽດນາມ ​ແລະ ພັກ​ກອມ​ມູນິດ​ຈີນ ​ໃສສະອາດ ໝັ້ນຄົງ​ເຂັ້ມ​ແຂງ, ສືບ​ຕໍ່​ນຳພາ​ພາລະກິດ​ປະຕິວັດ​ໃນ​ແຕ່ລະ​ປະ​ເທດ​ຢ່າງ​ສຳ​ເລັດ​ມີ​ໄຊ./. 

ຕາມ​ຂ່າວ: TTXVN

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ