ວັນອັງຄານ, 22/10/2019
ຫວຽດນາມ - ລາວ ກໍ່ສ້າງເສັ້ນຊາຍແດນສັນຕິພາບ, ມິດຕະພາບ ແລະ ການຮ່ວມມືພັດທະນາ
12/9/2013 10:52' ສົ່ງ ພິມ
ກຳລັງປະກອບອາວຸດຂອງສອງປະເທດ ສົມທົບກັນປົກປັກຮັກສາ ຫຼັກໝາຍຊາຍແດນເລກທີ 605 ໃນເສັ້ນຊາຍແດນລວມ ຫວຽດນາມ-ລາວ.

ຊາຍ​ແດນ​ຫວຽດນາມ - ລາວ ມີ​ຄວາມ​ຍາວ​ປະມານ 2.067 ກມ, ຕິດ​ຈອດ​ກັບ 10 ​ແຂວງ​ຂອງ​ຫວຽດນາມ (ດ້ຽນບຽນ, ​ເຊີນ​ລາ, ​ແທງ​ຮວາ, ​ເງະ​ອານ, ຮ່າ​ຕິ້ງ, ກວ໋າງບິ່ງ, ກວ໋າງຈິ, ​ເທື່ອ​ທຽນ-​ເຫວ້, ກວ໋າງນາມ, ກອນ​ຕຸ​ມ) ​ແລະ​ຕິດ​ຈອດ​ກັບ 10 ​ແຂວງ​ຂອງ​ລາວ (ຜົ້ງ​ສາລີ, ຫຼວງ​ພະ​ບາງ, ຫົວພັນ, ຊຽງ​ຂວາງ, ບໍລິ​ຄຳ​ໄຊ, ຄຳ​ມ່ວນ, ສະຫວັນ​ນະ​ເຂດ, ສາລະ​ວັນ, ​ເຊ​ກອງ ​ແລະ ອັດ​ຕະປື). ວັນ​ທີ 18 ກໍລະກົດ 1977, ຫວຽດນາມ ​ແລະ ລາວ ​ພ້ອມ​ກັນເຊັນ​ສົນທິສັນຍາວ່າ​ດ້ວຍ​ການ​ກຳນົດ​ເສັ້ນ​ຊາຍ​ແດນ; ​ໄລຍະ​ປີ 1978-1987, ສອງ​ຝ່າຍ​ໄດ້​ເຮັດ​ສຳ​ເລັດ​ໂດຍ​ພື້ນຖານ ວຽກ​ງານ​ກຳນົດ​ເສັ້ນ​ຊາຍ​ແດນ ປັກ​ຫຼັກ​ໝາຍ​ຊາຍ​ແດນ​ໃນ​ພື້ນ​ທີ່​ຕົວ​ຈິງ, ​ເຊິ່ງ​ໄດ້​ປັກ​ຫຼັກ​ໝາຍ 214 ຫຼັກ​ໝາຍ, ທຽບ​ເທົ່າກັບ 199 ​ບ່ອນ. ຜົນສຳ​ເລັດ​ດັ່ງກ່າວ​ ໄດ້​ຖືກຮັບຮອງ​ໃນ​ອະນຸ​ສັນຍາ ວ່າ​ດ້ວຍ​ການ​ກຳນົດ​ເສັ້ນ​ຊາຍ​ແດນ​ໃນ​ພື້ນ​ທີ່​ຕົວ​ຈິງ ​ແລະ ປັກ​ຫຼັກ​ໝາຍ​ຊາຍ​ແດນ​ແຫ່ງ​ຊາດ ທີ່​ໄດ້​ເຊັນ​ກັນ​ໃນ​ວັນ​ທີ 16 ຕຸລາ 1987. ປີ 2003, ສອງ​ຝ່າຍ​ໄດ້​ເຮັດສຳ​ເລັດ​ປະມວນ​ແຜນ​ທີ່​ເສັ້ນ​ຊາຍ​ແດນ​ແຫ່ງ​ຊາດ​ຫວຽດນາມ - ລາວ ທີ່​ມີ​ອັດຕາ​ສ່ວນ 1/50.000.

​ແຕ່​ວ່າ, ​ເສັ້ນ​ຊາຍ​ແດນ​ລະຫວ່າງ​ສອງ​ປະ​ເທດ​ມີ​ຄວາມຍາວ​ເຖິງ 2.067 ກມ ​ແຕ່​ໄດ້​ປັກ​ຫຼັກໝາຍພຽງ 214 ຫຼັກ​ໝາຍ, ທຽບ​ເທົ່າກັບ 199 ​ບ່ອນ, ດັ່ງ​ນັ້ນ​ຫຼັກ​ໝາຍ​ຈຶ່ງຫ່າງ​ກັນໂພດ. ຍິ່ງ​ກວ່າ​ນັ້ນ, ລະບົບ​ຫຼັກ​ໝາຍ​ຊ້ຳພັດ​ໄດ້​ອອກ​ແບບ ​ແລະ ກໍ່ສ້າງ​ບໍ່​ສອດຄ່ອງ​ກັບ​ເງື່ອນ​ໄຂ​ພູມ​ສັນຖານ ທໍລະນີ​ສາດ ລົມ​ຟ້າ​ອາກາດ ຢູ່​ເຂດ​ຊາຍ​ແດນ, ຂະໜາດ​ຫຼັກ​ໝາຍກໍ່​ນ້ອຍ ຄຸນ​ນະພາ​ບຫຼັກ​ໝາຍ​ກໍ່​ບໍ່​ສູງ… ດັ່ງນັ້ນ ພາຍຫຼັງ 20 ປີ ຫຼັກ​ໝາຍ​ສ່ວນ​ຫຼາຍ​ຈຶ່ງ​ຖືກ​ເສື່ອ​ມ​ເສຍ​ຄຸນ​ນະພາ​ບ ​ແລະ ຖືກ​ເພພັງ. ຫຼັກ​ໝາຍ​ສ່ວນ​ເກືອບ​ທັງ​ໝົດ​ຕ້ອງ​ໄດ້​ສ້ອມ​ແປງ​ຮາກ​ຖານຄືນ​ໃໝ່, ຫຼາຍ​ຫຼັກ​ໝາຍ​ຕ້ອງ​ສ້ອມ​ແປງຄືນ​ໃໝ່​ຫຼາຍ​ເທື່ອ ຕ້ອງ​ເສຍ​ຄ່າ​ສິ້ນ​ເປືອງ​ຫຼາຍ​ ແຕ່​ກໍ່​ບໍ່​ສາມາດຮັບປະກັນ​ຄວາມ​ໝັ້ນຄົງ​ໄດ້.

ຕໍ່ໜ້າ​ຄວາມ​ເປັນ​ຈິງ​ແຫ່ງ​ການ​ພັດທະນາ​ເສດຖະກິດ - ສັງຄົມ ​ແລະ ຄວາມ​ຕ້ອງການ​ໄປມາຫາສູ່ ​ແລກປ່ຽນ​ຊື້-ຂາຍລະຫວ່າງ​ປະຊາຊົນ​ຢູ່​ຕາມ​ເຂດ​ຊາຍ​ແດນ, ​ໃນ​ຊຸມ​ປີ​ທີ່​ຜ່ານ​ມາ, ຫວຽດນາມ ​ແລະ ລາວ ​ໄດ້​ພ້ອມ​ກັນ​​ເປີດ​ນຳ​ໃຊ້ດ່ານ​ຜ່ານ​ແດນ​ໃໝ່ ​ແລະ ຍົກລະດັບ​ດ່ານ​ຜ່ານ​ແດນ​ຫຼາຍ​ແຫ່ງ, ພ້ອມ​ກັນ​ນັ້ນ​ ກໍ່​ໄດ້​ສ້າງກິດຈະກຳ​ກໍ່ສ້າງ​ໃໝ່​ຫຼາຍ​ແຫ່ງທີ່​ໃຫຍ່​ໂຕ ທັນ​ສະ​ໄໝ… ບໍລິ​ເວນ​ພົນລະ​ເມືອງ​ອາ​ໄສ​ຫຼາຍ​ແຫ່ງ​ຢູ່​ໃກ້​ເຂດ​ຊາຍ​ແດນ ​ໄດ້​ພັດທະນາ​ຢ່າງ​ແຂງ​ແຮງ, ດັ່ງ​ນັ້ນ ລະບົບ​ຫຼັກ​ໝາຍ​ຊາຍ​ແດນ​ເກົ່າ​ຈຶ່ງ​ບໍ່​ເໝາະ​ສົມ​ອີກ, ​ເປັນ​ຕົ້ນ​ແມ່ນ​ຢູ່​ບັນດາ​ເຂດ​ດ່ານ​ຜ່ານ​ແດນ, ບ່ອນ​ມີ​ພົນລະ​ເມືອງ​ໜາ​ແໜ້ນ ​ແລະ ມີ​ຄົນ​ໄປມາ​ຫຼາຍ. ​ເພື່ອ​ແນ່​ໃສ່​ເພີ່ມ​ທະວີລະບົບ​ຫຼັກ​ໝາຍ​ຊາຍ​ແດນ​ລະຫວ່າງ​ສອງ​ປະ​ເທດ, ຮັບ​ໃຊ້​ຄວາມ​ຕ້ອງການສົມທົບ​ກັນຄຸ້ມ​ຄອງ​ຊາຍ​ແດນ​ໃຫ້​ໝັ້ນຄົງ​ຕະຫຼອດ​ໄປ, ປະກອບສ່ວນ​ປັບປຸງ​ສາຍ​ພົວພັນ​ພິ​ເສດ​ຫວຽດນາມ - ລາວ​ໃຫ້​ໝັ້ນຄົງ​ຂະໜົງ​ແກ່ນ, ພ້ອມ​ກັນ​ນັ້ນ ​ເພື່ອ​ປັບປຸງ​ບູລະນະ​ຄຸນ​ນະພາ​ບຂອງ​ເສັ້ນ​ຊາຍ​ແດນ ​ແລະ ຊຸກຍູ້​ການ​ຮ່ວມ​ມື ພັດທະນາ​ເສດຖະກິດ - ສັງຄົມ ​ຢູ່​ເຂດ​ຊາຍ​ແດນ​ລະຫວ່າງ​ສອງ​ປະ​ເທດ, ການ​ນຳ​ຂັ້ນ​ສູງຂອງ​ສ​ອງປະ​ເທດ​ໄດ້ຕົກລົງ​ເຫັນ​ດີກັນ​​ອະນຸຍາດ​ໃຫ້​ຜັນ​ຂະຫຍາຍ​ການ​ກໍ່ສ້າງ ​ແລະ ປະຕິບັດ​ໂຄງການ “​ປັກ​ຫຼັກ​ໝາຍ​ຊາຍ​ແດນ​ຖີ່ ​ແລະ ປັບປຸງ​ລະບົບຫລັກໝາຍຊາຍແດນ​ແຫ່ງ​ຊາດ​ລະຫວ່າງຫວຽດນາມ - ລາວ". ​ໂຄງການ​ໄດ້​ປະຕິບັດ​ໃນ​ໄລຍະ​ ປີ 2008-2014. ນີ້​ແມ່ນ​ໜຶ່ງ​​ໃນບັນດາ​ເນື້ອ​ໃນ​ຮ່ວມ​ມືທີ່​ສຳຄັນ​ລະຫວ່າງ​ສອງ​ປະ​ເທດ.

​ໂຄງການ​ໄດ້​ລວມສູນ​ໃສ່​ເນື້ອ​ໃນ​ຕ່າງໆ ​ເຊັ່ນ: ປັກ​ຫຼັກ​ໝາ​ຍຖີ່ ຢູ່​ເຂດ​ທີ່​ຈຳ​ເປັນຕ່າງໆ ​ເພື່ອ​ເຮັດ​ໃຫ້​ເສັ້ນ​ຊາຍ​ແດນ​ໃນ​ພື້ນ​ທີ່​ຕົວ​ຈິງ ​ມີ​ຄວາມ​ກະຈ່າງ​ແຈ້ງ​ຂຶ້ນ​ຕື່ມ; ປັບປຸງ ​ແລະ ສ້າງ​ໃໝ່​ບັນດາ​ຫຼັກ​ໝາຍ​ທີ່​ມີ​ຢູ່, ​ເປັນ​ຕົ້ນ​ແມ່ນ​ຢູ່​ບັນດາ​ດ່ານ​ຜ່ານ​ແດນ ​ເພື່ອ​ຮັບປະກັນ​ມີລະບົບຫຼັກ​ໝາຍ​ຊາຍ​ແດນ​ທີ່​ໝັ້ນຄົງ​ໜັກ​ແໜ້ນແລະ ທັນ​ສະ​ໄໝ. ​ໂຄງການ​ກໍ່ໄດ້​ສຸມ​ໃສ່​ການ​ຮຽບຮຽງບູລະນະ ສຳເນົາເອກະສານນິຕິກຳ ກ່ຽວກັບເສັ້ນຊາຍແດນຫວຽດນາມ - ລາວ ໃຫ້ຄົບຖ້ວນ. ຕາມ​ແຜນການ, ສອງຝ່າຍຈະ​ເຮັດສຳເລັດ ວຽກງານປັກຫຼັກໝາຍຊາຍແດນຢູ່ພື້ນທີ່ຕົວຈິງ ໃນເດືອນ ມິຖຸນາ 2013 (ທັງໝົດມີ 793 ບ່ອນ ທຽບເທົ່າກັບ 835 ຫຼັກໝາຍ); ຫຼັງຈາກນັ້ນ ກໍ່ຈະຜັນຂະຫຍາຍວຽກງານປັບປຸງແຜນທີ່ ແລະ ຮຽບຮຽງ​ເອກະສານ “ອະນຸສັນຍາວ່າດ້ວຍເສັ້ນຊາຍແດນ ແລະ ຫຼັກໝາຍຊາຍແດນແຫ່ງຊາດ ລະຫວ່າງສາທາລະນາລັດ ສັງຄົມນິຍົມຫວຽດນາມ ແລະ ສາທາລະນະລັດ ປະຊາທິປະໄຕ ປະຊາຊົນລາວ”. ປີ 2014, ສອງ​ຝ່າຍ​ຈະ​ເຮັດ​ສຳ​ເລັດ ​ເອກະສານນິຕິກຳທັງໝົດທີ່​ຮັບຮອງ​ຜົນສຳ​ເລັດ​ ຂອງ​ການ​ປັກ​ຫຼັກ​ໝາຍ​ຊາຍ​ແດນ (ລວມ​ທັງ​ຜົນສຳ​ເລັດ​ການ​ປັກ​ຫຼັກ​ໝາຍ​ຊາຍ​ແດນ​ຢູ່​ພື້ນ​ທີ່​ຕົວ​ຈິງ​ກ່ອນໜ້ານັ້ນ).

ວັນ​ທີ 5 ກັນຍາ 2008, ຢູ່​ທີ່​ດ່ານ​ຜ່ານ​ແດນ​ ລາວ​ບ໋າ​ວ - ​ແດນ​ສະຫວັນ, ສອງຝ່າຍ​ໄດ້​ຈັດ​ຕັ້ງ​ພິທີ​ເປີດ​ນຳ​ໃຊ້​ຫຼັກ​ໝາຍຄູ່​ເລກທີ 605 - ຫຼັກ​ໝາຍ​ທຳ​ອິດ​ຢ່າງ​ຄຶກຄື້ນ ຊຶ່ງ​ເປັນ​ການ​ເລີ່​ມ​ເຄື່ອນ​ໄຫວ​ເປັນ​ທາງ​ການ​ ວຽກ​ງານ​ປັກ​ຫຼັກ​ໝາຍ​ຖີ່ ​ແລະ ປັບປຸງ​ຫຼັກ​ໝາຍ​ຊາຍ​ແດນ​ລະຫວ່າງ​ສອງ​ປະ​ເທດ. ດ້ວຍ​ຄວາມ​ເອົາ​ໃຈ​ໃສ່​ຊີ້​ນຳ​ນຳພາ​ຢ່າງ​ໃກ້ຊິດຕິດ​ແທດ​ຂອງສອງລັດຖະບານ, ການ​ສົມທົບ​ຢ່າງ​ແໜ້ນ​ແຟ້ນ ​ແລະ ຄວາມ​ມານະ​ພະຍາຍາມ​ລວມຂອງ​ບັນດາ​ກະຊວງ ຂະ​ແໜງ​ການ ທ້ອງ​ຖິ່ນ​ທີ່​ກ່ຽວຂ້ອງຂອງ​ສອງ​ປະ​ເທດ, ມາ​ຮອດ​ປັດຈຸບັນ ສອງ​ຝ່າຍ​ໄດ້​ສຳ​ເລັດ​ການ​ສ້າງ​ຫຼັກ​ໝາຍ​ຊາຍ​ແດນ​ດ້ວຍ​ຫີນ​ສີ​ລາ ກາຣານິກ ຈຳນວນ 793 ບ່ອນ ທຽບ​ເທົ່າ​ກັບ 835 ຫຼັກ​ໝາຍ ​ແລະ ສ້າງ​ເພີ່ມ​ເຕີມ​ອີກ 20 ກວ່າ​ຫຼັກ​ໝາຍ ​ເພື່ອ​ປະກອບສ່ວນ​ເຮັກ​ໃຫ້​ເສັ້ນ​ຊາຍ​ແດນ​ມີ​ຄວາມ​ກະຈ່າງ​ແຈ້ງ​ຂຶ້ນ​ຕື່ມ, ສ້າງ​ສິ່ງ​ອຳນວຍ​ຄວາມ​ສະດວກ​ໃຫ້​ແກ່​ວຽກ​ງານ​ຄຸ້ມ​ຄອງ ປົກ​ປັກ​ຮັກສາ​ຊາຍ​ແດນ​ສອງ​ປະ​ເທດ.

​ພິທີ​ສະ​ເຫຼີ​ມສະຫຼອງ ຜົນສຳເລັດວຽກງານການປັກຫຼັກໝາຍຊາຍແດນຖີ່ ແລະ ປັບປຸງຫຼັກໝາຍຊາຍແດນ ຫວຽດນາມ-ລາວ ທີ່ຈັດຂຶ້ນຢູ່ເຂດ​ດ່ານ​ຜ່ານ​ແດນ​ແທງ​ທຸຍ - ນ້ຳ​ອ້ອມ​ ​ໃນ​ວັນ​ທີ 9 ກໍລະກົດ 2013 ນັ້ນ ​ເປັນ​ເຫດການ​ທີ່​ມີ​ຄວາມ​ໝາຍ​ໃຫຍ່​ຫຼວງທີ່​ສຸດ ຕໍ່​ກັບ​ປະຊາຊົນ​ສອງ​ປະ​ເທດ, ປະກອບສ່ວນ​ອັນ​ສຳຄັນ​ ເຂົ້າ​ໃນ​ການ​ຍົກ​ສູງ​ປະສິດທິ​ຜົນ​ ຂອງ​ວຽກ​ງານຄຸ້ມ​ຄອງ​ຊາຍ​ແດນ, ປັບປຸງ​ຄວາມ​ສະຫງົບ ການ​ປ້ອງ​ກັນ​ປະ​ເທດ, ສ້າງ​ເງື່ອນ​ໄຂ​ອຳນວຍ​ຄວາມ​ສະດວກ​ໃຫ້ກ​​ແກ່ການສ້າງສາ ​ແລະ ພັດ​ທະນາ​ເສດຖະກິດ - ສັງຄົມ​ຢູ່​ເຂດ​ຊາຍ​ແດນ, ​ເປັນ​ເສັ້ນ​ຊາຍ​ແດນ​ແຫ່ງ​ສັນຕິພາບ ມິດຕະພາບ ການ​ຮ່ວມ​ມື​ພັດທະນາ./.

ແຫຼ່ງຂ່າວ: TTXVN

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ