ວັນອັງຄານ, 22/10/2019
ປັບປຸງ ແລະ ຊຸກຍູ້ ການພົວພັນຄູ່ຮ່ວມມືຍຸດທະສາດ ກັບສາທາລະນະລັດເກົາຫລີ ຢ່າງບໍ່ຢຸດບໍ່ຢັ້ງ
18/9/2013 9:20' ສົ່ງ ພິມ
ທ່ານຫງວຽນຊິງຮຸ່ງ ປະທານສະພາແຫ່ງຊາດຫວຽດນາມ ແລະ ທ່ານ ກາງ ຈາງຮີ ປະທານສະພາແຫ່ງຊາດ ສ.ເກົາຫລີ. ພາບຂອງ: TTXVN

ໃນ​ການຢ້ຽມຢາມ​ປະ​ເທດ ສ.​ເກົາຫລີ ຢ່າງ​ເປັນ​ທາງ​ການ, ທ່ານປະທານ​ສະພາ​ແຫ່ງ​ຊາດ​ ຫງວຽນ​ຊິງ​ຮຸ່ງ ​ໄດ້​ພົບ​ປະ​ປຶກສາຫາລື​ກັບທ່ານ ກາງ​ ຈາງຮີ ປະທານ​ສະພາ​ແຫ່ງ​ຊາດ ສ.​ເກົາຫລີ; ພົບ​ປະ​ແລກປ່ຽນ​ຄວາມ​ເຫັນ​ກັບ​ທ່ານ ຈູງ ​ຮົງ​ໂ​ວນ ນາຍົກລັດຖະມົນຕີ ສ.​ເກົາຫລີ ​ແລະ ​ເຂົ້າຢ້ຽມ​ຂ່ຳນັບທ່ານ​ນາງ ​ພັກ​ ກຶນຮະ​ເຢ ປະທານາທິບໍດີ ສ.​ເກົາຫລີ.

​ໃນ​ການ​ພົບ​ປະ​ກັບທ່ານ​ນາງ ​ພັກ​ ກຶນຮະ​ເຢ ປະທານາທິບໍດີ ສ.​ເກົາຫລີ, ທ່ານ​ຜູ້ນຳ​ທັງ​ສອງ​ໄດ້​ສະ​ແດງ​ຄວາມ​ເຊື່ອ​ໝັ້ນ ​ແລະ ​ໃຫ້​ຄຳ​ໝັ້ນ​ສັນຍາ ​ຈະ​ພະຍາຍາມ​ຊຸກຍູ້​ສາຍ​ພົວພັນ​ຮ່ວມ​ມື​ຍຸດ​ທະ​ສາດ ລະຫວ່າງ​ຫວຽດນາມ ​ແລະ ສ.​ເກົາຫລີ. ທ່ານປະທານ​ສະພາ​ແຫ່ງ​ຊາດ​ ຫງວຽນ​ຊິງ​ຮຸ່ງ ຢືນຢັນ​ການ​ມາ​ຢ້ຽມຢາມ ກ.​ເກົາຫລີ ຄັ້ງນີ້ຂອງ​ຄະນະ​ຜູ້​ແທນ​ສະພາ​ແຫ່ງ​ຊາດ​ຫວຽດນາມ ​ແມ່ນ​ເພື່ອ​ແນ​ໃສ່​ສືບ​ຕໍ່​ຊຸກຍູ້ສາຍ​ພົວພັນ​ຮ່ວມ​ມືລະຫວ່າງ​ສອງ​ປະ​ເທດ ​ໃຫ້​ຂະຫຍາຍຕົວແຂງ​ແຮງຍິ່ງກວ່າ​ອີກ.

​ ທ່ານປະທານ​ສະພາ​ແຫ່ງ​ຊາດ​ ຫງວຽນ​ຊິງ​ຮຸ່ງ ​ໄດ້​ແຈ້ງ​ຂ່າວ​​ໃຫ້ທ່ານ​ນາງປະທານາທິບໍດີ ພັກ​ ກຶນຮະ​ເຢ ຊາບກ່ຽວ​ກັບໝາກຜົນ​ອັນ​ດີງາມ​ຂອງ​ການພົບ​ປະ​ປຶກສາ​ຫາລື ກັບທ່ານ ກາງ ​ຈາງຮີ ປະທານ​ສະພາ​ແຫ່ງ​ຊາດ ສ.​ເກົາຫລີ, ​ແລະ ໃຫ້​ຮູ້​ວ່າ ສອງ​ຝ່າຍ​ໄດ້​ເປັນ​ເອກະ​ພາບກັນ ກ່ຽວ​ກັບ​ບັນດາ​ມາດ​ຕະການ​ຊຸກຍູ້​ການ​ພົວພັນ​ລະຫວ່າງ​ສະພາແຫ່ງສອງ​ປະ​ເທດ ​ໃຫ້​ຂະຫຍາຍຕົວ​ຍິ່ງ​ກວ່າ​ອີກ. ທ່ານປະທານ​ສະພາ​ແຫ່ງ​ຊາດ​ ຫງວຽນ​ຊິງ​ຮຸ່ງ ​ເນັ້ນ​ວ່າ ຫວຽດນາມ​ຍາມ​ໃດ​ກໍ່​ໃຫ້​ຄວາມ​ສຳຄັນ ​ແລະ ຊຸກຍູ້​ສາຍ​ພົວພັນ​ມິດຕະພາບ ການ​ຮ່ວມ​ມື ​ແລະ ຄູ່​ຮ່ວມ​ຍຸດ​ທະ​ສາດ​ກັບ ສ.​ເກົາຫລີ ຢ່າງ​ບໍ່​ຢຸດ​ຢັ້ງ, ​ເພື່ອ​ຜົນ​ປະ​ໂຫຍ​ດຂອງ​ປະຊາຊົນ​ແຕ່ລະ​ປະ​ເທດ, ປະກອບ​ສ່ວນ​ຮັກສາສັນຕິພາບ ສະຖຽນ​ລະ​ພາບ ​ແລະ ການ​ຮ່ວມ​ມື​ພັດທະນາ ຢູ່​ພາກ​ພື້ນ​ອາຊີ - ປາຊີ​ຟິກ ​ແລະ ​ໃນ​ໂລກ. ບົນ​ຈິດ​ໃຈ​ດັ່ງກ່າວ​ນັ້ນ, ທ່ານປະທານ​ສະພາ​ແຫ່ງ​ຊາດ​ ຫງວຽນ​ຊິງ​ຮຸ່ງ ຫວັງ​ວ່າ​ສອງ​ຝ່າຍ​ຈະ​ເພີ່ມ​ທະວີ​ການ​ພົວພັນ​ເສດຖະກິດ​ນຳ​ກັນ​ຍິ່ງ​ກວ່າ​ອີກ, ພິ​ເສດ​ແມ່ນ​ໃນ​ຂົງ​ເຂດ​ການ​ລົງທຶນ ການ​ຄ້າ ການ​ຮ່ວມ​ມື​ພັດທະນາ ​ແຮງ​ງານ ການທ່ອງທ່ຽວ. ສອງ​ຝ່າຍ​ຄວນ​ຊຸກຍູ້ການ​ເຈ​ລາ​ຈາ​ເຊັນ​ຂໍ້​ຕົກລົງ​ກ່ຽວ​ກັບ​ການ​ຄ້າ​ເສລີ​ທະວິ​ພາຄີ, ທັງ​ນີ້​ກໍ່​ເພື່ອ​ສ້າງ​ກຳລັງ​ຂັບ​ເຄື່ອນ​ໃໝ່​ ໃຫ້​ແກ່​ການ​ຮ່ວມ​ມື​ພັດທະນາ​ເສດຖະກິດ​ຢ່າງ​ແຂງ​ແຮງ ​ແລະ ຮອບດ້ານ​ກວ່າ​ອີກ.

ທ່ານປະທານ​ສະພາ​ແຫ່ງ​ຊາດ​ ຫງວຽນ​ຊິງ​ຮຸ່ງ ກໍ່​ໄດ້​ສະ​ແດງ​ຄວາມ​ຂອບ​ອົກ​ຂອບ​ໃຈ ​ແລະ ປາຖະໜາ​ວ່າ​ ທ່ານ​ປະທານາທິບໍດີ ​ແລະ ບັນດາ​ການ​ນຳ ສ.​ເກົາຫລີ ສືບ​ຕໍ່​ໃຫ້​ຄວາມ​ເອົາ​ໃຈ​ໃສ່ ​ແລະ ຊ່ວຍ​ໜູນ​ຕົວ​ຈິງ​​ໃຫ້​ແກ່​ຊາວ​ຫວຽດນາມ​ທີ່ອາ​ໄສຢູ່ ສ.​ເກົາຫລີ, ​ເປັນ​ຕົ້ນ​ແມ່ນ​ແມ່ຍິງ​ຫວຽດນາມ​ເອົາ​ຜົວ​ຄົນ ສ.​ເກົາຫລີ, ​ໃຫ້​ເຂົາ​ເຈົ້າ​ເຂົ້າ​ຮ່ວມ​ເຈືອ​ຈານ​ກັບ​ສັງຄົມ​ເກົາຫລີ.

ທ່ານ​ນາງ ​ປະທານາທິບໍດີ ພັກ​ ກຶນຮະ​ເຢ ​ໃຫ້​ທັດສະນະ​ວ່າ ການ​ມາ​ຢ້ຽມຢາມ​ຂອງທ່ານປະທານ​ສະພາ​ແຫ່ງ​ຊາດ​ ຫງວຽນ​ຊິງ​ຮຸ່ງ ​ແລະ ຄະນະ​ຜູ້​ແທນ​ຂັ້ນ​ສູງ​ຂອງ​ສະພາ​ແຫ່ງ​ຊາດ​ຫວຽດນາມ ​ເປັນ​ການປະກອບສ່ວນ​ອັນ​ຕັ້ງໜ້າ ​ເຂົ້າ​ໃນ​ການ​ເພີ່ມ​ພູນ​ຄູນ​ສ້າງສາ​ຍພົວພັນ​ອັນ​ດີງາມ​ ລະຫວ່າງ​ສອງ​ປະ​ເທດ ສອງ​ຊາດ; ສະ​ເໜີ​ໃຫ້​ສອງ​ຝ່າຍ​ຕັ້ງໜ້າ​ປ່ຽນ​ແປງ​ໃໝ່​ກົນ​ໄກ ນະ​ໂຍບາຍ, ສ້າງ​ສິ່ງ​ອຳນວຍ​ຄວາມ​ສະ​ດວກ​ໃຫ້​ວິ​ສາ​ຫະກິດ​ຂອງ​ສອງ​ປະ​ເທດ ​ເພີ່ມ​ທະວີ​ການ​ຮ່ວມ​ມື ລົງທຶນ​ເພື່ອ​ຜົນ​ປະ​ໂຫຍ​ດຂອງ​ແຕ່ລະ​ຝ່າຍ. ທ່ານ​ຜູ້ນຳ​ທັງ​ສອງ​ກໍ່​ເປັນ​ເອກະ​ພາບ​ກັນ ສືບ​ຕໍ່​ຮັກສາ ​ແລະ ​ເພີ່ມ​ທະວີການ​ຢ້ຽມຢາມ ​ແລະ ພົບ​ປະລະ​ຫວ່າງ​ການ​ນຳ​ຂັ້ນ​ສູງ, ຂັ້ນ​ຕ່າງໆ, ບັນດາ​ຂະ​ແໜງ​ການ ​ແລະ ທ້ອງ​ຖິ່ນຂອງ​ສອງ​ປະ​ເທດ, ປະກອບສ່ວນ​ປັບປຸງ ​ແລະ ​ເພີ່ມ​ທະວີ​ຄວາມ​ໄວ້​ວາງ​ໃຈ​ດ້ານ​ການ​ເມືອງ​ຊຶ່ງ​ກັນ​ແລະ​ກັນ.

​ໃນ​ການພົບ​ປະ​ປຶກສາຫາລື​ກັບທ່ານ ກາງ​ ຈາງຮີ ປະທານ​ສະພາ​ແຫ່ງ​ຊາດ ສ.​ເກົາຫລີ, ສອງຝ່າຍ​ໄດ້​ເປັນ​ເອກະ​ພາບ​ກັນ​ ເຮັດ​ໃຫ້​ສາຍ​ພົວພັນ​ມິດຕະພາບ ​ແລະ ການ​ພົວພັນ​ຄູ່​ຮ່ວມ​ມື​ຍຸດ​ທະ​ສາດ​ລະຫວ່າງ​ສອງ​ປະ​ເທດ ​ເລິກ​ເຊິ່ງກວ່າ ​ແລະ ມີ​ປະສິດທິ​ຜົນ​ຍິ່ງ​ກວ່າ​ອີກ, ກໍ່​ຄື​ຍູ້​ແຮງ​ການ​ຮ່ວມ​ມື ​ແບ່ງປັນ​ບົດຮຽນ​ປະສົບ​ການ​ລະຫວ່າງ​ສອງ​ສະພາ​ແຫ່ງ​ຊາດ.

ໃນ​ການພົບ​ປະ​ປຶກສາຫາລື, ທ່ານ​ປະທານ​ສະພາ​ແຫ່ງ​ຊາດ​ທັງ​ສອງ​ກໍ່​ໄດ້​​ແຈ້ງ​ໃຫ້​ກັນຊາ​ບ ກ່ຽວກັບ​ການ​ເຄື່ອນ​ໄຫວ​ຈຳນວນ​ໜຶ່ງ​ໃນ​ເວລາ​ມໍ່ໆ​ມາ​ນີ້​ຂອງ​ສອງ​ສະພາ​ແຫ່ງ​ຊາດ, ​ເປັນ​ເອກະ​ພາບ​ກັນ​ເພີ່ມ​ທະວີ​ການ​ຮ່ວມ​ມື​ຊຸກຍູ້ ​ແລະ ຕິດຕາມ​ກວດ​ກາການ​ປະຕິບັດ​ບັນດາ​ສັນຍາ ຂໍ້​ຕົກ​ລົງ​ລະຫວ່າງ​ລັດຖະບານ​ຂອງ​ສອງ​ປະ​ເທດ, ​ເພື່ອ​​ໃຫ້ບັນດາ​ສັນຍາ ຂໍ້​ຕົກລົງ​ນັ້ນ​ນຳ​ມາ​ຊຶ່ງ​ຜົນສຳ​ເລັດ​ຕົວ​ຈິງ ​ແລະ ປະ​ສິດທິ​ຜົນ​ມາ​ໃຫ້​ທັງ​ສອງ​ຝ່າຍ. ສອງ​ຝ່າຍ​ເຫັນ​ດີ​ຍູ້​ແຮງ​ການ​ຮ່ວມ​ມື ​ແລະ ປະສານ​ສົມທົບ​ການ​ກະທຳ​ຢ່າງ​ແໜ້ນ​ແຟ້ນ ຢູ່​ໃນ​ບັນດາ​ເວທີປາ​ໄສ​ລະຫວ່າງ​ບັນດາ​ສະພາ​ແຫ່ງ​ຊາດ​ສາກົນ ​ແລະ ພາກ​ພື້ນ ບົນ​ຈິດ​ໃຈ​ສະໜັບສະໜູນ​ກັນ ​ແລະ ສົມທົບ​ຢ່າງ​ກົມກຽວ​ໃນ​ບັນດາ​ບັນຫາ​ພາກ​ພື້ນ ​ແລະ ທົ່ວ​ໂລກ.

ທັນທີ​ພາຍຫຼັງ​ການພົບ​ປະ​ປຶກສາຫາລື, ທ່ານປະທານ​ສະພາ​ແຫ່ງ​ຊາດ​ຫວຽດນາມ ຫງວຽນ​ຊິງ​ຮຸ່ງ ​ແລະ ທ່ານ​ປະທານສະພາ​ແຫ່ງ​ຊາດ ສ.​ເກົາຫລີ ກາງ ​ຈາງຮີ ​ໄດ້​ພ້ອມ​ກັນ​ລົງ​ນາມ​ໃນ ຂໍ້​ຕົກລົງ​ກ່ຽວ​ກັບ​ການ​ຮ່ວມ​ມື​ລະຫວ່າງສະພາ​ແຫ່ງ​ຊາດ​ຫວຽດນາມ ​ແລະ ສະພາ​​ແຫ່ງຊາດ ສ.​ເກົາຫລີ; ພ້ອມ​ກັນ​ເປັນ​ສັກຂີ​ພະຍານ​ໃນ​ພິທີ​ເຊັນ ຂໍ້​ຕົກລົງ​ກ່ຽວ​ກັບ​ການ​ຮ່ວມ​ມື​ ລະຫວ່າງ​ຫ້ອງ​ວ່າການ​ສະພາ​​ແຫ່ງ​ຊາດ​ຫວຽດນາມ ​ແລະ ຄະນະ​ເລຂາທິການ​ສະພາ​ແຫ່ງ​ຊາດ ສ.​ເກົາຫລີ.

​ໃນ​ການພົບ​ປະ​ແລກປ່ຽນ​ຄວາມ​ເຫັນ​ກັບ​ທ່ານນາຍົກລັດຖະມົນຕີ​ແຫ່ງ ສ.​ເກົາຫລີ ຈູງ ​ຮົງ​ໂ​ວນ, ທ່ານປະທານ​ສະພາ​ແຫ່ງ​ຊາດ​ ຫງວຽນ​ຊິງ​ຮຸ່ງ ສະ​ແດງ​ຄວາມ​ປາຖະໜາ​ຢາກ​ໃຫ້​ລັດຖະບານ ສ.​ເກົາຫລີ ສືບ​ຕໍ່​ສົ່ງ​ເສີມ​ບັນດາວິສາຫະກິດ ສ.​ເກົາຫລີ ​ເພີ່ມ​ທະວີ​ການ​ລົງ​ທຶນ​ເຂົ້າ​ຫວຽດນາມ, ພ້ອມ​ກັນ​ນັ້ນ​ສອງ​ຝ່າຍ​ກໍ່​ສື​ບຕໍ່​ຜັນ​ຂະ​ຫຍາຍ ຍູ້​ແຮງ​ວິວັດ​ການ​ເຈລະຈາ​ກ່ຽວ​ກັບ​ສັນຍາ​ການ​ຄ້າ​ເສລີ (FTA) ທະວິ​ພາຄີ, ​ແນ​ໃສ່​ຈຸດໝາຍ​ຍົກ​ສູງ​ມູນ​ຄ່າ​ການ​ຄ້າ​ສອງ​ສົ້ນ​ຂຶ້ນ​ເປັນ 30 ຕື້​ໂດ​ລາ​ສະຫະລັດ​ໃນ​ປີ 2015.

​ໂດຍຕາງໜ້າ​ລັດຖະບານ ສ.​ເກົາຫລີ, ທ່ານນາຍົກລັດຖະມົນຕີ ຈູງ ​ຮົງ​ໂ​ວນ ສະແດງຄວາມຂ່ຳນັບຢ່ງສຸດອົກສຸດໃຈ ຕໍ່​ທ່ານ​ປະທານ​ສະພາ​ແຫ່ງ​ຊາດ​ ຫງວຽນ​ຊິງ​ຮຸ່ງ ​ແລະ​ ຄະນະ​ຜູ້​ແທນ​ຂັ້ນ​ສູງ​ ຂອງ​ສະພາ​ແຫ່ງ​ຊາດ​ຫວຽດນາມທີ່ມາ​ຢ້ຽວຢາມ ສ.​ເກົາຫລີ ຢ່າງ​ເປັ​ນທາງ​ການ; ​ເຊື່ອ​ໝັ້ນ​ວ່າ ການ​ມາ​ຢ້ຽມຢາມ​ມີ​ຄວາມ​ໝາຍ​ສຳຄັນ​ ຕໍ່ການຍົກ​ສູງ​ປະ​ສິດທິຜົນ​ຂອງ​ການ​ພົວພັນ​ຄູ່​ຮ່ວມ​ຍຸດ​ທະ​ສາດ​ ລະຫວ່າງ​ສອງ​ປະ​ເທດຍິ່ງ​ຂຶ້ນ.

ທາງ​ດ້ານ​ການ​ຄ້າ, ສ.​ເກົາຫລີ ​ເປັນ​ຄູ່​ຮ່ວມ​ການ​ຄ້າ​ໃຫຍ່​ທີ 4 ຂອງ​ຫວຽດນາມ ​ແລະ ຫວຽດນາມ​ເປັນ​ຕະຫຼາດ​ສົ່ງ​ນອກ​ໃຫຍ່​ທີ 9 ຂອງ ສ.​ເກົາຫລີ. ມູນ​ຄ່າ​ການ​ຄ້າ​ລະຫວ່າງ​ສອງ​ປະ​ເທດ​ປີ 2012 ບັນລຸ 21,12 ຕື້​ໂດ​ລາ​ສະຫະລັດ, ກ່ອນ​ກຳນົດ​ເວລາ 2 ປີ ທຽບ​ກັບ​ຈຸດໝາຍ​ທີ່​ໄດ້​ວາງ​ອອກ​ມາ, ​ເພີ່ມ​ຂຶ້ນທົບ 42 ​ເທົ່າ​ທຽບ​ກັບ 500 ລ້ານ​ໂດ​ລາ​ສະຫະລັດ​ຂອງ​ປີ 1992. ມູນຄ່າ​ການ​ຄ້າ​ລະຫວ່າງ​ສອງ​ປະ​ເທດ​ໃນ 4​ ເດືອນຕົ້ນ​ປີ 2013 ບັນລຸ 8,4 ຕື້​ໂດ​ລາ​ສະຫະລັດ, ​ໃນ​ນັ້ນ​ຂາ​ອອກ​ບັນລຸ 2,1 ຕື້​ໂດ​ລາ​ສະຫະລັດ, ຂາ​ເຂົ້າ​ບັນລຸ 6,3 ຕື້​ໂດ​ລາ​ສະຫະລັດ.

ວັນ​ທີ 6 ສິງຫາ 2012, ສອງ​ປະ​ເທດ​ໄດ້​ເລີ່​ມ​ເຈລະຈາ​ກ່ຽວ​ກັບ​ສັນຍາ​ການ​ຄ້າ​ເສລີ (FTA) ທະວິ​ພາຄີ. ສອງ​ຝ່າຍ​ໄດ້​ດຳ​ເນີນ​ການ​ເຈລະຈາ 2 ຄັ້ງ​ກ່ຽວ​ກັບ FTA ຢູ່ ​ເຊ​ອູ​ນ (ລະຫວ່າງວັນ​ທີ 3 ​- 4 ກັນຍາ 2012) ​ແລະ ຢູ່​ຮ່າ​ໂນ້ຍ (ລະຫວ່າງ​ວັນ​ທີ 22 - 23 ພຶດສະພາ 2013). ສ.​ເກົາຫລີ ກໍ່​ເປັນ​ປະ​ເທດ​ທີ່​ສະໜອງ​ທຶນ​ຊ່ວຍ​ເຫຼືອພັດທະນາ​ເປັນ​ທາງ​ການ (ODA) ​ໃຫຍ່​ທີ 2 ຂອງ​ຫວຽດນາມ. ຫວຽດນາມ ​ແລະ ສ.​ເກົາຫລີ ​ໄດ້​ເຊັນ​ສົນທິສັນຍາ​ຮ່ວມ​ມື​ກ່ຽວ​ກັບ​ການ​ຊ່ວຽ​ເຫຼືອ​ພັດທະນາ, ​ໃນ​ນັ້ນ ສ.​ເກົາຫລີ ​ໃຫ້​ຄຳ​ໝັ້ນ​ສັນຍາ​ຈະ​ສະໜອງໃຫ້​ຫວຽດນາມ 1,2 ຕື້​ໂດ​ລາ​ສະຫະລັດ ​ໃນ​ໄລຍະ​ປີ 2012 – 2015 ດ້ວຍ​ທຶນ​ຈາກກອງ​ທຶນ​ຮ່ວມ​ມື ​ແລະ ພັດທະນາ​ເສດຖະກິດຂອງ​ ສ.​ເກົາຫລີ (EDCF), ​ເພີ່ມ 200 ລ້ານ​ໂດ​ລາ​ສະຫະລັດ ທຽບ​ກັບ​ໄລ​ຍະ​ປີ 2008 - 2011. ການ​ຮ່ວມ​ມື​ລະຫວ່າງ​ຫຼາຍ​ທ້ອງ​ຖິ່ນ​ຂອງ​ສອງ​ປະ​ເທດ ​ແລະ ການ​ຮ່ວມ​ມື​ໃນ​ບັນດາ​ຂົງ​ເຂດ​ວັດທະນາ​ທຳ ການ​ສຶກສາ ການທ່ອງທ່ຽວກໍ່​ໄດ້​ຮັບ​ຜົນສຳ​ເລັດ​ຫຼາຍ​ຢ່າງ​ທີ່​ສຳຄັນ.

​ໃນ​ການ​ຢ້ຽມຢາມ ສ.​ເກົາຫລີ ຄັ້ງນີ້, ທ່ານປະທານ​ສະພາ​ແຫ່ງ​ຊາດ​ ຫງວຽນ​ຊິງ​ຮຸ່ງ ​ແລະ ຄະນະ​ຜູ້​ແທນ​ຂັ້ນ​ສູງ​ກໍ່​ໄດ້​ໄປ​ຢາມສຳນັກ​ງານ​ສະພາ​ນະຄອນ ຢົງ​ກີ​ນ; ພົບ​ປະ​ກັບ​ທ່ານປະທານສະພາ​ນະຄອນ ລີ ວູຮະ​ຢູນ; ຕ້ອນຮັບ​ການ​ນຳ​ກຸ່ມ​ບໍລິສັດ Lotte, ​ໄປ​ຢາມ​ສຳນັກງານ​ຂອງ​ກຸ່ມ​ບໍລິສັດ Kumho Asiana ຢູ່​ນະຄອນຫຼວງ ​ເຊ​ອູ​ນ./.

ຮຽບຮຽງ​ໂດຍ ຮູ​ຍຮຸ່ງ

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ