ວັນອາທິດ, 22/9/2019
ຜົນສຳເລັດການໄປຢ້ຽມຢາມ ປະເທດສະຫະລັດອາເມລິກາ ຢ່າງເປັນທາງການ ຂອງທ່ານປະທານປະເທດ ສສ ຫວຽດນາມ ເຈືອງເຕິນຊາງ
25/9/2013 15:33' ສົ່ງ ພິມ
ທ່ານປະທານາທິບໍດີສະຫະລັດອາເມລິກາ ບາຣັກ ໂອບາມາ ຕ້ອນຮັບ ແລະ ພົບປະປຶກສາຫາລືກັບ ທ່ານປະທານປະເທດ ສສ ຫວຽດນາມ ເຈືອງເຕິນຊາງ. ພາບ: TTXV

ທ່ານຟ້າ​ມບິ່ງ​ມິງ ລັດຖະມົນຕີ​ວ່າການ​ກະຊວງການ​ຕ່າງປະ​ເທດ​ແຫ່ງ ສສ ຫວຽດນາມ ​ໃຫ້​ຮູ້​ວ່າ ການ​ໄປ​ຢ້ຽ​ມຢາ​ມປະ​ເທດ​ສະຫະລັດ​ອາ​ເມ​ລິ​ກາ ຂອງທ່ານ​ປະທານ​ປະ​ເທດ ​ເຈືອງ​ເຕິ​ນຊາງ ​ໄດ້​ດຳ​ເນີນ​ໄປ​ໃນສະພາບ​ການ​ຂອງ​ໂລກ ​ແລະ ພາກ​ພື້ນ​ພວ​ມມີ​ການ​ເຄື່ອນ​ເໜັງ​ຢ່າງ​ໄວວາ... ດ້ວຍ​ການ​ເຄື່ອນ​ໄຫວ​ທີ່​ອຸດົມສົມບູນ ​ແລະ ສຳຄັນ​ຫຼາຍ​ຢ່າງ, ການ​ຢ້ຽມຢາມ​ສະຫະລັດ​ອາ​ເມ​ລິ​ກາ​ ຂອງທ່ານ​ປະທານ​ປະ​ເທດ ​ເຈືອງ​ເຕິ​ນຊາງ ​ໄດ້​ບັນລຸ​ຜົນສຳ​ເລັດ​ທີ່​ໂດດ​ເດັ່ນ​ຈຳນວນ​ໜຶ່ງ ​ດັ່ງ​ນີ້:

ທາງ​ດ້ານ​ການ​ເມືອງ, ຜົນສຳ​ເລັດ​ໃຫຍ່​ທີ່​ສຸດ​ຂອງ​ການ​ຢ້ຽມຢາມ ​ແມ່ນ​ສອງ​ຝ່າຍ​ໄດ້​ພ້ອມ​ກັນສ້າງ​ຕັ້ງ​ການ​ພົວພັນ​ຄູ່​ຮ່ວມ​ຮອບດ້ານ ຫວຽດນາມ - ສະຫະລັດ​ອາ​ເມ​ລິ​ກາ, ກຳນົດ​ຂອບ​ເຂດ​ການ​ພົວພັນ​ທະວິ​ພາຄີ​ໃນ​ໄລຍະ​ໃໝ່ ກໍ່​ຄື​ທິດທາງ​ແຫ່ງ​ການ​ຂະຫຍາຍຕົວ ​ຂອງ​ການ​ພົວພັນໃນ​ຊຸມ​ປີ​ສະ​ເພາະ​ໜ້າ. ສອງ​ຝ່າຍ​ໄດ້​ອອກ​ຖະ​ແຫຼ​ງການ​ຮ່ວມ ​ເຊິ່ງ​ກຳນົດ​ຢ່າງຮອບດ້ານກ່ຽວ​ກັບ​ບັນດາ​ຫຼັກການ ​ແລະ ​ເນື້ອ​ໃນ​ ຂອງ​ການ​ພົວພັນ​ລະຫວ່າງ​ສອງ​ປະ​ເທດ ທີ່​ສ້າງ​ຕັ້ງ​ຂຶ້ນ​ຕາມຂອບ​ເຂດ​ໃໝ່, ​ໃນ​ນັ້ນ​ມີ​ການ​ເຄົາລົບ​ກົດ​ບັດ​ສະຫະ​ປະຊາ​ຊາດ ກົດໝາຍ​ສາກົນ, ​ເຄົາລົບ​ລະບອບ​ການ​ເມືອງ ​ເອກະລາດ ອະທິປະ​ໄຕ ​ແລະ ຜືນ​ແຜ່ນດິນ​ອັນ​ຄົບ​ຖ້ວນ​ຂອງ​ກັນ​ແລະ​ກັນ...

ສອງ​ຝ່າຍ​ເນັ້ນ​ໜັກ​ວ່າ ການ​ພົວພັນ​ຄູ່​ຮ່ວມ​ຮອບດ້ານ ຫວຽດນາມ - ສະຫະລັດ​ອາ​ເມ​ລິ​ກາ ບໍ່​ພຽງ​ແຕ່​ຮັບ​ໃຊ້​​ໃຫ້ຜົນ​ປະ​ໂຫຍ​ດລວມ ຂອງ​ປະຊາຊົນ​ສອງ​ປະ​ເທດ​ເທົ່າ​ນັ້ນ ຫາກ​ຍັງ​ປະກອບສ່ວນ​ຮັກສາ​ສັນຕິພາບ ສະຖຽນ​ລະ​ພາບ ການ​ຮ່ວມ​ມື ​ແລະ ຄວາມ​ວັດທະນາ​ຖາວອນ​ໃນພາກ​ພື້ນ ​ແລະ ​ໃນ​ທົ່ວໂລກ... ຫວຽດນາມ​ຊົມ​ເຊີຍ​ສະຫະລັດ​ອາ​ເມ​ລິ​ກາ ​ເປີດ​ກວ້າງ​ການ​ຮ່ວມ​ມື​ກັບອາຊີ - ປາຊີ​ພິກ ​ເພື່ອ​ສັນຕິພາບ ສະຖຽນ​ລະ​ພາບ ການ​ຮ່ວມ​ມື ​ແລະ ການ​ພັດທະນາ​ຢູ່​ໃນ​ພາກ​ພື້ນ. ສອງ​ຝ່າຍ​ກໍ່​ໄດ້​ເຫັນ​ດີ​ ສ້າງ​ຕັ້ງ​ກົນ​ໄກສົນທະນາ​ເປັນ​ປະຈຳ ​ລະຫວ່າງ​ສອງ​ທ່ານລັດຖະມົນ​ຕີ​ວ່າການ​ກະຊວງ​ການ​ຕ່າງປະ​ເທດ; ການສົນທະນາລະຫວ່າງ​ສອງ​ສະພາ​ແຫ່ງ​ຊາດ; ພິຈາລະນາ​ການ​ແລກປ່ຽນ​ຄະນະ​ຜູ້​ແທນ​ຂອງ​ບັນດາ​ອົງການ​ພັກ...

ທາງ​ດ້ານ​ເສດຖະກິດ, ສອງ​ຝ່າຍ​ຖື​ວ່າ ການ​ພົວພັນ​ດ້ານ​ເສດຖະກິດ​ເປັນ​ຈຸດ​ໜັກ​ໃຈກາງ, ​ເປັນ​ຮາກ​ຖານ ​ແລະ ກຳ​ລັງ​ໝູນ ​ທີ່​ຊຸກຍູ້ການ​ພົວພັນ​ລະຫວ່າງ​ສອງ​ປະ​ເທດ​​ໃຫ້​ຂະຫຍາຍຕົວ​ຍິ່ງ​ຂຶ້ນ. ສອງ​ຝ່າຍສົ່ງ​ເສີມ​ບັນດາ​ວິ​ສາ​ຫະກິດ ​ແລະ ນັກ​ລົງທຶນ​ອາ​ເມ​ລິ​ກາ ສືບ​ຕໍ່​ມາ​ທຸລະ​ກິດ​ທຳ​ມາ​ຫາ​ກິນ​ຢູ່​ຫວຽດນາມ, ພິ​ເສດ​ແມ່ນ​ໃນ​ບັນດາ​ຂົງ​ເຂດ​ທີ່ຫວຽດນາມ​ໃຫ້ບຸລິມະສິດ ເຊັ່ນ ​ເຕັກ​ໂນ​ໂລ​ຊີ​ສູງ, ພະລັງງານ, ຜະລິດ​ປຸງ​ແຕ່ງ, ສິ່ງ​ແວດ​ລ້ອມ, ​ເຕັກ​ໂນ​ໂລ​ຊີ​ສື່ສານ, ຫັນ​ການກະສິກຳ​ເປັນ​ອຸດສາຫະກຳ, ພັດທະນາຊັບພະຍາກອນ​ມະນຸດ...

ທ່ານ​ປະທານ​ປະ​ເທດ​ ​ເຈືອງ​ເຕິ​ນຊາງ ​ແລະ ທ່ານ​ປະທານາທິບໍດີ​ ບາຣັກ ​ໂອ​ບາ​ມາ ຢືນຢັນ​ຄຳ​ໝັ້ນ​ສັນຍາ ຈະ​ສຳ​ເລັດ​ການ​ເຈລະຈາ​ກ່ຽວ​ກັບ ສັນຍາວ່າ​ດ້ວຍຄູ່​ຮ່ວມ​ຂ້າມ​ປາ​ຊີ​ຟິກ (Trans-Pacific Partnership -TPP) ຢ່າງຮອບດ້ານ ​ແລະ ມີ​ມາດຕະຖານ​ສູງ ​ໃນ​ໄລຍະ​ເວລາ​ໄວ​ທີ່​ສຸດ​ທີ່​ອາດ​ຈະ​ໄວ​ໄດ້​ໃນ​ປີນີ້... ສອງ​ຝ່າຍ​ກໍ​ໃຫ້​ຄຳ​ໝັ້ນ​ສັນຍາ ຈະ​ຊຸກ​ຍູ້​ກວ່າ​ອີກ​ການ​ພົວພັນດ້ານ​ເສດຖະກິດ ການ​ຄ້າ ​ແລະ ການ​ລົງທຶນ​ທະວິ​ພາຄີ ​ໃນ​ຂອບ​ເຂດ​ຂອງ ສັນຍາ​ວ່າ​ດ້ວຍ​ກອບ​ການ​ຄ້າ​ແລະ​ການ​ລົງທຶນ ​ລະຫວ່າງລັດຖະບານ ສສ ​ຫວຽດນາມ ​ແລະ ລັດຖະບານ​ສະຫະລັດອາ​ເມ​ລິ​ກາ (TIFA) ​ແລະ ບັນດາ​ການຈັດ​ຕັ້ງ​ພາກ​ພື້ນ ​ແລະ ທົ່ວ​ໂລກ ​ເຊັ່ນ​ອາ​ຊຽນ (ASEAN) ອາ​ເປັກ (APEC) ອົງການ​ການ​ຄ້າ​ໂລກ (WTO). ​ໃນ​ໂອກາດ​ນີ້, ວິ​ສາ​ຫະກິດ​ຂອງ​ສອງ​ປະ​ເທດ​ກໍ່​ໄດ້​ພ້ອມ​ກັນເຊັນ​ຂໍ້​ຕົກລົງ​ຈຳນວນ​ໜຶ່ງ.

​ໃນ​ການ​ເຈລະຈາ​ກັບ​ທ່ານປະທານາທິບໍດີ​ ບາຣັກ ​ໂອ​ບາ​ມາ, ​ໃນ​ຄຳ​ປາ​ໄສ​ຢູ່​ທີ່​ສູນ​ຄົ້ນຄວ້າຍຸດ​ທະ​ສາດ ​ແລະ ສາກົນ (CSIS) ​ແລະ ​ໃນ​ການ​ແລກປ່ຽນ​ກັບ​ທ່ານ​ເລຂາທິການ​ໃຫຍ່ ສະຫະ​ປະຊາ​ຊາດ, ທ່ານ​ປະທານ​ປະ​ເທດ​ ​ເຈືອງ​ເຕິ​ນຊາງ ​ໄດ້​ແບ່ງປັນ​ການ​ສັງ​ເກດ ຕີ​ລາຄາ​ປະ​ເມີນ​ຄ່າ ​ກ່ຽວ​ກັບ​ການ​ເຄື່ອນ​ເໜັງ​ຂອງ​ສະພາບ​ການ​ໂລກ ​ແລະ ພາກ​ພື້ນ, ບົດບາດ​ຂອງ​ອາ​ຊຽນ ​ໃນ​ໂຄງ​ປະກອບ​ພາກ​ພື້ນ​ທີ່​ພວມ​ເປັນ​ຮູບ​ເປັນ​ຮ່າງ​ຂຶ້ນ​ໃນ​ປັດຈຸບັນ...

ທ່ານ​ປະທານ​ປະ​ເທດ​ ​ເຈືອງ​ເຕິ​ນຊາງ ຍົກ​ໃຫ້​ເຫັນແຈ້ງວ່າ ການ​ຮັກສາ​ສັນຕິພາບ ສະຖຽນ​ລະ​ພາບ ຄວາມ​ສະຫງົບ​ປອດ​ໄພ​ທາງ​ດ້ານ​ການ​ເດີນ​ທະ​ເລ ຢູ່​ທະ​ເລ​ຕາ​ເວນ​ອອກ ​​ແມ່ນ​ຄວາມ​ເອົາ​ໃຈ​ໃສ່ ​ແລະ ຜົນ​ປະ​ໂຫຍ​ດລວມຂອງ​ບັນດາ​ປະ​ເທດ​ທີ່ຢູ່​ໃນ​ແລະ​ນອກ​ພາກ​ພື້ນ​ນີ້; ບັນດາ​ປະ​ເທດ​ຕ້ອງ​ມີ​ຄວາມ​ຕັ້ງໜ້າ​ພະຍາຍາມ ສະ​ແດງ​ໃຫ້​ເຫັນ​ເຖິງ​ຄວາມ​ຮັບຜິດຊອບ​ຂອງ​ຕົນ​ ໃນການ​ປະຕິບັດ​ຈຸດໝາຍ​ລວ​ມນີ້. ບົນ​ຈິດ​ໃຈ​ດັ່ງ​ກ່າວ, ທ່ານ​ປະທານ​ປະ​ເທດ​ ​ເຈືອງ​ເຕິ​ນຊາງ ​ແລະ ທ່ານປະທານາທິບໍດີ​ ບາຣັກ ​ໂອ​ບາ​ມາ ​ໄດ້​ຢັ້ງຢືນຄືນ​ໃໝ່ຄວາມ​ສະໜັບສະໜູນ ຕໍ່​ກັບ​ການ​ແກ້​ໄຂ​ຄວາມ​ພິພາດ​ຕ່າງໆ ​ດ້ວຍ​ສັນຕິ​ວິທີ, ສອດຄ່ອງ​ກັບ​ກົດໝາຍ​ສາກົນ, ​ໃນນັ້ນມີ​ຂໍ້​ກຳ​ນົດ​ຕ່າງໆ ຂອງ​ອະນຸ​ສັນຍາ​ສະຫະ​ປະຊາ​ຊາດ ວ່າດ້ວຍ​ກົດໝາຍທະເລ ປີ 1982 (UNCLOS), ພ້ອມ​ກັນ​ນັ້ນ​ ກໍ່ຢັ້ງຢືນ​ອີກ​ເທື່ອ​ຄວາມ​ສະໜັບສະໜູນ ຕໍ່​ຫຼັກການບໍ່​ໄຊ້ກຳລັງ​ອາວຸດ ຫຼື​ນາບ​ຂູ່​ໃຊ້​ກຳລັງ​ອາວຸດ​ ເພື່ອ​ແກ້​ໄຂ​ການຊ່ວງ​ຊິງກັນ​ຢູ່ທະ​ເລ ​ແລະ ການ​ຊ່ວງ​ຊິງ​ກັນດ້ານ​ອານາ​ເຂດ.

ທ່ານ​ປະທານ​ປະ​ເທດ​ ​ເຈືອງ​ເຕິ​ນຊາງ ​ແລະ ທ່ານປະທານາທິບໍດີ​ ບາຣັກ ​ໂອ​ບາ​ມາ ​ເນັ້ນ​ໜັກ​ເຖິງ​ຄຸນຄ່າ​ຂອງ​ການ​ປະຕິບັດ​ຕາມ​ຢ່າງ​ຄົບ​ຖ້ວນ ຖະແຫຼງການກ່ຽວກັບວິທີການປະພຶດຂອງບັນດາຝ່າຍ ຢູ່ທະເລຕາເວັນອອກ (DOC), ​ແລະ ຄວາມ​ສຳຄັນ​ຂອງ​ການ​ເລີ່​ມຕົ້ນ​ເຈລະຈາ ​ເພື່ອ​​ເຮັດສຳ​ເລັດປະມວນ​ຂໍ້​ກຳນົດ​ກ່ຽວ​ກັບການປະພຶດຂອງບັນດາຝ່າຍ ຢູ່ທະເລຕາເວັນອອກ (COC) ຢ່າງ​ມີ​ປະສິດທິ​ຜົນ.

ຜົນສຳ​ເລັດ​ທີ່​ພົ້ນ​ເດັ່ນ​ອັນ​ໜຶ່ງ​ອີກ ​ຂອງ​ການ​ຢ້ຽມຢາມ​ຄັ້ງ​ນີ້ ​ແມ່ນ​ການ​ສົມທົບ​ຢ່າງ​ມີ​ປະສິດທິ​ຜົນ​ ລະຫວ່າງ​ການ​ທູດ​ແຫ່ງ​ລັດ ກັບ​ການ​ຕ່າງປະ​ເທດປະຊາຊົນ. ຄຽງ​ຄູ່​ກັບ​ການ​ເຄື່ອນ​ໄຫວ​ເປັນ​ທາງ​ການ​ຂອງ ທ່ານ​ປະທານ​ປະ​ເທດ​ ​ເຈືອງ​ເຕິ​ນຊາງ, ຄະນະ​ຜູ້​ແທນ​ນັກຮົບ​ເກົ່າ ​ແລະ ຄະນະພະ​ເຖລະຂອງ​ຫວຽດນາມທີ່​ໄປ​ນຳ ກໍ່​ໄດ້​ມີ​ການ​ເຄື່ອນ​ໄຫວ​ພົບ​ປະ ພົວພັນ​ເຮັດ​ວຽກ​ໃນ​ເວລາ​ຢູ່​ຢ້ຽ​ມຢາມອາ​ເມ​ລິ​ກາ.

ນອກຈາກ​ການ​ເຮັດ​ວຽກ​ກັບຜູ້ຕາງໜ້າ​ອົງການ ຢູ​ເຊັດ (United States Agency for International Development - USAID), ໜ່ວຍ​ງານ​ສົນທະນາ ອາ​ເມ​ລິ​ກາ - ຫວຽດນາມ ກ່ຽວ​ກັບທາດພິດ​ສີ​ສົ້ມ/ດີ​ໂອ​ຊີ​ນ, ບັນດາ​ນັກຮົບ​ເກົ່າ​ໄດ້​ພົບ​ປະ​ກັບ ນັກຮົບ​ເກົ່າ​ອາ​ເມ​ລິ​ກາ. ບັນດາ​ພະ​ເຖລະ​ຂອງ​ຫວຽດນາມ​ ກໍ​ໄດ້​ດຳ​ເນີນ​ການເຮັດ​ວຽກຢ່າງມີ​ຜົນ​ປະ​ໂຫຍ​ດດີ​ກັບ ​ເຈົ້າ​ໜ້າ​ທີ່​ກະຊວງ​ການ​ຕ່າງປະ​ເທດ, ກັບ​ບັນດາ​ສະມາຊິກ​ສະພາ​ແຫ່ງ​ຊາດ​ອາ​ເມ​ລິ​ກາ ​ແລະ ຜູ້ຕາງໜ້າ​ຂອງ​ບາງອົງການ​ໄຮ້​ລັດຖະບານ ​ເຊັ່ນ ອົງການ​ນິລະ​ໂທດ​ສາກົນ, ອົງການ​ຕິດຕາມ​ການ​ປະຕິບັດ​ສິດທິ​ມະນຸດ...

​ເມື່ອ​ເວົ້າ​​ເຖິງ​ແງ່​ຫວັງຂອງ​ການ​ພົວພັນ​ຫວຽດນາມ - ສະຫະລັດ​ອາ​ເມ​ລິ​ກາ ​ໃນ​ເວລາ​ທີ່​ຈະມາ​ເຖິງ, ທ່ານ​ລັດຖະມົນຕີ​ວ່າການ​ກະຊວງ ຟ້າ​ມບິ່ງ​ມິ​ງ ​ໃຫ້​ຮູ້​ວ່າ, ​ໃນ​ສະ​ເພາະ​ໜ້າ, ວຽກ​ງານ​ການ​ຕ່າງປະ​ເທດ​ຈະ​ໃຫ້​ບຸລິມະສິດ​ຢ່າງ​ສູງ​ແກ່​ການຜັນ​ຂະຫຍາຍ​ມະຕິ​ກອງ​ປະຊຸມ​ໃຫຍ່​ຄັ້ງ​ທີ XI ຂອງ​ພັກ​ ກ່ຽວ​ກັບ​ການ​ເຊື່ອມ​ໂຍງ​ເຂົ້າ​ກັບ​ສາກົນ​ຢ່າງຮອບດ້ານ, ນຳ​ເອົາ​ການ​ພົວພັນ​ກັບ​ບັນດາ​ປະ​ເທດ,​ ເປັນ​ຕົ້ນ​ແມ່ນ​ການ​ພົວພັນ​ກັບ​ບັນດາ​ຄູ່​ຮ່ວ​ມ​ໃຫຍ່ ​ໃນ​ນັ້ນ​ມີ​ສະຫະລັດ​ອາ​ເມ​ລິ​ກາ, ​ເຂົ້າ​ສູ່​ລວງ​ເລິກ, ​ເນື້ອ​ແທ້ ​ແລະ ມີ​ປະສິດທິ​ຜົນ​ກວ່າ​ອີກ. ຫວຽດນາມສືບ​ຕໍ່​ຖື​ວ່າ ສະຫະລັດ​ອາ​ເມ​ລິ​ກາ​ເປັນ​ຄູ່​ຮ່ວມ​ສຳຄັນ​ອັນ​ດັບ​ໜຶ່ງ ​ແລະ ສະຫະລັດ​ອາ​ເມ​ລິ​ກາກໍ່​​ໃຫ້​ຄວາມ​ສຳຄັນ​ຕໍ່ ຫວຽດນາມໃນນະໂຍບາຍພາກພື້ນ.

ບົນພື້ນຖານດັ່ງກ່າວນັ້ນ, ໃນເວລາທີ່ຈະມາເຖິງ ການພົວພັນຫວຽດນາມ - ສະຫະລັດ​ອາ​ເມ​ລິ​ກາ ຈະ​ສືບ​ຕໍ່​ຮັກສາ​ທ່ວງທ່າພັດທະນາ ​ແລະ ມີ​ບາດກ້າວ​ຂະ​ຫຍາ​ຍຕົວ​ໃໝ່, ​ເນື້ອ​ໃນ​ຮ່ວ​ມມື​ໃນ​ແຕ່​ລະ​ຂົງ​ເຂດຈະ​ເຂົ້າ​ສູ່​ລວງ​ເລິກ ດ້ວຍ​ປະສິດທິ​ຜົນ​ສູງ​ກວ່າ​ເກົ່າ ນັບ​ທັງ​ທາງ​ດ້ານ​ຮ່ວມ​ມື​ທະວິ​ພາຄີ ​ແລະ ພະຫຸ​ພາຄີ, ​ໃນ​ບັນດາ​ບັນຫາ​ພາກ​ພື້ນ ​ແລະ ທົ່ວ​ໂລກ.../.

ແຫຼ່ງຂ່າວ: TTXVN

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ