ວັນອາທິດ, 22/9/2019
ກອງປະຊຸມສູນກາງພັກກອມມູນິດຫວຽດນາມ ຄັ້ງທີ 8 ສະໄໝທີ XI: ຕັດສິນຕົກລົງຫຼາຍບັນຫາທີ່ສຳຄັນ
15/11/2013 12:3' ສົ່ງ ພິມ
ພາບວາລະອັດກອງປະຊຸມຄັ້ງທີ 8 ຄະນະບໍລິຫານງານສູນກາງພັກ ສະໄໝທີ XI. ພາບ: TTXVN

ໂດຍ​ປະຕິບັດ​ຕາມໂຄງການ​ເຮັດ​ວຽກທົ່ວ​ສະ​ໄໝ, ​ແຕ່​ວັນ​ທີ 30 ກັນຍາ ຫາ​ວັນ​ທີ 9 ຕຸລາ 2013, ຢູ່​ທີ່​ນະຄອນ​ຮ່າ​ໂນ້ຍ, ຄະນະ​ບໍລິຫານ​ງານ​ສູນ​ກາງ ພັກກອມ​ມູນິດ​ຫວຽດນາມ ສະ​ໄໝ​ທີ XI ​ໄດ້​ດຳ​ເນີນ​ກອງ​ປະຊຸມ​ຄັ້ງ​ທີ 8 ​ເພື່ອປຶກສາ​ພິຈາລະນາ, ​ໃຫ້​ຄວາມ​ເຫັນ​ກ່ຽວ​ກັບ: ສະພາບ​ການ​ເສດຖະກິດ - ສັງຄົມ​ປີ 2013, ​ແຜນການ​ພັດທະນາ​ເສດຖະກິດ - ສັງຄົມ​ປີ 2014; ສະພາບ​ການ​ປະຕິບັດ​ ມະຕິ​ກອງ​ປະຊຸມ​ໃຫຍ່​ຄັ້ງທີ XI ຂອງ​ພັກ ກ່ຽວ​ກັບ​​ເສດຖະກິດ - ສັງຄົມ; ປ່ຽນ​ແປງ​ໃໝ່​ການ​ສຶກສາ - ກໍ່ສ້າງ​ ຢ່າງ​ພື້ນຖານ ຮອບດ້ານ; ຮ່າງ​ດັດ​ແປງ​ລັດຖະທຳ​ມະນູນ​ປີ 1992; ສະຫຼຸບ​ສັງ​ລວມ 10 ປີ ​ແຫ່ງ​ການ​ປະຕິບັດ​ມະຕິ​ສູນ​ກາງ​ພັກ​ຄັ້ງ​ທີ 8 ສະ​ໄໝ​ທີ IX ກ່ຽວ​ກັບ​ແຜນຍຸດ​ທະ​ສາດ​ປົກ​ປັກ​ຮັກສາ​ປະ​ເທດ​ຊາດ ​ໃນ​ສະພາບ​ການ​ໃໝ່ ​ແລະ ບັນຫາ​ສຳຄັນ​ຈຳນວນ​ໜຶ່ງ ທີ່​ມີ​ຄວາມ​ພົວພັນ​ເຖິງວຽກ​ງານ​ກໍ່ສ້າງ​ພັກ.

ສະຫາຍ​ເລຂາ​ທິການ​ໃຫຍ່ ຫງວຽນ​ຝູຈ້ອງ ​ເປັນ​ປະທານ​ກອງ​ປະຊຸມ ​ໄດ້​ກ່າວ​ຄຳ​ປາ​ໄສ​ໄຂ​ກອງ​ປະຊຸມ ​ແລະ ອັດ​ກອງ​ປະຊຸມ.

1- ຄະນະ​ບໍລິຫານ​ງານ​ສູນ​ກາງພັກ ​ໄດ້​ປຶກສາ​ພິຈາລະນາ ​ແລະ ອອກ​ຄຳ​ສະຫຼຸບ​ຫ່ຽວ​ກັບ​ສະພາບ​ການ​ເສດຖະກິດ - ສັງຄົມ​ປີ 2013 ​ແລະ ຈຸດໝາຍ ໜ້າ​ທີ່​ພັດທະນາ​ເສດຖະກິດ - ສັງຄົມ​ປີ 2014; ສະພາບ​ການ​ປະຕິບັດ​ ມະຕິ​ກອງ​ປະຊຸມ​ໃຫຍ່​ຄັ້ງທີ XI ຂອງ​ພັກ ກ່ຽວ​ກັບ​​ເສດຖະກິດ - ສັງຄົມ ​ເຊິ່ງຈຸດ​ໜັກ​ແມ່ນ​ປະຕິບັດສາມ​ຂອດ​ບຸກທະລຸ​ຍຸດ​ທະ​ສາດ ຕິດ​ແໜ້ນ​ກັບ​ການ​ປ່ຽນ​ແປງ​ຄືນໃໝ່​ໂຄງ​ປະກອບ​ເສດຖະກິດ, ປ່ຽນ​ແປງ​​ໃໝ່​ຕົວ​ແບບ​ເຕີບ​ໂຕ​ເສດຖະກິດ ​ແລະ ໜ້າ​ທີ່, ວິທີ​ແກ້​ໃນ​ສະ​ເພາະ​ໜ້າ.

2- ຄະນະ​ບໍລິຫານ​ງານ​ສູນ​ກາງພັກ ​ໄດ້​ປຶກສາ​ພິຈາລະນາ ​ແລະ ອອກ​ມະຕິຕົກລົງວ່າ​ດ້ວຍ​ການ​ປ່ຽນ​ແປງ​ໃໝ່​ການ​ສຶກສາ - ກໍ່ສ້າງ ​ຢ່າງ​ພື້ນຖານ ຮອບດ້ານ ​ເພື່ອ​ຕອບ​ສະໜອງຄວາມ​ຮຽກຮ້ອງ​ຕ້ອງການ ຂອງ​ການ​ຫັນ​ເປັນ​ອຸດສາຫະກຳ ທັນ​ສະ​ໄໝ ​ໃນ​ເງື່ອນ​ໄຂ​ເສດຖະກິດ​ຕະຫຼາດ​ຕາມ​ທິດ​ສັງຄົມ​ນິຍົມ ​ແລະ ​ເຊື່ອມ​ໂຍງ​ເຂົ້າ​ກັບ​ສາກົນ. ຄະນະ​ບໍລິຫານ​ງານ​ສູນ​ກາງພັກ ກຳນົດບາງໜ້າທີ່ ວິທີການປ່ຽນແປງໃໝ່ການສຶກສາ - ກໍ່ສ້າງ ຢ່າງພື້ນຖານ ຮອບດ້ານ ນັ້ນຄື: ເພີ່ມທະວີການນຳພາຂອງພັກ ແລະ ການຄຸ້ມຄອງຂອງລັດ ຕໍ່ກັບຂະບວນວິວັດປ່ຽນແປງໃໝ່ການສຶກສາ; ສືບຕໍ່ປ່ຽນແປງໃໝ່ຢ່າງແຂງແຮງ ແລະ ຄົບຊຸດ ບັນດາປັດໃຈພື້ນຖານ ຂອງຫຼັກສູດການສຶກສາ ຕາມທິດພັດທະນາຄຸນທາດ ແລະ ຄວາມສາມາດຂອງຜູ້ຮຽນ; ປ່ຽນແປງໃໝ່ໂດຍພື້ນຖານຮູບການ ແລະ ວິທີກວດກາ ສອບເສງ ແລະ ປະເມີນຄ່າຄຸນນະພາບການສຶກສາ, ຮັບປະກັນຄວາມຊື່ສັດ ພາວະວິໄສ ຊັດເຈນ ຕາມຄວາມຕ້ອງການຂອງການພັດທະນາຄຸນທາດ ແລະ ຄວາມສາມາດຂອງຜູ້ຮຽນ; ປັບປຸງບູລະນະລະບົບສຶກສາແຫ່ງຊາດ ຕາມທິດພັດທະນາລະບົບການສຶກສາເປີດ ຮ່ຳຮຽນຕະຫຼອດຊີວິດ ແລະ ສ້າງສັງຄົມຮ່ຳຮຽນ; ປ່ຽນແປງໃໝ່ໂດຍພື້ນຖານວຽກງານຄຸ້ມຄອງການສຶກສາ, ຮັບປະກັນປະຊາທິປະໄຕ ເປັນເອກະພາບ; ເພີ່ມຕື່ມສິດເປັນເຈົ້າຕົນເອງ ແລະ ຄວາມຮັບຜິດຊອບສັງຄົມ ຂອງບັນດາພື້ນ​ຖານ​ການ​ສຶກສາ; ​ໃຫ້​ຄວາມ​ສຳຄັນ​ແກ່​ການ​ຄຸ້ມ​ຄອງ​ຄຸນ​ນະພາ​ບ.

3- ຄະນະ​ບໍລິຫານ​ງານ​ສູນ​ກາງພັກ ​ໄດ້​ປຶກສາ​ພິຈາລະນາກ່ຽວ​ກັບ​ຮ່າງ​ດັດ​ແປງ​ລັດຖະທຳ​ມະນູນ​ປີ 1992, ​ໃຫ້​ຄວາມ​ຄິດ​ເຫັນ​ກ່​ຽວກັບບາງ​​ເນື້ອ​ໃນ​ທີ່​ສຳຄັນ ​ເຊັ່ນ: ກ່ຽວ​ກັບ​ບົດບາດນຳ​ພາ​ຂອງ​ພັກ; ກ່ຽວ​ກັບ​ບົດບາດ​ທີ່​ຕັ້ງ​ຂອງ​ກຳມະບານ​ຫວຽດນາມ; ກ່ຽວ​ກັບ​ພາກສ່ວນ​ເສດຖະກິດ; ກ່ຽວ​ກັບ​ການ​ທ້ອນ​ໂຮມ​ຄືນ​ທີ່​ດິນ; ກ່ຽວ​ກັບ​ຂໍ້ກຳນົດການລົງ​ຄະ​ແນນ​ສຽງ​ໄວ້​ວາງ​ໃຈ ຕໍ່​ຜູ້ດຳລົງ​ຕຳ​ແໜ່​ງ​ໂດຍ​ສະພາ​ແຫ່ງ​ຊາດ​ເລືອກ​ຕັ້ງ ຫຼື ​ໃຫ້​ສັດຕະຍະ​ບັນ; ກ່ຽວ​ກັບ​ອຳນາດ​ການ​ປົກຄອງ​ທ້ອງຖິ່ນ; ກ່ຽວ​ກັບ​ສະພາ​ລັດຖະທຳ​ມະນູນ; ​ແລະ ບາງ​ເນື້ອ​ໃນ​ອື່ນທີ່​ສຳຄັນ. ຄະນະ​ບໍລິຫານ​ງານ​ສູນ​ກາງພັກ ອອກ​ຄຳ​ສະຫຼຸບກ່ຽວ​ກັບການ​ບູລະນະ​ຮ່າງ​ດັດ​ແປງ​ລັດຖະທຳ​ມະນູນ​ປີ 1992 ​ເພື່ອ​ໃຫ້​ສະພາ​ແຫ່ງ​ຊາດ​ຮັບຮອງ​ຜ່ານ ​ໃນ​ທີ່​ກອງ​ປະຊຸມ​ສະ​ໄໝ​ສາມັນ​ເທື່ອ​ທີ 6 ຈະ​ເຖິງ​ນີ້.

4- ຄະນະ​ບໍລິຫານ​ງານ​ສູນ​ກາງພັກ ​ໄດ້​ພິຈາລະນາ ປຶກສາ​ສົນທະນາ ປະ​ເມີນ​ຄ່າ​ໝາກຜົນ 10 ປີ ​ແຫ່ງ​ການ​ປະຕິບັດ​ມະຕິ​ສູນ​ກາງ​ພັກ​ຄັ້ງ​ທີ 8 ສະ​ໄໝ​ທີ IX ກ່ຽວ​ກັບ​ແຜນຍຸດ​ທະ​ສາດ​ປົກ​ປັກ​ຮັກສາ​ປະ​ເທດ​ຊາດ ​ໃນ​ສະພາບ​ການ​ໃໝ່. ຄະນະ​ບໍລິຫານ​ງານ​ສູນ​ກາງພັກ ວິ​ໄຈ​ໄຈ້​ແຍກ​ຢ່າງ​ເລິກ​ເຊິ່ງສະພາບ​ການ​ສາກົນ, ຄາດ​ຄະ​ເນ​ທ່າ​ອຽງ​ຂະຫຍາຍຕົວ ຂອງ​ບັນດາ​ບັນຫາ​ສາ​ກົນ ພາກ​ພື້ນ ​ແລະ ​ໃນ​ປະ​ເທດ; ກຳນົດສາ​ເຫດ, ​ເປັນ​ຕົ້ນ​ແມ່ນ​ສາ​ເຫດ​ອັດຕະວິ​ໄສ​ຂອງ​ຄວາມ​ຂາດ​ຕົກ​ບົກພ່ອງ; ສຸມ​ໃສ່​ປຶກສາ​ພິຈາລະນາ​ບັນດາ​ໜ້າ​ທີ່ ວິທີ​ແກ້ ​ເພື່ອ​ສືບ​ຕໍ່ປະຕິບັດ​ເປັນ​ຢ່າງ​ດີ ​ແຜນ​ຍຸດ​ທະ​ສາດກໍ່ສ້າງ ​ແລະ ປົກ​ປັກ​ຮັກສາ​ປະ​ເທດ​ຊາດ​ໃນ​ສະພາບ​ການ​ໃໝ່. ຄະນະ​ບໍລິຫານ​ງານ​ສູນ​ກາງພັກ ​ເປັນ​ເອກະ​ພາບ​ປະກາດ​ໃຊ້​ມະຕິ​ ວ່າ​ດ້ວຍຍຸດ​ທະ​ສາດປົກ​ປັກ​ຮັກສາ​ປະ​ເທດ​ຊາດ ​ໃນ​ສະພາບ​ການ​ໃໝ່.

5- ຄະນະ​ບໍລິຫານ​ງານ​ສູນ​ກາງພັກ ​ໄດ້​ພິຈາລະນາ ຕົກລົງ​ບາງ​ບັນຫາ​ສຳຄັນ ​ກ່ຽວກັບ​ວຽກ​ງານ​ກໍ່ສ້າງ​ພັກ: ປຶກສາ​ພິຈາລະນາ ​ໃຫ້​ຄວາມ​ເຫັນ​ເບື້ອງ​ຕົ້ນ ກ່ຽວ​ກັບ​ຂໍ້​ກຳນົດ​ການ​ເລືອກ​ຕັ້ງ​ຢູ່ໃນ​ພັກ; ຕົກລົງ​ສ້າງ​ຕັ້ງ​ບັນດາ​ອະນຸ​ກຳມະການ​ກະກຽມ​ ກອງ​ປະຊຸມ​ໃຫຍ່​ຄັ້ງ​ທີ XII ຂອງ​ພັກ ​ແລະ ບາງ​ບັນຫາ​ອື່ນ​ທີ່​ສຳຄັນ.

ຄະນະ​ບໍລິຫານ​ງານ​ສູນ​ກາງພັກ ຮຽກຮ້ອງ​ທົ່ວ​ພັກ ທົ່ວ​ປວງຊົນ ທົ່ວ​ກອງທັບ ຈົ່ງຮັດ​ແໜ້ນ​ຖັນ​ແຖວ ​ເພິ່ມທະວີ​ຄວາມ​ສາມັກຄີ​ເປັນ​ເອກະ​ພາບ, ​ເສີມ​ຂະຫຍາຍ​ຜົນສຳ​ເລັດ​ທີ່​ຍາດ​ມາ​ໄດ້, ກຳຈັດ​ດັດ​ແກ້ສິ່ງຄົງຄ້າງ ຂໍ້​ຂາດ​ຕົກ​ບົກພ່ອງ; ຕັ້ງໜ້າ​ສູ້​ຊົນ​ຜ່ານ​ຜ່າ​ຄວາມ​ຫຍຸ້ງຍາກ ສິ່ງ​ທ້າ​ທາຍ, ປະຕິບັດ​ຢ່າງ​ສຳ​ເລັດ​ມີ​ໄຊ ​ບັນດາ​ມະຕິ ຂໍ້ສະຫລຸບ​ຂອງ​ກອງ​ປະຊຸມສູນ​ກາງ​ຄັ້ງ​ທີ 8, ມະຕິ​ກອງ​ປະຊຸມ​ສູນ​ກາງ​ຄັ້ງ​ທີ 4 ສະ​ໄໝ​ທີ XI ກ່ຽວ​ກັບ​ການ​ກໍ່ສ້າງ​ພັກ ​ແລະ ມະຕິ​ກອງ​ປະຊຸມ​ໃຫຍ່​ຄັ້ງທີ XI ຂອງ​ພັກ, ສູ້​ຊົນ​ປະຕິບັດ​ຢ່າງ​ສຳ​ເລັດ​ມີ​ໄຊ ຈຸດໝາຍ ໜ້າ​ທີ່​ພັດທະນາ​ເສດຖະກິດ - ສັງຄົມ​ປີ 2013 ​ແລ​ະ ບັນດາ​ປີ​ຕໍ່ໆ​ໄປ, ສ້າງ​ຮາກຖານ​ເພື່ອ​ເຖິງ​ປີ 2020 ຫວຽດນາມ ສາມາດກາຍ​ເປັນ​ປະ​ເທດ​ອຸດສາຫະກຳ​ ຕາມ​ທິດ​ທັນ​ສະ​ໄໝໂດຍ​ພື້ນຖານ./.

                                                    ສັງ​ລວມ​ໂດຍ HB

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ