ວັນຈັນ, 18/11/2019
ຮັດແໜ້ນ, ຊຸກຍູ້ການພົວພັນຮ່ວມມື ລະຫວ່າງຫວຽດນາມ ກັບຮຸງກາຣີ ແລະ ເດນໝາກ
20/11/2013 10:7' ສົ່ງ ພິມ
ພະນາງກະສັດ ເດນໝາກ ມາກາເຣັດ ທີສອງ ຕ້ອນຮັບທ່ານປະທານປະເທດ ສສ ຫວຽດນາມ ເຈືອງເຕິນຊາງ. ພາບ: nhandan.com.vn

ການ​ໄປ​ຢ້ຽມຢາມ​ຂັ້ນ​ລັດ​ຄັ້ງ​ນີ້ ​ແມ່ນ​ໄດ້​ດຳ​ເນີນ​ພາຍຫຼັງ 10 ປີ ​ແຫ່ງ​ການ​ໄປ​ຢ້ຽມ​ຢາມ​ຂອງ​ປະທານ​ປະ​ເທດ​ຫວຽດນາມ ​ຢູ່​ຮຸງ​ກາຣີ ​ເຊິ່ງ​ເປັ​ນປະ​ເທດ​ທີ່​ມີ​ການ​ພົວພັນ​ອັນ​ເປັນ​ມູນ​ເຊື້ອ​ກັບປະ​ເທດ​ຫວຽດນາມ ​ແລະ ພວມ​ຜັນ​ຂະຫຍາຍ​ນະ​ໂຍບາຍຫັນ​ສູ່​ທິດຕາ​ເວນ​ອອກ, ​ໃນ​ນັ້ນ​ໄດ້​ຖື​ການ​ພົວພັນ​ກັບຫວຽດນາມ ​ເປັນບຸລິມະສິດ​ຢູ່​​ໃນ​ພາກ​ພື້ນ.

ສຳລັບ​ປະ​ເທດ​ເດນ​ໝາກ, ນີ້​ເປັນ​ການ​ໄປ​ຢ້ຽມຢາມ​ຄັ້ງ​ທຳ​ອິດ​ຂອງ​ປະທານ​ປະ​ເທດ​ຫວຽດນາມ ​ໃນ​ເວລາ​ທີ່​ການ​ພົວພັນ​ລະຫວ່າງ​ສອງ​ປະ​ເທດ​ ພວມ​ຢູ່​ໃນ​ທ່ວງທ່າ​ພັດທະນາ​ຢ່າງ​ແຂງ​ແຮງ. ສອງ​ປະ​ເທດ​ໄດ້​ສ້າງ​ຕັ້ງ​ການ​ພົວພັນ​ຄູ່​ຮ່ວມ​ຍຸດ​ທະ​ສາດ ​ໃນ​ຂົງ​ເຂດການປ່ຽນແປງສະພາບ​ດິນ​ຟ້າ​ອາກາດ, ພະລັງງານ, ສິ່ງ​ແວດ​ລ້ອ​ມ ​ແລະ ການ​ເຕີບ​ໂຕ​ສີຂຽວ. ​ເດນ​ໝາກ​ເປັນ​ປະ​ເທດ​ໜຶ່ງ​ໃນ​ບັນດາ​ປະ​ເທດ​ທີ່​ສະໜອງ​ທຶນ ODA ຊ່ວຍ​ເຫຼືອ​ລ້າ​ຫຼາຍ​ກວ່າ​ໝູ່​ໃຫ້​ຫວຽດນາມ. ທັງ​ຮຸງ​ກາຣີ ​ແລະ ​ເດນ​ໝາກ ລ້ວນ​ແຕ່​ເປັນ​ຄູ່​ຮ່ວມ​ທີ່​ສຳຄັນ​ຂອງ​ຫວຽດນາມ​ຢູ່​​ເອີຣົບ. ​ໃນ​ສະພາບ​ການ​ດັ່ງກ່າວ​ນັ້ນ, ການ​ໄປ​ຢ້ຽມຢາມ​ສອງ​ປະ​ເທດ​ຂອງ​ທ່ານ​ປະທານ ​ເຈືອງ​ເຕິ​ນຊາງ ​ໄດ້​ຮັດ​ແໜ້ນກວ່າ​ອີກ ສາຍ​ພົວພັນ​ທະວິ​ພາຄີ, ຊຸກຍູ້​ການ​ຮ່ວມ​ມື​ໃນຫຼາຍ​ຂົງ​ເຂດ ພິ​ເສດ​ແມ່ນ​ເສດຖະກິດ ການ​ຄ້າ ​ແລະ ​ການ​ລົງທຶນ.

ຢູ່​ໃນ​ການ​ພົບ​ປະ​ປຶກສາ​ຫາລື​ຕ່າງໆ, ການ​ນຳຂອງ​ສອງ​ປະ​ເທດ​ໄດ້​ຕີ​ລາຄາ​ສູງ​ບົດບາດ ​ແລະ ຖານະ​ທີ່​ຕັ້ງ​ຂອງ​ຫວຽດນາມ​ ຢູ່​ໃນ​ພາກ​ພື້ນ​ອາຊີ​ອາຄະ​ເນ, ຖື​ວ່າ​ຫວຽດນາມ​ເປັ​ນຄູ່​ຮ່ວມໜຶ່ງ ທີ່​ບຸລິມະສິດຊຸກຍູ້​ການ​ຮ່ວມ​ມື. ຢູ່​ຮຸງ​ກາຣີ, ສອງ​ຝ່າຍ​ໄດ້​ອອກ​ຖະ​ແຫຼ​ງການ​ຮ່ວມ​ກ່ຽວ​ກັບ​ການ​ຢ້ຽມຢາມ, ວາງ​ບັນດາ​ຫຼັກການ​ການ​ເມືອງ​ທີ່​ສຳຄັນ​ອອກ​ມາ ​ເພື່ອ​ເປັນ​ພື້ນຖານ​ໃຫ້​ແກ່​ການສືບ​ຕໍ່​ເພິ່ມທະວີ​ ການ​ຮ່ວມ​ມື​ມິດຕະພາບ​ອັນ​ເປັນ​ມູນ​ເຊື້ອ ລະ​ຫວ່າງ​ສອງ​ປະ​ເທດ​ໃນ​ສະພາບ​ການ​ໃໝ່. ຢູ່​ເດນ​ໝາກ, ການ​ຢ້ຽ​ມຢາມມີ​ຄວາມ​ໝາຍ​ປະຫວັດສາດ ​ເມື່ອສອງ​ປະ​ເທດ​ໄດ້​ເຊັນ​ຖະ​ແຫຼ​ງການ​ຮ່ວມ ກ່ຽວ​ກັບ​ການສ້າງ​ຕັ້ງ​ສາຍ​ພົວພັນ​ຄູ່​ຮ່ວມ​ຮອບ​ຕ້ານ​ນຳ​ກັນ.

​ໃນ​ການ​ໄປ​ຢ້ຽມຢາມ​ສອງ​ປະ​ເທດ, ​​ມີ​ຫຼາຍເອກະສານ​ການ​ຮ່ວມ​ມືອັນ​ສຳຄັນ​ໃນ​ຂົງ​ເຂດ​ຕ່າງໆ ​ໄດ້​ຮັບ​ການ​ເຊັນ​ກັນ ​ເຊັ່ນ: ຄວາມ​ສະຫງົບ, ບຸລິມະສິດ​ການ​ສິນ​ເຊື່ອ, ​ການ​ຜະລິດໄຟ​ຟ້າດ້ວຍ​ລົມ, ການ​ກະສິກຳ​ປູກ​ແລະ​ລ້ຽງ​ສິນ​​ໃນ​ນ້ຳ​ແບບ​ຍືນ​ຍົງ, ຄຸ້ມ​ຄອງ​ແຫຼ່ງນ້ຳ, ການ​ສຶກສາ - ກໍ່ສ້າງ, ວັດທະນະທຳ - ກິລາ,… ສ້າງ​ພື້ນຖານນິຕິ​ກຳ​​ ໃຫ້​ແກ່​ການ​ຊຸກຍູ້​ການ​ຮ່ວມ​ມື​ກວ້າງຂວາງ​ກວ່າ​ອີກ​ ໃນ​ຂົງ​ເຂດ​ເຫຼົ່າ​ນີ້. ທ່ານ​ປະທານ ​ເຈືອງ​ເຕິ​ນຊາງ ​ໄດ້​ສຸມ​ໃສ່​ປຶກສາ​ຫາລື​ກັບ​ການ​ນຳ​ຂັ້ນ​ສູງ ຂອງ​ບັນດາ​ປະ​ເທດ​ຄູ່​ຮ່ວມ​ນີ້ ກ່ຽວກັບທິດ​ທາງ​ໃຫຍ່​ຕ່າງໆ​ ແນ​ໃສ່​ຍົກມູນ​ຄ່າ​ການ​ຄ້າ​​ໃຫ້​ສູງຂຶ້ນ ​ແລະ ​ເປີດ​ກວ້າງ​ປະ​ເພດ​ສິນຄ້າ​ຂາ​ອອກ​ຂາ​ເຂົ້າ​ໃຫ້​ແກ່​ກັນ, ສືບ​ຕໍ່​ເປີດ​ກວ້າງ ​ແລະ ຍູ້​ແຮງການ​ປະຕິບັດ​ບັນດາ​ໂຄງການ FDI, ODA ຢູ່​ຫວຽດນາມ ກໍ່​ຄື​ຄວາມ​ສາມາດ​ລົງທຶນ​ ຂອງ​ບັນດາ​ວິ​ສາຫະກິດ ຫວຽດນາມ ​ໃນ​ການ​ລົງທຶນ​ຢູ່​ສອງ​ປະ​ເທດ​ນີ້. ​ເດນ​ໝາກ​ຢັ້ງຢືນ​ຄຳ​ໝັ້ນ​ສັນຍາ ປະຕິບັດ​ຍຸດ​ທະ​ສາດ​ເພີ່ມ​ທະວີ​ຕະຫຼາດ ຕໍ່​ກັບ​ຫວຽດນາມ ​ເຊິ່ງ​ເປັນ​ໜຶ່ງ​ໃນ 10 ພື້ນຖານ​ເສດຖະກິດ​ທີ່​ມີ​ແງ່​ຫວັງ​ດີ​ໃນ​ໂລກ ທີ່​ເດນ​ໝາກຄັດ​ເລືອກ​ເພື່ອ​ຜັນ​ຂະ​ຫຍາຍ​ຍຸດ​ທະ​ສາດ​ນີ້. ​ໃນ​ແຕ່ລະ​ປະ​ເທດ, ​ເວທີ​ປາໄສວິ​ສາ​ຫະກິດ​ໄດ້​ດຳ​ເນີນ​ໄປ​ຢ່າງ​ສຳ​ເລັດ​ຜົນ ​ໂດຍ​ມີ​ການ​ເຂົ້າ​ຮ່ວມຂອງ​ຫຼາຍໆ ວິ​ສາ​ຫະກິດທີ່​ຊອກ​ຮູ້​ເງື່ອນ​ໄຂ​ໂອກາດ ​ແລະ ສິ່ງ​ແວດ​ລ້ອມ​ເພື່ອ​ລົງທຶນ, ຂາ​ອອກ​ຂາ​ເຂົ້າ​ສິນຄ້າ...

ມີ​ຫຼາຍ​ວິ​ສາ​ຫາ​ກິດ​ຂອງ​ຮຸງ​ກາຣີ ​​ແລະ​ ເດນ​ໝາກ​ ໄດ້​ເອົາ​ໃຈ​ໃສ່​ທີ່​ສຸດ ​ແລະ ຖື​ວ່າ​ຫວຽດນາມ​ເປັນ​ສະຖານ​ທີ່​ລົງທຶນ, ທຸລະ​ກິດ​ທີ່​ຈັບ​ໃຈ. ບັນດາ​ວິ​ສາ​ຫະກິດ​ຫວຽດນາມ​ ໄດ້​ເຊັນ​ຂໍ້​ເຕົກລົງການ​ຮ່ວມ​ມື​ຫຼາຍ​ສະບັບ ກັບ​ບັນດາ​ຄູ່​ຮ່ວມ​ເດນ​ໝາກ ​ກ່ຽວ​ກັບ​ບັນດາ​ຂົງ​ເຂດ​ເຊັ່ນ ອຸປະກອນ​ກໍ່ສ້າງ, ປະ​ຢຸກ​ໃຊ້​ເຕັກ​ໂນ​ໂລ​ຊີ​ຂຽວ, ການ​ເງິນ - ທະນາຄານ … ຄຽງ​ຂ້າງ​ນັ້ນ, ທ່ານ​ປະທານ​ປະ​ເທດ ​ເຈືອງ​ເຕິ​ນຊາງ ກໍ່​ໄດ້ປຶກສາ​ສົນທະນາ​ກັບ​ການ​ນຳ​ຂອງ​ສອງ​ປະ​ເທດ ກ່ຽວ​ກັບ​ການ​ຊຸກຍູ້​ການ​ຮ່ວມ​ມື​ໃນ​ບາງ​ຂົງ​ເຂດ ບົນ​ພື້ນຖານ​ທ່າ​ແຮງ ​ແລະ ຄວາມ​ຕ້ອງການ​ຂອງ​ແຕ່ລະ​ຝ່າຍ. ຮຸງ​ກາຣີ ຢືນຢັນຈະ​ສືບ​ຕໍ່​ເພີ່ມ​ທະວີ​ການ​ຮ່ວມ​ມື​ກັບ​ຫວຽດນາມ ​ໃນ​ຂົງ​ເຂດ​ເພສັດຊະກຳ, ຊ່ວຍ​ເຫຼືອ​ຫວຽດນາມ​ໃນ​ການ​ກໍ່ສ້າງ​ຜູ້​ຊຳນານ​ງານ​ດ້ານ​ພະລັງງານ​ປະລະມະ​ນູ.

​ໃນ​ການ​ປົກ​ປັກ​ຮັກສາ​ສິ່ງ​ແວດ​ລ້ອມ ​ແລະ ຮັບ​ມື​ກັບ​ການ​ປ່ຽນ​ແປງສະພາບ​ດິນ​ຟ້າອາກາດ - ຂົງ​ເຂດ​ທີ່ທັງ​ຮຸງ​ກາຣີ ​ແລະ ​ເດ​ນໝາກ ລ້ວນ​ແຕ່​ມີ​ທ່າ​ແຮງ, ຫວຽດນາມ​ ແລະ ສ​ອງປະ​ເທດ​ນີ້ ​ໄດ້​ແລກປ່ຽນ​ກັນ​ກ່ຽວ​ກັບບົດຮຽນ​ປະສົບ​ການ, ຄວາມ​ສາມາດ​ຮ່ວມ​ມື ​ແລະ ​ໄດ້​ບັນລຸ​ເຖິງ​ຂໍ້​ຕົກລົງ​ທີ່​ສຳຄັນ​ຕ່າງໆ ​ເຊັ່ນ ຂໍ້​ຕົກລົງ​ລະຫວ່າງ​ສອງ​ລັດຖະບານ​ຫວຽດນາມ ​ແລະ ຮຸງ​ກາຣີ ກ່ຽວ​ກັບ​ການ​ຮ່ວມ​ມື​ໃນ​ຂົງ​ເຂດ​ຄຸ້ມ​ຄອງ​ແຫຼ່ງນ້ຳ; ​ເດນ​ໝາກ​ໃຫ້​ຄຳ​ໝັ້ນ​ສັນຍາ​ຈະ​ສືບ​ຕໍ່​ສະໜອງທຶນ ODA ​ໃຫ້​ຫວຽດນາມ​ ​ເພື່ອ​ໃຊ້ໃນບັນດາ​ຂົງ​ເຂດຮັບ​ມື​ກັບ​ການ​ປ່ຽນ​ແປງສະພາບ​ດິນ​ຟ້າ​ອາກາດ, ພະລັງງານ ສະອາດ, ພະລັງງານ​ສ້າງ​ຂຶ້ນຄືນ​ໃໝ່​… ບົນ​ພື້ນຖານ​ກອບ​ການ​ພົວພັນຄູ່​ຮ່ວມ​ຍຸດ​ທະ​ສາດ ​ໃນ​ຂົງ​ເຂດ​ການ​ປ່ຽນ​ແປງສະພາບ​ດິນ​ຟ້າ​ອາກາດ, ສິ່ງ​ແວດ​ລ້ອມ, ພະລັງງານ ​ແລະ ການ​ເຕີບ​ໂຕ​ສີຂຽວ ​ເຊິ່ງ​ໄດ້​ຮັບ​ການ​ສ້າງ​ຕັ້ງ​ຂຶ້ນ ​ແລະ ຜັນ​ຂະຫຍາຍ​ຢ່າງ​ມີ​ປະສິດທິ​ຜົນ ​ແຕ່​ເດືອນ​ພະຈິກ ປີ 2011. ນອກຈາກ​ນັ້ນ, ​ທັງ​ຮຸງ​ກາຣີ ​ແລະ ​ເດນ​ໝາກ ລ້ວນ​ແຕ່​ໄດ້​ເປັນ​ເອກະ​ພາບ​ເພິ່ມທະວີ​ການ​ພົວພັນ​ກັບ​ຫວຽດນາມ ຢູ່​ໃນ​ບັນດາ​ເວທີ​ປາ​ໄສ, ອົງການ​ຈັດ​ຕັ້ງ​ສາກົນ ​ແລະ ພາກ​ພື້ນ ​ເຊັ່ນ ​ສະຫະ​ປະຊາ​ຊາດ, ​ເວທີ​ປາ​ໄສ​ການ​ຮ່ວມ​ມື​ອາຊີ - ​ເອີຣົບ (ASEM)..., ພ້ອມ​ກັນ​ນັ້ນ​ກໍ່​ສະ​ແດງ​ຄວາມ​ສະໜັບສະໜູນ​ຫວຽດນາມ ​ໃນ​ການ​ເພິ່ມທະວີ​ການ​ພົວພັນຮອບດ້ານ​ກັບສະຫະພາບ​ເອີຣົບ (EU), ຊ່ວຍ​ໜູນ​ຫວຽດນາມ ​ໃນ​ຂະ​ບວນວິວັດການ​ໃຫ້​ສັດຕະຍະ​ບັນ​ສັນຍາ​ຄູ່​ຮ່ວມ ​ແລະ ການ​ຮ່ວມ​ມື, ການ​ເຈລະຈາ​ສັນຍາ​ການ​ຄ້າ​ເສລີ​ຫວຽດນາມ - ອີ​ຢູ ​ແລະ ​ໃຫ້ການຮັບຮອງ​ໂດຍ​ໄວຕໍ່​ກັບ ລະບຽບ​ການ​ເສດຖະກິດ​ຕະຫຼາດ​ຂອງ​ຫວຽດນາມ.

ນອກຈາກ​ຍູ້​ແຮງ​ການ​ຮ່ວມ​ມື​ໃນ​ບັນດາ​ຂົງ​ເຂດ​ທີ່​ເປັນ​ມູນ​ເຊື້ອ ​ເຊັ່ນ ​ເສດຖະກິດ-ການ​ຄ້າ ການ​ລົງທຶນ​ແລ້ວ​ ຄວາມ​ສາມາດ​ບົ່ມ​ຊ້ອນ​ໃນ​ການ​ຮ່ວມ​ມື​ ລະຫວ່າງ​ຫວຽດນາມ ກັບ​ສອງ​ປະ​ເທດດັ່ງກ່າວ ​ແມ່ນ​ຍັງ​ມີຫຼວງຫຼາຍທີ່​ສຸດ ຍ້ອນລັກສະນະ​ເພິ່ມ​ເຕີມ​ໃຫ້​ແກ່​ກັນ​ລະຫວ່າງ​ສອງ​ຝ່າຍ, ທ່າ​ແຮງ​ຂອງ​ຮຸງ​ກາຣີ ​ແລະ ​ເດນ​ໝາກ ​ແລະ ຄວາມ​ຕ້ອງການ​ຂອງ​ຫວຽດນາມ. ຄຽງຂ້າງ​ນັ້ນ, ດ້ວຍ​ບົດາດ​ເປັນ​ສະມາຊິກທີ່​ຕັ້ງໜ້າ​ຂອງ​ຫວຽດນາມ​ໃນ​ອາ​ຊຽນ ​ແລະ ຂອງ​ຮຸງ​ກາຣີ ​ແລະ ​ເດນ​ໝາກ ​ໃນ​ອີ​ຢູ (EU), ສາຍ​ພົວພັນອັນ​ເປັນ​ມູນ​ເຊື້ອ​ກັບ​ຮຸງ​ກາຣີ, ການ​ພົວພັນ​ຄູ່​ຮ່ວມ​ຮອບດ້ານ​ກັບ​ເດນ​ໝາກ ຈະ​ຂະຫຍາຍຕົວ​ແຂ​ງແຮ​ງກວ່າ​ອີກ, ປະກອບ​ສ່ວນ​ເຂົ້າ​ໃນ​ການ​ເພີ່ມ​ທະວີ​ການ​ພົວພັນອາ​ຊຽນ - ອີ​ຢູ, ຕອບ​ສະໜອງ​ກັບ​ຄວາມ​ມຸ່ງ​ມາດ​ປາຖະໜາ ​ແລະ ນຳ​ເອົາ​ຜົນ​ປະ​ໂຫຍ​ດຕົວ​ຈິງ​ມາ​ໃຫ້​ປະຊາຊົນ​ຫວຽດນາມ ​ແລະ ສອງ​ປະ​ເທດ, ​ເພື່ອ​ສັນຕິພາບ ການ​ຮ່ວມ​ມື ​ແລະ ການ​ພັດທະນາ​ຢູ່​ສອງ​ພາກ​ພື້ນ ​ແລະ ຢູ່​ໃນ​ໂລກ./.

ສັງ​ລວ​ມ​ໂດຍ: HB

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ