ວັນອາທິດ, 18/8/2019
ການເຄື່ອນໄຫວຂອງທ່ານນາຍົກລັດຖະມົນຕີ ແຫ່ງ ສສ ຫວຽດນາມ ຫງວຽນເຕິນຢຸ໊ງ ຢູ່ທີ່ກອງປະຊຸມຂັ້ນສູງອາຊຽນຄັ້ງທີ 23 ແລະ ບັນດາກອງປະຊຸມທີ່ກ່ຽວຂ້ອງ
21/11/2013 9:4' ສົ່ງ ພິມ
ທ່ານນາຍົກລັດຖະມົນຕີ ຫງວຽນເຕິນຢຸ໊ງ ເຂົ້າຮ່ວມ ກອງປະຊຸມຂັ້ນສຸງອາຊີຕາເວນອອກ. ພາບ: qdnd.vn

ພິຈາລະນາ​ການ​ສ້າງ​ຕັ້ງກອງ​ທຶນ​ຂອງ​ອາ​ຊຽນ+3 ກ່ຽວກັບການ​ເຊື່ອມ​ໂຍງພື້ນຖານໂຄງລ່າງໃນ​ພາກ​ພື້ນ

ຢູ່​ທີ່ກອງ​ປະຊຸມ​ຂັ້ນ​ສູງ​ອາ​ຊຽນ+3, ການ​ນຳ​ບັນດາ​ປະ​ເທດອາ​ຊຽນ ​ແລະ 3 ປະ​ເທດ​ຄູ່​ຮ່ວມ​ອາຊີ​ຕາ​ເວນ​ອອກສຽງ​ເໜືອ (ຈີນ, ຍີ່ປຸ່ນ ​ແລະ ສ.​ເກົາຫຼີ) ​ໄດ້​ຊົມ​ເຊີຍ ​ແລະ ຕີ​ລາຄາ​ສູງ​ຕໍ່​ປະສິດທິຜົນ​ຂອງ​ການຮ່ວມ​ມື​ອາ​ຊຽນ+3 ​ໃນ​ເວລາ​ທີ່​ຜ່ານ​ມາ; ສືບ​ຕໍ່​ບຸລິມມະ​ສິດຍູ້​ແຮງການ​ປະຕິບັດ ​ບັນດາ​ໂຄງການຮ່ວມ​ມື​ທີ່​ໄດ້​ຕົກລົງ​ກັນ, ​ເປັນ​ຕົ້ນ​ແມ່ນ​ໃນ​ຂົງ​ເຂດ​ເສດຖະກິດ - ການ​ຄ້າ, ການ​ລົງທຶນ ​ແລະ ການ​ເງິນ; ຜັນ​ຂະຫຍາຍ​ເສັ້ນທາງດຳ​ເນີນ​ງານ​ໃໝ່ ກ່ຽວກັບຄວາມ​ຄິດ​ລິ​ເລີ່ມສ້າງ​ຕັ້ງຕະຫຼາດ​ຄ້າ​ຫຸ້ນ​ອາຊີ ​ແລະ ຄວາມ​ຄິດ​ລິ​ເລີ່​ມ ກ່ຽວກັບການພັດທະນາພັນທະບັດພື້ນຖານໂຄງລ່າງ; ​ເຈລະຈາ​ກ່ຽວ​ກັບ​ສັນຍາ​ຄູ່​ຮ່ວມ​ເສດຖະກິດ​ຮອບດ້ານ​​ ຢູ່ພາກ​ພື້ນ (RCEP). ​ເນື່ອງ​ໃນ​ໂອກາດ​ນີ້, ບັນດາ​ການ​ນຳ​ໄດ້​ຮັບຮອງຜ່ານ ​ແຜນການ​ປະຕິບັດ​ງານ​ອາ​ຊຽນ+3 ສະບັບ​ດັດ​ແປງ​ຮອດ​ປີ 2017; ຕົກລົງ​ຜັນ​ຂະຫຍາຍ​ໂດຍ​ໄວ​ ໂຄງການ​ຄູ່​ຮ່ວມ​ອາ​ຊຽນ+3 ກ່ຽວ​ກັບ​ການ​ເຊື່ອມ​ໂຍງ​ກັນ, ກວມ​ທັງ​ການ​ພິຈາລະນາ ການ​ສ້າງ​ຕັ້ງກອງ​ທຶນ​ຂອງ​ອາ​ຊຽນ+3 ກ່ຽວກັບການ​ເຊື່ອມ​ຕໍ່​ໂຄງສ້າງພື້ນຖານໃນພາກ​ພື້ນ; ສືບ​ຕໍ່​ເປີດ​ກວ້າງ​ຄວາມ​ຄິດ​ລິ​ເລີ່​ມຊຽງ​ໃໝ່. ນອກຈາກ​ນັ້ນ, ບັນດາ​ການ​ນຳ​ກໍ່​ໄດ້​ຕົກລົງ​ຍູ້​ແຮງ​ການ​ຮ່ວມ​ມື​ ທາງ​ດ້ານ​ປ້ອງ​ກັນ​ຄວາມ​ສະຫງົບ ການ​ເມືອງ ​ແລະ ຮັບ​ມື​ຢ່າງ​ມີ​ປະສິດທິ​ຜົນ​ ຕໍ່​ກັບສິ່ງ​ທ້າ​ທາຍ​ຕ່າງໆ ​ທາງ​ດ້ານ​ຄວາມ​ສະຫງົບ​ແບບ​ດັ້ງ​ເດີມ ​ແລະ ບໍ່​ເປັນ​ແບບ​ດັ້ງ​​ເດີມ; ​ໃນ​ນັ້ນ ​ມີ​ການ​ຮ່ວມ​ມື​ໃນ​ການ​ຮັບປະ​ກັນ ຄວາ​ມສະຫງົບ​ດ້ານ​ພະລັງງານ, ຄວາມ​ສະຫງົບ ​ແລະ ຄວາມ​ປອດ​ໄພ ​ດ້ານ​ສະບຽງ​ອາຫານ, ສິ່ງ​ແວດ​ລ້ອ​ມ, ຮັບ​ມື​ຕໍ່​ໄພ​ທຳ​ມະ​ຊາດ, ພັດທະນາ​ແບບ​ຍືນ​ຍົງ, ສາທາລະນະ​ສຸກ, ການ​ສຶກສາ, ພັດທະນາ​ແຫຼ່ງຊັບພະຍາກອນ​ມະນຸດ, ການທ່ອງທ່ຽວ, ​ສື່​ຂ່າວ ​ແລະ ໂທລະ​ຄົມມະນາຄົມ, ການ​ສັງ​ສັນ​ລະຫວ່າງ​ປະຊາຊົນ…

​ເພີ່ມ​ທະວີ​ການ​ຮ່ວມ​ມື​ແນ​ໃສ່​ປົກ​ປັກ​ຮັກສາ​ສັນຕິພາບ, ສະຖຽນ​ລະ​ພາບ ​ແລະ ຄວາມ​ສະຫງົບ​ຢູ່​ພາກ​ພື້ນ

ຢູ່​ທີ່ກອງ​ປະຊຸມ​ຂັ້ນ​ສູງ​ອາ​ຊີ​ຕາ​ເວນ​ອອກ (EAS) ຄັ້ງ​ທີ​ 8, ບັນດາ​ການ​ນຳ​ໄດ້​ປຶກສາ​ຫາລື​ ບັນດາ​ບັນຫາ​ທີ່​ມີ​ຄວາມ​ສຳຄັນ​ຍຸດ​ທະ​ສາດ ຂອງ​ຂັ້ນ​ສູງ​ອາຊີ​ຕາ​ເວນ​ອອກ ​ໃນ​ຖານະ​ເປັນ​ເວທີ​ປາ​ໄສ​ຂອງ​ບັນດາ​ການ​ນຳ, ໂດຍ​ອາ​ຊຽນຖື​ບົດບາດ​ເປັນ​ເຈົ້າພາ​ທາງ ​ເພື່ອ​ພິຈາລະນາ ​ແລະ ຕົກລົງ​ ກ່ຽວ​ກັບ​ບັນດາ​ບັນຫາ​ຍຸດ​ທະ​ສາດ, ​ໃນ​ທຸກໆ​ຂົງ​ເຂດ​ການ​ເມືອງ ຄວາມ​ສະຫງົບ ​ແລະ ​ການ​ພັດທະນາ​ຢູ່​ພາກ​ພື້ນ. ຕາມ​ນັ້ນ, ຂັ້ນ​ສູງ​ອາຊີ​ຕາ​ເວນ​ອອກ​ຕ້ອງ​ສືບ​ຕໍ່​ຍູ້​ແຮງ​ການ​ຮ່ວມ​ມື​ ແນ​ໃສ່​ຮັບປະກັນ​ສິ່ງ​ແວດ​ລ້ອມ​ສັນຕິພາບ ສະຖຽນ​ລະ​ພາບ ​ແລະ ຄວາມ​ສະຫງົບ​ຢູ່​ພາກ​ພື້ນ; ​ເປີດ​ກວ້າງ​ການ​ພົວພັນ ​ແລະ ​ເຊື່ອມ​ໂຍງ​ກັນ; ກໍ່​ຄື​ເພີ່ມ​ທະວີ​ການ​ຮ່ວມ​ມື​ ໃນ​ບັນດາ​ຂົງ​ເຂດບຸລິມະສິດ​ອື່ນ​ເຊັ່ນ ການ​ເງິນ, ພະລັງງານ, ການ​ສຶກສາ, ປ້ອງ​ກັນ​ຕ້ານ​ໂລກລະບາດ, ຄຸ້ມ​ຄອງ​ໄພ​ທຳ​ມະ​ຊາດ ​ແລະ ​ເຊື່ອມ​ໂຍງ​ອາ​ຊຽນ. ກອງ​ປະຊຸມ​ໄດ້​ເຫັນ​ດີ​ເປັນ​ເອກະສັນ​ກັນ ​ຍູ້​ແຮງ​ການ​ເຈລະຈາ ​ເພື່ອ​ອາດສາມາດ​ບັນລຸ​​ເຖິງ ສັນຍາ​ຄູ່​ຮ່ວມ​ເສດຖະກິດ​ຮອບດ້ານ​ຢູ່ພາກ​ພື້ນ (RCEP) ​ໃນ​ປີ 2015. ບັນດາ​ການ​ນຳ​ ໄດ້​ເນັ້ນ​ໜັກ​ເປັນ​ພິ​ເສດ​ເຖິງ ​ການເພີ່ມ​ທະວີການ​ຮ່ວມ​ມື​ ແນ​ໃສ່​ຮັບປະກັນ​ສັນຕິພາບ ສະຖຽນລະ​ພາບ ​ແລະ ຄວາມ​ສະຫງົບຢູ່​ໃນ​ພາກ​ພື້ນ; ​ໃນ​ນັ້ນ​ ມີ​ຄວາມ​ສະຫງົບ​ປອດ​ໄພ ​ແລະ ​ເສລີພາບ​ໃນ​ການ​ເດີນ​ທະ​ເລ ຢູ່​ທະ​ເລ​ຕາ​ເວນ​ອອກ; ຮ່ວມ​ມື​ກັນ​ທາງ​ດ້ານປ້ອງ​ກັນ ​ແລະ ຕ້ານ​ໂຈນ​ທະ​ເລ, ຊອກ​ຫາ ​ແລະ ກູ້​ໄພ​​ໃນ​ທະ​ເລ, ສິ່ງ​ແວ​ດລ້​ອມ ​ແລະ ຄວາມ​ສະຫງົບ​ທາງ​ທະ​ເລ. ບັນດາ​ການ​ນຳ​ໄດ້​ເຊີດ​ຊູ​ຫຼັກການ​ແກ້​ໄຂຄວາມ​ພິພາດດ້ວຍ​ສັນຕິ​ວິທີ, ປະຕິບັດ​ຕາມ​ກົດໝາຍ​ລະຫວ່າງ​ຊາດ ​ແລະ ອະນຸສັນຍາສະຫະປະຊາຊາດ ວ່າດ້ວຍກົດໝາຍທະເລ ປີ 1982; ປະຕິບັດ DOC ​ແລະ ບັນດາ​ຂໍ້​ຕົກລົງ​ທີ່​ບັນລຸ​ໄດ້​ຢ່າງ​ເຂັ້ມ​ງວດ, ພ້ອມ​ກັນ​ນັ້ນ​ ກໍ່​ຕ້ອງການ​ມີ​ໂດ​ຍ​ໄວ ປະມວນ​ຂໍ້​ກຳນົດ​ກ່ຽວກັບການປະພຶດ ຂອງບັນດາຝ່າຍຢູ່ທະເລຕາເວັນອອກ (COC).

ສູ້​ຊົນ​ເພື່ອ​ບັນລຸ​ມູນ​ຄ່າ​ການ​ຄ້າ 100 ຕື້​ໂດ​ລາ​ສະຫະລັດ ​ໃນ​ປີ 2015

​ໂດຍ​ສືບ​ຕໍ່​ໂຄງການ, ບັນດາ​ການ​ນຳ​ອາ​ຊຽນ​ໄດ້​ເຂົ້າ​ຮ່ວມ ​ກອງ​ປະຊຸມ​ຂັ້ນ​ສູງ​ອາ​ຊຽນ - ອິນ​ເດຍຄັ້ງ​ທີ 11. ຢູ່​ທີ່​ກອງ​ປະຊຸມ, ບັນດາ​ການ​ນຳ​ໄດ້​ຊົມ​ເຊີຍ​ຜົນງານຄວາມ​ຄືບ​ໜ້າທີ່​ບັນລຸ​ໄດ້​ ໃນ​ເວລາ​ທີ່​ຜ່ານ​ມາ, ​ເປັນ​ຕົ້ນແມ່ນ ​ການ​ທີ່​ສອງ​ຝ່າຍ​ໄດ້​ຍົກ​ລະດັບ​ການ​ພົວພັນ​ ຂຶ້ນ​ເປັນ​ຄູ່​ຮ່ວມຍຸດ​ທະ​ສາດ ​ແລະ ​ເຊັນ​ສັນຍາ​ການ​ຄ້າ ການ​ບໍລິການ ​ແລະ ການ​ລົງທຶນ (​ເດືອນ​ສິງຫາ 2013), ​ເປັນ​ເອກະສັນ​ກັນ​ຜັນ​ຂະຫຍາຍ ຖະ​ແຫຼ​ງການ​ກ່ຽວກັບວິ​ໄສ​ທັດ ທີ່​ໄດ້​ຖືກຮັບຮອງ​​ ໂດຍ​ກອງ​ປະຊຸມ​ຂັ້ນ​ສູງສະ​ເຫຼີ​ມສະຫຼອງ​ສາຍ​ພົວພັນອາ​ຊຽນ - ອິນ​ເດຍ (ເດືອນ​ທັນວາ 2012), ​ເພີ່ມ​ທະວີ​ການ​ຮ່ວມ​ມື​ໃນ​ບັນດາ​ຂົງ​ເຂດ​ບຸລິມະສິດ ​ເຊັ່ນ​ການ​ຄ້າ ການ​ລົງທຶນ ​ເຊື່ອມ​​ໂຍງພື້ນຖານໂຄງລ່າງ ​ເຕັກ​ໂນ​ໂລ​ຊີ​ສື່ສານ ການ​ປ່ຽນ​ແປງ​ດິນ​ຟ້າ​ອາກາດ ​ແລະ ການ​ຄຸ້ມ​ຄອງ​ໄພ​ທຳ​ມະ​ສາດ ການ​ສັງ​ສັນ​ລະຫວ່າງ​ປະຊາຊົນ… ສອງ​ຝ່າຍ​ຢັ້ງຢືນ​ຄວາມ​ຕັດສິນ​ໃຈ​ສູ້​ຊົນ​ ເພື່ອ​ບັນລຸ​ຈຸດໝາຍ 100 ຕື້​ໂດ​ລາ​ສະຫະລັດ ກ່ຽວ​ກັບ​ມູນ​ຄ່າ​ການ​ຄ້າ​ສອງ​ສົ້ນ​ປີ 2015. ອິນ​ເດຍຢັ້ງຢືນຄຳ​ໝັ້ນ​ສັນຍາສືບ​ຕໍ່ຊ່ວຍ​ໜູນ​ອາ​ຊຽນ ​ໃນ​ການ​ກໍ່ສ້າງ​ປະຊາ​ຄົມ, ຜັນ​ຂະຫຍາຍ​ການ​ເຊື່ອມ​ໂຍງ ​ແລະ ​ເພີ່ມ​ທະວີ​ບົດບາດ​ເປັນ​ໃຈກາງ​ຂອງ​ອາ​ຊຽນ ​ໃນ​ໂຄງ​ປະກອບ​ພາກ​ພື້ນ. ບັນດາ​ການ​ນຳ​ໄດ້​ເນັ້ນ​ໜັກ​ເຖິງ ​ການ​ຮັກສາ​ຄວາມ​ສະຫງົບ ຄວາມ​ປອດ​ໄພ​ໃນ​ການ​ເດີນ​ທະ​ເລ​ ຢູ່ທະ​ເລ​ຕາ​ເວນ​ອອກ ​ແລະ ສະໜັບສະໜູນ​ບັນດາ​ຫຼັກການ​ຂອງ​ອາ​ຊຽນກ່ຽວ​ກັບ​ບັນຫາ​ນີ້.

ປະສານ​ສົມທົບ​ກັນ​ໃນ​ການ​ປະຕິບັດ​ຢ່າງ​ສຳ​ເລັດ​ຜົນ ບັນດາເປົ້າໝາຍ​ການ​ພັດ​ທະນາສະຫັດ​ສະວັດ

ຢູ່​ທີ່​ກອງ​ປະຊຸມ​ອາ​ຊຽນ - ສະຫະ​ປະຊາ​ຊາດຄັ້ງ​ທີ 5, ການ​ນຳອາ​ຊຽນ ​ແລະ ​ເລຂາທິການ​ໃຫຍ່​ສະຫະ​ປະຊາ​ຊາດ ຕີ​ລາຄາ​ສູງຕໍ່ຜົນງານອັນຕັ້ງໜ້າມໍ່ໆນີ້ ໃນການພົວພັນລະຫວ່າງສອງຝ່າຍ, ພິເສດແມ່ນ ການສົມທົບກັນແກ້ໄຂສິ່ງທ້າທາຍຕ່າງໆ ໃນພາກພື້ນ ແລະ ໃນທົ່ວໂລກ, ປະຕິບັດບັນດາເປົ້າໝາຍສະຫັດສະວັດ …; ເຫັນດີເປັນເອກະພາບກັນ ສືບຕໍ່ຜັນຂະຫຍາຍຖະແຫຼງການຮ່ວມອາ​ຊຽນ - ສະຫະ​ປະຊາ​ຊາດ ກ່ຽວກັບການພົວພັນຄູ່ຮ່ວມຮອບດ້ານ, ຍູ້ແຮງການຮ່ວມມືໃນຂົງເຂດຕ່າງໆ ເຊັ່ນ ຮັກສາຄວາມສະຫງົບ ຄວາມປອດໄພໃນການເດີນທະເລ, ຮັກສາຄວາມປອດໄພດ້ານສະບຽງອາຫານ ແລະ ພະລັງງານ, ການປ່ຽນແປງດິນຟ້າອາກາດ, ປະຕິບັດບັນດາເປົ້າໝາຍສະຫັດສະວັດ ຕາມມາດຕະຖານໃໝ່ ຂອງສະຫະປະຊາຊາດ; ເພີ່ມທະວີການປະສານສົມທົບ ພ້ອມກັນແກ້ໄຂສິ່ງທ້າທາຍຕ່າງໆ ທີ່ພວມເກີດຂຶ້ນ ກໍ່ຄືເພີ່ມທະວີການສົມທົບກັນ ລະຫວ່າງຄະນະເລຂາທິການຂອງສອງຝ່າຍ ເພື່ອຜັນຂະຫຍາຍ ການເຄື່ອນໄຫວຮ່ວມມືດ້ານຕ່າງໆ ຢ່າງມີປະສິດທິຜົນ.

ສຳເລັດສິ້ນສຸດບັນດາກອງປະຊຸມ, ການ​ນຳ​ຂອງ​ບັນດາ​ປະ​ເທດອາ​ຊຽນ ​ແລະ ຄູ່​ຮ່ວມ ໄດ້ຮັບຮອງເອົາ ເອກະສານທີ່ສຳຄັນຫຼາຍສະບັບ: ຖະ​ແຫຼ​ງການ​ກ່ຽວ​ກັບ​ວິ​ໄສ​ທັດ​ປະຊາ​ຄົມອາ​ຊຽນ ຫຼັງ​ປີ 2015, ຖະ​ແຫຼງການອາ​ຊຽນ ກ່ຽວກັບວິສາຫະກິດໜຸ່ມນ້ອຍ ແລະ ວຽກເຮັດງານທຳໃຫ້ແກ່ຊາວໜຸ່ມ, ຖະ​ແຫຼ​ງການອາ​ຊຽນ ກ່ຽວກັບການເພີ່ມທະວີສະຫວັດດີການສັງຄົມ, ຖະ​ແຫຼ​ງການອາ​ຊຽນ ກ່ຽວ​ກັບ​ການ​ລົບ​ລ້າງ​ການ​ໃຊ້ຄວາມ​ຮຸນ​ແຮງ ຕໍ່​ກັບ​ແມ່ຍິງ ແລະ ເດັດນ້ອຍ, ຖະ​ແຫຼ​ງການອາ​ຊຽນ ກ່ຽວ​ກັບ​ການ​ເພີ່ມ​ທະວີ​ການ​ຮ່ວມ​ມື​ກັນ ຄຸ້ມ​ຄອງ​ໄພ​ທຳ​ມະ​ຊາດ, ຖະ​ແຫຼ​ງການອາ​ຊຽນ ກ່ຽວ​ກັບ​ການ​ປ້ອງ​ກັນ ຕ້ານ​ບັນດາ​ພະຍາດ​ທີ່​ບໍ່​ຕິດ​ແປດ, ຖະ​ແຫຼ​ງການ​ຮ່ວມ ກ່ຽວ​ກັບ​ການ​ສະ​ເຫຼີມສະຫຼອງ 10 ປີ ​ແຫ່ງ​ການ​ສ້າງ​ຕັ້ງຄູ່​ຮ່ວມ​ຍຸດ​ທະ​ສາດອາ​ຊຽນ - ຈີນ ​ແລະ ຖະ​ແຫຼ​ງການ​ຂັ້ນ​ສູງ​ອາຊີ​ຕາ​ເວນ​ອອກ.

ຢູ່​ຕາມ​ລະບຽງ​ກອງ​ປະ​ຊຸມ​ຂັ້ນ​ສູງ​ສະມາຄົມ​ປະຊາ​ຊາດ​ແຫ່ງ​ອາຊີ​ຕ​າ​ເວນ​ອອກສຽງ​ໃຕ້ (ອາ​ຊຽນ), ທ່ານນາຍົກລັດຖະມົນຕີ​​ ຫງວຽນ​ເຕິນຢຸ໊ງ ​ໄດ້ພົບ​ປະ​ສົນທະນາ​ກັບ ທ່ານ​ນາຍົກລັດຖະມົນຕີ​ໂອ​ສະ​ເຕີ​ເລຍ ​ໂທ​ນີ ອາບັ​ອດ (Tony Abbott), ທ່ານ​ລັດຖະມົນຕີ​ວ່າການ​ກະຊວງ​ການ​ຕ່າງປະ​ເທດ​ອາ​ເມ​ລິ​ກາ ​ຈອນ ​ແຄຣີ (John Kerry), ປະທານາທິບໍດີ ​ຟີ​ລິບ​ປິນ ​​ເບ​ນີກ​ໂນ ​ເອກິວ​ໂນ (Benigno Aquino)./.

ສັງ​ລວມ​ໂດຍ: HB

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ