ວັນອາທິດ, 22/9/2019
ພົນເອກ ຫວໍ ຫງວຽນ ຢາບ ເຖິງແກ່ມໍລະນະກຳ
21/11/2013 9:5' ສົ່ງ ພິມ
ພົນເອກ ຫວໍ ຫງວຽນ ຢາບ. ພາບ: VGP

ພົນເອກ ຫວໍ ຫງວຽນ ຢາບ, ຊື່ຕາມໜັງສືການເກີດ: ຫວໍຢາບ (ຊື່ແຝງ: ວັນ); ເກີດວັນທີ 25 ສິງຫາ 1911, ທີ່ຕາແສງ ລົກຖວີ ເມືອງເລ້ຖວີ ແຂວງກວ໋າງບິ່ງ; ອະດີດ​ກຳມະການກົມການເມືອງ, ອະດີດເລຂາຄະນະພັກການທະຫານສູງກາງ, ອະດີດຮອງນາຍົກລັດຖະມົນຜູ້​ປະຈຳການ; ອະດີດລັດຖະມົນຕີວ່າການ ກະຊວງປ້ອງກັນປະເທດ, ອະດີດຜູ້ບັນຊາການສູງສຸດກອງທັບ ປະຊາຊົນຫວຽດນາມ;  ຜູ້ແທນສະພາແຫ່ງຊາດຫວຽດນາມ ແຕ່ຊຸດທີ I ເຖິງຊຸດທີ  VII. ຍ້ອນອາຍຸສູງ, ສຸຂະພາບອ່ອນເພຍ, ເຖິງວ່າໄດ້ຮັບຄວາມເອົາໃຈໃສ່ຈາກພັກ ລັດ ຄະນະພັກການທະຫານສູນກາງ ກະຊວງປ້ອງກັນປະເທດ ແລະ ໝູ່ຄະນະສາດສະດາຈານ ນາຍໝໍນາຍແພດ ພະນັກງານສາທາລະນະສຸກ ຢູ່ໃນ ແລະ ນອກກອງທັບ ພ້ອມດ້ວຍຄອບຄົວ ໃນການເບິ່ງແຍງບົວລະບັດ ປິ່ນປົວຢ່າງສຸດອົກສຸດໃຈກໍຕາມ ແຕ່ສະຫາຍກໍໄດ້ເຖິງແກ່ມໍລະນະກຳ ໃນເວລາ 18 ໂມງ 09 ນາທີ, ວັນທີ 4 ຕຸລາ 2013 (ຕົງກັບວັນທີ 30 ສິງຫາ ປີມະເສງ), ຢູ່ທີ່ໂຮງໝໍການທະຫານສູນກາງ 108; ສະຫາຍ​ມີ​ອາຍຸ​ຍືນ​ເຖິງ 103 ປີ.

​ໃນ​ຕະຫຼອດ​ຊີວິດ​ການ​ເຄື່ອນ​ໄຫວ​ປະຕິວັດ​ກວ່າ 80 ປີ, ສະຫາຍ​ໄດ້​ສ້າງ​ຄຸນງາມຄວາມດີ​ອັນ​ໃຫຍ່​ຫຼວງ​ ປະກອບສ່ວນອັນ​ສຳຄັນ ​ເຂົ້າ​ໃນ​ພາລະກິດ​ການ​ປະຕິວັດ​ຂອງ​ພັກ ​ແລະ ຂອງ​ຊາດ​ຫວຽດນາມ. ​ໂດຍ​ເປັນ​ສາວົກ​ທີ່​ດີ​ເດັ່ນ​ ​ແລະ ​ໃກ້ຊິດຕິດ​ແທດ​ ຂອງ​ທ່ານ​ປະທານ​ໂຮ່ຈີ​ມິນ, ​ເປັນ​ພົນ​ເອກ ​ແລະ ຜູ້​ບັນຊາ​ການ​ສູງ​ສຸດທຳ​ອິດ ຂອງ​ກອງທັບ​ປະຊາຊົນ ​ຫວຽດນາມ, ສະຫາຍ​ໄດ້​ຮັບ​ຄວາມ​ຮັກ​ແພງ ຄວາມ​ເຄົາລົບ​ນັບຖື​ຈາກ​ປະຊາຊົນ, ຄວາມ​ນິຍົມ​ຊົມ​ເຊີຍ​ຈາກ​ເພື່ອນ​ມິດ​ໃນ​ໂລກ, ​ເປັນທີ່ເອກອ້າງ​ທະ​ນົງ​ໃຈ​ຂອງ​ພະນັກງານ ນັກ​ຮົບ​ຮຸ້ນ​ຕ່າງໆ ​ໃນ​ກອງທັບ. ສະຫາຍ​ໄດ້​ຮັບ​ປະດັບ​ຫຼຽນ​ໄຊ ຫຼຽນກາ​ຕ່າງໆ ຂອງ​ພັກ ​ແລະ ລັດ ​ເຊັ່ນ: ຫຼຽນ​ໄຊດາວ​ຄຳ, ຫຼຽນ​ໄຊ​ໂຮ່ຈີ​ມິນ, ຫຼຽນ​ກາ​ອາຍຸ​ພັກ 70 ປີ ​ແລະ ຫຼຽນ​ໄຊ ຫຼຽນ​ກາ​ທີ່​ປະ​ເສີດສູງ​ສົ່ງອື່ນໆອີກ ຂອງ​ຫວຽດນາມ ​ແລະ ສາກົນ. ສະຫາຍ​ລ່ວງ​ລັບ​ໄປ ​ເປັນຄວາມ​ເສຍ​ຫາຍ​ອັນ​ໃຫຍ່ຫຼວງ ​ສຳ​ລັບພັກ ລັດ ປະຊາຊົນ ​ແລະ ກອງທັບ​ປະຊາຊົນ​ຫວຽດນາມ.

ພິທີຊາ​ປະ​ນະ​ກິດ​ສົບ​ສະຫາຍ ພົນ​ເອກ ຫວໍ​ ຫງວຽນ ​ຢາ​ບ ຈັດ​ຂຶ້ນ​ໃນ​ລະດັບ​ຊາດ. ພິທີໄວ້ອາໄລ ເລີ່​ມ​ແຕ່ 7​ ໂມ​ງ 30 ນາທີ ວັນ​ທີ 12 ຕຸລາ 2013, ​ທີ່ຫໍ​​ໄວ້ອາ​ໄລ​​ແຫ່ງຊາດ ​ເລກທີ 5 ​ເຈິ່ນ​ແຖງ​ຕົງ ຮ່າ​ໂນ້ຍ. ພິທີ​ສົ່ງສະການ ​​ເລີ່​ມ​ແຕ່ 7 ​ໂມງ ວັນ​ທີ 13 ຕຸລາ 2013. ​ໂດຍ​ປະຕິບັດ​ຕາມ​ຄວາມ​ປາຖະໜາ​ຂອງພົນ​ເອກ ຫວໍ ຫງວຽນ ຢາ​ບ ​ແລະ ຄວາມ​ສະ​ເໜີຂອງຄອບຄົວ, ງານ​ຊາ​ປະ​ນະ​ກິດ​ສົບ​ສະຫາຍ ພົນ​ເອກ ຫວໍ​ ຫງວຽນ ຢາ​ບ ​ໄດ້​ຈັດຂຶ້ນ​ໃນ​ວັນ​ດຽວກັນ ​ຢູ່​ທີ່​ບ້ານ​ເກີດ​ເມືອງ​ນອນ​ຂອງ​ສະຫາຍ (ແຂວງ​ກວ໋າງບິ່ງ). ​ໃນ​ເວລາ​ດຽວ​ກັນ​ກັບ​ການ​ຈັດ​ຕັ້ງ​ພິທີ​ໄວ້ອາ​ໄລ ແລະ ສົ່ງສະການ ​​ພົນ​ເອກ ​ຫວໍ​ ຫງວຽນ​ ຢາ​ບ ຢູ່​ຮ່າ​ໂນ້ຍນັ້ນ, ຢູ່​ແຂວງ​ກວ໋າງບິ່ງ ​ແລະ ນະຄອນ​ໂຮ່ຈີ​ມິນ ກໍ່​ໄດ້​ຈັດ​ພິທີ​ໄວ້ອາ​ໄລ ພົນ​ເອກ ​ຫວໍ​ ຫງວຽນ ​ຢາ​ບ.

ຄະນະຈັດຕັ້ງພິທີຊາປະນະກິດສົບສະຫາຍ ພົນເອກ ຫວໍ ຫງວຽນ ຢາບ ກວມດ້ວຍ 30 ສະຫາຍ ໂດຍແມ່ນສະຫາຍ ຫງວຽນຝູຈ້ອງ ເລຂາທິການໃຫຍ່ ຄະນະບໍລິຫານງານສູນກາງ ພັກກອມມູນິດຫວຽດນາມ ເປັນຫົວໜ້າຄະນະ.

    

ຄະນະ​ຜູ້​ແທນ​ຄະນະ​ບໍລິຫານ​ງານ​ສູນ​ກາງ ພັກ​ກອມ​ມູນິດ​ຫວຽດນາມ ນຳ​ໂດຍ​ສະຫາຍ​ເລຂາທິການ​ໃຫຍ່ ຫງວຽນ​ຝູຈ້ອງ ​ເຂົ້າ​ໄວ້ອາ​ໄລ​ສະຫາຍພົນ​ເອກ ຫວໍ​ ຫງວຽນ ​ຢາ​ບ. ພາບ: VGP

ໂດຍ​ຕາງໜ້າ​ການ​ນຳ​ພັກ - ລັດ, ສະຫາຍ​ເລຂາທິການ​ໃຫຍ່ ຫງວຽນ​ຝູຈ້ອງ ​ໄດ້​ອ່ານ​ຄຳ​ໄວ້​ອາ​ໄລ ຕີ​ລາຄາ​ສູງ​ຕໍ່ຄຸນງາມຄວາມດີ​ອັນ​ໃຫຍ່​ຫຼວງ ​ແລະ ​ແວ່ນ​ແຍງ​ອັນ​ໃສ​ແຈ້ງ​ຂອງ ພົນ​ເອກ ​ຫວໍ​ ຫງວຽນ ​ຢາ​ບ ​ແລະ ​ເນັ້ນວ່າ: “ຂໍ​ສະ​ແດງ​ຄວາມ​ເສົ້າ​​​ໂສກ ​ເສຍດາຍ​ທີ່​ສຸດ ຕໍ່​ການ​ມໍລະນະ​ກຳ​ຂອງສະຫາຍ​ພົນ​ເອກ ຫວໍ​ ຫງວຽນ ​ຢາ​ບ - ອ້າຍ​ວັນ - ຜູ້ນຳທີ່​ມີ​ອິທິພົນ​ສູງຂອງ​ພັກ-ລັດ ​ແລະ ປະຊາຊົນ​ເຮົາ; ສາວົກ​ທີ່​ດີ​ເດັ່ນ ​ແລະ ​ໃກ້​ຊິດ​ຕິດ​ແທດຂອງ​ທ່ານປະທານ​ໂຮ່ຈີ​ມິນ; ນັກຮົບ​ປະຕິວັດ​ທີ່ເດັ​ດດ່ຽວ​ໜຽວ​ແໜ້ນ; ຜູ້ນຳການ​ທະຫານທີ່​ເກັ່ງ​ກ້າ​ສາມາດ​ເລີດ​ລ້ຳ, ທ່ານ​ພົນ​ເອກ ລັດຖະມົນ​ຕີ​ວ່າການ​ກະຊວງ​ປ້ອງ​ກັນ​ປະ​ເທດ ຜູ້​ບັນຊາ​ການ​ສູງ​ສຸດ​ທຳ​ອິດ ​ແລະ ​ອ້າຍ​ກົກຂອງ​ກອງທັບ​ປະຊາຊົນ​ ຫວຽດນາມ; ຜູ້​ທີ່​ມີ​ຄຸນງາມຄວາມດີ​ອັນ​ໃຫຍ່​ຫຼວງ​ຫຼາຍ​ຢ່າງ ​ແລະ ມີ​ການ​ປະກອບສ່ວນ​ທີ່​ດີ​ເດັ່ນ​ເປັນ​ພິ​ເສດ ​ເຂົ້າ​ໃນ​ພາລະກິດການ​ປະຕິວັດ​ຂອງ​ພັກ ​ແລະ ຊາດ​ຫວຽດນາມ. ຊື່​ສຽງ ພາລະກິດ ບຸກຄະ​ລິກລັກສະນະ ແລະ ການ​ປະກອບສ່ວນ​ອັນ​ໃຫຍ່​ຫຼວງຂອງ​ສະຫາຍ ​ໄດ້​ຈະ​ລຶກ​ໄວ້​​ໃນ​ຈິດ​ໃຈ​ປະຊາຊົນ, ​ເປັນ​ນາຍ​ພົນ​ຂອງ​ປະຊາຊົນ ຊື່​ສຽງ​ລື​ຊາຈາລຶກ​ໄວ້ຕະຫຼອດ​ໄປ​ໃນ​ປະຫວັດສາດ​ຂອງ​ຊາດ... ພວກ​ຂ້າພະ​ເຈົ້າໝັ້ນ​ໝາຍ​ວ່າ ຈະ​ຮ່ຳຮຽນ​ແນວ​ຄິດ ຄຸນສົມບັດສິນ​ທຳ ​ແບບ​ແຜນປະຕິບັດ​ງານ ​ແລະ ​​ແວ່ນ​ແຍງສູ້​ຊົນ​ຮັບ​ໃຊ້​ປະ​ເທດ​ຊາດ ປະຊາຊົນ​ຢ່າງ​ສຸດ​ອົກ​ສຸດ​ໃຈ​ຂອງ​ສະຫາຍ”.

ຕອນ​ເຊົ້າ​ວັນ​ທີ 12 ຕຸລາ, ຄະນະ​ຜູ້​ແທນ​ບັນດາ​ແຂວງ ນະຄອນ​ໃນ​ທົ່ວ​ປະ​ເທດ, ຄະນະ​ຜູ້​ແທນບັນດາ​ກະຊວງ ຄະນະ​ກຳມະການ ຂະ​​ແໜງການ ອົງການ​ຈັດ​ຕັ້ງ​ມະຫາຊົນ​ສູນ​ກາງ, ຄະນະ​ຜູ້​ແທນບັນດາ​ຊົນ​ເຜົ່າ ສາສະໜາ, ພະນັກງານ ນັກຮົບ ພີ່ນ້ອງ​ຮ່ວມ​ຊາດ​ເປັນ​ຈຳນວນ​ຫຼວງ​ຫຼາຍ​ໃນ​ທົ່ວ​ປະ​ເທດ, ຜູ້​ຕາງ​ໜ້າຊາວ​ຫວຽດນາມ​ຢູ່​ຕ່າງປະ​ເທດ ​ແລະ ບັນດາ​ຄະນະ​ຜູ້​ແທນ​ສາ​ກົນ ​ໄດ້ມີໜ້າ​ຢູ່​ທີ່​ຫໍ​ໄວ້ອາ​ໄລ ​ເພື່​ອສະ​ແດງຄວາມຮູ້​ບຸນຄຸນ ຄວາມ​ລະນຶກ​ຄິດ​ເຖິງ ​ແລະ ​ໄວ້ອາ​ໄລ ທ່ານ​ພົນ​ເອກ ຫວໍ​ ຫງວຽນ ​ຢາ​ບ - ທ່ານ​ນາຍ​ພົນ​ຂອງ​ປະຊາຊົນ.

ກ່ອນ​ໜ້າ​ນັ້ນ, ​ແຕ່​ວັນ​ທີ 6 ຫາ​ວັນ​ທີ 10 ຕຸລາ 2013, ຢູ່​​ອາຄານ​ເລກທີ 30 ຮ່ວາງ​ຢ້ຽວ ຂອງ​ສະ​ຫາຍ ພົນ​ເອກ ຫວໍ​ ຫງວຽນ ​ຢາ​ບ ​​ມີ​ປະຊາຊົນ​ແສນ​ກວ່າ​ຄົນ​ ໄດ້​ມາ​ໄວ້ອາ​ໄລ​ສະຫາຍ​ພົນເອກ. ມີ​ປະຊາຊົນ​ເປັນ​ຈຳນວນ​ຫຼາຍໝື່ນຄົນ ​ໄດ້​ຢືນ​ຢູ່​ຕາມ​ເສັ້ນທາງ​ຕ່າງໆ ທີ່ຂະ​ບວນລົດ​ສົ່ງສະການ​ສະຫາຍ​ພົນ​ເອກ ​ແລ່ນ​ຜ່ານ, ບົນ​ເສັ້ນທາງ​ໄປ​ສູ່​ສະໜາມ​ບິນ ​ເມືອ​ບ້ານ​ເກີດ​ເມືອງ​ນອນ ຂອງ​ສະຫາຍ​ຢູ່​ກວ໋າງບິ່ງ. ບັນດາ​ພາຫະນະ​ສື່​ມວນ​ຊົນ​ຢູ່​ໃນ ​ແລະ ຕ່າງປະ​ເທດ​ ​ໄດ້​ໃຊ້​ໜ້າ​ພິມ​ແລະເນື້ອ​ໃນ​ສຳຄັນ ​ເພື່ອ​ສະ​ແດງ​ຄວາມ​ເສົ້າ​​ໂສກ ​ເສຍດາຍ​ຕໍ່​ການ​ມໍ​ລະນະ​ກຳ​ຂອງ ພົນ​ເອກ ຫວໍ​ ຫງວຽນ ​ຢາ​ບ; ນັກ​ການ​ເມືອງ ຜູ້​ຊ່ຽວຊານ​ການ​ທະຫານ ນັກ​ຄົ້ນ​ຄວ້າປະຫວັດສາດ​ຫຼາຍ​ຄົນ​ຢູ່​ຕ່າງປະ​ເທດ​ ​ໄດ້​ຢັ້ງຢືນ​ວ່າ ພົນ​ເອກ ຫວໍ​ ຫງວຽນ​ ຢາ​ບ ​ເປັນ​ໜຶ່ງ​ໃນ​ບັນດາ​ນາຍ​ພົນ​ທີ່​ຍິ່ງ​ໃຫຍ່ ຂອງ​ປະຫວັດສາດ​ການ​ທະຫານ​ແຫ່ງ​ໂລກ./.

ສັງ​ລວມ​ໂດຍ: ​ແຂັງ​ງວຽນ


Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ