ວັນອັງຄານ, 22/10/2019
ສະມາຊິກສະພາແຫ່ງຊາດພົບປະຜູ້ເລືອກຕັ້ງ ເພື່ອກະກຽມໃຫ້ແກ່ກອງປະຊຸມ ສະໄໝສາມັນເທື່ອທີ່ 6 ສະພາແຫ່ງຊາດຊຸດທີ XIII
4/12/2013 11:59' ສົ່ງ ພິມ
ສະຫາຍເລຂາທິການໃຫຍ່ ຫງວຽນຝູຈ້ອງ ພົບປະກັບຜູ້ເລືອກຕັ້ງເມືອງໄຕໂຮ່ ແລະ ເມືອງຮວ່ານກ໋ຽມ, ນະຄອນຮ່າໂນ້ຍ.

** ວັນ​ທີ 28 ກັນຍາ 2013, ສະຫາຍ​ເລຂາທິການ​ໃຫຍ່ ຫງວຽນຝູຈ້ອງ ພ້ອມ​ກັບ​ບັນດາ​ສະມາຊິກ​ສະພາ​ແຫ່ງ​ຊາດ​ນະຄອນ​ຮ່າ​ໂນ້ຍ ​ໄດ້​ພົບ​ປະ​ກັບ​ຜູ້​ເລືອກ​ຕັ້ງ​​ເມື​ອງໄຕ​ໂຮ່ ​ແລະ ​ເມືອງ​ຮວ່ານກ໋ຽມ.

ຜູ້​ເລືອກ​ຕັ້ງ​​ໃນສອງ​ເມືອງດັ່ງກ່າວ​ໄດ້​ຍົກ​ຫຼາຍ​ບັນຫາ​ທີ່​ຕົນ​ເອົາ​ໃຈ​ໃສ່​ເຊັ່ນ: ປັບປຸງ​ລັດຖະທຳ​ມະນູນ, ຄຸ້ມ​ຄອງ​ທີ່​ດິນ, ການ​ລົງ​ຄະ​ແນນສຽງ​ໄວ້ວາງ​ໃຈ, ການ​ປ້ອງ​ກັນ ຕ້ານ​ການ​ສໍ້​ລາດ​ບັງ​ຫຼວງ... ຕໍ່ກັບຄວາມ​ເອົາ​ໃຈ​ໃສ່​ຂອງ​ຜູ້​ເລືອກ​ຕັ້ງ​ຫຼາຍ​ຄົນ ກ່ຽວກັບ​ການ​ປັບປຸງ​ລັດຖະທຳ​ມະນູນ​ປີ 1992 ​ແລະ ວຽກ​ງານ​ກໍ່ສ້າງ​ກົດໝາຍ​ເວົ້າ​ລວມ, ສະຫາຍ​ເລຂາທິການ​ໃຫຍ່ ຫງວຽນຝູຈ້ອງ ​ໃຫ້​ຮູ້​ວ່າ, ​ໃນ​ການ​ປະຊຸມ​ສະ​ໃໝ​ສາມັນ​ທີ່​ຈະ​ມາ​ເຖິງ​ນີ້, ສະພາ​ແຫ່ງ​ຊາດຈະ​ສືບ​ຕໍ່ປຶກສາ​ຫາລື ພິຈາລະນາ​ຮັບຮອງ​ເອົາ​ສະບັບ​ຮ່າງ​ນີ້. ຜ່ານ​ການ​ລວບ​ລວມຄວາມ​ຄິດ​ຄວາມ​ເຫັນ​ປະກອບສ່ວນຫຼວງ​ຫຼາຍ​ທີ່​ສຸດ ຂອງ​ປະຊາຊົນຢູ່​ໃນ​ປ​ະ​ເທດ ​ແລະ ຂອງ​ພີ່ນ້ອງ​ຫວຽດນາມ​ຢູ່​ຕ່າງປະ​ເທດ ​ໄດ້​ໃຫ້​ເຫັນ​ວ່າ ຄວາມ​ຄິດ​ຄວາມເຫັນສ່ວນ​ເກືອບ​ທັງ​ໝົດ​ ໄດ້​ເປັນ​ເອກະ​ພາບກ່ຽບກັບ​ບັນດາ​ບັນຫາ​ໃຫຍ່ ພື້ນຖານ​ໃນ​ສະບັບ​ຮ່າງ. ຍັງ​ມີ​ບາງ​ບັນຫາ​ທີ່​ມີ​ຄວາມ​ຄິດ​ເຫັນ​ແຕກ​ຕ່າງ​ກັນ ​ເຊິ່ງກ່ຽວ​ພັນ​ເຖິງ​ທີ່​ດິນ ອຳນາດ​ການ​ປົກຄອງ​ຂັ້ນຮາກ​ຖານ ພາກສ່ວນ​ເສດຖະກິດ..., ສະພາ​ແຫ່ງ​ຊາດຈະ​ປຶກສາ​ພິຈາລະນາ ​ແລະ ​ໃຫ້​ຄວາມ​ເຫັນ​ຕັດສິນ​ໃນ​ກອງ​ປະຊຸມ​ສະ​​ໄໝສາມັນ​ທີ່​ຈະ​ມາ​ເຖິງ. ສະຫາຍ​ເລຂາທິການ​ໃຫຍ່ ຈົດ​ຈຳຮັບ​ເອົາ​ຄວາມ​ເຫັນ​ສຸດ​ໃຈ​ຂອງຜູ້​ເລືອກ​ຕັ້ງ ກ່ຽວ​ກັບ​ວຽກ​ງານ​ແກ້​ໄຂ​ລະບອບ​ຕໍ່​ຜູ້​ທີ່​ມີ​ຄຸນງາມຄວາມດີ​ຕໍ່​ຊາດ; ວຽກ​ງານ​ຂົນ​ຂວາ​ຍປະຊາຊົນ ສາສະໜາ; ກໍ່ສ້າງ​ອຳນາດ​ການ​ປົກຄອງ​ຂັ້ນ​ຕ່າງໆ; ສະກັດ​ກັ້ນ​ໄພ​ອັນຕະລາຍ​ໃນ​ການ​ຄົມມະນາຄົມ... ບັນດາ​ຄວາມ​ເຫັນ​ເຫຼົ່າ​ນີ້​ ຈະ​ໄດ້​ສ່ອງ​ແສງ​ໃຫ້​ບັນດາ​ອົງການ​ກ່ຽວຂ້ອງ ​ເພື່ອ​ເຮັດ​ວຽກ​ງານ​ຊີ້​ນຳ ກຳກັບ​ບັນຊາ...​ໃຫ້​ໄດ້​ດີກ​ວ່າ​ອີກ.

     ** ​ໃນ​ວັນ​ດຽວ​ກັນ ທີ 28 ກັນຍາ, ສະຫາຍ​ປະທານສະພາ​ແຫ່ງ​ຊາດ ຫງວຽນ​ຊິງ​ຮຸ່ງ ​ແລະ ຄະນະ​ຜູ້​ແທນ​ສະພາ​ແຫ່ງ​ຊາດ​ແຂວງ​ຮ່າ​ຕິ້ງ ກໍ່​ໄດ້​ໄປ​ກວດ​ເບິ່ງ​ເຂດ​ເສດຖະກິດ​ຫວຸງອ້າງ, ຮ່າ​ຕິ້ງ.


ຄະນະ​ໄດ້​ໃຊ້​ເວລາ​ຫຼາຍ​ຊົ່ວ​ໂມງ​ ເພື່ອ​ຮັບ​ຟັງຄວາມ​ຄິດ​ຄວາມ​ເຫັນ​ປະກອບສ່ວນ​ຂອງ​ຜູ້​ເລືອກ​ຕັ້ງ, ຊອກ​ຮູ້​ຄວາມ​ຄິດ​ຈິດ​ໃຈ ຄວາມປາຖະໜາ ​ແລະ ອະທິບາຍ​ຕອບ​ຄຳ​ສະ​ເໜີ​ຂອງຜູ້​ເລືອກ​ຕັ້ງຢູ່​ເມືອງ​ກີ່​ແອ​ງ ​ເຊິ່ງ​ເປັນ​ເມືອງ​ເຂດ​ພູດ​ອຍຂອງ​ແຂວງ​ຮ່າ​ຕິ້ງ ທີ່​ກຳລັງ​ພັດທະນາ​ຕາມ​ທິດ​ຫັນ​ເປັນ​ອຸດສາຫະກຳ.

ໂດຍ​ຢູ່​ໃນ​ບໍລິ​ເວນ​ຕິດ​ລຽນ​ກັບ​ເຂດ​ເສດຖະກິດ ຫວຸງອ້າງ, ພີ່ນ້ອງ​ປະຊາຊົນ ຜູ້​ເລືອກ​ຕັ້ງ ສະ​ເໜີ​ໃຫ້​ແຂວງ​ຮ່າ​ຕິ້ງ, ​ເມືອງ​ກີ່​ແອ​ງ ຈົ່ງ​ເອົາ​ໃຈ​ໃສ່​ຫຼາຍ​ກວ່າ​ອີກ​ເຖິງ​ການຈັດ​ຕັ້ງ​ກໍ່ສ້າງ​ວິຊາ​ອາຊີບ​ຕາມ​ຄວາມ​ຕ້ອງການ​ອອກ​ແຮງ​ງານ, ​ເປັນ​ຕົ້ນ​ແມ່ນ​ການ​ອອກ​ແຮງ​ງານ​ຮັບ​ໃຊ້​ການ​ພັດທະນາ​ອຸດສາຫະກຳ; ຂໍ​ສະ​ເໜີ​ໃຫ້​ອົງການ​ພາລະ​ບົດບາດ ບຸລິມະສິດ​ນຳ​ໃຊ້​ນະ​ໂຍບາຍ ​ໃຫ້​ແກ່​ພວກ​ເດັກນ້ອຍ​ຂອງ​ຄອບຄົວ​ຕ່າງໆ ​ທີ່​ຢູ່​ໃນ​ພາກ​ສ່ວນ​ຖືກ​ທ້ອນ​ໂຮມ​ທີ່​ດິນ ​ເອົາ​ເນື້ອ​ທີ່​ໃຫ້​ແກ່​ການ​ກໍ່ສ້າງເຂດ​ເສດຖະກິດ ຫວຸງອ້າງ; ​ເພີ່ມ​ທະວີ​ນະ​ໂຍບາຍ​ຊ່ວຍ​ເຫຼືອ​ປະຊາຊົນ ທີ່​ຕ້ອງ​ຍ້າຍ​ບ່ອນຢູູ່​ແລະ​ຜະລິດ, ຮັບປະກັນ​ຊີວິດ​ການ​ເປັນ​ຢູ່​ຂອງ​ພໍ່​ແມ່​ປະຊາຊົນ​ ພາຍຫຼັງ​ຕັ້ງ​ພູມລຳ​ເນົາ​ໃໝ່ ​ໃຫ້​ໄດ້​ດີກ​ວ່າ​ເກົ່າ ​ແລະ ມີ​ຄວາມສະ​ດວກ​ດີ​ໃນ​ການ​ອອກ​ແຮງ​ງານ ຮ່ຳຮຽນ ພັດທະນາ​ເສດຖະກິດ ຍົກ​ສູ​ງຊີວິດ​ການ​ເປັນ​ຢູ່. ສະ​ຫາຍປະທານສະພາ​ແຫ່ງ​ຊາດ ຫງວຽນ​ຊິງ​ຮຸ່ງ ສະ​ແດງ​ຄວາມ​ດີ​ໃຈ​ຕໍ່​ການ​ປ່ຽນ​ແປງຢ່າງ​ຕັ້ງໜ້າ​ຢູ່​ເມືອງ​ກີ່​ແອ​ງ ​ເຊິ່ງ​ເປັນ​ເຂດ​ຊົນນະບົດ​ທີ່​ມີ​ມູນ​ເຊື້ອ​ປະຕິວັດ, ພວມ​ບືນ​ຕົວ​ຂຶ້ນ​ຢ່າງ​ແຂ​ງແຮງ, ພັດທະນາ​ຢ່າງ​ໄວ​ຕາມ​ທິດ​ຫັນ​ເປັນ​ອຸດສາຫະກຳ; ສະຫາຍ​ປະທານ​ສະພາ​ຫວັງ​ວ່າ ຄະນະ​ພັກ ອຳນາດ​ການ​ປົກຄອງ​ເມືອງ​ກີ່​​ແອ​ງ ຈະ​​ໃຫ້​ຄວາມ​ສຳຄັນເອົາ​ໃຈ​ໃສ່ກວ່າ​ອີກ​ເຖິງ​ວຽກ​ງານ​ລົບ​ລ້າງ​ຄວາມ​ອຶດ​ຫີ​ວ ຫລຸດຜ່ອນ​ຄວາມທຸກ​ຍາກ; ຮັກສາ ​ເສີມ​ຂະຫຍາຍ​ມູນ​ເຊື້ອ​ສາມັກຄີ ​ເປັນ​ຈິດ​ໜຶ່ງ​ໃຈ​ດຽວກັນ​ ລະຫວ່າງ​ປະຊາຊົນ ​ແລະ ອຳນາດ​ການ​ປົກຄອງ, ຮ່ວມ​ມື​ຮ່ວມ​ແຮງ​ກັນ​ພັດທະນາ​ເສດຖະກິດ - ສັງຄົມ, ກໍ່ສ້າງ​ບ້ານ​ເກີດ​ເມືອງ​ນອນ​ກີ່​​ແອ​ງ ​ໃຫ້ນັບ​ມື້​ນັບ​ຂະຫຍາຍຕົວ ຮັ່ງມີ​ສວຍ​ງາມ.

** ​ໃນ​ສອງ​ວັນ ຄື​ວັນ​ທີ 10 ​ແລະ 11 ຕຸລາ 2013, ສະ​ຫາຍ​ປະທານ​ປະ​ເທດ ​ເຈືອງ​ເຕິ​ນຊາງ ພ້ອມ​ກັບ​ຄະນະ​ຜູ້​ແທນສະພາ​ແຫ່ງ​ຊາດ ນະຄອນໂຮ່ຈີ​ມິນ ​ໄດ້​ມີ​ການ​ພົບ​ປະ​ກັບຜູ້​ເລືອກ​ຕັ້ງຢູ່​ເມືອງ​ທີ 4, ​ເມືອງ​ທີ 1 ​ແລະ ​ເມືອງ​ທີ 3 ກ່ອນ​ກອງ​ປະຊຸມ​ສະ​ໄໝ​ສາມັນ​ເທື່ອ​ທີ 6, ສະພາ​ແຫ່ງ​ຊາດຊຸດ​ທີ XIII.

ຢູ່​ທີ່​ການ​ພົບ​ປະ, ມີ​ຫຼາຍ​ບັນຫາ​ທີ່ຜູ້​ເລືອກ​ຕັ້ງ​ໃຫ້​ຄວາມ​ສົນ​ໃຈ ​ແລະ ສະ​ເໜີ​ອອກ​ມາ, ​ໃນ​ນັ້ນ​ພົ້ນ​ເດັ່ນ​ແມ່ນ: ບັນຫາການ​ສໍ້​ລາດ​ບັງ​ຫຼວງ​ໃນ​ປັດຈຸບັນ​ຍັງ​ສັບສົນ​ຫຼາຍ; ບັນຫາ​ການ​ຄົມມະນາຄົມ​ຍັງ​ບໍ່​ທັນ​ຄົບ​ຊຸດ ຍັງ​ເຮັດ​ໃຫ້ການ​ຈະລາຈອນ​ຖືກ​ຕິດ​ຂັດ​ອັດ​ແອ; ບັນຫາ​ການ​ກຳກັບ​ຄຸ້ມ​ຄອງ​ລັດ … ກ່າວ​ປາ​ໄສ​ຕໍ່​ຜູ້​ເລືອກ​ຕັ້ງ​ຂອງນະຄອນ​ໂຮ່ຈີ​ມິນ, ສະ​ຫາຍ​ປະທານ​ປະ​ເທດ ​ເຈືອງ​ເຕິ​ນຊາງ ຂອບ​ອົກ​ຂອບ​ໃຈ​ຕໍ່​ຄວາມ​ຄິດ​ເຫັນ​ທີ່​ຈິງ​ໃຈ ປະ​ເສີດ ກົງ​ໄປ​ກົງ​ມາ​ຂອງຜູ້​ເລືອກ​ຕັ້ງ. ​ເວົ້າ​ກ່ຽວກັບ​ການ​ຕໍ່ສູ້​ຕ້ານການ​ສໍ້​ລາດ​ບັງຫຼວງ, ສະຫາຍປະທານ​ປະ​ເທດ​ໃຫ້​ທັດສະນະ​ວ່າ, ການ​ສໍ້​ລາດ​ບັງ​ຫຼວງ​ແມ່ນ​ບັນຫາ​ທີ່​ໄດ້​ເວົ້າ​ມາຫຼາຍ​ທີ່​ສຸດ​ແລ້ວ, ​ແຕ່​ໃນ​ພາກ​ຕົວ​ຈິງ, ການ​ແກ້​​ໄຂຍັງ​ບໍ່​ໄດ້​ຮັບຜົນສຳ​ເລັດ ຕາມ​ຄວາມ​ຕ້ອງການ​ແທ້​ເທື່ອ ດັ່ງ​ນັ້ນ ຄວາມ​ຂັດຂ້ອງ ຮ້ອນ​ເຄືອງ​ຂອງຜູ້​ເລືອກ​ຕັ້ງ​ແມ່ນ​ຖືກຕ້ອງ​ທີ່​ສຸດ. ສະ​ຫາຍ​ປະທານ​ປະ​ເທດສະ​ເໜີ​ໃຫ້ຜູ້​ເລືອກ​ຕັ້ງ ຈົ່ງ​ພ້ອມ​ກັນ​ກັບ​ບັນດາ​ອົງການ​ພາລະ​ບົດບາດ ປະກອບສ່ວນ​ຄົ້ນ​ເຜີຍ​ກໍລະນີ​ລະ​ເມີດ​ກົດໝາຍ, ສໍ້​ລາດ​ບັງ​ຫຼວງ ​ເພື່ອ​ກຳຈັດ​ຢ່າງ​ເຂັ່ງຄັດ. ​ໂດຍ​ຕາງໜ້າ​ບັນດາ​ສະມາຊິກສະພາ​ແຫ່ງ​ຊາດ ຢູ່​ຫົວ​ໝ່ວຍ​ເລືອກ​ຕັ້ງ​ເລກ 1, ສະ​ຫາຍປະທານ​ປະ​ເທດ ເຈືອງ​ເຕິ​ນຊາງ ​ໄດ້​ສະ​ແດງ​ຄວາມ​ຂອບ​ອົກ​ຂອບ​ໃຈ ​ແລະ ຮັບ​ເອົາ​ຄວາມ​ຄິດ​ຄວາມ​ເຫັນ​ຕ່າງໆ​ຂອງຜູ້​ເລືອກ​ຕັ້ງຢູ່​ເມືອງ​ຕ່າງໆ ທີ່​ຝາກ​ມາ​ໃຫ້​ພັກ, ສະພາ​ແຫ່ງ​ຊາດ, ລັດຖະບານ ​ແລະ ອຳນາດ​ການ​ປົກຄອງ​ຂັ້ນ​ຕ່າງໆ ຂອງນະຄອນ​ໂຮ່ຈີ​ມິນ.

** ຕອນ​ບ່າຍ​ວັນ​ທີ 16 ຕຸລາ, ນາຍົກລັດຖະມົນຕີ ຫງວຽນ​ເຕິ​ນຢຸ໊ງ ​ແລະ ຄະນະ​ຜູ້​ແທນສະພາ​ແຫ່ງ​ຊາດນະຄອນ​ຮາຍຟອງ ​ໄດ້​ພົບ​ປະຜູ້​ເລືອກ​ຕັ້ງເມືອງຫວິງບ໋າວ (ຮາຍຟອງ).

ຢູ່ທີ່ການພົບປະ, ຜູ້​ເລືອກ​ຕັ້ງສະເໜີໃຫ້ລັດສືບຕໍ່ເອົາໃຈໃສ່ເບິ່ງແຍງດູແລບັນດາຄອບຄົວໃນກອບ​ນະ​ໂຍບາຍ, ຜູ້​ມີ​ຄຸນງາມຄວາມດີ​ຕໍ່​ຊາດ, ຜູ້​ປະສົບໄພດ້ອຍ​ຄວາມ​ສາມາດ, ຄົນ​ຈົນ​​ໃນ​ສັງຄົມ; ຊ່ວຍເຫຼືອໂດຍກົງໃຫ້​ແກ່​ຊາວ​ກະສິກອນ​ພັດທະນາ​ການ​ຜະລິດ​ກະສິກຳ, ​ແກ້​ໄຂ​ສົ້ນ​ອອກ​ໃຫ້​ແກ່​ຜະລິດ​ຕະພັນ ​ເປັນ​ຕົ້ນ​ແມ່ນ​ຕໍ່​ກັບ​ເຂົ້າສານ​ເຂົ້າ​ເປືອກ; ​ເອົາ​ໃຈ​ໃສ່​ເປັນ​ສຳຄັນ​ເຖິງ​ການ​ລົງທຶນ​ກໍ່ສ້າງ​ ພື້ນຖານ​ໂຄງ​ລ່າງ​ຄົມມະນາຄົມ​ຊົນນະບົດ... ​ເວົ້າ​ເຖິງ​ຂໍ້​ສະ​ເໜີ​ຂອງຜູ້​ເລືອກ​ຕັ້ງ, ສະຫາຍ​ນາຍົກລັດຖະມັນ​ຕີ ຫງວຽນ​ເຕິ​ນຢຸ໊ງຢືນຢັນ​ວ່າ ພັກ​ ແລະ ລັດ​ຈະ​ສືບ​ຕໍ່​ເອົາ​ໃຈ​ໃສ່​ຊີ້​ນຳ, ​ໃຊ້​ແຫຼ່ງກຳລັງ​ເພື່ອ​ລົງທຶນ​ຢ່າງ​ເໝາະ​ສົມ​ ໃຫ້​ແກ່​ການ​ພັດທະນາ​ແບບ​ຍືນ​ຍົງ​ຂອງ​ຂະ​ແໜງ​ກະສິກຳ. ກ່ຽວ​ກັບ​ການ​ພັດທະນາ​ພື້ນຖານ​ໂຄງ​ລ່າງ, ລັດຖະບານ​ຈະ​ສືບ​ຕໍ່​ເອົາ​ໃຈ​ໃສ່​ຊີ້​ນຳ ຊ່ວຍ​ໜູນ​ໃຫ້​ຮາ​ຍຟອງ​ຜັນ​ຂະຫຍາຍ​ບັນດາ​ໂຄງການພື້ນຖານ​ໂຄງ​ລ່າງ​ຂະໜາດ​ໃຫຍ່, ​ເປັນ​ຕົ້ນ​ແມ່ນ​ບັນດາ​ໂຄງການ​ຈຸດ​ໜັກ​ກ່ຽວ​ກັບ​ການ​ຄົມມະນາຄົມ ຊົນລະປະທານ; ສ້າງ​ເງື່ອນ​​ໄຂ​ອຳນວຍ​ຄວາມ​ສະດວກ​ ເພື່ອ​ໃຫ້​ຮາ​ຍຟອງຊຸກຍູ້​ບັນດາ​ຂະ​ແໜງ​ອາຊີບ​ທີ່​ເປັນ​ທ່າ​ແຮງ ຈຸດ​ໜັກ, ສ້າງ​ເປັນ​ກຳລັງ​ໝູນ​ຊຸກຍູ້​ການພັດທະນາ​ເສດຖະກິດ - ສັງຄົມຂອງ​ທ້ອງ​ຖິ່ນ. ສະຫາຍ​ນາຍົກລັດຖະມັນ​ຕີ ຫງວຽນ​ເຕິ​ນຢຸ໊ງ ສະ​ເໜີ​ໃຫ້​ຄະນະ​ຜູ້​ແທນສະພາ​ແຫ່ງ​ຊາດນະຄອນ​ຮາ​ຍ​ຟອງ ​ເກັບ​ກຳ​ສັງ​ລວມຄວາມ​ຄິດ​ເຫັນ ຂໍ້​ສະ​ເໜີ​ຂອງຜູ້​ເລືອກ​ຕັ້ງ​ໃນ​ທີ່​ການ​ພົບ​ປະ​ນີ້ ​​ແລ້ວສົ່ງ​​ໄປໃຫ້​ບັນດາ​ກະຊວງ ຂະ​ແໜງ​ການ​ພາລະ​ບົດ​ບາດ ​ເພື່ອ​ພິຈາລະນາ ​ແກ້​ໄຂ.

** ກ່ອນ​ນັ້ນ, ຕອນ​ເຊົ້າ​ວັນ​ທີ 24 ກັນຍາ, ສະຫາຍ​ເລ​ໂຮ່ງ​ແອ​ງ, ກຳມະການ​ກົມ​ການ​ເມືອງ, ຜູ້​ປະຈຳການ​ຄະນະ​ເລຂາທິການສູນ​ກາງ ພ້ອມ​ກັບ​ຄະນະ​ຜູ້​ແທນສະພາ​ແຫ່ງ​ຊາດນະຄອນ​ເກິ່ນ​ເທີ ​ໄດ້​ພົບ​ປະກັບຜູ້​ເລືອກ​ຕັ້ງຢູ່​ເມືອງ​ຫວິ​ງ​ແທ້ງ.

ພາຍຫຼັງ​ທີ່​ໄດ້​ຮັບ​ຟັງ​ລາຍງານ​ເບຶ້ງ​ຕົ້ນ​ ກ່ຽວ​ກັບ​ລະບຽບ​ວາລະ​ຄາດກະ​ການ​ເຮັດ​ວຽກ ​ຂອງ​ກອງ​ປະຊຸມ​ສະ​ໄໝ​ສາມັນ​ເທື່ອ​ທີ 6, ສະພາ​ແຫ່ງ​ຊາດຊຸດ​ທີ XIII ​ແລະ ລາຍ​ງານ​ສະພາບ​ການ​ເຄື່ອນ​ໄຫວ​ໃນ 9 ​ເດືອນ​ທີ່​ຜ່ານ​ມາ​ ຂອງ​ຄະນະ​ຜູ້​ແທນ​ສະພາ​ແຫ່ງ​ຊາດນະຄອນ​ເກິ່ນ​ເທີ, ຜູ້​ເລືອກ​ຕັ້ງ​ໄດ້​ມີ​ຄວາມ​ຄິດ​ເຫັນ​ສຸດ​ໃຈ​ຫຼາຍ​ຢ່າງ ປະກອບສ່ວນ​​ໃຫ້ສະພາ​ແຫ່ງ​ຊາດ ກ່ຽວ​ກັບ​ບາງ​ບັນຫາຮ້ອນ​ເຄືອງ​ທີ່​ພວມ​ສະ​ແດງ​ອອກ​ຢູ່​ທ້ອງ​ຖິ່ນ. ຜູ້​ເລືອກ​ຕັ້ງສະ​ເໜີ​ໃຫ້​ພັກ-ລັດ ​ເອົາ​ໃຈ​ໃສ່​ລົງທຶນ​ຫຼາຍ​ກວ່າ​ອີກ​ເພື່ອ​ກໍ່ສ້າງ​ຊົນນະບົດ​ໃໝ່, ​ໃຫ້​ແກ່​ການ​ພັດທະນາ​ກະສິກຳ ຊາວ​ກະສິກ​ອນ ຊົນນະ​ບົດ; ຮັກສາ​ຄວາມ​ໝັ້ນ​ຖ່ຽງຂອງ​ລາຄາ​ເຂົ້າ​ເປືອກ ​ແລະ ລາຄາຜະລິດ​ຕະພັນ​ກະສິກຳ​ອື່ນໆ; ​ເພີ່ມ​ທະວີ​ການປ້ອງກັນ​ຮັກສາຄວາມ​ສະຫງົບ ຄວາມ​ເປັນ​ລະບຽບ​ຮຽບຮ້ອຍ​ສັງຄົມ; ຄົ້ນຄວ້າ ປະກາດ​ໃຊ້​ຂໍ້ກຳນົດ​ຕ່າງໆ ກ່ຽວ​ກັບ​ການ​ທົດ​ແທນ​ຄ່າ​ເສຍ​ຫາຍ​​ໃນ​ການ​ປົດ​ປ່ອຍ​ທີ່​ດິນ ​ໃນ​ບັນດາ​ໂຄງການ​ໃຫຍ່ ​ໃຫ້​ໄດ້​ຢ່າງ​ສົມ​ເຫດ​ສົມ​ຜົນ ສອດຄ່ອງ​ເໝາະ​ສົມ... ສະຫາຍ​ເລ​ໂຮ່ງ​ແອ​ງ ຈົດ​ຈຳ​ຄວາມ​ຄິດ​ເຫັນ​ປະກອບສ່ວນ​ສຸດ​ໃຈ​ ຂອງຜູ້​ເລືອກ​ຕັ້ງເມືອງ​ຫວິ​ງ​ແທ້ງ, ພ້ອມ​ກັນ​ນັ້ນ​ກໍ່​ຊີ້​ນຳ​ອຳນາດ​ການ​ປົກຄອງເມືອງ​ຫວິ​ງ​ແທ້ງ ​ແລະ ນະຄອນ​ເກິ່ນ​ເທີ ​ໃຫ້​ເກ້​ໄຂ​ຢ່າງ​ໄວ​ຄວາມ​ຂ້ອງ​ໃຈ​ຂອງ​ປະຊາຊົນຢູ່​ທ້ອງ​ຖິ່ນ... ບັນດາ​ຄວາມ​ຄິດ​ເຫັນ​ທີ່​ຂຶ້ນ​ກັບ​ສິດ​ຂອບ​ເຂດ​ຂອງ​ລັດຖະບານ ​ແລະ ບັນດາ​ກະຊວງ ຂະ​ແໜງ​ການ, ຄະນະ​ຜູ້​ແທນສະພາ​ແຫ່ງ​ຊາດຈະ​ສະ​ເໜີ​ຕໍ່ສະພາ​ແຫ່ງ​ຊາດ ​ໃນ​ກອງ​ປະຊຸມ​ສະ​​ໄໝ​ສະ​ມັນ​ທີ່​ຈະ​ມາ​ເຖິງ​ນີ້./.

ສັງ​ລວມ​ໂດຍ: ທູ່​ຍລິງ

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ