ວັນອັງຄານ, 22/10/2019
ທົ່ວໂລກເສົ້າສະຫລົດໃຈຕໍ່ການລ່ວງລັບ ຂອງທ່ານພົນເອກ ຫວໍ ຫງວຽນ ຢາບ
4/12/2013 12:9' ສົ່ງ ພິມ
ຮູບຂອງຜູ້ບັນຊາການສູງສຸດກອງທັບປະຊາຊົນຫວຽດນາມ ຢູ່ໃນມືທະຫານທີ່ກຳລັງລໍຖ້າເພື່ອເຂົ້າໄວ້ອາໄລເພິ່ນ. ພາບ: thethaovanhoa.vn

ກະຊວງ​ການ​ຕ່າງປະ​ເທດ ​ເວ​ເນ​ຊູ​ເອວາ ​ໃນ​ແຈ້ງ​ຂ່າວ​ກ່ຽວ​ກັບ​ການ​ມໍລະນະ​ກຳ​ຂອງ ພົນ​ເອກ ຫວໍ ຫງວຽນ ຢາ​ບ ​ໄດ້​ເນັ້ນ​ວ່າ ພົນ​ເອກ ຫວໍ ຫງວຽນ ຢາ​ບ ​ເປັນ​ນັກ​ຍຸດ​ທະ​ສາດ​ລະດັບ​ໂລກ, ​ໄດ້​ອຸທິດ​ໃຫ້​ບັນດາ​ປະຊາ​ຊາດ​ທີ່​ຖືກ​ກົດ​ຂີ່​​ໃນ​ໂລກ ມີ​ທິດ​ສາ​ດີກາ​ນທະຫານ​ອັນ​ເລີດ​ລ້ຳ ທີ່​ໄດ້​ຮັບການ​ພິສູດຢັ້ງຢືນ​ດ້ວຍ​ບັນດາໄຊຊະນະ​ອັນ​ເປັນ​ປະຫວັດສາດ ​ເຊັ່ນ​ໄຊຊະນະ​ດຽນບຽນ​ຝູ ​ແລະ ​ໄຊຊະນະ​ໃນ​ສົງຄາມ​ປົດ​ປ່ອຍ​ຊາດ ​ແລະ ການຮ່ວມ​ປະ​ເທດ​ຊາດ​ເປັນ​ເອກະ​ພາບ.

ພາຍ​ໃຕ້​ຫົວ​ຂໍ້ ພົນ​ເອກ ຫວໍ ຫງວຽນ ຢາ​ບ, ນັກ​ການ​ທະຫານ​ທີ່​ຍິ່ງໃຫຍ່​ຂອງ​ສະຕະ​ວັດທີ XX, ຂ່າວສານ​ແຫ່ງ​ລັດ​ເມ​ຊິ​ໂກ (NOTIMEX) ຢືນຢັນວ່າ ພົນ​ເອກ ຫວໍ ຫງວຽນ ຢາ​ບ ​ເປັນ​ໜຶ່ງ​ໃນ​ບັນດາ​ວິລະບຸລຸດ​ຍິ່ງ​ໃຫຍ່​ທີ່​ສຸດ​ຂອງ​ສະຕະວັດ​ທີ XX.

ທ່ານ ອັບ​ແດນ​ລາ ບູ​ເຕຟລິ​ກາ ປະທານາທິບໍດີປະ​ເທດ ສາທາລະນະ​ລັດ ອານ​ເຢຣີ ​ໄດ້​ຝາກ​ສານ​ແບ່ງປັນ​ຄວາມ​ເສົ້າ​ສະຫລົດ​ໃຈ​ ມາ​ຍັງ​ທ່ານ​ປະທານ​ປະ​ເທດ ​ເຈືອງ​ເຕິ​ນຊາງ, ​ໃນ​ນັ້ນ​ໄດ້​ເນັ້ນ​ວ່າ ຊື່​ສຽງ​ຂອງ​ທ່ານ​ພົນ​ເອກ - ວິລະ​ຊົນ​ກອງ​ທັບ​ແຫ່ງ​ຄວາມ​ເປັນ​ເອກະລາດ​ຂອງ​ຫວຽດນາມ ​ແລະ ​ເປັນ​ຜູ້​ທີ່​ໄດ້​ເຮັດ​ໃຫ້​ລ່າ​ເມືອງ​ຂຶ້ນ​ຝຣັ່ງ ຕ້ອງ​ຫວາດ​ຫວັ່ນ​ສັ່ນ​ສາຍ​ຢູ່​ດຽນບຽນ​ຝູ - “ຈະ​ຈາລຶກ​ໄວ້​ຕະຫຼອດ​ໄປ​ໃນ​ຄວາມ​ຊົງ​ຈຳ​ຂອງ​ປະຊາ​ຊົນອານ​ເຢຣີ”.

ການ​ນຳ​ພັກ​ປະຊາຊົນ​ປະຕິວັດ​ລາວ ​ແລະ ລັດ​ແຫ່ງ ສປປ ລາວ ​ໄດ້​ຍົກຍ້ອງວ່າ: “ສະຫາຍ​ເປັນ​ຜູ້​ທີ່​ໄດ້​ປະກອບສ່ວນ​ອັນ​ຕັ້ງໜ້າ ​ໃຫຍ່​ຫຼວງ​ເຂົ້າ​ໃນ​ການ​ເພີ່ນພູນ​ຄູນ​ສ້າງ ​ແລະ ພັດທະນາ​ສາຍ​ພົວພັນ​ມິດຕະພາບ​ອັນ​ຍິ່ງ​ໃຫຍ່ ຄວາມ​ສາມັກຄີ​ພິ​ເສດ ​ແລະ ການ​ຮ່ວມ​ມື​ຮອບດ້ານ​ລະຫວ່າງ ລາວ - ຫວຽດນາມ”.

ສະຫາຍ ຈູມມາລີ ໄຊຍະສອນ ​ເລຂາທິການ​ໃຫຍ່, ປະທານ​ປ​ະ​ເທດ​ແຫ່ງ ສປປ ລາວ
ວາງ​ພວງມາລາ ​ໄວ້ອາ​ໄລ​ສະຫາຍພົນ​ເອກ ຫວໍ ຫງວຽນ ຢາ​ບ. ພາບ: vov.vn

ຄະນະຜູ້​ແທນ​ຂັ້ນ​ສູງ​ແຫ່ງ ສາທາລະນະ​ລັດ ​ໂມ​ຊຳ​ບິ​ກ ນຳ​ໂດຍ​ພົນ​ເອກ ອານ​​ແບກ​ໂຕ ຈີ​ປານ​ເດ, ອະດີດ​ລັດຖະມົນຕີ​ວ່າການກະຊວງ​ປ້ອງ​ກັນ​ປະ​ເທດ, ກຳມະການ​ກົມ​ການ​ເມືອງພັກ​ແນວ​ໂຮມ​ປົດ​ປ່ອຍ​ຊາດ ​ໂມ​ຊຳ​ບິ​ກ (Frelimo)
ວາງ​ພວງມາລາ ​ໄວ້ອາ​ໄລ ພົນ​ເອກ ຫວໍ ຫງວຽນ ຢາ​ບ. ພາບ: vov.vn

ໃນ​ສາຍຕາ​ຂອງ​ນາງ ມາຣ໌ຕາ ​ໂຣຈາສ, ​ນັກ​ຂ່າວ​ທີ່​ລື​ຊື່​ຂອງ​ປະ​ເທດ​ກູ​ບາ, ຜູ້​ທີ່​ເຄີຍ​ມາ​ຫວຽດນາມ​ຫຼາຍ​ເທື່ອ​ ໃນ​ສະ​ໄໝ​ປະຊາຊົນ​ຫວຽດນາມ​ດຳ​ເນີນ​ການ​ຕໍ່ສູ້​ກູ້​ຊາດ​ ຕ້ານ​ອາ​ເມ​ລິ​ກາ, ​ເຫັນ​ວ່າທ່ານພົນ​ເອກ ຫວໍ ຫງວຽນ ຢາ​ບ ບໍ່​ພຽງ​ແຕ່​ເປັນ​ ນັກ​ຍຸດ​ທະ​ສາດ​ການ​ທະຫານ​ທີ່​ເກ່ງ​ກ້າ​ສາມາດ, ນັກ​ເຄື່ອນ​ໄຫວ​ການ​ເມືອງ​ທີ່​ເຕັນ​ໄປ​ດ້ວຍ​ຄວາມ​ຮັບຜິດຊອບ ຫາກ​ຍັງ​ເປັນ​ຜູ້​ຄ່ຽມຄົມ ສຸພາບ​ມັກງ່າຍ ມີ​ຄວາມ​ເມ​ຕາ ​ແລະ ນ້ຳ​ໃຈມະນຸດສະທຳ.

ບັນດາ​ໜັງສືພິມ​ລາຍ​ວັນ​ອັນ​ດັບ​ໜຶ່ງ​ຂອງ ສິງຄະ​ໂປ The Straits Times, Today ​ແລະ ​ເວັບ​ໄຊ​ຕ໌ ​ໃຫຍ່​ຂອງສິງຄະໂປ ເຊັ່ນ Channel News Asia ໄດ້ລົງພິມບົດໜັງສືພິມຫຼາຍບົດຍົກຍ້ອງ ພົນ​ເອກ ຫວໍ ຫງວຽນ ຢາ​ບ ວ່າເປັນ “ສະຖາປະ​ນິກແຫ່ງໄຊຊະນະຕ່າງໆດ້ານການທະຫານ”... ຂອງຫວຽດນາມ.

ໃນທັນທີ ພາຍຫຼັງຂ່າວການມໍລະນະກຳຂອງພົນ​ເອກ ຫວໍ ຫງວຽນ ຢາ​ບ ໄດ້​ແຜ່ຜາຍກະຈາຍ​ອອກ​ໄປ​ໃນ​ທົ່ວ​ໂລກ, ໜັງ​ສື​ພິມ​ໃຫຍ່​ຫຼາຍ​ສະບັບ​ຢູ່​ປະ​ເທດ​ຈີນ ​ໄດ້​ລົງ​ພິມ​ບົດ​ຄວາມ​ສະ​ແດງ​ຄວາມ​ເຄົາລົບ​ນັບຖື ຕໍ່​ທ່ານ​ນາຍ​ພົນ​ລື​ຊື່ ທີ່​ໄດ້​ຮັບ​ຄວາມ​ເຄົາລົບ​ຮັກ​ແພງ​ຢ່າງ​ສູງ ຢູ່​ຫວຽດນາມ ກໍ່​ຄືຢູ່​ໃນ​ໂລກ. ຄໍ​ລຳ​ການ​ທະຫານ​ຂອງ​ເວັບ​ໄຊ​ຕ໌ ຮວ່ານ​ເກົ໋າ ​ໄດ້​ສະ​ເໜີ 4 ຈຸດ​ທີ່​ພົ້ນ​​ເດັ່ນ​ຂອງພົນ​ເອກ ຫວໍ ຫງວຽນ ຢາ​ບ. ​ໃນ​ນັ້ນ, ເວັບ​ໄຊ​ຕ໌ ຮວ່ານ​ເກົ໋າ ​ໃຫ້​ທັດສະນະ​ວ່າ ພົນ​ເອກ ຫວໍ ຫງວຽນ ຢາ​ບ ​ເປັນ​ໜຶ່ງ​ໃນ​ບັນດາ​ຜູ້​ກໍ່​ຕັ້ງ ກອງ​ທັນ​ປະຊາຊົນ​ຫວຽດນາມ; ​ເຂົ້າ​ຮ່ວມ​ໂດຍ​ກົງ​ໃນ​ສອງ​ການ​ຕໍ່ສູ້​ຕ້ານ ຝຣັ່ງ ​ແລະ ຕ້ານ​ອາ​ເມ​ລິ​ກາ, ບັນຊາ​ຫຼາຍໆ​ບັ້ນ​ຮົບ​ຕ້ານ​ຝຣັ່ງ, ພິ​ເສດ​ແມ່ນ​ບັ້ນ​ຮົບ​ດຽນບຽນ​ຝູ... ​ເປັນ​ເພື່ອນດີ​ຂອງ​ປະຊາຊົນ​ຈີນ, ມີ​ຄຸນງາມຄວາມດີ​ອັນ​ໃຫຍ່​ຫຼວງ​ໃນ​ການ​ເຮັດ​ໃຫ້ການ​ພົວພັນ​ຫວຽດນາມ - ຈີນ​ ເຂົ້າ​ເປັນ​ປົກກະຕິ. ໜັງ​ມື​ພິນ ເຢີນໝີນ​ຢື້​ເປົ້າ ຂຽນ​ວ່າ: “...​ເຖິງ​ວ່າ​ບໍ່​ເລີ່​ມ​ເຮັດ​ວິຊາ​ຊີບ​ຈາກ​ທະຫານ​ກໍ່ຕາມ, ​ແຕ່​ທ່ານ​ລັດຖະມົນຕີ​ວ່າການ​ກະຊວງ​ປ້ອງ​ກັນປະ​ເທ​ດ ຄວບ​ຕຳ​ແໜ່ງຜູ້​ບັນຊາ​ການ​ສູງ​ສຸດ​ກອງທັບ​ປະຊາຊົນ​ຫວຽດນາມ ກໍ່​ໄດ້​ບັນຊາ​ການ​ສູ້​ຮົບ​ໄດ້​ຮັບ​ໄຊຊະນະ​ຫຼາຍ​ຄັ້ງ, ​ໃນ​ນັ້ນ​ມີ​ໄຊຊະນະ​ດຽນບຽນ​ຝູປີ 1954 ທີ່​ໂດ່​ງດັງ​ໄປ​ທົ່ວ​ຫ້າ​ທະວີບ, ກະທົບກະ​ເທືອ​ນທົ່ວ​ໂລກ”.

ຂ່າວສານ AFP ຂອງຝຣັ່ງ ​ໄດ້​ຍົກຍ້ອງພົນ​ເອກ ຫວໍ ຫງວຽນ ຢາ​ບ ວ່າ​ເປັນ​ນັກ​ການ​ທະຫານເກັ່ງ​ກ້າ​ສາມາດ ​ທີ່ໄດ້​ຜາບ​ແພ້​ກອງທັບ​ຝຣັ່ງ ​ແລະ ກອງທັບອາ​ເມ​ລິ​ກາ, ພ້ອມ​ກັນ​ນັ້ນ, ກໍ່​ຢືນຢັນ​ວ່າ ພົນ​ເອກ ​ເປັນ​ຜູ້​ທີ່​ໄດ້​ຮັບ​ຄວາມ​ເຄົາລົບຮັກ​ແພງ​ຂອງ​ປະຊາຊົນ​ຫວຽດນາມ.

ວາລະສານ Time ຂອງ​ອາ​ເມ​ລິ​ກາ ​ໄດ້ພິມຮູບ​ຂອງພົນ​ເອກ ຫວໍ ຫງວຽນ ຢາ​ບ ສາມ​ຄັ້ງ​ໃນ​ໜ້າ​ປົກ​ວາລະສານ. ​ໃນ​ສະບັບ​ອອກ​ເດືອນ​ພຶດສະພາ 1972, ວາລະສານ Time ​ໄດ້​ພິມຄຳ​ສັງ​ເກດ​ຕີ​ລາຄາ​ຂອງ​ຄົນ​ຝຣັ່ງ, ​ທີ່​ເອີ້​ນທ່ານພົນ​ເອກ ຫວໍ ຫງວຽນ ຢາ​ບ ວ່າ​​ເປັນ “ພູ​ເຂົາ​ໄຟ​ທີ່​ປົກ​ຫຸ້ມ​ດ້ວຍ​ຫິມະ​ຂາວ”, ພົນ​ເອກ​ເປັນ​ຜູ້​ທີ່​ມີ​ຄວາມ​ສາມາດ​ເປັນ​ພິ​ເສດ​ດ້ານ​ການ​ທະຫານ, ສີໜ້າ​ເສີຍ​ເວີຍ​ງຽບສະຫງົບ ​ແຕ່​ໃນ​ໃຈ​ພັດ​ຟົດ​ຟື້ນ.

ຂ່າວສານ Reuters ຍົກຍ້ອງພົນ​ເອກ ຫວໍ ຫງວຽນ ຢາ​ບ ວ່າ​ເປັນ​ໜຶ່ງ​ໃນ​ບັນດາຜູ້​ບັນຊາ​ການ​ທະຫານ​ທີ່​ລື​ຊື່​ທີ່​ສຸດ​ໃນ​ສະຕະວັດ​ທີ XX, ມີ​ຄວາມ​ເກັ່ງ​ກ້າ​ສາມາດ​ດ້ານ​ສິນລະປະ​ຍຸດ ທຽບ​ເທົ່າ​ທ່ານ​ນາຍ​ພົນ​ລື​ຊື່​ຕ່າງໆ​ໃນ​ໂລກ​ເຊັ່ນ ທ່ານນາຍ​ພົນ Montgomery ຂອງ ອັງກິດ, ທ່ານ​ນາຍ​ພົນ Rommel ຂອງ​ເຢຍລະ​ມັນ…

​ເວັບ​ໄຊ​ຕ໌ Bloomberg ​ໄດ້​ອ້າງ​ຄຳ​ເວົ້າ​ຂອງ ຮສ Jonathan London ຢູ່​ພາກ​ວິຊາ​ອາຊີແລະສາກົນ​ວິທະຍາ (DAIS) ​ແຫ່ງ​ມະຫາວິທະຍາ​ໄລ ​ໂຮ້ງ​ໂກງ ທີ່ຢືນຢັນ​ວ່າ “ປັດຈຸບັນ​ນີ້ ບໍ່​ມີ​ຜູ້​ໃດ​ທີ່​ມີ​ຄວາມ​ຍິ່ງ​ໃຫຍ່​ເທົ່າ​ກັບພົນ​ເອກ ຫວໍ ຫງວຽນ ຢາ​ບ”.

ສື່​ເອ​ເລັກ​ໂຕຣນິກ Pakistan Observer ​ໃນ​ບົດ​ຄວາມ “ນັກຮົບ​ຜູ້​ໜຶ່ງຕ້ານ​ລັດທິ​ຈັກກະພັດ” ມີ​ຕອນ​ໜຶ່ງ​ຂຽນ​ວ່າ: “...ພົນ​ເອກ ຫວໍ ຫງວຽນ ຢາ​ບ ​ເປັນ​ນັກ​ຍຸດ​ທະ​ສາດ​ການ​ທະຫານ ທີ່​ໄດ້​ຍາດ​ເອົາມະຫາ​ໄຊ​ໃນ​ບັ້ນ​ຮົບ​ດຽນບຽນ​ຝູ ປີ 1954 ​ເຊິ່ງບໍ່​ພຽງ​ແຕ່​ທັບ​ມ້າງ​ຄວາມ​ທະ​ເຍີ​ທະຍານ​ຂອງ​ລັດທິ​ລ່າ​ເມືອງ​ຂຶ້ນ​ຝຣັ່ງ ຢູ່​ຫວຽດນາມ​ເທົ່າ​ນັ້ນ ຫາກ​ຍັງ​ໄດ້​ຊ່ວຍ​ເຫຼືອ​ໃຫ້​ບັນດາ​ກຳລັງ​ຕ້ານ​ຈັກກະພັດ ຢູ່​​ທົ່ວ​ທຸກ​ປະ​ເທດ​ໃນ​ໂລກ​ທີ​ສາມ​ອີກ​ດ້ວຍ...”.

ຂ່າວສານ AP ຂອງ​ອາ​ເມ​ລິ​ກາ ​ໄດ້​ສົ່ງ​ຂ່າວ​ວ່າ ປະຊາຊົນ​ນັບ​ເປັນ​ແສນ​ຄົນ​ໄດ້​ຢືນ​ຢູ່​ຕາມ​ສາຍ​ທາງຍາວ 40 ກມ ​ແຕ່​ໃຈ​ກາງ​ນະຄອນຫຼວງ​ຮ່າ​ໂນ້ຍ ​ເຖິງ​ເດີນ​ບິນ​ໂນ້ຍບ່າຍ ຕອນ​ເຊົ້າ​ວັນທີ 13 ຕຸລາ ​ເພື່ອ​ໄວ້ອາ​ໄລ​ອຳ​ລາ​ຄັ້ງ​ສຸດ​ທ້າຍ​ຕໍ່ ວິລະ​ຊົນ​ເລີດ​ລ້ຳ​ແຫ່ງ​ຊາດ, ຜູ້​ທີ່​ໄດ້ບັນຊາ​ກອງທັບ​ປະຊາຊົນ​ຫວຽດນາມ ຍາດ​ເອົາ​ໄຊຊະນະ​ອັນ​ເປັນ​ປະຫວັດສາດ ຜາບ​ແພ້​ກອງທັບ​ຝຣັ່ງ ​ແລະ ອາ​ເມ​ລິ​ກາ. ຂ່າວສານ AP ຍັງ​ໄດ້​ໃຫ້​ຮູ້​ວ່າ ປະຊາຊົນ​ຫຼາຍ​ຄົນ​ຍັງຮ້ອງເປັນສຽງດັງກ້ອງ “ພົນ​ເອກ ຫວໍ ຫງວຽນ ຢາ​ບ ໝັ້ນຢືນ”, ຫຼາຍຄົນນ້ຳຕາໄຫຼ ຍ້ອນສະເທືອນໃຈ ເມື່ອຂະ​ບວນລົດ​ສົ່ງສະການ​ສະຫາຍ​ພົນ​ເອກ ​ແລ່ນ​ຜ່ານ. ຂ່າວສານ AP ​ໄດ້​ອ້າງ​ຄຳ​ເວົ້າ​ຂອງ​ປະຊາຊົນ​ຄົນ​ໜຶ່ງ​ວ່າ: “ຂ້ອຍ​ຮູ້ສຶກ​ຄື​ວ່າ​​ຍາດຕິ​ຄົນ​ໜຶ່ງ​ຂອງ​ຕົນ​ໄດ້​ລ່ວງ​ລັບໄປ ​ແລະ ພົນ​ເອກ ຫວໍ ຫງວຽນ ຢາ​ບ ຈະມີ​ຊີວິດ​ຢູ່​ຕະຫຼອດ​ໄປ​ໃນ​ໝາກ​ຫົວ​ໃຈ​ຂອງ​ປະຊາຊົນ​ຫວຽດນາມ​ທຸກ​ຄົນ”.

ເວັບ​ໄຊ​ຕ໌ Bloomberg ​ໃຫ້​ຮູ່ວ່າ ນັບ​ແຕ່​ມື້ພົນ​ເອກ ຫວໍ ຫງວຽນ ຢາ​ບ ​ເຖິງ​ແກ່​ມໍລະນະ​ກຳ, ປະຊາຊົນ​ຫວຽດນາມ​ຫຼາຍ​ພັນ​ຄົນ ມີ​ຖື​ດອກ​ເບັນ​ຈະ​ມາດ​ເຫຼືອງ ​ແລະ ​​ໃສ່ໝວກຖື​ກຸບ​ກັນ​ແດດ ຢືນລຽງ​ແຖວ​ຍາວ​ເປັນ​ກິ​ໂລ​ເມັດຕາມ​ທາງ​ເຂົ້າ​ເຮືອນຂອງ​ພົນ​ເອກ ຢູ່​ມີ່​ຖະໜົນຮ່ວາງ​ຢ້ຽວ ​ເພື່​ອເຂົ້າ​ໄວ້ອາ​ໄລ​ເພິ່ນ.../.

ປະຊາຊົນ​ຢືນ​ເປັນ​ແຖວ​ນັບ​ມື້​ນັບ​ຍາວ…​ເພື່ອ​ເຂົ້າ​ໄວ້ອາ​ໄລ ພົນ​ເອກ. ພາບ: tapchicongsan.org.vn

ສັງ​ລວມ​ໂດຍ: ຮວ່າຍ​ເຟືອງ



Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ