ວັນອາທິດ, 18/8/2019
ການເຄື່ອນໄຫວຂອງທ່ານປະທານປະເທດ ຫວຽດນາມ ເຈືອງເຕິນຊາງ ທີ່ກອງປະຊຸມຂັ້ນສູງ APEC 21
6/12/2013 10:18' ສົ່ງ ພິມ
ພາບ: ທ່ານປະທານປະເທດຫວຽດນາມ ເຈືອງເຕິນຊາງ ທີ່ກອງປະຊຸມຂັ້ນສູງ APEC 21

ໃນ​ວາລະ​ທຳ​ອິດ​ຂອງ​ກອງ​ປະຊຸມ​ຂັ້ນສູງ ​ເວທີ​ຮ່ວມ​ມື​ທາງ​ດ້ານ​ເສດຖະກິດ ອາຊີ - ປາຊີ​ຟິກ (APEC) ຄັ້ງ​ທີ 21 ​ແຕ່​ວັນ​ທີ 7 ຕຸລາ 2013, ທ່ານປະທານ​ປະ​ເທດ ເຈືອງ​ເຕິ​ນຊາງ ​ໄດ້​ມີ​ບົດ​ປາ​​​ໄສກ່ຽວ​ກັບ​ບົດບາດ​ຂອງ APEC ​​ໃນ​ການ​ປັບ​ປຸງ​ລະບົບ​ການ​ຄ້າ​ຫຼາຍ​ຝ່າ​ຍ ​ໃນ​ເງື່ອນ​ໄຂ​ສະພາບ​ເສດຖະກິດ​ທົ່ວ​ໂລກ​ໃນ​ປັດຈຸບັນ.

​ໃນ​ບົດ​ປາ​​​ໄສ​ໂດຍ​ຫົວ​ຂໍ້: “​ເປັນ​ເຈົ້າພາບ​ກອງ​ປະຊຸມ​ຂັ້ນສູງ APEC  ຄັ້ງ​ທີ 25, ປີ 2017, ຫວຽດນາມເປັນ​ເຈົ້າ​ການ, ຕັ້ງໜ້າ​ເຂົ້າ​ຮ່ວມ​ການ​ຮ່ວມ​ມື APEC ແລະ ​ເຊື່ອມ​​ໂຍງ​ ອາຊີ - ປາຊີ​ຟິກ”, ທ່ານປະທານ​ປະ​ເທດ ​ເຈືອງ​ເຕິ​ນຊາງ ​ໄດ້​ເນັ້ນວ່າ: ກອງ​ປະຊຸມ​ຂອງ​ພວກ​ເຮົາ ​​ໄດ້​ດຳ​ເນີນ​ໄປ​ໃນ​​ໄລຍະ​ເວລາທີ່​ມີ​ຄວາມ​ໝາຍ​ສຳ​ຄັນ. ພື້ນຖານ​ເສດຖະກິດ​ໂລກ ​ແລະ ລະບົບ​ການ​ບໍລິຫານ​ເສດຖະກິດ,​ ການ​ຄ້າ​ໃນ​ຂອບ​ເຂດ​ທົ່ວ​ໂລກ ສືບ​ຕໍ່​ຫັນປ່ຽນ​ຢ່າງ​ໄວ​ວາ ​ແລະ ​ເລິກ​ເຊິ່ງ... ທຸກ​ການ​ຫັນປ່ຽນ​ດ່ັງ​ກ່າວ ​ໄດ້​ປະກອບສ່ວນ​ອັນ​ຕັ້ງໜ້າ​​ເຂົ້າ​ໃນການຊຸກຍູ້​ທ່າ​ອ່ຽງ​ຮ່ວມ​ມື, ຮ່ວມ​ສຳພັນ ຫັນໄປສູ່ເປົ້າໝາຍລວມ ນັ້ນແມ່ນ ການຄ້າເສລີ ແລະ ການພັດທະນາ ເພື່ອຄຸນນະພາບຊີວິດຂອງປະຊາຊົນ... ​ເຖິງ​ແມ່ນ​ວ່າການ​ຮ່ວມມື ​ແລະ ຮ່ວມ​ສຳພັນ​ທາງ​ດ້ານ​ເສດຖະກິດ​ເປັນ​ທ່າ​ອ່ຽງຕົ້ນຕໍ​, ​ແຕ່ຄຽງ​ຄູ່​ກັນ​ນັ້ນ ການ​ແກ່ງ​ແຍ້ງຍິ່ງ​ດຸ​ເດືອດ ຂ້ຽວຂາດ ​ແລະ ລັດທິ​ປົກ​ປ້ອງ​ມີ​ທ່າ​ອ່ຽງ​ເພີ່ມ​ຂຶ້ນ​. ນີ້​ແມ່ນ​ບັນດາ​ປັດ​ໄຈ​ອັນ​ເລິກ​ເຊິ່ງ ທີ່​ເຮັດ​ໃຫ້ການ​ຄ້າ​ສາກົນ​ຟື້ນ​ຕົວຂາດ​ຄວາມ​ຍືນ​ຍົງ​, ລະບົບ​ການ​ຄ້າ​ຫຼາຍ​ຝ່າຍສືບ​ຕໍ່​ພົບ​ຄວາມ​ຫຍຸ້ງຍາກ ​ແລະ ຮອບ​ວຽນ​ເຈລະຈາ ​ໂດ​ຮາ ຖືກ​ຢຸດ​ສະຫງັກ​ໃນ​​​ເວລາ​ກວ່າທົດ​ສະວັດ.

ຍ້ອນ​ແນວ​ນັ້ນ, ​ໜ້າ​ທີ່​ອັນ​ຮີບ​ດ່ວນ​ຂອງ​ພວກ​ເຮົາ​ໃນ​ປັດຈຸບັນ ​ແມ່ນ​ສູ້​ຊົນ​ສຸດ​ຄວາມ​ສາມາດ ​ເພື່ອ​ເຮັດ​ໃຫ້​ກອງ​ປະຊຸມ WTO ທີ່​ຈະ​ມາ​ເຖິງ​ບັນ​ລຸ​ໄດ້​ໝາກ​ຜົນ​ລະອຽດຕົວ​ຈິງ. ນີ້​ແມ່ນ​ບັນຫາ​ກຸນ​ແຈ ​ແນ​ໃສ່​ຟື້ນ​ຟູ​ຄວາມ​ເຊື່ອ​ໝັ້ນ​ຕໍ່​ລະບົບ​ການ​ຄ້າຫຼາຍ​ຝ່າຍ​ໃນ​ໄລຍະ​ປັດຈຸບັນ... ​ເພື່ອ​ບັນລຸ​ໄດ້​ຕາມ​​ເປົ້າ​ໝາຍ​ດັ່ງກ່າວ, ພວກ​ເຮົາ​ຄວນ​ພ້ອມ​ກັນ​ປະຕິບັດ​ຢ່າງ​ແຂງ​ແຮງ ​ແລະ ສະ​ແດງ​ອອກ​ເຖິງ​ຄວາມໄຫວ​ພິບ​ທີ່​ຈຳ​ເປັນ…

​ໃນ​ສະພາບ​ການ​ສາກົນ ​ແລະ ພາກ​ພື້ນ​ຫັນປ່ຽນ​ຢ່າງ​ເລິກ​ເຊິ່ງ, ຫວຽດນາມມີ​ຜົນ​ປະ​ໂຫຍ​ດ ​ແລະ ກຽມ ພ້ອມທີ່​ຈະ​ຮ່ວມ​ກັບ​ບັນດາ​ສະມາຊິກ​ຂອງ APEC ຜັນ​ຂະຫຍາຍການ​ຮ່ວມ​ສຳພັນ​ທາງ​ດ້ານ​ເສດຖະກິດ​ໃນ​ພາກ ພື້ນຢ່າງ​ແຂງ​ແຮງ, ປະກອບສ່ວນ​ປັບປຸງ​ລະບົບ​ການ​ຄ້າ​ຫຼາຍ​ຝ່າຍ. ບົນ​ຈິດ​ໃຈ​ດ່ັງ​ກ່າວ ​ແລະ​ ​ໄດ້​ຮັບ​ການ​ສະໜັບ ສະໜູນ​ຂອງ​ບັນດາ​ສະມາຊິກ APEC, ຫວຽດນາມຕັດສິນ​​ໃຈ​ທີ່​ຈະ​ເປັນ​ເຈົ້າພາບ​ກອງ​ປະຊຸມ​ຂັ້ນສູງ APEC ຄັ້ງ​ທີ 25 ​ແລະ ການ​ເຄື່ອນ​ໄຫວ​ຂອງ​ເວທີ APEC ​ໃນ​ປີ 2017.

ກອງ​ປະຊຸມຂັ້ນສູງ APEC ຄັ້ງ​ທີ 21 ​ໄດ້​ຕົກລົງ​ເອົາ​ຫວຽດນາມ ​ເປັນ​ເຈົ້າພາບ​ກອງ​ປະຊຸມຂັ້ນສູງ APEC ຄັ້ງ​ທີ 25 ທີ່​ຈະ​ຈັດ​ຂຶ້ນ​ໃນ​ປີ 2017. ນີ້​ເປັນ​​ຄັ້ງ​ທີສອງ ທີ່​ຫວຽດນາມ​ໄດ້​ຮັບ​ຄວາມ​ໄວ້​ເນື້ອ​ເຊື່ອ​ໃຈ​ໃຫ້​ຮັບຜິດຊອບ​ເປັນ​ເຈົ້າພາບ​ຈັດ​ກອງ​ປະຊຸມ APEC, ສະ​ແດງ​ໃຫ້​ເຫັນ​ເຖິງ​ຖານະ​ຂອງ​ຫວຽດນາມ ທີ່ນັບ​ມື້​ນັບ​ສູງ​ຂຶ້ນ​ໃນ​ເວທີ​ສາ​ກົນ.

​ນອກຈາກການ​ເຂົ້າຮ່ວມ​ກອງ​ປະຊຸມ​ຂັ້ນສູງ​ເວທີ​ຮ່ວມ​ມື​ເສດຖະກິດ ອາຊີ - ປາຊີ​ຟິກ, ທ່ານປະທານ​ປະ​ເທດ ​ເຈືອງເຕິ​ນຊາງ ຍັງ​ໄດ້​ມີ​ການ​ພົບ​ປະ ​ແລກປ່ຽນກັບ​ການ​ນຳ​ຂອງ​ຫຼາຍ​ປະ​ເທດອີກ​ດ້ວຍ.

​ໃນ​ການ​ພົບ​ປະ​ກັບ ​ເລຂາທິການ​ໃຫຍ່ ປະທານ​ປະ​ເທດຈີນ ສີ ຈິ້ນຜິງ, ສອງ​ຝ່າຍ​ສະ​ແດງ​ຄວາມ​ດີ​ໃຈ ຕໍ່​ກັບ​ຄວາມ​ຄືບ​ໜ້າ​ອັນ​ຈົບງາມ ​ໃນ​ສາຍ​ພົວພັນ​ລະຫວ່າງ​ສອງ​ພັກ ​ແລະ ​ສອງ​ລັດ, ພິ​ເສດ​ແມ່ນ​ຄວາມ​ຕັ້ງໜ້າ​ໃນ​ການ​ຫັນ​ເປັນຕົວ​ຈິງຕໍ່​ກັບ​ຄວາມ​ຮັບ​ຮູ້​ລວມ ​ແລະ ບົດ​ບັນທຶກ​ທີ່​ສຳຄັນ​ຂອງ​ສອງ​ການ​ນຳ​ຂັ້ນ​ສູງ ພາຍຫຼັງ​ການ​ຢ້ຽມຢາມ ສປ ຈີນ ຂອງ​ທ່ານປະທານ​ປະ​ເທດ ​ເຈືອງເຕິ​ນຊາງ ​ໃນ​ເດືອນ ມິຖຸນາ ທີ່​ຜ່ານ​ມາ.

ທ່ານປະທານ​ປະ​ເທດຕີ​ລາຄາ​ສູງ ຕໍ່​ກັບ​ການ​ເດີນທາງ​ມາ​ຢ້ຽມຢາມຫວຽດນາມ​ເປັນ​ທາງ​ການ​ຂອງ​ທ່ານ ຫລີ່ ​ເຄີ່ຈຽງ ນາຍົກລັດຖະມົນຕີ​ແຫ່ງ ສປ ຈີນ,​ ທີ່​ໄດ້​ປະກອບສ່ວນເຮັດ​ໃຫ້​ສາຍ​ພົວພັນ ຄູ່​ຮ່ວມ​ມື​ຍຸດ​ທະ​ສາດ, ຮອບດ້ານ ຫວຽດນາມ - ຈີນ ​​ເລິກ​ເຊິ່ງ​ເຂົ້າ​ຕື່ມ.

​ໃນ​ການ​ພົບ​ປະລະ​ຫວ່າງ ທ່ານ​ປະທານ​ປະ​ເທດ ​ເຈືອງເຕິ​ນຊາງ ກັບນາຍົກລັດຖະມັນ​ຕີ ຢີ່ປຸ່ນ Shinzo Abe, ສອງ​ຝ່າຍ​ໄດ້​ແລກປ່ຽນກ່ຽວ​ກັບ​ສາຍ​ພົວພັນ​ລະຫວ່າງ​ສອງປະ​ເທດ, ສະ​ແດງ​ຄວາມ​​ເພິ່ງ​ພໍ​ໃຈ ຕໍ່​ກັບ​ຄວາມ​ຄືບ​ໜ້າ​ອັນ​ແຂງ​ແຮງ ຮອບດ້ານ​ຂອງ​ສາຍ​ພົວພັນຄູ່​ຮ່ວມ​ມື​ຍຸດ​ທະ​ສາດ ​ໃນ​ຂົງ​ເຂດ​ການ​ເມືອງ ການ​ຕ່າງປະ​ເທດ ​ເສດຖະກິດ ການ​ຄ້າ ການ​ລົງທຶນ, ວຽກ​ງານ​ປ້ອງ​ປະ​ເທດ​ ປ້ອງກັນ​ຄວາມ​ສະຫງົບ ວັດທະນາ​ທຳ ການ​ສຶກສາ ການ​ພົບ​ປະແລກປ່ຽນ​ລະຫວ່າງ​ປະຊາຊົນ​ສອງ​ປະ​ເທດ...

ສອງຝ່າຍ​ກໍ່​ໄດ້​ມີ​ການ​​ແລກປ່ຽນ​ກ່ຽວ​ກັບ​ບັນຫາ​ສຳຄັນໃຈກາງ ຂອງ​​ກອງ​ປະຊຸມ APEC ຄັ້ງ​ນີ້ ​ແລະ ບັນ ດາ​ບັນຫາ​ທີ່​ພາກ​ພື້ນ ​ແລະ ສາກົນ​ໃຫ້​ຄວາມ​ສົນ​ໃຈ. ສອງ​ຝ່າຍ​ເຫັນ​ດີ​ເປັນ​ເອກະ​ພາບ​ກັນ​ວ່າ ສັນຕິພາບ ສະຖຽນ​ລະ​ພາບ ຄວາມ​ສະຫງົບ ​ແລະ ຄວາມ​ປອດ​ໄຟ ຂອງການ​ຄົມມະນາຄົມ​ທາງ​ທະ​ເລ ​ໃນ​ຂົງ​ເຂດ​ທະ​ເລ​ຕາ​ເວັນ​ອອກ ທະ​ເລ​ຈີນ​ຕາ​ເວັນ​ອອກ ​ແມ່ນ​ມີ​ຄວາມ​ໝາຍ​ສຳຄັນ ຕໍ່​ກັບ​ການ​ພັດທະນາ​ລວມຂອງ​ພາກ​ພື້ນ; ບັນດາ​ປະ​ເທດ​ທີ່​ກ່ຽວ​ຂ້ອງ ຕ້ອງ​ໄດ້​ຮ່ວມ​ກັນ​​ແກ້​ໄຂ​ດ້ວຍ​ສັນຕິ​ວິທີ,​ ​ໃຫ້​ຄວາມ​ເຄົາລົບ​ກົດໝາ​ຍສາກົນ, ​ໃນ​ນັ້ນ​ມີ​ສົນທິສັນຍາ​ຂອງສະຫະ​ປະຊາ​ຊາດ ກ່ຽວ​ກັບ​ກົດໝາຍ​ທະ​ເລ​ປີ 1982 ​ແລະ ບັນດາ​ຫຼັກການ​ປະ​ຕິ​ບັດ​ໃນ​ພາກ​ພື້ນ.

​ໃນ​ການ​ພົບ​ປະລະຫວ່າງທ່ານປະທານ​ປະ​ເທດ ​ເຈືອງເຕິ​ນຊາງ ກັບ​ນາຍົກລັດຖະມົນ​ຕີນິວຊີ​ແລນ ທ່ານ John Key, ການ​ນຳ​ຂອງ​ສອງ​ຝ່າຍ​ໄດ້​ແລກປ່ຽນ​ກ່ຽວ​ກັບບັນດາ​ທິດ​ທາງ​ໃນ​ການ​ຍູ້​ແຮງ​ການ​ຮ່ວມ​ມືຮອບດ້ານ ລະຫວ່າງສອງ​ປະ​ເທດ, ພິ​ເສດ​ແມ່ນ​ເພີ່ມ​ທະວີ​ການ​​ແລກປ່ຽນ​ຄະນະ​ຜູ້​ແທນ​ຂັ້ນ​ສູງ,​ ຈັດ​ຕັ້ງ​ຜັນ​ຂະຫຍາຍ​ໂຄງການ​ເຄື່ອນ​ໄຫວ​ໄລຍະ 2013-2016 ກ່ຽວ​ກັບ​ການ​ຮ່ວມ​ມື​ທາງ​ດ້ານ​ເສດຖະກິດ ການ​ຄ້າ ການ​ລົງທຶນ ກະສິກຳ ການ​ສຶກສາ-ກໍ່ສ້າງ ​ຢ່າງ​ມີປະສິດ​ທິຜົນ...

ທ່ານປະທານ​ປະ​ເທດ ​ເຈືອງເຕີນຊາງ ຮ່ວມ​ກັບປະທານາທິບໍດີ ອິນ​ໂດ​​ເນ​ເຊຍ ໂຊຊີໂລ ບາມບາງ ຢູໂພໂຢໂນ ​ເປັນສັກຂີ​ພິຍານ​ໃຫ້​ແກ່​ລັດຖະມົນຕີ​ການ​ຕ່າງປະ​ເທດ​ສອງ​ປະ​ເທດ ຕາງໜ້າ​ໃຫ້​ແກ່​ລັດຖະບານ​ສອງ​ປະ​ເທດ ລົງ​ນາມ​ໃນ​ໂຄງການ​ເຄື່ອນ​ໄຫວ​ໄລຍະ 2014-2018 ຜັນ​ຂະຫຍາຍ​ສາຍ​ພົວພັນ​ຮ່ວມ​ມື​ຍຸດ​ທະ​ສາດ ຫວຽດນາມ - ອິນ​ໂດ​ເນ​ເຊຍ; ປຶກສາ​ຫາລື​ກັບ​ທ່ານ ຮາດ​ຊານ ​ໂບນກຽດ ປະທານ​ສະພາ​ລາຊາ​ອານາຈັກ ບູ​ໄນ; ພົບ​ປະ​ກັບ​​ນາຍົກລັດຖະມົນຕີ ປາ​ປົວ ນິວກີ​ເນ ທ່ານ ປີ​ເຕີ ​ໂອ​ເນນ; ​ເຂົ້າ​ຮ່ວມ​ກອງ​ປະຊຸມ​ສຳ​ມະ​ນາ​ກັບ​ການ​ນຳ​ຂອງ​​ເກືອບ 20 ສະຫະ​ບໍລິສັດ ບໍລິສັດຍັກ​ໃຫຍ່ ທີ່ຕາງໜ້າພັນທະ​ພາບ​ວິ​ສາ​ຫະກິດອາ​ເມ​ລິ​ກາ ທີ່​ APEC...

ລັດຖະມົນຕີ​ວ່າການ​ກະຊວງ​ການ​ຕ່າງປະ​ເທດຫວຽດນາມ ທ່ານ ຝ້າ​ມບິ່ງມິ​ງ ກໍ່​ໄດ້​ມີ​ການ​ພົບ​ປະ​ກັບ​ທ່ານ ລັດຖະມົນຕີ​ວ່າການ​ກະຊວງ​ການ​ຕ່າງປະ​ເທດ ສະຫະພາບ ​ລັດ​ເຊຍ, ​ແມັກ​ຊິກ​ໂກ ​ແລະ ​ເປ​ຣູ. ​ໃນ​ການ​ພົບ​ປະ​ທ່ານລັດຖະມົນຕີການ​ຕ່າງປະ​ເທດ ຝ້​ມບິ່ງມິ​ງ ​ແລະ ລັດຖະມົນຕີ​ການ​ຕ່າງປະ​ເທດຂອງ​ບັນດາ​ປະ​ເທດດັ່ງກ່າວ ​ໄດ້​ຕີ​ລາຄາ​ສູງ​ຕໍ່​ກັບ​ບາດກ້າວ​ການ​ຂະຫຍາຍຕົວ ​ໃນ​ການ​ພົວພັນ​ສອງ​ຝ່າຍ, ຢືນຢັນ​ເຖິງ​ຄວາມ​ຕັດສິນ​ໃຈ ​ໃນ​ການ​ເພີ່ມ​ທະວີ​ການ​ພົວພັນ​ທີ່​ມີ​ມາ​ແລ້ວ ​ແລະ ຈະ​ສືບ​ຕໍ່​ຮ່ວມ​ມື​ໃຫ້​ດີກ​ວ່າ​ເກົ່າ ​ໃນ​ເວທີ​ພາກ​ພື້ນ ​ແລະ ສາກົນ./.

ໂດຍ: ນດ

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ