ວັນຈັນ, 18/11/2019
ທ່ານນາຍົກລັດຖະມົນຕີ ຫງວຽນເຕິນຢຸ໊ງ ໄປຢ້ຽມຢາມປະເທດສາທາລະນະລັດຝຣັ່ງ ຢ່າງເປັນທາງການ
7/12/2013 14:40' ສົ່ງ ພິມ
ພາບ: ທ່ານນາຍົກລັດຖະມົນຕີ ຫງວຽນເຕິນຢຸ໊ງ ແລະ ທ່ານນາຍົກລັດຖະມົນຕີຝຣັ່ງ ຈີນມາກ ເອຣາອູນ ລົງນາມໃນຖະແຫຼງການຮ່ວມ ກ່ຽວກັບການພົວພັນຄູ່ຮ່ວມຍຸດທະສາດ ຫວຽດນາມ - ຝຣັ່ງ

ໃນ​ຊຸມ​ປີ​ທີ່​ຜ່ານ​ມາ, ສາຍ​ພົວພັນ​ມິດຕະພາບ ການ​ຮ່ວມ​ມື​ອັນ​ເປັນ​ມູນ​ເຊື້ອ​ລະຫວ່າງຫວຽດນາມ - ຝຣັ່ງ ໄດ້ຮັບການເປີດກວ້າງ ແລະ ຂະຫຍາຍຕົວໃນທຸກດ້ານ. ຝຣັ່ງຖືຫວຽດນາມເປັນຄູ່ຮ່ວມບຸລິມະສິດ ​ແລະ ສຳຄັນຢູ່ພາກພື້ນ, ສອງຝ່າຍໄດ້ແລກປ່ຽນຄະນະຜູ້ແທນຂັ້ນຕ່າງໆ ນຳກັນຢ່າງເປັນປະຈຳ ແລະ ມີຫຼາຍກົນໄກຮ່ວມມືທີ່ດີ ຢູ່ໃນເວທີປາໄສສາກົນ ແລະ ພາກພື້ນຕ່າງໆເຊັ່ນ ສະຫະປະຊາຊາດ ເວທີປາໄສການຮ່ວມມືອາຊີ - ເອີຣົບ (ASEM), ອາຊຽນ - ອີຢູ ແລະ ອົງການຈັດຕັ້ງສາກົນກ່ຽວກັບພາສາຝຣັ່ງ (OIF).

ທາງດ້ານເສດຖະກິດ, ຝຣັ່ງເປັນຄູ່ຮ່ວມການຄ້າເອີຣົບໃຫຍ່ທີ່ສາມຂອງຫວຽດນາມ ດ້ວຍມູນຄ່າການຄ້າປີ 2012 ບັນລຸ 3,2 ຕື້ໂດລາສະຫະລັດ. ຄິດຮອດທ້າຍເດືອນທັນວາ 2012, ຝຣັ່ງເປັນນັກລົງທຶນເອີຣົບອັນດັບໜຶ່ງ ທີ່ໄດ້ລົງທຶນຢູ່ຫວຽດນາມ ດ້ວຍຈຳນວນທຶນຈົດ​ທະບຽນ​ກວ່າ 3 ຕື້​ໂດ​ລາ​ສະຫະລັດ ​ແລະ ຍາມ​ໃດ​ກໍ່​ເປັນ​ຜູ້​ຊ່ວຍ​ເຫຼືອ​ທະວິ​ພາຄີ​ທີ່​ໃຫຍ່​ທີ່​ສຸດ​ຂອງ​ຫວຽດນາມ ດ້ວຍ​ລວ​​ມຍ​ອດຈຳນວນ​ທຶນ​ຊ່ວຍ​ເຫຼືອກວ່າ 2,5 ຕື້​ໂດ​ລາ​ສະຫະລັດ.

ຕອນ​ທ່ຽງ​ວັນ​ທີ 25 ກັນຍາ, ທ່ານ​ນາຍົກລັດຖະມົນຕີຫວຽດນາມ ຫງວຽນ​ເຕິ​ນຢຸ໊ງ ​ແລະ ທ່ານນາຍົກລັດຖະມົນຕີຝຣັ່ງ ຈີນ​ມາກ ​ເອຣາອູ​ນ ​ໄດ້​ພົບ​ປະປຶກສາຫາລື ​ແລະ ​ເປັນ​ເອກະ​ພາບກ່ຽວ​ກັບ​ບັນດາ​ທິດ​ທາງ​ໃຫຍ່ ​ແນ​ໃສ່​ຊຸກຍູ້​ການ​ຮ່ວມ​ມື​ລະຫວ່າງ​ສອງ​ປະ​ເທດ; ​ແລກປ່ຽນ​ກ່ຽວ​ກັບ​ບັນດາ​ບັນຫາ​ສາກົນ ​ແລະ ພາກ​ພື້ນ ​ເຊິ່ງທັງ​ສອງ​ຝ່າຍ​ຕ່າງ​ກໍ​ມີ​ຄວາມ​ສົນ​ໃຈ.

ທ່ານ​ນາຍົກລັດຖະມົນຕີຝຣັ່ງ ຈີນ​ມາກ ​ເອຣາອູ​ນ ຖື​ວ່າ ກາ​ນຢ້ຽມຢາມ​ຂອງທ່ານ​ນາຍົກລັດຖະມົນຕີ ຫງວຽນ​ເຕິ​ນຢຸ໊ງ ​ເປັນ​ຫຼັກ​ໝາຍ​ສຳຄັນ​ ໃນ​ການ​ຊຸກຍູ້​ການ​ພົວພັນ​ມິດຕະພາບ​ຮ່ວມ​ມື ລະຫວ່າງ​ສອງ​ປະ​ເທດ; ຕີ​ລາຄາ​ສູງ ​​ຜົນສຳ​ເລັດ​ໃນ​ການ​ພັດທະນາ​ເສດຖະກິດ - ສັງຄົມ​ຂອງ​ຫວຽດນາມ, ​ເປັນ​ຕົ້ມ​ແມ່ນ​ຄວາມ​ພະຍາຍາມ​ຜ່ານ​ຜ່າ​ວິ​ກິດ​ການ​ເສດຖະກິດ​ໃນ​ເວລາ​ທີ່​ຜ່ານ​ມາ. ທ່ານ​ນາຍົກລັດຖະມົນຕີຝຣັ່ງ ຈີນ​ມາກ ​ເອຣາອູ​ນ ກໍ່​ຕີ​ລາຄາ​ວ່າ​ຫວຽດນາມ​ມີ​ບົດບາດ​ທີ່​ຕັ້ງ​ນັບ​ມື້​ນັບ​ສູງ ​ໃນ​ເວທີ​ສາກົນ, ພິ​ເສດ​ແມ່ນ​ມີ​ບົດບາດ​ສຳຄັນ​ ໃນ​ຂະ​ບວນວິວັດ​ການ​ກໍ່ສ້າງ​ປະຊາ​ຄົມ​ອາ​ຊຽນ, ພ້ອມ​ກັນ​ນັ້ນ​ກໍ່​ຢືນຢັນ​ຄວາມ​ປາຖະໜາ​ໄດ້​ຊຸກຍູ້​ການ​ຮ່ວມ​ມື​ກັບ​ຫວຽດນາມ ໃນ​ຂົງ​ເຂດ​ຕ່າງໆ.

ທ່ານ​ນາຍົກລັດຖະມົນຕີ ຫງວຽນ​ເຕິ​ນຢຸ໊ງ ຢືນຢັນ​ແຜນ​ນະ​ໂຍບາຍ​ສະ​ເໝີ​ຕົ້ນ​ສະ​ເໝີ​ປາຍ​ຂອງ​ຫວຽດນາມທີ່ຖື​ການ​ພົວພັນ​ກັບ​ຝຣັ່ງ​ ເປັນ​ສຳຄັນ​ທີ່​ສຸດ. ການ​ພົວພັນ​ຄູ່​ຮ່ວມ​ຍຸດ​ທະ​ສາດ​ແມ່ນ​ຈຸດ​ເລີ່​ມຕົ້ນ​ໃໝ່ ທີ່​ມີ​ຫຼາຍ​ໂອກາດສິ່ງ​ອຳນວຍ ​ແລະ ​ແງ່​ຫວັງ​ດີ​ໃຫ້​ແກ່​ການ​ຮ່ວມ​ມື, ນັບ​ທັງ​ຮ່ວມ​ມື​ທະວິ​ພາຄີ ​ແລະ ພະຫຸ​ພາຄີ ​ເຊິ່ງຮຽກຮ້ອງ​ຄວາມ​ມານະ​ພະຍາຍາມ​ອັນ​ໃຫຍ່ຫຼວງ ຂອງ​ສອງ​ຝ່າຍ. ທ່ານ​ນາຍົກລັດຖະມົນຕີສະ​ເໜີ​ໃຫ້​ຝ່າຍ​ຝຣັ່ງ ສ້າງ​ເງື່ອນ​ໄຂ​ອຳນວຍ​ຄວາມ​ສະດວກ​ໃຫ້​ສິນຄ້າ​ຫວຽດນາມ ​ເຂົ້າປະ​ເທດ​ຝຣັ່ງ, ສົ່ງ​ເສີມ​ບັນດາ​ການຈັດ​ຕັ້ງ​ສິນ​ເຊື່ອ​ຝຣັ່ງ ​ເຂົ້າ​ຮ່ວມ​ໃນ​ການຈັດ​ວາງ​ໂຄງ​ປະກອບ​ລະບົບ​ທະນາຄານ​ຄືນ​ໃໝ່ ​ແລະ ​ເຂົ້າ​ຮ່ວມ​ໂຄງການ​ໄຟ​ຟ້າ ​ເອ​ເລັກ​ໂຕຣນິກ ​ໂທລະ​ຄົມມະນາຄົ​ມ, ພະລັງງານ​ສ້າງ​ຂຶ້ນ​ໃໝ່...

ທ່ານ​ນາຍົກລັດຖະມົນຕີທັງ​ສອງ​ໄດ້​ເປັນ​ເອກະ​ພາບ​ກັນ​ວ່າ ​ໃນ​ເວລາ​ທີ່​ຈະ​ມາ​ເຖິງ​ນີ້​ຈະ​ໄດ້​ເພີ່ມ​ທະວີ​ການ​ພົບ​ປະ ​ແລກປ່ຽນ​ຄະນະຜູ້​ແທນ​ຂັ້ນ​ສູງຢ່າງ​ເປັນ​ປະຈຳ​ກວ່າ​ອີກ, ຊຸກຍູ້​ການ​ຮ່ວມ​ມື​ໃນ​ຂົງ​ເຂດການ​ປ້ອງ​ກັນປະ​ເທດ - ປ້ອງ​ກັນ​ຄວາມ​ສະຫງົບ, ​ເສດຖະກິດ - ການ​ຄ້າ - ການ​ລົງທຶນ, ວິທະຍາສາດ​ເຕັກ​ໂນ​ໂລ​ຊີ, ສຶກສາ​ກໍ່ສ້າງ...; ​ເພີ່ມ​ທະວີການ​ຮ່ວມ​ມື ​ແລະ ສະໜັບສະໜູນ​ເຊິ່ງກັນ​ແລະ​ກັນ ​ໃນ​ການ​ມີ​ສ່ວນ​ຮ່ວມ​ໃນ​ບັນດາ​ການຈັດ​ຕັ້ງ​ສາກົນ.

ກ່ຽວ​ກັບ​ບັນຫາ​ທະ​ເລ​ຕາ​ເວັນ​ອອກ, ຝ່າຍ​ຝຣັ່ງ​ແບ່ງປັນ ສະໜັບສະໜູນ​ຫຼັກ​ໝັ້ນ​ສະ​ເໝີ​ຕົ້ນ​ສະ​ເໝີ​ປາຍຂອງ​ຫວຽດນາມທີ່​ວ່າ ​ແກ້​ໄຂ​ການ​ພິພາດ​ຕ່າງໆ​ຢູ່​ທະ​ເລ​ຕາ​ເວນ​ອອກ​ດ້ວຍ​ສັນຕິ​ວິທີ, ບົນ​ພື້ນຖານ​ເຄົາລົບ​ກົດໝາຍ​ສາກົນ, ​ໃນ​ນັ້ນ​ມີ​ສົນທິສັນຍາ​ຂອງ​ສະຫະ​ປະຊາ​ຊາດ​ກ່ຽວ​ກັບ​ກົດໝາຍ​ທະ​​ເລ (ປີ 1982), ປະຕິບັດ​ຢ່າງ​ເຂັ້ມ​ງວດ​ຖະ​ແຫຼ​ງການ​ວ່າ​ດ້ວຍ​ວິທີ​ການ​ປະພຶດ ​ຂອງ​ຝ່າຍ​ຕ່າງໆ​ຢູ່​ທະ​ເລ​ຕາ​ເວັນ​ອອກ (DOC) ​ແລະ ກໍ່ສ້າງ​ໂດຍ​ໄວ​ປະມວນຂໍ້​ກຳນົດກ່ຽວ​ກັບ​ການ​ປະພຶດ​ ຂອງ​ບັນດາ​ຝ່າຍ​ຢູ່​ທະ​ເລ​ຕາ​ເວັນ​ອອກ (COC).

​ໃນ​ທັນທີ​ພາຍຫຼັງການ​ພົບ​ປະ​ປຶກສາ​ຫາລື, ທ່ານ​ນາຍົກລັດຖະມົນຕີ ຫງວຽນ​ເຕິ​ນຢຸ໊ງ ​ແລະ ທ່ານນາຍົກລັດຖະມົນຕີຝຣັ່ງ ຈີນ​ມາກ ​ເອຣາອູ​ນ ​ໄດ້​ລົງ​ນາມ​ໃນ​ຖະ​ແຫຼ​ງການ​ຮ່ວມກ່ຽວ​ກັບ​ການ​ພົວພັນ​ຄູ່​ຮ່ວມ​ຍຸດ​ທະ​ສາດ​ ລະຫວ່າງ​ສາທາລະນະ​ລັດ​ສັງຄົມ​ນິຍົມ​ຫວຽດນາມ ​ແລະ ສາ​ທາ​ລະນະ​ລັດ​ຝຣັ່ງ ​ແລະ ​ເປັນ​ສັກຂີ​ພະຍານການ​ລົງ​ນາມ​ໃນບາງ​ເອກະສານ​ການ​ຮ່ວມ​ມື​ລ​ະຫ​ວ່າງສອງ​ປະ​ເທດ… ຕໍ່​ຈາກ​ນັ້ນ ສອງ​ທ່ານ​ນາຍົກລັດຖະມົນຕີ​ໄດ້​ພົບ​ປະ​ກັບ​ສື່​ມວນ​ຊົນ ​ເພື່ອ​ແຈ້ງ​ຂ່າວ​ກ່ຽວ​ກັບ​ຜົນ​ຂອງການ​ພົບ​ປະ​ປຶກສາ​ຫາລື​ລະຫວ່າງ​ສອງ​ຝ່າຍ.

ຕອນ​ຄ່ຳ​ວັນ​ທີ 25 ກັນຍາ, ທ່ານ​ນາຍົກລັດຖະມົນຕີ ຫງວຽນ​ເຕິ​ນຢຸ໊ງ ​ໄດ້​ພົບ​ປະ​ກັບປະທານາທິບໍດີ​ຝຣັ່ງ ທ່ານ​ຟຣັງຊວາ ​ໂຮ​ລັງ ​ເພື່ອ​ແລກປ່ຽນ​ກ່ຽວ​ກັບ​ມາດ​ຕະການ​ຕ່າງໆ ​ແນ​ໃສ່​ຊຸກຍູ້​ການ​ພົວພັນ​ລະຫວ່າງ​ສອງ​ປະ​ເທດ. ທ່ານປະທານາທິບໍດີ​ ​ຟຣັງຊວາ ​ໂຮ​ລັງ ​ຕີ​ລາຄາ​ສູງ​ຕໍ່​ຜົນ​ຂອງ​ການ​ພົບ​ປະ​ປຶກສາ​ຫາລື​ ລ​ະຫວ່າງທ່ານ ນາຍົກລັດຖະມົນຕີ ຫງວຽນ​ເຕິ​ນຢຸ໊ງ ​ແລະ ທ່ານ​ນາຍົກລັດຖະມົນຕີ ຈີນ​ມາກ ​ເອຣາອູ​ນ; ​ເຊື່ອ​ໝັ້ນ​ຕໍ່​ການ​ທີ່​ສອງ​ປະ​ເທດ​ຍົກ​ລະດັບ​ການ​ພົວພັນ​ຢ່າງ​ເປັນ​ທາງ​ການ​ ຂຶ້ນ​ເປັນຄູ່​ຮ່ວມ​ຍຸດ​ທະ​ສາດ ​ເຊິ່ງ​ເປັນ​ຂີດ​ໝາຍ​ສຳຄັນ​ໃນ​ການ​ຊຸກຍູ້​ການ​ຮ່ວມ​ມື​ລະຫວ່າງ​ສອງ​ປະ​ເທດ​ໃນ​ຂົງ​ເຂດ​ຕ່າງໆ; ຢືນຢັນ​ຄວາມ​ສະໜັບສະໜູນ​ການ​ຮ່ວມ​ມື​ລະຫວ່າງ​ສອງ​ປະ​ເທດ, ​ເປັນ​ຕົ້ນ​ແມ່ນ​ໃນ​ຂົງ​ເຂດ​ການ​ປ້ອງ​ກັນ​ຄວາມ​ສະຫງົບ - ປ້ອງ​ກັນປະ​ເທດ, ​ເສດຖະກິດ, ການ​ຄ້າ, ການ​ລົງທຶນ, ວິທະຍາສາດ​ເຕັກ​ໂນ​ໂລ​ຊີ, ຊ່ວຍ​ເຫຼືອ​ເພື່ອ​ພັດທະນາ…

ທ່ານປະທານາທິບໍດີ​ ​ຟຣັງຊວາ ​ໂຮ​ລັງ ກໍ່​ໄດ້​ຢືນຢັນ​ວ່າ ຝຣັ່ງຈະ​ສືບ​ຕໍ່​ຊຸກຍູ້​ການ​ພົວພັນ​ຫວຽດນາມ - ອີ​ຢູ ບົນ​ພື້ນຖານ​ສັນຍາ​ວ່າ​ດ້ວຍ​ການ​ພົວພັນ​ຄູ່​ຮ່ວມ ​ແລະ ຮ່ວມ​ມື​ຮອບດ້ານ (PCA), ສະໜັບສະໜູນ​ຫວຽດນາມ​ໃນ​ການ​ເຈລະຈາ​ສັນຍາ​ການ​ຄ້າ​ເສລີ (FTA) ຫວຽດນາມ - ອີ​ຢູ ​ແລະ ການຮ່ວມມື​ໃນ​ບັນດາ​ເວທີ​ປາ​ໄສ​ສາກົນ...

ທ່ານປະທານາທິບໍດີ​ ​ຟຣັງຊວາ ​ໂຮ​ລັງ ​ແລະ ທ່ານ​ນາຍົກລັດຖະມົນຕີ ຫງວຽນ​ເຕິ​ນຢຸ໊ງ ​ໄດ້​ເປັນ​ເອກະ​ພາບກັນວ່າ ສອງ​ຝ່າຍ​ສືບ​ຕໍ່​ເພີ່ມ​ທະວີການ​ຮ່ວມ​ມື ​ແລະ ສະໜັບສະໜູນ​ຊຶ່ງ​ກັນ​ແລະກັນ ​ໃນ​ບັນດາ​ເວທີ​ປະ​ໄສ​ສາກົນ, ​ເປັນ​ຕົ້ນ​ແມ່ນ​ເວທີ​ສະຫະ​ປະຊາ​ຊາດ. ສະໜັບສະໜູນ​ຫຼັກ​ໝັ້ນ​ສະ​ເໝີ​ຕົ້ນ​ສະ​ເໝີ​ປາຍ​ຂອງ​ຫວຽດນາມ ​ໃນ​ການ​ແກ້​ໄຂ​ການ​ພິພາດ​ຕ່າງໆ​ ຢູ່​ທະ​ເລ​ຕາ​ເວັນ​ອອກ ດ້ວຍ​ສັນຕິ​ວິທີ, ບົນພື້ນຖານ​ກົດໝາຍ​ສາກົນ.

ຢູ່ໃນ​ລາຍການ​ຢ້ຽມຢາມ​ປະ​ເທດ​ສາທາລະນະ​ລັດ​ຝຣັ່ງຢ່າງ​ເປັນ​ທາງ​ການຄັ້ງ​ນີ້, ທ່ານ​ນາຍົກລັດຖະມົນຕີ ຫງວຽນ​ເຕິ​ນຢຸ໊ງ ​ໄດ້​ພົບ​ປະ​​ກັບ​​ປະທານ​ສະພາ​ສູງ​ຝຣັ່ງ ທ່ານ ຈີນ-ປີ​ແອຣ ​ແບນ; ຕ້ອນຮັບ​ລັດຖະມົນຕີ​ວ່າການ​ກະຊວງ​ປ້ອງ​ກັນ​ປະ​ເທດ​ຝຣັ່ງ ທ່ານ ​ລີ ​ເດຣນ; ​ຕ້ອນຮັບເລຂາທິການ​ທົ່ວ​ປະ​ເທດພັກ​ກອມ​ມູນິດ​ຝຣັ່ງ ທ່ານ ປີ​ແອຣ ລໍ​ແຣນ ​ແລະ ປະທານສະມາຄົມ​ມິດຕະພາບ​ຝຣັ່ງ - ຫວຽດນາມ ທ່ານ​ປາຕຣິກ ຈອຣ​ແລນ./.

ສັງ​ລວ​ມ​ໂດຍ: ຫງວຽນ​ດຶກ

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ