ວັນເສົາ, 21/9/2019
ທ່ານປະທານາທິບໍດີ ວະລາດີເມຍ ປູຕີນ ແຫ່ງສະຫະພາບລັດເຊຍ ຢ້ຽມຢາມປະເທດຫວຽດນາມຢ່າງເປັນທາງການ
12/2/2014 16:31' ສົ່ງ ພິມ
ທ່ານເລຂາທິການໃຫຍ່ພັກກອມມູນິດຫວຽດນາມ ຫງວຽນຝູຈ້ອງ ຕ້ອນຮັບ ທ່ານປະທານາທິບໍດີສະຫະພາບລັດເຊຍ ວ.ປູຕີນ. ພາບຂອງ: TTXVN

ໃນບັນດາການພົບປະນັ້ນ, ສອງຝ່າຍໄດ້ແຈ້ງໃຫ້ກັນຊາບກ່ຽວກັບສະພາບການການເມືອງ ເສດຖະກິດ ສັງຄົມ ແລະ ນະໂຍບາຍການຕ່າງປະເທດຂອງແຕ່ລະປະເທດ; ແລກປ່ຽນຄວາມຄິດຄວາມເຫັນ ກ່ຽວກັບການພົວພັນທະວິພາຄີ ແລະ ບັນດາບັນຫາສາກົນ ແລະ ພາກພື້ນທີ່ທັງສອງຝ່າຍຕ່າງກໍ່ສົນໃຈ. ການນຳຂອງສອງປະເທດໄດ້ຕີລາຄາສູງ ຕໍ່ການຍົກລະດັບ ການພົວພັນລະຫວ່າງສອງຝ່າຍ ຂຶ້ນເປັນການພົວພັນຄູ່ຮ່ວມຍຸດທະສາດຮອບດ້ານ; ໃຫ້ທັດສະນະວ່າ ການພົວພັນດ້ານການເມືອງຫວຽດນາມ - ສະຫະພາບລັດເຊຍ ພວມຂະຫຍາຍຕົວຢ່າງແຂງແຮງ ດ້ວຍລະດັບຄວາມເຊື່ອໝັ້ນສູງ, ເປັນເອກະພາບນຳກັນວ່າ ຈະສືບຕໍ່ປະຕິບັດກົນໄກແລກປ່ຽນຄະນະຜູ້ແທນ ແລະ ພົບປະແລກປ່ຽນຂັ້ນສູງ, ເປີດກວ້າງບັນດາການຮ່ວມມືຕາມສາຍພັກ ລັດ ລັດຖະບານ ສະພາແຫ່ງຊາດ ກະຊວງ ຂະແໜງການ ແລະ ບັນດາທ້ອງຖິ່ນ. ສອງຝ່າຍເນັ້ນໜັກເຖິງການບຸລິມະສິດພັດທະນາການຮ່ວມມື ໃນຂົງເຂດພະລັງງານ; ຢັ້ງຢືນເຖິງການສືບຕໍ່ການຮ່ວມມື ໃນບັນດາຂົງເຂດເຊັ່ນ ຂຸດຄົ້ນແຮ່ທາດ, ຄົມມະນາຄົມ ກວມທັງການບິນພົນລະເຮືອນ ຕໍ່ກ່ຳປັ່ນທະເລ ປະດິດເຄື່ອງຈັກ ສື່ຂ່າວ ແລະ ໂທລະຄົມມະນາຄົມ. ສອງຝ່ານໃຫ້ທັດສະນະວ່າ ຕ້ອງຕັ້ງໜ້າຊຸກຍູ້ການຮ່ວມມື ລະຫວ່າງບັນດາທ້ອງຖິ່ນຂອງສອງປະເທດ ຕາມທິດແທດຈິງ ແລະ ມີປະສິດທິຜົນ, ໃນນັ້ນ ຄົ້ນຄວ້າຄວາມສາມາດຮ່ວມມືລົງທຶນ ກໍ່ສ້າງເຂດອຸດສາຫະກຳເບົາຢູ່ພາກຕາເວັນອອກໄກ ຂອງສະຫະພາບລັດເຊຍ. ການ​ນຳ​ຂອງ​ສອງ​ປະ​ເທດ​ກໍ່​ໄດ້​ຮັບ​ຮູ້ ການ​ປະກອບສ່ວນ​ພໍ​ສົມ​ຄວາມ ​ຂອງ​ພົນລະ​ເມືອງ​ຫວຽດນາມທີ່​ພວມ​ດຳລົງ​ຊີວິດ ​ແລະ ຮ່ຳຮຽນ​ຢູ່ລັດເຊຍ ​ແລະ ການ​ປະກອບ​ສ່ວນ ຂອງ​ພົມ​ລະ​ເມືອງລັດ​ເຊຍທີ່​ພວມ​ດຳລົງ​ຊີວິດ ​ແລະ ຮ່ຳຮຽນ​ຢູ່​ຫວຽດນາມ ​​ເຂົ້າໃນ​ການ​ຮັກສາ ​ແລະ ​ເສີມ​ຂະຫຍາຍ​ສາຍ​ພົວພັນມິດຕະພາບອັນ​ເປັນ​ມູນ​ເຊື້ອ, ການ​ຊ່ວຍ​ເຫຼືອ ​ແລະ ຮ່ວມ​ມື​ຮອບດ້ານ​ລະຫວ່າງ​ສອງ​ລັດ ​ແລະ ປະຊາຊົນ​ສອງ​ປະ​ເທດ.

ປະທານປະ​ເທດ ​ເຈືອງ​ເຕິ​ນຊາງ ພົບ​ປະ​ປຶກສາ​ຫາລື​ກັບ
    ປະທານາທິບໍດີລັດ​ເຊຍ ວ.ປູຕີນ. ພາບ​ຂອງ: TTXVN   

 ໃນບັນຍາກາດ​ມິດຕະພາບ​ອັນ​ເປັນ​ມູນ​ເຊື້ອ, ​ສະໜິດສະໜົມ ​ແລະ ​ໄວ້​ວາງ​​ໃຈກັນຂອງການ​ພົບ​ປະ​ປຶກສາ​ຫາລືລະຫວ່າງທ່ານປະທານປະ​ເທດ ​ເຈືອງ​ເຕິ​ນຊາງ ​ແລະ ທ່ານປະທານາທິບໍດີລັດ​ເຊຍ ວ.ປູຕີນ, ທ່ານ​ການ​ນຳ​ທັງ​ສອງ​ໄດ້​ແຈ້ງ​ໃຫ້​ກັນຊາ​ບ ກ່ຽວ​ກັບ​ສະພາບ​ການ​ການ​ເມືອງ ​ເສດຖະກິດ ສັງຄົມ ​ແລະ ນະໂຍບາຍ​ການ​ຕ່າງປະ​ເທດ ​ຂອງ​ແຕ່ລະ​ປະ​ເທດ; ​ແລກ​ປ່ຽນ​ຄວາມ​ຄິດ​ຄວາມ​ເຫັນ​ກ່ຽວ​ກັບ ​ບັນດາ​ບັນຫາ​ພົວພັນ​ສອງ​ຝ່າຍ ​ແລະ ບັນດາ​ບັນຫາ​ສາກົນ​ ແລະ ພາກ​ພື້ນ​ທີ່​ທັງ​ສອງ​ຝ່າຍ​ລ້ວນ​ແຕ່​ມີ​ຄວາມ​ສົນ​ໃຈ. ສິ້ນສຸດ​ການ​ພົບ​ປະ​ປຶກສາ​ຫາລື​ຂັ້ນ​ສູງ, ທ່ານ​ປະ​ທານ​ປະ​ເທດ ​ເຈືອງ​ເຕິ​ນຊາງ ​ແລະ ທ່ານປະທານາທິບໍດີ ວ.ປູຕີນ ​ໄດ້​ເປັນ​ສັກຂີ​ພະຍານ​ ພິທີ​ເຊັນ​ສັນຍາ​ການ​ຮ່ວມ​ມື​ທີ່​ສຳຄັນຫຼາຍສະບັບ ກ່ຽວ​ກັບ​ຫຼາຍ​ຂົງ​ເຂດ, ​ໃນ​ນັ້ນ​ມີ​ ສັນຍາ​ລະຫວ່າງ​ລັດຖະບານ​ ກ່ຽວ​ກັບ​ການ​ກໍ່ສ້າງ​ພົນລະ​ເມືອງ​ຫວຽດນາມ​ ຢູ່ສະຫະພາບລັດເຊຍ, ສັນຍາ​ລະຫວ່າງ​ລັດຖະບານ ກ່ຽວ​ກັບ​ການ​ມອບ​ສົ່ງ​ຜູ້​ທີ່​ຖືກ​ຕັດສິນ​ລົງ​​ໂທ​ດຈຳ​ຄຸກ, ສັນຍາ​ລະຫວ່າງ​ລັດຖະບານ ກ່ຽວ​ກັບ​ການ​ຮ່ວມ​ມື​ດ້ານ​ການ​ປ້ອງ​ກັນ​ປະ​ເທດ ​ແລະ ຂໍ້​ຕົກລົງ​ຂັ້ນ​ກະຊວງ ຂະ​ແໜງ​ການຫຼາຍ​ສະບັບ ​ແລະ ບັນດາ​ສັນຍາ​ເສດຖະກິດ​ອື່ນ​ອີກ.

ທ່ານ​ເລຂາທິການ​ໃຫຍ່ພັກ​ກອມ​ມູນິດ​ຫວຽດນາມ ຫງວຽນ​ຝູຈ້ອງ ຕ້ອນຮັບ
ທ່ານປະທານາທິບໍດີສະຫະພາບ
ລັດ​ເຊຍ ວ.ປູຕີນ. ພາບ​ຂອງ: TTXVN





      ** ພາຍ​ລັງກາ​ນພົບ​ປະ​ປຶກສາ​ຫາລື, ຕອນ​ແລງວັນ​ທີ 12 ພະຈິກ, ຢູ່​ທີ່​ສຳນັກງານ​ສູນ​ກາງ​ພັກ​ກອມ​ມູນິດ​ຫວຽດນາມ, ທ່ານ​ເລຂາທິການ​ໃຫຍ່ ຫງວຽນ​ຝູຈ້ອງ​ ໄດ້​ໃຫ້ການ​ຕ້ອນຮັບຢ່າງ​ອົບ​ອຸ່ນສະໜິດສະໜົມ ທ່ານປະທານາທິບໍດີສະຫະພາບລັດເຊຍ ວ.ປູຕີນ. ທ່ານ​ເລຂາທິການ​ໃຫຍ່ ຫງວຽນ​ຝູຈ້ອງ​ ​ໄດ້​ສະ​ແດງ​ຄວາມ​ຊົມ​ເຊີຍ​ຢ່າງ​ສຸດ​ອົກ​ສຸດ​ໃຈ ​ແລະ ຕີ​ລາຄາ​ສູງ ຕໍ່​ຄວາມ​ໝາຍ​ຂອງການມາ​ຢ້ຽມຢາມຫວຽດນາມ​ຂັ້ນ​ລັດ ຂອງ​ທ່ານ ວ.ປູຕີນ ປະທານາທິບໍດີ​ແຫ່ງສະຫະພາບລັດເຊຍ, ຖື​ວ່າ ນີ້​ແມ່ນ​ເຫດການ​ທີ່​ສຳຄັນຍິ່ງ, ສ້າງ​ກຳ​ລັງດັນ​ໃໝ່​ ຊຸກຍູ້​ຢ່າງ​ແຂ​ງແຮງການ​ພົວພັນ​ມິດຕະພາບ​ອັນ​ເປັນ​ມູນ​ເຊື້ອ ​ແລະ ຄູ່​ຮ່ວມ​ຍຸດ​ທະ​ສາດ​ຮອບດ້ານ ລະຫວ່າງ​ສອງ​ປະ​ເທດ​ຫວຽດນາມ ​ແລະ ສະຫະພາບລັດເຊຍ ​ໃຫ້​ຂະຫຍາຍຕົວ​ນັບ​ມື້​ນັບ​ຂະຫຍັນ​ຂັນ​ເຄື່ອນ. ສະ​ແດງ​ຄວາມ​ດີ​ອົກ​ດີ​ໃຈ​ ທີ່​ໄດ້​ກັບ​ຄືນ​ມາ​ຢ້ຽມຢາມ​ຫວຽດນາມ​ໃນ​ຄັ້ງ​ນີ້, ທ່ານປະທານາທິບໍດີ ວ.ປູຕີນ ຢັ້ງຢືນ​ວ່າ, ສະຫະພາບ​ລັດ​ເຊຍ​ໃຫ້​ຄວາມ​ສຳຄັນ​ ຕໍ່​ການ​ຂະຫຍາຍສາຍ​ພົວພັນ​ຄູ່​ຮ່ວມ​ຍຸດ​ທະ​ສາດ​ຮອບດ້ານ ກັບຫວຽດນາມ, ຖື​ວ່າ​ຫວຽດນາມ​ແມ່ນ​ຄູ່​ຮ່ວມ​ບຸລິມະສິດ​ຢູ່​ພາກ​ພື້ນ​ອາຊີ - ປາຊີ​ຟິກ. ຢູ່​ທີ່​ການ​ພົບ​ປະ, ທ່ານ​ການ​ນຳ​ທັງ​ສອງ ​ເນັ້ນ​ໜັກ​ເຖິງ​ຄວາມ​ຕ້ອງການ​ເພີ່ມ​ທະວີ​ການ​ພົວພັນ ຕາມ​ສາຍ​ພັກ, ລັດ, ສະພາ​ແຫ່ງ​ຊາດ ​ແລະ ການ​ສັງ​ສັນ​ລະ​ຫວ່າງ​ປະຊາຊົນ​ສອງ​ປະ​ເທດ; ​ໃຫ້ທັດສະນະ​ວ່າ ໝາກຜົນ​ຂອງ​ການ​ຮ່ວມ​ມື​ລະຫວ່າງ​ສອງ​ຝ່າຍ ​ແມ່ນ​ໜ້າ​ຊົມ​ເຊີຍ​ທີ່​ສຸດ, ​ແຕ່​ຄວາມ​ສາມາດ​ຊ້ອນ​ແຝງ​ໃນ​ການ​ຮ່ວມ​ມື​ແມ່ນ​ຍັງ​ຫຼາຍ​ທີ່​ສຸດ, ສະ​ນັ້ນ ຕ້ອງ​ເສີມ​ຂະຫຍາຍ​ປະສິດທິ​ພາບ ​ຂອງບັນດາ​ກົນ​ໄກ​ຮ່ວມ​ມື​ທີ່​ມີ​ຢູ່​ແລ້ວ ​ເພື່ອ​ແນ​ໃສ່​ປະຕິບັດບັນດາ​ຂໍ້​ສັນຍາ​ທີ່​ໄດ້​ຕົກ​ລົງ​ກັນ​ ໃຫ້​ໄດ້​ຮັບ​ຜົນ​ດີ.

ທ່ານ​ນາຍົກ​ລັດຖະມົນ​ຕີ ຫງວຽນ​ເຕິ​ນຢຸງ ພົບ​ປະ​ປຶກສາ​ຫາລື​ກັບ
​ທ່ານ
ປະທານາທິບໍດີລັດ​ເຊຍ ວ.ປູຕີນ. ພາບ​ຂອງ: TTXVN



 
     ** ຕອນ​ແລງ​ຂອງ​ວັນ​ດຽວ​ກັນ, ​ຢູ່​ທີ່​ທຳນຽບລັດຖະບານ, ທ່ານ​ນາຍົກລັດຖະມົນ​ຕີ ຫງວຽນເຕິນຢຸງ ໄດ້ພົບປະປຶກສາຫາລືກັບ ທ່ານປະທານາທິບໍດີສະຫະພາບລັດເຊຍ ວ.ປູຕີນ. ຕີລາຄາສູງ ແລະ ຊົມເຊີຍບັນດາໝາກຜົນທີ່ທັງສອງຝ່າຍບັນລຸໄດ້ ໃນການພົບປະປຶກສາຫາລື ລະຫວ່າງທ່ານປະທານ ເຈືອງເຕິນຊາງ ແລະ ທ່ານປະທານາທິບໍດີ ວ.ປູຕີນ, ທ່ານ​ນາຍົກລັດຖະມົນ​ຕີ ຫງວຽນເຕິນຢຸງ ຢັ້ງຢືນວ່າລັດຖະບານຫວຽດນາມ ຈະເຮັດຈົມສຸດຄວາມສາມາດຂອງຕົນ ເພື່ອສົມທົບກັບລັດຖະບານ ແຫ່ງສະຫະພາບລັດເຊຍ ຜັນຂະຫຍາຍການປະຕິບັດສັນຍາຕ່າງໆ ທີ່ສອງຝ່າຍໄດ້ຕົກລົງກັນ ໃຫ້ໄດ້ຢ່າງແທດຈິງ ລະອຽດ. ຢູ່ທີ່ການພົບປະປຶກສາຫາລື, ທ່ານ​ນາຍົກລັດຖະມົນ​ຕີ ຫງວຽນເຕິນຢຸງ ແລະ ທ່ານປະທານາທິບໍດີ ວ.ປູຕີນ ໄດ້ເປັນເອກະພາບກັນວ່າສອງຝ່າຍຕ້ອງຍູ້ແຮງການຮ່ວມມື ໃນບັນດາຂົງເຂດປ້ອງກັນປະເທດ, ເຕັກນິກການທະຫານ, ສືບສວນຢັ້ງເບິ່ງ ແລະ ຂຸດຄົ້ນນ້ຳມັນ, ພະລັງງານ, ຂຸດຄົ້ນແຮ່ທາດ, ການສຶກສາ… ໂດຍສະເພາະແມ່ນ ສອງຝ່າຍຈະເພີ່ມທະວີການຮ່ວມມືຢ່ານແໜ້ນແຟ້ນ, ແກ້ໄຂຢ່າງທັນການ ຂໍ້ຄົງຄ້າງ ເພື່ອແນໃສ່ຊຸກຍູ້ການຜັນຂະຫຍາຍບັນດາໂຄງການ ທີ່ທັງສອງຝ່າຍໄດ້ຕົກລົງກັນ ໃນບັນດາຂົງເຂດທີ່ໄດ້ກ່າວເທິງນີ້. ທ່ານ​ນາຍົກລັດຖະມົນ​ຕີ ຫງວຽນເຕິນຢຸງ ແລະ ທ່ານປະທານາທິບໍດີ ວ.ປູຕີນ ກໍ່ໄດ້ເປັນເອກະພາບກັນວ່າ ສອງຝ່າຍສືບຕໍ່ປະສານສົມທົບກັນຢ່າງແໜ້ນແຟ້ນ ແລະ ສະໜັບສະໜູນກັນ ໃນບັນດາເວທີປາໄສສາກົນ.

ທ່ານ​ປະທານ​ປະ​ເທດ ​ເຈືອງ​ເຕິ​ນຊາງ ​ແລ​ະ ທ່ານປະທານາທິບໍດີ ວ.ປູຕີນ
ກ່າວ​ປາ​ໄສ​ໄຂ​ພິທີ ຊຸມ​ວັນ​ວັດທະນະທຳ​ລັດ​ເຊຍ​ຢູ່​ຫວຽດນາມ. ພາບ​ຂອງ: VOV News

** ຕອນ​ຄ່ຳ, ປະມຸກຂອງ​ສອງ​ປະ​ເທດ​ໄດ້​ໃຫ້​ກຽດ​ເຂົ້າ​ຮ່ວມ​ ພິທີ​​ເປີດ​ການສະ​ແດງ​ເຄ່ືອນໄຫວ “ຊຸມ​ວັນ​ວັດທະນະທຳ​ລັດ​ເຊຍ​ຢູ່​ຫວຽດນາມ 2013" ທີ່​ຈັດ​ຂຶ້ນ​ຢູ່ ​ໂຮງ​ລະຄອນ​​ໃຫຍ່ (ຮ່າ​ໂນ້ຍ) ​ໂດຍ​ແມ່ນ​ກະຊວງ​ວັດທະນະທຳ ກິລາ ​ແລະ ການທ່ອງທ່ຽວ​ຫວຽດນາມ ​ແລະ ກະຊວງ​ວັດທະນະທຳ​ສະຫະພາບ​ລັດ​ເຊຍ ສົມທົບ​ກັນ​ຈັດ​ຕັ້ງ​ຂຶ້ນ. ງານ​ມະ​ໂຫລານ​ນີ້​ໄດ້​ຈັດ​ຕັ້ງ​ຂຶ້ນ​ຖືກ​ກັບໂອ​ກາດ​ທີ່​ທ່ານປະທານາທິບໍດີ ວ.ປູຕີນ ມາຢ້ຽມຢາມຫວຽດນາມ ​ເປັນ​ເຫດການ​ທີ່​ມີ​ຄວາມ​ໝາຍ​ສຳຄັນ​ຍິ່ງ, ປະກອບສ່ວນ​ຕົວ​ຈິງ​ເຂົ້າ​ໃນ​ການ​ເພີ່ມ​ທະວີ​ການ​ພົວພັນ​ຄູ່​ຮ່ວມຍຸດ​ທະ​ສາດ​ຮອບດ້ານ ​ລະຫວ່າງ​ສອງ​ປະ​ເທດ​ຫວຽດນາມ - ສະຫະພາບ​ລັດ​ເຊຍ ​ແລະ ນ້ຳ​ໃຈ​ສາມັກຄີ ມິດຕະພາບ​ອັນ​ເປັນ​ມູນ​ເຊື້ອ​ລະຫວ່າງ​ສອງ​ຊາດ. ງານ​ມະ​ໂຫລານ​ມີ​ການ​ເຄື່ອນ​ໄຫວ​ຕ່າງໆ ​ເຊັ່ນ: ວາງສະ​ແດງ "ບັນດານົງພະງາ​ແຫ່ງ​ລັດ​ເຊຍ ​ແລະ ຈິດ​ວິນ​ຍານ​ແຫ່ງ​ຊາດ" ຢູ່​ທີ່​ຫໍພິພິດທະພັນ​ໂຮ່ຈີ​ມິນ, ດ້ວຍ​ເຄື່ອງ​ວາງສະ​ແດງ​ປະມານ 200 ອັນ, ທີ່​ສະ​ເໜີ​ກ່ຽວ​ກັບ​ຄວາມ​ງ​າມ​​ໃນ​ພື້ນຖານ​ສິນລະປະກຳ ​ເຄື່ອງຫັດຖະກຳວິຈິດ​ສິນຂອງ​ລັດ​ເຊຍ​ ໂດຍ​ຜ່ານ​ຮູບ​ພາບ; ບັນດາ​ຮ້ານ​ວາງສະ​ແດງ​ເຄື່ອງປັກ​ແສ່ວ (ຜ້າ​ຫົ່ມມູນ​ເຊື້ອ ປາວາ​ໂລ​ວາ), ​ເຄື່ອງ​ໄມ້​ວິຈິດ​ສິນ, ຕຸກກະຕາ ມາຕຣີ​ໂອສກາ, ​ເຄື່ອງນຸ່ງ​ຫົ່ມ​ມູນ​ເຊື້ອ​ຂອງ​ແມ່ຍິງ​ລັດ​ເຊຍ ​ແຕ່​ສະຕະວັດທີ XVIII ​ເຖິງ​ສະຕະວັດ​ທີ XX ກໍ່​ໄດ້​ຈັດ​ຕັ້ງ​ວາງສະ​ແດງ​ໃນ​ໂອກາດ​ນີ້.

ສຳ​ເລັດ​ສິ້ນ​ສຸດ​ໂຄງການ​ເຮັດ​ວຽກ, ຄ່ຳ​ວັນ​ທີ 12 ພະຈິກ 2013,  ທ່ານປະທານາທິບໍດີສະຫະພາບລັດເຊຍ ວ.ປູຕີນ ​ໄດ້​ອອກ​ຈາກ​ຮ່າ​ໂນ້ຍ, ສຳ​ເລັດ​ເປັນ​ຢ່າງ​ດີການຢ້ຽມຢາມຂັ້ນ​ລັດ​ຢູ່​ຫວຽດນາມ ຕາມ​ຄຳ​ເຊີນ​ຂອງ​ທ່ານ​ເຈືອງ​ເຕິ​ນຊາງ ປະທານ​ປະ​ເທດ​ແຫ່ງ ສ.ສ.ຫວຽດນາມ​./.

 

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ