ວັນຈັນ, 18/11/2019
ກອງປະຊຸມສະໄໝສາມັນເທື່ອທີ 6 ສະພາແຫ່ງຊາດຊຸດທີ XIII ແຫ່ງ ສສ ຫວຽດນາມ ໄດ້ສຳເລັດແຜນງານທັງໝົດທີ່ວາງອອກ
14/2/2014 18:32' ສົ່ງ ພິມ
ພາບ: ກອງປະຊຸມສະໄໝສາມັນເທື່ອທີ 6 ສະພາແຫ່ງຊາດຊຸດທີ XIII

ໃນ​ກອງ​ປະຊຸມ​ສະ​ໄໝ​ສາມັນ​ເທື່ອ​ນີ້, ສະພາ​ແຫ່ງ​ຊາດ​ໄດ້​ພິຈາລະນາ, ຕົກລົງ​ຮັບຮອງ​ເອົາ​ບັນດາ​ເນື້ອ​ໃນ​ທີ່ສຳຄັນ​ດັ່ງ​ລຸ່ມ​ນີ້:

ຮັບຮອງ​ເອົາ​ສະບັບຮ່າງການ​ປັບປຸງ​ລັດຖະທຳ​ມະນູນ​ປີ 1992. ສະບັບຮ່າງການ​ປັບປຸງ​ລັດຖະທຳ​ມະນູນ ​ໄດ້ຖືກ​ຈັດ​ຕັ້ງ​ໃຫ້​ປະຊາຊົນ​ປະກອບ​ຄວາມ​ຄິດ​ຄວາມ​ເຫັນ ​ແລະ ​ໄດ້ດຶງ​ດູດ​​ເອົາ​ຄວາມ​ຄິດ​ຄວາມ​ເຫັນ​ທີ່​​ເລິກ​ເຊິ່ງ ເໝາະ​ສົມ​ເປັນ​ຈຳນວນ​ຫຼາຍ. ໃນ​ກອງ​ປະຊຸມ​​ນີ້, ສະພາ​ແຫ່ງ​ຊາດ​ໄດ້​ໃຊ້​ເວລາ​ອັນ​ເໝາະ​ສົມ​ເພື່ອ​ສືບ​ຕໍ່​ປຶກສາ​ຫາລື​ຢ່າງ​ປະຊາທິປະ​ໄຕ, ສ້າງ​ຄວາມ​ເຫັນ​ດີ​ເຫັນ​ພ້ອມ ​ເປັນ​ເອກະ​ພາບ​ຢ່າງສູງ ​ແລະ ​ໄດ້​ລົງ​ຄະ​ແນນ​ສຽງຮັບຮອງ​ເອົາລັດຖະທຳມະນູນ​ປີ 2013 ດ້ວຍ​ອັດຕາ​ສ່ວນ​ສູງ. ສະພາ​ແຫ່ງ​ຊາດ​ກໍ່​ໄດ້​ລົງມະຕິ​ກຳນົດ​ບາງ​ບັນຫາ​ກ່ຽວ​ກັບ​ການ​ປະຕິບັດ​ລັດຖະທຳ​ມະນູນ, ​ໃນ​ນັ້ນມີ​ ຂໍ້​ກຳນົດກ່ຽວ​ກັບ​ຜົນ​ສັດ​ສິດ​ຂອງ​ລັດຖະທຳ​ມະນູນ; ການ​ດັດ​ແປງ ​ເພີ່ມ​ເຕີມ ຫຼື​ປະກາດ​ໄຊ້​ໃໝ່ ບັນດາ​ກົດໝາຍ ກົດດຳລັດ ​ແລະ ບັນດາ​ເອກະສານ​ນິຕິ​ກຳອື່ນ ທີ່​ໄດ້​ປະກາດ​ໃຊ້​ກ່ອນ​ເມື່ອ​ລັດຖະທຳ​ມະນູນ​ສະບັບ​ປັບປຸງ​ມີ​ຜົນ​ສັກສິດ; ໜ້າ​ທີ່​ຮັບຜິດຊອບ​ຂອງ​ບັນດາ​ສຳນັກງານ​ອົງການ ​ໃນ​ການຈັດ​ຕັ້ງ​ປະຕິບັດ, ​ໂຄສະນາ ​ແລະ ​ເຜີຍ​ແຜ່ຢ່າງ​ກວ້າງຂວາງ ​ເນື້ອ​ໃນ​ຂອງ​ລັດຖະທຳ​ມະນູນ​ສະບັບ​ປັບປຸງ ​ເພື່ອ​ໃຫ້​ລັດຖະທຳ​ມະນູນ​ໄດ້​ຮັບ​ການ​ປະຕິບັດ​ຕາມ ​ແລະ ປະຕິບັດ​ໃນ​ພາກ​ຕົວ​ຈິງ​ຢ່າງ​ເຂັ້ມ​ງວດ.

ສະພາ​ແຫ່ງ​ຊາດ​ກໍ່​ໄດ້​ຮັບຮອງ​ເອົາ​ກົດໝາຍ 8 ສະບັບ, ​ໃນ​ນັ້ນ​ມີ​ບັນດາ​ກົດໝາຍ​ທີ່​ສຳຄັນ​​ເຊັ່ນ: ກົດໝາຍ​ທີ່​ດິນ (ສະບັບ​ປັບປຸງ), ກົດໝາຍ​ການ​ລົງທຶນ, ກົດໝາຍ​ແຂ່ງຂັນ - ຍ້ອງຍໍ​ໃຫ້​ລາງ​ວັນ (ສະບັບ​ປັບປຸງ), ກົດໝາຍ​ວ່າ​ດ້ວຍ​ວຽກ​ເຮັດ​ງານ​ທຳ… ນີ້​ແມ່ນ​ບັນດາ​ປະມວນ​ກົດໝາຍ​ທີ່​ມີຜົນ​ກະທົບ​ໂດຍ​ກົງ​ເຖິງ​ຊີວິດ​ການ​ເປັນ​ຢູ່ຂອງ​ປະຊາຊົນ ​ແລະ ​ໄດ້​ຮັບ​ຄວາມ​ເອົາ​ໃຈ​ໃສ່​ຈາກ​ຫາງ​ສຽງ​ປະຊາຊົນ. ສະພາ​ແຫ່ງ​ຊາດ​ກໍ່​ໄດ້​ໃຫ້​ຄວາມ​ເຫັນ​ປະກອບ​ໃສ່​ກົດໝາຍອື່ນ​ອີກ 10 ສະບັບ ​ເຊັ່ນ ກົດໝາຍ​ການ​ກໍ່ສ້າງ (ສະບັບ​ປັບປຸງ), ກົດໝາຍ​ວ່າ​ດ້ວຍ​ການ​ສົມລົດ ​ແລະ ຄອບຄົວ (ສະບັບ​ປັບປຸງ), ກົດໝາຍ​ວ່າ​ດ້ວຍ​ການ​ລົງທຶນ​ພາກ​ລັດ, ກົດໝາຍ​ວ່າ​ດ້ວຍ​ການ​ລົ້ມ​ລະລາຍ… ສະ​ເພາະ​ກົດໝາຍ​ທີ່​ດິນ (ສະບັບ​ປັບປຸງ) ມີຂອບ​ເຂດ​ດັດສົມ​ກວ້າງ, ​ເປັນ​ຜົນກະທົບ​ໂດຍ​ກົງ​ເຖິງ​ການພັດທະນາ​ເສດຖະກິດ, ສະຖຽນລະພາບດ້ານການເມືອງ, ຮັບປະກັນຄວາມໝັ້ນຄົງ, ລະບຽບຄວາມປອດໄພສັງຄົມ ແລະ ຊີວິດການເປັນຢູ່ຂອງປະຊາຊົນທຸກຄົນ ດັ່ງນັ້ນມັນຈຶ່ງໄດ້ຮັບຄວາມເອົາໃຈໃສ່ ປະກອບຄວາມຄິດເຫັນ ຂອງປະຊາຊົນບັນດາຊັ້ນວັນນະທີ່ກວ້າງຂວາງ. ສະພາແຫ່ງຊາດ ໄດ້ໃຊ້ກອງປະຊຸມສະໄໝສາມັນສາມຄັ້ງ ເພື່ອປຶກສາພິຈາລະນາ, ໃຫ້ຄວາມຄິດຄວາມເຫັນ, ພ້ອມກັນນັ້ນກໍ່ຊີ້ນຳການຄົ້ນຄວ້າ, ຮັບເອົາ, ອະທິບາຍຢ່າງເຂັ້ມງວດ ຄວາມຄິດຄວາມເຫັນຂອງປະຊາຊົນ, ຄວາມຄິດຄວາມເຫັນຂອງ ສະມາຊິກສະພາແຫ່ງຊາດ ແລະ ກອງປະຊຸມເທື່ອນີ້ຈຶ່ງໄດ້ຮັບຮອງ​ເອົາ​ກົດໝາຍ​ທີ່​ດິນ​ສະບັບ​ນີ້.

ທ່ານຫງວຽນມິງກວາງ ລັດຖະມົນຕີວ່າການກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ໃຫ້ຮູ້ວ່າ, ກົດໝາຍທີ່ດິນ (ສະບັບປັບປຸງ) ທີ່ສະພາແຫ່ງຊາດຮັບຮອງໃນຕອນເຊົ້າວັນທີ 29 ພະຈິກນັ້ນ ໄດ້ກຳນົດຢ່າງແໜ້ນແຟ້ນບັນຫາທ້ອນໂຮມທີ່ດິນ, ແກ້ໄຂຜ່ານຜ່າໄດ້ສິ່ງຄົງຄ້າງ ຄວາມຂັດຂ້ອງ ການຮ້ອງຟ້ອງ ທີ່ກ່ຽວພັນເຖິງທີ່ດິນໃນເວລາທີ່ຜ່ານມາ. ໃນນັ້ນໄດ້ກຳນົດຢ່າງລະອຽດ ກ່ຽວກັບສິດຂອບເຂດທ້ອນໂຮມທີ່ດິນ, ເປັນຕົ້ນແມ່ນທ້ອນໂຮມທີ່ດິນເພື່ອພັດທະນາເສດຖະກິດ - ສັງຄົມ, ຫຼີກລ່ຽງການລ່ວງເກີນສິດອຳນາດ ທ້ອນໂຮມທີ່ດິນຕາມລຳພັງໃຈ.

ສະພາແຫ່ງຊາດໄດ້ໃຊ້ເວລາເພື່ອພິຈາລະນາ ແລະ ຮັບຮອງຜ່ານລາຍງານຂອງລັດຖະບານ ກ່ຽວກັບໝາກຜົນການປະຕິບັດ ແຜນການພັດທະນາເສດຖະກິດ - ສັງຄົມ ແລະ ງົບປະມານແຫ່ງລັດປີ 2013; ແຜນການພັດທະນາເສດຖະກິດ - ສັງຄົມ ແລະ ແຜນງົບປະມານແຫ່ງລັດປີ 2014; ສະພາບການປະຕິບັດ ແຜນການພັດທະນາເສດຖະກິດ - ສັງຄົມ 5 ປີ 2011 - 2015; ການປະຕິບັດໂຄງການກວມລວມ ກ່ຽວກັບການຈັດວາງຄືນໃໝ່ໂຄງປະກອບພື້ນຖານເສດຖະກິດ; ສະຫຼຸບເບື້ອງຕົ້ນ 3 ປີແຫ່ງການປະຕິບັດໂຄງການເປົ້າໝາຍແຫ່ງຊາດ ໄລຍະປີ 2011 - 2015; ການຈຳໜ່າຍພັນທະບັດລັດຖະບານເພີ່ມເຕີມ ເພື່ອໃຊ້ໃຫ້ແກ່ບາງໂຄງການທີ່ສຳຄັນ, ຮີບດ່ວນ.

ສະພາແຫ່ງຊາດໄດ້ດຳເນີນການຕິດຕາມກວດກາບັນຫາສະເພາະ “ການປະຕິບັດນະໂຍບາຍ, ກົດໝາຍ ກ່ຽວກັບການປະກັນໄພສາທາລະນະສຸກໄລຍະປີ 2009 - 2012”; ພິຈາລະນາບັນດາລາຍງານໝາກຜົນການຕິດຕາມກວດກາ ໂດຍແມ່ນສະພາບັນດາເຜົ່າ ແລະ ບັນດາກຳມາທິການຂອງສະພາແຫ່ງຊາດເປັນຜູ້ປະຕິບັດ; ຟັງລາຍງານສັງລວມຄວາມຄິດເຫັນ, ຄຳສະເໜີແນະ ຂອງຜູ້ປ່ອນບັດເລືອກຕັ້ງ ແລະ ໝາກຜົນການຕິດຕາມກວດກາ ຕໍ່ການແກ້ໄຂຄຳສະເໜີແນະຕ່າງໆ ທີ່ຜູ້ປ່ອນບັດເລືອກຕັ້ງຝາກມາໃຫ້ ກອງປະຊຸມສະໄໝສາມັນເທື່ອທີ 5 ສະພາແຫ່ງຊາດຊຸດທີ XIII; ລາຍງານຂອງລັດຖະບານ ແລະ ອົງການໄອຍະການປະຊາຊົນສູງສຸດ ກ່ຽວກັບການປະຕິບັດບັນດາມະຕິຕົກລົງຂອງສະພາແຫ່ງຊາດວ່າດ້ວຍການຊັກຖາມ ແລະ ຕອບຄຳຊັກຖາມ ຢູ່ທີ່ກອງປະຊຸມສະໄໝສາມັນເທື່ອທີ 3, 4, 5; ດຳເນີນການຊັກຖາມ ແລະ ຕອບຄຳຊັກຖາມ ຂອງສະມາຊິກສະພາແຫ່ງຊາດ; ພິຈາລະນາບັນດາລາຍງານປະຕິບັດງານ ຂອງບັນດາອົງການຂອງສະພາແຫ່ງຊາດ, ປະທານສານປະຊາຊົນສູງສຸດ, ໄອຍະການປະຊາຊົນສູງສຸດ; ລາຍງານຂອງລັດທະບານ ກ່ຽວກັບວຽກງານປ້ອງກັນ, ຕ້ານການສໍ້ລາດບັງຫຼວງ; ວຽກງານປ້ອງກັນ, ຕ້ານການລະເມີດກົດໝາຍ, ອາຊະຍາກຳ; ວຽກງານປະຕິບັດຄະດີ; ໃຫ້ສັດຕະຍາບັນບຸກຄະລາກອນ ຂອງລັດຖະບານ, ເລືອກຕັ້ງບຸກຄະລາກອນຂອງບາງອົງການ ໃນສະພາແຫ່ງຊາດ ແລະ ພິຈາລະນາ, ຕົກລົງບາງບັນຫາທີ່ສຳຄັນ.

ໃນ​ກອງ​ປະຊຸມ​ສະ​ໄໝ​ສາມັນ​ເທື່ອ​ນີ້, ສະພາແຫ່ງຊາດໄດ້ໃຊ້ເວລາອາທິດໜຶ່ງ ເພື່ອພິຈາລະນາວຽກງານບຸກຄະລາກອນ. ລະອຽດຄື: ສະພາແຫ່ງຊາດໄດ້ ຢຸດເລີກຕຳແໜ່ງຮອງນາຍົກລັດຖະມົນຕີ ຂອງທ່ານຫງວຽນທ້ຽນເຍິນ; ໃຫ້ສັດຕະຍາບັນຕຳແໜ່ງຮອງ​ນາຍົກລັດຖະມົນຕີຂອງທ່ານ ຫວູດຶກ​ດາມ ​ແລະ ທ່ານ ຟ້າ​ມບິ່ງ​ມິ​ງ; ​ໃຫ້​ສັດຕະຍາບັນ​ຕຳ​ແໜ່​ງລັດຖະມົນຕີ​ວ່າການ, ຫົວໜ້າຫ້ອງ​ວ່າການ​ລັດຖະບານ​ຂອງ​ທ່ານ ຫງວຽນ​ວັນ​ເນນ. ຄຽງ​ຄູ່​ນັ້ນ, ສະພາ​ແຫ່ງ​ຊາດ​ກໍ່​ໄດ້​ເລືອກ​ຕັ້ງ​ເພີ່ມ​ເຕີມ ກຳມະການ​ຄະນະ​ປະຈຳການ​ສະພາ​ແຫ່ງ​ຊາດ, ຮອງ​ປະທານ​ສະພາ​ບັນດາ​ເຜົ່າ ​ແລະ ຮອງປະທານກຳມາ​ທິການ​ຈຳນວນ​ໜຶ່ງ ​ຂອງ​ສະພາ​ແຫ່ງ​ຊາດ.

ດ້ວຍ​ຈິດ​ໃຈ​ສາມັກຄີ, ຄວາມ​ຮັບຜິດຊອບ​ສູງ​ຕໍ່​ປະຊາຊົນ, ດ້ວຍ​ການ​ປະກອບສ່ວນ​ເຫື່ອ​ແຮງ ​ແລະ ສະຕິ​ປັນຍາ​ຢ່າງ​ຕັ້ງໜ້າ​ ຂອງ​ບັນດາ​ສະມາຊິກ​ສະພາ​ແຫ່ງ​ຊາດ, ກອງ​ປະຊຸມ​ສະ​ໄໝ​ສາມັນ​ເທື່ອ​ທີ 6 ສະພາ​ແຫ່ງ​ຊາດ​ຊຸດ​ທີ XIII ​​ໄດ້ສຳ​ເລັດ​ຜົນ​ຢ່າງ​ດີງາມ, ສ້າງ​ຄວາມ​ປະ​ທັບ​ໃຈ​ຢ່າງ​ເລິກ​ເຊິ່ງ​ໃນ​ຈິດ​ໃຈ​ຂອງ​ປະຊາຊົນ ​ແລະ ຜູ້​ປ່ອນ​ບັດ​ເລືອກ​ຕັ້ງ​ທົ່ວປະ​ເທດ./.

ຮຽບຮຽງ​ໂດຍ ຫງວຽນ​ດຶກ

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ