ວັນຈັນ, 18/11/2019
ທ່ານເລຂາທິການໃຫຍ່ພັກກອມມູນິດ ຫວຽດນາມ ຫງວຽນຝູຈ້ອງ ໄປຢ້ຽມຢາມຂັ້ນລັດ ທີ່ປະເທດສາທາລະນະລັດອິນເດຍ
15/2/2014 20:27' ສົ່ງ ພິມ
ພາບ: ທ່ານນາຍົກລັດຖະມົນຕີແຫ່ງສາທາລະນະລັດ ອິນເດຍ ມານໂມຮານ ຊິງ ແລະ ທ່ານເລຂາທິການໃຫຍ່ ຫງວຽນຝູຈ້ອງ ກ່ອນເວລາເຂົ້າການປຶກສາຫາລື. ພາບຂອງ: TTXVN

1. ທ່ານ​ເລຂາທິການ​​ໃຫຍ່​ໄດ້​ພົບ​ປະ​ຫາລື​ກັບ ທ່ານປະທານາທິບໍດີອິນເດຍ ປຣານາບ ມູເຄີຢີ, ທ່ານຮອງປະທານາທິບໍດີ ຊຣີ ຮາມິດ ອານຊາຣີ, ປະທານສະພາຜູ້ແທນລາຊະດອນ ເມຣາ ກູມາ, ທ່ານລັດຖະມົນຕີວ່າການກະຊວງຕ່າງປະເທດ ຊານມານ ຄູຣ໌ຊິດ ແລະ ຜູ້ນຳພັກການເມືອງບາງພັກຢູ່ອິນເດຍ. ທ່ານ​ເລຂາທິການ​​ໃຫຍ່​ໄດ້ໄປວາງພວງມາລາທີ່ອະນຸສາວາລີ ມະຫາດມາ ຄານ​ທີ ຢູ່ຣາຊຫາດ.

2. ທ່ານ​ເລຂາທິການ​​ໃຫຍ່​​ໄດ້​ໄປ​ຢ້ຽມຢາມ​ນະຄອນ ມູມບາຍ, ພົບ​ປະ​ຫາ​ລື​ກັບ​ທ່ານຜູ້​ວ່າ​ລາຊະການ​ລັດ ມະຫາຣາຊຕຣາ ​ແລະ ພົບ​ປະ​ກັບ​ວົງ​ການ​ນັກວິ​ສາ​ຫະກິດ​ອິນ​ເດຍ.

3. ທ່ານ​ເລຂາທິການ​​ໃຫຍ່​ ຫງວຽນ​ຝູຈ້ອງ ​ແລະ ທ່ານ​ນາຍົກລັດຖະມົນ​ຕີ ມານ​ໂມ​ຮານ ຊິງ ​ໄດ້​ເນັ້ນ​ວ່າ ຫວຽດນາມ ​ແລະ ອິນ​ເດຍ ມີ​ບັນດາ​ຈຸດໝາຍ​ລວມກ່ຽວ​ກັບ​ການ​ເຕີບ​ໂຕ​ເສດຖະກິດ ​ແລະ ພັດທະນາ​ເສດຖະກິດ - ສັງຄົມ​ຢ່າງຮອບດ້ານ ​ແລະ ຢັ້ງຢືນ​ວິ​ໄສ​ທັດ​ອັນ​ດຽວ​ກັນ ​​ໃນການ​ຕອບ​ສະໜອງຄວາມ​ມຸ່ງ​ມາດ​ປາຖະໜາ ຂອງ​ປະຊາຊົນ​ສອງ​ປະ​ເທດ. ທ່ານ​ນາຍົກລັດຖະມົນຕີ​ໄດ້​ເວົ້າ​ຄືນ​ວ່າ ຫວຽດນາມ​ແມ່ນ​ເສົາ​ຄ້ຳ​ໃນ​ນະ​ໂຍບາຍ​ຫັນ​ໄປ​ສູ່​ທາງ​ທິດຕາ​ເວັນ​ອອກ​ຂອງ​ອິນ​ເດຍ; ບັນຫາ​ນີ້​ກໍ່​ໄດ້​ຮັບ​ຄວາມ​ເຫັນ​ພ້ອມ​ຂອງທ່ານ​ເລຂາທິການ​​ໃຫຍ່​.

4. ທ່ານຜູ້ນຳທັງສອງ​ໄດ້​ລຶ້ມຄືນ​ເຖິງ​ການ​ປະກອບສ່ວນ​ອັນ​ໃຫຍ່​ຫຼວງຂອງອະດີດ​ນາຍົກລັດຖະມົນຕີ ຊວາ​ຮະ​ລານ ​ເນຣູ ​ແລະ​ ປະທານ​ໂຮ​ຈີ​ມິນ ຕໍ່ກັບການ​ຂະຫຍາຍ​ສາຍ​ພົວພັນ​ມິດຕະພາບຫວຽດນາມ - ອິນ​ເດຍ, ສານ​ພົວພັນ​ດັ່ງກ່າວ​ນັ້ນ​ ໄດ້​ບັນດາ​ຮຸ່ນ​ຜູ້ນຳ​ຂອງ​ສອງ​ປະ​ເທດ​ປົກ​ປັກ​ຮັກສາ ​ແລະ ​ເພີ່ມ​ພູນ​ຄູນ​ສ້າງ; ສະ​ແດງ​ຄວາມ​ດີ​ໃຈ ​ຕໍ່​ກັບບັນດາ​ການ​ແລກປ່ຽນ​ຄວາມ​ຄິດ​ຄວາມ​ເຫັນ​ນຳ​ກັນ​ຢ່າງ​ເປັນ​ປະຈຳ ຢູ່​ໃນ​ຂັ້ນ​ຕ່າງໆ, ການ​ເຄື່ອນ​ໄຫວ​ນີ້​ໄດ້​ຊ່ວຍການ​ປັບປຸງ ​ແລະ ​ເປີດ​ກວ້າງການ​ພົວພັນ​ສອງ​ຝ່າຍ.

5. ທ່ານຜູ້ນຳທັງສອງຕົກລົງ​ເພີ່ມ​ທະວີ​ບັນດາ​ການ​ແລກປ່ຽນ​ການ​ເມືອງ​ຂັ້ນ​ສູງ ດ້ວຍ​ການ​ຊຸກຍູ້​ການ​ຢ້ຽມຢາມ ​ແລະ ການ​ພົບ​ປະ​ສອງ​ຝ່າຍຢູ່ຕາມລະບຽງຂອງ​ບັນດາ​ເຫດການ ບັນດາກອງ​ປະຊຸມ​ພາກ​ພື້ນ ​ແລະ ພະຫຸ​ພາຄີ.

6. ທ່ານຜູ້ນຳທັງສອງ​​ໃຫ້​ທັດສະນະເປັນ​ເອກະ​ພາບວ່າ ການ​ຮ່ວມ​ມື​ດ້ານ​ການ​ປ້ອງ​ກັນ​ປະ​ເທດ​ໄດ້​ກາຍ​​ເປັນ​ເສົາ​ຄ້ຳ​ອັນ​ສຳຄັນ ຂອງ​ການ​ພົວພັນຄູ່​ຮ່ວມ​ຍຸດ​ທະ​ສາດລະຫວ່າງ​ສອງ​ປະ​ເທດ. ທ່ານຜູ້ນຳທັງສອງສະ​ເໜີ​ໃຫ້ສອງ​ຝ່າຍ ສືບ​ຕໍ່​ແລກປ່ຽນກ່ຽວ​ກັບ​ບັນດາ​ຂໍ້​ມາດຕາ​ຂອງ​ຮ່ວງ​ສິນ​ເຊື່ອ 100 ລ້ານ​ໂດ​ລາ​ສະຫະລັດ ​ໃນ​ຂົງ​ເຂດ​ປ້ອງ​ກັນ​ປະ​ເທດ ​ເພື່ອ​ສ້າງ​ກຳລັງ​ຊຸກ​ດັນ​ຕື່ມອີກ​ໃຫ້​ແກ່​ການ​ຮ່ວມ​ມືນີ້. ສອງ​ຝ່າຍ​ຊົມ​ເຊີຍການ​ເຊັນ​ຂໍ້​ຕົກລົງ​ກ່ຽວ​ກັບ​ການ​ປົກ​ປັກ​ຮັກສາ​ຊຶ່ງ​ກັນ​ແລະ​ກັນ ​ໃນ​ການ​ແລກປ່ຽນ​ຂ່າວສານ​ປິດ​ລັບ ​ແລະ ບົດ​ບັນທຶກ​ຄວາມ​ຈຳ​ທີ່​ກຳ​ລັງ​ໄດ້​ຜັນ​ຂະຫຍາຍ ກ່ຽວ​ກັບ​ການ​ກໍ່ສ້າງ​ນາຍ​ທະຫານ​ເຮືອ ​ແລະ ນາຍ​ທະຫານ​ອາກາດ​ຫວຽດນາມ.

7. ທ່ານຜູ້ນຳທັງສອງຢັ້ງ​ຢືນ​ຄວາມ​ມຸ່ງ​ຫວັງ ​ແລະ ຄວາມ​ຕັດສິນ​ໃຈ​ຮ່ວມ​ມື ​ເພື່ອ​ແນ​ໃສ່​ຮັກສາ​ສັນຕິພາບ ສະຖຽນ​ລະ​ພາບ ການ​ພັດທະນາ ​ແລະ ຄວາມ​ວັດທະນາ​ຖາວອນ​ຢູ່​ທະວີບອາຊີ; ​ໃຫ້​ທັດສະນະ​ເປັນ​ເອກະ​ພາບ​ວ່າ ການ​ເດີນ​ເຮືອ​ຢູ່​ທະ​ເລ​ຕາ​ເ​ວັນ​ອອກ​ບໍ່​ຄວນ​ຖືກ​ກີດຂວາງ ​ແລະ ຮຽກຮ້ອງ​ບັນດາ​ຝ່າຍທີ່​ກ່ຽວຂ້ອງ​ຈົ່ງຈຳກັດ​ຕົວ​ເອງ, ບໍ່​ໃຊ້​ກຳລັງ​ອາວຸດ ຫຼື ນາບ​ຂູ່​ໃຊ້​ກຳລັງ​ອາວຸດ ​ແລະ​ ແກ້​ໄຂການ​ແກ່ງ​ແຍ້ງຕ່າງໆ ​​ໂດຍ​ຜ່ານບັນດາວິທີສັນຕິ ຕາມບັນດາຫຼັກການຂອງກົດໝາຍສາກົນ ທີ່ໄດ້ຮັບການຮັບຮູ້ ຢ່າງກວ້າງຂວາງ, ໃນນັ້ນມີອະນຸສັນຍາສະຫະປະຊາຊາດວ່າດ້ວຍກົດໝາຍທະເລ (UNCLOS). ທ່ານ​ຜູ້ນຳ​ທັງ​ສອງ​ກໍ່​ໄດ້​ຊົມ​ເຊີຍ ​ບັນດາ​ຄຳ​ໝັ້ນ​ສັນຍາ​ລວມຂອງບັນດາ​ຝ່າຍທີ່​ກ່ຽວຂ້ອງ ກ່ຽວ​ກັບ​ການ​ເຄົາລົບ​ຕາມ ​ແລະ ​ປະຕິບັດ ຖະແຫຼງການກ່ຽວກັບວິທີການປະພຶດຂອງບັນດາຝ່າຍຢູ່​ທະເລຕາເວັນອອກ (DOC) ປີ 2002 ​ແລະ ຮັບຮອງໂດຍໄວຕໍ່ປະມວນ​ຂໍ້​ກຳນົດ​ກ່ຽວ​ກັບການປະພຶດຂອງບັນດາ ຝ່າຍຢູ່ທະເລຕາເວັນອອກ (COC) ບົນ​ພື້ນຖານ​ເຫັນ​ດີ​ເປັນ​ເອກະ​ພາບ. ທ່ານ​ຜູ້ນຳທັງ​ສອງຮຽກຮ້ອງ​ການ​ຮ່ວມ​ມື​​ ເພື່ອ​ຮັບປະກັນຄວາມ​ສະຫງົບ​ໃນ​ບັນດາ​ສາຍ​ທາງ​ທະ​ເລ, ຄວາມ​ສະຫງົບ​ໃນ​ການ​ເດີນ​ທະ​ເລ, ຕ້ານ​ໂຈນ​ທະ​ເລ ​ແລະ ດຳ​ເນີນ​ການ​ເຄື່ອນ​ໄຫວ​ຊອກ​ຫາ ​ແລະ ກູ້​ຊີບ​ຢູ່​ທ​ະ​ເລ.

8. ທ່ານຜູ້ນຳທັງສອງ​ເຫັນ​ດີ​​ເປັນ​ເອກະ​ພາບ​ຍົກ​ການ​ພົວພັນ​ຄູ່​ຮ່ວມ​ເສດຖະກິດ​ຂຶ້ນ ​ໃຫ້​ກາຍ​ເປັນ​ໜຶ່ງ​ໃນ​ບັນດາ​ເນື້ອ​ໃນ​ຕົ້ນ​ຕໍ່ ຂອງ​ການ​ພົວພັນ​ຄູ່​ຮ່ວມ​ຍຸດ​ທະ​ສາດ ລະຫວ່າງ​ສອງ​ປະ​ເທດ. ສອງ​ຝ່າຍ​ເປັນ​ເອກະ​ພາບ​ສ້າງ​ເງື່ອນ​ໄຂ​ອຳນວຍ​ຄວາມ​ສະດວກ ​ເພື່ອ​ແນ​ໃສ່​ຍົກ​ມູນຄ່າ​ການ​ຄ້າ​ສອງ​ສົ້ນ​ຂຶ້ນ​ເປັນ 15 ຕື້​ໂດ​ລາ​ສະຫະລັດ​ໃນ​ປີ 2020 ​ແລະ ຊຸກຍູ້​ການ​ລົງທຶນ​ລະຫວ່າງ​ສອງ​ປະ​ເທດ, ພິ​ເສດ​ແມ່ນ​ໃນ​ບັນດາ​ຂົງ​ເຂດ​ການ​ສຶກສາ, ​ໂຄງ​ສ້າງ​ພື້ນຖານ, ນ້ຳມັນ​ອາຍ​ແກັ​ດ, ພະລັງງານ, ພະລັງງານ​ໃໝ່ ​ແລະ ພະລັງງານ​ໃຊ້​ຄືນ​ໃໝ່, ການ​ກະສິກຳ, ຕ່ຳ​ແຜ່ນ, ​ເຕັກ​ໂນ​ໂລ​ຊີ​ຂໍ້​ມູນ​ຂ່າວສານ ​ແລະ ​ເພສັດຊະກຳ. ທ່ານ​ຜູ້ນຳ​ທັງ​ສອງ​ກໍ່​ເຫັນ​ດີ​ເປັນ​ເອກະ​ພາບ​ກ່ຽວ​ກັບ​ການ​ຜັນ​ຂະຫຍາຍ​ໂດຍ​ໄວ ສັນຍາ​ການ​ຄ້າ​ເສລີ​ອາ​ຊຽນ - ອິນ​ເດຍ ​ໃນ​ບັນດາ​ຂະ​ແໜງ​ການ​ບໍລິການ ​ແລະ ການ​ລົງທຶນ; ປະຕິບັດ​ການ​ພົວພັນ​ຄູ່​ຮ່ວມ​ເສດ​ພະ​ກິດ​ຮອບດ້ານ​ພາກ​ພື້ນ (RCEP) ​ເພື່ອ​ແນ​ໃສ່​ຊ່ວຍ​ເຫຼືອ​ອິນ​ເດຍ​ເຊື່ອມ​ໂຍງ​ເຂົ້າ​ກັບ​ປະຊາ​ຄົມ​ເສດຖະກິດ​ອາ​ຊຽນ.

9. ທ່ານຜູ້ນຳທັງສອງ ສົ່ງ​ເສີມ​ການ​ຮ່ວມ​ມື​ຂອງ​ພາກ​ເອກະ​ຊົນລະຫວ່າງ​ສອງ​ປະ​ເທດ ​ແລະ ຢັ້ງຢືນ​ການ​ຊ່ວຍ​ໜູນ​ຂອງ​ຂົງ​ເຂດ​ເອກະ​ຊົນ ຕໍ່​ກັບ​ເວທີ​ປາ​ໄສ​ວິ​ສາ​ຫະກິດ​ຫວຽດນາມ - ອິນ​ເດຍ ​ແລະ ການ​ເຄື່ອນ​ໄຫວ​ຂອງ​ຫ້ອງການ​ການ​ຄ້າ​ອຸດສາຫະກຳ​ ຂອງ​ສອງ​ປະ​ເທດ. ຝ່າຍ​ຫວຽດນາມ​ກໍ່​ເປັນ​ເອກະ​ພາບ​ຊ່ວຍ​ໜູນ​ຢ່າງ​ຕັ້ງໜ້າ​ໃຫ້​ແກ່ “ສະພາ​ວິ​ສາ​ຫະກິດ​ຫວຽດນາມ - ອິນ​ເດຍ”.

10. ທ່ານຜູ້ນຳທັງສອງຊົມ​ເຊີຍ ​ແລະ ສະໜັບສະໜູນ​ການ​ແນະນຳ​ກຸ່ມ​ບໍລິສັດ ຕາ​ຕ້າ ​ເຂົ້າ​ຮ່ວມ​ເປັນ​ຜູ້​ຮັບ​ປະມູນ​ ຂອງ​ໂຄງການ​ໄຟຟ້າ ລອງ​ຝູ 2 ມີ​ກຳລັງ 1.200 MW. ນີ້​ແມ່ນ​ໂຄງການ​ລົງທຶນ​ທີ່​ໃຫຍ່​ທີ່​ສຸດ​ຂອງ​ອິນ​ເດຍ ຢູ່​ຫວຽດນາມ ​ແລະ ຈະ​ເປັນ​ໂຄງການ​ນຳ​ໜ້າ ​ແນ​ໃສ່​ປຸກ​ກະ​ຕູ້ນກະ​ແສ​ການ​ລົງທຶນ​ໃຫຍ່​ກວ່າ​ອີກ​ຈາກ​ອິນ​ເດຍ.

11. ທ່ານຜູ້ນຳທັງສອງ​ເປັນ​ເອກະ​ພາບ​ເພີ່ມ​ທະວີ​ການ​ສັງ​ສັນ​ມິດ​ຕະພາບ, ສັງ​ສັນ​ປະຊາຊົນ ​ແລະ ຮ່ວມ​ມື​ໃນ​ບັນດາ​ຂົງ​ເຂດ​ວັດທະນະທຳ, ຄົ້ນຄວ້າ​ບູຮານ​ຄະດີ, ການ​ປົກ​ປັກ​ຮັກສາ, ວິທະຍາສາດ​ພິພິດທະພັນ, ການທ່ອງທ່ຽວ, ສາທາລະນະ​ສຸກ​ສ່ວນ​ລວມ, ການ​ກິລາ, ການ​ສຶກສາ ​ແລະ ສື່​ຂ່າວ; ຊົມເຊີຍການ​ສ້າງສາ​ຍພົວພັນ​ແຮກສ່ຽວ ລະ​ຫວ່າ​ງນະຄອນ​ມູມບາຍ ​ແລະ ນະຄອນ​ໂຮ​ຈີ​ມິນ. ຝ່າຍ​ຫວຽດນາມ​ຊົມ​ເຊີຍ​ການ​ຕົກລົງ​ເປີດ​ສູນວັດທະນະທຳ​ອິນ​ເດຍຢູ່​ຮ່າ​ໂນ້ຍ ​ແນ​ໃສ່​ຊຸກຍູ້​ການພົວພັນ​ແລກປ່ຽນ​ລະຫວ່າງ​ບັນດາ​ສິນລະປິນ ​ແລະ ຄະນະ​ສິນ​ລະ​ປະກຳ​ສອງ​ປະ​ເທດ, ຈັດ​ຕັ້ງ​ງານ​ມະ​ໂຫລານ​ຟິມຮູບ​ເງົາ, ການ​ສັງ​ສັນ​ລະຫວ່າງ​ຊາວ​ໜຸ່ມ ​ແລະ ການ​ເຄື່ອນ​ໄຫວ​ວັດທະນະທຳ​ອື່ນ.

12. ທ່ານຜູ້ນຳທັງສອງຕີ​ລາຄາ​ສູງ​ບົດບາດ​ທີ່​ນັບ​ມື້​ນັບ​​ເພີ່ມ​ຂຶ້ນ​ຂອງ​ສອງ​ປະ​ເທດ ​ໃນ​ບັນດາ​ບັນຫາ​ພາກ​ພື້ນ ​ແລະ ​ເປັນ​ເອກະ​ພາບ​ເພີ່ມ​ທະວີ​ຫຼາຍ​ກວ່າ​ອີກ ການ​ຮ່ວມ​ມື​ກັນ​ໃນ​ບັນດາ​ເວທີ​ປາ​ໄສ​ພາກ​ພື້ນ​ ​ແລະ ສາກົນ, ພິ​ເສດ​ແມ່ນ​ຢູ່ ອາ​ຊຽນ, ກອງ​ປະຊຸມ​ຂັ້ນ​ສຸດ​ຍອດ​ອາຊີ​ຕາ​​ເວັນ​ອອກ (EAS), ​ເວທີ​ປາ​ໄສ​ພາກ​ພື້ນ​ອາ​ຊຽນ (ARF), ກອງ​ປະຊຸມ​ລັດຖະມົນຕີ​ວ່າການ​ປະ​ຊວງ​ປ້ອງ​ກັນ​ປະ​ເທດ​ອາ​ຊຽນເປີດ​ກວ້າງ (ADMM+), ​ເວທີ​ປາ​ໄສ​ການ​ເດີນທ​ະ​ເລ​ອາ​ຊຽນ​ເປີດ​ກວ້າງ (EAMF), ກອງ​ປະຊຸມ​ອາຊີ - ​ເອຣົບ (ASEM), ການ​ຮ່ວມ​ມື​ແມ່​ນ້ຳຂອງ - ​ແມ່​ນ້ຳ​ຄົງ​ຄາ (MGC), ອົງການ​ການ​ຄ້າ​ໂລກ (WTO), ສະຫະ​ປະຊາ​ຊາດ ​ແລະ ຂະ​ບວນການ​ບໍ່​ຮ່ວມ​ກຸ່ມ.

13. ອິນ​ເດຍຕີ​ລາຄາ​ສູງ​ຕໍ່​ການ​ທີ່​ຫວຽດນາມ​ສືບ​ຕໍ່​ສະໜັບສະໜູນອິນ​ເດຍກາຍ​ເປັນ​ກຳມະການ​ປະຈຳການສະພາ​ຄວາມ​ໝັ້ນຄົງ​ເປີດ​ກວ້າງ ແຫ່ງ​ສະຫະ​ປະຊາ​ຊາດ​. ຝ່າຍ​ອິນ​ເດຍຢັ້ງຢືນ​ຄວາມ​ສະໜັບສະໜູນ​ຫວຽດນາມ​ສະໝັກ​ຮັບ​ເລືອກ​ຕັ້ງ​ເປັນ​ກຳມະກາ​ນບໍ່​ປະຈຳການ ສະພາ​ຄວາມ​ໝັ້ນຄົງ​ແຫ່ງ​ສະຫະ​ປະຊາ​ຊາດ ສະໄໝ​ປີ 2020 - 2021 ​ແລະ ຝ່າຍ​ຫວຽດນາມ​ກໍ່​ສະ​ແດງ​ຄວາມ​ສະໜັບສະໜູນ​ແບບ​ໄປໆ​ມາໆ ຕໍ່​ກັບ​ອິນ​ເດຍ​ໃນການຮັບ​ສະໝັກ​ເລືອກ​ຕັ້ງ​ເປັນ​ກຳມະການ​ບໍ່ໍ່ປະຈຳ​ການ ສະພາ​ຄວາມ​ໝັນ​ຄົງ​ແຫ່ງ​ສະຫະ​ປະຊາ​ຊາດ​ສະ​ໄໝ​ຕໍ່​ໄປ. ຫວຽດນາມ​ກໍ່​ສະ​ແດງ​ຄວາມ​ສະໜັບສະໜູນ ​ຕໍ່​ການ​ທີ່ອິນ​ເດຍ​ກາຍ​ເປັນ​ສະມາຊິກ​ຄະນະ​ມົນຕີ​ສິດທິ​ມະນຸດ ​ໃນ​ສະ​ໄໝ​ປີ 2015 - 2017. ຝ່າຍ​ຫວຽດນາມ​ຕີ​ລາຄາ​ສູງ​ການ​ສະໜັບສະໜູນ​ຂອງ​ອິນ​ເດຍ ຕໍ່​ກັບ​ການ​ທີ່​ຫວຽດນາມມອບ​ສຳ​ເນົາ​ຮ້ອງ​ຂໍ​ເປັນ​ສະມາຊິກ​ ອົງການ​ອຸ​ທົກ​ກະສາດສາກົນ. ຝ່າຍ​ອິນ​ເດຍຕີ​ລາຄາ​ສູງ​ການ​ສະໜັບສະໜູນ​ຂອງ​ຫວຽດນາມ ຕໍ່​ກັບ​ການ​ທີ່​ອິນ​ເດຍຖືກ​ເລືອກ​ຕັ້ງ​ຄືນ​ໃໝ່​ເຂົ້າ​ໃນ​ກຸ່ມ​ທີ II ຂອງ​ອົງການ​ການບິນ​ພົນລະ​ເຮື​ອນສາກົນ (ICAO).

14. ສອງທ່ານຜູ້ນຳຂອງສອງປະ​ເທດ ​ໄດ້​ມີ​ການ​ພົບ​ປະ​ແລກປ່ຽນ​ໃນ​ບັນຍາກາດສະໜິດສະໜົມ ອົບ​ອຸ່ນ ​ແລະ ມິດຕະພາບ. ທ່ານ​ເລຂາທິການ​​ໃຫຍ່​ ຫງວຽນ​ຝູຈ້ອງ ​ໄດ້​ສະ​ແດງ​ຄວາມ​ຂອບ​ອົກ​ຂອບ​ໃຈ​ຢ່າງ​ຈິງ​ໃຈຕໍ່​ກັບ​ລັດຖະບານ ​ແລະ ປະຊາຊົນອິນ​ເດຍ ທີ່​ໄດ້​ໃຫ້​ຄວາມ​ຮັກ​ແພງ ​ແລະ ຕ້ອນຮັບ​ອັນ​ອົບ​ອຸ່ນ​ແກ່ທ່ານ​ເລຂາທິການ​​ໃຫຍ່ ​ແລະ ຄະນະ​ຜູ້​ແທນ​ຂັ້ນ​ສູງ​ຫວຽດນາມ ​ໃນ​ການ​ມາ​ຢ້ຽມຢາມ​ຂັ້ນ​ລັດ​ທີ່​ປະ​ເທດ​ສາທາລະນະ​ລັດ​ອິນ​ເດຍ. ທ່ານ​ເລຂາທິການ​​ໃຫຍ່​ ຫງວຽນ​ຝູຈ້ອງ ​ໄດ້​ເປັນ​ກຽດ​ເຊື້ອ​ເຊີນ​ທ່ານ​ນາຍົກລັດຖະມົນຕີ ມານ​ໂມ​ຮານ ຊິງ ມາຢ້ຽມຢາມ​ຫວຽດນາມ ​ໃນ​ເວລາ​ທີ່​ສະດວກ​ດີ​ສຳລັບ​ສອງ​ຝ່າຍ. ທ່ານ​ນາຍົກລັດຖະມົນຕີສະ​ແດງ​ຄວາມ​ດີ​ໃຈ​ຮັບ​ຄຳ​ເນີນ, ​ເວລາ​ການ​ຢ້ຽມຢາມ​ຈະ​ໄດ້​ຕົກລົງ​ໂດຍ​ຜ່ານ​ສາຍ​ທາງ​ການ​ທູດ./.

ຮຽບຮຽງ​ໂດຍ ຮ.ບ

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ