ວັນຈັນ, 18/11/2019
ງານມະໂຫລານສັງສັນມິດຕະພາບລະຫວ່າງ ຊາວໜຸ່ມ ຫວຽດນາມ - ຈີນ ຄັ້ງທີສອງ
17/2/2014 8:16' ສົ່ງ ພິມ
ພາບ: ທ່ານປະທານແນວໂຮມປະເທດຊາດ ຫວຽດນາມ ຫງວຽນທ້ຽນເຍິນ ແລະ ທ່ານເລຂາທິການທີ່ໜຶ່ງ ຄະນະຊາວໜຸ່ມກອມມູນິດ ໂຮ່ຈີມິນ ຫງວຽນດັກວິງ ຮ່ວມການສັງສັນມິດຕະພາບ ກັບບັນດາຜູ້ແທນຊາວໜຸ່ມ ສອງປະເທດ. ພາບຂອງ: TTXVN

 ງານ​ມະ​ໂຫລານ​ສັງ​ສັນ​ມິດຕະພາບລະຫວ່າງ​ຊາວ​ໜຸ່ມ​ຫວຽດນາມ - ຈີນ ​ໄດ້​ດຳເນີນ​ແຕ່​ວັນ​ທີ 24 ຫາ​ວັນ​ທີ 27 ພະຈິກ 2013, ຢູ່​ທີ່​ເຂດ​ປົກຄອງ​ຕົນ​ເອງ​ຊົນ​ເຜົ່າ​ຈ້ວງ, ​ແຂວງ​ກວ່າ​ງຊີ (ປະ​ເທດ​ຈີນ). ນີ້​ແມ່ນ​ໜຶ່ງ​​ໃນ​ບັນດາ​ການ​ເຄື່ອນ​ໄຫວ​ການ​ຕ່າງປະ​ເທດ, ການສັງ​ສັນ​ມິດຕະພາບ​ທີ່​ໃຫຍ່​ທີ່​ສຸດ​ຂອງ​ຊາວ​ໜຸ່ມສອງ​ປະ​ເທດ​​ໃນ​ຊຸມ​ປີ​ທີ່​ຜ່ານ​ມາ.

​ໃນງານ​ມະ​ໂຫລານ​ສັງ​ສັນ​ມິດຕະພາບ, ຊາວ​ໜຸ່ມສອງ​ປະ​ເທດ​ໄດ້​ຮັບ​ຟັງ​ຈົດໝາຍ​ອວຍພອນ​ຂອງ​ປະທານ​ປະ​ເທດ ​ເຈືອງ​ເຕິ​ນຊາງ ​ແຫ່ງ ສສ ຫວຽດນາມ ​ແລະ ຂອງ​ປະທານ​ປະ​ເທດ ສີ ຈິ້ນ​ຜິ​ງ ​ແຫ່ງ ສປ ຈີນ ທີ່​ໄດ້​ຝາກ​ມາ​ໃຫ້​ງາມ​ມະ​ໂຫລານ ​ແລະ ຊາວ​ໜຸ່ມ​ສອງ​ປະ​ເທດ.

ກ່າວ​ຄຳ​ປະ​ໄສ​ທີ່ງານ​ມະ​ໂຫງານ​ສັງ​ສັນ​ມິດຕະພາບ, ສະຫາຍ​ກຳມະການ​ກົມ​ການ​ເມືອງ ຫງວຽນ​ທ້ຽນ​ເຍິນ ​ໄດ້​ເນັ້ນ​ວ່າ, ພັກ ລັດຖະບານ ​ແລະ ປະຊາຊົນ​ຫວຽດນາມ ຍາມ​ໃດ​ກໍ່​ຖື​ເປັນ​ສຳຄັນ​ເຖິງ​ການ​ຂະຫຍາຍ​ສາຍ​ພົວພັນ​ກັບ​ຈີນ, ຖື​ວ່າ​ນີ້​ເປັນ​ແຜນ​ນະ​ໂຍບາຍ​ສະ​ເໝີ​ຕົ້ນ​ສະ​ເໝີ​ປາຍ ບໍ່​ປ່ຽນ​ແປງ ​ແລະ ​ເປັນ​ການ​ບຸລິມະສິດ​ອັນ​ດັບ​ໜຶ່ງ ​ໃນ​ນະ​ໂຍບາຍ​ການ​ຕ່າງປະ​ເທດ​ຂອງຕົນ. ​ຫວຽດນາມຕັດສິນ​ໃຈ​ພ້ອມ​ກັນ​ກັບ​ຈີນ​ປະຕິບັດ​ຂໍ້​ຕົກລົງ​ຕ່າງໆ ຂອງ​ການ​ນຳ​ຂັ້ນ​ສູງ​ສອງ​ປະ​ເທດ ​ແລະ ບັນດາ​ເອກະສານ​ທີ່​ໄດ້​ເຊັນ​ນຳ​ກັນ, ສູ້​ຊົນ​ເຮັດ​ໃຫ້ການ​ພົວພັນ​ຫວຽດນາມ - ຈີນ ຂະຫຍາຍຕົວ​ຢ່າງ​ດີງາມ.

ງານ​ມະ​ໂຫລານ​ສັງ​ສັນ​ມິດຕະພາບ​ຊາວ​ໜຸ່ມຫວຽດນາມ - ຈີນ ​ແມ່ນ​ການ​ເຄື່ອນ​ໄຫວ​ທີ່​ແທດ​ເໝາະ​ຕົວ​ຈິງ ​ເພື່ອ​ແນ​ໃສ່​ສືບ​ຕໍ່​ກໍ່ສ້າງ, ​ເພີ່ມ​ພູນ​ຄູນ​ສ້າງ​ນ້ຳ​ໃຈ​ມິດຕະພາບ, ຄວາມ​ເຂົ້າ​ໃຈ ​ແລະ ​ໄວ້​ວາງ​ໃຈ​ຊຶ່ງ​ກັນ​ແລະ​ກັນ ລະຫວ່າງ​ໄວ​ໜຸ່ມ​ຂອງສອງ​ປະ​ເທດ​ຫວຽດນາມ - ຈີນ, ປະກອບສ່ວນ​ເພີ່ມ​ທະວີ​ການ​ພົວພັນ "ຄູ່​ຮ່ວມ​ຮ່ວມ​ມື​ຍຸດ​ທະ​ສາດ​ຮອບດ້ານ" ຫວຽດນາມ - ຈີນ ຕາມ​ທິດ​ນຳ "ອັກສອນ 16 ຕົວ" ​ແລະ ຈິດ​ໃຈ "4 ດີ".

ດ້ວຍ​ຫົວ​ຂໍ້ "ບິນ​ເຂົ້າ​ສູ່​ຄວາມ​ຫວັງ​ຂອງ​ໄວ​ໜຸ່ມ, ສ້າງສາ​ອະນາຄົດ​ອັນ​ສະຫວ່າງ​ສະ​ໄຫວ", ງານ​ມະ​ໂຫລານ​ສັງ​ສັນ​ມິດຕະພາບ​ຊາວ​ໜຸ່ມຫວຽດນາມ - ຈີນ​ ຄັ້ງ​ທີ​ສອງ​ປີ 2013 ນີ້ ​ໄດ້​ຈັດ​ຕັ້ງ​ໃນ​ຂະໜາດ​ໃຫຍ່ ທີ່​ມີ​ການ​ເຂົ້າ​ຮ່ວມ​ຂອງ​ຜູ້​ແທນ​ຊາວ​ໜຸ່ມ​ຫວຽດນາມ 3.000 ຄົນ ຊຶ່ງ​ເປັນ​ສະມາຊິກ​ຊາວ​ໜຸ່ມ ຊາວ​ໜຸ່ມດີເດັ່ນ​ທີ່ເປັນຕົວ​ແທນ​ໃນ​ທຸກ​ຂົງ​ເຂດ: ຂ້າ​ລັດຖະການ, ນັກຮຽນ​ນັກ​ສຶກສາ, ກຳມະກອນ, ກະສິກອນ, ນັກ​ວິ​ສາ​ຫະກິດ​ໜຸ່ມ​ນ້ອຍ, ນາຍ​ໝໍ​ນາຍ​ແພດ​ໜຸ່ມ​ນ້ອຍ, ສິນລະປິນ, ນັກ​ກິລາ, ຊາວ​ໜຸ່ມ​ກຳລັງ​ປະກອບ​ອາວຸດ ​ແລະ ພະນັກງານ​ເຮັດ​ວຽກ​ງານ​ຊາວ​ໜຸ່ມ​​ເຍົາວະຊົນ. ຜູ້​ແທນຊາວ​ໜຸ່ມ​ຈີນ​ທີ່​ເຂົ້າຮ່ວມງານ​ສັງ​ສັນມິດຕະພາບກວມດ້ວຍ ຊາວ​ໜຸ່ມ 5.600 ຄົນ ຂອງ​ແຂວງ​ກວ່າ​ງຊີ ​ແລະ ຊາວ​ໜຸ່ມ​ດີ​ເດັ່ນ​ທີ່​ເປັນ​ຕົວ​ແທນ 300 ຄົນ ມາ​ຈາກ 30 ​ແຂວງ ນະຄອນ ​ເຂດ​ປົກຄອງ​ຕົນ​ເອງ​ຂອງ​ປະ​ເທດ​ຈີນ.

ສະຫາຍ​ຫງວຽນ​ແມ້ງ​ຢຸ້ງ, ​ເລຂາທິການ​ສູນ​ກາງ​ຄະນະ​ຊາວ​ໜຸ່ມ​ກອມ​ມູນິດ​ໂຮ່ຈີ​ມິນ ​ໃຫ້​ຮູ້​ວ່າ: ການ​ເຄື່ອນ​ໄຫວ​ໄດ້​ດຳ​ເນີນ​ຢູ່ 8 ນະຄອນ​ຄື ຫຼຽວ​ໂຈວ, ​ເປ່​ໄຫ່, ຫຼິມ​ໂຈ​ວ, ກຸ້ຍ​ກາງ, ຫງໍ​ຫຼິມ, ​ເຝິ່ງ​ແຖງ, ຊຸງ​ຕ້າ ​ແລະ ໜານ​ໜິງ. ຜູ້​ແທນ​ຊາວ​ໜຸ່ມ​ຫວຽດນາມ 3.000 ຄົນ ​ແບ່ງ​ອອກ​ເປັນ 7 ກຸ່ມ ​ໄປ 7 ນະຄອນ ​ແລະ ​ເຂົ້າ​ຮ່ວມ​ບັນດາ​ການ​ເຄື່ອນ​ໄຫວ​ຕົ້ນ​ຕໍ່​ເຊັ່ນ: ພິທີ​​ໄຂ​ງານ​ມະ​ໄຫ​ລານ​ສັງ​ສັນ​ມິດຕະພາບ​ຢູ່​ທີ່​ດ່ານ​ຊາຍ​ແດນ ດົງ​ຮຶງ; ຢາມ​ບາງ​ບູຮານສະຖານ​ທີ່ຕິດ​ແໜ້ນ​ກັບ​ການ​ປະຕິວັດ​ຫວຽດນາມ ​ແລະ ປະທານ​ໂຮ່ຈີມິນ; ປະຊຸມສຳ​ມະ​ນາ​​ໃນ​ຫົວ​ຂໍ້ ຊາວ​ໜຸ່ມ​ກັບ​ການ​ພັດທະນາ​ອຸດສາຫະກຳ; ຢ້ຽມຢາມ ​ແລະ ຮ່ວມ​ການ​ສັງ​ສັນ​ຢູ່​ບັນດາ​ໂຮງງານ, ອົງການ​ຈັດ​ຕັ້ງ; ​ແລກປ່ຽນ​ວັດທະນະທຳ ສິນລະປະກຳ ກິລາ ກັບ​ຊາວ​ໜຸ່ມ​ທ້ອງ​ຖິ່ນ; ​ເຂົ້າ​ຮ່ວມ​ບັນດາ​ການ​ເຄື່ອນ​ໄຫວ​ປົກ​ປັກ​ຮັກສາ​ສິ່ງ​ແວດ​ລ້ອມ... ພາຍຫຼັງ​ທີ່​ໄດ້​ເຂົ້າ​ຮ່ວມ​ການ​ເຄື່ອນ​ໄຫວ​ຕ່າງໆ​ຢູ່​ເຈັດ​ນະຄອນ​ດັ່ງກ່າວ, ຜູ້​ແທນ​ຊາວ​ໜຸ່ມ​ຫວຽດນາມ 3.000 ຄົນ​ຈະ​ພ້ອມ​ກັນ​ເຂົ້າ​ຮ່ວມ​ບັນດາ​ການ​ເຄື່ອນ​ໄຫວ​ລວ​ມສູນ ຢູ່ນະຄອນ​ໜານ​ໜິງ.

ຢູ່​ທີ່ງານ​ມະ​ໂຫລານ​ສັງ​ສັນ​ມິດຕະພາບ, ພາຍຫຼັງ​ພິທີການ​ຕົ້ນ​ຕໍ່ ​ແມ່ນ​ລາຍການ​ສະ​ແດງ​ສິນລະປະກຳ​ພິ​ເສດ ​ແລະ ການ​ສັງ​ສັນ ດ້ວຍ​ການ​ເຂົ້າ​ຮ່ວມຂອງຊາວ​ໜຸ່ມ​ສອງປະ​ເທດ​ເກືອບ 1 ໝື່ນ​ຄົນ.

ງານ​ມະ​ໂຫລານ​ສັງ​ສັນ​ມິດຕະພາບ​ຊາວ​ໜຸ່ມ ຫວຽດນາມ - ຈີນ ​ແມ່ນ​ເຫດການ​ການ​ເມືອງ​ທີ່ສຳຄັນຂອງ​ໄວ​ໜຸ່ມ​ສອງ​ປະ​ເທດ. ຜົນສຳ​ເລັດ​ຂອງ​ການ​ສັງ​ສັນ​ມິດ​ຕະພາບ ຈະ​ປະກອບສ່ວນ​ເພີ່ມ​ທະວີ​ນ້ຳ​ໃຈ​ມິດຕະພາບ​ຫວຽດນາມ - ຈີນ​ເວົ້າ​ລວມ ​ແລະ ລະຫວ່າງ​ໄວ​ໜຸ່ມ​ສອງ​ປະ​ເທດ​ເວົ້າ​ສະ​ເພາະ./.

ຮຽບຮຽງ​ໂດຍ ຈາງ​ເຈິ່ນ

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ