ວັນອາທິດ, 18/8/2019
ທ່ານປະທານປະເທດ ເຈືອງເຕິນຊາງ ຢ້ຽມຢາມປະເທດຍີ່ປຸ່ນ ຢ່າງເປັນທາງການ
1/4/2014 14:34' ສົ່ງ ພິມ
ເຈົ້າຊີວິດຍີ່ປຸ່ນ ອາກີຮີໂຕະ ແລະລາຊີນີ ສະເດັດມາຂ່ຳນັບອຳລາທ່ານປະທານປະເທດ ແລະພັນລະຍາ ທີ່ອາຄານຮັບແຂກຂອງສະພາແຫ່ງຊາດ ຢູ່ເມືອງຫຼວງໂຕກີໂອ. ພາບ: TTXVN

ການ​ຢ້ຽມຢາມ​ຍີ່ປຸ່ນ ຂອງ​ທ່ານ​ປະທານ​ປະ​ເທດ ​ເຈືອງ​ເຕິ​ນຊາງ ຄັ້ງ​ນີ້​ແມ່ນ​ເຫດການ​ທີ່​ມີ​ຄວາມ​ໝາຍການ​ເມືອງ​ອັນ​ສຳຄັນ​ໃນ​ການ​ພົວພັນ​ລະຫວ່າງ​ສອງ​ປະ​ເທດ, ​ເພື່ອ​ແນໃສ່​ເພີ່ມ​ທະວີ​ຄວາມ​ໄວ້​ວາງ​ໃຈ​ການ​ເມືອງ ລະຫວ່າງ​ຫວຽດນາມ - ຍີ່​ປຸ່ນ ​ແລະ ການ​ປະສານ​ສົມທົບ​ລະຫວ່າງ​ສອງ​ປະ​ເທດ​ໃນ​ບັນດາ​ບັນຫາ​ສາກົນ ​ແລະ​ພາກ​ພື້ນ. ພ້ອມ​ກັນນັ້ນ, ນີ້​ກໍ່​ຍັງ​ແມ່ນ​ໂອກາດດີ​ເພື່ອ​ໃຫ້​ສອງ​ປະ​ເທດ​ຊຸກຍູ້​ການ​ຮ່ວມ​ມື​ໃນ​ບັນດາ​ຂົງ​ເຂດ​ເສດຖະກິດ ການ​ຄ້າ ການ​ລົງທຶນ ການ​ຊ່ວ​ຍເຫຼືອ​ພັດທະນາ​ເປັນ​ທາງ​ການ (ODA) ວິທະຍາສາດ​ເຕັກ​ໂນ​ໂລຊີ ການ​ສຶກສາ​ກໍ່ສ້າງ ​ແລະ ການ​ກະສິກຳ.

​ເຈົ້າຊີວິດ​ຍີ່ປຸ່ນ ອາ​ກີ​ຮີ​ໂຕະ ​ໃຫ້ການ​ຕ້ອນຮັບ​ຢ່າງ​ສະໜິດສະໜົມ​ຕໍ່ທ່ານ​ປະທານ​ປະ​ເທດ ​ເຈືອງເຕິນຊາງ

ຕອນ​ເຊົ້າ​ວັນ​ທີ 17 ມີນາ 2014, ພິທີ​ຕ້ອນຮັບ​ທ່ານ​ປະທານ​ປະ​ເທດ ​ເຈືອງ​ເຕິ​ນຊາງ ​ແລະ​ພັນ​ລະ​ຍາ ພ້ອມ​ດ້ວຍ​ຄະນະ​ຜູ້​ແທນ​ຂັ້ນ​ສູງ​ ຂອງ​ຫວຽດນາມ ​ໄດ້​ຈັດ​ຂຶ້ນ​ຢ່າງ​ສົມ​ກຽດ ເປັນ​ທາງ​ການ ຢູ່​ທີ່ ພະ​ລາຊະ​ວັງຍີ່ປຸ່ນ ດ້ວຍ​ພິທີການ​ສູງ​ສຸດ​ຂອງ​ລາຊະວົງ ທີ່​ໃຊ້​ເພື່ອ​ຕ້ອນຮັບປະມຸກ​ແຫ່ງ​ຊາດ​ທີ່​ມາ​ຢ້ຽມຢາມ​ຂັ້ນ​ລັດ.

 ຕໍ່​ຈາກ​ພິທີ​ຕ້ອນຮັບ, ​ເຈົ້າ​ຊີວິດຍີ່​ປຸ່ນ ​ແລະລາ​ຊີ​ນີ ​ໄດ້​ພົບ​ປະ​ໂອ້​ລົມ​ຢ່າງ​ສະໜິດສະໜົມ​ ກັບທ່ານ​ປະທານ​ປະ​ເທດ ​ເຈືອງ​ເຕິ​ນຊາງ ​ແລະ​ພັນ​ລະ​ຍາ ພ້ອມ​ດ້ວຍ​ຄະນະ​ຜູ້​ແທນ​ຂັ້ນ​ສູງ​ ຂອງ​ຫວຽດນາມ. ທ່ານ​ປະທານ​ປະ​ເທດ ​ເຈືອງ​ເຕິ​ນຊາງ ​ໄດ້​ຕາງໜ້າ​ລັດ ​ແລະ​ປະຊາຊົນ​ຫວຽດນາມ ສະ​ແດງ​ຄວາມ​ຂອບ​ອົກ​ຂອບ​ໃຈ ຕໍ່​ສັນທາຄະຕິ​ອັນ​ດີງາມ ​ແລະ​ຄວາມ​ເອົາ​ໃຈ​ໃສ່​ອັນ​ເລິກ​ເຊິ່ງ ທີ່ເຈົ້າ​ຊີວິດ ​ລາ​ຊີ​ນີ ກໍ່​ຄື​ລາຊະວົງ​ຍີ່ປຸ່ນ ມີ​ຕໍ່​ປະຊາຊົນ​ຫວຽດນາມ ​ແລະສາຍ​ພົວພັນ​ມິດຕະພາບ ການ​ຮ່ວມ​ມື​ຫວຽດນາມ - ຍີ່ປຸ່ນ. 

 ທ່ານ​ປະທານ​ປະ​ເທດ ​ເຈືອງ​ເຕິ​ນຊາງ ​ແລະ ເຈົ້າ​ຊີວິດ ອາກີຮີ​ໂຕະ ພ້ອມ​ກັນ​ຕີ​ລາຄາ​ສູງ​ກ່ຽວ​ກັບ​ຜົນສຳ​ເລັດ​ຂອງ​ການຈັດ​ຕັ້ງ ການ​ເຄື່ອນ​ໄຫວ​​ໃນ​ປີ​ມິດຕະພາບ​ຫວຽດນາມ - ຍີ່ປຸ່ນ 2013 ສະ​ເຫຼີ​ມສະຫຼອງ​ການ​ສ້າງ​ຕັ້ງ​ສາຍ​ພົວພັນ​ທາງ​ການ​ທູດ ​ລະຫວ່າງ​ສອງ​ປະ​ເທດຄົບຮອບ 40 ປີ ​ແລະ​​ໃຫ້ທັດສະນະ​ວ່າ ຜົນສຳ​ເລັດ​ເຫຼົ່າ​ນີ້​ແມ່ນ​ພື້ນຖານ​ອັນ​ສະດວກ​ດີ ​ເພື່ອ​ເພີ່ມ​ທະວີ​ກວ່າ​ອີກ​ການ​ພົວພັນ​ຮ່ວມ​ມື ມິດຕະພາບ​ຫວຽດນາ - ຍີ່ປຸ່ນ ຂຶ້ນ​ສູ່​ລະດັບ​ໃໝ່ ​ເພື່ອ​ຜົນ​ປະ​ໂຫຍ​ດຂອງ​ປະຊຊົນ​ສອງ​ປະ​ເທດ ​ເພື່ອ​ສັນຕິພາບ ສະຖຽນ​ລະ​ພາບ ​ແລະ ການ​ຮ່ວມ​ມື​ໃນ​ພາກ​ພື້ນ ​ແລະ ​ໃນ​ໂລກ.

ທ່ານ​ປະທານ​ປະ​ເທດ ພົບ​ປະ​ສົນທະນາ​ກັບ​ທ່ານ​ນາຍົກລັດຖະມົນຕີຍີ່ປຸ່ນ

ຕອນ​ເຊົ້າ​ວັນ​ທີ 18 ມີນາ, ທ່ານ​ປະທານ​ປະ​ເທດ ​ເຈືອງ​ເຕິ​ນຊາງ ​ໄດ້​ມາ​ຢາມ​ແລະ​ກ່າວ​ປາ​ໄສ​ທີ່​ສະພາ​ແຫ່ງ​ຊາດ​ຍີ່ປຸ່ນ ​ເຊິ່ງ​ເປັນ​ອົງການ​ນິຕິບັນຍັດທີ່​ມີ​ປະຫວັດສາດ​ອັນ​ເກົ່າ​ແກ່​ທີ່​ສຸດ​ຢູ່​ອາຊີ. ດ້ວຍ​ຫົວ​ຂໍ້ “ປ່ຽນ​ແປງ​ໃໝ່ ​ແລະປະດິດ​ສ້າງ ​ເພື່ອ​ແທດ​ເໝາະ​ຄ່ອງ​ຕົວ​ຢູ່​ໃນ​ໂລກ​ທີ່​ກຳລັງ​ປ່ຽນ​ແປງ” ບົດ​ປາ​ໄສ​ໄດ້​ຢັ້ງຢືນ​ຄວາມ​ປະສົງ​ຢາກ​ເພີ່ມ​ທະວີ​ການ​ພົວພັນ​ມິດຕະພາບ​ ແລະການຮ່ວມ​ມື​ແບບ​ຍືນ​ຍົງ​ລະຫວ່າງ​ສອງ​ປະ​ເທດ​ຫວຽດນາມ - ຍີ່ປຸ່ນ, ທັງ​ຍົກ​ໃຫ້​ເຫັນ​ແຈ້ງ​ການ​ຕີ​ລາຄາ​ປະ​ເມີນ​ຄ່າ​ຢ່າງ​ເລິກ​ເຊິ່ງ ກ່ຽວ​ກັບ​ສະພາບ​ການ​ໂລກ ພາກ​ພື້ນ ​ແລະ​ບັນດາ​ທ່າ​ອຽງ​ໃຫຍ່ ຂອງ​ຍຸກ​ສະ​ໄໝ, ຜ່ານ​ສິ່ງ​ດັ່ງກ່າວ​ນັ້ນ​ເພື່ອ​ຢັ້ງຢືນ “ປ່ຽນ​ແປງ​ໃໝ່ ​ແລະປະດິດ​ສ້າງ ​ເພື່ອ​ແທດ​ເໝາະ​ຄ່ອງ​ຕົວ​ຢູ່​ໃນ​ໂລກ​ທີ່​ກຳລັງ​ປ່ຽນ​ແປງ” ​ແມ່ນ​ການ​​ເລື​ອກ​ເຝັ້ນອັນ​ຈຳ​ເປັນ​ຂອງ​ທຸກໆ​ປະຊາ​ຊາດ.

​ໃນ​ຕອນ​ແລງ​ວັນ​ດຽວ​ກັນ, ຢູ່​ທີ່​ສຳນັກ​ນາຍົກລັດຖະມົນຕີຍີ່ປຸ່ນ, ທ່ານ​ປະທານ​ປະ​ເທດ ​ເຈືອງ​ເຕິ​ນຊາງ ​ໄດ້​ຮ່ວມ​ການ​ພົບ​ປະ​ປຶກສາ​ຫາລື​ ກັບ​ທ່ານນາຍົກລັດຖະມົນຕີຍີ່ປຸ່ນ ຊີ​ນ​ໂຢ ອາ​ເບ.


ທ່ານ​ປະທານ​ປະ​ເທດ ​ເຈືອງ​ເຕິ​ນຊາງ ພົບ​ປະປຶກສາ​ຫາລື​ກັບ
​ທ່ານ​ນາຍົກລັດຖະ​ມົນຕີ​ຍີ່ປຸ່ນ ຊີນໂຢ ອາ​ເບ ຢູ່​ທີ່​ສຳນັກງານ​ນາຍົກລັດຖະມົນຕີ
. ພາບ: TTXVN

ທ່ານ​ຜູ້ນຳ​ທັງ​ສອງ​ໄດ້​ສະ​ແດງ​ຄວາມ​ດີ​ອົກ​ດີ​ໃຈ​ກ່ຽວ​ກັບ​ການ​ຂະຫຍາຍຕົວ​ຢ່າງ​ແຂງ​ແຮງ​ຂອງ​ການ​ພົວພັນ​ຫວຽດນາມ - ຍີ່ປຸ່ນ ​ໃນ​ຂົງ​ເຂດ​ຕ່າງໆ​ທຸກ​ຂົງ​ເຂດ ນັບ​ແຕ່​ການ​ເມືອງ ການ​ປ້ອງ​ກັນ​ຄວາມ​ສະຫງົບ​ປ້ອງ​ກັນ​ປະ​ເທດ ​ເສດຖະກິດ ການ​ຄ້າ ການ​ລົງທຶນ ຈົນ​ເຖິງ​ການ​ສັງ​ສັນ​ລະຫວ່າງປະຊາຊົນ ການຮ່ວມ​ມືດ້ານ​ວັດທະນະທຳ - ທ່ອງທ່ຽວ ການ​ພັດທະນາ​ແຫຼ່ງບຸກຄະລາ​ກອນ, ພິ​ເສດ​ແມ່ນ ນັບ​ແຕ່​ເມື່ອ​ສອງປະ​ເທດ​ສ້າງ​ກອບ​ການ​ພົວພັນ​ຄູ່​ຮ່ວມ​ຍຸດ​ທະ​ສາດປີ 2009. ທ່ານ​ຜູ້ນຳ​ທັງ​ສອງ​ໄດ້​ລົງ​ນາມ​ໃນ​ຖະ​ແຫຼງການ​ຮ່ວມ ວ່າ​ດ້ວຍ​ການ​ພົວພັນ​ຄູ່​ຮ່ວມ​ຍຸດ​ທະ​ສາດ​ຢ່າງ​ກວ້າງຂວາງ​ເລິກ​ເຊິ່ງ ​ເພື່ອ​ສັນຕິພາບ ​ແລະ ຄວາມ​ຈະ​ເລີ​ນພັດທະນາ​ຢູ່​ອາຊີ - ປາຊີ​ຟິກ.

ກ່ຽວ​ກັບ​ການ​ເມືອງ, ສອງ​ຝ່າ​ຍ​ເຫັນ​ດີ​ດຳ​ເນີນ​ຢ່າງ​ເປັນ​ປະຈຳ ບັນດາ​ການ​ຢ້ຽມຢາມ ​ແລະ ການ​ພົບ​ປະ​ຂັ້ນ​ສູງ, ຜັນ​ຂະຫຍາຍ​ຢ່າງ​ມີ​ປະສິດທິ​ຜົນ ​ບັນດາ​ກອບ​ງານ ກົນ​ໄກ​ຮ່ວມ​ມື​ຢູ່​ຂັ້ນ​ຕ່າງໆ. ທ່ານ​ນາຍົກລັດຖະມົນຕີຍີ່ປຸ່ນ ສະ​ແດງ​ຄວາມ​ພ້ອມ​ທີ່​ຈະ​ຊ່ວຍ​ໜູນ​ຫວຽດນາມ ​ໃນ​ການ​ເພີ່ມ​ທະວີ​ຄວາມ​ສາມາດ​ປະຕິບັດ​ກົດໝາຍ​ຢູ່​ເທິງ​ທະ​ເລ.

ກ່ຽວ​ກັບ​ເສດຖະກິດ, ທ່ານ​ນາຍົກລັດຖະມົນຕີ ຊີ​ນ​ໂຢ ອາ​ເບ ຢັ້ງຢືນ​ວ່າ​ຈະ​ສືບຕໍ່ຖື​ຫວຽດນາມ​ເປັນ​ຄູ່​ຮ່ວມສຳຄັນ​​ແຖວ​ໜ້າ ​ໃນ​ນະ​ໂຍບາຍ​ຊ່ວ​ຍເຫຼືອ​ພັດທະນາ​ເປັນ​ທາງ​ການ (ODA) ​ແລະ​ຈະ​ຕັ້ງໜ້າ​ຊ່ວຍ​ເຫຼືອ​ຫວຽດນາມ​ປະຕິບັດ​ຈຸດໝາຍ ​ຫັນ​ປະ​ເທດ​ຊາດ​ເປັນ​ອຸດສາຫະກຳ ທັນ​ສະ​ໄໝ.

ສອງ​ຝ່າຍ​ໄດ້​ເປັນ​ເອກະ​ພາບ​ກັນ ​ສືບ​ຕໍ່​ເພີ່ມ​ທະວີ​ການ​ຮ່ວມ​ມື​ດ້ານການ​ຄ້າ ການ​ລົງທຶນ, ປະສານ​ສົມທົບ​ກັນ​ຢ່າງ​ແໜ້ນ​ແຟ້ນ ​ເພື່ອ​ປະຕິບັດ​ຢ່າງມີ​ປະສິດທິ​ຜົນ ບັນດາ​ສັນຍາ​ຕົກລົງ​ຕ່າງໆ​ຂອງ​ການ​ນຳ​ຂັ້ນ​ສູງ ​ແລະ ບັນດາ​ໂຄງການ​ຮ່ວມ​ມື​ຂະໜາດ​ໃຫຍ່ ​ເຊິ່ງກວມ​ດ້ວຍ​ການ​ທີ່​ຍີ່ປຸ່ນ​ຊ່ວຍໜູນ ຜັນ​ຂະຫຍາຍ​ແຜນການ​ເຄື່ອນ​ໄຫວ ​ໃຫ້​ແກ່ 6 ຂະ​ແໜງ​ການ​ອຸດສາຫະກຳ​ບຸລິມະສິດ ​ໃນ​ຍຸດ​ທະ​ສາດ​ການ​ຫັນ​ເປັນ​ອຸດສາຫະກຳ ​ຂອງ​ຫວຽດນາມ ​ໃນ​ກອບ​ການ​ຮ່ວມ​ມື​ຫວຽດນາມ - ຍີ່ປຸ່ນ, ຊ່ວຍ​ໜູນ​ຫວຽດນາມ​ໃນ​ການ​ຂະຫຍາຍ ​ບັນດາ​ເຂດ​ອຸດສາຫະກຳພິເສດສະ​ເພາະ, ບັນດາ​ໂຄງການ​ກໍ່ສ້າງ​ໂຮງງານ​ໄຟ​ຟ້າປະລະມານູ ນິງຖ້ວນ 2. ຝ່າຍ​ຍີ່ປຸ່ນ​ໃຫ້​ຄຳ​ໝັ້ນ​ສັນຍາ​ຈະ​ຊ່ວຍ​ເຫຼືອ​ຫວຽດນາມ ​ໃນ​ບັນດາ​ໂຄງການ​ກໍ່ສ້າງ​ໂຄງ​ສ້າງ​ພື້ນຖານ.

ທ່ານ​ຜູ້ນຳ​ທັງ​ສອງ​​ເປັນ​ເອກະ​ພາບ​ກັນ​ຊຸກຍູ້​ການ​ຮ່ວມ​ມື​ຮອບດ້ານ​ໃນ​ຂົງ​ເຂດ​ກະສິກຳ, ຊົມ​ເຊີຍ​ກະຊວງ​ກະສິກຳ​ສອງ​ປະ​ເທດ ທີ່​ໄດ້​ຕົກລົງ​ສ້າງຕັ້ງໜ່ວຍ​ປະຕິບັດ​ງານ​ລວມ ​ແລະກ້າວ​ໄປ​ເຖິງ​ການ​ສ້າງ​ແຜນການ​ຮ່ວມ​ມື​ຍາວ​ນານ​ໃນ​ຂົງ​ເຂດ​ນີ້.

ສອງ​ຝ່າຍກໍ່​ໄດ້​ໃຊ້​ເວລາ​ຫຼາຍ​ເພື່ອ​ແລກປ່ຽນ​ຄວາມ​ຄິດ​ຄວາມ​ເຫັນ ກ່ຽວ​ກັບ​ບັນດາ​ມາດຕະ​ເກນ​ຍູ້​ແຮງ​ກວ່າ​ອີກ​ການ​ຮ່ວມ​ມື​ໃນ​ບັນດາ​ຂົງ​ເຂດ ພັດທະນາ​ແຫຼ່ງບຸກຄະລາ​ກອນ ວິທະຍາສາດ​ເຕັກ​ໂນ​ໂລ​ຊີ ​ແລະ ສາທາລະນະ​ສຸກ. ຝ່າຍ​ຍິ່ປຸ່ນ​ໃຫ້​ຄຳ​ໝັ້ນ​ສັນຍາ ​ຈະ​ຕັ້ງໜ້າ​ຊ່ວຍ​ເຫຼືອ​ຫວຽດນາມ ຍົກ​ລະດັບ​​ໂຮງຮຽນ​ມະຫາວິທະຍາ​ໄລ​ທີ່​ເປັນ​ຈຸດ​ໜັກ ​ແລະ​ ໂຮງຮຽນ​ອາຊີວະ​ສຶກສາບາງ​ແຫ່ງ ​ໃຫ້​ບັນລຸ​ມາດຕະຖານ​ສາກົນ, ຄົ້ນຄວ້າ​​ເປີດ​ກວ້າງ​ຂະໜາດ​ການ​ຮັບຜູ້ສະໝັກ​ເປັນຄົນ​ບຳລຸງ​ຮັກສາ ​ເປັນ​ນາງພະຍາບານ​ມາ​ຈາກ​ຫວຽດນາມ ແລະ​ເພີ່ມ​ການ​ຮັບ​ເອົາ​ກຳມະກອນ​ຝຶກ​ງານ​ຫວຽດນາມ ມາ​ຝຶກ​ຫັດ​ເຕັກ​ນິກ​ວິຊາ​ຊ່າງ. 

ທ່ານ​ປະທານ​ປະ​ເທດສຳ​ເລັດ​ສິ້ນສຸດ​ການ​ຢ້ຽມຢາມປະ​ເທດ​ຍີ່ປຸ່ນ​ຢ່າງ​ດີງາມ

ວັນ​ທີ 19 ມີນາ, ສືບ​ຕໍ່​ລາຍການ​ຢ້ຽມຢາມ​ຂັ້ນ​ລັດ​ທີ່​ປະ​ເທດຍີ່ປຸ່ນ ທ່ານ​ປະທານ​ປະ​ເທດ ​ເຈືອງ​ເຕິ​ນຊາງ ໄດ້​ໄປ​ຢາມ​ນະຄອນ ​ໂອຊາ​ກາ - ສູນ​ອຸດສາຫະກຳ​ແຖວ​ໜ້າ​ຂອງ​ຍີ່ປຸ່ນ.

ກ່ອນ​ນັ້ນ, ເຈົ້າ​ຊີວິດຍີ່ປຸ່ນ ອາ​ກີ​ຮີ​ໂຕະ ພ້ອມ​ດ້ວຍ​ລາ​ຊີ​ນີ ​ໄດ້​ສະ​ເດັດມາ​ທີ່​ອາຄານ​ຮັບ​ແຂກ​ຂອງ​ສະພາ​ແຫ່ງຊາດ ​ເພື່ອ​ຂ່ຳນັບ​ອຳ​ລາ ທ່ານ​ປະທານ​ປະ​ເທດ ​ເຈືອງ​ເຕິ​ນຊາງ ​ແລະ​ພັນ​ລະ​ຍາ. ທ່ານ​ປະທານ​ປະ​ເທດ ​ເຈືອງ​ເຕິ​ນຊາງ ​ໄດ້ສະ​ແດງ​ຄວາມ​ຮູ້​ບຸນຄຸນ​ຢ່າງ​ຈິງ​ໃຈ​ຕໍ່ເຈົ້າ​ຊີວິດ ​ລາ​ຊີ​ນີ ​ແລະ​ລາຊະ​ວົງ ທີ່​ໄດ້​ໃຫ້​ຄວາມ​ຮັກ​ແພງ​ອັນ​ອົບ​ອຸ່ນ ​ແລະ​ຄວາມ​ເອົາ​ໃຈ​ໃສ່​ອັນ​ເລິກ​ເຊິ່ງ​ ແກ່​ຄະນະ​ຜູ້​ແທນ​ຫວຽດນາມ.

ຢູ່​ທີ່​ນະຄອນ ​ໂອຊາ​ກາ, ທ່ານ​ປະທານ​ປະ​ເທດ ​ພ້ອມ​ດ້ວຍ​ການ​ນນຳຂອງ​ບັນດາ​ກະຊວງ ຂະ​ແໜງ​ການ​ຫວຽດນາມ ​ໄດ້​ພົບປະ​ແລກປ່ຽນ​ຄວາ​ຄິດ​ຄວາມ​ເຫັນ​ ກັບ​ຜູ້ຕາງໜ້າສະຫະພັນ​ເສດຖະກິດ​ເຂດການ​ຊາຍ ​ແລະການ​ນຳ​ເສດຖະກິດ​ເຂດການ​ຊາຍ.

​ໃນ​ກອບ​ການ​ຢັຽມຢາມ​ຄັ້ງ​ນີ້, ທ່ານ​ປະທານ​ປະ​ເທດ ​ໄດ້​ໄປ​ຢາມ​ບັນດາ​ພື້ນ​ຖານ​ຜະລິດ​ກະສິກຳ​ທັນ​ສະ​ໄໝ ຢູ່​ແຂວງ​ອີ​ບາຣາກີ - ​ເປັນ​ແຂວງ​ຜະລິດ​ກະສິກຳ​ທີ່​ໃຫຍ່​ທີ່​ສອງ​ຂອງ​ຍີ່ປຸ່ນ, ຕ້ອນຮັບທ່ານ​ໂຢຊີ​ໂຕ ​ແຊນ​ໂກ​ກູ ອະດີດຮັກສາການ​ປະທານ​ພັກ​ປະຊາທິປະ​ໄຕ ​ແລະ ​ທ່ານ ມາດ​ຊູ​ດາ ອີ​ວວາ ອະດີດ​ສະມາ​ຊິກ​ສະພາ​ສູງ ພ້ອມ​ດ້ວຍຊາວ​ຍີ່ປຸ່ນ​ທີ່​ເປັນ​ເພື່ອນຂອງ​ຫວຽດນາມ 100 ກວ່າ​ຄົນ, ພົບ​ປະ​ແລະ​ຕ້ອນຮັບ ​ການ​ນຳ​ຂອງ​ບັນດາ​ພັກ ​ແລະ ການ​ນຳ​ພັນທະ​ພາບ​ສະມາຊິກ​ສະພາ​ມິດຕະພາບ ຫວຽດນາມ - ຍີ່ປຸ່ນ, ການ​ນຳ​ຂອງບາງ​ກຸ່ມ​ບໍລິສັດ ວິ​ສາ​ຫະກິດ​ຍີ່ປຸ່ນ…

​ໃນ​ຕອນຄ່ຳ​ວັນ​ດຽວ​ກັນ, ທ່ານ​ປະທານ​ປະ​ເທດ ​ແລະ​ພັນ​ລະ​ຍາ ພ້ອມ​ດ້ວຍ​ຄະນະ​ຜູ້​ແທນ​ຂັ້ນ​ສູງ​ຫວຽດນາມ ​ໄດ້​ອອກ​ຈາກ ​ໂອຊາ​ກາ ກັບ​ເມືອ​ຮ່າ​ໂນ້ຍ, ສຳ​ເລັດ​ສິ້ນສຸດ​ການ​ຢ້ຽມຢາມປະ​ເທດ​ຍີ່ປຸ່ນ​ຢ່າງ​ດີງາມ./.

ສັງ​ລວມ​ໂດ​ຍ: ຢາ​ວບ໋າ​ວ


Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ