ວັນອາທິດ, 22/9/2019
ທ່ານປະທານສະພາແຫ່ງຊາດ ແຫ່ງ ສສ ຫວຽດນາມ ເຂົ້າຮ່ວມແລະກ່າວປາໄສ ທີ່ສະມັດຊາໃຫຍ່ ສະຫະພັນລັດຖະສາພາໂລກ ຄັ້ງທີ 130
3/4/2014 11:7' ສົ່ງ ພິມ
ຄະນະຜູ້ແທນຫວຽດນາມ ເຂົ້າຮ່ວມສະມັດຊາໃຫຍ່ ສະຫະພັນລັດຖະສະພາໂລກ ຄັ້ງທີ 130. ພາບ: vov

ສະມັດ​ຊາ​ໃຫຍ່ IPU-130 ທີ່​ນະຄອນ​ເຊີ​ແນວ ​ແຫ່ງສະຫະພາບສະ​ວິດ ​ໄດ້​ດຶງ​ດູດ​ຄວາມ​ເອົາ​ໃຈ​ໃສ່ ການ​ເຂົ້າ​ຮ່ວມຂອງ​ສະມາຊິກ​ສະພາ 1.400 ກວ່າ​ຄົນ​ທີ່​ຕາງໜ້າ​ໃຫ້ 164 ປະ​ເທດ​ສະມາຊິກຂອງ IPU. ​ໃນ​ວາລະ​ປະຊຸມ​ຄົບ​ຄະນະ​ຂອງສະມັດ​ຊາ​ໃຫຍ່ IPU-130, ທ່ານ​ປະທານ​ສະພາ​​ແຫ່ງຊາດ ຫງວຽນ​ຊິງ​ຮຸ່ງ ​ໄດ້​ມີ​ບົດ​ປະກອບ​ຄວາມ​ເຫັນ ຢັ້ງຢືນ​ແຈ້ງ​ທັດສະນະ​ຂອງ​ຫວຽດນາມ ທີ່​ຍາມ​ໃດ​ກໍ່ຕັ້ງໜ້າ ມີ​ຄວາມ​ຮັບຜິດຊອບ​ໃນ​ບັນດາ​ບັນຫາ​ສາກົນ, ພິ​ເສດ​ແມ່ນ​ບັນຫາ​ສັນຕິພາບ ປະຊາ​ທິປະ​ໄຕ; ​ເຊິ່ງ​ໄດ້ຮັບຄວາມ​ເຫັນ​ພ້ອມ ສະໜັບສະໜູນ ​ແລະ ຕີ​ລາຄາ​ສູງ​ຂອງ​ບັນດາ​ຜູ້​ແທນ. ທີ່​ກອງ​ປະຊຸມ, ຄະນະ​ຜູ້​ແທນ​ຫວຽດນາມ​ໄດ້​ສະ​ເໜີ​ຕໍ່ IPU ກ່ຽວ​ກັບ​ຫົວ​ຂໍ້​ຂອງສະມັດ​ຊາ​ໃຫຍ່ IPU ຄັ້ງທີ 132 ທີ່​ຈະ​ຈັດຂຶ້ນຢູ່​ຫວຽດນາມ ຄື: ລັດຖະສະພາ ​ແລະ ການ​ປະຕິບັດ​ໂຄງການ​ພັດທະນາ​ແບບ​ຍືນ​ຍົງ​ພາຍຫຼັງ​ປີ 2015. ຫົວ​ຂໍ້​ນີ້​ໄດ້​ຮັບ​ຄວາມ​ເຫັນ​ດີ​ເຫັນ​ພ້ອມ​ຂອງ IPU. ຢູ່​ຕາມ​ລະບຽງສະມັດ​ຊາ​ໃຫຍ່ IPU-130, ທ່ານ​ປະທານ​ສະພາ​​ແຫ່ງຊາດ ຫງວຽນ​ຊິງ​ຮຸ່ງ ​ໄດ້​ພົບ​ປະ​ກັບ​ທ່ານ​ປະທານ IPU ​ແລະ ​ເຂົ້າ​ຮ່ວມ​ພິທີ​ເຊັນ​ຂໍ້​ຕົກລົງ​ກ່ຽວ​ກັບ​ການຈັດ​ຕັ້ງ​ສະມັດຊາ​ໃຫຍ່ IPU-132 ຢູ່​ຫວຽດນາມ. ພິ​ເສດ​ແມ່ນ, ​ໃນ​ເວລາ​ດຳ​ເນີນສະມັດ​ຊາ​ໃຫຍ່ນັ້ນ ຝ່າຍ​ຫວຽດນາມ​ກໍ່ໄດ້ຈັດ​ຕັ້ງ​​ແນະນຳ​ ຍ່ານ​ເທສະ​ວັດທະ​ນະທຳ​ຫວຽດນາມ ດ້ວຍ​ບັນດາ​ລາຍການ​ສະ​ແດງ​ສິນລະປະກຳ​ແຫ່ງ​ຊາດທີ່​ມີ​ສີສັນ​ພິ​ເສດ ​ແລະ ບັນດາ​ຮ້ານ​ວາງສະ​ແດງ​ສິນຄ້າ​ຜະລິດ​ຕະພັນ​ໃນ​ປະ​ເທດ ​ເຊິ່ງ​ໄດ້ດຶງ​ດູດ​ຄວາມ​ເອົາ​ໃຈ​ໃສ່​ຢ່າງ​ແຂງ​ແຮງ ​ແລະ​ເປັນຄວາມ​ປະ​ທັບ​ໃຈຕໍ່​ຜູ້​ແທນ​ທີ່​ມາ​ຮ່ວມ.

​ພາຍ​ຫຼັງທີ່​ສຳ​ເລັດການ​ເຂົ້າ​ຮ່ວມສະມັດ​ຊາ​ໃຫຍ່ IPU-130, ທ່ານ​ປະທານ​ສະພາ​​ແຫ່ງຊາດ ຫງວຽນ​ຊິງ​ຮຸ່ງ ​ແລະ​ຄະນະ​ຜູ້​ແທນ​ຂັ້ນ​ສູງ ຂອງ​ສະພາ​ແຫ່ງ​ຊາດ​ຫວຽດນາມ​ໄດ້​ໄປ​ຢ້ຽ​ມຢາມ ສະ​ຫະພາບ​ສະວິດ ​ແລະ ປະ​ເທດ​ສາທາລະນະ​ລັດ​ອີ​ຕາ​ລີ ຢ່າງ​ເປັນ​ທາງ​ການ.

ຢູ່​ທີ່​ນະຄອນຫຼວງ​ເບີ​ນ ​ແຫ່ງ​ສະຫະພາບ​ສະ​ວິດ, ທ່ານ​ປະທານ​ສະພາ​​ແຫ່ງຊາດ ​ໄດ້​ມີ​ການ​ພົບ​ປະ​ປຶກສາ​ຫາລື​ກັບ​ທ່ານ ຣູດີ ລູສະ​ແຕນ​ແບກ ປະທານ​ສະພາ​ຕ່ຳ, ພົບ​ປະສົມ​ທະ​ນາ​ກັບ​ທ່ານ ຮານ​ແນ​ດ ​ເກີ​ມານ ປະທານ​ສະພາ​ສູງ ​ແລະ​ເຂົ້າ​ຮ່ວມ​ການ​ປະຊຸມ​ຄົບ​ຄະນະ​ຂອງ​ສະພາ​ຕ່ຳ ສະພາ​ສູງ​ແຫ່ງ​ສະຫະພາບ​ສະ​ວິດ. ຢູ່​ທີ່​ການພົບ​ປະ​ປຶກສາ​ຫາລື ​ແລະ ພົບ​ປະ​ສົນທະນາ​ດັ່ງກ່າວນັ້ນ ສອງ​ຝ່າຍ​ໄດ້​ເປັນ​ເອກະ​ພາບ​ຮ່ວມ​ມືກັນຢ່າງ​ແໜ້ນ​ແຝ້ນ ​ເພື່ອ​ປະກອບສ່ວນ​ປັບປຸງການ​ພົວພັນ​ສອງ​ຝ່າຍ, ​ເປັນ​ຕົ້ນ​ແມ່ນ ​ໃນ​ບັນດາ​ຂົງ​ເຂດ​ເສດຖະກິດ ການ​ຄ້າ ການ​ສຶກສາ.

​ໃນ​ໂອກາດ​ນີ້, ທ່ານ​ປະທານ​ສະພາ​​ແຫ່ງຊາດ ຫງວຽນ​ຊິງ​ຮຸ່ງ ​ໄດ້​ພົບ​ປະ​ກັບທ່ານ​ຜູ້ອຳນວຍການ​ໃຫຍ່ ​ແລະຢ້ຽມຢາມ​ຫ້ອງ​ວ່າການ​ສະຫະ​ປະຊາ​ຊາດຢູ່​ທີ່ ​ເຊີ​ແນວ (UNOG).

​ໃນ​ການ​ຢ້ຽມຢາມ​ປະ​ເທດ​ສາທາລະນະ​ລັດ ອີ​ຕາ​ລີ ຢ່າງ​ເປັນ​ທາງ​ການ, ທ່ານ​ປະທານ​ສະພາ​​ແຫ່ງຊາດ ຫງວຽນ​ຊິງ​ຮຸ່ງ ກໍ່​ໄດ້​ມີ​ການ​ພົບ​ປະ​ປຶກສາ​ຫາລືກັບທ່ານ ມາຣີນາ ​​ແຊ​ແຣຣີ ຮອງ​ປະທານ​ສະພາ​ຕ່ຳ​ແຫ່ງ ສາທາລະນະ​ລັດ ອີ​ຕາ​ລີ, ທ່ານ ​ກີ​ອໍ​ເຢີ ນາ​ໂປ​ລີ​ຕາ​ໂນ ປະທານາທິບໍດີ ​​ແຫ່ງ​ສາທາລະນະ​ລັດ ອີ​ຕາ​ລີ; ​ພົບ​ປະ​ສົນທະນາ​ກັບທ່ານ ປີ​ແອ​ໂຕຼ ກຣາດ​ໂຊ ປະທານ​ສະພາ​ສູງ ​ແລະພົບ​ປະ​ກັບ​ທ່ານ ວາ​​​ເລ​ເຣຍ ​ເຟ​ເດ​ລີ ຮອງ​ປະທານ​ສະພາ​ສູງ. ທ່ານ​ປະທານ​ສະພາ​​ແຫ່ງຊາດ ຫງວຽນ​ຊິງ​ຮຸ່ງ ກໍ່​ໄດ້​ໃຫ້ການ​ຕ້ອນຮັບ​ຢ່າງ​ສະໜິດສະໜົມ ສະຫາຍ ​ເຊ​ຊາ​ຣ໌ ​ໂປຣກາ​ຊີ​ນີ ​ເລຂາທິການ​ໃຫຍ່ ພັກ​ຂອງ​ຊາວ​ກອມ​ມູນິດ ອີ​ຕາ​ລີ ​ແລະ ສະຫາຍ ປາວ​ໂລ ​ເຟີເຣ​ໂຣ ​ເລຂາທິການ​ໃຫຍ່ ພັກ​ຟື້ນ​ຟູກ​ອມມູນິດ ອີ​ຕາ​ລີ.

​ໃນ​ໂອ​ກາດນີ້, ທ່ານ​ປະທານ​ສະພາ​​ແຫ່ງຊາດ ຫງວຽນ​ຊິງ​ຮຸ່ງ ​ໄດ້​ເຂົ້າ​ຮ່ວມ​ພິທີ​ສະ​ເໜີ​ຕົວ​ຂອງ​ກຸ່ມ​ສະມາຊິກ​ລັດຖະສະພາ​ມິດຕະພາບ ອີ​ຕາ​ລີ - ຫວຽດນາມ.

​ໃນ​ບັນດາ​ການ​ພົບ​ປະ​ປຶກສາ​ຫາ​ລື ການ​ພົບ​ປະ​ສົນທະນາ, ທ່ານ​ປະທານ​ສະພາ​​ແຫ່ງຊາດ ຫງວຽນ​ຊິງ​ຮຸ່ງ ​ແລະ​ບັນດາ​ການ​ນຳ ອີ​ຕາ​ລີ ລ້ວນ​ແຕ່​ໄດ້​ຕີ​ລາຄາ​ສູງ​ຕໍ່​ບາດກ້າວ​ຂະຫຍາຍຕົວ​ຢ່າງ​ດີງາມ ຂອງ​ສາຍ​ພົວພັນ​ຄູ່​ຮ່ວມ​ຍຸດ​ທະ​ສາດ ຫວຽດນາມ - ອີ​ຕາ​ລີ. ການ​ນຳ​ຂອງ​ສອງ​ຝ່າ​ຍ​ໄດ້​ເຫັນ​ດີເປັນ​ເອກະ​ພາບ ພ້ອມ​ກັນ​ຕັ້ງໜ້າ​ພະຍາຍາມ​ຍົກ​ການ​ພົວພັນ​ຫວຽດນາມ - ອີ​ຕາ​ລີ ຂຶ້ນ​ສູ່​ຍອດ​ສູງ​ໃໝ່, ຊຸກຍູ້​ການ​ຮ່ວມ​ມື​ຢ່າງ​ແໜ້ນ​ແຟ້ນ​ໃນ​ທຸກໆ​ຂົງ​ເຂດ ທີ່​ທັງ​ສອງ​ຝ່າຍ​ມີ​ຄວາມ​ສາມາດ​ບົ່ມ​ຊ້ອນ ​ເພື່ອ​ຮັບ​ໃຊ້​ຜົນ​ປະ​ໂຫຍ​ດອັນ​ແທດ​ຈິງ​ຂອງ​ປະຊາຊົນ​ແຕ່ລະ​ປະ​ເທດ. ການ​ນຳ​ສະພາ​ແຫ່ງ​ຊາດ​ສອງ​ປະ​ເທດ​ ກໍ່​ເຫັນ​ດີ​ເປັນ​ເອກະ​ພາບ​ກັນ ​ເພີ່ມ​ທະວີ​ການ​ແລກປ່ຽນ​ບົດ​ຮຽນ​ປະສົບ​ການ ກ່ຽວ​ກັບ​ການ​ນິຕິບັນ​ຍັດ ​ແລະການ​ຕິດຕາມ​ກວດກາ, ສະໜັບສະໜູນ ​​ຊ່ວຍ​ເຫຼືອ​ກັນ​ຢູ່​ທີ່​ເວທີ​ປາ​ໄສພາກ​ພື້ນ ​ແລະສາກົນ.

​ໃນ​ກອບ​ການ​ຢ້ຽມຢາມ​ຄັ້ງ​ນີ້, ທ່ານ​ປະທານ​ສະພາ​​ແຫ່ງຊາດ ຫງວຽນ​ຊິງ​ຮຸ່ງ ​ກໍ່ໄດ້​ພົບ​ປະ​ໂອ້​ລົ​ມ​ຢ່າງ​ສະໜິດສະໜົມ​ກັບ​ພີ່ນ້ອງ​ຊາວ​ຫວຽດນາມ​ຢູ່ສະ​ວິດ ​ແລະ ອີ​ຕາ​ລີ

ທ່ານ​ປະທານ​ສະພາ​​ແຫ່ງຊາດ ຫງວຽນ​ຊິງ​ຮຸ່ງ ​ໄດ້​ໄປ​ທີ່​ສັນຕະສຳນັກ​ວາ​ຕີ​ກັງ ພົບ​ປະ​ສົນທະນາ​ກັບ​ສັນ​ຕະປະ​ປາ ຟຣານຊິດ I ​ແລະ ທ່ານ​ນາຍົກລັດຖະມົນຕີ​ແຫ່ງ​ສັນຕະສຳນັກ​ວາ​ຕີ​ກັງ, ພົບ​ປະ​ກັບ​ພະ​ລາຊາ​ຄະນະ ປີແອ​ໂຕຼ ປາ​ໂຣລິນ ກ່ອນ​ທີ່​ຈະ​ເດີນທາງ​ກັບ​ເມືອ​ປະ​ເທດ, ສຳ​ເລັດ​ສິ້ນ​ສຸດ​ການ​​ໄປປະຕິ​ບັດ​ງານ​ຢູ່​ບັນດາ​ປະ​ເທດ​ເອີຣົບ ຢ່າງ​ດີງາມ./.

ສັງ​ລວມ​ໂດຍ: PV

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ