ວັນເສົາ, 21/9/2019
ທ່ານຫງວຽນເຕິນຢຸງ ນາຍົກລັດຖະມົນຕີແຫ່ງ ສສ ຫວຽດນາມ ຕອບຄຳສຳພາດຂອງສຳນັກຂ່າວຕ່າງປະເທດ ກ່ຽວກັບສະພາບການທະເລຕາເວັນອອກ
31/5/2014 11:26' ສົ່ງ ພິມ
ທ່ານນາຍົກລັດຖະມົນຕີ ຫວຽນເຕິນຢຸງ ກ່າວປາໄສທີ່ກອງປະຊຸມສື່ຂ່າວ ຢູ່ທີ່ຟີລິບປິນ (ພາບ: TTXVN)

ຕອບ​ຄຳ​ຖາມຂອງ​ນັກ​ຂ່າວ ກ່ຽວ​ກັບ​ການ​ທີ່​ຫວຽດນາມຈະ​ຍື່ນ​ຄະດີ​ຟ້ອງ​ຮ້ອງ​​ຈີນ​ ຕາມ​ກົນ​ໄກ​ຕ່າງໆ​ຂອງ​ກົດໝາຍ​ສາກົນ ຫຼື​ວ່າ​ຈະ​ແກ້​ໄຂ​ຄວາມ​ເຄັ່ງ​ຕຶງ​ຢູ່​ທະ​ເລ​ຕາ​ເວັນ​ອອກດ້ວຍ​ວິທີ​ການ​ທະຫານ?

ທ່ານນາຍົກລັດຖະມົນຕີ ຫງວຽນ​ເຕິ​ນຢຸງ ຢືນຢັນ: “ຫວຽດນາມ​ເຄີຍ​ໄດ້​ທົນ​ຕໍ່​ຄວາມ​ເຈັບ​ປວດ ​ແລະ​ຖືກເສຍ​ຫາຍຫຼາຍ​ຢ່າງ​ ຍ້ອນ​ການສົງຄາມ​ຮຸກ​ຮານຫຼາຍ​ຄັ້ງ. ​ດັ່ງ​ນັ້ນ, ພວກ​ຂ້າພະ​ເຈົ້າ​ຍາມ​ໃດ​ກໍ່ກະຫາຍຢາກ​ມີ​ສັນຕິພາບ ມິດຕະພາບ​ເພື່ອ​ສ້າງສາ ​ແລະ ພັດທະນາ​ປະ​ເທດ​ຊາດ. ພວກ​ຂ້າພະ​ເຈົ້າບໍ່​ມີ​ຍາມ​ໃດ​ທີ່​ຈະ​ໃຊ້​ມາດ​ຕະການ​ການ​ທະຫານ​ໂດຍ​ຝ່າຍ​ດຽວ, ບໍ່​ມີ​ຍາມ​ໃດ​ທີ່​ຈະລິ​ເລີ່​ມການ​ປະ​ເຊີນ​ໜ້າດ້ານ​ການ​ທະຫານ, ​ເວັ້ນແຕ່​ກໍລະນີພວກ​ຂ້າພະ​ເຈົ້າ​ຖືກ​ບັງຄັບ​ໃຫ້​ຕ້ອງ​ປ້ອງ​ກັນ​ຕົວ​ເອງ. 

ຫວຽດນາມ​ຕັ້ງ​ໝັ້ນ​ສະ​ເໝີ​ຕົ້ນ​ສະ​ເໝີ​ປາຍ​ໃນ​ການ​ນຳ​ໃຊ້​ບັນດາ​ມາດຕະ​ການ​ສັນຕິພາບ ​ແລະ ນຳ​ໃຊ້​ທຸກ​ໂອກາດ, ທຸກ​ຊ່ອງ​ສາຍ​ສົນທະນາ​ ເພື່ອ​ແກ້​ໄຂ​ສະພາບ​ການ​ປັດຈຸບັນ​ຢ່າງ​ສັນຕິພາບ. ພວກ​ຂ້າພະ​ເຈົ້າ​ສຸດ​ທີ່­ຊື່ສັດ, ຈິງ​ໃຈ, ມີ​ເຈດຕະນາ​ດີ ​ແລະ​ອົກ​ທົນ​ອົກ​ກັ້ນ, ​ແຕ່​ປັດຈຸບັນ​ ຈີນ​ນັບ​ມື້​ນັບ​ເພີ່ມ​ທະວີ​ກຳລັງ​ແຮງ ​ເພີ່ມ​ການ​ເຄື່ອນ​ໄຫວ​ນາບ​ຂູ່ ​ແລະ ລ່ວງ​ລ້ຳ, ​ແລ້ວ​ກໍ່​ໃສ່​ຮ້າຍ​ປ້າຍ​ສີ ​ແລະ​ຖິ້ມ​ໂທດ​ໃຫ້​ຫວຽດນາມ​ຢ່າງ​ລຽນຕິດ. 

ສິ່ງ​ຕ່າງໆ​ທີ່​ຈີນ​ພວມ​ເຮັດນັ້ນ ມັນ​ແຕກ​ຕ່າງ​ທີ່​ສຸດ​ກັບ​ສິ່ງ​ທີ່​ຈີນ​ເວົ້າ​. ການ​ກະທຳ​ຕ່າງໆ​ຂອງ​ຈີນ​ຢູ່​ເຂດ​ທະ​ເລ​ຫວຽດນາມ​ໃນ​ຫຼາຍ​ວັນ​ທີ່​ຜ່ານ​ມາ ​ແມ່ນ​ອັນຕະລາຍ​ທີ່​ສຸດ, ​ເປັນ​ການ​ນາບ​ຂູ່​ຢ່າງ​ໜັກໜ່ວງ​ຕໍ່​ສັນຕິພາບ ສະຖຽນ​ລະ​ພາບ ຄວາມ​ສະຫງົບ ຄວາມ​ປອດ​ໄພ ​ແລະ ​ເສລີພາບ​ໃນ​ການ​ເດີນ​ເຮືອ​ທະ​ເລ ການ​ຮ່ວມ​ມື ​ແລະ ການ​ພັດທະນາ​ ຢູ່​ພາກ​ພື້ນ​ແລະ​ໃນ​ໂລກ. 

ຂ້າພະ​ເຈົ້າ​ຢາກ​ເນັ້ນ​ໜັກ​ວ່າ, ຫວຽດນາມ​ເດັດດ່ຽວ​ປົກ​ປັກ​ຮັກສາ​ອຳນາດ​ອະທິປະ​ໄຕ ​ແລະ ຜົນ​ປະ​ໂຫຍ​ດອັນ​ຊອບ​ທຳ​ຂອງ​ຕົນ ຍ້ອນ​ວ່າ​ອຳນາດອະທິປະ​ໄຕ​​ໃນ​ດິນ​ແດນ, ອຳນາດ​ອະທິປະ​ໄຕ​ໃນ​ທະ​ເລ​ໝູ່​ເກາະ​ເປັນ​ສິ່ງ​ສັກກະ​ລະ​ບູຊາ. ພວກ​ຂ້າພະ​ເຈົ້າ​ຍາມ​ໃດ​ກໍ່​ປາຖະໜາ​ຢາກ​ມີ​ສັນຕິພາບ ມິດຕະພາບ ​ແຕ່​ຕ້ອງ​ບົນ​ພື້ນຖານ​ຮັບປະກັນ​ເອກະລາດ ຄວາມ​ເປັນ​ເຈົ້າ​ຕົນ​ເອງ ອຳນາ​ດອະທິປະ​ໄຕ ​ເຂດນ້ຳ​ທະເລ-ດິນ​ແດນ​ອັນ​ຄົບ​ຖ້ວນ, ​ແລະ​ເດັດຂາດ​ບໍ່​ຍອມຮັບ​ການ​ແລກ​ປ່ຽນ​ສິ່ງ​ສັກກະ​ລະ​ບູຊາ​ນີ້ ​​ເພື່ອ​ເອົາ​ສັນຕິພາບ ມິດຕະພາບ​ແບບ​ເລື່ອນລອຍ​ບົນ​ເມກ ທີ່​ຖືກ​ຂຶ້ນ​ກັບ​ໃດ​ໜຶ່ງ​ ເປັນອັນຂາດ.

ອາດ​ຈະ​ຄື​ກັນ​ກັບ​ທຸກໆ​ປະ​ເທດ, ຫວຽດນາມ​ພວກ​ຂ້າພະ​ເຈົ້າ​ພວມ​ຊັ່ງຊາ​ບັນດາ​ແຜນການ​ເພື່ອ​ປົກ​ປັກຮັກສາ​ຕົນ​ເອງ, ນັບ​ທັງ​ແຜນການ​ຕໍ່ສູ້​ດ້ານ​ນິຕິ​ທຳ ຕາມ​ກົດໝາຍ​ສາກົນ”.

ຕອບ​ຄຳ​ຖາມທີ່ວ່າ ​ທ່າມກາງ​ສະພາບ​ການ​ເຄັ່ງ​ຕຶງ​ທີ່​ພວມ​ທະວີຄູນ​ໃນ​ປັດຈຸບັນ​ຢູ່​ທະ​ເລ​ຕາ​ເວັນ​ອອກ, ຫວຽດນາມ​ມີ​ຂໍ້​ສະ​ເໜີ​ຫຍັງ​ແດ່​ຕໍ່​ກັບ​ວົງ​ຄະນາ​ຍາດ​ສາກົນ, ຫວຽ​ດນາມຈະ​ພິຈາລະນາ​ເຖິງ​ການ​ເຂົ້າຮ່ວມ​ໃນ​ບັນດາ​ສຳພັນ​ທະ​ພາບ​ດ້ານ​ຄວາມ​ສະຫງົບ​ຫຼື​ບໍ່?

ທ່ານນາຍົກລັດຖະມົນຕີ ຫງວຽນ​ເຕິ​ນຢຸງ ​ໃຫ້​ຮູ້​ວ່າ: “ຫວຽດນາມ​ບໍ່​ເຂົ້າ​ຮ່ວມ​ໃນ​ບໍ່​ວ່າສຳພັນທະ​ພາບ​ການ​ທະຫານ​ໃດໆ ​ເພື່ອ​ຕ້ານ​ຄືນ​ປະ​ເທດ​ອື່ນ​ໃດ. ນີ້​ແມ່ນ​ນະ​ໂຍບາຍ​ການ​ຕ່າງປະ​ເທດ​ທີ່​ສະ​ເໝີຕົ້ນ​ສະ​ເໝີ​ປາຍ​ຂອງ​ຫວຽດນາມ. ພວກ​ຂ້າພະ​ເຈົ້າ​ໄດ້​ປະກາດ​ເປີດ​ເຜີຍ​ເລື່ອງ​ນີ້​ຕໍ່​ໂລກ​ຫຼາຍ​ຄັ້ງ​ທີ່​ສຸດ​ແລ້ວ.

ກ່ຽວ​ກັບ​ການ​ທີ່​ຈີນ​ຕິດ​ຕັ້ງ​ຮ້ານ​ຂຸດ​ເຈາະ​ນ້ຳມັນ ​ໄຮ່​ຢາງ-981 ຢ່າງຜິດ​ກົດໝາຍ, ລ່ວງ​ລ້ຳ​ຢ່າງ​ຮ້າຍ​ແຮງ​ຕໍ່​ເຂດ​ເສດຖະກິດ​ຈຳ​ເພາະ ​ແລະ​ໄຫຼ່​ທະວີບ​ຂອງ​ຫວຽດນາມ​ຢູ່​ທະ​ເລ​ຕາ​ເວັນ​ອອກນັ້ນ, ພວກ​ຂ້າພະ​ເຈົ້າ​ໄດ້​ແຈ້ງ​ການ ​ແລະ​ສື່​ຂ່າວຢ່າງຊື່ສັດ ຕໍ່​ບັນດາ​ອົງການ​ສາກົນ, ລັດຖະບານ​ບັນດາ​ປະ​ເທດ, ວົງ​ການ​ນັກການ​ເມືອງແລະນັກ​ຄົ້ນຄວ້າ, ສື່​ມວນ​ຊົນ​ສາກົນ ​ແລ້ວ. 

​ໃນ​ຊຸມ​ວັນ​ທີ່​ຜ່ານ​ມາ, ​ເລຂາທິການ​ໃຫຍ່​ສະ​ພະ​ປະຊາ​ຊາດ, ການ​ນຳ​ຫຼາຍ​ປະ​ເທດ​ໃນ​ໂລກ, ບຸກຄົນ​ຜູ້​ສຳຄັນ​ຫຼາຍ​ຄົນ ​ແລະ ຫຼາຍ​ອົງການ​ຈັດ​ຕັ້ງ​ສາກົນ ​ໄດ້​ອອກປາກ​ອອກສຽງ​ສະ​ແດງ​ຄວາມ​ເປັນ​ຫ່ວງ​ເປັນ​ໄຍຢ່າງ​ເລິກ​ເຊິ່ງ ກ່ຽວ​ກັບ​ການ​ນາບ​ຂູ່​ຂອງ​ເຫດການ​ນີ້ ຕໍ່​ກັບ​ສັນຕິພາບ ສະຖຽນ​ລະ​ພາບ ຄວາມ​ສະຫງົບ​ໃນພາກ​ພື້ນ. ​ຂ້າພະ​ເຈົ້າ​ເຊື່ອ​ໝັ້ນ​ວ່າ ວົງ​ຄະນາ​ຍາດ​ສາກົນ​ຈະ​ສືບ​ຕໍ່​ມີ​ການ​ຕີ​ລາຄາ​ຢ່າງ​ຖືກຕ້ອງ ​ແລະ ມີ​ສຽງ​ປາກ​ສຽງ​ເວົ້າ​ອັນ​​ເໝາະສົມ ​ເພື່ອສະກັດ​ກັ້ນ​ການ​ນາບ​ຂູ່​ອັນ​ຮ້າຍແຮງ​ນີ້ ຕໍ່​ສັນຕິພາບ ສະຖຽນ​ລະ​ພາບ​ຢູ່​ທະ​ເລ​ຕາ​ເວັນ​ອອກ. ຫວຽດນາມ​ຮຽກຮ້ອງ​ວົງ​ຄະນາ​ຍາດ​ສາກົນ, ບັນດາ​ປະ​ເທດ, ບັນດາ​ບຸກຄົນ​ແລະ​ອົງການ​ສາກົນ ຈົ່ງ​ສືບ​ຕໍ່​ອອກປາກ​ອອກສຽງ​ຄັດຄ້ານ​ຢ່າງ​ແຂງ​ແຮງ ຕໍ່​ການ​ກະທຳ​ລະ​ເມີດ​ກົດໝາຍ​ສາກົນ​ຂອງ​ຈີນ”.

 ຕອບ​ຄຳ​ຖາມ​ກ່ຽວ​ກັບການ​ພົວພັນ​ລະຫວ່າງ​ຫວຽດນາມ ​ແລະ ຈີນ ​ໃນ​ສະພາບ​ການ​ທີ່​ຈີນ​ສືບ​ຕໍ່ຕິດ​ຕັ້ງ​ຮ້ານ​ຂຸດ​ເຈາະ​ນ້ຳມັນ ​ໄຮ່​ຢາງ-981 ​ເລິກ​ເຂົ້າ​ໄປ​ໃນ​ເຂດ​ທະ​ເລ​ຂອງ​ຫວຽດນາມ?

ທ່ານນາຍົກລັດຖະມົນຕີ ຫງວຽນ​ເຕິ​ນຢຸງ ​ເນັ້ນ​ໜັກ​ວ່າ: “ຂ້າພະ​ເຈົ້າ​ພຽງ​ແຕ່​ຢາກ​ເວົ້າ​ວ່າ, ຫວຽດນາມ​ຍາມ​ໃດ​ກໍ່​ມີ​ຄວາມຮັບ​ຮູ້ອັນ​ເລິກ​ເຊິ່ງ ກ່ຽວ​ກັບ​ສາຍ​ພົວພັນມິດຕະພາບ ການ​ຮ່ວມ​ມື​ສະ​ເໝີ​ພາບ ຕ່າງ​ຝ່າຍ​ຕ່າງ​ມີ​ຜົນ​ປະ​ໂຫຍ​ດລະຫວ່າງ​ຫວຽດນາມ ​ແລະ​ຈີນ ຍ້ອນ​ວ່າ​ສິ່ງ​ນີ້​ບໍ່​ພຽງ​ແຕ່​ນຳ​ເອົາ​ຜົນ​ປະ​​ໂຫຍດອັນ​ພື້ນຖານ ​ແລະ​ຍາວ​ນານ ​ມາ​ໃຫ້​ສອງ​ປະ​ເທດຫວຽດນາມ - ຈີນ​ເທົ່າ​ນັ້ນ ຫາກ​ຍັງປະກອບສ່ວນ​ໃຫ້​ສັນຕິພາບ ສະຖຽນ​ລະ​ພາບ ການ​ຮ່ວມ​ມື ​ແລະ​ການ​ພັດທະນາຢູ່​ໃນ​ພາກ​ພື້ນ ​ແລະ​ໃນ​ໂລກ​ອີກ​ນຳ. ຖ້າ​ຫາກ​ກົງ​ຂ້າມ, ພວກ​ເພື່ອນ​ຄົງ​ຈະ​ຮູ້​​ໄດ້​ວ່າສິ່ງ​ໃດ​ຈະ​ເກີດ​ຂຶ້ນ. 

ຂ້າພະ​ເຈົ້າ​ຢາກ​ເນັ້ນ​ອີກ​ເທື່ອ​ວ່າ, ຫວຽດນາມ​ໃຫ້​ຄວາມ​ສຳຄັນ​ເປັນ​ພິ​ເສດ ​ແລະ​ຍາມ​ໃດ​ກໍ​ເຮັດ​ຈົນ​ສຸດ​ຄວາມ​ສາມາດ​ຂອງ​ຕົນ ​ເພື່ອ​ປະກອບສ່ວນ​ເຂົ້າ​ໃນ​ການ​ຮັກສາ ​ແລະ​ເພີ່ມ​ທະວີ​ການ​ພົວພັນ​ຮ່ວມ​ມືມິດຕະພາບ​ອັນ​ດີງາມ​ກັບ​ຈີນ. ຫວຽດນາມ​ຍາມ​ໃດ​ກໍ​ປາຖະໜາ​ຢ່າງ​ຈິງ​ໃຈ ​ຢາກ​ພ້ອມ​ກັນ​ກັບ​ຈີນ​ແກ້​ໄຂຄວາມ​ພິພາດ​ຕ່າງໆ​ ດ້ວຍ​ສັນຕິ​ວິທີ ບົນ​ພື້ນຖານ​ກົດໝາຍ​ສາກົນ ສະ​ເໝີ​ພາບ ​ແລະ​ເຄົາລົບ​ຊຶ່ງ​ກັນ​ແລະ​ກັນ. 

ຕໍ່ກັບ​ການ​ທີ່​ຈີນ​ຕິດ​ຕັ້ງ​ຮ້ານ​ຂຸດ​ເຈາະ​ນ້ຳມັນ ​ໄຮ່​ຢາງ-981 ຢ່າງ​ຜິດ​ກົດໝາຍ ຢູ່​ໃນ​ເຂດ​ທະ​ເລ​ຂອງ​ຫວຽດນາມ, ຫວຽດນາມ​ຄັດ​ຄ້ານ​ຢ່າງ​ສຸດ​ຂີດຕໍ່​ການ​ກະທຳ​ລ່ວງ​ລ້ຳ​ນີ້ ​ແລະ​ເດັດດ່ຽວ​ປົກ​ປັກ​ຮັກສາ​ອຳນາ​ອະທິປະ​ໄຕ​ແຫ່ງ​ຊາດ ​ແລະ​ຜົນ​ປະ​ໂຫຍ​ດອັນ​ຊອບ​ທຳ​ຂອງ​ຕົນ ທີ່​ສອດຄ່ອງ​ກັບ​ກົດໝາຍ​ສາກົນ”./

ຕາມ​ຂ່າວ: Chinhphu.vn

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ