ວັນອາທິດ, 18/8/2019
ກໍ່ສ້າງອາຊີ - ປາຊີຟິກໃຫ້ເປັນພາກພື້ນ ແຫ່ງສັນຕິພາບ ສະຖຽນລະພາບ ການຮ່ວມມື ແລະ ຈະເລີນວັດທະນາຖາວອນ
1/6/2014 10:39' ສົ່ງ ພິມ
ທ່ານນາຍົກລັດຖະມົນຕີ ຫງວຽນເຕິນຢຸງ ກ່າວປາໄສທີ່ກອງປະຊຸມ (ແຫຼ່ງ: VPG)

ຮຽນທ່ານ​ເບ​ນິກ​ໂນ ຊີ​ເມ​ອອນ ອາ​ກີ​ໂນ, ປະທານາທິບໍດີ​ຟີ​ລິບ​ປິນ,

ຮຽນທ່ານ​ສາດສະດາຈານ ຄຼາອັສ ສະ​ເຄວົບ, ປະທານ​ເວທີ​ປາ​ໄສ​ເສດຖະກິດ​ໂລກ,

ຮຽນ​ບັນດາ​ທ່ານ​ການ​ນຳ ​ແລະ​ທ່ານ​ຜູ້​ແທນ​ທີ່​ນັບຖື, 

ຂ້າພະ​ເຈົ້າ​ຮູ້ສຶກ​ດີ​ອົກ​ດີ​ໃຈ​ທີ່​ສຸດ​ທີ່​ໄດ້​ເຂົ້າຮ່ວມເວທີ​ປາ​ໄສ​ເສດຖະກິດ​ໂລກ ກ່ຽວ​ກັບ​ອາຊີ​ຕາ​ເວັນ​ອອກ ຄັ້ງ​ທີ 23 ຢູ່​ມາ​ນີລາ. ​ເຫດການ​ນີ້​ສະ​ແດງ​ໃຫ້​ເຫັນ​ເຖິງ​ຄວາມ​ເອົາ​ໃຈ​ໃສ່​ຂອງ​ວົງ​ການທຸລະ​ກິດ​ສາກົນ ຕໍ່​ຄວາມ​ພະຍາຍາມ​ປະຕິ​ຮູບ ​ແລະ ຄວາມ​ເຕີບ​ໂຕ​ໄວ​ຂອງ​ຟີ​ລິບ​ປິນ ​ໃນ​ຊຸມ​ປີ​ມໍ່ໆ​ມາ​ນີ້. ຕາງໜ້າ​ລັດຖະບານ ​ແລະ​ປະຊາຊົນ​ຫວຽດນາມ ຂ້າ​ພະ​ເຈົ້າ​ຂໍ​ສະ​ແດງ​ຄວາມ​ຂ່ຳນັບ​ອວຍພອນ​ຢ່າງ​ສຸດ​ໃຈ​ຕໍ່​ຟີ​ລິບ​ປິນ. ​ໃນ​ໂອກາດ​ນີ້, ຂ້າພະ​ເຈົ້າ​ຕີ​ລາຄາ​ສູງ​ການ​ປະກອບສ່ວນ​ອັນ​ຕັ້ງໜ້າ​ຂອງ WEF ​ແລະທ່ານ​ສາດສະດາຈານ ຄຼາອັສ ສະ​ເຄວົບ ​ເຂົ້າ​ໃນ​ການ​ຊຸກຍູ້​ການ​ພັດທະນາ​ຢ່າງ​ຂະຫຍັນ​ຂັນ​ເຄື່ອນ​ຂອງ​ພາກ​ພື້ນ.

ກອງ​ປະຊຸມ​ຄັ້ງ​ນີ້​ໄດ້​ດຳ​ເນີນ​ໄປ​ໃນ​ສະພາບ​ການ​ທີ່​ອາຊີ-ປາຊີ​ຟິກພວມ​ເປັນ​ພາກ​ພື້ນ​ທີ່ມີ​ການ​ເຕີບ​ໂຕໄວ ​ແລະຂະຫຍັນ​ຂັນ​ເຄື່ອນ​ໃນ​ໂລກ. ​ແຕ່​ພວກ​ເຮົາ​ກໍ່​ຮູ້​ເຫັນ​ປະກົດ​ການ​ແຫ່ງ​ການ​ຫລຸດຜ່ອນ​ຄວາມ​ໄວ​ໃນ​ການ​ເຕີບ​ໂຕ​ຂອງ​ບາງ​ປະ​ເທດ​ໃນ​ພາກ​ພື້ນ. ໜຶ່ງ​ໃນ​ບັນດາ​ສາ​ເຫດ​ຄື ກຳລັງ​ຂັບ​ເຄື່ອນ​ຂອງ​ຕົວ​ແບ​ບ​ເຕີບ​ໂຕ​ປັດຈຸບັນ​ບໍ່​ແຮງ​ເທົ່າ​ທີ່​ຕ້ອງການ. ​ເພາະສະ​ນັ້ນ, ພວກ​ເຮົາ​ຄວນ​ສ້າງ​ກຳລັງ​ຂັບ​ເຄື່ອນ​ໃໝ່​ຕື່ມ​ອີກ ​ເພື່ອ​ຊຸກ​ດັນ​ທ່ວງທ່າ​ເຕີບ​ໂຕ​ໄວ ​ແລະໝັ້ນ​ທ່ຽງ​ຄືນ​ໃໝ່. ຕາມ​ຂ້າພະ​ເຈົ້າ, ນັ້ນ​ແມ່ນ​ການ​ເຊື່ອມ​ໂຍງ​ເຂົ້າ​ກັບ​ສາກົນ ​ແລະ​ໂລກາ​ພິວັດ​ຕ້ອງ​ກວ້າງຂວາງເລິດ​ເຊິ່ງກວ່າ​ອີກ. ພ້ອມ​ກັນ​ນັ້ນ ກໍ່​ຄວນປ່ຽນ​ແປງ​ໃໝ່ລະບຽບ​ກົດໝາຍ​ເສດຖະກິດ​ຕະຫຼາດ ດ້ວຍ​ຄຸນ​ນະພາ​ບ ​ແລະ​ຄວາມ​ຮຽກຮ້ອງ​ຕ້ອງການ​ສູງ​ກວ່າ ຄຽງ​ຄູ່​ກັບ​ການ​ປະຕິບັດ​ຄວາມ​ກ້າວໜ້າ ​ແລະ​ຍຸດຕິ​ທຳ​ສັງຄົມ, ປົກ​ປັກ​ຮັກສາ​ສິ່ງ​ແວດ​ລ້ອມ​ໃຫ້​ດີກ​ວ່າອີກ, ປະຕິບັດ​ເປົ້າ​ໝາຍ​ການ​ພັດທະນາ​ສະຫັດ​ສະ​ວັດ​ໃຫ້​ໄດ້​ໄວ​ກວ່າ ​ແລະ​ໝັ້ນ​ທ່ຽງ​ກວ່າ.

ປັດຈຸບັນ, ບັນດາ​ປະ​ເທດ​ໃນ​ພາກ​ພື້ນ​ພວມ​ຍາດ​ແຍ່ງ​ເອົາ​ທ່າ​ອຽງ​ຮ່ວມ​ມື ​ເຊື່ອມ​​ໂຍ​ງ​ເສ​ດຖະກິດທີ່​ຟົດ​ຟື້ນ ຢູ່​ໃນ​ຫຼາຍ​ລະດັບ ​ເພື່ອ​ຫັນປ່ຽນ​ເປັນ​ກຳ​ລັງ​ຂັບ​ເຄື່ອນ​ໃໝ່​ໃຫ້​ແກ່​ການ​ພັດທະນາ​ຢ່າງ​ໝັ້ນ​ທ່ຽງ. ສ່ວນ​ຕົນ​ເອງ, ຫວຽດນາມ​ພວນ​ເປັນ​ປະ​ເທດ​ໜຶ່ງທີ່​​ການ​ເມືອງ - ສັງ​ຄົນມີ​ຄວາມ​ສະຖຽນ​ລະ​ພາບ​ໝັ້ນຄົງ, ​ເສດຖະກິດ​ມະຫາ​ພາກ​ໝັ້ນ​ທ່ຽງ ​ແລະ​ເຕີບ​ໂຕ​ໄວ, ການ​ຄ້າ​ຂາ​ອອກ ​ແລະ​ການ​ລົງທຶນ​ຈາກ​ຕ່າງປະ​ເທດ​ເພີ່ມ​ຂຶ້ນ​ຢ່າງ​ແຂງ​ແຮງ. ຫວຽດນາມ​ຕັ້ງໜ້າ​ປະກອບສ່ວນ​ກໍ່ສ້າງ​ປະຊາ​ຄົມ​ອາ​ຊຽນ​ໃຫ້​ສຳ​ເລັດ​ໃນ​ປີ 2015. ພວກ​ຂ້າພະ​ເຈົ້າ​ພວມ​ຍູ້​ແຮງ​ການ​ເຈລະຈາ ສັນຍາ​ຄູ່​ຮ່ວມ​ເສດຖະກິດ​ຂ້າມ​ປາຊີ​ຟິກ (TPP), ສັນຍາ​ຄູ່​ຮ່ວມ​ເສດຖະກິດ​ຮອບດ້ານ​ພາກ​ພື້ນ (RCEP) ​ແລະ​ບັນດາ​ສັນຍາ​ການ​ຄ້າ​ເສລີ​ກັບ​ອີ​ຢູ, ສ.​ເກົາຫຼີ, ສະຫະພັນ​ພາສີສຸນ​ລະກາ​ກອນ​ (ລັດ​ເຊຍ - ​ເບ​ລາຣຸດ - ຄາ​ຢັກ​ສະຖານ)... ຂ້າພະ​ເຈົ້າ​ເຊື່ອ​ໝັ້ນ​ວ່າ ນີ້​ແມ່ນ​ບັນດາ​ໂອກາດ​ທີ່​ດີ​ທີ່​ສຸດ ​ເພື່ອ​ໃຫ້​ບັນດາ​ວິ​ສາ​ຫະກິດ​ຕ່າງປະ​ເທດ ​ເປີດ​ກວ້າງ​ການ​ເຄື່ອ​ນໄຫວທຸລະ​ກິດ ​ລົງທຶນກັບ​ຫວຽດນາມ ກໍ່​ຄື​ກັບ​ບັນດາ​ປະ​ເທດ​ໃນ​ພາກ​ພື້ນ​ອາຊີ - ປາຊີ​ຟິກ.

ກຳລັງຂັບ​ເຄື່ອນການ​ເຕີບ​ໂຕ​ກໍ່​ໄດ້​ສ້າງ​ຂຶ້ນ​ມາ​ຈາກ​ການ​ປະຕິ​ຮູບ​ໂຄງປະກອບ ​ແລະລະບຽບ​ກົດໝາຍ​ເສດຖະກິດ. ​ເກືອບ​ທັງ​ໝົດທຸກ​ປະ​ເທດ ລ້ວນ​ແຕ່​ພວມ​ບຸລິມະສິດ​ຍົກ​ສູງ​ກຳລັງຄວາມ​ສາມາດຄຸ້ມ​ຄອງ, ພັດທະນາພື້ນຖານ​ໂຄງ​ລ່າງ, ການ​ສຶກສາ​ກໍ່ສ້າງ, ສາທາລະນະ​ສຸກ, ວິທະຍາສາດ​ເຕັກ​ໂຂ​ໂລ​ຊີ ​ແລະ​ການ​ກະສິກຳ... ​ເວທີ​ປາ​ໄສ WEF ອາຊີ​ຕາ​ເວັນ​ອອກ​ປີ​ນີ້ ຕັ້ງ​ຈຸດ​ໜັກ​ໃຈກາງ​ເຂົ້າ​ໃສ່ “ຊຸກຍູ້​ການ​ເຕີບ​ໂຕ​ເພື່ອ​ຄວາມ​ກ້າວໜ້າ​ສະ​ໝ່ຳສະ​ເໝີ” ​ເປັນ​ການ​ຄັດ​ເລືອ​ທີ່​ສອດ​ຄ່ອງ. ບົດຮຽນ​ປະສົບ​ການ​ຂອງ​ຫວຽດນາມ​ໃຫ້​ເຫັນ​ວ່າ ການ​ປະຕິ​ຮູບ​ໃນ​ປະ​ເທດ​ໄປ​ຄຽງ​ຄູ່​ກັບ​ການ​ເຊື່ອມ​ໂຍງ​ເຂົ້າ​ກັບ​ສາກົນ ​ເປັນ​ແບບ​ວິທີ​ທີ່​ມີ​ປະສິດທິ​ຜົນ ​ເພື່ອ​ສ້າງ​ເປັນ​ແຫຼ່ງພະລັງ​ຊຸກ​ດັນ​ທີ່​ແຂງ​ແຮງ ​ໃຫ້​ແກ່​ການ​ພັດທະນາ​ຢ່າງ​ໄວ ​ແລະ​ຍືນ​ຍົງ. ປັດຈຸບັນ, ພວກ​ຂ້າພະ​ເຈົ້າ​ກຳລັງ​ສືບ​ຕໍ່​ປັບປຸງ​ບູລະນະ ​ລະບຽບ​ກົດໝາຍ​ເສ​ດຖະກິດ​ຕະຫຼາດ ​ແລະ​ຫັນປ່ຽນ​ຕົວ​ແບບ​ເຕີບ​ໂຕ ​ເພື່ອ​ແນ​ໃສ່​ກໍ່ສ້າງພື້ນຖານ​ເສດຖະກິດ​ທີ່​ມີ​ກຳລັງ​ແກ່ງ​ແຍ້​ງສູງ ຕິດ​ແໜ້ນ​ກັບ​ຄວາມ​ສະ​ເໝີ​ພາບ​ແລະ​ຄວາມ​ກ້າວໜ້າ​ສັງຄົມ, ​ໃກ້ຊິດ​ຕິດ​ພັນ​ກັບ​ສິ່ງ​ແວດ​ລ້ອມ.

ຮຽນ​ທ່ານ​ຜູ້​ມີ​ກຽດທັງຫຼາຍ,

ບໍ່​ອາດ​ຈະ​ມີ​ການ​ພັດທະນາ ຖ້າ​ຫາກ​ບໍ່​ມີ​ສັນຕິພາບ ​ແລະ​ສະຖຽນ​ລະ​ພາບ. ຫວຽດນາມ​ຍາມ​ໃດ​ກໍ່ຕັ້ງໜ້າ​ປະກອບສ່ວນ​ເຂົ້າ​ໃນ​ສັນຕິພາບ ສະຖຽນ​ລະ​ພາບ ​ແລະ ດີ​ໃຈ​ຕໍ່​ອະນາຄົດ​ແຫ່ງ​ການ​ຮ່ວມ​ມື​ພັດທະນາ​ຂອງ​ພາກ​ພື້ນ​ອາຊີ - ປາຊີ​ຟິກ. ​ແຕ່, ​​ເມື່ອເບິ່ງ​ຄືນ​ຮູບ​ພາບ​ທັງ​ໝົດຂອງ​ພາກ​ພື້ນ​ໃນ​ເວລາ​ມໍ່ໆ​ມາ​ນີ້, ຂ້າພະ​ເຈົ້າ​​ເຫັນ​ດີແບ່ງປັນ​ໂດຍ​ສົມບູນ ກັບ​ຄວາມ​ເປັນ​ຫ່ວງ​ເປັນ​ໄຍ ຂອງທ່ານ​ສາດສະດາຈານ ຄຼາອັສ ສະ​ເຄວົບ ທີ່​ສະ​ແດງ​ອອກ​ໃນ​ບົດ​ປາ​ໄສ​ໃນ​ມື້​ນີ້ ​ແລະຢູ່​​ໃນເວທີ​ປາ​ໄສ WEF ດາ​ວົສ ຕົ້ນ​ປີ 2014 ​ນັ້ນ​ຄືໄພ​ອັນຕະລາຍ​ແຫ່ງ​ຄວາມ​ວຸ່ນວາຍ​ທີ່​ພວມ​ທະວີຄູນ. ​ໃນ​ພາກ​ຕົວ​ຈິງ, ການ​ຊ່ວງ​ຊິງ​ກັນ​ດ້ານ​ອຳນາດ​ອະທິປະ​ໄຕຕໍ່​​ເຂດ​ນ້ຳດິນ​ແດນ​ ຢູ່​ທະ​ເລ​ຕາ​ເວັນ​ອອກ ​ແລະທະ​ເລ​ຈີນ​ຕາ​ເວັນ​ອອກ ພວມ​ສະ​ແດງ​ອອກ​ນັບ​ມື້​ນັບ​ສັບສົນ, ນາບ​ຂູ່​ຢ່າງ​ໜັກໜ່ວງ​ຕໍ່​ສັນຕິພາບ ສະຖຽນ​ລະ​ພາບ ​ແລະ ຄວາ​ງສະຫງົບ​ຢູ່​ໃນ​ພາກ​ພື້ນ. 

ປັດຈຸບັນ, ກວ່າ 3/4 ຂອງ​ຈຳນວນ​ສິນຄ້າ​ການ​ຄ້າທົ່ວ​ໂລກໄດ້​ຂົນ​ສົ່ງ​ດ້ວຍ​ທາງ​ທະ​ເລ ​ແລະ​ 2/3 ໃນຈຳນວນ​ນັ້ນ​ແມ່ນ​ຜ່ານ​ທະ​ເລ​ຕາ​ເວັນ​ອອກ. ຄວາມ​ວຸ່ນວາຍ ຫຼື​ການ​ປະ​ທະກັນ​ທີ່​ເກີດ​ຂຶ້ນ​ຢູ່​ທະ​ເລ​ແຫ່ງ​ນີ້ ຈະ​ເປັນ​ການ​ຕັດ​ຕອນ​ການ​ຈໍລະ​ຈອນ​ຈຳນວນສິນຄ້າອັນ​ໃຫຍ່​ຫຼວງ​ນີ້ ​ແລະ​ເສດຖະກິດ​ຂອງ​ຫຼາຍ​ປະ​ເທດ​ໃນ​ພາກ​ພື້ນ ​ແລະ​ໃນ​ໂລກ​ ລ້ວນ​ແຕ່​ຕ້ອງ​ແບກ​ຫາບ​ຜົນ​ເສຍ​ຫາຍ​ທີ່​ບໍ່​ອາດ​ຈະ​ພັນ​ລະນາ​ໄດ້, ຊ້ຳ​ບໍ່​ນຳ ອາດ​ຈະ​ເຮັດ​ໃຫ້​ວິວັດທະນາ​ການ​ແຫ່ງ​ການ​ຟື້ນ​ຟູ​ເສດຖະກິດ​​ໂລ​ກຕ້ອງຕ່າວ​ປິ້ນ. 

ຂ້າພະ​ເຈົ້າ​ຂໍ​ສະ​ເນີໃຫ້​ເອົາ​ໃຈ​ໃສ່ ກ່ຽວ​ກັບ​ສະພາບ​ການ​ເຄັ່ງຮ້ອນ​ເປັນ​ພິ​​ເສດທີ່​ພວມ​ເກີດ​ຂຶ້ນ​ຢູ່​ທະ​ເລ​ຕາ​ເວັນ​ອອກ. ​ແຕ່​ວັນ​ທີ 1 ພຶດສະພາ 2014 ມາ​ເຖິງ​ມື້​ນີ້, ຈີນ​ໄດ້​ນຳ​ໃຊ້​ກຳ​ປັ່ນ​ທະ​ເລກ​ວ່າ 130 ລຳ, ມີ​ທັງ​ກຳ​ປັ່ນ​ທະຫານ ​ແລະ​ເຮືອບິນ​ປ້ອງ​ກັນ ​ເພື່ອ​ຕິດ​ຕັ້ງ​ຮ້ານ​ຂຸດ​ເຈາະ​ນ້ຳມັນ​ໃນ​ທີ່​ຕັ້ງ​ເລິກ​ເຂົ້າ​ໄປ​ໃນ​ເຂດ​ເສດຖະກິດ​ຈຳ​ເພາະ​ຂອງ​ຫວຽດນາມ​ກວ່າ 80 ​ໄມ​ທະ​ເລ ຕາມສົນທິສັນຍາ​ສະຫະ​ປະຊາ​ຊາດ​ກ່ຽວ​ກັບ​ກົດໝາຍ​ທະ​ເລ ປີ 1982.  ​ນີ້​ແມ່ນ​ການລະ​ເມີດທີ່​ຮ້າຍ​ແຮງ​ເປັນ​ພິ​ເສດ​ ຕໍ່ຖະແຫຼງການກ່ຽວກັບວິທີການປະພຶດຂອງບັນດາຝ່າຍຢູ່​ທະ​ເລ​ຕາ​ເວັນ​ອອກ (DOC) ຊຶ່ງ​ຈີນ​ເປັນ​ຝ່າຍ​ໜຶ່ງ​ທີ່​ໄດ້​ລົງ​ນາມ. ການ​ກະທຳ​ນີ້​ຂອງ​ຈີນ ​ໄດ້​ແລະ​ພວມ​ນາບ​ຂູ່​ໂດຍກົງ​ຕໍ່​ສັນຕິພາບ ສະຖຽນ​ລະ​ພາບ ຄວາມ​ສະຫງົບ ຄວາມ​ປອດ​ໄພ ​ເສລີພາບ​ໃນ​ການ​ເດີນ​ເຮືອ ​ແລະ​ການບິນ ​ຢູ່​ທະ​ເລ​ຕາ​ເວັນ​ອອກ. 

ຫວຽດນາມ​ຍາມ​ໃດ​ກໍ່​ມຸ່ງ​ຫວັງ​ໃນສັນຕິພາບ​ມິດຕະພາບ, ຍາມ​ໃດ​ກໍ່​ອົດທົນ​ອົດ​ກັ້ນ​ທີ່​ສຸດ, ສະ​ແດງ​ເຈດ​ຕະນາ​ດີ​ຢ່າງ​ຈິງ​ໃຈ ​ແລະ​ນຳ​ໃຊ້​ທຸກ​ຊ່ອງ​ສາຍ​ສົນທະນາ ​ເພື່ອ​ຄັດຄ້ານ ​ແລະ​ຮຽກຮ້ອງ​ໃຫ້​ຈີນ​ຖອນ​ຮ້ານ​ຂຸດ​ເຈາະ​ນ້ຳມັນ ​ແລະ​ບັນດາ​ກຳ​ປັ່ນ​ປ້ອງ​ກັນຮັກສາ ອອກ​ຈາກ​ເຂດ​ທະ​ເລ​ຂອງ​ຫວຽດນາມ, ​ເຄົາລົບ​ອຳນາດ​ອະທິປະ​ໄຕ​ໃນ​ທະ​ເລ​ໝູ່​ເກາ​ະຂອງ​ຫວຽດນາມ, ປະຕິບັດ​ຕາມ​ກົດໝາຍ​ສາກົນ, ສົນທິສັນຍາ​ສະຫະ​ປະຊາ​ຊາດ​ກ່ຽວ​ກັບ​ກົດໝາຍ​ທະ​ເລ ປີ 1982. ​ແຕ່​ມາ​ເຖິງ​ດຽວ​ນີ້ ຈີນ​ບໍ່​ພຽງ​ແຕ່​ບໍ່​ຕອບ​ສະໜອງ​ຄວາມ​ຮຽກຮ້ອງ​ອັນ​ຊອບ​ທຳ​ຂອງ​ຫວຽດນາມ​ເທົ່າ​ນັ້ນ ຫາກ​ຍັງ​ໃສ່​ຮ້າຍ​ປ້າຍ​ສີ ຖິ້ມ​ໂທດ​ໃຫ້​ຫວຽດນາມ ​ແລະ​ສືບ​ຕໍ່​ນຳ​ໃຊ້​ກຳລັງ​ແຮງ, ​ເພີ່ມ​ທະວີ​ການ​ກະທຳ​ນາບ​ຂູ່ ລ່ວງ​ລ້ຳ​ທີ່​ນັບ​ມື້​ນັບ​ຮ້າຍ​ແຮງ​ກວ່າ​ເກົ່າ. ພວກ​ຂ້າພະ​ເຈົ້າ​ຕັ້ງ​ໝັ້ນ ​ແລະ​ເດັດດ່ຽວປົກປັກ​ຮັກສາ​ອຳນາດ​ອະທິປະ​ໄຕ​ຂອງຕົນ​ດ້ວຍ​ສັນຕິ​ວິທີ, ສອດຄ່ອງ​ກັບ​ກົດໝາຍ​ສາກົນ.

ປະຊາຊົນ​ຫວຽດນາມ​ທັງ​ຊາດ​ຄັດຄ້ານ​ການ​ກຳ​ທຳ​ຜິດພາດ​ນີ້​ຂອງ​ຈີນ. ຢູ່​ຫຼາຍ​ແຫ່ງ, ປະຊາຊົນ​ເດີນ​ຂະ​ບວນຄັດຄ້ານ​ແບບ​ເກີດ​ເອງ, ​ໃນ​ນັ້ນ​ຈຳນວນ​ໜຶ່ງ​ໄດ້​ມີ​ການ​ກະທຳລະ​ເມີດ​ກົດ​ລະບຽບ, ລັດຖະບາ​ນຫວຽດນາມ​ໄດ້​ກີດ​ກັ້ນ​ຢ່າງ​ທັນ​ການ ​ແລະ​ແກ້​ໄຂ​ຢ່າງ​ເຂັ້​ມງວດ ຖືກຕ້ອງ​ຕາມ​ກົດໝາຍ. ສະພາບ​ການ​ໄດ້​ເຂົ້າ​ສູ່​ຄວາມ​ເປັນ​ປົກກະ​ຕິ​ຢ່າງ​ສົມບູນ. ບັນດາ​ວິ​ສາ​ຫະກິດ​ໄດ້​ຮັບ​ການ​ຊ່ວຍ​ເຫຼື​ອຊ່ວຍ​ໜູນ​ຢ່າງ​ເໝາະ​ສົມ ​ແລະ​ເກືອບ​ທັງ​ໝົດ​ໄດ້​ກັບ​ຄືນ​ສູ່​ການ​ເຄື່ອນ​ໄຫວ​ຜະລິດ​ທຸລະ​ກິດ​ເປັນ​ປົກກະຕິ.

ຮຽນ​ທ່ານຜູ້​ມີ​ກຽດ​ທັງຫຼາຍ,

ພວກ​ຂ້າພະ​ເຈົ້າ​ຂໍ​ສະ​ແດງ​ຄວາມ​ຂອບ​ອົກ​ຂອບ​ໃຈ​ອັນ​ສູງ​ສົ່ງ​ມາ​ຍັງ​ອາ​ຊຽນ, ບັນດາ​ປະ​ເທດ ​ແລະ​ເພື່ອນ​ມິດ​ໃນ​ໂລກ ທີ່​ໄດ້​ແບ່ງປັນ ​ແລະ​ສະໜັບສະໜູນ​ຫວຽດນາມ ​ໃນ​ການ​ປົກ​ປັກ​ຮັກສາ​ອຳນາດ​ອະທິປະ​ໄຕ​ແຫ່ງ​ຊາດ ​ແລະ​ຜົນ​ປະ​ໂຫຍ​ດອັນ​ຊອບ​ທຳ​ຂອງ​ຕົນ ສອດຄ່ອງ​ກັບ​ກົ​ດໝາຍ​ສາກົນ. ພວກ​ຂ້າພະ​ເຈົ້າ​ຫວັງ​ວ່າ​ຈະ​ສືບ​ຕໍ່​ໄດ້​ຮັບ​ການ​ສະໜັບສະໜູນ​ຊ່ວຍ​ເຫຼືອ​ອັນ​ປະ​ເສີດ​ນີ້. ຄວາມ​ສາມັກຄີ​ຮ່ວມ​ມື​ຂອງ​ວົງ​ຄະນາ​ຍາດ​ສາກົນ ​​ເປັນ​ສິ່ງ​ຈຳ​ເປັນ​ຕ້ອງການ​ທີ່​ສຸດ ​ເພື່ອ​ກີດ​ກັ້ນ​ບັນດາ​ການ​ກະທຳ​ລະ​ເມີດ​ກົດໝາຍ​ສາກົນ. 

ຫວັງ​ວ່າ​ທ່ານ​ຜູ້​ມີ​ກຽດ​ທັງຫຼາຍ ​ແລະ​ເວທີ​ປາ​ໄສ​ເສດຖະກິດ​ໂລກສືບຕໍ່ປະກອບສ່ວນ​ຢ່າງ​ຕັ້ງໜ້າ ​ເຂົ້າ​ໃນ​ການ​ກໍ່ສ້າງ​ອາຊີ - ປາຊີ​ຟິກ​ໃຫ້​ເປັນ​ພາກ​ພື້ນ​ແຫ່ງສັນຕິພາບ ສະຖຽນ​ລະ​ພາບ ການ​ຮ່ວມ​ມື ​ແລະຈະເລີນວັດທະນາຖາວອນ.

ຕາງໜ້າລັດຖະບານຫວຽດນາມ, ຂ້ພະເຈົ້າຂໍອວຍພອນໃຫ້ທ່ານທັງຫຼາຍຈົ່ງມີສຸຂະພາບເຂັ້ມແຂງ ມີຄວາມສຸກ ແລະຄວາມຈະເລີນທຸກປະການ. ອວຍພອນໃຫ້ກອງປະຊຸມສຳເລັດຜົນຢ່າງຈົບງາມ. 

ຂໍຂອບໃຈ./.

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ