ວັນອາທິດ, 18/8/2019
ຮຽກຮ້ອງໃຫ້ຈີນສືບຕໍ່ເຈລະຈາ ແກ້ໄຂສະພາບການທະເລຕາເວັນອອກ
23/6/2014 15:23' ສົ່ງ ພິມ
ທ່ານເລຂາທິການໃຫຍ່ ຫງວຽນຝູຈ້ອງ ຕ້ອນຮັບທ່ານຢາງ ເຄັ້ຍຈີ ສະມາຊິກສະພາລັດຖະມົນຕີຈີນ (ພາບ: TTXVN)

ຕອນ​ແລງ​ວັນ​ທີ 18, ຢູ່​ທີ່​ສຳນັກງານ​ສູນ​ກາ​ງພັກ​ກອມ​ມູນິດ​ຫວຽດນາມ, ທ່ານ​ເລຂາ​ທິການ​ໃຫຍ່ ຫງວຽນ​ຝູຈ້ອງ ​ໄດ້​ຕ້ອນຮັບ ​ແລະ​ຊົນ​ເຊີຍທ່ານຢາງ ​ເຄັ້ຍຈີ ທີ່​ໄດ້ມາ​ຢ້ຽມຢາມ​ຫວຽດນາມ.

ທ່ານ​ເລຂາ​ທິການ​ໃຫຍ່ຢັ້ງຢືນ​ນະ​ໂຍບາຍ​ສະ​ເໝີ​ຕົ້ນ​ສະ​ເໝີ​ປາຍ​ຂອງ​ພັກ ລັດ ​ແລະ​ປະຊາຊົນ​ຫວຽດນາມ ທີ່​ຍາມ​ໃດ​ກໍ່​ໃຫ້​ຄວາມ​ສຳຄັນ ​ແກ່ການພົວພັນ​ມິດຕະພາບ ການ​ຮ່ວມ​ມື​ກັບ​ຈີນ; ມີ​ຄວາມ​ປາຖະໜາ​ດີຢາກ​ປົກ​ປັກ​ຮັກສາ, ປັບປຸງສາຍ​ພົວພັນຫວຽດນາມ - ຈີນ ​ແລະ​ຍາມ​ໃດ​ກໍ່​ພະຍາຍາມ​ເຮັດ​ໃຫ້ ການ​ພົວພັນ​ລະຫວ່າງ​ສອງ​ປະ​ເທດຂະຫຍາຍຕົວ​ຢ່າງ​ສົດ​ໃສ ໝັ້ນ​ທ່ຽງ ​ເພື່ອ​ຜົນ​ປະ​ໂຫຍ​ດອັນ​ພື້ນຖານ ​ແລະຍາວ​ນານ​ ຂອງ​ປະຊາຊົນ​ສອງ​ປະ​ເທດ; ຕີ​ລາຄາ​ສູງ​ບັນດາ​ບາດກ້າວ​ຂະຫຍາຍຕົວ​ຢ່າງ​ຕັ້ງໜ້າ ຂອງ​ການ​ພົວພັນຫວຽດນາມ - ຈີນ ​ໃນ​ຊຸມ​ປີ​ມໍ່ໆ​ມາ​ນີ້.

ທ່ານ​ເລຂາ​ທິການ​ໃຫຍ່​ເນັ້ນ​​ເຖິງ​ລັກສະນະຄັບຂັນ ​ແລະການ​ກະທົບ​ຫຍໍ້​ທໍ້​ທີ່​ສຸດ​ ຂອງ​ການ​ທີ່​ຈີນ​ຕິດ​ຕັ້ງ​ຮ້ານ​ຂຸດ​ເຈາະ​ນ້ຳມັນ ​ໄຮ່​ຢາງ - 981 (Haiyang Shiyou - 981) ຢູ່​ໃນ​ເຂດ​ທະ​ເລ​ຂອງ​ຫວຽດນາມ ​ແຕ່​ຕົ້ນ​ເດືອນ​ພຶດສະພາ​ມາ​ຮອດ​ດຽວ​ນີ້ ຕໍ່​ກັບ​ສະພາບ​ການພົວພັນຫວຽດນາມ - ຈີນ ​ແລະ​ສະພາບ​ການ​ພາກ​ພື້ນ.

ທ່ານເລຂາ​ທິການ​ໃຫຍ່ຢັ້ງຢືນ​ຫຼັກ​ໝັ້ນ​ກ່ຽວ​ກັບ​ອຳນາດ​ອະທິປະ​ໄຕ​ຂອງ​ຫວຽດນາມ ຕໍ່​ກັບ​ບັນດາ​ໝູ່​ເກາະ​ຫ່ວາງ​ຊາ (Paracel Islands), ​ເຈື່ອງ​ຊາ (Spratly Islands) ​ແລະ​ທະ​ເລ​ຕາ​ເວັນ​ອອກ ​ແມ່ນ​ບໍ່​​ປ່ຽນ​ແປງ ​ແລະ​ບໍ່​ອາດ​ປ່ຽນ​ແປງ​ໄດ້; ສະ​ເໜີ​ໃຫ້​ຮີບ​ປຶກສາ​ຫາລື​ເພື່ອ​ມີ​ວິທີ​ແກ້​ໄຂ​ ໃຫ້​ສະພາບ​ການ​ເປັນ​ປົກກະຕິ​ຄືນ​ໃໝ່​ໂດຍ​ໄວ, ສ້າງປະຖົມ​ປັດ​​ໄຈ​ໃຫ້​ແກ່​ບັນດາ​ວິທີ​​ແກ້ອັນ​ພື້ນຖານ ​ແລະ​ຍາວ​ນານ ​ເພື່ອ​ແກ້​ໄຂ​ບັນດາ​ບັນຫາ​ເທິງ​ທະ​ເລ, ​ເລີ່​ມຈາກ​ຜົນ​ປະ​ໂຫຍ​ດມະຫາ​ພາກລວມ​ຂອງ​ສອງ​ປະ​ເທດ, ບົນ​ພື້ນຖານ​ຂໍ້​ຕົກລົງ​ຕ່າງໆ​ ລະຫວ່າງ​ການ​ນຳ​ຂັ້ນ​ສູງ​ສອງ​ປະ​ເທດ ​ແລະ ກົດ​ໝາຍສາກົນ, ​ເປັນ​ຕົ້ນ​ແມ່ນ​ສົນທິສັນຍາ​ສະຫະ​ປະຊາ​ຊາດ​ກ່ຽວ​ກັບ​ກົດໝາຍ​ທະ​ເລປີ 1982.

ທ່ານຢາງ ​ເຄັ້ຍຈີ ສະມາຊິກ​ສະພາ​ລັດຖະມົນຕີ​ຈີນ ​ໄດ້​ສົ່ງຄຳ​ຢ້ຽມຢາມ​ຖາມ​ຫາ ​ຂອງທ່ານ​​ເລຂາ​ທິການ​ໃຫຍ່ ປະທານ​ປະ​ເທດ​ຈີນ ສີ ຈິ້ນ​ຜິ​ງ ມາ​ຍັງທ່ານ​​ເລຂາ​ທິການ​ໃຫຍ່ ຫງວຽນ​ຝູຈ້ອງ ​ແລະ​ບັນດາ​ການ​ນຳ​ອື່ນ​ຂອງ​ພັກ ​ແລະ​ລັດ​ຫວຽດນາມ; ຢັ້ງຢືນ​ວ່າ ພັກ ລັດຖະບານ​ຈີນ ​​ໃຫ້​ຄວາມ​ສຳ​ຄັນ​ທີ່​ສຸດ​ແກ່​ການ​ພົວພັນ​ກັບ​ຫວຽດນາມ ​ແລະ​ ຍາມ​ໃດ​ກໍ່​ຢາກຂະຫຍາຍສາຍ​ພົວພັນ​ອັນ​ດີງາມ ​ເປັນ​ປົກກະຕິ​ຍາວ​ນານ​ກັບ​ຫວຽດນາມ; ມຸ່ງ​ຫວັງ​ໃຫ້​ສອງ​ຝ່າຍ​ສືບ​ຕໍ່​ປຶກສາຫາລື​ເພື່ອ​ຫລຸດຜ່ອນ​ຄວາມ​​ເຄັ່ງຕຶງ, ​ແກ້​ໄຂ​ບັນຫາ​ເທິງ​ທະ​ເລ ​ເປັນ​ຕົ້ນ​ແມ່ນ​ຕ້ອງ​ສືບຕໍ່ໜ່ວງ​ໜ່ຽວການ​ເຄື່ອນ​ໄຫວ​ສັງ​ສັນ ຮ່ວມ​ມື​ໃນ​ບັນດາຂົງ​ເຂດ ລະຫວ່າງ​ສອງ​ປະ​ເທດ, ພ້ອມ​ກັນ​ຕັ້ງໜ້າ​ພະຍາຍາມ​ຮັກສາ​ສະພາບ​ການ​ພົວພັນຫວຽດນາມ - ຈີນ ​ໃຫ້​ຂະຫຍາຍຕົວ​ຢ່າງສົດ​ໃສ ໝັ້ນ​ທ່ຽງ.

ທ່ານ​ນາ​ຍົກ​ລັດຖະມົນ​ຕີ ຫງວຽນ​ເຕິ​ນຢຸງ ຕ້ອນຮັບ
ທ່ານຢາງ ​ເຄັ້ຍ​ຈີ ສະມາຊິກ​ສະພາ​ລັດຖະມົນຕີ​ຈີນ (ພາບ: TTXVN)

* ​ໃນ​ວັນ​ດຽວ​ກັບ, ທ່ານ​ນາ​ຍົກ​ລັດຖະມົນ​ຕີ ຫງວຽນ​ເຕິ​ນຢຸງ ​ໄດ້​ຕ້ອນຮັບທ່ານຢາງ ເຄັ້ຍຈີ ສະມາຊິກ​ສະພາ​ລັດຖະມົນຕີ​ຈີນ.

​ໃນ​ການ​ຕ້ອນຮັບ, ທ່ານ​ນາ​ຍົກ​ລັດຖະມົນ​ຕີ ຫງວຽນ​ເຕິ​ນຢຸງ ຢັ້ງຢືນ​ບົນ​ພື້ນຖານ​ແນວທາງການ​ຕ່າງປະ​ເທດ​ສະ​ເໝີ​ຕົ້ນ​ສະ​ເໝີ​ປາຍຂອງ​ພັກ ລັດ ລັດຖະບານ ​ແລະ​ປະຊາຊົນ​ຫວຽດນາມ ທີ່​ຍາມ​ໃດ​ກໍ່​ຈາ​ລຶກ ຮູ້​ບຸນຄຸນ​ຕໍ່​ການ​ສະໜັບສະໜູນ ຊ່ວຍ​ເຫຼືອ​ອັນ​ໃຫຍ່​ຫຼວງ​ຂອງ​ຈີນ, ຍາມ​ໃດ​ກໍ່​​ໃຫ້​ຄວາມ​ສຳຄັນ​ແກ່​ການ​ຮັກສາ ​ເພີ່ມ​ທະວີ ​ແລະ ຂະຫຍາຍ​ສາຍ​ພົວພັນຮ່ວມ​ມື​ຮອບດ້ານ ສະ​ເໝີ​ພາບ ຕ່າງ​ຝ່າ​ຍຕ່າງ​ມີ​ຜົນ​ປະ​ໂຫຍ​ດລະຫວ່າງຫວຽດນາມ - ຈີນ. ພິ​ເສດ​ແມ່ນ, ​ໃນ​ການ​ຢ້ຽມຢາມ​ຫວຽດນາມ​ຂອງ​ທ່ານ​ນາຍົກລັດຖະມົນຕີຈີນ ຫຼີ ​ເຄີ້ສຽງ ທ້າ​ຍປີ 2013, ສອງ​ຝ່າຍ​ໄດ້​ບັນລຸ​ເຖິງ​ຂໍ້​ຕົກລົງ​ອັນ​ລະອຽດ​ຕ່າງໆ​ ຫຼາຍຂໍ້ ​ແນ​ໃສ່​ຊຸກຍູ້​ການ​ພົວພັນ​ລະຫວ່າງ​ສອງ​ປະ​ເທດ ​ແລະ​ໄດ້​ເປັນ​ເອກະ​ພາບ​ກັນ​ສ້າງ​ຕັ້ງ 3 ໜ່ວຍ​ປະຕິບັດ​ງານ​ກ່ຽວ​ກັບ​ການ​ຮ່ວມ​ມື​ດ້ານ​ໂຄງ​ສ້າງ​ພື້ນຖານ ການ​ເງິນ​ເງິນຕາ ​ແລະ​ປຶກສາ​ຫາລື​ການ​ຮ່ວມ​ມື​ເພື່ອ​ພ້ອມ​ກັນ​ພັດທະນາ​ເທິງ​ທະ​ເລ ​ໃນ​ກອບ​ຂອງ​ຄະນະເຈລະຈາ​ຂັ້ນ​ລັດຖະບານ ກ່ຽວ​ກັບຊາຍ​ແດນ​​ແຜ່ນດິນລະ​ຫວ່າງຫວຽດນາມ - ຈີນ. ພ້ອມ​ກັນ​ນັ້ນ, ການ​ນຳ​ຂັ້ນ​ສູ​ງສອງ​ປະ​ເທດ​ກໍ່​ໄດ້​ເປັນ​ເອກະ​ພາບ​ກັນ​ວ່າ ​ໃນ​ຂະ​ບວນວິວັດ​ການ​ຊອກ​ຫາ​ວິທີ​ແກ້​ ອັນ​ພື້ນຖານ​ຍາວ​ນານ ​​ໃຫ້​ແກ່​ບັນຫາພິພາດ​ເທິງ​ທະ​ເລ​ນັ້ນ ສອງ​ຝ່າຍຕ້ອງ​ພ້ອມ​ກັນ​ກວດກາ​ຄວບ​ຄຸມ​ສະພາບ​ການ, ບໍ່​ມີ​ການ​ກະທຳ​ເປີດ​ກວ້າງ​ການ​ພິພາດ, ຖ້າ​ຫາກ​ມີ​ບັນຫາ​ເກີດ​ຂຶ້ນ ກໍ່​ພ້ອມ​ກັນ​ແກ້​ໄຂ​ຢ່າງ​ທັນ​ການ ​ເໝາະ​ສົມ, ບໍ່​ປະ​ໃຫ້​ມັນ​ສົ່ງ​ຜົນ​ກະທົບ​ຫຍໍ້​ທໍ້​ເຖິງ​ການ​ຮ່ວມ​ມື​ພັດທະນາ​ລະຫວ່າງ​ສອງ​ປະ​ເທດ.

ການ​ທີ່​ຈີນ​ຕິດ​ຕັ້ງ​ຮ້ານ​ຂຸດ​ເຈາະ​ນ້ຳມັນ-​ແກ້​ສ ​ໄຮ່​ຢາງ 981 ​ເຂົ້າ​ເລິກ​ໃນ​ເຂດ​ທະ​ເລ​ຂອງ​ຫວຽດນາມ, ທ່ານນາ​ຍົກ​ລັດຖະມົນ​ຕີ ຫງວຽນ​ເຕິ​ນຢຸງ ​ເນັ້ນ​​ເຖິງ​ຫຼັກ​ໝັ້ນ​ສະ​ເໝີ​ຕົ້ນ​ສະ​ເໝີ​ປາຍ​ຂອງ​ຫວຽດນາມ ທີ່​ໄດ້​ສະ​ເໜີຢູ່ໃນການ​ພົບ​ປະ​ຂັ້ນ​ຕ່າງໆ ຂອງ​ສອງຝ່າຍ​ໃນ​ເວລາ​ທີ່​ຜ່ານ​ມາ. ພ້ອມ​ກັນ​ນັ້ນ, ທ່ານ​ນາ​ຍົກ​ລັດຖະມົນ​ຕີ ຫງວຽນ​ເຕິ​ນຢຸງ ກໍ່​ສະ​ເໜີ​ໃຫ້​ສອງ​ຝ່າຍ​ຕ້ອງ​ຄວບ​ຄຸມ​ສະພາບ​ການ, ບໍ່​ໃຫ້​ເກີດ​ມີ​ການ​ປະ​ທະ​ກັນ, ສືບ​ຕໍ່​ຮັກສາ​ການ​ພົບ​ປະ ການ​ເຈລະຈາ​ເພື່ອ​ແກ້​ໄຂ​ການ​ພິພາດ ຄວາມ​ຂັດຂ້ອງ​ກັນ​ໃນ​ປັດຈຸບັນ. ຫວຽດນາມ​ເດັດດ່ຽວ​ຕໍ່ສູ້​ປົກ​ປັກ​ຮັກສາອຳນາດ​ອະທິປະ​ໄຕ​ຂອງ​ຕົນ​ດ້ວຍ​ບັນດາ​ມາດ​ຕະການ​ສັນຕິພາບ ສອດຄ່ອງ​ກັບ​ກົດໝາຍ​ສາກົນ.

ກ່ຽວ​ກັບ​ຄວາມ​ເຫັນ​ຂອງທ່ານຢາງ ​ເຄັ້ຍ​ຈີ ສະມາຊິກ​ສະພາ​ລັດຖະມົນຕີ​ຈີນ ທີ່ກ່ຽວ​ພັນ​ເຖິງ​ສະພາບ​ຄວາມ​ສະຫງົບ​ປອດ​ໄພ​ຂອງ​ບັນດາ​ວິ​ສາ​ຫະກິດ ​ແລະ​ພົນລະ​ເມືອງ​ຈີນ​ຢູ່​ຫວຽດນາມ, ທ່ານ​ນາ​ຍົກ​ລັດຖະມົນ​ຕີ ຫງວຽນ​ເຕິ​ນຢຸງ ຍົກ​ໃຫ້​ເຫັນ​ແຈ້ງວ່າ: ຫວ່າງ​ແລ້ວ​ນີ້ ຢູ່​ບາງ​ທ້ອງ​ຖິ່ນ​ຂອງ​ຫວຽດນາມ, ​ໂດຍ​ສວຍ​ໃຊ້ການ​ເດີນ​ຂະ​ບວນຄັດຄ້ານ​ຈີນ​ຕິດ​ຕັ້ງ​ຮ້ານ​ຂຸດ​ເຈາະນ້ຳມັນ​ຢ່າງ​ຜິດ​ກົດໝາຍ​ ໃນ​ເຂດ​ທະ​ເລ​ຂອງ​ຫວຽດນາມ, ຜູ້​ຄົນ​ຈຳນວນ​ໜຶ່ງ​ໄດ້​ມີ​ການ​ກະທຳລະ​ເມີດ​ກົດໝາຍ, ກໍ່​ຄວາມ​​ເສຍຫາຍ​ໃຫ້​ແກ່​ໂຮງງານ​ວິ​ສາ​ຫະກິດ​ຕ່າງປະ​ເທດ​ຈຳນວນ​ໜຶ່ງ, ​ໃນ​ນັ້ນ​ມີ​ວິ​ສາ​ຫະກິດ​ຂອງ​ຈີນ. ຢືນຢັນ​ວ່າ ນີ້​ແມ່ນ​ເຫດການ​ໜ້າ​ເສຍດາຍ ທີ່ບໍ່ຄຶດ​ວ່າ​ມັນ​ຈະ​ເກີດ​ຂຶ້ນ, ລັດຖະບານ​ຫວຽດນາມ​ໄດ້​ສະກັດ​ກັ້ນ​ຢ່າງ​ເດັດຂາດ, ​ເຮັດ​ໃຫ້​ສະພາບ​ການ​ເຂົ້າ​ເປັນ​ປົກກະຕິ​ໂດຍ​ໄວ, ກຳ​ຈັດ​ຢ່າງ​ເຄັ່ງ​ຄັດ​ຕໍ່​ພວກຜູ້ລະ​ເມີດ​ກົດໝາຍ ​ແລະ​ມີ​ມາດ​ຕະການ​ຕ່າງໆ​ເພື່ອຊ່ວຍ​ໜູນ ຊ່ວຍ​ເຫຼືອ​ຢ່າງ​ທັນ​ການ. ​ໝົດ​ທຸກ​ໂຮງງານ​ວິ​ສາ​ຫະກິດ​ໄດ້​ກັບ​ຄືນ​ສູ່​ການ​ຜະລິດ​ທຸລະ​ກິດ​ຕາມ​ທຳ​ມະ​ດາ.

​ເລິ່ມຈາກ​ຜົນ​ປະໂຫຍ​ດລວມຂອງ​ສອງ​ປະ​ເທດ, ທ່ານ​ນາ​ຍົກ​ລັດຖະມົນ​ຕີ ຫງວຽນ​ເຕິ​ນຢຸງ ສະ​ເໜີ​ໃຫ້​ສອງ​ຝ່າຍ​ສືບ​ຕໍ່​ໜ່ວງ​ໜ່ຽວ​ຮັກສາ​ ບັນດາ​ກົນ​ໄກ​ຮ່ວມ​ມືທີ່​ມີ​ຢູ່​ໃນ​ຂົງ​ເຂດ​ຕ່າງໆ. ຈັດ​ຕັ້ງ​ໂດຍ​ໄວ​ການ​ປະຊຸມ​ຄັ້ງ​ທີ 7 ຄະນະ​ກຳມາທິການ​ຊີ້​ນຳ​ການ​ຮ່ວມ​ມື​ສອງ​ຝ່າຍ ​ເພື່ອ​ປຶກສາ​ຫາລື​ແລກປ່ຽນ​ມາດ​ຕະການ​ອັນ​ລະອຽດ ​ແນ​ໃສ່​ຊຸກຍູ້​ການ​ຮ່ວມ​ມື​ລະຫວ່າງ​ສອງປະ​ເທດ, ​ເປັນ​ຕົ້ນ​ແມ່ນ​ໃນ​ບັນດາ​ຂົງ​ເຂດ​ເສດຖະກິດ ການ​ຄ້າ ການ​ລົງທຶນ ການທ່ອງທ່ຽວ...

​ໃນ​ການ​ຕ້ອນຮັບ, ທ່ານຢາງ ​ເຄັ້ຍຈີ ສະມາຊິກ​ສະພາ​ລັດຖະມົນຕີ​ຈີນໄດ້​ແຈ້ງ​ໃຫ້​ທ່ານ​ນາ​ຍົກ​ລັດຖະມົນຕີ​ຫງວຽນ​ເຕິ​ນຢຸງ ຊາບກ່ຽວ​ກັບ​ຜົນສຳ​ເລັດ​ຂອງ​ການ​ພົບ​ປະ​ປຶກສາ​ຫາລື​ກັບທ່ານ​ຮອງ​ນາຍົກລັດຖະມົນຕີ ລັດຖະມົນຕີ​ວ່າການ​ກະຊວງ​ການ​ຕ່າງປະ​ເທດ ຟ້າ​ມບິ່ງ​ມິ​ງ. ຢັ້ງຢືນວ່າ ພັກ ລັດຖະບານ ​ແລະ​ປະຊາຊົນ​ຈີນ ຖື​ເປັນ​ສຳຄັນ ​ແລະ​ບໍ່​ມີ​ເວລາ​ໃດປ່ຽນ​ແປງ​ຫຼັກນຳ​ມິດຕະພາບ​ໃນ​ການ​ພົວພັນ​ກັບ​ຫວຽດນາມ. ກ່ຽວ​ກັບ​ບັນຫາ​ພິພາດ​ເທິງ​ທະ​ເລ, ທ່ານຢາງ ​ເຄັ້ຍ​ຈີ ຍົກ​ໃຫ້​ເຫັນ​ຄືນ​ໃໝ່​ເຖິງ​ຫຼັກ​ໝັ້ນ​ຂອງ​ຈີນ, ພ້ອມ​ກັນ​ນັ້ນ​ກໍ່​ສະ​ແດງ​ຄວາມ​ເຫັນ​ດີ​ເປັນ​ເອກະ​ພາບ​ໃຫ້​ສອງ​ຝ່າຍ​ສືບ​ຕໍ່​ບັນດາ​ຊ່ອງສາຍພົບ​ປະ ​ປຶກສາ​ຫາລືສອງ​ຝ່າຍ ​ເພື່ອ​ແກ້​ໄຂ​ສະພາບ​ການ​ເຄັ່ງ​ຕືງ​ໃນ​ປັດຈຸບັນ ​ແລະ​ພ້ອມ​ກັນ​ຊຸກຍູ້​ບັນດາ​ຂົງ​ເຂດ​ຮ່ວມ​ມື​ທີ່​ມີ​ຢູ່​ໃນ​ປັດຈຸບັນ​ລະຫວ່າງ​ສອງ​ປະ​ເທດ.


ທ່ານ​ຮອງ​ນາຍົກລັດຖະມົນຕີ ລັດຖະມົນຕີ​ວ່າການ​ກະຊວງ​ການ​ຕ່າງປະ​ເທດ ຟ້າ​ມບິ່ງ​ມິ​ງ
ຕ້ອນຮັບ
ທ່ານຢາງ ​ເຄັ້ຍຈີ ສະມາຊິກ​ສະພາ​ລັດຖະມົນຕີ​ຈີນ (ພາບ: TTXVN)
     * ​ໃນ​​ການ​ພົບ​ປະລະ​ຫວ່າງ​ສອງ​ທ່ານ​ປະທານຄະນະ​ກຳມາທິການ​ຊີ້​ນຳ​ການ​ຮ່ວມ​ມື​ສອງ​ຝ່າຍ ຫວຽດນາມ - ຈີນ, ທ່ານ​ຮອງ​ນາຍົກລັດຖະມົນຕີ ຟ້າ​ມບິ່ງ​ມິ​ງ ຢັ້ງຢືນວ່າ ​ໃນ​ຊຸມ​ປີ​ທີ່​ຜ່ານ​ມາ, ດ້ວຍ​ຄວາມ​ມານະ​ພະຍາຍາມ​ຂອງ​ສອງ​ຝ່າຍ, ການ​ພົວພັນ​ຄູ່​ຮ່ວມ​​ຍຸດ​ທະ​ສາດ​ຮອບດ້ານ​ລະຫວ່າງຫວຽດນາມ - ຈີນ ​ໄດ້​ມີ​ບາດກ້າວ​ຂະຫຍາຍຕົວ​ຢ່າງ​ກວ້າງຂວາງ​ເລິກ​ເຊິ່ງ. ​ແຕ່​ວ່າ, ​ໃນ​ສະພາບ​ການທີ່​ການ​ພົວພັນ​ສອງ​ປະ​ເທດ​ພວມ​ຂະຫຍາຍຕົວ​ຢ່າງ​ດີ​ງານ​ນັ້ນ, ການ​ທີ່​ຈີນ​ຕິດ​ຕັ້ງ​ຮ້ານ​ຂຸດ​ເຈາະ​ນ້ຳມັນ ​ໄຮ່​ຢາງ - 981 (Haiyang Shiyou - 981) ​ເຂົ້າ​ເລິກ​ໃນ​ເຂດ​ເສດຖະກິດ​ຈຳ​ເພາະ ​ແລະ​ໄຫຼ່​ທະວີບ​ຂອງຫວຽດນາມ ​ເປັນ​ການລະ​ເມີດກົດ​ໝາຍສາກົນ ​ສົນທິສັນຍາ​ສະຫະ​ປະຊາ​ຊາດ​ກ່ຽວ​ກັບ​ກົດໝາຍ​ທະ​ເລປີ 1982, ນາບ​ຂູ່​ຄວາມ​ສະຫງົບ ຄວາມ​ປອດ​ໄພ​ໃນ​ການ​ເດີນ​ເຮືອ​ທະ​ເລ ​ແລະ​ສັນຕິພາບ ສະຖຽນ​ລະ​ພາບ​ຂອງ​ພາກ​ພື້ນ, ​ເປັນ​ຜົນ​ເສຍ​ຫາຍ​​​​ໃຫ້​ແກ່​ມະ​ໂນ​ຄະຕິ​ຂອງ​ປະຊາຊົນ​ຫວຽດນາມ ​ແລະ​ກະທົບ​ຫຍໍ້​ທໍ້​ເຖິງ​ການ​ພົວພັນ​ຮ່ວມ​ມື​ລະຫວ່າງ​ສອງ​ປະ​ເທດ. 

ທ່ານ​ຮອງ​ນາຍົກລັດຖະມົນຕີ ຟ້າ​ມບິ່ງ​ມິ​ງ ຮຽກຮ້ອງ​ໃຫ້​ຈີນ​ຖອນ​ຮ້ານ​ຂຸດ​ເຈາະ​ນ້ຳມັນ ​ແລະ ກ່ຳປັ່ນອອກ​ຈາກ​ເຂດ​ທະ​ເລ​ຂອງຫວຽດນາມ, ຄວບ​ຄຸມ​ສະພາບ​ການ​ບໍ່​ໃຫ້​ເກີດ​ການ​ປະ​ທະ​ກັນ, ​ເຈລະ​ຈາ​ແກ້​ໄຂ​ສະພາບ​ການ​ເຄັ່ງ​ຕຶງ​ປັດຈຸ​ບັນ ກໍ່​ຄື​ແກ້​ໄຂ​ຄວາມ​ຜິດຂ້ອງຕ້ອງຖຽງ​ອື່ນ​ລະຫວ່າງ​ສອງ​ປະ​ເທດ ບົນ​ພື້ນຖານກົດ​ໝານ​ສາກົນ, ​​ສົນທິສັນຍາ​ສະຫະ​ປະຊາ​ຊາດ​ກ່ຽວ​ກັບ​ກົດໝາຍ​ທະ​ເລປີ 1982. 

ທ່ານຢາງ ​ເຄັ້ຍ​ຈີ ສະມາຊິກ​ສະພາ​ລັດຖະມົນຕີ​ຈີນ ​ເຫັນດີ​ເປັນ​ເອກະ​ພາບ​ວ່າ ​ສອງ​ຝ່າຍ​ຕ້ອງ​ຮີບ​ເຮັດ​ໃຫ້​ສະພາບ​ການ​ເທິງ​ທະ​ເລ ​ເປັນ​ປົກກະຕິ​ໂດຍ​ໄວ, ອົດທົນ​ອົດ​ກັ້ນ​ບໍ່​ໃຫ້​ເກີດ​ມີ​ການ​ປະ​ທະ​ກັນ, ບໍ່​ປະ​ໃຫ້​ການ​ພົວພັນ​ສອງ​ປະ​ເທດ​ປ່ຽນ​ແປງ​ໄປ​ໃນ​ທາງ​ບໍ່​ດີ, ພ້ອມ​ກັນ​ຕັ້ງໜ້າ​ພະຍາຍາມ​ຊຸກຍູ້​ການ​ຮ່ວມ​ມື​ດ້ານ​ຕ່າງໆ ​ລະຫວ່າງ​ສອງ​ປະ​ເທດ ​ໃຫ້​ມີ​ບາດກ້າວ​ຂະຫຍາຍຕົວ​ຢ່າງ​ກວ້າງຂວາງ​ເລິກ​ເຊິ່ງ ​ແລະ ມີ​ເນື້ອ​ແທ້​ກວ່າ​ອີກ.

ສອງ​ຝ່າຍ​ຢັ້ງຢືນ​ສືບ​ຕໍ່​ໜ່ວງ​ໜ່ຽວ​ຮັກສາ​ບັນດາ​ກົນ​ໄກ​ແລກປ່ຽນ ຮ່ວມ​ມື​ລະຫວ່າງ​ບັນດາ​ກະຊວງ ຂະ​ແໜງ​ການ ທ້ອງ​ຖິ່ນ​ຂອງ​ສອງປະ​ເທດ, ຜັນ​ຂະຫຍາຍ​ຢ່າງ​ມີ​ປະສິດທິ​ຜົນ ​ໂຄ​ງການດຳ​ເນີນ​ງານ​ຜັນ​ຂະຫຍາຍການ​ພົວພັນ​ຄູ່​ຮ່ວມ​​ຍຸດ​ທະ​ສາດ​ຮອບດ້ານຫວຽດນາມ - ຈີນ ​ແລະ​ຈັດ​ຕັ້ງ​ກອງ​ປະ​ຊຸມ​ຄັ້ງ​ທີ 7 ຄະນະ​ກຳມາທິການ​ຊີ້​ນຳ​ການ​ຮ່ວມ​ມື​ສອງ​ຝ່າຍ./.

ສັງ​ລວມ​ໂດຍ ນຂ


Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ