ວັນອັງຄານ, 22/10/2019
ອະທິປະໄຕໃນອານາເຂດ ເປັນທີ່ສັກກະລະບູຊາ ແລະ ບໍ່ສາມາດລ່ວງລ້ຳໄດ້
28/6/2014 14:8' ສົ່ງ ພິມ
ທ່ານປະທານປະເທດ ເຈືອງເຕິນຊາງ

ນັກ​ຂ່າວ: ຮຽນ​ທ່ານ​ປະ​ທານ​ປະ​ເທດ, ຂໍໃຫ້​ທ່ານຊີ້​ແຈງ​ກ່ຽວ​ກັບ​ສະພາບ​ການ​ພົວພັນ ຫວຽດນາມ - ຈີນ​ປັດຈຸບັນ ​ໃນ​ເມື່ອທີ່ຈີນ​ຕິດ​ຕັ້ງ​ຮ້ານ​ຂຸດ​ເຈາະ​ນ້ຳມັນ ​ໄຮ່​ຢາງ-981 ​ເຂົ້າ​ເລິກ​ໃນ​ເຂດ​ເສດຖະກິດ​ຈຳ​ເພາະ ​ແລະ​ໄຫຼ່​ທະວີບ​ຂອງຫວຽດນາມ ? 

ທ່ານ​ປະທານ​ປະ​ເທດ ​ເຈືອງ​ເຕິ​ນຊາງ: ວັນ​ທີ 2 ພຶດສະພາ 2014, ຈີນ​​ໄດ້ຕິດ​ຕັ້ງ​ຮ້ານ​ຂຸດ​ເຈາະ​ນ້ຳມັນ ​ໄຮ່​ຢາງ-981 ຢ່າງ​ຜິດ​ກົດໝາຍ ​ຢູ່​ທີ່​ຕັ້ງ​ເລິກ​ເຂົ້າ​ໄປ​ໃນ​ເຂດ​ເສດຖະກິດ​ຈຳ​ເພາະ ​ແລະ​ໄຫຼ່​ທະວີບ​ຂອງຫວຽດນາມ. ຈີນ​ຝ່າຍ​ດຽວ​ໄດ້​ລະ​ເມີດ​ຂໍ້​ຕົກລົງ​ຂັ້ນ​ສູງ​ລະຫວ່າງ​ສອງ​ປະ​ເທດ ກ່ຽວ​ກັບ​ບັນດາ​ຫຼັກການ​ອັນ​ພື້ນຖານ​ເພື່ອ​ແກ້​ໄຂ​ບັນດາ​ບັນຫາ​ເທິງ​ທະ​ເລ, ລະ​ເມີດ​ກົດໝາຍ​ສາກົນ, ​ໃນ​ນັ້ນ​ມີ​ກົດ​ບັດ​ສະຫະ​ປະຊາ​ຊາດ ກໍ່​ຄືລະ​ເມີດສົນທິສັນຍາ​ສະຫະ​ປະຊາ​ຊາດ​ກ່ຽວ​ກັບ​ກົດໝາຍ​ທະ​ເລ ປີ 1982 ​ແລະບັນດາ​ຂໍ້​ຕົກລົງ​ລະຫວ່າງ​ອາ​ຊຽນ - ຈີນ (DOC). ພັກ ລັດ ​ແລະ​ປະຊາຊົນ​ຫວຽດນາມ​ ຍາມ​ໃດ​ກໍ່​ນັບຖື​ຖະນຸຖະໜອມ ​ແລະ​ເຮັດ​ຈົນ​ສຸດ​ຄວາມ​ສາມາດ​ຂອງ​ຕົນ ​ເພື່ອ​ເພີ່ມ​ທະວີນ້ຳ​ໃຈ​ມິດຕະພາບ​ ລະ​ຫວ່າງ​ປະຊາຊົນ​ສອງ​ປະ​ເທດ​ຫວຽດນາມ - ຈີນ, ຮັກສາ​ສັນຕິພາບ ສະຖຽນ​ລະ​ພາບ ​ເພື່ອ​ພັດທະນາ​ປະ​ເທດ, ຍ້ອນ​ປະຊາຊົນ​ຫວຽດນາມ​ເຄີຍ​ຖືກ​ສົງຄາມ​ຮຸກ​ຮານ​ທຳລາຍ ​ແລະ​ມ້າງຜານ​ເປັນ​ເວລາ​ຫຼາຍ​ສິບ​ປີ. ພ້ອມ​ກັນ​ນັ້ນ ​ຮຽກຮ້ອງ​ໃຫ້​ຝ່າຍຈີນ​ກໍ່​ຕ້ອງ​ເຮັດ​ຄື​ແນວ​ນັ້ນ. ຄື​ດັ່ງ​ທີ່​ຂ້າພະ​ເຈົ້າ​ໄດ້​ເວົ້າ​ກັບ​ຜູ້​ເລືອກ​ຕັ້ງ​ຢູ່​ນະຄອນ​ໂຮ່ຈີ​ມິນ ​ເມື່ອ​ເຫດ​ການ​ນີ້​ຫາກໍ່​ເກີດ​ຂຶ້ນ, ວ່າ ພວກ​ເຮົາ​ບໍ່​ຍອມຮັບ​ການ​ທີ່​ບໍ່​ວ່າ​ຜູ້​ໃດ ບໍ່​ວ່າ​ປະ​ເທດ​ໃດ, ​ເຖິງ​ວ່າ​ຈະ​ແຂງ​ແຮງ​ປານ​ໃດ​ກໍ່ຕາມ, ບັງຄັບ​ໃຫ້​ເຮົາ​ຕ້ອງປະ​ນິປະນອມ​ຍອມ​ແບ່ງອຳນາດ​ອະທິປະ​ໄຕ ຜືນ​​ແຜ່ນດິນ​ອັນ​ສັກກະ​ລະ​ບູຊາ​ຂອງ​ປະ​ເທດ​ຊາດ. ຫວຽດນາມ​ມີ​ຫຼັກ​ຖານ​ປະຫວັດສາດ ​ແລະ​ນິຕິ​ທຳ​ຢ່າງ​ພຽງພໍ ກ່ຽວ​ກັບ​ອຳນາດ​ອະທິປະ​ໄຕຂອງ​ຕົນຕໍ່​ກັບ 2 ໝູ່​ເກາະ ຮ່ວາງຊາ ​ເຈື່ອງ​ຊາ (Paracel Islands, Spratly Islands) ​ແລະເຂດ​ເສດຖະກິດ​ຈຳ​ເພາະ ​ໄຫຼ່​ທະວີບ​ຂອງຫວຽດນາມ, ສອດຄ່ອງ​ກັບ​ກົດໝາຍ​ສາກົນ. ພວກ​ເຮົາ​ເດັດ​ຂາດ​ບໍ່​ປະ​ໃຫ້​ດິນດອນ ທະ​ເລຂອງ​ປະ​ເທດ​ຊາດ​ຖືກ​ລ່ວງ​ລ້ຳພໍ​ນິ້ວ. ສຳລັບຄົນ​ຫວຽດນາມທຸກ​ຄົນ, ອະທິປະ​ໄຕ​ໃນ​ອານາ​ເຂດ​​ເປັນ​ທີ່​ສັກກະ​ລະ​ບູຊາ ​ແລະ ບໍ່​ສາມາດ​ລ່ວງ​ລ້ຳ​ໄດ້. 

ນັກ​ຂ່າວ: ​ທ່ານ​ປະທານຈົ່ງ​ໃຫ້​ຮູ້​ວ່າ ກອງ​ປະຊຸມ​ຄະນະ​ບໍລິຫານ​ງານ​ສູນ​ກາງ​ພັກ​ຄັ້ງ​ທີ 9 ທີ່​ຜ່ານ​ມາ ​ໄດ້ສະ​ແດງ​ທ່າ​ທີ​ຕໍ່​ເຫດການ​ນີ້​ຄື​ແນວ​ໃດ ? 

ທ່ານ​ປະທານ​ປະ​ເທດ ​ເຈືອງ​ເຕິ​ນຊາງ: ກອງ​ປະຊຸມຄະນະ​ບໍລິຫານ​ງານ​ສູນ​ກາງ​ພັກ​ຄັ້ງ​ທີ 9 ສະ​ໄໝ​ທີ XI ​ໄດ້​​ໃຊ້​ເວລາ​ອັນ​ເໝາະ​ສົມ​ ເພື່ອປຶກສາ​ຫາລື​ກ່ຽວ​ກັບ​ບັນຫາ​ນີ້. ດ້ວຍ​ຫຼັກ​ໝັ້ນ​ສະ​ເໝີ​ຕົ້ນ​ສະ​ເໝີ​ປາຍ, ຄະນະ​ບໍລິຫານ​ງານ​ສູນ​ກາງ​ພັກ ​ແລະ​ກົມ​ການ​ເມືອງ​ສູນ​ກາງ​ພັກ ຍາມ​ໃດ​ກໍ່​ຢືນຢັນ: ອະທິປະ​ໄຕ​ໃນ​ອານາ​ເຂດ​ຂອງ​ປະ​ເທດ​ຊາ​ດ, ​ໃນ​ນັ້ນ​ມີເຂດ​ເສດຖະກິດ​ຈຳ​ເພາະ ​ແລະ​ໄຫຼ່​ທະວີບ ​ເປັນ​ສິ່ງ​ສັກກະ​ລະບູ​ຊາ, ບໍ່​ອາດ​ປະ​ນິປະນອມອ່ອນຍອມ. ປະຊາຊົນ​ຫວຽດນາມ​ພວກ​ເຮົາ, ພັກ ​ແລະ​ລັດ​ເຮົາ ມີ​ຄວາມ​ສາມາດ ​ເຈດ​ຈຳນົງ​ເດັດດ່ຽວ ​ແລະ​ຄວາມ​ຕັດສິນ​ໃຈ​ຢ່າງ​ພຽງພໍ, ກໍ່​ຄື​ມີ​ພື້ນຖານປະຫວັດສາດ ​ແລະ​ນິຕິ​ທຳຢ່າງ​ພຽງພໍ ​ເພື່ອ​ຕໍ່ສູ້​ປົກ​ປັກ​ຮັກສາ​ອຳນາດ​ອະທິປະ​ໄຕ​ ຂອງ​ປະ​ເທດຊາດ. ບໍ່​ອາດ​ຍອມຮັບ​ສະພາບ​ການທີ່​ວ່າ ​ເປັນປະ​ເທດ​ມະຫາ​ອຳນາດ​ແມ່ນ​ບໍ່ຕ້ອງ​ເຄົາລົບ​ນັບຖື​ສິນ​ທຳ ​ແລະຄວາມ​ຮູ້ສຶກ​ເຫດ​ສົມ. ປະຊາຊົນ​ເຮົາ​ເຄິຍຜ່ານ​ການ​ຕໍ່ສູ້ ​ແລະ​ໄດ້​ຕໍ່ສູ້​ຢ່າງ​ເດັດດ່ຽວ​ ເພື່ອ​ປົກ​ປັກ​ຮັກສາ​ປະ​ເທດຊາດ ຕ້ານການ​ຮຸກ​ຮານ​ຈາກ​ພາຍ​ນອກ​ ເປັນ​​ເວລາ​ພັນ​ປີ​ມາ​ແລ້ວ. ​ເຫດການ​ທີ່​ຫາ​ກໍ່​ເກີດ​ຂຶ້ນ​ນີ້, ບໍ່​ຄ່ອຍ​ເຫັນ​ປະ​ເທດ​ໃດ ​ແລະ​ອົງການຈັດ​ຕັ້ງ​ສາກົນ​ໃດ ອອກປາກ​ອອກສຽງສະໜັບສະໜູນ​ຝ່າຍຈີນ ກ່ຽວ​ກັບ​ການ​ຕິດ​ຕັ້ງ​ຮ້ານ​ຂຸດ​ເຈາະ​ນ້ຳມັນ ​ໄຮ່​ຢາງ-981 ຢ່າງ​ຜິດ​ກົດໝາຍ​ ໃນ​ເຂດ​ທະ​ເລ​ຂອງ​ຫວຽດນາມ ກໍ່​ຄື​ຄຳ​ອ້າງ​ສິດທິ​ທາງ​ລີ້ນ​ງົວ 9 ຕອນ ​ທີ່​ໄຮ້​ເຫດຜົນ. ບັນດາ​ຫຼັກ​ຖານ​ປະຫວັດສາດ ​ແລະ​ນິຕິ​ທຳ​ໃຫ້​ເຫັນ​ວ່າ, ຄວາມ​ເປັນ​ທຳ​ຂຶ້ນ​ກັບ​ພວກ​ເຮົາ. ທ່າ​ທີ​ຂອງ​ວົງ​ຄະນາ​ຍາດ​ສາກົນ​ກ່ຽວ​ກັບ​ເລື່ອງນີ້ ​ແມ່ນ​ຈະ​ແຈ້ງ​ພໍ​ຄວນ. 

ນັກ​ຂ່າວ: ທ່ານ​ປະທານ​ປະ​ເທດຕີ​ລາຄາ​ຄື​ແນວ​ໃດ​ ກ່ຽວ​ກັບ​ນ້ຳ​ໃຈ​ຮັກ​ຊາດ ​ແລະ​ວິທີ​ສະ​ແດງ​ນ້ຳ​ໃຈ​ຮັກ​ຊາດ ຂອງ​ປະຊາຊົນ​​ເຮົາ ຕໍ່​ການ​ທີ່ຈີນ​ຕິດ​ຕັ້ງ​ຮ້ານ​ຂຸດ​ເຈາະ​ນ້ຳມັນ ​ໄຮ່​ຢາງ-981 ຢ່າງ​ຜິດ​ກົດໝາຍ ​ໃນ​ເຂດ​ທະ​ເລ ​ແລະ​ໄຫຼ່​ທະວີບ​ຂອງປະ​ເທດ​ເຮົາ ?

ທ່ານ​ປະທານ​ປະ​ເທດ ​ເຈືອງ​ເຕິ​ນຊາງ: ປະຊາຊົນ​ເຮົາຍາມ​ໃດ​ກໍ່ມີ​ມູນ​ເຊື້ອ​ຮັກ​ຊາດ​ອັນ​ແຮງ​ກ້າ. ​ເມື່ອ​ເອກະລາດ ອຳນາດອະທິປະ​ໄຕຂອງ​ຊາດຖືກ​ນາບ​ຂູ່ ປະຊາຊົນ​ເຮົາ​ກໍ່​ສາມັກຄີ​ເປັນ​ຈິດ​ໜຶ່ງ​ໃຈດຽວ ລຸກ​ຂຶ້ນ​ຕໍ່ສູ້​ປົກ​ປັກ​ຮັກສາ​ປະ​ເທດ​ຊາດ. ຂ້າພະ​ເຈົ້າ​ຮູ້ສຶກ​ສະ​ເທືອ​ນ​ໃຈ​ທີ່​ສຸດ ​ແລະ​​ເຄົາລົບນັບຖື​​ຈິ​ດ​ໃຈອັນ​ສູງ​ສົ່ງ​ດັ່ງກ່າວ​ຂອງພີ່ນ້ອງປະຊາຊົນຮ່ວມ​ຊາດ ​ແລະ​ບັນດາ​ສະຫາຍ​ພວກ​ເຮົາ. ​ທຸກ​ຄົນລ້ວນ​ແຕ່​ພ້ອມຈິດ​ພ້ອມ​ໃຈ​ກັນ​ຫັນ​ສູ່​ທະ​ເລ​ຕາ​ເວັນ​ອອກ. ບັນດາ​ຜູ້​ທີ່​ເຄື່ອນ​ໄຫວ​ຕິດ​ແໜ້ນກັບ​ທະ​ເລ ​ໄດ້​ອົງອາດ​ກ້າ​ແກ່ນ​ຢູ່​ແນວ​ໜ້າ ​ເຖິງ​ວ່າ​ຈະ​ຖືກ​ກ່ຳ​ປັ່ນ​ຂອງຈີນກົດ​ໜີບ ຂົ່ມ​ຂູ່, ຊ້ຳ​ຍັງ​ມີ​ກໍລະນີ​ຖືກກ່ຳ​ປັ່ນ​ຈີນ​ຕຳຈົນ​ລົ້ມຈົມ​ລົງ​ໄປ​ໃນ​ທ​ະ​ເລ. ​ເຂົາ​ຍັງ​ຄົງ​ຕິດ​ແໜ້ນ​ນຳ​ສະໜາມ​ປະມົງ​ອັນ​ເປັນ​ມູນ​ເຊື້ອ​ມາ​ແຕ່​ເຊັ່ນ​ປູ່ຍ່າ​ຕາ​ຍາຍ​ ​ໂດຍ​ບໍ່​ຍອມ​ຈຳນົນ. ບັນດາ​ກຳລັງ​ປົກ​ປັກ​ຮັກສາ​ກົດໝາຍຂອງ​ຫວຽດນາມ ​ກໍ່​ບໍ່​ທໍ້ຖອຍ, ​ເຂົາ​ໄດ້​ກ້າຫານຜ່ານ​ຜ່າ​ສິ່ງ​ທ້າ​ທາຍ​ທຸກ​ຢ່າງ​ ເພື່ອ​ປະຕິບັດ​ໜ້າ​ທີ່​ປົກ​ປັກ​ຮັກສາ ອຳນາດອະທິປະ​ໄຕ​ອັນ​ສັກກະ​ລະ​ບູຊາ ​ຂອງ​ປະ​ເທດ​ຊາດ. ປະຊາຊົນ​ທົ່ວ​ປະ​ເທດ​ໄດ້​ສະ​ແດງ​ນ້ຳ​ໃຈ​ຮັກ​ຊາດ ດ້ວຍ​ຫຼາຍ​ຮູບ​ການ​ອັນ​ອຸດົມ​ສົມ​ບູນ ປະດິດ​ສ້າງ. ພີ່ນ້ອງ​ຮ່ວມ​ຊາດ​ເຮົາ​ຢູ່​ທົ່ວ​ທຸກ​ແຫ່ງ​ຫົນ​ໃນ​ໂລກ ​ໄດ້​ສະ​ແດງ​ທ່າ​ທີ່​ຢ່າງ​ແຂງ​ແຮງ, ກ່າວ​ປະນາມ​ການ​ກະທຳ​ຜິດ​ກົດໝາຍ​ຂອງ​ຝ່າຍ​ຈີນ. ພວກ​ເຮົາ​ເດັດດ່ຽວ​ຕໍ່ສູ້​ ປົກ​ປັກ​ຮັກສາ​ອຳນາດອະທິປະ​ໄຕ ດ້ວຍ​ສັນ​ຕິ​ວິທີ, ບົນ​ພື້ນຖານ​ກົດໝາຍ​ສາກົນ.

​ແຕ່​ວ່າ, ກໍ່​ຕ້ອງ​ມີ​ສະຕິລະວັງ​ຕົວ​ຕໍ່ຄຳ​ເວົ້າ ​ແລະ​ການ​ກະທຳ​ທີ່​ມີ​ລັກສະນະ​ກະຕຸກ​ເສັ້ນ, ​ໃນ​ນາມ​ນ້ຳ​ໃຈ​ຮັກ​ຊາດ. ​ເມື່ອ​ປະ​ເທດ​ປະ​ເຊີນ​ໜ້າ​ຕໍ່​ຄວາມ​ຫຍຸ້ງຍາກ ສິ່ງ​ທ້າ​ທາຍ ຍິ່ງ​ຕ້ອງ​ສາມັກຄີ​ກັນ​. ການ​ແບ່ງ​ແຍກ ການ​ກະຕຸກ​ເສັ້ນ ​ເປັນອັນ​ຈະ​ແຈ້ງວ່າ​ບໍ່​ອາດ​ຊ່ວຍ​ໃຫ້​ປະ​ເທດ​ຜ່ານຜ່າ​ສິ່ງ​ທ້າ​ທາຍ​ໄດ້.

ນັກ​ຂ່າວ: ປະຊາຊົນ​ເອົາ​ໃຈ​ໃສ່​ທີ່​ສຸດ​ເຖິງ​ການ​ພົວພັນ​ເສດຖະກິດ​ລະຫວ່າງ​ປະ​ເທດ​ເຮົາ​ກັບ​ຈີນ. ຫາງ​ສຽງ​ວີ​ຈານ​ວ່າ, ຫວຽດນາມ​ອາດ​ຈະ​ຖືກ​ຂຶ້ນ​ກັບ​ຈີນ​ທາງ​ດ້ານ​ເສດຖະກິດ​ແລ້ວ. ທ່ານ​ປະທານ​ປະ​ເທດຈົ່ງໃຫ້​ທັດສະນະ​ກ່ຽວ​ກັບ​ບັນຫາ​ນີ້ ?

ທ່ານ​ປະທານ​ປະ​ເທດ ​ເຈືອງ​ເຕິ​ນຊາງ: ນັບ​ແຕ່​ເມື່ອ​ປະຕິບັດ​ແນວທາງ​ປ່ຽນ​ແປງ​ໃໝ່​ມາ​ເຖິງ​ດຽວ​ນີ້ ​ເປັນ​ເວລາ​ເກືອບ 30 ​ປີ​ແລ້ວ, ພວກ​ເຮົາ​ຍາມ​ໃດ​ກໍ່​ປະຕິບັດ​ຢ່າງ​ສະ​ເໝີ​ຕົ້ນ​ສະ​ເໝີ​ປາຍ ​ແຜນນະ​ໂຍບາຍ​ເຊື່ອມ​ໂຍງ​ເສດຖະກິດ​ຢ່າງ​ກວ້າງຂວາງ​ເລິກ​ເຊິ່ງກັບ​ສາກົນ, ພ້ອມ​ກັນ​ນັ້ນ​ກໍ​ກໍ່ສ້າງພື້ນຖານ​ເສດຖະກິດ​ເອກະລາດ ​ເປັນ​ເຈົ້າ​ຕົນ​ເອງ. ຕາມ​ນັ້ນ, ປະ​ເທດ​ເຮົາ​ໄດ້​ມີ​ການ​ພົວພັນຮ່ວມ​ມືດ້ານ​ການ​ຄ້າ ​ແລະ​ການ​ລົງທຶນ​ກັບ​ກວ່າ 200 ປະ​ເທດ ​ແລະ​ອານາເຂດ. ພວກ​ເຮົາ​ຍາມ​ໃດ​ກໍ່​ປະຕິບັດ​ຫຼັກ​ນຳທີ່​ວ່າ ຫວຽດນາມ​ເປັນ​ເພື່ອນ​ມິດ ​ເປັນ​ຄູ່​ຮ່ວມ​ທີ່​ໄວ້​ວາງ​ໃຈ​ໄດ້ ​ແລະມີ​ຄວາມ​ຮັບຜິດຊອບ​ຕໍ່​ວົງ​ຄະນາ​ຍາດ​ສາກົນ, ຢູ່​ຮ່ວມ​ກັນ​ໂດຍ​ສັນຕິ​ກັບ​ໝົດ​ທຸກ​ປະຊາ​ຊາດ​ໃນ​ໂລກ ບົນ​ພື້ນຖານ​ເຄົາລົບ​ຊຶ່ງ​ກັນ​ແລະ​ກັນ ສະ​ເໝີ​ພາບ ຕ່າງ​ຝ່າຍ​ຕ່າ​ງມີ​ຜົນ​ປະ​ໂຫຍ​ດ. ຫັນ​ການ​ພົວພັນ​ກັບ​ບັນດາ​ປະ​ເທດ​ເປັນ​ຫຼາຍ​ຮູບ​ຫຼາຍ​ແບບ ຫຼາຍກ້ຳ​ຫຼາຍ​ຝ່າຍ, ພວກ​ເຮົາ​ຍາມ​ໃດ​ກໍ່​ສູ້​ຊົນ ​​ເພື່ອຮັບປະກັນຜົນ​ປະ​ໂຫຍ​ດ​ໃຫ້​ແກ່​ກັນ ​ແລະ​ເດັດຂາດ​ຈະ​ບໍ່​ຖືກ​ຂຶ້ນ​ກັບປະ​ເທດ​ໃດໆ​ ທັງ​ທາງ​ດ້ານ​​ເສດຖະກິດ ​ແລະການ​ເມືອງ. ປະຕິ​ບັນ​ແນວທາງ​ການ​ຕ່າງປະ​ເທດ​ຄື​ແນວ​ນັ້ນ, ​ໃນ​ເວລາ​ທີ່​ຜ່ານ​ມາ, ພວກ​ເຮົາ​ໄດ້​ຮັບ​ຜົນສຳ​ເລັດ​ຕ່າງໆ​ ທີ່​ສຳຄັນ​ທີ່​ສຸດ, ປະ​ເທດ​ນັບ​ມື້​ນັບ​ຈະ​ເລີ​ນພັດທະນາ, ຊີວິດ​ການ​ເປັນ​ຢູ່​ຂອງ​ປະຊາຊົນ​ນັບ​ມື້​ນັບ​ໄດ້​ປົວ​ແປງ​ໃຫ້​ດີ​ຂຶ້ນ. ​ແຕ່​ກໍ່​ຕ້ອງ​ຮັບ​ຮູ້​ຢ່າງກົງ​ໄປ​ກົງ​ມາ​ວ່າ, ບາງ​ຂົງ​ເຂດ​ປະຕິບັດ​ບໍ່​ຖືກຕ້ອງ​ຕາມ​ແຜນ​ນະ​ໂຍບາຍ​ນີ້ ອັນ​ໄດ້​ສົ່ງ​ຜົນ​ສະທ້ອນ​ບໍ່​ດີ​ເຖິງ​ພື້ນຖານ​ເສດຖະກິດ. ຕໍ່​ກັບ​ຈີນ, ການ​ພົວພັນ​ເສດຖະກິດ ການ​ຄ້າ​ໃນ​ຊຸມ​ປີ​ທີ່​ຜ່ານ​ມາ​ ໄດ້​ຂະຫຍາຍຕົວ​ໄວ​ພໍ​ຄວນ, ​ແຕ່​ສະພາບ​ການ​ການ​ຄ້າ​ຂາ​ເຂົ້າຂອງ​ຫວຽດນາມ​ລື່ນກາຍ​ການ​ຂາ​ອອກ​ນັບ​ມື້​ນັບ​ຫຼາຍ, ​ເກີດ​ຂຶ້ນ​ຢ່າງລຽນຕິດ​ທຸກ​ປີ, ພິ​ເສດ​ແມ່ນ​ບັນດາ​ວັດຖຸອຸປະກອນ​ສົ້ນ​ເຂົ້າ​ໃຫ້ການ​ຜະລິດ. ຜະລິດ​ຕະພັນ​ສົ່ງ​ນອກ​ບາງ​ປະ​ເພດ​ຂອງ​ຫວຽດນາມ ​​ໄດ້ເຕົ້າ​ໂຮມ​ລວມສູນ​ເກີນ​ຄວນ​ເຂົ້າ​ໃນ​ຕະຫຼາດ​ຈີນ. ຂົງ​ເຂດ​ການ​ປະມູນ​ແບບ EPC, BOT ​ແລະ​ສະໜອງ​ເຄື່ອງ​ຈັກ​ເຄື່ອງປະກອບ ​ໃຫ້​ບາງ​ຂະ​ແໜງ​ການ​ທີ່​ສຳຄັນ​ເຊັ່ນ ​ໄຟຟ້າ ​ໂທລະ​ຄົມມະນາຄົມ ສື່​ຂ່າວ ​ແລະ​ບາງ​ຂະ​ແໜງ​ເສດຖະກິດ​ອື່ນ, ນັກ​ລົງທຶນ​ຈີນ​ໄດ້​ກວມ​ເອົາ​ສ່ວນ​ຫຼາຍ, ຫຼາຍ​ໂຄງການ ຄຸນ​ນະພາ​ບ​ເຕັກ​ໂນ​ໂລ​ຊີ​ບໍ່​ສູງ, ຄ່າ​ໃຊ້​ຈ່າຍລົງທຶນ​ເຄີຍ​ເພີ່ມ​ຂຶ້ນ​ທຽບ​ກັບ​​ເວລາ​​ເລີ່​ມ​ໂຄງການ, ​ເວລາ​ສຳ​ເລັດ​ໂຄງການ​ຖືກ​ແກ່ຍາວ... ສະພາບ​ການ​ນີ້​ຕ້ອງ​ໄດ້​ປັບປຸງ​ແກ້​ໄຂ​ໂດຍ​ໄວ.

ນັກ​ຂ່າວ: ຮຽນ​ທ່ານ​ປະທານ​ປະ​ເທດ, ປະຊາຊົນ​ເຮົາ​ເອົາ​ໃຈ​ໃສ່​ທີ່​ສຸດ​ເຖິງ​ການ​ທີ່​ພັກ-​ລັດ ​ໄດ້​ແລະ​ພວມ​ມີ​ແຜນ​ນະ​ໂຍບາຍ ວິທີ​ແກ້​ຫຍັງ​ແດ່ ຕໍ່​ການ​ທີ່​ຮ້ານ​ຂຸດ​ເຈາະ​ນ້ຳມັນ ​ໄຮ່​ຢາງ-981 ຂອງ​ຈີນ ຍັງ​ຄົງ​ເຄື່ອນ​ໄຫວ​ຢ່າງ​ບັງອາດ​ຜິດ​ກົດໝາຍ ​ໃນ​ເຂດ​ເສດຖະກິດ​ຈຳ​ເພາະ ​ແລະ​ໄຫຼ່​ທະວີບ​ຂອງ​ຫວຽດນາມ ?

ທ່ານ​ປະທານ​ປະ​ເທດ ​ເຈືອງ​ເຕິ​ນຊາງ: ​​ໃນ​ທັນທີ​ທັນ​ໃດ​ຫຼັງ​ຈາກ​ທີ່ ຈີນ​​ຕິດ​ຕັ້ງ​ຮ້ານ​ຂຸດ​ເຈາະ​ນ້ຳມັນ ​ໄຮ່​ຢາງ-981 ຢ່າງ​ຜິດ​ກົດໝາຍ ​ເຂົ້າ​ເລິກ​ໃນ​ເຂດ​ເສດຖະກິດ​ຈຳ​ເພາະ ​ແລະ​ໄຫຼ່​ທະວີບ​ຂອງຫວຽດນາມ, ຄະນະ​ບໍລິຫານ​ງານ​ສູນ​ກາງ​ພັກ ກົມ​ການ​ເມືອງສູນ​ກາງ​ພັກ ​ໄດ້​ວາງ​ແຜນ​ນະ​ໂຍບາຍ​ອອກ​ມາ​ຢ່າງ​ທັນ​ການ​ເພື່ອ​ແກ້​ໄຂ​ສະພາບ​ການ. ດ້ານ​ໜຶ່ງ, ​ເດັດດ່ຽວ​ຮຽກຮ້ອງ​ໃຫ້​ຈີນ​ຖອນ​ຮ້ານ​ຂຸດ​ເຈາະ​ນ້ຳມັນ​ອອກ​ຈາກ​ເຂດ​ທະ​ເລ​ຂອງ​ຫວຽດນາມ, ດ້ານ​ອື່ນ, ຕັ້ງ​ໝັ້ນ​ຮັກສາ​ສິ່ງ​ແວດ​ລ້ອມ​ສັນຕິພາບ​ເພື່ອ​ສ້າງສາ​ພັດທະນາ​ປະ​ເທດ; ຮັກສາ​ສາຍ​ພົວພັນ​ເພື່ອນ​ບ້ານ​ໃກ້​ຄຽງ ມິດຕະພາບ​ກັບ​ປະຊາຊົນ​ຈີນ ບົນ​ພື້ນຖານ​ສະ​ເໝີ​ພາບ ​ເຄົາລົບ​ຊຶ່ງ​ກັນ​ແລະ​ກັນ ​ແລະ​ພ້ອມ​ກັນຮັບຜົນ​ປະ​ໂຫຍ​ດ. ບົນ​ພື້ນຖານ​​ແຜນນະ​ໂຍບາຍ​ດັ່ງກ່າວ, ບັນດາ​ອົງການ​ພາລະ​ບົດບາດ​ຂອງ​ພັກ ລັດ ສະພາ​ແຫ່ງ​ຊາດ ລັດຖະບານ ​ແລະ​ທົ່ວ​ທັງ​ລະບົບ​ການ​ເມືອງ ​ໄດ້​ເຂົ້າ​ການ​​ເຂົ້າ​ງານ ດຳ​ເນີນ​ການ​ຕໍ່ສູ້​ທາງ​ການ​ທູດ​ຢ່າງຮອບດ້ານ ທັງ​ສອງ​ຝ່າຍ ​ແລະ​ຫຼາຍ​ຝ່າຍ; ຕໍ່ສູ້​ສະ​ກັດ​ກັ້ນ​ໃນ​ພື້ນ​ທີ່​ທະ​ເລ ດ້ວຍ​ກຳລັງ​ຝ່າຍ​ພົນລະ​ເຮືອນ​ປະຕິບັດ​ກົດໝາຍ; ສົ່ງ​ຂ່າວ​ຢ່າງ​ທັນ​ການ ​ເປັນ​ປະຈຳ ​ແລະ ຖືກຕ້ອງ​ຊັດ​ເຈນ, ​ເຮັດ​ໃຫ້​ປະຊາຊົນ​ເຮົາ ​ແລະ ​ເພື່ອນ​ມິດ​ໃນ​ໂລກ​ເຂົ້າໃຈ​ແຈ້ງສະພາບ​ການ​ທີ່​ກຳລັງ​​ເກີດ​ຂຶ້ນ. ພວກ​ເຮົາ​ຍາມ​ໃດ​ກໍ່​ໃຊ້​ບັນດາ​ມາດ​ຕະການ​ສັນຕິ, ພ້ອມ​ກັນ​ນັ້ນ​ກໍ່​ຮຽກຮ້ອງ​ໃຫ້​ຈີນ ສະ​ແດງ​ເຈຕະນາ​ດີ ​ແກ້​ໄຂ​ບັນຫາຢ່າງ​ເໝາະ​ສົມ ດ້ວຍ​ມາດ​ຕະການ​ສັນຕິ ບົນ​ພື້ນຖານ​ກົດໝາຍ​ສາກົນ ​ແລະ​ບັນດາ​ຂໍ້​ຕົກລົງ​ລະ​ຫວ່າງ​ຈີນ - ອາ​ຊຽນ, ຈີນ - ຫວຽດນາມ. ມາດ​ຕະການ​ນິຕິທຳ​ກໍ່​ໃດ້ນຳ​ໃຊ້​ເມື່ອ​ຈຳ​ເປັນ ​ເພື່ອປົກ​ປັກ​ຮັກສາອະທິປະ​ໄຕ​ ປົກ​ປັກ​ຮັກສາ​ດິນ​ແດນ​ຂອງ​ປະ​ເທດ​ຊາດ. ການ​ຕໍ່ສູ້ປົກ​ປັກ​ຮັກສາ​ເອກະລາດ ອຳນາດອະທິປະ​ໄຕ ​ເອກະ​ພາບ ​ແລະ​ຜືນ​​ແຜ່ນດິນ​ອັນ​ຄົບ​ຖ້ວນ ​ແມ່ນ​ຫຍຸ້ງຍາກ ຍາວ​ນານ, ຮຽກຮ້ອງ​ໃຫ້​ພວກ​ເຮົາ​ຕ້ອງ​ເດັດດ່ຽວ, ​ແຕ່​ກໍ່​ຕ້ອງ​ທຸ່ນ​ທ່ຽງ ທົນ​ທານໜຽວ​ແໜ້ນ​ເພື່ອ​ບັນລຸ​ປະສິດທິ​ຜົນ.

ພັກ ​ແລະ​ລັດ​ເຮົາກຳລັງ​ປະຕິບັດ​ບັນດາ​ແຜນ​ນະ​ໂຍບາຍ ​ແລະ​ວິທີ​ແກ້ ຕອບ​ສະໜອງ​ຄວາມ​ມຸ່ງ​ມາດ​ປາຖະໜາ​ອັນ​ແຮງ​ກ້າ ຊອບ​ທຳ​ຂອງພີ່ນ້ອງ​ປະຊາຊົນຮ່ວມ​ຊາດກວ່າ 90 ລ້ານ​ຄົນ. ຂ້າພະ​ເຈົ້າ​ຂໍ​ຢ້ຳຄືນ​ເຖິງ​ຄຳ​​ໂອວາດຂອງ​ເຈົ້າ​ຊີວິດ ​ເລ​ແຖງ​ໂຕງ ທີ່​ເຄີຍ​ເວົ້າ​ຕໍ່​ເສນາ​ອຳນາດ ທີ່​ໄດ້​ບັນທຶກ​ໄວ້​ໃນ​ປຶ້ມ ບັນທຶກປະຫວັດສາດຂອງມະຫາຫວຽດ ສະບັບສົມບູນ  (ດ້າຍ​ຫວຽດສື​ກີ໋ ຕວ່າ​ນທື): “ພູຫຼາໜຶ່ງ, ​ເຊ​ຄືບໜຶ່ງຂອງ​ເຮົາ, ​ເຫດ​ໃດ​ຈຶ່ງ​ປະ​ຖິ້ມ? ​ເຈົ້າ​ຕ້ອງ​​ໂຕ້​ວາທີຢ່າງ​ເດັ​ດດ່ຽວ, ບໍ່​ໃຫ້​ເຂົາ​ບັງ​ບຽບ​ເປັນ​ແຕ່​ລະ​ກ້າວ. ຖ້າ​ຫາກ​ເຂົາ​ບໍ່​ຮັບຟັງ, ຍັງ​ອາດ​ຈະ​ສົ່ງ​ທູດ​ໄປ​ທາງ​ທິດ​ເໜືອ ​ເພື່ອ​ສະ​ເໜີ​ອະທິບາຍ​ຄວາມ​ຖືກ​ຄວາມ​ຜິດ. ຖ້າ​ເຈົ້າ​ກ້າ​ເອົາ​ພູ​ຫຼາ​ໜຶ່ງ ດິນ​ຄືບ​ໜຶ່ງ​ຂອງ​ເຈົ້າ​ຊີວິດ​ຜູ້​ກໍ່​ຕັ້ງ​ລາຊະອານາຈັກ ​ໄປ​ເປັນ​ເຫຍື່ອ​ໃຫ້ສັດຕູ, ຈະ​ຖືກ​ໂທດ​ປະຫານ​ຊີວິດ!”. 

ນັກ​ຂ່າວ: ຂໍ​ຂອບ​ໃຈ​ທ່ານ​ປະທານ​ປະ​ເທດ​ດ້ວຍ​ຄວາມ​ນັບຖື​ຢ່າງ​ສູງ./. 

ຕາມ: TTXVN

ຄວາມເຫັນຕໍ່ບົດຂ່າວ

CommentForm

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ