ວັນອາທິດ, 18/8/2019
ທ່ານປະທານາທິບໍດີ ສາທາລະນະລັດອິນເດຍ ມາຢ້ຽມຢາມຂັ້ນລັດທີ່ປະເທດ ສາທາລະນະລັດສັງຄົມນິຍົມຫວຽດນາມ ຢ່າງເປັນທາງການ
21/10/2014 10:50' ສົ່ງ ພິມ
ທ່ານຫງວຽນຟູຈ້ອງ ເລຂາທິການໃຫຍ່ ພັກກອມມູນິດຫວຽດນາມ ຕ້ອນຮັບທ່ານປະທານາທິບໍດີ ປຣານາບ ມູຄາຈີ (ພາບ: TTXVN)

ພິທີຕ້ອນຮັບທ່ານ​ປຣານາບ ມູຄາ​ຈີ ປະທານາທິບໍດີ ສາທາລະນະ​ລັດ ອິນເດຍ ໄດ້​ຈັດຂຶ້ນ​ຢ່າງ​ເປັນ​ທາງ​ການ ​ແລະ​ສົມ​ກຽດ ທີ່ນະຄອນຫຼວງຮ່າໂນ້ຍ ໃນວັນທີ 15 ກັນຍາ 2014. ພາຍຫຼັງພິທີຕ້ອນຮັບ, ທ່ານເຈືອງເຕິນຊາງ ປະທານປະເທດຫວຽດນາມ ໄດ້ດຳເນີນການພົບປະເຈລະຈາ ແລະ ຈັດງານລ້ຽງທ່ານ​ປະທານາທິບໍດີ ອິນເດຍ ຢ່າງ​ສົມ​ກຽດ. ທ່ານຫງຽນຟູຈ້ອງ ເລຂາທິການໃຫຍ່ ພັກກອມມູນິດຫວຽດນາມ, ທ່ານ ຫງຽນເຕິນຢູງ ນາຍົກລັດຖະມົນຕີ ແລະ ທ່ານຫງຽນຊີງຮູ່ງ ປະທານສາພາແຫ່ງຊາດ ກໍ່ໄດ້ມີການຕ້ອນຮັບທ່ານ​ປະທານາທິບໍດີປຣານາບ ມູຄາ​ຈີ ໃນໂອກາດນີ້.

ສອງຝ່າຍໄດ້ອອກແຈ້ງ​ການລວມ ລະຫວ່າງ ສາທາ​ລະນະ​ລັດສັງຄົມ​ນິຍົມ ຫວຽດນາມ ແລະສາທາ​ລະນະ​ລັດ ອິນເດຍ.

 
  


ການ​ພົບ​ປະ​ເຈລະຈາລະຫວ່າງ​ທ່ານ​ປະທານ​ປະ​ເທດ ​ເຈືອງ​ເຕິ​ນຊາງ
​ແລະ​ທ່ານ​ປະທານາທິບໍດີ ປຣານາບ ມູຄາ​ຈີ (ພາບ: tgvn.com.vn)


     ທ່ານປະທານປະເທດເຈືອງເຕິນຊາງ ​ແລະ ທ່ານປະທານາທິບໍດີປຣານາບ ມູຄາ​ຈີ ໄດ້ແລກປ່ຽນທັດສະນະ ​ກ່ຽວ​ກັບສະພາບການພັດທະນາ​ເສດຖະກິດ - ສັງຄົມ ກໍ່​ຄື​ກ່ຽວ​ກັບ​ນະ​ໂຍບາຍການ​ຕ່າງປະ​ເທດ​ຂອງ​ແຕ່ລະ​ປະ​ເທດ, ການພົວພັນລະຫວ່າງສອງປະເທດ, ບັນດາບັນຫາສາກົນ ແລະ ພາກ​ພື້ນເຊິ່ງທັງສອງຝ່າຍຕ່າງ​ກໍ​ສົນ​ໃຈ...

ຜູ້ນຳທັງສອງໄດ້ສະແດງຄວາມດີອົກດີໃຈຕໍ່ການຂະຫຍາຍຕົວຂອງ​ສາຍພົວພັນມິຕະພາບອັນເປັນມູນເຊື້ອ ລະຫວ່າງງສອງປະເທດ ໃນເວລາທີ່ຜ່ານມາ ແລະ ສະແດງຄວາມເພິງພໍໃຈ ກ່ຽວກັບຄວາມກ້າວໜ້າ ໃນຫຼາຍຂົງເຂດຂອງການຮ່ວມມື, ພິເສດນັບແຕ່ເວລາສອງປະເທດກາຍເປັນຄູ່ຮ່ວມຍຸດທະສາດໃນປີ 2007 ​ເປັນ​ຕົ້ນ​ມາ. ຝ່າຍອິນເດຍຢັ້ງຢືນຄືນໃໝ່ວ່າ: ສືບຕໍ່ຖືຫວຽດນາມເປັນເສົາຄ້ຳໜຶ່ງ ໃນນະໂຍບາຍ ມຸ່ງສູ່ທາງທິດຕາເວັນອອກ ຂອງຕົນ. ຫວຽນາມສືບຕໍ່ສະໜັບສະໜູນນະໂຍບາຍ ມຸ່ງສູ່ທາງທິດຕາເວັນອອກ ຂອງອິນເດຍ ແລະ ສະໜັບສະໜູນອິນເດຍ ມີບົດບາດສຳຄັນຍິ່ງກ່ວາອີກ ​ໃນ​ບັນດາເວທີປາໃສພາກພື້ນ ແລະ ສາກົນ. ສອງຝ່າຍໄດ້ເອກະພາບກັນຊຸກຍູ້ການແລກປ່ຽນເປັນປະຈຳ ໃນທຸກຂັ້ນ ລວມທັງ ພັກ-ລັດ ວິສາຫະກິດ ການພົວພັນປະຊາຊົນ ​ເພື່ອແນໃສ່ເພີ່ມທະວີການຮ່ວມມືໃນຫຼາຍຂົງເຂດ; ເພີ່ມທະວີ ແລະ​ເຮັດ​ໃຫ້ການ​ພົວພັນ​ຮ່ວມ​ມື​ສອງ​ຝ່າຍ ບົນພື້ນຖານການພົວພັນຄູ່ຮ່ວມຍຸດທະສາດ ລະຫວ່າງ​ສອງ​ປະ​ເທດ ຂະຫຍາຍຕົວເລິກເຊິ່ງກວ່າອີກ ​ເຊິ່ງຈຸດໃຈກາງແມ່ນ ຮ່ວມມືດ້ານການເມືອງ ການປ້ອງກັນຊາດ-ປ້ອງກັນຄວາມສະຫງົບ ເສດຖະກິດ ວິທະຍາສາດ-ເຕັກນິກ ວັດທະນະທຳ ເຊື່ອມຕໍ່ປະຊາຊົນ, ຮ່ວມມືໃນພາກພື້ນ ແລະຮ່ວມ​ມື​ແບບ​ພະຫຸ​ພາຄີ; ສືບຕໍ່ຊຸກຍູ້ການພົວພັນໃນຂອບການພົວພັນຄູ່ຮ່ວມຍຸດທະສາດ ໃຫ້ແໜ້ນແຟ້ນຍິ່ງ​ຂຶ້ນ, ເປັນຕົ້ນແມ່ນຄະນະກຳມະການລະຫວ່າງລັດຖະບານ, ​ແລກປ່ຽນ​ຄວາມ​ເຫັນການເມືອງ ແລະສົນທະ​ນາ​ກ່ຽວ​ກັບ​ຍຸດ​ທະ​ສາດ, ສົນທະ​ນາ​ກ່ຽວ​ກັບຄວາມສະຫງົບ ແລະ ບັນດາກົນໄກສົນທະນາ​ອື່ນ ລະຫວ່າງສອງປະເທດ. ສອງຝ່າຍໄດ້ຢືນຢັນວ່າ ຈະປະຕິບັດຂໍ້ຕົກລົງຕ່າງໆໃຫ້ມີປະສິດທິຜົນ ແນໃສ່ເປີດກ້ວາງ ແລະເຮັດໃຫ້ສາຍພົວພັນຮ່ວມມືສອງຝ່າຍເລິກເຊິ່ງກວ່າ​ອີກ.

ສອງຝ່າຍໄດ້​ເຫັນ​ດີ​ເປັນເອກະພາບວ່າ ການຮ່ວມມືປ້ອງກັນຊາດ-ປ້ອງກັນຄວາມສະຫງົບ ​ເປັນ​ເສົາ​ຄ້ຳໜຶ່ງທີ່​ສຳຄັນ ຂອງການພົວພັນຄູ່ຮ່ວມຍຸດທະສາດລະຫວ່າງສອງປະເທດ. ສອງຝ່າຍກໍສະແດງຄວາມເພິງພໍໃຈ ກ່ຽວກັບການຮ່ວມມືໃນຂົງເຂດນີ້ ແລະເນັ້ນວ່າ ການລົງນາມບົດບັນທຶກຊ່ວຍຈຳວ່າດ້ວຍວົງເງິນສິນເຊື່ອ ລວມມູນຄ່າ 100 ລ້ານ ໂດລາສະຫະລັດ ທີ່ອິນເດຍໄດ້ສະຫງວນໃຫ້ແກ່ຫວຽດນາມ ຈະ​ສ້າງ​ໂອກາດຮ່ວມມື​ໃໝ່ຫຼາຍໆ​ໂອກາດ​ອີກ.

ສອງຝ່າຍໄດ້ເປັນເອກະສັນກັນ ຊຸກຍູ້ການພົວພັນຄູ່ຮ່ວມດ້ານເສດຖະກິດ ແລະເພີ່ມທະວີການພົວພັນການ​ຄ້າ ການລົງທຶນ ລະຫວ່າງຂົງເຂດລັກ-ເອກະຊົນຂອງ​ສອງ​ປະ​ເທດ, ລວມທັງສ້າງຕັ້ງບໍລິສັດຮ່ວມທຸລະກິດ. ການນຳສອງຝ່າຍໄດ້ຊົມເຊີຍ ການຂະຫຍາຍຕົວຢ່າງວ່ອງໄວຂອງການພົວພັນການຄ້າສອງຝ່າຍ ໃນເວລາມໍ່ໆມານີ້ ແລະສະເໜີ​ໃຫ້ ບັນດາວິສາຫະກິດເປີດກວ້າງ ແລະ​ເພີ່ມ​ທະວີ​ການ​ແລກປ່ຽນ​ສິນຄ້າ​ທີ່ຫລາກຫລາຍກວ່າອີກ ​ເພື່ອແນໃສ່ບັນລຸລະດັບ​ຄາດຫມາຍ ຍົກລວມຍອດ​ມູນ​ຄ່າການຄ້າສອງສົ້ນ ຂຶ້ນ 15 ຕື້ໂດລາສະຫະລັດໃນປີ 2020.

ສອງຝ່າຍໄດ້ເປັນເອກະສັນກັນວ່າ ການທ່ອງທ່ຽວ ຕ່ຳແຜ່ນຕັດຫຍິບ ການຢຸກຢາ ແລະ ກະສິກຳ ແມ່ນບັນດາຂົງເຂດສຳຄັນ ທີ່​ມີ​ຄວາມ​ສາມາດ​ເຕີບ​ໂຕ​ໄວ​ໃນ​ການ​ຄ້າ​ສອງ​ຝ່າຍ; ​ແລະ​ເນັ້ນ​ໜັ້ກຄວາມ​ຕ້ອງການເພີ່ມທະວີການຮ່ວມ​ມື ໃນຂົງເຂດຕ່າງໆ ຄື: ເຕັກໂນໂລຢີຂ່າວສານ ວິທະຍາສາດ-ເຕັກນິດ ວິທະຍາສາດຈັກກະວານ ແລະ ອື່ນໆ.

ທ່ານເຈືອງເຕິນຊາງ ປະທານປະເທດຫວຽດນາມໄດ້ສະແດງຄວາມຂອບອົກຂອບໃຈຕໍ່ທ່ານ​ປຣານາບ ມູຄາ​ຈີ ປະທານາທິບໍດີອິນເດຍ ກ່ຽວກັບການຊ່ວຍເຫຼືອຂອງລັດຖະບານອິນເດຍ ໃຫ້ແກ່ຫວຽດນາມ ​ໂດຍ​ຜ່ານ​ບັນດາ​ໂຄງການ​ຍົກ​ລະດັບ​ຄວາມ​ສາມາດ. ຝ່າຍອິນເດຍກໍ່ໄດ້ແຈ້ງວ່າ ຈະ​ມອບ​ທຶນ​ສຶກສາໃຫ້​​ນັກ​ສຶກສາ​ຫວຽດນາມ 20 ຄົນ ​ເພື່ອເຂົ້າຮ່ວມຮຽນພາກ​ໜຶ່ງ (1 term) ຢູ່ມະຫາວີທະຍາໄລແຫ່ງໜຶ່ງຂອງອິນເດຍ ໃນຂອບໂຄງການ​ຮ່ວມ​ມື​ໃໝ່ທີ່​ມີ​ຊື່ວ່າ “ການເຊື່ອມຕໍ່ອິນເດຍ”...

ສອງຝ່າຍກໍ່ໄດ້​ແລກປ່ຽນທັດສະນະກ່ຽວກັບບັນດາບັນຫາພາກພື້ນ ແລະສາກົນ ທີ່​ທັງ​ສອງ​ຝ່າຍ​ຕ່າງ​ກໍ​ສົນ​ໃຈ; ສອງ​ຝ່າຍຕີລາຄາສູງການຮ່ວມມື ແລະປະສານສົມທົບລະຫວ່າງສອງປະເທດ ​ໃນ​ບັນດາ​ເວທີ​ປາ​ໄສ​ພາກ​ພື້ນ​ແລະ​ສາກົນ, ​ເປັນເອກະສັນກັນໃນການເປີດກ້ວາງການຮ່ວມມື, ເປັນຕົ້ນແມ່ນຢູ່​ອາ​ຊຽນ, ​ເວທີ​ປາ​ໄສ​ຄວາມ​ປອດ​ໄພ​ພາກ​ພື້ນ (ARF), ກອງ​ປະຊຸມ​ລັດຖະມົນຕີປ້ອງ​ກັນ​ປະ​ເທດ​ອາ​ຊຽນ​ເປີດ​ກວ້າງ (ADMM Plus), ກອງ​ປະຊຸມ​ຂັ້ນ​ສຸດ​ຍອດ​ອາຊີ​ຕາ​ເວັນ​ອອກ (EAS), ສະຫະ​ປະຊາ​ຊາດ ​ແລະ​ຂະ​ບວນການ​ບໍ່​​ເຂົ້າຮ່ວມ​ກຸ່ມ,…; ສູ້ຊົນເພື່ອສັນຕິພາບ ສະຖຽນລະພາບ ແລະ ວັດທະນາຖາວອນຢູ່ພາກພື້ນ ແລະ ໃນໂລກ... 

ສອງຝ່າຍ​ເວົ້າຢ້ຳ​ເຖິງ​ຄ​ວາມປາຖະໜາ ແລະ ຄວາມຕັດສິນໃຈຮ່ວມມືນຳກັນ ແນໃສ່ຮັກສາສັນຕິພາບ ສະຖຽນລະພາບ ຄວາມເຕີບໂຕ ແລະ ວັດທະນາຖາວອນ ຢູ່ທະວີບອາຊີ; ສອງ​ຝ່າຍ​ເປັນເອກະພາບກັນ​ໃຫ້​ທັດສະນະວ່າ ເສລີພາບໃນການເດີນທະເລຢູ່ທະເລຕາເວັນອອກ ບໍ່ອາດຖືກຂັດຂວາງ ແລະ ຮຽກຮ້ອງຝ່າຍຕ່າງໆ ທີ່ກ່ຽວຂ້ອງຕ້ອງມີຄວາມອົດທົນ​ອົດ​ກັ້ນ, ບໍ່​ນາບ​ຂູ່​ກັນຫຼື​ໃຊ້​ກຳລັງ​ອາວຸດຕໍ່​ກັນ, ແລະແກ້ໄຂຂໍ້ຂັດແຍ່ງໂດຍສັນຕິວິທີ ໃຫ້ສອດຄ່ອງກັບບັນດາຫຼັກການຂອງກົດໝາຍສາກົນ ທີ່ໄດ້ຮັບຮອງຈາກໂລກ ລວມມີ​ອະນຸສັນຍາ​ສະຫະ​ປະຊາ​ຊາດ​ວ່າ​ດ້ວຍ​ກົດໝາຍ​ທະ​ເລ​ປີ 1982 (UNCLOS); ສອງ​ຝ່າຍ​ຊົມ​ເຊີຍ​ຄຳ​ໝັ້ນສັນຍາ​ລວມຂອງ​ບັນດາ​ຝ່າ​ຍທີ່​ກ່ຽວຂ້ອງ​ໃນ​ການ​ເຄົາລົບ​ນັບຖື ​ແລະປະຕິບັດ DOC, ກ້າວໄປເຖິງ ອະນຸມັດຜ່ານ COC ບົນ​ພື້ນຖານ​ຄວາມ​ເຫັນ​ດີ​ເຫັນ​ພ້ອມ​ກັນ. ສອງຝ່າຍຮຽກຮ້ອງການຮ່ວມມືຮັບປະກັນຄວາມປອດໄພໃນການເດີນທະເລ ​ແລະ​ຕໍ່ສູ້​ຕ້ານ​ໂຈນ​ທະ​ເລ, ຮ່ວມ​ມື​​ໃນການ​ເຄື່ອນ​ໄຫວ​ຊອກ​ຫາ​ ຊ່ວຍ​ກູ້​ອຸບັດ​​ໄພ ​ແລະຜູ້​ປະສົບໄພ​ໃນ​ທະ​ເລ.


ທ່ານຫງວຽນຟູຈ້ອງ ເລຂາທິການ​ໃຫຍ່​ພັກ​ກອມ​ມູນິດ​ຫວຽດນາມ
ຕ້ອນຮັບທ່ານປະທານາທິບໍດີ ປຣານາບ ມູຄາ​ຈີ (ພາບ: TTXVN)

ໂດຍ​ການ​ເປັນ​ສັກຂີ​ພະຍານ​ຂອງ​ທ່ານ​ປະທານ​ປະ​ເທດ​ເຈືອງ​ເຕີນ​ຊາງ ​ແລະ ທ່ານ​ປະທານາທິບໍດີ ປຣານາບ ມູຄາ​ຈີ, ອງຝ່າຍໄດ້ລົງນາມໃນເອກະສານຕ່າງໆ​ເຊັ່ນ: (1) ສັນຍາ​ລະຫວ່າງ​ລັດຖະບານ​ແຫ່ງ ສສ ຫວຽດນາມ ​ແລະ​ລັດຖະບານ​ແຫ່​ງ ສ.ອິນ​ເດຍ ວ່າ​ດ້ວຍ​ການ​ຮ່ວມ​ມື ​ແລະ​ຊ່ວຍ​ເຫຼື​ອຊຶ່ງກັນ​ແລະ​ກັນ​ໃນ​ບັນດາ​ບັນຫາ​ກ່ຽວ​ກັບການກວດ​ແລະ​ເກັບ​ພາສີ​ສຸລະກາກອນ; (2) ສັນຍາ​ກ່ຽວ​ກັບ​ສິນ​ເຊື່ອ​ໂດ​ລາ​ສະຫະລັດ ລະຫວ່າງ​ລັດຖະບານ​ແຫ່ງ ສສ ຫວຽດນາມ ​ແລະ​ທະນາຄານ​ຂາ​ອອກ​ຂາ​ເຂົ້າ​ອິນ​ເດຍ; (3) ບົດ​ບັນທຶກ​ຊ່ວຍ​ຈຳ ລະຫວ່າງ​ກະຊວງ​ກະສິກຳ​ແລະ​ພັດທະນາ​ຊົນນະບົດ​ຫວຽດນາມ ​ແລະ ກະຊວງ​ກະສິກຳ​ອິນ​ເດຍ ວ່າ​ດ້ວຍ​ການ​ຮ່ວມ​ມື​ທາງ​ດ້ານ​ສັດຕະວະ​ແພດ; (4) ບົດ​ບັນທຶກ​ຊ່ວຍ​ຈຳ ລະຫວ່າງ​ກະຊວງ​ກະສິກຳ​ແລະ​ພັດທະນາ​ຊົນນະບົດ​ຫວຽດນາມ ​ແລະ ກະຊວງ​ກະສິກຳ​ອິນ​ເດຍ ວ່າ​ດ້ວຍ​ການ​ສ້າງ​ຕັ້ງ​ຟາ​ມລ້ຽງ​ປາ ບາ​ຊາ ຢູ່​ອິນ​ເດຍ; (5) ສານ​ສະ​ແດງ​ຄວາມ​ມຸ່ງໝາຍ ລະຫວ່າງ​ກຸ່ມ​ບໍລິສັດນ້ຳມັນ​ອາຍ​ແກ໊ສຫວຽດນາມ PETROVIETNAM ​ແລະ​ສະຫະ​ບໍລິສັດ​ນ້ຳມັນ​ອາຍ​ແກ໊ສອິນ​ເດຍ ONGC Videsh; (6) ບົດ​ບັນທຶກ​ຊ່ວຍ​ຈຳ ກ່ຽວ​ກັບ​ການ​ຮ່ວມ​ມື ​ແລະ​ພ້ອມ​ກັນ​ຊຸກຍູ້​ການ​ບໍລິການ​ດ້ານ​ການ​ເດີນ​ອາກາດ​ໂດຍ​ກົງ​ ລະຫວ່າງ Vietnam Airlines ​ແລະ ບໍລິສັດ​ການບິນ Jet Airways ອິນ​ເດຍ; (7) ຂໍ້​ຕົກລົງ​ວ່າ​ດ້ວຍ​ການ​ຮ່ວມ​ມື​ດ້ານ​ວຽກ​ງານ​ຊາວ​ໜຸ່ມ ລະ​ຫວ່າ​ງຄະນະ​ຊາດ​ໜຸ່ມ​ກອມ​ມູນິດ​ໂຮ່ຈີ​ມິນ ​ແລະກະຊວງພັດທະນາ​ຄວາມ​ສາມາດ​ດ້ານ​ວິຊາ​ຊ່າງ, ວິ​ສາ​ຫະກິດ, ຊາວ​ໜຸ່ມ ​ແລະ​ການ​ກິລາ​ອິນ​ເດຍ ​ໄລຍະ​ປີ 2014 - 2017.

ໃນການຢ້ຽມຢາມຫວຽດນາມຢ່າງເປັນທາງການຄັ້ງ​ນີ້, ທ່ານປຣານາບ ມູຄາ​ຈີ ປະທານາທິບໍດີອິນເດຍ ໄດ້ເຂົ້າໄວ້ອາໄລອະນຸສາວະລີ​ຫໍ​ສົບ​ຂອງ​ທ່ານປະທານ ໂຮ່ຈີມີນ ແລະ ວາງພວງມາລາຢູ່ທີ່ອນຸສາວະລີ ບັນດານັກຮົບວິລະຊົນຜູ້ເສຍສະຫຼະຊີວິດເພື່ອຊາດ. ທ່ານປະທານ ​ເຈືອງ​ເຕິ​ນຊາງ ​ແລະ​ທ່ານ​ປະທານາທິບໍດີ ປຣານາບ ມູຄາ​ຈີ ​ໄດ້​ໃຫ້​ກຽດເຂົ້າຮ່ວມພິທີ​ເປີດ​ນຳ​ໃຊ້ ສູນຄົ້ນຄ້ວາອິນເດຍ ຢູ່ທີ່ສະ​ຖາ​ບັນການເມືອງແຫ່ງຊາດ ໂຮ່ຈີມີນ. ທ່ານປະທານາທິບໍດີ ປຣານາບ ມູຄາ​ຈີ ​ໄດ້​ໄປຢ້ຽມຢາມນະຄອນໂຮ່ຈີມິນ ແຕ່ວັນທີ່ 16 ຫາ 17 ກັນຍາ 2014.

ທ່ານປະທານາທິບໍດີ ປຣານາບ ມູຄາ​ຈີ ​ໄດ້​​ເອົາຕົ້ນໂພໜຶ່ງຕົ້ນຈາກພຸດທະ​ຄະຍາ ມາ​ມອບ​ໃຫ້​ທ່ານ​ປະທານ​ປະ​ເທດ ເຈືອງເຕິນຊາງ ​ເພື່ອ​ປູກເປັນ​ທີ່​ລະນຶກ​ຢູ່ທີ່ສຳນັກງານປະທານປະເທດ. ຕົ້ນໂພຕົ້ນນີ້​ເປັນ​ສັນຍະ​ລັກ​ໃຫ້​ແກ່​ມູນມໍລະດົກສາດສະໜາພຸດ ລວມຂອງສອງປະເທດ. ທ່ານເຈືອງເຕິນຊາງໄດ້ສະແດງ ຄວາມຂອບອົກຂອບໃຈຢ່າງ​ຈິງ​ໃຈ​ຕໍ່ທ່ານປະທານາທິບໍດີ ປຣານາບ ມູຄາ​ຈີ ..../.

ສັງ​ລວມ​ໂດຍ: ​ແຂງ​ງວຽນ

 


Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ