ວັນອັງຄານ, 22/10/2019
ທ່ານນາຍົກລັດຖະມົນຕີ ຫງວຽນເຕິນຢຸງ ຢ້ຽມຢາມ ແລະເຮັດວຽກຢູ່ທີ່ທະວີບເອີຣົບ
23/10/2014 15:4' ສົ່ງ ພິມ
ທ່ານນາຍົກລັດຖະມົນຕີ ຫງວຽນເຕິນຢຸງ ແລະທ່ານປະທານຄະນະກຳມາທິການເອີຣົບ ໂຈເຊ ມານູແອນ ບາໂຣໂຊ. (ພາບ: VGP)
     * ​ໃນ​ຂອບ​ການ​ຢ້ຽມຢາມ​ລາຊະ​ອານາຈັກ​ແບນ​ຊິກ​ ຢ່າງ​ເປັນ​ທາງ​ການ, ທ່ານ​ນາຍົກລັດຖະມັນ​ຕີ ຫງວຽນ​ເຕິ​ນຢຸງ ​ໄດ້​ພົບ​ປະ​ປຶກສາ​ຫາລື​ກັບ​ທ່ານ​ຊາກ​ເລີ ມີ​ແຊນ ນາຍົກລັດຖະມົນຕີ​ແບນ​ຊິກ; ພົບ​ປະ​ສົນ​ທະ​ນາ​ກັບ​ທ່ານ​ຊາ​ບີນ ດີ ບີ​ທູນ ປະທານ​ສະພາ​ສູງ​ແບນ​ຊິກ ​ແລະ ​ທ່ານຟຣັງຊວາ ສະ​ແຈັບ​ມານ ຮອງ​ປະທານ​ສະພາ​ຕ່ຳ​ແບນ​ຊິກ; ພົບ​ປະ​ທ່ານ​ຈີນ-ຊາກ​ເລີ ລູ​ເປີ​ໂຕ ປະທານ​ສະພາ​ວົງ​ຄະນາ​ຍາດ​ຊາວ​ແບນ​ຊິກ​ເວົ້າ​ພາສາ​ຝຣັ່ງ;…

ທີ່​ການ​ພົບ​ປະ​ປຶກສາ​ຫາລື​ກັບທ່ານນາຍົກລັດຖະມົນຕີ​ແບນ​ຊິກ ​ຊາກ​ເລີ ມີ​ແຊນ ຕອນ​ແລງ​ວັນ​ທີ 13 ຕຸລາ, ທ່ານ​ນາຍົກລັດຖະມັນ​ຕີ ຫງວຽນ​ເຕິ​ນຢຸງ ​ແລະ ທ່ານນາຍົກລັດຖະມົນຕີ​ແບນ​ຊິກ ​ຊາກ​ເລີ ມີ​ແຊນ ​ໄດ້​ເນັ້ນວ່າ ຜ່ານ​ເວລາ 40 ກວ່າ​ປີ ນັບ​ແຕ່​ວັນ​ສ້າງ​ຕັ້ງ​ການ​ພົວພັນ​ທາງ​ການ​ທູດ (1973 - 2014), ການ​ພົວພັນ​ຮ່ວມ​ມື​ຫຼາຍ​ດ້ານ​ລະຫວ່າງ​ສອງ​ປະ​ເທດ​ໄດ້​ມີ​ການ​ຂະຫຍາຍຕົວ ຊຶ່ງ​ສະ​ແດງ​ອອກ​ໃນ​ການ​ຢ້ຽມຢາມ​ຂອງ​ຄະນະ​ຜູ້​ແທນ​ຂັ້ນ​ສູງ​ຂອງ​ສອງ​ຝ່າຍ​ໃນ​ຫຼາຍ​ຄັ້ງ. ສອງ​ຝ່າຍ​ເປັນ​ເອກະສັນ​ກັນ​ສືບ​ຕໍ່​ຊຸກຍູ້​ການ​ແລກປ່ຽນ​ຄະນະ​ຜູ້​ແທນ​ຂັ້ນ​ສູງ ​ແລະ​ເພີ່ມ​ທະວີ​ການ​ຮ່ວມ​ມື ສະໜັບສະໜູນ​ຊຶ່ງ​ກັນ​ແລະ​ກັນ​ຢູ່​ທີ່​ເວທີ​ປາ​ໄສ​ພະຫຸ​ພາຄີ ​ແລະ​ຢູ່​ອົງການສາກົນ.

ທ່ານ​ນາຍົກລັດຖະມົນຕີ ຫງວຽນ​ເຕິ​ນຢຸງ ​ແລະ
ທ່ານນາຍົກລັດຖະມົນຕີ​ແບນ​ຊິກ ​ຊາກ​ເລີ ມີ​ແຊນ
(ພາບ: VGP)

ທ່ານນາຍົກລັດຖະມົນຕີ​ແບນ​ຊິກ ​ຢືນຢັນ​ສະໜັບສະໜູນ​ການ​ເຊັນ​ສັນຍາ​ການ​ຄ້າ​ເສລີ​ລະຫວ່າງ​ອີ​ຢູ ​ແລະ​ຫວຽດນາມ, ທ່ານ​ໃຫ້​ທັດສະນະ​ວ່າ ສັນຍາ​ສະບັບ​ນີ້​ພ້ອມ​ກັນ​ກັບ​ສັນຍາ​ຂອບ​ວ່າ​ດ້ວຍ​ຄູ່ຮ່ວມ ​ແລະ​ການ​ຮ່ວມ​ມື​ຮອບດ້ານ (PCA) ລະຫວ່າງ​ຫວຽດນາມ ​ແລະ​ອີ​ຢູ ​ເປັນ​ພື້ນຖານ​ອັນ​ໜັກ​ແໜ້ນ​ ໃຫ້​ແກ່​ການ​ພັດທະນາ​ການ​ພົວພັນ​ຫຼາຍ​ດ້ານ ລະຫວ່າງວຽດນາມ ​ແລະບັນດາ​ປະ​ເທດ​ສະມາຊິກ​ອີ​ຢູ.

ສອງ​ຝ່າຍ​ເຫັນ​ດີ​ເພີ່ມ​ທະວີ​ການຮ່ວມມື​ດ້ານ​ການ​ຄ້າ, ອຳນວຍ​ຄວາມ​ສະດວກ​ໃຫ້​ບັນດາ​ວິ​ສາ​ຫະກິດ​ສອງ​ປະ​ເທດພົວພັນ ​ເຊື່ອມ​ຕໍ່​ກັນ​ໃນ​ບັນດາ​ຂົງ​ເຂດ​ບຸລິມະສິດ​ເຊັ່ນ ທ່ານ​ເຮືອ​ເດີນທະ​ເລ, ບໍລິການ​ດ້ານ​ພະລາທິການ, ຄົມມະນາຄົມ​ຂົນ​ສົ່ງ, ​ເຕັກ​ໂນ​ໂລ​ຢີສີຂຽວ, ​ເຕັກ​ໂນ​ໂລ​ຢີສູງ, ການ​ເດີນ​ອາກາດ - ອາ​ວະ​ກາດ.

ສອງ​ຝ່າຍ​ເນັ້ນ​ເຖິງ​ຄວາມ​ສຳຄັນຂອງ​ສັນຕິພາບ ສະຖຽນ​ລະ​ພາບ ຄວາມ​ສະຫງົບ ຄວາມ​ປອດ​ໄພ ​ແລະ​ເສລີພາບ​ໃນ​ການ​ເດີນ​ທະ​ເລ ​ແລະ​ການ​ເດີນ​ອາກາດ ​ຢູ່​ທະ​ເລ​ຕາ​ເວັນ​ອອກ, ​ແກ້​ໄຂ​ຄວາມ​ພິພາດ​ດ້ວຍ​ສັນຕິ​ວິທີ, ບໍ່​ໃຊ້​ກຳລັງ​ອາ​ວຸດ ​ຫຼື​ນາບ​ຂູ່​ໃຊ້​ກຳລັງ​ອາວຸດ, ບົນ​ພື້ນຖານ​ກົດໝາຍ​ສາກົນ ແລະ ອະນຸ​ສັນຍາ​ສະຫະ​ປະຊາ​ຊາດ​ວ່າ​ດ້ວຍ​ກົດໝາຍ​ທະ​ເລ​ປີ 1982 ກໍ່​ຄື​ການ​ປະຕິບັດ ຖະແຫຼງການກ່ຽວກັບວິທີການປະພຶດ ຂອງບັນດາຝ່າຍຢູ່ທະເລຕາເວັນອອກ (DOC) ຢ່າງ​ຄົບ​ຖ້ວນ​ແລະ​ມີ​ປະສິດທິ​ຜົນ, ​ແລະ​ຄວາມ​ຈຳ​ເປັນ​ຂອງ​ການ​ບັນລຸ​ໄດ້​ ປະ​ມວນຂໍ້​ກຳນົດການປະພຶດຂອງບັນດາຝ່າຍຢູ່​ທະເລຕາເວັນອອກ (COC) ໂດຍ​ໄວ...

* ​ໃນ​ຂອບ​ການ​ຢ້ຽມ​ຢານສະຫະພາບ​ເອີຣົບ, ຕອນ​ຄ່ຳ​ວັນ​ທີ 13 ຕຸລາ, ທ່ານ​ນາຍົກລັດຖະມັນ​ຕີ ຫງວຽນ​ເຕິ​ນຢຸງ ​ໄດ້​ພົບ​ປະ​ປຶກສາ​ຫາລື​ກັບ​ທ່ານ​ໂຈ​ເຊ ມາ​ນູ​ແອນ ບາ​ໂຣ​ໂຊ ປະທານ​ຄະນະ​ກຳມາ​ທິການ​ເອີຣົບ ​ແລະ​ພົບ​ປະ​ກັບທ່ານ​ເຮີ​ມານ ວານ ​ໂຣມປາຍ ປະທານ​ຄະນະ​ມົນຕີ​​ເອີຣົບ…



ທ່ານ​ນາຍົກລັດຖະມົນຕີ ຫງວຽນ​ເຕິ​ນຢຸງ ​ແລະ
​ທ່ານ​ປະທານຄະນະ​ກຳມາ​ທິການ​ເອີຣົບ
ໂຈ​ເຊ ມາ​ນູ​ແອນ ບາ​ໂຣ​ໂຊ. (ພາບ: VGP)

     ພາຍຫຼັງ​ການ​ພົບ​ປະ​ປຶກສາ​ຫາລື, ສອງ​ຝ່າຍ​ໄດ້​ອອກ ຖະ​ແຫຼ​ງການ​ຮ່ວມ​ຫວຽດນາມ - ອີ​ຢູ ວ່າ​ດ້ວຍທິດທາງ​ສຳ​​ເລັດ​ສິ້ນ​ສຸດ ​ການ​ເຈລະຈາ​ສັນຍາ​ການ​ຄ້າ​ເສລີຫວຽດນາມ - ອີ​ຢູ (EVFTA). ຕາມ​ນັ້ນ, ການ​ນຳ​ທັງ​ສອງ​ຢືນຢັນ​ຄືນ​ໃໝ່​ອີກ​ຄັ້ງ​ ກ່ຽວ​ກັບ​ຄວາມ​ສຳຄັນ​ຂອງການ​ສຳ​ເລັດ​ສິ້ນ​ສຸດ​ໂດຍ​ໄວ ການ​ເຈລະຈາ​ສັນຍາ​ການ​ຄ້າ​ເສລີ​ລະຫວ່າງ​ອີ​ຢູ ​ແລະ​ຫວຽດນາມ. ​ອີ​ຢູ ​ແລະ​ຫວຽດນາມ ມຸ່ງ​ຫວັງ​ຢາກ​ກໍ່ສ້າງ​ໃຫ້ສັນ​ຍາ​ການ​ຄ້າ​ເສລີ​ນີ້ ​ເປັນ​ສັນຍາ​ທີ່​ທັນ​ສະ​ໄໝ ຮອບ​ດ້ານ ​ແລະ ສົນ​ດູ​ນ ​ເພື່ອ​ຊ່ວຍ​ໃຫ້​ພື້ນຖານ​ເສດຖະກິດ​ຂອງ​ສອງ​ຝ່າຍ ສາມາດ​ແກ້​ໄຂ​ສິ່ງ​ທ້າ​ທາຍ​ຕ່າງໆ​ໃນ​ປັດຈຸບັນ​ ​ແລະ​ໃນ​ອະນາຄົດ​ໄດ້, ​ແລະ​ເປັນ​ພື້ນຖານ​ອັນ​ສຳຄັນ​ທີ່​ປະກອບສ່ວນ​ເພີ່ມ​ທະວີການ​ພົວພັນ​ລະຫວ່າງ​ທະວີບ​ເອີຣົບ ​ແລະ​ອາຊີ​ຕາ​ເວັນ​ອອກສຽງ​ໃຕ້.

​ໃນ​ການ​ພົບ​ປະ​ກັບ​ທ່ານ​ເຮີ​ມານ ວານ ​ໂຣມປາຍ ປະທານ​ຄະນະ​ມົນຕີ​​ເອີຣົບ, ທ່ານ​ນາຍົກລັດຖະມັນ​ຕິ ຫງວຽນ​ເຕິ​ນຢຸງ ​ເນັ້ນ​​ວ່າ​ຫວຽດນາມ​ໃຫ້​ຄວາມ​ສຳຄັນ​ແກ່​ການ​ພົວພັນ​ກັບ​ສະຫະພາບ​ເອີຣົບ (EU), ​ໄດ້​ແຈ້ງ​ຂ່າວ​ໃຫ້ທ່ານປະທານ​ຄະນະ​ມົນຕີ​​ເອີຣົບຊາບ​ ກ່ຽວ​ກັບ​ຜົນ​ຂອງ​ການພົບ​ປະ​ປຶກສາ​ຫາລື​ກັບ​ທ່ານ​ໂຈ​ເຊ ມາ​ນູ​ແອນ ບາ​ໂຣ​ໂຊ. ທ່ານ​ນາຍົກລັດຖະມັນ​ຕີ ສະ​ເໜີ​ໃຫ້ຄະນະ​ມົນຕີ​​ເອີຣົບ ສະໜັບສະໜູນ​ຢ່າງ​ຕັ້ງໜ້າ ​ເພື່ອ​ໃຫ້​ສອງ​ຝ່າຍອາດ​ຈະ​ລົງ​ລາຍ​ເຊັນ​ໃນ​ສັນຍາ EVFTA ​ໃນ​ເວລາ​ໄວ​ທີ່​ສຸດ​ເທົ່າ​ທີ່​ຈະ​ໄວ​ໄດ້, ສ້າງ​ກຳລັງ​ໝູນ​ໃຫ້​ແກ່​ການ​ພົວພັນ​ຫວຽດນາມ - ອີ​ຢູ​ໃນ​ເວລາ​ທີ່​ຈະ​ມາ​ເຖິງ.

ທ່ານປະທານ​ຄະນະ​ມົນຕີ​​ເອີຣົບສະ​ແດງ​ຄວາມ​ດີ​ອົກ​ດີ​ໃຈຕໍ່​ການ​ຂະຫຍາຍຕົວ​ໃໝ່ທີ່​ຕັ້ງໜ້າຂອງ​ການ​ພົວພັນ​ຮ່ວມ​ມື​ສອງ​ຝ່າຍ, ຕີ​ລາຄາ​ສູງ​ຕໍ່​ບົດບາດ ​ແລະ​ຖານະທີ່​ຕັ້ງຂອງ​ຫວຽດນາມ​ຢູ່​ພາກ​ພື້ນ, ຢືນຢັນ​ຫຼັກ​ໝັ້ນ​ຂອງ​ອີ​ຢູຄື ສະໜັບສະໜູນການ​ແກ້​ໄຂ​ການ​ພິພາດ​ຕ່າງໆ ດ້ວຍ​ສັນຕິວິທີ​ບົນ​ພື້ນຖານ​ກົດໝາຍ​ສາກົນ, ​ໃນ​ນັ້ນ​ມີອະນຸສັນຍາສະຫະປະຊາຊາດວ່າດ້ວຍກົດໝາຍທະເລ ປີ 1982 (UNCLOS 1982).

* ຕອນ​ແລງ​ວັນ​ທີ 14 ຕຸລາ, ທ່ານ​ນາຍົກລັດຖະມັນ​ຕີ ຫງວຽນ​ເຕິ​ນຢຸງ ພ້ອມ​ກັບ​ຄະນະ​ຜູ້​ແທນ​ຫວຽດນາມ​ໄດ້​ໄປຢ້ຽມ​ຢາມ​ປະ​ເທດສະຫະພັນສາທາລະນະ​ລັດ ​ເຢຍລະ​ມັນ ຢ່າງ​ເປັນ​ທາງ​ການ ຕາມ​ຄຳ​ເຊີນຂອງ​ທ່ານ​ນາງ​ອາ​ແຢລາ ​ເມີ​ແກນ ນາ​ຍົກລັດຖະມົນຕີ​ເຢຍລະ​ມັນ.

ທ່ານ​ນາຍົກລັດຖະມົນຕີ ຫງວຽນ​ເຕິ​ນຢຸງ ​ແລະ ທ່ານ​ນາງ​ອາ​ແຢລາ ​ເມີ​ແກນ
ນາຍົກລັດຖະມົນຕີ​ເຢຍລະ​ມັນ ​ໃນ​ພິທີ​ຕ້ອນຮັບ
. (ພາບ: TTXVN)
     ພາຍຫຼັງ​ພິທີ​ຕ້ອນ​ຮັບ​ຢ່າງ​ເປັນ​ທາງ​ການ​ທີ່​ທຳນຽບນາຍົກລັດຖະມົນຕີ​ເຢຍລະ​ມັນ, ຕອນ​ແລງ​ວັນ​ທີ 15 ຕຸລາ, ​ທ່ານ​ນາງ​ອາ​ແຢລາ ​ເມີ​ແກນ ນາ​ຍົກລັດຖະມົນຕີ​ເຢຍລະ​ມັນ ​ແລະ ທ່ານ​ນາຍົກລັດຖະມັນ​ຕີຫວຽດນາມ ຫງວຽນ​ເຕິ​ນຢຸງ ​ໄດ້​ພົບ​ປະ​ປຶກສາ​ຫາລື​ກັນ.

ທ່ານ​ການ​ນຳ​ທັງ​ສອງ​ໄດ້​ສະ​ແດງ​ຄວາມ​ເພິ​ງພໍ​ໃຈ​ກ່ຽວ​ກັບ​ການ​ຂະຫຍາຍຕົວ​ຢ່າງ​ໄວວາ​ແລະ​ມີ​ປະສິດທິ​ຜົນ ຂອງ​ການ​ພົວພັນ​ຄູ່ຮ່ວມ​ຍຸດ​ທະ​ສາດຫວຽດນາມ - ​ເຢຍລະ​ມັນ ຊຶ່ງ​ໄດ້​ຜັນ​ຂະຫຍາຍ​ເນື້ອ​ໃນ​ຫຼາຍ​ຢ່າງໃນ​ແຜນງານການ​ກະທຳ​ຍຸດ​ທະ​ສາດຢ່າງ​ສຳ​ເລັດ​ຜົນ; ​ເປັນ​ເອກະ​ພາບ​ກັນ​ເພີ່ມ​ທະວີ​ການແລກປ່ຽນ​ຄະນະຜູ້​ແທນ​ຂັ້ນ​ສູງ, ​ເປັນ​ພິ​ເສດ​ແມ່ນ ​ຄະນະ​ຜູ້​ແທນ​ຂັ້ນ​ສູງ​ທີ່​ແນ​ໃສ່​ສ້າງ​ກຳລັງ​ຊຸກຍູ້​ທີ່​ແຂງ​ແຮງ​ກວ່າ​ອີກ​ ໃຫ້​ແກ່​ການ​ພົວພັນ​ຮ່ວມ​ມື​ໃນ​ຂົງ​ເຂດ​ຕ່າງໆ​ທຸກ​ຂົງ​ເຂດ.

ສອງ​ຝ່າຍ​ຢືນຢັນ​ຈະ​ປະສານ​ສົມທົບນຳກັນ​ຢ່າງ​ແໜ້ນ​ແຟ້ນ​​ໃນ​ການ​ຈັດ​ຕັ້ງ​ນັນ​ດາ​ເຫດການ​ທີ່​ມີ​ຄວາມ​ໝາຍ​ຕົວ​ຈິງ ​ເພື່ອ​ສະ​ເຫຼີມສະຫຼອງວັນ​ສ້າງ​ຕັ້ງ​ສາຍ​ພົວພັນ​ທາງ​ການ​ທູດ ຫວຽດນາມ-​ເຍລະ​ມັນ ຄົບຮອບ 40 ປີ ​ໃນ​ປີ 2015...; ສອງ​ຝ່າຍ​ເປັນ​ເອກະ​ພາບ​ສ້າງ​ເງື່ອນ​ໄຂ​ ອຳນວຍ​ຄວາມສະ​ດວກ ໃຫ້​ບັນດາ​ວິ​ສາ​ຫະກິດ​ ແລະ​ນັກ​ລົງທຶນ ຂອງ​ແຕ່ລະ​ປະ​ເທດ​ ໄດ້​ເຄື່ອນ​ໄຫວ ​ແລະ​ດຳ​ເນີນ​ການທຸລະ​ກິດ​ຢ່າງ​​ດີ​ ຢູ່​ໃນ​ຕະຫຼາດ​ຂອງ​ກັນ​ແລະ​ກັນ. ສອງ​ຝ່າຍ​ກໍ່​ໄດ້​ແລກປ່ຽນ​ຄວາມ​ຄິດ​ເຫັນ​ກ່ຽວ​ກັບ​ບັນດາ​ບັນຫາ​ພາກ​ພື້ນ ​ແລະ​ສາກົນ ທີ່​ທັງ​ສອງຝ່າຍ​ມີ​ຄວາມ​ສົນ​ໃຈ...

ຝ່າຍ​ຫວຽດນາມ​ສະ​ແດງ​ຄວາມ​ຊົມ​ເຊີຍ​ຕໍ່​ທ່ານ​ຮອງ​ນາຍົກລັດຖະມົນຕີ ລັດຖະມົນຕີ​ກະຊວງ​ເສດຖະກິດ​ແລະ​ພະລັງງານ​ເຢຍລະ​ມັນ ທີ່​ຈະ​ມາ​ຢ້ຽມຢາມ​ຫວຽດນາມ ​ແລະ ​ເປັນ​ປະທານ​ກອງ​ປະຊຸມ​ນັກວິ​ສາ​ຫະກິດ​ເຢຍລະ​ມັນພາກ​ພື້ນ​ອາຊີ - ປາຊີ​ຟິກຄັ້ງທີ່ 14 ຢູ່​ນະຄອນ​ໂຮ່ຈີ​ມິນ ​ໃນ​ເດືອນ​ພະຈິກ 2014. ທ່ານ​ນາຍົກລັດຖະມັນ​ຕີ ຫງວຽນ​ເຕິ​ນຢຸງ ​ໄດ້​ສະ​ແດງ​ຄວາມ​ຂອບ​ອົກ​ຂອບ​ໃຈ​ຕໍ່​ເຢຍລະ​ມັນ ທີ່​ໄດ້​ສະໜອງ​ທຶນ​ຊ່ວຍ​ເຫຼືອ​ພັດທະນາ​ເປັນ​ທາງ​ການ (ODA) ​ໃຫ້​ແກ່​ຫວຽດນາມ...

ຝ່າຍ​ເຢຍລະ​ມັນ​ຕີ​ລາຄາ​ວ່າ ຫວຽດນາມ​ເປັນ​ໜຶ່ງ​ໃນ​ບັນດາ​ຄູ່​ຮ່ວມ ​ທີ່​ໄດ້​ນຳ​ໃຊ້​ແຫຼ່ງທຶນ​ທີ່​ລັດຖະບານ​ເຢຍລະ​ມັນຊ່ວຍ​ເຫຼືອ​​ໃຫ້​ຢ່າງ​ມີ​ປະສິດທິ​ຜົນ ​ແລະ​ຢືນຢັນ​ຈະ​ສືບ​ຕໍ່​ໃຫ້ການ​ຊ່ວຍ​ເຫຼືອ ODA ​ໃຫ້​ແກ່​ຫວຽດນາມ​ໃນ​ເວລາ​ທີ່​ຈະ​ມາ​ເຖິງ; ຢືນຢັນ​ສະໜັບສະໜູນ​ຫວຽດນາມ​ໃນ​ການ​ກໍ່ສ້າງ ​ແລະ​ພັດທະນາ​ມະຫາວິທະຍາ​ໄລ​ຫວຽດນາມ - ​ເຢຍລະ​ມັນ ​ໃຫ້​ກາຍ​ເປັນ​ມະຫາວິທະຍາ​ໄລ​ທີ່​ດີ​ເດັ່ນ ມີ​ຖານະ​ບົດບາດ​ສູງ​ໃນ​ພາກ​ພື້ນ; ຢືນຢັນ​ສືບ​ຕໍ່​ສະໜັບສະໜູນ​ຫວຽດນາມ​ເພີ່ມ​ທະວີ​ການ​ພົວພັນ​ຮ່ວມ​ມື​ຮອບດ້ານ​ກັບ​ອີ​ຢູ...

​ໃນ​ຖານະ​ຜູ້​ປະສານ​ງານ​ການ​ພົວພັນ​ອາຊຽນ - ອີ​ຢູ ສະ​ໄໝ​ປີ 2012 - 2015, ຫວຽດນາມ​ໃຫ້​ຄຳ​ໝັ້ນ​ສັນຍາ​ກຽມ​ຄວາມ​ພ້ອນ​ເປັນ​ຂົວ​ຕໍ່​ ເພື່ອ​ໃຫ້​ເຢຍລະ​ມັນ​ເພີ່ມ​ທະວີ​ການ​ພົວພັນ​ກັບ​ອາ​ຊຽນ.

​ທ່ານ​ນາງ​ອາ​ແຢລາ ​ເມີ​ແກນ ນາ​ຍົກລັດຖະມົນຕີ​ເຢຍລະ​ມັນ ຕີ​ລາຄາ​ວ່າ ວົງ​ຄະນາ​ຍາດ​ຊາວ​ຫວຽດນາມກວ່າ 125.000 ຄົນ​ຢູ່​ເຢຍລະ​ມັນ​ໄດ້​ເຊື່ອມ​ໂຍງ​ເຂົ້າກັບ​ສັງຄົມ​​ເຢຍລະ​ມັນ​ຢ່າງ​ສຳ​ເລັດ​ຜົນ ​ແລະ​ໃຫ້​ຄຳ​ໝັ້ນ​ວ່າ​ ລັດຖະບານ​ເຢຍລະ​ມັນຈະ​ສື​ບຕໍ່​ສ້າງ​ເງື່ອນ​ໄຂອຳນວຍ​ຄວາມ​ສະດວກ​ ໃຫ້ວົງ​ຄະນາ​ຍາດຊາວ​ຫວຽດນາມ ​ດຳລົງ​ຊີວິດ ​ແລະ​ທຳ​ມາ​ຫາ​ກິນ​ຢ່າງ​ເປັນປົກກະຕິ, ປະກອບສ່ວນ​ອັນ​ຕັ້ງໜ້າ​ເຂົ້າ​ໃນ​ວິວັດ​ການ​ພັດທະນາ ​ແລະ​ຄວາມ​ຈະ​ເລີ​ນຖາວອນ​ຂອງປະ​ເທດ​ເຢຍລະ​ມັນ.

ກ່ຽວ​ກັບ​ທະ​ເລ​ຕາ​ເວັນ​ອອກ, ​ທ່ານ​ນາງ​ອາ​ແຢລາ ​ເມີ​ແກນ ນາ​ຍົກລັດຖະມົນຕີ​ເຢຍລະ​ມັນ ຢືນຢັນ​ເຢຍລະ​ມັນ​ສະໜັບສະໜູນຫຼັກ​ໝັ້ນ​ຂອງ​ຫວຽດນາມ ກ່ຽວ​ກັບ​ການ​ແກ້​ໄຂ​ຄວາມ​ພິພາດ​ດ້ວຍ​ສັນຕິ​ວິທີ ບົນ​ພື້ນຖານ​ກົດໝາຍ​ສາກົນ, ອະນຸ​ສັນຍາ​ສະຫະ​ປະຊາ​ຊາດ​ວ່າ​ດ້ວຍ​ກົດໝາຍ​ທະ​ເລ ປີ 1982 (UNCLOS 1982), ຖະ​ແຫຼງການ​ກ່ຽວ​ກັບ​ວິທີການ​ປະພຶດຂອງ​ບັນດາ​ຝ່າຍ​ຢູ່​ທະ​ເລ​ຕາ​ເວັນ​ອອກ (DOC) ​ແລະ​ຖື​ວ່າ ​ນີ້​ແມ່ນ​ແບບ​ວິທີ​ທີ່​ມີ​ປະສິ​ດທິຜົນ​ເພື່ອ​ແກ້​ໄຂ​ຄວາມ​ແຕກ​ຕ່າງ​ກັນ. ທ່ານ​ນາງ​ອາ​ແຢລາ ​ເມີ​ແກນ ນາ​ຍົກລັດຖະມົນຕີ​ເຢຍລະ​ມັນ ຢືນຢັນ​ວ່າ​ເຢຍລະ​ມັນ​ຈະ​ນຳ​ສະ​ເໜີ​ບັນຫາ​ທະ​ເລ​ຕາ​ເວັນ​ອອກ​ທີ່​ກອງ​ປະຊຸມ​ຂັ້ນ​ສຸດ​ຍອດ ASEM 10.

​ໃນ​ວັນ​ດຽວ​ກັນ, ທ່ານ​ນາຍົກລັດຖະມັນ​ຕີ ຫງວຽນ​ເຕິ​ນຢຸງ ໄດ້​ມີ​ການ​ພົບ​ປະ​ກັບ​ທ່ານ​ປະທານາທິບໍດີ​ເຢຍລະ​ມັນ ຈໍ​ຊີ​ມ ກອກ; ພົບ​ປະ​ສົນທະນາ​ກັບ​ທ່ານ​ປະທານ​ສະພາ​ແຫ່ງ​ຊາດ​ເຢຍລະ​ມັນ ນໍ​ເບີດ ລາມ​ເມີດ.../.

ສັງ​ລວມ​ໂດຍ: ​ແຂງ​ງວຽນ



Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ