ວັນອັງຄານ, 22/10/2019
ກອງປະຊຸມສະໄໝສາມັນເທື່ອທີ 8 ສະພາແຫ່ງຊາດຊຸດທີ XIII ແຫ່ງສສ.ຫວຽດນາມ
6/11/2014 15:45' ສົ່ງ ພິມ
ກອງປະຊຸມສະໄໝສາມັນເທື່ອທີ 8 ສະພາແຫ່ງຊາດຊຸດທີ XIII

ທ່ານເລຂາທິການ​ໃຫຍ່ ຫງວຽນ​ຝູຈ້ອງ; ອະດີດເລຂາທິການ​ໃຫຍ່ ທ່ານ​ເລຂາ​ຟຽວ, ທ່ານ​ໂນ​ງດຶກ​ແມ້ງ; ທ່ານ​ປະ​ທານ​ປະ​ເທດ​ເຈືອງ​ເຕິ​ນຊາງ; ທ່ານ​ອະດີດ​ປະທານ​ປະ​ເທດ​ເຈິ່ນດຶກ​ເລືອ​ງ; ທ່ານ​ນາຍົກລັດຖະມົນຕີ​ ຫງວຽນ​ເຕິ​ນຢຸງ; ທ່ານປະທານ​ສະພາ​ແຫ່ງ​ຊາດ ຫງວຽນ​ຊິ​ຮຸ່ງ; ທ່ານ​ອະດີດປະທານ​ສະພາ​ແຫ່ງ​ຊາດ ຫງວຽນ​ວັນ​ອານ; ທ່ານ​ປະທານ​ຄະນະ​ກຳ​ມະຫານ​ສູນ​ກາງ​ແນວ​​ໂຮມປະ​ເທດ​ຊາດ​ຫວຽດນາມ ຫງວຽນ​ທ້ຽນ​ເຍິນ ພ້ອມ​ດ້ວຍ​ບັນດາ​ທ່ານ​ແຂກ ບັນດາ​ນັກ​ປະຕິວັດ​ອະ​ວຸ​ໂສ ບັນດາ​ສະມາ​ຊິກ​ສະພາ​ແຫ່ງ​ຊາດ ບັນດາຜູ້ຕາງໜ້າ​ຄະນະ​ທູຕານຸທູດ ​ແລະ ​ອົງການ​ສາກົນ​ປະຈຳ​ຮ່າ​ໂນ້ຍ ​ໄດ້​ເຂົ້າ​ຮ່ວມ​ໃນ​ວາລະ​ໄຂ​ກອງ​ປະຊຸມ​ຢ່າງ​ສົມ​ກຽດ.

ກ່າວ​ຄຳ​ປາ​ໄສ​ໄຂ​ກອງ​ປະຊຸມ, ຕາງໜ້າ​ຄະນະ​ກຳມະການ​ປະຈຳ​ສະພາ​ແຫ່ງ​ຊາດ, ທ່ານປະທານ​ສະພາ​ແຫ່ງ​ຊາດ ຫງວຽນ​ຊິງ​ຮຸ່ງ ​ໄດ້​ສະ​ແດງ​ຄວາມ​ຂອບ​ອົກ​ຂອບ​ຢ່າງ​ສູງ​ຕໍ່ຄະນະ​ບໍລິຫານ​ງານ​ສູນ​ກາງ ພັກກອມມູນິດຫວຽດນາມ, ສະພາ​ແຫ່ງ​ຊາດ, ພີ່ນ້ອງ​ຮ່ວມ​ຊາດ ​ແລະ​ຜູ້​ເລືອກ​ຕັ້ງ​ໃນ​ທົ່ວ​ປະ​ເທດ ທີ່​ໄດ້​ອຳນວຍ​ເງື່ອນ​ໄຂ​ອັນ​ຈຳ​ເປັນ​ທຸກ​ຢ່າງ ​ເພື່ອ​ກໍ່ສ້າງ​ຫໍ​ສະພາ​ແຫ່​ງຊາດ; ຂອບ​ອົກ​ຂອບ​ໃຈຄວາມ​ຕັ້ງໜ້າ​ພະຍາຍາມ​ຂອງ​ລັດ​ທະ​ບານ, ທ່ານ​ນາຍົກລັດຖະມົນຕີ, ກະຊວງ​ການກໍ່ສ້າງ, ບັນດາ​ກະຊວງ ຂະ​ແໜງ​ການ​ທີ່​ກ່ຽວຂ້ອງ ​ແລະ​ນະຄອນ​ຮ່າ​ໂນ້ຍ; ຂອບ​ອົກ​ຂອບ​ໃຈ​ຄະນະ​ຄຸ້ມ​ຄອງ​ໂຄງການ, ບັນດາ​ບໍລິສັດ​ຮັບ​ເໝົາ ​ແລະ​ພະນັກງານ ກຳມະກອນ ຜູ້​ອອກ​ແຮງ​ງານ​ທັງ​ໝົດ ທີ່​ໄດ້​ເຮັດ​ວຽກ​ຢ່າງຕັ້ງໜ້າທັງ​ວັນ​ແລະ​ຄືນ ​ເພື່ອກໍ່ສ້າງ ​ແລະ​ເປີດ​ນຳ​ໃຊ້​ຫໍ​ສະພາ​ແຫ່ງ​ຊາດ​ຢ່າງ​ທັນ​ການ ຮັບ​ໃຊ້​​ໃຫ້​ແກ່​ກອງ​ປະຊຸມ​ສະ​ໄໝ​ສາມັນ​ເທື່ອ​ນີ້​ໄດ້​ດຳ​ເນີນ​ໄປ​ຢ່າງ​ສະດວກ.

ທ່ານປະທານ​ສະພາ​ແຫ່ງ​ຊາດ ຫງວຽນ​ຊິງ​ຮຸ່ງ ​ໃຫ້​ຄວາມ​ສັງ​ເກດ​ວ່າ ກອງ​ປະຊຸມ​ສະ​ໄໝ​ສາມັນ​ຂອງ​ສະພາ​ແຫ່ງ​ຊາດ​ເທື່ອ​ນີ້​ ​ດຳ​ເນີນ​​ໄປໃນ​ເວລາທີ່​ເສດຖະກິດ​ພວມ​ຟື້ນ​ຟູ​ຄືນ​ໃໝ່ ​ແຕ່​ຍັງ​ຊ້າ; ຄວາມ​ສະຫງົບ​ດ້ານ​ການ​ເມືອງ, ການ​ປະ​ທະ​ກັນ​ດ້ວຍ​ອາວຸດ, ​ໂລກລະບາດ​ຢູ່​ບາງ​ແຫ່ງ​ຜັນ​ປ່ຽນ​ຢ່າງ​ສັບສົນ ​ໄດ້​ສົ່ງ​ຜົນ​ກະທົບ​ຫຍໍ້​ທໍ້​ເຖິງ​ຊີວິດ​ເສດຖະກິດ - ການ​ເມືອງຢູ່​ໃນ​ພາກ​ພື້ນ ​ແລະ​ໃນ​ທົ່ວ​ໂລກ. ຢູ່​ໃນ​ປະ​ເທດ, ​ເສດຖະກິດ​ມະຫາ​ພາກ​ເປັນ​ປົກກະຕິ, ​ໄພ​ເງິນ​ເຟີ້​ຖືກ​ຈຳກັດ, ​ເສດຖະກິດ​ຫັນປ່ຽນ​ຕາມ​ທິດ​ຕັ້ງໜ້າ, ການ​ເຕີບ​ໂຕ​ເສດຖະກິດ​ພວມ​ຢູ່​ໃນ​ທ່ວງທ່າ​ແຫ່ງ​ການ​ຟື້ນ​ຟູ. ​ເຖິງຢ່າງ​ນັ້ນ​ກໍ່ຕາມ, ສະພາບ​ການ​ເສດຖະກິດ - ສັງຄົມ ​ຍັງ​ມີ​ຈຸດ​ອ່ອນ​ແລະຄວາມ​ຫຍຸ້ງຍາກຫຼາຍ​ຢ່າງ ທີ່​ນາບ​ຂູ່​ການ​ພັດທະນາ​ແບບ​ຍືນ​ຍົງ​ຂອງ​ປະ​ເທດ. ສະພາບ​ການ​ດັ່ງກ່າວ ຮຽກຮ້ອງ​ໃຫ້​ທົ່ວ​ພັກ ທົ່ວ​ປວງ​ຊົນ ​ແລະ​ທົ່ວກອງທັບຫວຽດນາມ ຕ້ອງ​ມີ​ຄວາມ​ຕັດສິນ​ໃຈ​ສູງ​ກວ່າ​ອີກ, ມີ​ບັນດາ​ແຜນ​ນະ​ໂຍບາຍ ວິທີ​ແກ້​ອັນ​ພື້ນຖານ ຄົບ​ຊຸດ ​ເພື່ອ​ສືບ​ຕໍ່​ຮັກສາ​ເສດຖະກິດ​ມະຫາ​ພາກ​ໃຫ້​ມີ​ຄວາມ​ໝັ້ນ​ທ່ຽງ, ກວດກາ​​ແກ້​ໄຂໄພ​ເງິນ​ເຟີ້, ຟື້ນ​ຟູ​ທ່ວງທ່າ​ເຕີບ​ໂຕ… ສູ້​ຊົນ​ປະຕິ​ບັດ​ແຜນ​ພັດທະນາ​ເສດຖະກິດ - ສັງ​ຄົນ​ປີ 2014 ​ແລະ 5 ປີ 2011 – 2015 ຢ່າງ​ສຳ​ເລັດ​ມີ​ໄຊ, ສ້າງ​ທ່ວງທ່າ​ພັດທະນາ​ຢ່າງ​ໄວວາ, ໝັ້ນ​ທ່ຽງ​ໃນ​ຊຸມ​ປີ​ຕໍ່​ໄປ.

ຕາມ​ລະບຽບ​ວາລະ​ທີ່​ໄດ້​ວາງ​ອອກ, ກອງ​ປະຊຸມ​ສະ​ໄໝ​ສາມັນ​ເທື່ອ​ທີ່ 8 ຈະ​ເຮັດ​ວຽກ​ໃນ​ເວລາ 35 ວັນ. ສະພາ​ແຫ່ງ​ຊາດຈະ​ໃຊ້​ເວລາ​ຫຼາຍ (ປະມານ 70%) ​ໃຫ້​ແກ່​ວຽກ​ງານ​ກໍ່ສ້າງ​ກົດໝາຍ, ກວດຄືນ ປັບປຸງ ​ເພີ່ມ​ເຕີມ ​ແລະ​ປະກາດ​ໃຊ້​​ເອກະສານກົດໝາຍສະບັບ​ຕ່າງໆ ​ເພື່ອນຳ​ປະຕິບັດ​ລັດຖະທຳ​ມະນູນປີ 2013 ​ໃນ​ຊີວິດ​ຕົວ​ຈິງ​ໄດ້​ໂດຍ​ໄວ. ລະອຽດ​ຄື, ສະພາ​ແຫ່ງ​ຊາດ​ຈະ​ພິຈາລະນາ ຮັບຮອງ​ຜ່ານຮ່າງ​ກົດໝາຍ 18 ສະບັບ (ກົດໝາຍ​ວ່າ​ດ້ວຍການຈັດ​ຕັ້ງ​ສະພາ​ແຫ່ງ​ຊາດ​ສະບັບ​ປັບປຸງ, ກົດໝາຍ​ວ່າ​ດ້ວຍການຈັດ​ຕັ້ງ​ໄອ​ຍະ​ການ​ປະຊາຊົນ​ສະບັບປັບປຸງ, ກົດໝາຍ​ວ່າ​ດ້ວຍການ​ປະກັນ​ໄພ​ສັງຄົມ​ສະບັບ​ປັບປຸງ, ກົດໝາຍ​ວ່າ​ດ້ວຍອາຄານ​ສະບັບປັບປຸງ, ກົດໝາຍ​ວ່າ​ດ້ວຍການ​ທຸລະ​ກິດ​ອະສັງຫາລິມະ​ຊັບ​ສະບັບປັບປຸງ, ກົດໝາຍ​ວ່າ​ດ້ວຍການ​ລົງທຶນ​ສະບັບປັບປຸງ, ກົດໝາຍ​ວ່າ​ດ້ວຍວິ​ສາ​ຫະກິດ​ສະບັບ​ປັບປຸງ, ກົດໝາຍ​ວ່າ​ດ້ວຍການ​ສຶກສາ​ວິຊາ​ອາຊີບ, ກົດໝາຍ​ວ່າ​ດ້ວຍການ​ປັບປຸງ ​ເພີ່ມ​ເຕີມ​ບາງ​ມາດຕາ​ໃນກົດໝາຍການ​ເດີນ​ອາກາດ​ພົນລະ​ເຮືອນຫວຽດນາມ, ກົດໝາຍ​ວ່າ​ດ້ວຍການ​ປັບປຸງ ​ເພີ່ມ​ເຕີມ​ບາງມາດຕາ​ໃນກົດໝາຍ​ວ່າ​ດ້ວຍການ​ປະຕິບັດ​ຄະດີ​ແພ່ງ, ກົດໝາຍ​ວ່າ​ດ້ວຍບັດປະຈຳຕົວ​ພົນລະ​ເມືອງ, ກົດໝາຍ​ວ່າ​ດ້ວຍການ​ປັບປຸງ ​ເພີ່ມ​ເຕີມ​ບາງ​ມາດຕາ​ໃນກົດໝາຍ​ວ່າ​ດ້ວຍນາຍ​ທະຫານ​ກອງທັບ​ປະຊາຊົນ​ຫວຽດນາມ, ກົດໝາຍ​ວ່າ​ດ້ວຍຕຳຫຼວດ​ປະຊາຊົນ​ສະບັບ​ປັບປຸງ, ກົດໝາຍ​ວ່າ​ດ້ວຍສຳມະ​ໂນ​ຄົວ, ກົດໝາຍ​ວ່າ​ດ້ວຍການ​ຄຸ້ມ​ຄອງ ນຳ​ໃຊ້​ທຶນ​ຂອງ​ລັດ​ທີ່​ລົງທຶນ​ເຂົ້າ​ໃນ​ການ​ຜະລິດ​ທຸລະ​ກິດ, ກົດໝາຍ​ວ່າ​ດ້ວຍການ​ປັບປຸງ ​ເພີ່ມ​ເຕີມ​ບາງ​ມາດຕາ​ໃນກົດໝາຍ​ວ່າ​ດ້ວຍພາສີ​ການ​ບໍລິ​ໂພ​ກພິ​ເສດ, ກົດໝາຍ​ວ່າ​ດ້ວຍການ​ປັບປຸງ ​ເພີ່ມ​ເຕີມ​ບາງ​ມາດຕາ​ໃນບັນດາກົດໝາຍພາສີ​ອາກອນ) ​ແລະ​ຮ່າງ​ມະຕິ​ຕົກລົງ 3 ສະບັບ (ມະຕິ​ຂອງ​ສະພາ​ແຫ່ງ​ຊາດ​ວ່າ​ດ້ວຍການ​ເອົາ​ຄະ​ແນນ​ສຽງ​ໄວ້​ວາງ​ໃຈ, ການ​ລົງ​ຄະ​ແນນ​ສຽງ​ໄວ້​ວາງ​ໃຈຕໍ່​ກັບ​ຜູ້​ດຳລົງ​ຕຳ​ແໜ່​ງ​ ໂດຍ​ສະພາ​ແຫ່ງ​ຊາດ, ສະພາ​ປະຊາຊົນ​ເລືອກ​ຕັ້ງ​ຂຶ້ນ ຫຼື​ອະ​ນຸມັດຮັບຮອງ ສະ​ບັບປັບປຸງ; ມະຕິ​ຂອງ​ສະພາ​ແຫ່ງ​ຊາດ​​ໃຫ້​ສັດຕະຍາບັນອະນຸ​ສັນຍາ​ສະຫະ​ປະຊາ​ຊາດ​ວ່າ​ດ້ວຍ​ການ​ຕ້ານ​ການ​ທໍລະມານ ​ແລະ​ບັນດາ​ຮູບ​ການ​ປະ​ພຶກ ຫຼື​ການ​ລົງ​ໂທດ​​ແບບປ່າ​ເຖື່ອນ​ໄຮ້​ມະນຸດສະທຳ ຫຼືທຳລາຍ​ກຽດສັກ​ສີມະນຸດ; ມະຕິ​ຂອງ​ສະພາ​ແຫ່ງ​ຊາດ​​ໃຫ້​ສັດຕະຍາ​ບັນອະນຸ​ສັນຍາ​ສະຫະ​ປະຊາ​ຊາດ​ວ່າ​ດ້ວຍສິດ​ຂອງ​ຜູ້​ພິການ); ​ໃຫ້​ຄວາມ​ຄິດ​ຄວາມ​ເຫັນ​ປະກອບ​ເຂົ້າ​ໃນ​ຮ່າງ​ກົດ​ໝານ​ອື່ນອີກ 12 ສະບັບ. ​​ເປັນ​ອັນວ່າ, ​ກອງ​ປະຊຸມ​ສະ​ໄໝ​ສາມັນ​ເທື່ອນີ້​ຈະ​ພິຈາລະນາ ຮັບຮອງ, ​ໃຫ້​ຄວາມ​ຄິດ​ເຫັນ​ໃນ​ຮ່າງກົດໝາຍ​​ເປັນ​ຈຳນວນ​ຫຼາຍ​ກ່ວາທຽບ​ກັບກ​ອງປະຊຸມກ່ອນ​ໜ້າ​ນີ້. ​

ໃນ​ກອງ​ປະຊຸມ​ນີ້, ສະພາ​ແຫ່ງ​ຊາດ​ຕາງໜ້າ​ຜູ້​ປ່ອນ​ບັດ​ເລືອກ​ຕັ້ງ ​ແລະ​ພີ່ນ້ອງ​ຮ່ວມ​ຊາດ​ໃນ​ທົ່ວ​ປະ​ເທດ ​ເພື່ອ​ປະຕິບັດ​ການ​ຕີ​ລາຄາ​ຄວາມ​ເຊື່ອ​ຖື​ຕໍ່​ກັບ​ບັນດາ​ຖານະ​ຕຳ​ແໜ່​ງນຳພາ​ຫຼັກ​ແຫຼ່ງຢູ່​ໃນກົງຈັກ​ແຫ່ງ​ລັດ. ນີ້​ແມ່ນ​ຄັ້ງ​ທີ​ສອງທີ່​ສະພາ​ແຫ່ງ​ຊາດ​ປະຕິບັດ​ໜ້າ​ທີ່​ຮັບຜິດຊອບ​ອັນ​ສຳຄັນ​ນີ້.

ສະພາ​ແຫ່ງ​ຊາດຈະ​ໃຊ້​ເວລາ​ເພື່ອ​ພິຈາລະນາ​ບົດລາຍ​ງານຜົນງານ​ການ​ປະຕິບັດ​ໜ້າ​ທີ່​ພັດທະນາ​ເສດຖະກິດ - ສັງຄົມ ​ແລະ​ງົບ​ປະມານ​ແຫ່ງ​ລັດ​ປີ 2014; ພິຈາລະນາ​ແຜນ​ພັດທະນາ​ເສ​ດຖະກິດ - ສັງຄົມ, ​ແຜນງົບປະມານ​ແຫ່ງ​ລັດ ​ແລະ ​ແຜນການ​ຈັດ​ແບ່ງ​ງົບປະມານ​ສູນ​ກາງ​ປີ 2015.

ສະພາ​ແຫ່ງ​ຊາດກໍ່​ຈະ​ດຳ​ເນີນ​ການ​ຕິດຕາມ​ກວດກາ​ສູງ​ສຸດກ່ຽວ​ກັບ​ບັນຫາ​ສະ​ເພາະ “ການ​ປະຕິບັດ​ແຜນ​ຈັດ​ວາງ​ໂຄງ​ປະກອບ​ເສດຖະກິດ​ຄືນ​ໃໝ່​ ໃນ​ຂົງ​ເຂດການ​ລົງທຶນ​ຂອງພາກ​ລັດ, ວິ​ສາ​ຫະກິດ​​ແຫ່ງລັດ ​ແລະ​ລະບົບທະນາຄານ ຕາມ​ມະຕິ​ຂອງສະພາ​ແຫ່ງ​ຊາດວ່າ​ດ້ວຍ​ແຜນ​ພັດທະນາ​​ເສດຖະກິດ - ສັງຄົມ 5 ​ປີ 2011-2015”; ຟັງ​ລາຍ​ງານ​ສັງ​ລວມຄວາມ​ຄິດ​ຄວາມ​ເຫັນ ​ແລະ ຄຳ​ສະ​ເໜີ​ແນະ​ຂອງ​ຜູ້​ເລືອກ​ຕັ້ງ, ​ລາຍ​ງານ​ໝາກຜົນ​ແຫ່ງ​ການ​ຕິດ​ຕາມກວດກາ​ການ​ແກ້​ໄຂຄຳສະ​ເໜີ​ແນະ​ຂອງ​ຜູ້​ເລືອກ​ຕັ້ງ ທີ່​ຝາກ​ໃຫ້​ກອງ​ປະຊຸມ​ສະ​​ໄໝ​ສາມັນ​ເທື່ອ​ທີ 7, ລາຍ​ງານວຽກ​ງານ​ຂອງ​ປະທານ​ສານ​ປະຊາຊົນ​ສູງ​ສຸດ, ​ໄອ​ຍະ​ການ​ປະຊາຊົນ​ສູງ​ສຸດ, ລາຍ​ງານ​ຂອງ​ລັດຖະບານ​ກ່ຽວ​ກັບ​ວຽກ​ງານ​ປ້ອງ​ກັນ​ແລະ​ຕ້ານ​ການສໍ້ລາດ​ບັງ​ຫຼວງ, ການປະຕິບັດ​ຄະດີ, ການປ້ອງ​ກັນແລະ​ຕ້ານການລະ​ເມີດ​ກົດໝາຍ ​ແລະ ອາ​ຊະຍະ​ກຳ, ​ໄພ​ສັງຄົມ...

ສະພາ​ແຫ່ງ​ຊາດກໍ່​ຈະ​ໃຊ້​ເວລາ​ເພື່ອ​ພິຈາລະນາ​ໂຄງການ​ປ່ຽນ​ແປງ​ໃໝ່​ຫຼັກສູດ​ການ​ສຶກສາ ​ແລະ​ປຶ້ມ​ຫຼັກສູດສາມັນ​ສຶກສາ, ​ແຜນ​ນະ​ໂຍບາຍ​ລົງທຶນ​ກໍ່ສ້າງ​ເດີນ​ບີນສາກົນ​ລອງ​ແທ່ງ ​ແລະ​ພິຈາລະນາ ຕັດສິນ​ຕົກ​ລົງບັນຫາ​ທີ່​ສຳຄັນອື່ນ​ອີກ​ຈຳນວນ​ໜຶ່ງ.

​ໃນ​ວາລະ​ໄຂ​ກອງ​ປະຊຸມ, ສະພາ​ແຫ່ງ​ຊາດ​ຈະໄດ້​ຮັບ​ຟັງ ທ່ານ​ນາຍົກລັດຖະມົນຕີ​ ຫງວຽນ​ເຕິ​ນຢຸງ ອ່ານ​ລາຍ​ງານ​ຂອງ​ລັດຖະບານກ່ຽວ​ກັບຜົນງານ​ການ​ປະຕິບັດ​ແຜນ​ພັດທະນາ​ເສດຖະກິດ - ສັງຄົມ​ປີ 2013, ແຜນ​ພັດທະນາ​ເສດຖະກິດ - ສັງຄົມ​ປີ 2014; ສະພາບ​ການ​ປະຕິບັດແຜນ​ພັດທະນາ​ເສດຖະກິດ - ສັງຄົມ​ 5 ປີ (2011-2015): ຜົນງານການ​ປະຕິບັດ​ແຕ່​ປີ 2011 ​ເຖິງ​ປັດຈຸບັນ ​ແລະ ທິດ​ທາງ, ວິທີ​ການ​ປະຕິບັດ​ບັນດາ​ລະດັບ​ຄາດໝາຍ​ເສດຖະກິດ - ສັງຄົມ​ຮອດ​ປີ 2015; ທ່ານ​ປະທານ​ຄະນະ​ກຳ​ມະການ​ສູນ​ກາງ​ແນວ​​ໂຮມປະ​ເທດ​ຊາດ​ຫວຽດນາມ ຫງວຽນ​ທ້ຽນ​ເຍິນ ອ່ານ​ລາຍ​ງານ​ສັງ​ລວມຄວາມ​ຄິດ​ຄວາມ​ເຫັນ, ຄຳ​ສະ​ເໜີ​ແນະ​ຂອງ​ຜູ້​ປ່ອນ​ບັດ​ເລືອກ​ຕັ້ງ.

ກອງ​ປະຊຸມ​​ເທື່ອນີ້​ຈະ​ມີ​ການຖ່າຍ​ທອດສົດ 14 ຄາບ (​ຫຼາຍ​ກວ່າ​ກອງ​ປະຊຸມ​ຄັ້ງ​ກ່ອນ 3 ຄາດ) ຕາມ​​ວິທະຍຸ​ໂທລະພາບ​ແລະ​ວິທະຍຸ​ກະ​ຈ່າຍ​ສຽງ​ຊ່ອງ​ຕ່າງໆ (ຊ່ອງ VTV1 ຂອງສະຖານີ​ວິທະຍຸ​​ໂທລະພາບ​ຫວຽດນາມ ​ແລະ ຊ່ອງ​ຂ່າວ - ການ​ເມືອງ - ສັງ​ລວມ (VOV1) ຂອງ​ສະຖານີ​ວິທະຍຸ​ກະ​ຈ່າຍ​ສຽງ​ຫວຽດນາມ) ​ເພື່ອ​ໃຫ້​ຜູ້​ປ່ອນ​ບັດ​ເລືອກ​ຕັ້ງ ​ແລະ​ປະຊາຊົນ​ໃນ​ທົ່ວ​ປະ​ເທດ​ໄດ້​ຕິດຕາມ​ໂດຍ​ກົງ./.

ສັງ​ລວມ​ໂດຍ:

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ