ວັນອັງຄານ, 22/10/2019
ແກ້ໄຂບັນຫາຢູ່ທະເລມີຄວາມໝາຍສຳຄັນ ຕໍ່ກັບຫວຽດນາມ - ຈີນ
7/11/2014 16:10' ສົ່ງ ພິມ

ຕອນ​ແລງ​ວັນ​ທີ 27 ຕຸລາ, ຢູ່​ທີ່​ສຳນັກງານ​ສູນ​ກາງ​ພັກ, ທ່ານ​ຫງວຽນ​ຝູຈ້ອງ ເລຂາທິການ​ໃຫຍ່ສູນ​ກາງ​ພັກ​ກອມ​ມູນິດ​ຫວຽດນາມ ​ໄດ້​ໃຫ້​ກຽດ​ຕ້ອນຮັບທ່ານຢາງ ​ເຄັ້ຍຈີ ສະມາຊິກ​ສະພາ​ລັດຖະມົນຕີ​ຈີນ.

ທ່ານ​ຫງວຽນ​ຝູຈ້ອງ ເລຂາທິການ​ໃຫຍ່ ຕ້ອນຮັບທ່ານຢາງ ​ເຄັ້ຍຈີ
ສະມາຊິກ​ສະພາ​ລັດຖະມົນຕີ​ຈີນ
(ພາບ: TTXVN)

ທ່ານຢາງ ​ເຄັ້ຍຈີ ​ເປັນ​ກຽດ​ສົ່ງ​ຄຳ​ຢ້ຽມຢາມ​ຖາມ​ຂ່າວ​ຂອງທ່ານ​ສີ ຈິ້ນ​ຜິ​ງ ​ເລຂາທິການ​ໃຫຍ່ ປະທານ​ປະ​ເທດ​ຈິນ ມາ​ຍັງທ່ານ​ເລຂາທິການ​ໃຫຍ່ ຫງວຽນ​ຝູຈ້ອງ ​ແລະ​ບັນດາ​ການ​ນຳ​ອື່ນ​ຂອງ​ພັກ-ລັດ​ຫວຽດນາມ; ລາຍ​ງານ​ໂດຍ​ຫຍໍ້​ຜົນງານ​ຕ່າງໆ​ທີ່​ບັນລຸ​ໄດ້​ໃນ​ກອງ​ປະຊຸມ​ຄັ້ງ​ທີ 7 ຄະນະ​ກຳມະການ​ຊີ້​ນຳ​ການ​ຮ່ວມ​ມື​ສອງ​ຝ່າຍ​ຫວຽດນາມ - ຈີນ, ສະ​ແດງ​ຄວາມ​ປະສົງ ​ແລະ​ຄວາມ​ຕັດສິນ​ໃຈ​ພ້ອມ​ກັບ​ຝ່າຍຫວຽດນາມຜັນ​ຂະຫຍາຍປະຕິບັດ​ຢ່າງ​ມີ​ປະສິດທິ​ຜົນ ບັນດາ​ຂໍ້​ຕົກລົງ​ທີ່​ການ​ນຳ​ຂັ້ນ​ສູງ​ຂອງ​ສອງ​ປະ​ເທດ​ໄດ້​​ເຫັນ​ດີຕົກລົງກັນ ​ເພື່ອ​​ປະກອບສ່ວນເຮັດ​ໃຫ້ການ​ພົວພັນ​ມິດຕະພາບ ການ​ຮ່ວມ​ມື​ລະຫວ່າງ​ຈີນ - ຫວຽດນາມ ຂະຫຍາຍຕົວ​ຈົບງາມ​ຢ່າງ​ບໍ່​ຢຸດ​ຢັ້ງ.

ທ່ານ​ເລຂາທິການ​ໃຫຍ່ ຫງວຽນ​ຝູຈ້ອງ ຊົມ​ເຊີຍ ​ແລະ​ຕີ​ລາຄາ​ສູງ​ຕໍ່ບັນດາຜົນງານ​ອັນ​ຕັ້ງໜ້າທີ່​ກອງ​ປະຊຸມບັນລຸ​ໄດ້​, ພ້ອມ​ກັນ​ນັ້ນ ​ກໍ່​ສະ​ເໜີ​ໃຫ້ຄະນະ​ກຳມະການຊີ້​ນຳ​ການ​ຮ່ວມ​ມື​ສອງ​ຝ່າຍ ຕ້ອງ​ສືບ​ຕໍ່​ເສີມ​ຂະຫຍາຍ​ເປັນ​ຢ່າງ​ດີ​ບົດບາດ​ກຳນົດ​ທິດ, ປະກອບສ່ວນ​ຕົວ​ຈິງ​​ເຂົ້າ​ໃນ​ການຊຸກຍູ້​ການ​ພົວພັນ​ມິດຕະພາບ ​ແລະ ການ​ຮ່ວມ​ມື​ລະຫວ່າງ​ສອງ​ປະ​ເທດ, ​ເຮັດ​ໃຫ້ການ​ພົວພັນ​ຄູ່​ຮ່ວມ​ຍຸດ​ທະ​ສາດ​ຮອບດ້ານ​ຫວຽດນາມ - ຈີນ ຂະຫຍາຍຕົວ​ຢ່າງ​ໝັ້ນ​ທ່ຽງ ສົດ​ໃສ.

​ໃນ​ວັນ​ດຽວ​ກັນ, ຢູ່​ທີ່ທຳນຽບປະທານປະ​ເທດ, ທ່ານ​ເຈືອງ​ເຕິ​ນຊາງ ​ປະທານ​ປະ​ເທດ ກໍ່​ໄດ້​ໃຫ້​ກຽດ​ຕ້ອນຮັບທ່ານຢາງ ​ເຄັ້ຍຈີ ສະມາຊິກ​ສະພາ​ລັດຖະມົນຕີ​ຈີນ. ທ່ານ​ປະທານ​ປະ​ເທດ​ເນັ້ນ​ວ່າ ການ​ເພີ່ມ​ທະວີ​ຄວາມ​ໄວ້​ວາງ​ໃຈ​ການ​ເມືອງ​ລະຫວ່າງ​ສອງ​ຝ່າຍມີ​ຄວາມ​ໝາຍ​ສຳຄັນ​ໃນ​ການຮັກສາ​ການ​ພົວພັນ​ລະຫວ່າງ​ສອງ​ພັກ, ສອງ​ປະ​ເທດ​ໃຫ້​ຂະຫຍາຍຕົວ​ຢ່າງ​ສົດ​ໃສ ​ແລະ​ໝັ້ນ​ທ່ຽງ.

ທ່ານ​ເຈືອງ​ເຕິ​ນຊາງ ​ປະທານ​ປະ​ເທດ ຕ້ອນຮັບທ່ານຢາງ ເຄັ້ຍຈີ ສະມາຊິກສະພາລັດຖະມົນຕີຈີນ
ທີ່​ກຳລັງ​ຢູ່​ຢ້ຽມຢາມ ​ແລະ​ເຮັດ​ວຽກ​ທີ່​ຫວຽດນາມ (ພາບ: TTXVN)

     ທ່ານຢາງ ​ເຄັ້ຍຈີ ສະມາຊິກ​ສະພາ​ລັດຖະມົນຕີ​ຈີນ
ຢືນຢັນ​ພັກແລະ​ລັດຈີນ​ໃຫ້​ຄວາມ​ສຳຄັນ ​ແລະ ມຸ່ງ​ຫວັງ​ພັດທະນາ​ການ​ພົວພັນ​ເພື່ອນ​ບ້ານ​​ໃກ້​ຄຽງ​ມິດຕະພາບ, ການ​ຮ່ວມ​ມື​ຮອບດ້ານ​ກັບ​ຫວຽດນາມ ສອດຄ່ອງ​ກັບ​ຜົນ​ປະ​ໂຫຍ​ດອັນ​ພື້ນຖານ​ຂອງ​ປະຊາຊົນ​ສອງ​ປະ​ເທດ, ມີ​ຄວາມ​ໝາຍ​ຕັ້ງໜ້າ​ຕໍ່​ກັບ​ສະຖຽນ​ລະ​ພາບ ​ແລະ​ການ​ພັດທະນາ​ຂອງ​ພາກ​ພື້ນ.

ກ່ອນ​ນັ້ນ, ທ່ານ​​ຟ້າ​ມບິ່ງ​ມິ​ງ ຮອງ​ນາຍົກລັດຖະມົນຕີ ລັດຖະມົນຕີ​ວ່າການກະຊວງ​ຕ່າງປະ​ເທດ​ຫວຽດນາມ ​ແລະ​ ທ່ານຢາງ ​ເຄັ້ຍຈີ ສະມາຊິກ​ສະພາ​ລັດຖະມົນຕີ​ຈີນ ​ໄດ້​ເປັນ​ປະທານ​ຮ່ວມ​ກອງ​ປະຊຸມ​ຄັ້ງ​ທີ 7 ຄະນະ​ກຳມະການ​ຊີ້​ນຳ​ການ​ຮ່ວມ​ມື​ສອງ​ຝ່າຍຫວຽດນາມ - ຈີນ.


ທ່ານ​​ຟ້າ​ມບິ່ງ​ມິ​ງ ຮອງ​ນາຍົກລັດຖະມົນຕີ ລັດຖະມົນຕີ​ວ່າການກະຊວງ​ຕ່າງປະ​ເທດ​ຫວຽດນາມ
ຕ້ອນຮັບ
ທ່ານຢາງ ​ເຄັ້ຍຈີ ສະມາຊິກ​ສະພາ​ລັດຖະມົນຕີ​ຈີນ (ພາບ: TTXVN)

ໃນ​ທີ່​ກອງ​ປະຊຸມ, ສ​ອງຝ່າຍ​ໄດ້ທົບ​ທວນສະພາບ​ການ​ຮ່ວມ​ມື​ໃນ​ດ້ານ​ຕ່າງໆ ລະຫວ່າງ​ສອງ​ປະ​ເທດ​ນັບ​ແຕ່ກອງ​ປະຊຸມ​ຄັ້ງ​ທີ 6 ຄະນະ​ກຳມະການ​ຊີ້​ນຳ​ການ​ຮ່ວມ​ມື​ສອງ​ຝ່າຍຫວຽດນາມ - ຈີນ ​ແຕ່​ເດືອນ​ພຶດສະພາ 2013 ມາ​ເຖິງ​ປັດຈຸບັນ, ສະ​ເໜີ​ຄວາມ​ເຫັນ​ຊີ້​ນຳ​ກ່ຽວ​ກັບ​ຈຸດ​ໜັກຂອງ​ການ​ຮ່ວມ​ມື​ໃນ​ຕໍ່ໜ້າ. ສອງ​ຝ່າຍ​ໃຫ້​ທັດສະນະ​ວ່າ ການ​ພົວພັນ​ມິດຕະພາບຫວຽດນາມ - ຈີນ ຂະຫຍາຍຕົວ​ຢ່າງ​ສົດ​ໃສ ໝັ້ນ​ທ່ຽງ​ແມ່ນ​ສອດຄ່ອງ​ກັບ​ຄວາມ​ປາຖະໜາ ​ແລະ ຜົນ​ປະ​ໂຫຍ​ດອັນ​ພື້ນຖານ​ຂອງ​ປະຊາຊົນ​ສອງ​ປະ​ເທດ, ​ເປັນ​ຜົນ​ດີ​ໃຫ້​ແກ່​ສັນຕິ​ພາບ ສະຖຽນ​ລະ​ພາບ ​ແລະ ການ​ພັດທະນາ​ຂອງ​ພາກ​ພື້ນ.

ສອງ​ຝ່າຍ​ຈະ​ພ້ອມ​ກັນ​ຕັ້ງໜ້າ​ພະຍາຍາມ​ປະຕິບັດ​ບັນດາ​ຂໍ້​ຕົກລົງ ​ແລະ​ຄວາມ​ຮັບ​ຮູ້​ລວມຂອງ​ການ​ນຳ​ຂັ້ນ​ສູງ​ຂອງ​ສອງ​ປະ​ເທດ ​ຢ່າງ​ເຂັ້ມ​ງວດ, ປັບປຸງ​ແລະ​ຊຸກຍູ້​ຢ່າງ​ບໍ່​ຢຸດ​ຢັ້ງ​​ ເຮັດ​ໃຫ້ການ​ພົວພັນ​ຄູ່​ຮ່ວມ​ຍຸດ​ທະ​ສາດ​ຮອບດ້ານລະຫວ່າງຫວຽດນາມ - ຈີນ ນັບ​ມື້ຂະຫຍາຍຕົວ​ເຂົ້າ​ສູ່​ລວງ​ເລິກ. 

ສອງ​ຝ່າຍ​ເຫັນ​ດີ​ເປັນ​ເອກະ​ພາບ​ສ້າງ​ເງື່ອນ​ໄຂ​ອຳນວຍ​ຄວາມ​ສະດວກ​ເພື່ອ​ຊຸກຍູ້​ການ​ສັງ​ສັນ​ຮ່ວມ​ມື​ລະຫວ່າງ​ສອງ​ປະ​ເທດ; ຍູ້​ແຮງ​ການ​ປະຕິບັດ​ໂຄງການ​ຜັນ​ຂະຫຍາຍ​ການ​ພົວພັນ​ຄູ່​ຮ່ວມ​ ຮ່ວມມື​ຍຸດ​ທະ​ສາດຫວຽດນາມ - ຈີນ​ໃຫ້​ໄດ້​ຢ່າງ​ມີ​ປະສິດທິ​ຜົນ; ຮີບ​ສ້າງ​ຕັ້ງໜ່ວຍ​ງານ​ສະ​ເພາະ​ກິດ​ກ່ຽວ​ກັບ​ການ​ຮ່ວມ​ມື​ດ້ານ​ໂຄງ​ສ້າງ​ພື້ນຖານ ​ແລະໜ່ວຍ​ງານ​ສະ​ເພາະ​ກິດ​ກ່ຽວ​ກັບ​ການ​ຮ່ວມ​ມື​ດ້ານ​ເງິນຕາ ​ເພື່ອ​ເພີ່ມ​ທະວີ​ການ​ຮ່ວມ​ມື​ໃນ​ບັນດາ​ຂົງ​ເຂດ​ທີ່​ກ່ຽວຂ້ອງ. 

ສອງ​ຝ່າຍ​ເຫັນ​ດີ​ເປັນ​ເອກະ​ພາບປະຕິບັດ​ຢ່າງ​ເຂັ້ມ​ງວດ 3 ​ເອກະສານ​ກ່ຽວ​ກັບ​ຊາຍ​ແດນ​ເທິງ​ໜ້າດິນລະຫວ່າງ​ຫວຽດນາມ - ຈີນ, ສົມທົບ​ກັນ​ແກ້​ໄຂ​ຢ່າງ​ທັນ​ການ​ບັນດາ​ບັນຫາ​ເກີດ​ຂຶ້ນ​ໃນ​ວຽກ​ງານ​ຄຸ້ມ​ຄອງ​ຊາຍ​ແດນ. ສອງ​ຝ່າຍ​ໃຫ້​ທັດສະນະ​ວ່າ ​ແກ້​ໄຂ​ຢ່າງ​ເໝາະ​ສົມ​ບັນຫາ​ເທິງ​ທະ​ເລ ມີ​ຄວາມ​ໝາຍ​​ສຳຄັນ​ຕໍ່​ກັບ​ການ​ພົວພັນ​ລະຫວ່າງ​ສອງ​ປະ​ເທດ. 

ສອງ​ຝ່າຍ​ໃຫ້​ຄຳ​ໝັ້ນ​ສັນຍາ​ຈະ​ປະຕິບັດຢ່າງ​ເຂັ້ມ​ງວດ​ຄວາມ​ຮັບ​ຮູ້​ລວມຂອງ​ການ​ນຳ​ຂັ້ນ​ສູງ​ຂອງ​ສອງ​ພັກ ສອງ​ລັດ, ອີງ​ໃສ່ “ຂໍ້​ຕົກລົງ​ກ່ຽວ​ກັບ​ບັນດາ​ຫຼັກການ​ອັນ​ພື້ນຖານທີ່​ຊີ້​ນຳ​ແກ້​ໄຂ​ບັນຫາ​ເທິງ​ທະ​ເລ​ລະຫວ່າງຫວຽດນາມ - ຈີນ” ​ເພື່ອ​ຊຸກຍູ້​ບັນດາ​ກົນ​ໄກ​ເຈລະຈາ​ກ່ຽວ​ກັບ​ບັນຫາ​ເທິງ​ທະ​ເລ. ອີງ​ໃສ່ຫຼັກການ ງ່າຍ​ເຮັດ​ກ່ອນ ຍາກ​ເຮັດຕາມ​ຫຼັງ, ຜັນ​ຂະຫຍາຍ​ໂດຍ​ໄວ​ວຽກ​ງານ​ສຳ​ຫຼວດລວມ, ສ້າງ​ພື້ນຖານ​ໃຫ້​ແກ່​ການ​ຊຸກຍູ້​ການ​ເຈລະຈາ​ກຳນົດ​ແບ່ງ​ເຂດ​ທະ​ເລ​ຢູ່​ນອກ​ອ່າວບັກ​ໂບ້ (Gulf of Tonkin) ​ໄປ​ຄຽງ​ຄູ່ກັບ​ການ​ຮ່ວມ​ມື​ພ້ອມ​ກັນ​ພັດທະນາ​ເຂດ​ທະ​ເລ​ແຫ່ງ​ນີ້ ຄື​ດັ່ງ​ທີ່ທ່ານ​ຫລີ່ ​ເຄີ້ສຽງ ນາຍົກລັດຖະມົນຕີຈີນ ​ໄດ້​​ເຫັນ​ດີເປັນ​​ເອກະ​ພາບ​ກັບ ທ່ານ​ນາຍົກລັດຖະມົນຕີ ຫງວຽນ​ເຕິ​ນຢຸງ ​ໃນ​ການ​ພົບ​ປະ​ທີ່​ນະຄອນ​ມີ​ລານ ອີ​ຕາ​ລີ ວັນ​ທີ 16 ຕຸລາ 2014.

ທ່ານ​​ຟ້າ​ມບິ່ງ​ມິ​ງ ຮອງ​ນາຍົກລັດຖະມົນຕີ ລັດຖະມົນຕີ​ວ່າການກະຊວງ​ຕ່າງປະ​​ເທດຢືນຢັນວ່າ ​ຫວຽດນາມຍາມ​ໃດ​ກໍ່​ໃຫ້​ຄວາມ​ສຳຄັນ​ແກ່​ການ​ພັດທະນາສາຍ​ພົວພັນ​ຄູ່​ຮ່ວມ ຮ່ວມ​ມື​ຍຸດ​ທະ​ສາດ​ຮອບດ້ານ​ກັບ​ຈີ​ນ; ​ເນັ້ນ​ວ່າ ສອງ​ຝ່າຍ​ຕ້ອງ​ຜັນ​ຂະຫຍາຍ​ຢ່າງ​ມີ​ປະສິດທິ​ຜົນ ບັນດາ​ຂໍ້​ຕົກລົງ​ທີ່​ບັນລຸ​ໄດ້​ໃນ​ການ​ໄປ​ຢ້ຽມຢາມ​ຈີນ ຂອງ​ສະຫາຍ​ເລ​ໂຮ່ງ​ແອ​ງ, ທູດ​ພິ​ເສດ​ຂອງ​ເລຂາທິການ​ໃຫຍ່​ພັກ​ກອມ​ມູນິດ​ຫວຽດນາມ, ກ່ຽວ​ກັບ​ການ​ຟື້ນ​ຟູການ​ສັງ​ສັນ​ຮ່ວມ​ມື, ກວດກາ​ການ​ພິພາດ​ກັນຕ່າງໆ​ເທິງ​ທ​ະ​ເລ​ໃຫ້​ດີ, ບໍ່​ມີ​ການ​ກະທຳ​ເຮັດ​​ໃຫ້ສະພາບ​ການ​ສັບສົນ​ຂຶ້ນ​ຕື່ມ ບໍ່​ເຮັດ​ໃຫ້ການ​ພິພາດ​ກັນ​ແຜ່​ກວ້າງ​ອອກ. 

ທ່ານ​​ຟ້າ​ມບິ່ງ​ມິ​ງ ຮອງ​ນາຍົກລັດຖະມົນຕີ ລັດຖະມົນຕີ​ວ່າການກະຊວງ​ຕ່າງປະ​ເທດ ກໍ່​ໄດ້​ຍົກ​ໃຫ້​ເຫັນ​ແຈ້ງທັດສະນະ​ ຫຼັກ​ໝັ້ນຂອງພັກ ລັດ​ຫວຽດນາມ​ໃນ​ບັນຫາ​ທະ​ເລ​ຕາ​ເວັນ​ອອກ, ຢືນຢັນ​ຫວຽດນາມ​ຍາມ​ໄດ​ກໍ່​ບຸລິມະສິດ ຜ່ານ​ສັນຕິ​ວິທີ​ ເພື່ອ​ພ້ອມ​ກັນ​ກັບ​ຈີນ​ແກ້​ໄຂ​ຂໍ້​ພິພາດ, ຄວາມ​ບໍ່​ຖືກຕ້ອງ​ກັນ​ຢູ່​ທະ​ເລ​ຕາ​ເວັນ​ອອກ ບົນ​ພື້ນຖານ​ປະຕິບັດ​ຕາມ​ຄວາມ​ຮັບ​ຮູ້​ລວມຂອງ​ການ​ນຳ​ຂັ້ນ​ສູງ​ຂອງ​ສອງ​ປະ​ເທດ; ຂໍ້​ຕົກລົງ​ກ່ຽວ​ກັບ​ບັນດາ​ຫຼັກການ​ອັນ​ພື້ນຖານທີ່​ຊີ້​ນຳ​ແກ້​ໄຂ​ບັນດາ​ບັນຫາ​ເທິງ​ທະ​ເລຫວຽດນາມ - ຈີນ; ​ເຄົາລົບ​ນັບ​ຖື​ກົດໝາຍ​ສາກົນ, ​ເປັນ​ຕົ້ນ​ແມ່ນ ອະນຸສັນ​ຍາ​ສະຫະ​ປະຊາ​ຊາດ​ວ່າ​ດ້ວຍ​ກົດໝາຍ​ທະ​ເລ​ປີ 1982 (UNCLOS 1982) ​ແລະ ຖະ​ແຫຼ​ງການ​ກ່ຽວ​ກັບ​ການ​ປະພຶດ​ຂອງ​ບັນດາ​ຝ່າ​ຍທີ່​ກ່ຽວ​ຢູ່​ທະ​ເລ​ຕາ​ເວັນ​ອອກ (DOC).

ທ່ານຢາງ ​ເຄັ້ຍຈີ ສະມາຊິກ​ສະພາ​ລັດຖະມົນຕີ​ຈີນ ກ່າວ​ວ່າ ຈີນ ​ແລະຫວຽດນາມ​ແມ່ນ​ສອງ​ປະ​ເທດ​ເພື່ອນ​ບ້ານ​ທີ່​ສຳຄັນ​ຂອງ​ກັນ, ພັກ ລັດຖະບານ ​ແລະ​ປະຊາຊົນ​ຈີນ​ໃຫ້​ຄວາມ​ສຳຄັນ​ທີ່​ສຸດ ​ແລະ​ຍາມ​ໃດ​ກໍ່​ຕັ້ງ​ໝັ້ນ​ທິດ​ນຳ ຮ່ວມ​ມື​ມິດຕະພາບ​ກັບ​ຫວຽດນາມ. ດ້ວຍ​ຄວາມ​ມານະ​ພະຍາຍາມ​ລວມ, ສອງ​ຝ່າຍ​ໄດ້​ຜ່ານ​ຜ່າ​ຄວາມ​ຫຍຸ້ງຍາກ​ຕ່າງໆ​ທີ່​ຕ້ອງ​ປະ​ເຊີນ​ໃນ​ເວລາ​ຜ່ານ​ມາ. ປັດຈຸບັນ ການ​ພົວພັນ​ສອງ​ຝ່າຍ​ພວມ​ໄດ້​ຮັບ​ການ​ຟື້ນ​ຟູ​ເປັນ​ແຕ່​ລະ​ກ້າວ, ສອງ​ຝ່າຍ​ຕ້ອງ​ກຳ​ແໜ້ນ​ທິດ​ທາງ​ພັດທະນາ​ການ​ພົວພັນ​ລະຫວ່າງສອງ​ປະ​ເທດ, ​ແກ້​ໄຂ​ການ​ພິພາດ​ເທິງ​ທະ​ເລ​ໃຫ້​ໄດ້​ເໝາະ​ສົມຕາມ​ຄວານ ​ແລະ​ກວດກາມັນ​ໃຫ້​ດີ, ສ້າງ​ສິ່ງ​ແວດ​ລ້ອມ​ອັນ​ສະດວກ​ດີ​ໃຫ້​ແກ່​ການ​ຮ່ວມ​ມື​ສອງ​ຝ່າຍ. 

ທ່ານຢາງ ​ເຄັ້ຍຈີ ສະມາຊິກ​ສະພາ​ລັດຖະມົນຕີ​ຈີນ ​ເຫັນ​ດີ​ເປັນ​ເອກະ​ພາບ​ເພີ່ມ​ທະວີ​ການ​ຊີ້​ນຳ​ບັນດາ​ອົງການ​ທີ່​ກ່ຽວ​ຂອງ​ຈີນ ​ໃຫ້​ຕັ້ງໜ້າ​ຜັນ​ຂະຫຍາຍ​ປະຕິບັດ​ຂໍ້​ຕົກລົງ​ຕ່າງໆ​ທີ່​ບັນລຸ​ໄດ້​ໃນ​ກອງ​ປະຊຸມ​ຄັ້ງ​ນີ້.

ຫຼັງ​ຈາກ​ການ​ປະຊຸມ, ສອງ​ທ່ານ​ປະທານ​ຮ່ວມ​ໄດ້​ເປັນ​ສັກຂີ​ພະຍານ​ພິທີ​ເຊັນ​ບົດ​ບັນທຶກກອງ​ປະຊຸມ​ຄັ້ງ​ທີ 7 ຄະນະ​ກຳມະການ​ຊີ້​ນຳ​ການ​ຮ່ວມ​ມື​ສອງ​ຝ່າຍຫວຽດນາມ - ຈີນ./.

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ