ວັນອັງຄານ, 22/10/2019
ທ່ານປະທານາທິບໍດີ ປະເທດສາທາລະນະລັດ ເອກະພາບ ຕັງຊານີ ມາຢ້ຽມຢາມ ປະເທດສາທາລະນະລັດ ສັງຄົມນະຍົມ ຫວຽດນາມ
9/11/2014 15:4' ສົ່ງ ພິມ
ທ່ານເລຂາທິການໃຫຍ່ ຫງວຽນຝູຈ້ອງ ຕ້ອນຮັບທ່ານປະທານາທິບໍດີ ຕັງຊານີ ຈາກາຢາ ມຣີໂຊ ກີກວີດ (ພາບ: TTXVN)

ນີ້​ແມ່ນ​ການ​ຢ້ຽມຢາມ​ຫວຽດນາມ​ຄັ້ງ​ທີ​ສອງ ​ຂອງ​ທ່ານ​ປະທານາທິບໍດີ​ຕັງ​ຊານີ ຈາ​ກາ​ຢາ ມຣີ​ໂຊ ກີ​ກວີ​ດ (ຄັ້ງ​ທີ​ໜຶ່ງ​​ແມ່ນ​ປີ 2001 ​ໃນ​ຖານະ​ລັດຖະມົນຕີ​ວ່າການ​ກະຊວງ​ການຕ່າງປະ​ເທດ ​ແລະ​ການ​ຮ່ວມ​ມື​ສາກົນ).

      * ຕອນ​ແລງ​ວັນ​ທີ 27 ຕຸລາ, ຢູ່​ທີ່​ທຳນຽບປະທານ​ປະ​ເທດ, ທ່ານ​ປະທານ​ປະ​ເທດ​ເຈືອງ​ເຕິ​ນຊາງ ​ໄດ້​ເປັນ​ເຈົ້າພາບ​ພິທີ​ຕ້ອນຮັບ ທ່ານຈາ​ກາ​ຢາ ມຣີ​ໂຊ ກີ​ກວີ​ດ ປະທານາທິບໍດີ​​ແຫ່ງ​ສາທາລະນະ​ລັດເອກະ​ພາບ ຕັງ​ຊານີ ພ້ອມ​ດ້ວຍ​ຄະນະ​ຜູ້​ແທນ​ຂັ້ນ​ສູງ​ແຫ່ງ​ລັດ​ຕັງ​ຊານີ ດ້ວຍ​ພິທີການ​ຕ້ອນຮັບ​ປະມຸກ​ແຫ່ງ​ຊາດ​ຢ່າງ​ສົມ​ກຽດ.


ທ່ານ​ປະທານ​ປະ​ເທດ​ເຈືອງ​ເຕິ​ນຊາງ ​ແລະທ່ານຈາ​ກາ​ຢາ ມຣີ​ໂຊ ກີ​ກວີ​ດ
ປະທານາທິບໍດີ​​ແຫ່ງ​ສາທາລະນະ​ລັດເອກະ​ພາບ ຕັງຊານີ ຢູ່​ທີ່​ພິທີ​ຕ້ອນຮັບ (ພາບ: TTXVN)

ຫຼັງ​ຈາກ​ພິທີ​ຕ້ອນຮັບ, ທ່ານ​ປະທານ​ປະ​ເທດ​ ເຈືອງ​ເຕິ​ນຊາງ ​ໄດ້​ພົບ​ປະ​ປຶກສາ​ຫາລື​ກັບທ່ານປະທານາທິບໍດີ​​ ຈາ​ກາ​ຢາ ມຣີ​ໂຊ ກີ​ກວີ​ດ.

ທ່ານ​ປະທານ​ປະ​ເທດ​ ເຈືອງ​ເຕິ​ນຊາງ ຢືນຢັນ​ຫວຽດນາມ​ຍາມ​ໃດ​ກໍ່​ໃຫ້​ຄວາມ​ສຳຄັນ ​ແລະ​ປະສົງ​ຢາກ​ເປີດ​ກວ້າງ​ການ​ຮ່ວມ​ມື ​ແບບ​ຕ່າງ​ຝ່າຍ​ຕ່າ​ງມີ​ຜົນ​ປະ​ໂຫຍ​ດ ກັບ​ບັນດາ​ປະ​ເທດ​ອາ​ຟຣິກກາ, ​ໃນ​ນັ້ນ​ມີ​​ຕັງຊານີ ​ເຊິ່ງ​ເປັນ​ພີ່ນ້ອງທີ່​ໄດ້​ຄຽງ​ບ່າ​ຄຽງ​ໄຫຼ່ ສະໜັບ​ສະໜູນ​ຫວຽດນາມ ​ໃນ​ໄລຍະ​ການ​ຕໍ່ສູ້​ຍາດ​ເອົາ​ເອກະລາດ ​ແລະ​ໂຮມ​ປະ​ເທດ​ຊາດ​ເປັນ​ເອກະ​ພາບ​ກ່ອນ​ໜ້າ​ນີ້ ກໍ່​ຄື​ໃນ​ພາລະກິດ​ການ​ສ້າງສາ ​ແລະ​ພັດທະນາ​ປະ​ເທດ​ປັດຈຸບັນ; ຊົມ​ເຊີຍ​ບັນດາ​ຜົນສຳ​ເລັດ​ອັນຈັບ​ໃຈ​ ທີ່​ປະຊາຊົນຕັງຊານີຍາດ​ມາ​ໄດ້ ​ໃນ​ການ​ປະຕິ​ຮູບ​ແລະ​ພັດທະນາ​ປະ​ເທດ; ຕີ​ລາຄາ​ສູງ​ການ​ປະກອບສ່ວນ​ອັນ​ຕັ້ງໜ້າ​ຕ່າງໆ​ ຂອງ​ຕັງຊານີ ​ໃຫ້​ແກ່​ສັນຕິພາບ ສະຖຽນ​ລະ​ພາບ ການ​ສຳພັນ​ຮ່ວມ​ມື​ ໃນປະຊາ​ຄົມ​​ພັດທະນາການ​ພາກ​ໃຕ້​ອາ​ຟຣິກກາ, ປະຊາ​ຄົມ​ເສດຖະກິດ​ເຂດ​ຕາ​ເວັນ​ອອກ​ອາ​ຟຣິກກາ ​ແລະ​ໃນ​ທົ່ວ​ທະວີບ.

ທ່ານປະທານາທິບໍດີ​​ ຈາ​ກາ​ຢາ ມຣີ​ໂຊ ກີ​ກວີ​ດ ສະ​ແດງ​ຄວາມ​ນິຍົມ​ນັບຖື​ຕໍ່​ການຕໍ່ສູ້ຍາດ​ເອກະລາດ ​ໂຮມ​ປະ​ເທດ​ຊາດ​ເປັນ​ເອກະ​ພາບ​ຂອງ​ຫວຽດນາມ​ກ່ອນ​ໜ້າ​ນີ້, ກໍ່​ຄື​ບັນດາ​ຜົນສຳ​ເລັດ​ອັນຈັບ​ໃຈ ​ໃນ​ພາລະກິດການ​ປ່ຽນ​ແປງ​ໃໝ່​ປະ​ເທດ​ຊາດ​ປັດຈຸບັນ, ຖື​ວ່າ​ນັ້ນ​ມັນ​ເປັນ​ແຫຼ່ງດົນ​ໃຈ ​ເປັນແວ່ນ​ແຍງ​ອັນ​ໃສ​ແຈ້ງ ທີ່​ປຸກລະດົມ​ກຳລັງ​ໃຈ​ປະຊາຊົນ​ຕັງຊານີ ​ໃນ​ການ​ຕໍ່ສູ້​ປົດ​ປ່ອຍ​ຊາດ ​ແລະ​ພັດທະນາ​ປະ​ເທດ.

​ໃນ​ການ​ພົບ​ປະ​ປຶກສາ​ຫາລື, ທ່ານ​ປະທານ​ປະ​ເທດ​ເຈືອງ​ເຕິ​ນຊາງ ​ແລະ ທ່ານປະທານາທິບໍດີ​​ ຈາ​ກາ​ຢາ ມຣີ​ໂຊ ກີ​ກວີ​ດ ​ໄດ້​ແຈ້ງ​ໃຫ້​ກັນຊາ​ບກ່ຽວ​ກັບ​ຈຸດ​ໃໝ່​ຕ່າງໆ ຂອງ​ສະພາບ​ການ​ແຕ່ລະ​ປະ​ເທດ; ຕີ​ລາຄາ​ຜົນງານ​ການ​ຮ່ວມ​ມື​ລະຫວ່າງ​ສອງ​ປະ​ເທດ​ໃນ​ເວລາ​ທີ່​ຜ່ານ​ມາ ​ແລະ ​ເປັນ​ເອກະ​ພາບ​ກ່ຽວ​ກັບ​ບັນດາ​ມາດ​ຕະການ ​ເພື່ອ​ແນ​ໃສ່​ເພີ່ມ​ທະວີ​ການ​ພົວພັນ​ຮ່ວມ​ມື​ໃນ​ຫຼາຍ​ດ້ານ​ລະ​ຫວ່າງ​ສອງ​ປະ​ເທດ​ຍິ່ງ​ກວ່າ​ອີກ.

ສອງ​ຝ່າຍ​ຮູ້ສຶກ​ເພິ່ງ​ພໍ​ໃຈ​ກ່ຽວກັບ​ຄວາມ​ຄືບ​ໜ້າ​ທີ່​ດີງາມ​ໃນ​ເວລາ​ມໍ່ໆ​ຜ່ານ​ມາ​ນີ້; ​ເຫັນ​ດີ​ເປັນ​ເອກະ​ພາບ​ເພີ່ມ​ທະວີ​ ການ​ພົວພັນ​ດ້ານ​ການ​ເມືອງ​ອັນ​ສະໜິດສະໜົມ ​ໂດຍ​ຜ່ານ​ການ​ແລກປ່ຽນ​ຄະນະ​ຜູ້​ແທນ​ຂັ້ນ​ຕ່າງໆ; ຍູ້​ແຮງ​ການ​ເຄື່ອນ​ໄຫວ​ການ​ທູດ​ປະຊາຊົນ, ​ແຮກສ່ຽວ​ລະຫວ່າງ​ບັນດາ​ນະຄອນ​ໃຫຍ່ ​ແນ​ໃສ່​ຍົກ​ສູງ​ຄວາມ​ເຂົ້າ​ໃຈ​ຊຶ່ງ​ກັນ​ແລະ​ກັນ​ຍິ່ງ​ຂຶ້ນ​ລະຫວ່າງ​ປະຊາຊົນ​ສອງ​ປະ​ເທດ; ສ້າງ​ເງື່ອນ​ໄຂ​ອຳນວຍ​ຄວາມ​ສະດວກ ​ໃຫ້​ບັນດາ​ໂຄງການ​ຮ່ວມ​ມືດ້ານ​ກະສິກຳ ​ແລະ ​ໂທລະ​ຄົມມະນາຄົມ​ໄດ້​ຜັນ​ຂະຫຍາຍ​ໂດຍ​ໄວ... ສອງ​ຝ່າຍ​ໄດ້​ແລກປ່ຽນ​ຄວາມ​ຄິດ​ຄວາມ​ເຫັນ​ກ່ຽວ​ກັບ​ບັນຫາ​ພາກ​ພື້ນ ​ແລະ​ສາກົນ​ທີ່​ຕ່າງ​ຝ່າຍ​ຕ່າງ​ກໍ່​ສົນ​ໃຈ.

ການ​ນຳ​ທັງ​ສອງ​ກໍ່​ໄດ້​ແລກປ່ຽນ​ຄວາມ​ຄິດ​ເຫັນ​ກ່ຽວ​ກັບ​ຄວາມ​ສຳຄັນ​ຂອງ​ການ​ຮັບປະກັນ​ຄວາມ​ສະຫງົບ ຄວາມ​ປອດ​ໄພ ​ແລ​ະ​ເສລີພາບ​ໃນ​ການ​ເດີນ​ທະ​ເລ​ຢູ່​ທະ​ເລ​ຕາ​ເວັນ​ອອກ, ​ແກ້​ໄຂ​ຄວາມ​ພິພາດ​ຢູ່​ໃນ​ພາກ​ພື້ນ​ດ້ວຍ​ສັນຕິ​ວິທີ, ຄວາມ​ຈຳ​ເປັນ​ຕ້ອງ​ປະຕິບັດ​ຕາມ​ກົດໝາຍ​ສາກົນ, ພິ​ເສດ​ແມ່ນ​ອະນຸ​ສັນຍາ​ສະຫະ​ປະຊາ​ຊາດ​ວ່າ​ດ້ວຍ​ກົດໝາຍ​ທະ​ເລ​ປີ 1982, ປະຕິບັດ​ຖະ​ແຫຼ​ງການ​ກ່ຽວ​ກັບ​ການ​ປະພຶດ​ຂອງ​ບັນດາ​ຝ່າຍ​ຢູ່​ທະ​ເລ​ຕາ​ເວັນ​ອອກ (DOC) ​ແລະ​​ດຳ​ເນີນການ​ເຈລະຈາ​ກ່ຽວ​ກັບ ປະມວນ​ຂໍ້​ກຳນົດ​ການ​ປະພຶດ​ຢູ່​ທະ​ເລ​ຕາ​ເວັນ​ອອກ (COC) ​ໃຫ້ສຳ​ເລັດ​ໂດຍ​ໄວ.

​ໃນ​ໂອ​ການ​ນີ້, ທ່ານ​ປະທານາທິບໍດີ ​ເປັນ​ກຽດ​ເຊື້ອ​ເຊີນທ່ານ​ປະທານ​ປະ​ເທດ ​ເຈືອງ​ເຕິ​ນຊາງ ​ໄປ​ຢ້ຽມຢາມ​ມິດຕະພາບ ປະ​ເທດ​ຕັງຊານີ ຢ່າງ​ເປັນ​ທາງ​ການ. ທ່ານ​ປະທານ​ປະ​ເທດ​ ເຈືອງ​ເຕິ​ນຊາງ ສະ​ແດງ​ຄວາມ​ຂອບ​ອົກ​ຂອບ​ໃຈ ​ແລະ​ດີ​ໃຈ​ຮັບ​ຄຳ​ເຊີນ. ​ເວລາ​ຂອງ​ການ​ຢ້ຽມຢາມ​ຈະ​ໄດ້​ຕົກລົງ​ກັນ ​ໂດຍ​ຜ່ານ​ເສັ້ນທາງ​ການ​ທູດ.

ຫຼັງ​ຈາກ​ການ​ພົບ​ປະ​ປຶກສາ​ຫາລື, ການ​ນຳ​ທັງ​ສອງ​ໄດ້​ເປັນ​ສັກຂີ​ພະຍານ​ພິທີ​ເຊັນ​ສັນຍາ​ການ​ຮ່ວມ​ມື​​ດ້ານ​ການ​ຂົນ​ສົ່ງ​ທາງ​ທະ​ເລ​ລະຫວ່າງ​ສອງ​ປະ​ເທດ...

* ກໍ່​ໃນ​ຕອນ​ແລງ​ຂອງ​ວັນ​ທີ 27 ຕຸລາ​ນີ້, ຢູ່​ທີ່​ສຳນັກງານ​ສູນ​ກາງ​ພັກ​ກອມ​ມູນິດ​ຫວຽດນາມ, ທ່ານ​ຫງວຽນ​ຝູຈ້ອງ ​ເລຂາທິການ​ໃຫຍ່​ພັກ​ກອມ​ມູນິດ​ຫວຽດນາມ ​ໄດ້​ຕ້ອນຮັບທ່ານປະທານາທິບໍດີ​​ ປະທານ​ພັກປະຕິວັດຕັງຊານີ ຈາ​ກາ​ຢາ ມຣີ​ໂຊ ກີ​ກວີ​ດ ຢ່າງ​ສະໜິດສະໜົມ.



ທ່ານ​ເລຂາທິການ​ໃຫຍ່ ຫງວຽນ​ຝູຈ້ອງ ຕ້ອນຮັບທ່ານປະທານາທິບໍດີ​​
ຕັງຊານີ ຈາ​ກາ​ຢາ ມຣີ​ໂຊ ກີ​ກວີ​ດ (ພາບ: TTXVN)

ທ່ານປະທານາທິບໍດີ​​ ຈາ​ກາ​ຢາ ມຣີ​ໂຊ ກີ​ກວີ​ດ ສະ​ແດງ​ຄວາມ​ຂອບ​ອົກ​ຂອບ​ໃຈຕໍ່ທ່ານ​ເລຂາທິການ​ໃຫຍ່ ທີ່​ໄດ້​ສະຫຼະ​ເວລາ​ອັນ​ລ້ຳ​ຄ່າ ​ເພື່ອ​ຕ້ອນຮັບ​ຄະນະ; ສະ​ແດງ​ຄວາມ​ນິຍົມ​ນັບຖື​ຕໍ່​ທ່ານ​ປະທານ​ໂຮ່ຈີ​ມິນ, ພັກ​ກອມ​ມູນິດ​ຫວຽດນາມ ​ແລະປະຊາຊົນ​ຫວຽດນາມ; ຢືນຢັນ​ສາຍ​ພົວພັນ​ມິດຕະພາບອັນສະໜິດສະໜົມ​ລະຫວ່າງ​ສອງ​ປະ​ເທດ ​ແລະ​ສະ​ແດງ​ຄວາມ​ປະສົງ​ຢາກ​ເພີ່ມ​ທະວີ​ການ​ຮ່ວມ​ມື​ດ້ານ​ເສ​ຖະກິດ, ຊຸກຍູ້​ການ​ພົວພັນລະຫວ່າງພັກປະຕິວັດຕັງຊານີ ກັບພັກກອມມູນິດຫວຽດນາມໃນເວລາຕໍ່ໜ້າ.

ທ່ານປະທານາທິບໍດີ​​ ຈາ​ກາ​ຢາ ມຣີ​ໂຊ ກີ​ກວີ​ດ ໄດ້ແຈ້ງຂ່າວໃຫ້ທ່ານ​ເລຂາທິການ​ໃຫຍ່ຊາບບາງຈຸດກ່ຽວກັບສະພາບການຂອງພັກປະຕິວັດຕັງຊານີ, ໝາກຜົນ​ຂອງ​ການ​ພົບ​ປະ​ປຶກສາ​ຫາລື​ລະຫວ່າງ​ທ່ານ​ປະທານາທິບໍດີ ​ແລະທ່ານ​ປະທານ​ປະ​ເທດ​ເຈືອງ​ເຕິ​ນຊາງ; ຢືນຢັນ​ວ່າ​ຈະ​ເຮັດ​ຈົນ​ສຸດ​ຄວາມ​ສາມາດ​ຂອງ​ຕົນ​ ເພື່ອ​ຊຸກຍູ້ການ​ພົວພັນ​ມິດຕະພາບ​ອັນ​ເປັນ​ມູນ​ເຊື້ອ ດີງາມ​ລະຫວ່າງ​ສອງ​ພັກ ​ແລະ​ປະຊາຊົນ​ສອງປະ​ເທດ​ຕັງຊານີ - ຫວຽດນາມ.

ທ່ານ​ເລຂາທິການ​ໃຫຍ່ຢືນຢັນ​ຫວຽດນາມ​ຍາມ​ໃດ​ກໍ່​ໃຫ້​ຄວາມ​ສຳ​ຄັນ​ແກ່​ສາຍ​ພົວພັນ​ມິດຕະພາບ​ອັນ​ເປັນ​ມູນ​ເຊື້ອ​ກັບ​ຕັງຊານີ; ສະ​ເໜີ​ໃຫ້​ສອງ​ປະ​ເທດ​ສືບ​ຕໍ່​ຊຸກຍູ້ການ​ຮ່ວມ​ມື​ສອງ​ຝ່າຍ​ໃນ​ຂົງ​ເຂດ​ຕ່າງໆ​ ໃຫ້​ຂະຫຍາຍຕົວແຂງ​ແຮງ​ກວ່າ​ອີກ; ​ເຫັນ​ດີ​ເປັນ​ເອກະ​ພາບ​ເພີ່ມ​ທະວີ​ການ​ພົວພັນ​ຮ່ວມ​ມື​ລະຫວ່າງ​ສອງ​ພັກ, ປະກອບສ່ວນ​ຊຸກຍູ້​ການ​ພົວພັນ​ມິດຕະພາບ ການ​ຮ່ວມ​ມື​ລະຫວ່າງ​ສອງ​ລັດ ​ແລະ​ປະຊາຊົນ​ສອງ​ປະ​ເທດ​ຫວຽດນາມ - ຕັງຊານີ.

* ຕອນ​ແລງ​ວັນ​ທີ 28 ຕຸລາ, ຢູ່​ທີ່​ຫໍ​ສະພາ​ແຫ່ງ​ຊາດ, ທ່ານ​ປະທານ​ສະພາ​ແຫ່ງ​ຊາດ​ຫງວຽນ​ຊິງ​ຮຸ່ງ ​ໄດ້​ຕ້ອນຮັບ​ທ່ານປະທານາທິບໍດີ​​ຕັງຊານີ ຈາ​ກາ​ຢາ ມຣີ​ໂຊ ກີ​ກວີ​ດ ຢ່າງ​ສະໜິດສະໜົມ.



ທ່ານ​ປະທານ​ສະພາ​ແຫ່ງ​ຊາດ ​ຫງວຽນ​ຊິງ​ຮຸ່ງ ຕ້ອນຮັບທ່ານປະທານາທິບໍດີ​
​ຕັງຊານີ ຈາ​ກາ​ຢາ ມຣີ​ໂຊ ກີ​ກວີ​ດ (ພາບ: TTXVN)

ທ່ານ​ປະທານ​ສະພາ​ແຫ່ງ​ຊາດ​ຫງວຽນ​ຊິງ​ຮຸ່ງ​ໄດ້​ຊົມ​ເຊີຍ ​ແລະ ອວຍພອນ​ຜົນສຳ​ເລັດ​ຕ່າງໆ ຂອງການ​ພົບ​ປະ​ປຶກສາ​ຫາລື ລະ​ຫວ່າງ​ທ່ານ​ປະທານາທິບໍດີ ກັບ​ບັນດາ​ການ​ນຳ​ພັກ ລັດຫວຽດນາມ; ​ໄຂ​ໂອກາດ​ດີ​ເພື່ອ​ເປີດ​ກວ້າງ​ການ​ຮ່ວມ​ມື, ສອດຄ່ອງ​ກັບ​ຄວາມ​ມຸ່ງ​ມາດປາຖະໜາຂອງ​ປະຊາຊົນ​ສອງ​ປະ​ເທດ. ທ່ານ​ປະທານ​ສະພາ​ແຫ່ງ​ຊາດ​ຫງວຽນ​ຊິງ​ຮຸ່ງ ກໍ່​ເປັນ​ກຽດ​ຝາກ​ຄຳ​ຢ້ຽມຢາມ​ຖາມ​ຂ່າວ ຄຳ​ເຊີນທ່ານ​ປະທານ​ສະພາ​ແຫ່ງ​ຊາດ​ຕັງຊາ​ນີມາ​ຢ້ຽມຢາມ​ປະ​ເທດ​ຫວຽດນາມ​ຢ່າງ​ເປັນ​ທາງ​ການ ​ແລະ​ເຂົ້າ​ຮ່ວມ​ສະມັດຊາ​ໃຫຍ່ສະຫະພັນ​ລັດຖະສະພາ​ບັນດາ​ປະ​ເທດ​ໃນໂລກຄັ້ງ​ທີ 132 (IPU-132) ທີ່​ຈະ​ຈັດ​ຂຶ້ນ​ໃນປີ 2015 ຢູ່​ນະຄອນ​ຮ່າ​ໂນ້ຍ.

ທ່ານປະທານາທິບໍດີ​​ ຈາ​ກາ​ຢາ ມຣີ​ໂຊ ກີ​ກວີ​ດ ສະ​ແດງ​ຄວາມ​ດີ​ອົກ​ດີ​ໃຈ​ທີ່​ໄດ້​ພົບ​ປະ​ກັບ​ທ່ານ​ປະທານ​ສະພາ​ແຫ່ງ​ຊາດ​ຫງວຽນ​ຊິງ​ຮຸ່ງ; ຝາກ​ຄວາມ​ຮັກ​ແພງມິດ​ຈິດ​ມິດ​ໃຈ​ອັນ​ດີງາມ ຂອງ​ສະພາ​ແຫ່ງ​ຊາດ ​ແລະ​ປະຊາຊົນ​ຕັງຊານີ ມາ​ຍັງ​ສະພາ​ແຫ່ງ​ຊາດ ​ແລະ​ປະຊາຊົນ​ຫວຽດນາມ. ທ່ານ​ປະທານາທິບໍດີ​ຢືນຢັນຈຸດປະສົງ​ຂອງ​ການ​ມາ​ຢ້ຽມຢາມ​ປະ​ເທດ​ຫວຽດນາມ​ຄັ້ງ​ນີ້​ ແມ່ນ​ເຮັດ​ໃຫ້​ສາຍ​ພົວພັນ​ອັນ​ເປັນ​ມູນ​ເຊື້ອ​ດີງາມ​ລະຫວ່າງ​ສອງ​ປະ​ເທດ ​ເລິກ​ເຊິ່ງຍິ່ງ​ຂຶ້ນ.

​ໃນ​ຂອບການ​ເຄື່ອນ​ໄຫວ​ຢ້ຽມຢາມ​ຄັ້ງ​ນີ້, ທ່ານປະທານາທິບໍດີ​ຕັງຊານີ ​ໄດ້​ເຂົ້າ​ຮ່ວມ “ການ​ສົນທະນາ​ໂຕະມົນ​ກ່ຽວ​ກັບ​ບັນດາ​ໂອກາດ​ລົງທຶນ​ວິ​ສາ​ຫະກິດ​ຢູ່​ຕານ​ຊາ​ເນຍ” ​ໂດຍ​ແມ່ນ​ຫ້ອງການ​ການ​ຄ້າ ​ແລະ​ອຸດສາຫະກຳ​ຫວຽດນາມ (VCCI) ສົມທົບ​ກັບ​ສູນ​ສົ່ງ​ເສີມ​ການ​ລົງທຶນ​ຕັງຊານີ ພ້ອມ​ກັນ​ຈັດ​ຕັ້ງ.

​ໃນ​ເວລາ​ຢູ່​ຢ້ຽມຢາມ​ຫວຽດນາມ, ທ່ານປະທານາທິບໍດີ​​ຕັງຊານີ ​ໄດ້​ໄປ​ວາງ​ພວງມາລາ​ທີ່​ອະນຸສາວະລີ​ວິລະຊົນນັກຮົບ​ທີ່​ໄດ້​ເສຍສະຫຼະ​ຊີວິດ​ເພື່ອ​ຊາດ ​ແລະ​ວາງ​ພວງມາລາ​ໄຫວ້​ອາ​ໄລທີ່​ອະນຸສາວະລີ​ຫໍ​ສົບ​ໂຮ່ຈີ​ມິນ; ​ໄປ​ຢາມ​ບໍລິສັດ​ປຸງ​ແຕ່ງອາຫານ​ສົ່ງ​ນອກ​ຈຸ​ງ​ເຊີນ (​ແຂວງ​ຮຶງອຽນ), ຢາມ​ບໍລິສັດ​ຕັດຫຍິບ​ໝາຍ​ເລກ 10 ​ແລະ​ເຂດ​ອຸດສາຫະກຳ​ທັງ​ລອງ (ນະຄອນ​ຮ່າ​ໂນ້ຍ)./.

ສັງ​ລວ​ມ​ໂດຍ: ​ແຂງ​ງວຽນ

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ