ວັນອັງຄານ, 22/10/2019
ຫວຽດນາມໄດ້ມີສ່ວນປະກອບອັນສຳຄັນ ຫຼາຍຢ່າງ ເຂົ້າໃນກອງປະຊຸມສຸດຍອດ ອາຊຽນ
22/11/2014 10:59' ສົ່ງ ພິມ
ທ່ານນາຍົກລັດຖະມົນຕີ ຫງວຽນເຕິນຢູ໊ງ ພົບປະກັບທ່ານບັນ ກີມຸນ ເລຂາທິການອົງການສະຫະປະຊາຊາດ ໃນວັນທີ 12 ພະຈິກ 2014, ທີ່ປະເທດມຽນມາ (ພາບ: TTXVN)

ດ້ວຍ​ທິດ​ນຳ “ຕັ້ງໜ້າ, ​ເປັນ​ເຈົ້າການ ​ແລະ​ ມີ​ຄວາມ​ຮັບຜິດຊອບ”, ຄະນະ​ຜູ້​ແທນ​ຫວຽດນາມ ນຳ​ໂດຍ​ທ່ານນາຍົກລັດຖະມົນຕີ ຫງວຽນ​ເຕິ​ນຢູ໊ງ ​ໄດ້​ເຂົ້າ​ຮ່ວມ ​ແລະ ​ປະກອບສ່ວນອັນ​ສຳຄັນຫຼາຍ​ຢ່າງ ​ເຂົ້າ​ໃນ​ຜົນສຳ​​ເລັດ​ລວມຂອງ​ກອງ​ປະຊຸມ​ສຸດ​ຍອດ​ຄັ້ງ​ນີ້, ລະອຽດ​ຄື:

ທີ​ໜຶ່ງ, ຫວຽດນາມ​ສືບ​ຕໍ່​ເຊີດ​ຊູ​ສົ່ງ​ເສີມຄວາມ​ສາມັກ​ຄີ ​ແລະ​ຄວາມ​ເປັນ​ເອກະ​ພາບ​ຂອງ​ອາ​ຊຽນ ອັນ​ເປັນ​ເງື່ອນ​ໄຂ​ຕັດສິນ​ເບື້ອງ​ຕົ້ນ ທີ່​ຮັບປະກັນ​ໃຫ້​ຈຸດໝາຍ​ປະຊາ​ຄົມ​ອາ​ຊຽນ ປະກົດ​ເປັນ​ຈິງ​ໃນ​ທ້າຍ​ປີ 2015 ​ແລະ​ສືບ​ຕໍ່​ຂະຫຍາຍຕົວ​ຢ່າງ​ໝັ້ນຄົງ​ເຂັ້ມ​ແຂງ​ໃນ​ໄລຍະ​ໃໝ່.

ທີ​ສອງ, ກ່ຽວ​ກັບ​ການຜັນ​ຂະຫຍາຍປະຕິບັດ​ແຜນ​ແມ່​ບົດສ້າງ​ຕັ້ງປະຊາ​ຄົມ​ອາ​ຊຽນ, ຫວຽດນາມ​ໄດ້​ເນັ້ນ​ເຖິງ​ຄວາມ​ຮັບຜິດຊອບ ​ແລະ​ຄວາມ​ມານະ​ພະຍາຍາມ​ຂອງ​ແຕ່ລະ​ປະ​ເທດ ​ແລະຂອງ​ທົ່ວ​ທັງ​ກຸ່ມ​ ​ໃນ​ການ​ປະຕິບັດ​ຂໍ້​ຕົກລົງ​ແລະ​ສັນຍາ​ຕ່າງໆ. ຫວຽດນາມ​ກໍ່​ໄດ້​ມີ​ຂໍ້​ສະ​ເໜີ​ແນະ​ທີ່​ສຳຄັນຫຼາຍ​ຂໍ້ ​ໃນ​ການ​ກຳນົດອົງ​ປະກອບ​ລວມຂອງ​ວິ​ໄສ​ທັດປະຊາ​ຄົມ​ອາ​ຊຽນ ຫຼັງ​ປີ 2015 ​ເຊິ່ງ​ເປັນ​ພື້ນຖານ​ໃຫ້​ແກ່​ການ​ສືບ​ຕໍ່​ກໍ່ສ້າງ ​ແລະຫັນ​ເປັນ​ລະອຽດ​ ບັນດາ​ທິດ​ທາງ​ການ​ພັດທະນາ​ອາ​ຊຽນ ​ໃນ​ໄລຍະ 2016 - 2025. ຫວຽດນາມ​ກໍ່​ໄດ້​ສະ​ເໜີ​ໃຫ້​ຍູ້​ແຮງ​ການ​ຮ່ວມ​ມື​ລະຫວ່າງ​ອາ​ຊຽນ ກັບບັນດາ​ຄູ່​ຮ່ວມ ​ໃນ​ການ​ສະກັດ​ກັ້ນ ​ແລະ​ແກ້​ໄຂ​ສິ່ງ​ທ້າ​ທາຍ​ຕ່າງໆ​ເຊັ່ນ ຄວາມ​ສະຫງົບ ສະຖຽນ​ລະ​ພາບ, ຄວາມ​ປອດ​ໄພ​ໃນ​ການ​ເດີນ​ທະ​ເລ, ການ​ປ່ຽນ​ແປງສະພາບ​ດິນ​ຟ້າ​ອາກາດ, ຄວາມ​ໝັ້ນຄົງ​ດ້ານ​ແຫຼ່ງນ້ຳ, ​ໄພ​ທຳ​ມະ​ຊາດ, ​ໂລຄາ​ພະຍາດ,... ​ໃຫ້​ໄດ້​ຢ່າງ​ມີ​ປະສິດທິ​ຜົນ.

ທີ​ສາມ, ກ່ຽວ​ກັບ​ສະພາບ​ການ​ຢູ່​ພາກ​ພື້ນ, ຫວຽດນາມ​ໄດ້​ພ້ອມ​ກັນ​ກັບ​ບັນດາ​ປະ​ເທດ​ຢືນຢັນ​ຕົ້ນ​ສ່ວນລວມ​ແຫ່ງ​ຜົນ​ປະ​ໂຫຍ​ດຂອງ​ທຸກໆ​ປະ​ເທດ ທີ່ຢູ່​ໃນ​ພາກ​ພື້ນ​ແລະ​ນອກ​ພາກ​ພື້ນ ນັ້ນຄື​ການ​ຮັບປະກັນ​ສິ່ງ​ແວດ​ລ້ອມ​ສັນຕິພາບ ສະຖຽນ​ລະ​ພາບ ​ແລະ​ການ​ຮ່ວມ​ມື​ຢູ່​ພາກ​ພື້ນ, ​ໃນ​ນັ້ນມີ​ບັນຫາ​ສັນຕິພາບ ສະຖຽນ​ລະ​ພາບ ຄວາມ​ສະຫງົບ ຄວາມ​ປອດ​ໄພ ​ແລະ​ເສລີພາບ​ໃນ​ການ​ເດີນ​ທະ​ເລ​ ​ເດີນ​ອາກາດ ຢູ່​​ເຂດທະ​ເລ​ຕາ​ເວັນ​ອອກ; ບັນດາ​ຝ່າຍ​ທີ່​ກ່ຽວຂ້ອງ​ຕ້ອງ​ປະຕິບັດ​ຕາມກົດໝາຍ​ສາກົນ, ​ອະ​ນຸ​ສັນຍາ​ສະຫະ​ປະຊາ​ຊາດວ່າ​ດ້ວຍ​ກົດໝາຍ​ທະ​ເລ ປີ 1982 ຢ່າງ​ເຂັ້ມ​ງວດ; ​ແກ້​ໄຂ​ຂໍ້​ຂັດ​ແຍ່ງ​ດ້ວຍ​ສັນຕິ​ວິທີ; ບໍ່​ເປີດ​ກວ້າງ​ຄວາມ​ເຄັ່ງ​ຕຶງ​, ບໍ່​ເຮັດ​ໃຫ້​ສະພາບຄວາມ​ເຄັ່ງ​ຕຶງສັບສົນ​ຂຶ້ນ​ຕື່ມ; ປະຕິບັດ​ຖະ​ແຫຼ​ງການ DOC ຢ່າງ​ຄົບ​ຖ້ວນ​ແລະ​ມີ​ປະສິດທິ​ຜົນ, ກ່ອນ​ອື່ນ​ໝົດ​ແມ່ນປະຕິບັດມາດຕາ 5 ກ່ຽວ​ກັບ​ການ​ປະຕິບັດ​ຄວາມ​ອົດທົນ​ອົດ​ກັ້ນ​ໃນ DOC, ​ແລະ ບັນລຸ​ໄດ້​ປະ​ມວນ​ຂໍ້​ກຳນົດ COC ​ໂດຍ​ໄວ. ວິທີ​ເຂົ້າ​ເຖິງ​ບັນຫາ​ນີ້ຂອງ​ຫວຽດນາມ ​ຢູ່​ໃນ​ບັນດາ​ກອງ​ປະ​ຊຸມ​ທີ່​ກ່ຽວຂ້ອງ ​ໄດ້​ສະ​ແດງ​ໃຫ້​ເຫັນ​ເຖິງ​ລັກສະນະ​ຕັ້ງໜ້າ, ກໍ່ສ້າງ ​ແລະ​ຄວາມ​ຮັບຜິດຊອບ, ​ໄດ້​ຮັບ​ຄວາມ​ເຫັນ​ດີ​ເຫັນ​ພ້ອມ ​ແລະ​ ຊົມ​ເຊີຍ.

​ໃນ​ໄລຍະ​ເຂົ້າ​ຮ່ວມ​ກອງ​ປະຊຸມຄັ້ງ​ນີ້, ທ່ານນາຍົກລັດຖະມົນຕີ ຫງວຽນ​ເຕິ​ນຢູ໊ງ ຍັງ​ໄດ້ພົບ​ປະ​ກັບ​ການ​ນຳ​ຂອງ​ບາງ​ປະ​ເທດ ​ແລະ​ອົງການ​ຄູ່​ຮ່ວມ​ ເພື່ອ​ປຶກສາ​ຫາລືກ່ຽວ​ກັບ​ການ​ຮ່ວມ​ມື​ສອງ​ຝ່າຍ ກໍ່​ຄືຫາລື​ບັນຫາຕ່າງໆ​ທີ່​ສອງ​ຝ່າຍ​ມີ​ຄວາມ​ສົນ​ໃຈ.

* ຕອນ​ເຊົ້າ​ວັນ​ທີ 12 ພະຈິກ, ທ່ານນາຍົກລັດຖະມົນຕີ ຫງວຽນ​ເຕິ​ນຢູ໊ງ ​ໄດ້​ພົບ​ປະ​ກັບ​ທ່ານ ບັນ ​ກີມຸນ ​ເລຂາທິການ​ສະຫະ​ປະຊາ​ຊາດ.

​ໃນ​ທີ່​ການ​ພົບ​ປະ, ທ່ານນາຍົກລັດຖະມົນຕີ ຢືນຢັນປະຕິບັດ​ນະ​ໂຍບາຍ​ເປັນ​ເຈົ້າ​ການ​ເຊື່ອມ​ໂຍງ​ເຂົ້າ​ກັບ​ສາກົນ, ຫວຽດນາມ​ໄດ້​ແລະ​ຈະ​ເຂົ້າ​ເປັນ​ສະມາຊິກ​ທີ່​ມີ​ຄວາມ​ຮັບຜິດຊອບ​ ໃນ​ບັນດາ​ອົງກອນ​ທີ່​ສຳຄັນ ​ຂອງອົງການ​ສະຫະ​ປະຊາ​ຊາດ; ພ້ອມ​ກັນ​ນັ້ນ ກໍ່​ປະກອບສ່ວນ​ອັນ​ຕັ້ງໜ້າ​ເຂົ້າ​ໃນ​ການ​ກໍ່ສ້າງ​ບັນດາ​ແຜນ​ຍຸດ​ທະ​ສາດ ​ແລະ​ໂຄງການ​ດຳ​ເນີນ​ງານ​ ຂອງ​ສະຫະ​ປະຊາ​ຊາດ.

ທ່ານນາຍົກລັດຖະມົນຕີ ຫງວຽນ​ເຕິ​ນຢູ໊ງ ຢືນຢັນ​ຫວຽດນາມ​ມີ​ຄວາມ​ປະສົງ​ຢາກ​ສືບ​ຕໍ່​ໄດ້​ຮັບຄຳ​ປຶກສາ​ນະ​ໂຍບາຍ ​ແລະ ການຊ່ວຍ​ເຫຼືອ​ຕົວ​ຈິງ ​ຂອງ​ອົງການ​ສະຫະ​ປະຊາ​ຊາດ ​ໃຫ້​ແກ່​ຂົງ​ເຂດ​ຕ່າງໆ, ​ເປັນ​ຕົ້ນ​ແມ່ນ​ການ​ຫລຸດຜ່ອນ​ຄວາມທຸກ​ຍາກ​ແບບ​ຍືນ​ຍົງ, ການປ້ອງ​ກັນ​ໂລກ HIV/AIDS ​ແລະ​ການ​ປ່ຽນ​ແປງ​ສະພາບດິນຟ້າ​ອາກາດ; ມີ​ຄວາມ​ປະສົງ​ອອກ​ສະ​ໝັກຮັບ​ເລືອກ​ຕັ້ງ ​ເປັນສະມາຊິກຄະນະ​ມົນຕີ​ເສດຖະກິດ​ແລະ​ສັງຄົມ ​ແຫ່ງ​ສະຫະ​ປະຊາ​ຊາດ (ECOSOC) ສະ​ໄໝ​ປີ 2016 - 2018 ​ແລະ​ເປັນສະມາຊິກ​ບໍ່​ຖາວອນ ​ຂອງ​ຄະນະ​ມົນຕີ​ຄວາມ​ໝັ້ນຄົງ ​ແຫ່ງ​ສະຫະ​ປະຊາ​ຊາດ ສະ​ໄໝ​ປີ 2020 - 2021.

​ທ່ານ​ເລຂາທິການ ບັນ ​ກີມຸນ ຕີ​ລາຄາ​ສູງ​ຕໍ່​ຜົນງານ​ການ​ປະຕິບັດ​ເປົ້າ​ໝາຍ​ການ​ພັດທະນາ​ສະຫັດ​ສະຫວັດ​ຂອງ​ຫວຽດນາມ ​ເຊິ່ງ​ໄດ້​ເຮັດ​ໃຫ້​ຫວຽດນາມ​ກາຍ​ເປັນ​ໜຶ່ງ​ໃນ​ບັນດາ​ປະ​ເທດ ​ທີ່​ມີ​ຄວາມ​ເຕີບ​ໂຕ​ເສດຖະກິດ​ໄວ​ທີ່​ສຸດ​ໃນ​ພາກ​ພື້ນ.

ກ່ຽວ​ກັບ​ສະພາບ​ການ​ທະ​ເລ​ຕາ​ເວັນ​ອອກ, ທ່ານ​ເລຂາທິການ ບັນ ​ກີມຸນ ຢືນຢັນ​ທັດສະນະ​ຂອງ​ສະຫະ​ປະຊາ​ຊາດ​ທີ່​ວ່າ ການ​ຊ່ວງ​ຊິງ​ກັນ​ດ້ານ​ອຳນາດ​ອະທິປະ​ໄຕ​ໃນ​ທະ​ເລ​ຕາ​ເວັນ​ອອກ ຕ້ອງ​ໄດ້​ແກ້​ໄຂ​ບົນ​ພື້ນຖານ​ການ​ສົນທະນາ​ເຈລະຈາ​ກັນ, ບັນດາ​ຝ່າຍ​ທີ່​ກ່ຽວ​ບໍ່​ມີ​ການ​ກະທຳ​ກໍ່​ຄວາມ​ເຄັ່ງ​ຕຶງ; ທ່ານ​ຫວັງ​ວ່າ​ ກອງ​ປະຊຸມ​ຕ່າງໆ​ຢູ່​ພາກ​ພື້ນ ຈະ​​ເປັນ​ໂອກາດ​ດີເພື່ອ​ໃຫ້​ບັນດາ​ຝ່າຍ​ທີ່​ກ່ຽວຂ້ອງ ​ພ້ອມ​ກັນ​ແກ້​ໄຂບັນຫາ ບົນ​ພື້ນຖານ​ວິທີ​ເຂົ້າ​ເຖິງ​ບັນຫາ​ຕາມ​ທິດ​​ມຸ່ງ​ໜ້າ​ສູ່​ອະນາຄົດ ​ແລະ ສະຫະ​ປະຊາ​ຊາດ​​ໄດ້ກຽມ​ຄວາມ​ພ້ອມ​ໃຫ້ການ​ຊ່ວຍ​ເຫຼືອ ​ແລະ​ສະໜັບສະໜູນ​ໃນ​ບັນຫາ​ນີ້.

* ຕອນ​ແລງ​ຂອງ​ວັນ​ດຽວ​ກັນ, ທ່ານນາຍົກລັດຖະມົນຕີ ຫງວຽນ​ເຕິ​ນຢູ໊ງ ​ໄດ້​ພົບ​ປະ​ຢ່າງ​ເປັນ​ທາງ​ການ​ກັບທ່ານ​ ໂທ​ນີ ແອບ​ບອດ ນາຍົກລັດຖະມົນຕີອົດ​ສະຕຣາລີ.

ທ່ານນາຍົກລັດຖະມົນຕີ ຫງວຽນ​ເຕິ​ນຢູ໊ງ ສະ​ເໜີ​ນຳ​ຝ່າຍອົດ​ສະຕຣາລີ ຈົ່ງອຳນວຍ​ຄວາມ​ສະດວກ​ໃຫ້​ແກ່​ສິນຄ້າ​ສົ່ງ​ນອກ​ຂອງ​ຫວຽດນາມ ​ແລະ ​ເພີ່ມ​ຈຳນວນ​ທຶນ​ຮ່ຳຮຽນ​ໃຫ້​ແກ່​ນັກ​ສຶກສາ​ຫວຽດນາມ​ໄປ​ຮຽນ​ຢູ່​ປະ​ເທດອົດ​ສະຕຣາລີ.

ທ່ານນາຍົກລັດຖະມົນຕີ ຫງວຽນ​ເຕິ​ນຢູ໊ງ ຕີ​ລາຄາ​ສູງ​ຕໍ່​ການ​ທີ່ອົດ​ສະຕຣາລີ ​ສະໜອງ​ທຶນ​ຊ່ວຍ​ເຫຼືອ​ພັດທະນາ​ເປັນ​ທາງ​ການ (ODA) ​ໃຫ້​ແກ່​ຫວຽດນາມ ​ແລະສະ​ແດງ​ຄວາມ​ຫວັງ​ມ່າ ອົດ​ສະຕຣາລີຈະ​ສືບ​ຕໍ່ຊ່ວຍ​ເຫຼືອ​ຫວຽດນາມ​ພັດທະນາ​ເສດຖະກິດ - ສັງຄົມ​ແບບ​ຍືນ​ຍົງ ​ແລະ ຮັບ​ມື​ກັບ​ການ​ປ່ຽນ​ແປງສະພາບດິນ​ຟ້າ​ອາກາດ. ທ່ານນາຍົກລັດຖະມົນຕີ ສະ​ເໜີ​ໃຫ້​ສອງ​ປະ​ເທດ​ຮັບຮອງ​ເອົາ​ ແຜນງານການ​ກະທຳ​ລະຫວ່າງ​ສອງ​ປະ​ເທດ​ໃນ​ໄລຍະ​ສະ​ເພາະ​ໜ້າ ​ໂດຍ​ໄວ.

ກ່ຽວ​ກັບ​ບັນຫາ​ທະ​ເລ​ຕາ​ເວັນ​ອອກ, ທ່ານນາຍົກລັດຖະມົນຕີ ໂທ​ນີ ແອບ​ບອດ ຢືນຢັນ​ທັດສະນະ​ຂອງອົດ​ສະຕຣາລີ ສະໜັບສະໜູນ​ຢ່າງ​ແຂງ​ແຮງ​ຕໍ່ຫຼັກ​ໝັ້ນ​ຂອງ​ອາ​ຊຽນ ​ແລະ ຫວຽດນາມ ກ່ຽວ​ກັບ​ການ​ແກ້​ໄຂ​ຄວາມຂັດ​ແຍ່ງດ້ວຍ​ສັນຕິ​ວິທີ, ບົນ​ພື້ນຖານ​ກົດໝາຍ​ສາກົນ, ຮັກສາ​ສັນຕິ​ພາບ ສະຖຽນ​ລະ​ພາບ ຄວາມ​ສະຫງົບ ຄວາມປອດ​ໄພ ​ແລະ ​ເສລີພາບ​ໃນ​ການ​ເດີນ​ທະ​ເລ, ​ການເດີນ​ອາກາດ ​ຢູ່​​ເຂດທະ​ເລ​ຕາ​ເວັນ​ອອກ.

* ​ໃນ​ວັນ​ດຽວ​ກັນ​ນັ້ນ ຄື​ວັນ​ທີ 12 ພະຈິກ, ທ່ານນາຍົກລັດຖະມົນຕີ ຫງວຽນ​ເຕິ​ນຢູ໊ງ ​ໄດ້​ພົບ​ປະ​ເປັນ​ທາງ​ການ​ກັບທ່ານ ເດີມີຕຼີ ເມດເວເດບ ນາຍົກລັດຖະມົນຕີ​ແຫ່ງ​ສະຫະພັນຣັດ​ເຊຍ ​ເພື່ອ​ແລກ​ປ່ຽນມາດ​ຕະການ​ຕ່າງໆ ​ແນ​ໃສ່​ຊຸກຍູ້​ການ​ຮ່ວມ​ມື​ສອງ​ຝ່າຍ.

ທ່ານ​ນາຍົກລັດຖະມົນຕີທັງສອງ ​ໄດ້​ແລກປ່ຽນ​ຢ່າງ​ກວ້າງຂວາງ​ເລິກ​ເຊິ່ງ ​ກ່ຽວ​ກັບ​ມາດ​ຕະການ​ຕ່າງໆ ​ເພື່ອ​ຍູ້​ແຮງ​ການ​ພົວພັນ​ຄູ່​ຮ່ວມ​ຍຸດ​ທະ​ສາດ​ຮອບດ້ານ ລະຫວ່າງ​ສອງ​ປະ​ເທດ ​ໃນ​ບັນດາ​ຂົງ​ເຂດ ​ການ​ເມືອງ, ​ເສດຖະກິດ, ການ​ປ້ອງ​ກັນ​ຄວາມ​ສະຫງົບ-ປ້ອງ​ກັນຊາ​ດ, ການ​ສຶກສາ-ກໍ່ສ້າງ, ພະລັງງານ, ວິທະຍາສາດ ​ເຕັກ​ໂນ​ໂລຢີ.

ທ່ານນາຍົກລັດຖະມົນຕີ ຫງວຽນ​ເຕິ​ນຢູ໊ງ ສະ​ເໜີ​ໃຫ້​ສອງ​ຝ່າຍ​ພ້ອມ​ກັນຕັ້ງໜ້າ​ພະຍາຍາມ​ພັດທະນາ​ການ​ພົວພັນ​ຍິ່ງ​ຂຶ້ນ ​ແລະ​ໃຫ້​ໄດ້​ຮັບ​ຜົນ​ແທດ​ຈິງ ຖືກຕ້ອງຕາມ​ຈິດ​ໃຈ​ຄູ່ຮ່ວມ​ຍຸດ​ທະ​ສາດ​ຮອບດ້ານ; ຮີບ​ຮ່າງ​ສັນຍາ​ທີ່​ສຳຄັນ​ຕ່າງ​ໆໃຫ້​ສຳ​ເລັດ ​ເພື່ອ​ເຊັນ​ກັນ​ໃນ​ເວລາ​ທີ່​ຈະ​ມາ​ເຖິງ​ນີ້; ສ້າງ​ເງື່ອນ​ໄຂ​ອຳນວຍ​ຄວາມ​ສະດວກ​ໃຫ້​ແກ່​ກັນ ​ເພື່ອສຳເລັດ​ສິ້ນ​ສຸດ​ການ​ເຈລະຈາ ສັນຍາ​ການ​ຄ້າ​ເສລີ (FTA) ລະຫວ່າງ​ຫວຽດນາມ ​ແລະ ສະຫະພັນພາສີ​ສຸນ​ລະກາ​ກອນຣັດ​ເຊຍ - ​ເບ​ລາຣຸດຊີ - ກາຊັກ​ສະຖານ.

ກ່ຽວ​ກັບ​ບັນຫາ​ທະ​ເລ​ຕາ​ເວັນ​ອອກ, ທ່ານນາຍົກລັດຖະມົນຕີ ເດີມີຕຼີ ເມດເວເດບ ​ແບ່ງປັນ​ທັດສະນະ​ຂອງ​ຫວຽດນາມ ​ແລະ ອາ​ຊຽນ ກ່ຽວ​ກັບ​ການ​ແກ້​ໄຂ​ຄວາມຂັດ​ແຍ່ງ​ດ້ວຍ​ສັນຕິ​ວິທີ, ບົນ​ພື້ນຖານ​ປະຕິບັດ​ຕາມ​ກົດໝາຍ​ສາກົນ ​ແລະ​ທ່ານ​ກໍ່​ໄດ້​ສະ​ແດງ​ຄວາມ​ຫວັງ​ຢູ່​ສະ​ເໝີ​ວ່າ ສະພາບ​ການ​ຢູ່​ທະ​ເລ​ຕາ​ເວັນ​ອອກຍາມ​ໃດ​ກໍ່​ມີ​ຄວາມ​ໝັ້ນ​ທ່ຽງ​ເປັນ​ປົກກະຕິ.

* ວັນ​ທີ 13 ພະຈິກ, ທ່ານນາຍົກລັດຖະມົນຕີ ຫງວຽນ​ເຕິ​ນຢູ໊ງ ​ໄດ້​ພົບ​ປະ​ເປັນ​ທາງ​ການ​ກັບ​ທ່ານ ບາຣັກ ​ໂອ​ບາ​ມາ ປະທານາທິບໍດີ​ແຫ່ງ​ສະຫະລັດ​ອາ​ເມຣິກາ.

ຢູ່​ທີ່​ການ​ພົບ​ປະ, ທ່ານນາຍົກລັດຖະມົນຕີ ຫງວຽນ​ເຕິ​ນຢູ໊ງ ຕີ​ລາຄາ​ສູງ​ຕໍ່​ບົດບາດ​ຂອງ​ທ່ານປະທານາທິບໍດີ ບ.​ໂອ​ບາ​ມາ ​ແລະ ຢືນຢັນ​ວ່າ ຫວຽດນາມ​ຕັດສິນ​ໃຈພ້ອມ​ກັບສະຫະລັດ​ອາ​ເມຣິກາ ​ແລະ​ບັນດາ​ປະ​ເທດ​ອື່ນ​ ຍູ້​ແຮງ​ວິວັດ​ການ​ເຈລະຈາສັນຍາ​ຄູ່​ຮ່ວມ​ເສດຖະກິດ​ຂ້າມ​ປາຊີ​ຟິກ (TPP - ທີ​ປີ​ປີ) ບົນ​ພື້ນຖານ​ຮັບປະກັນ​ຄວາມ​ສົມ​ດູ​ນດ້ານ​ຜົນ​ປະ​ໂຫຍ​ດຂອງ​ບັນດາ​ຝ່າຍ​ທີ່​ເຂົ້າ​ຮ່ວມ ​ແລະ ​ໃຫ້​ບັນດາ​ປະ​ເທດ​ສະມາຊິກ​ທີ່​ກຳລັງ​ພັດທະນາ, ​ໃນ​ນັ້ນ​ມີ​ຫວຽດນາມ, ມີ​ເວລາ​ຫັນປ່ຽນ​ທີ່​ເໝາະ​ສົມ​ເພື່ອ​ປະຕິບັດ​ສັນຍາ.

ທ່ານນາຍົກລັດຖະມົນຕີ ສະ​ເໜີນຳທ່ານປະທານາທິບໍດີ ບ.​ໂອ​ບາ​ມາ ຈົ່ງ​ຊີ້​ນຳ​ຄະນະ​ເຈລະຈາ​ຂອງສະຫະລັດ​ອາ​ເມຣິກາ ຕອບ​ສະໜອງ​ຜົນ​ປະ​ໂຫຍ​ດຂອງ​ຫວຽດນາມ​ ກ່ຽວ​ກັບ​ການ​ເປີດ​ປະຕູ​ຕະຫຼາດ ​ແລະ ມີການ​ໂຍະຍານ​ທີ່​ຈຳ​ເປັນ​ສອດຄ່ອງ​ກັບ​ລະດັບ​ການ​ພັດທະນາ​ຂອງ​ຫວຽດນາມ.

ທ່ານນາຍົກລັດຖະມົນຕີ ຫງວຽນ​ເຕິ​ນຢູ໊ງ ກໍ່​ສະ​ເໜີ​ໃຫ້​ສະຫະລັດ​ອາ​ເມຣິກາສືບ​ຕໍ່​ເພີ່ມ​ງົບປະມານ​ໃຫ້​ແກ່​ການ​ເຄື່ອນ​ໄຫວລຶບລ້າງ​ທາດ​ພິດ ​ແລະ​ຊ່ວຍ​ເຫຼືອ​ຜູ້​ຖືກ​ທາດພິດສີ​ສົ້ມ-ດີ​ອອກ​ຊິນ ຢູ່​ຫວຽດນາມ, ຄົ້ນ​ຫາ​ແລະ​ທຳລາຍ​ລູກ​ລະ​ເບີດທີ່​ຖືກ​ຄ້າງ​ໄວ້​ແຕ່​ສະ​ໄໝ​ສົງຄາມ; ສະ​ເໜີ​ໃຫ້ສະຫະລັດ​ອາ​ເມຣິກາ​ເລີກ​ລ້າງ​ຄຳ​ສັ່ງ​ເກືອດ​ຫ້າມ​ການ​ຂົນ​ສົ່ງ​ອາວຸດ​ທຳລາຍ​ລ້າງ.

ທ່ານປະທານາທິບໍດີ ບ.​ໂອ​ບາ​ມາ ຢືນຢັນ​ວ່າສະຫະລັດ​ອາ​ເມຣິກາຢາກ​ເຫັນ​ປະ​ເທດ​ຫວຽດນາມ​ມີ​ການ​ພັດທະນາ​ຢ່າງ​ແຂງ​ແຮງ​ ວັດທະນາ​ຖາວອນ; ທ່ານ​ກໍ່​ໄດ້ໃຫ້​ຄຳ​ໝັ້ນ​ສັນຍາ​ວ່າ ຈະ​ຊຸກຍູ້​ການ​ພົວພັນ​ສອງ​ຝ່າຍ​ບົນ​ພື້ນຖານ​ບັນດາ​ຂົງ​ເຂດ​ບຸລິມະສິດ ທີ່​ໄດ້​ລະບຸ​ໄວ້​ໃນ​ການ​ພົວພັນ​ຄູ່​ຮ່ວມ​ຮອບດ້ານ ​ເພື່ອ​ຜົນ​ປະ​ໂຫຍ​ດຂອງ​ປະຊາຊົນ​ສອງ​ປະ​ເທດ.

ທ່ານປະທານາທິບໍດີ​ແຫ່ງສະຫະລັດ​ອາ​ເມຣິກາ ຢືນຢັນ​​ສືບຕໍ່​ຊ່ວຍ​ເຫຼືອ​ຫວຽດນາມ​ລຶບລ້າງ​​ທາດ​ພິດ​ດີ​ອອກຊິນ, ຄົ້ນ​ຫາ​ທຳລາຍ​ລູກ​ລະ​ເບີດ​ທີ່​ຍັງ​ບໍ່​ທັນ​ແຕກ, ຊົມ​ເຊີຍ​ຫວຽດນາມ​ເຂົ້າ​ຮ່ວມ​ໃນ​ບັນດາ​ອະນຸ​ສັນຍາ​ສະຫະ​ປະຊາ​ຊາດ​ວ່າ​ດ້ວຍ​ການ​ຕ້ານ​ການ​ທໍລະມານ ​ແລະ ຜູ້​ພິການ.

ກ່ຽວ​ກັບ​ສັນຍາ ທີ​ປີ​ປີ - TPP, ທ່ານປະທານາທິບໍດີ ບ.​ໂອ​ບາ​ມາ ຢືນຢັນ​ວ່າ ຈະ​ພິຈາລະ​ນາ​ໃຫ້​ການ​ໂຍະຍານທີ່​ຈຳ​ເປັນຈຳນວນ​ໜຶ່ງ​ແກ່​ຫວຽດນາມ ​ແລະ​ສອດຄ່ອງ​ກັບ​ຜົນ​ປະ​ໂຫຍ​ດຂອງ​ທັງ​ສອງ​ຝ່າຍ; ທ່ານປະທານາທິບໍດີ ສືບ​ຕໍ່​ຢືນຢັນ​ໃຫ້​ຄວາມ​ສຳຄັນ​ແກ່​ການ​ຮ່ວມ​ມືກັບ​ອະ​ນຸພາກ​ພື້ນ​ແມ່​ນ້ຳຂອງ, ​ໃນ​ນັ້ນ​ມີ​ການ​ຮັບປະກັນ​ການ​ນຳ​ໃຊ້​ແຫຼ່ງນ້ຳ​ຢ່າງ​ມີ​ປະສິດທິ​ຜົນ ​ແລະ​​ແບບຍືນ​ຍົງ, ​ແລະ​ຈະ​ສືບ​ຕໍ່​ຊ່ວຍ​ເຫຼືອ​ຫວຽດນາມ​ແລະ​ບັນດາ​ປະ​ເທດ​ຢູ່​ອະນຸ​ພາກ​ພື້ນ​ໃນ​ຂອບ​ຄວາມ​ຄິດ​ລິ​ເລີ່​ມ​ລຸ່ມ​ແມ່ນ້ຳຂອງ​.

ກ່ຽວ​ກັບ​ບັນຫາ​ທະ​ເລ​ຕາ​ເວັນ​ອອກ, ທ່ານນາຍົກລັດຖະມົນຕີ ຫງວຽນ​ເຕິ​ນຢູ໊ງ ຊົມ​ເຊີຍ ​ແລະ​ຕີ​ລາຄາ​ສູງ​ຕໍ່​ຫຼັກ​ໝັ້ນ​ອັນ​ຈະ​ແຈ້ງ​ຂອງສະຫະລັດ​ອາ​ເມຣິກາ, ສະ​ເໜີ​ໃຫ້ສະຫະລັດ​ອາ​ເມຣິກາ ​ແລະ​ບັນດາ​ປະ​ເທດ​ທີ່​ກ່ຽວຂ້ອງ ສືບ​ຕໍ່ປະກອບສ່ວນ​ຢ່າງ​ມີ​ປະສິດທິ​ຜົນ​ ເຂົ້າ​ໃນ​ການຮັກສາ​ສັນຕິພາບ ສະຖຽນ​ລະ​ພາບ ຄວາມ​ສະຫງົບ ຄວາມ​ປອດ​ໄພ ​ແລະ​ເສລີພາບ​ໃນ​ການ​ເດີນ​ທະ​ເລ, ສະ​ເໜີ​ໃຫ້​ບັນດາ​ຝ່າຍ​ທີ່​ກ່ຽວຂ້ອງ​ປະຕິບັດ​ການ​ອົດທົນ​ອົດ​ກັ້ນ, ​ແກ້​ໄຂ​ຂໍ້​ຂັດ​ແຍ່ງ​ດ້ວຍ​ສັນຕິ​ວິທີ, ປະຕິບັດ​ຕາມ​ກົດໝາຍ​ສາກົນ./.

ສັງ​ລວມ​ໂດຍ: ຮບ

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ