ວັນອາທິດ, 18/8/2019
ທ່ານຫງວຽນຝູຈ້ອງ ເລຂາທິການໃຫຍ່ພັກກອມມູນິດຫວຽດນາມ ຢ້ຽມຢາມສະຫະພັນລັດເຊຍ ຢ່າງເປັນທາງການ
6/12/2014 14:50' ສົ່ງ ພິມ
ທ່ານເລຂາທິການໃຫຍ່ຫງວຽນຝູຈ້ອງ ພົບປະກັບ ທ່ານປະທານາທິບໍດີ ວ.ປູຕີນ (ພາບ: TTXVN)

ການ​ຢ້ຽມຢາມ​ສະຫະພັນ​ລັດ​ເຊຍ​ເປັນ​ທາງ​ການ​ຄັ້ງ​ທຳ​ອິດ ​ໃນຖານະ​ຕຳ​ແໜ່​ງ​ເລຂາທິການ​ໃຫຍ່​ຂອງທ່ານ​ຫງວຽນ​ຝູຈ້ອງ ​ເພື່ອ​ແນ​ໃສ່​ຍູ້​ແຮງ​ການ​ພົວພັນ​ຮ່ວມ​ມື​ລະຫວ່າງ​ສອງ​ປະ​ເທດ ​ໃນ​ບັນດາ​ຂົງ​ເຂດ​ການ​ເມືອງ, ​ເສດຖະກິດ - ການ​ຄ້າ, ການ​ລົງທຶນ, ພະລັງງານ, ນ້ຳມັນ​ອາຍ​ແກ໊ດ, ​ໄຟຟ້າ​ປະລະ​ມານູ, ການ​ປ້ອງ​ກັນ​ຄວາມ​ສະຫງົບ, ປ້ອງ​ກັນ​ປະ​ເທດ ​ແລະ ຫຼາຍ​ຂົງ​ເຂດ​ອື່ນ​ອີກ; ຊຸກຍູ້​ການ​ຮ່ວມ​ມື​ລະຫວ່າງ​ບັນດາ​ທ້ອງ​ຖິ່ນ; ​ແລກປ່ຽນ​ຄວາມ​ຄິດ​ເຫັນ​ກ່ຽວ​ກັບ​ບັນດາ​ບັນຫາ​ສາກົນ ​ແລະ​ພາກ​ພື້ນ ຊຶ່ງ​ສອງ​ຝ່າຍ​ມີ​ຄວາມ​ສົນ​ໃຈ.

ພິທີ​ຕ້ອນຮັບ​ເປັນ​ທາງ​ການ​ໄດ້​ຈັດ​ຂຶ້ນ​ຢ່າງ​ສົມ​ກຽດ​ຢູ່​ທີ່​ສະໜາມ​ບິນ ​ເວີ​ນູ​ໂກ​ໂວ ວັນ​ທີ 23 ພິຈິກ.

ວັນ​ທີ 25 ພະຈິກ, ຢູ່​ທີ່​ນະຄອນ ​ໂຊ​ຈີ - ​ພາກ​ໃຕ້​ປະ​ເທດ​ລັດ​ເຊຍ, ທ່ານເລຂາ​ທິການ​ໃຫຍ່​ຫງວຽນ​ຝູຈ້ອງ ​ແລະ ຄະນະ​ຜູ້​ແທນ​ຂັ້ນ​ສູງ​ຫວຽດນາມ ​ໄດ້​ພົບ​ປະ​​ຫາລື​ກັບທ່ານ​ປະທານາທິບໍດີ ວະ​ລາ​ດີ​ເມຍ ປູ​ຕີນ, ພົບ​ປະ​ສົນທະນາ​ກັບ​ທ່ານ ​ເດີ​ມີ​ຕຼີ ​ເມດ​ເວ​ເດ​ບ ນາ​ຍັກ​ລັດຖະມົນຕີ, ປະທານ​ພັກ ປະ​ເທດ​ລັດ​ເຊຍ​ເອກະ​ພາບ.

ການ​ທີ່ທ່ານ​ປະທານາທິບໍດີ ວ.ປູ​ຕີນ ​ແລະ​ທ່ານ​ນາຍົກລັດຖະມົນຕີ ​​ເດີ​ມີ​ຕຼີ ​ເມດ​ເວ​ເດ​ບ ພົບ​ປະ​ກັບທ່ານເລຂາ​ທິການ​ໃຫຍ່​ຫງວຽນ​ຝູຈ້ອງ ຢູ່​ທີ່​ນະຄອນ ​ໂຊ​ຈີ ຊຶ່ງ​ເປັນສະຖານ​ທີ່​ໃຊ້​ສະ​ເພາະເພື່ອ​ຕ້ອນຮັບຜູ້ນຳ​ຂອງ​ບັນດາ​ປະ​ເທດ​ໃຫຍ່ ​ແລະ​ຄູ່​ຮ່ວມ​ທີ່​ສຳຄັນ​ໃນ​ໂລກ, ບັນດາຜູ້ນຳ​ຂອງ​ບັນດາ​ປະ​ເທດ​ທີ່​ສະໜິດສະໜົມ​ກັບ​ປະ​ເທດ​ລັດ​ເຊຍ​ນັ້ນ ​ໄດ້​ໃຫ້​ເຫັນ​ເຖິງ​ຄວາມ​ເອົາ​ໃຈ​ໃສ່​ເປັນ​ສຳຄັນ ​ແລະ​ມິດ​ຈິດ​ມິດ​ໃຈ​ອັນ​ເລິກ​ເຊິ່ງທີ່​ບັນດາ​ການ​ນຳ​ສະຫະພັນ​ລັດ​ເຊ​ຍ ມີ​ຕໍ່​ຫວຽດນາມ ​ແລະ​ສ່ວນ​ຕົວທ່ານເລຂາ​ທິການ​ໃຫຍ່ - ຜູ້ນຳ​ສູງ​ສຸດ​ຂອງພັກ​ກອມມູນິດ​ຫວຽດນາມ.

ຕາງໜ້າ​ລັດ, ລັດຖະບານ ​ແລະ​ປະຊາຊົນ​ລັດ​ເຊຍ, ທ່ານ​ປະທານາທິບໍດີ ວ.ປູ​ຕີນ ​ໄດ້​ຊົມ​ເຊີຍການມາ​ຢ້ຽມຢາມ​ປະ​ເທດ​ລັດ​ເຊຍ ຂອງທ່ານເລຂາ​ທິການ​ໃຫຍ່​ຫງວຽນ​ຝູຈ້ອງ ຢ່າງ​ສຸດ​ອົກ​ສຸດ​ໃຈ ​ແລະ​ຖື​ວ່າການ​ຢ້ຽມຢາມ​ຈະ​ສ້າງ​ໃຫ້​ມີກຳລັງ​ຊຸກ​ດັນ​​ໃໝ່, ປະກອບສ່ວນ​ເພີ່ມ​ທະວີ ​ແລະ​ເຮັດ​ໃຫ້ການ​ພົວພັນ​ຄູ່​ຮ່ວມ​ຍຸດ​ທະ​ສາດ​ຮອບດ້ານທີ່​ມີ​ລັກສະນະ​ພິ​ເສດ ລະຫວ່າງ​ຫວຽດນາມ​ແລະ​ສະຫະພັນ​ລັດ​ເຊຍ ​ເລິກ​ເຊິ່ງຂຶ້ນ​ຕື່ມ ​ໃນ​ເວລາ​ມໍ່​ໃກ້​ກັບ​ພິທີ​ສະ​ເຫຼີມສະຫຼອງວັນ​ສ້າງ​ຕັ້ງ​ສາຍ​ພົວພັນ​ທາງ​ການ​ທູດ​ລະຫວ່າງສ​ອງປະ​ເທດ ຄົບຮອບ 65 ປີ ​ໃນ​ເດືອນ​ມັງກອນ 2015; ທ່ານ​ປະທານາທິບໍດີ ກໍ່​ໄດ້​ສະ​ແດງ​ຄວາມຊົມ​ເຊີຍຢ່າງ​ສຸດ​ໃຈ​ຕໍ່​ຜົນສຳ​ເລັດ​ອັນ​ໃຫຍ່​ຫຼວງ​ທີ່​ຫວຽດນາມຍາດ​ມາ​ໄດ້​ໃນ​ເວລາ​ຜ່ານ​ມາ ​ແລະ​ບົດບາດຖານະ​ນັບ​ມື້​ນັບ​ສູງ​ຂອງ​ຫວຽດນາມ ​ໃນ​ທະວີບອາຊີ ​ແລະ​ໃນ​ໂລກ.

ທ່ານເລຂາ​ທິການ​ໃຫຍ່​ຫງວຽນ​ຝູຈ້ອງ ​ໄດ້ສະ​ແດງ​ຄວາມປິ​ຕິຊົມ​ຊື່ນ​ທີ່​ໄດ້​ມາ​ຢ້ຽມ​ຢານປະ​ເທດ​ລັດ​ເຊຍ ຄືນ​ໃໝ່​ໃນ​ຄັ້ງ​ນີ້; ຢືນຢັນ​ວ່າ ພັກ ລັດ ​ແລະ​ປະຊາຊົນ​ຫວຽດນາມ ຍາມ​ໃດ​ກໍ່​ຖະນຸຖະໜອມແລະ​ຮູ້​ບຸນ​ຄຸນ ຕໍ່​ການ​ສະໜັບສະໜູນ ຊ່ວຍ​ເຫຼືອ​ອັນ​ໃຫຍ່​ຫຼວງ​ແລະ​ມີ​ປະສິດທິ​ຜົນ ​ດ້ວຍ​ຄວາມ​ບໍລິສຸດ​ໃຈ​ ຂອງ​ປະຊາຊົນ​ສະຫະພາບ​ໂຊ​ວຽດ ກ່ອນ​ໜ້າ​ນີ້ ​ແລະ​ ຂອງ​ປະຊາຊົນ​ລັດ​ເຊຍ​ໃນ​ປັດຈຸບັນ; ຢືນຢັນ​ຫວຽດນາມ​ຍາມ​ໃດ​ກໍ່​ໃຫ້​ຄວາມ​ສຳຄັນ ​ແລະ​ມຸ່ງ​ຫວັງ​ປັບປຸງ ຊຸກຍູ້ການ​ພົວພັນ​ຄູ່​ຮ່ວມ​ຍຸດ​ທະ​ສາດ​ຮອບດ້ານ​ກັບ​ສະຫະພັນລັດ​ເຊຍ​ຍິ່ງ​ກວ່າ​ອີກ ​ແລະຖື​ວ່າ​ລັດ​ເຊຍ​ເປັນ​ໜຶ່ງ​ໃນ​ບັນດາ​ຄູ່​ຮ່ວມ​ທີ່​ສຳຄັນທີ່​ສຸດ ​ແລະ​ໄວ້ວາງ​ໃຈ​ໄດ້​ຂອງ​ຫວຽດນນາມ.

​ໃນ​ບັນຍາກາດ​ມິດ​ຕະພາບ, ​ເປີດ​ອົກ​ເປີດ​ໃຈ, ຊື່ສັດ​ສຸດຈະລິດ ​ແລະ​ເຊື່ອ​ຖື​ຊຶ່ງ​ກັນ​ແລະ​ກັນ, ທ່ານເລຂາ​ທິການ​ໃຫຍ່​ຫງວຽນ​ຝູຈ້ອງ ​ແລະ ທ່ານ​ປະທານາທິບໍດີ ວ.ປູ​ຕີນ ​ໄດ້​ແຈ້ງ​ໃຫ້​ກັນຊາ​ບກ່ຽວ​ກັບ​ສະພາບ​ການ​ຂອງ​ແຕ່ລະ​ປະ​ເທດ; ​ແລກປ່ຽນ​ຄວາມ​ຄິດ​ປະ​ເມີນ​ຄ່າ​ຜົນສຳ​ເລັດ​ຂອງ​ການ​ຮ່ວມ​ມື​ລະຫວ່າງ​ສອງ​ປະ​ເທດ​ ໃນ​ຊຸມ​ປີ​ທີ່​ຜ່ານ​ມາ, ​ເຫັນ​ດີ​ເປັນ​ເອກະ​ພາບ​ກ່ຽວ​ກັບ​ບັນດາ​ທິດ​ທາງ, ມາດ​ຕະການ​ອັນ​ພື້ນຖານ ​ເພື່ອ​ແນ​ໃສ່​ຍູ້​ແຮງ​ການ​ພົວພັນ​ລະຫວ່າງ​ສອງ​ປະ​ເທດ; ​ແລກປ່ຽນ​ຄວາມ​ຄິດເຫັນ​ກ່ຽວ​ກັບ​ບັນດາ​ບັນຫາສາກົນ ​ແລະ​ພາກ​ພື້ນ​ທີ່​ທັງ​ສອງ​ຝ່າຍ​ຕ່າງກໍ່​ສົນ​ໃຈ.

ທ່ານເລຂາ​ທິການ​ໃຫຍ່​ຫງວຽນ​ຝູຈ້ອງ ​ແລະ ທ່ານ​ປະທານາທິບໍດີ ວ.ປູ​ຕີນ ​ເຫັນ​ດີ​ເປັນ​ເອກະ​ພາບ​ໃຫ້​ທັດສະນະ​ວ່າ ການ​ພົວພັນ​ມິດຕະພາບແລະ​ຮ່ວມ​ມື​ຫວຽດນາມ - ລັດ​ເຊຍ ​ໄດ້​ຮັບ​ການ​ພິສູດ​ແລະ​ທົດ​ສອບ​ໂດຍ​ຜ່ານ​ກາລະ​ເວລາ, ​ໄດ້​ກາຍ​ເປັນ​ຊັບ​ສົມບັດ​ອັນ​ລ້ຳຄ່າຂອງ​ສອງ​ຊາດ ​ແລະ ​ເປັນ​ພື້ນຖານ​ອັນ​ໝັ້ນຄົງ, ​ເປັນ​ປະຖົມ​ປັດ​ໃຈ​ອັນ​ສຳຄັນ ​ເພື່ອ​ໃຫ້​ສອງ​ປະ​ເທດ​ສືບ​ຕໍ່​ປັບປຸງ ​ເພີ່ມ​ທະວີ​ການ​ພົວພັນ​ມິດຕະພາບ, ການ​ຮ່ວມ​ມື​ໃນ​​ໄລຍະ​ເວລາ​ຕໍ່ໜ້າ.

ການ​ນຳ​ທັງ​ສອງ​ໄດ້​ຕີ​ລາຄາ​ສູງ​ຕໍ່​ບັນດາ​ບາດກ້າວ​ພັດທະນາ​ຢ່າງ​ຈົບງາມ ຂອງ​ການ​ພົວພັນ​ຮ່ວມ​ມື​ລະຫວ່າງ​ສອງ​ປະ​ເທດ ​ໃນ​ເວລາ​ທີ່​ຜ່ານ​ມາ ​ໃນ​ທຸກ​ຂົງ​ເຂດ. ​ແຕ່​ວ່າ, ການ​ນຳທັງສອງ​ກໍ່​ຖື​ວ່າ ຜົນສຳ​ເລັດ​ທີ່ບັນລຸ​ໄດ້​ນັ້ນຍັງ​ໜ້ອຍ, ບໍ່​ສົມ​ຄູ່​ກັບ​ລະດັບ​ການ​ພັດທະນາ​ການ​ພົວພັນ​ດ້ານ​ການ​ເມືອງ​ທີ່​ດີງາມ, ກັບ​ຄວາມ​ສາມາດ​ບົ່ມ​ຊ້ອງ ​ແລະ​ຄວາມ​ມຸ່ງ​ຫວັງ​ຂອງ​ສອງ​ຝ່າຍ.

ການ​ນຳ​ຂອງ​ສອງ​ປະ​ເທດ​​ໄດ້ຕີ​ລາຄາ​ສູງ​ ບົດບາດ​ປະສານ​ງານ​ ​ຂອງ​ຄະນະ​ກຳມະການ​ການຮ່ວມ​ມື​ລະຫວ່າງ​ລັດຖະບານ ຫວຽດນາມ-ລັດ​ເຊຍ ກ່ຽວ​ກັບ​ການ​ຮ່ວມ​ມື​ໃນ​ຂົງ​ເຂດ​ເສດຖະກິດ-ການ​ຄ້າ ​ແລະ ວິທະຍາສາດ-​ເຕັກນິກ, ຕີ​ລາຄາ​ສູງ​ການ​ປະຕິບັດ​ງານຂອງ​ບັນດາ​ອະນຸ​ກຳມະການ ​ແລະ ໜ່ວຍ​ງານ​ສະ​ເພາະ​ກິດຂອງ​ຄະນະ​ກຳມະການ ​ໃນ​ການ​ກະກຽມ ​ແລະ​ຜັນ​ຂະຫຍາຍ​ບັນດາ​ໂຄງການ​ແລະ​​ແຜນ​ງານ​ການ​ຮ່ວມ​ມື; ສະ​ແດງ​ຄວາມ​ເພິ່ງ​ພໍ​ໃຈ​ກ່ຽວ​ກັບ​ຂະ​ບວນວິວັດ​ການ​ເຈລະຈາ​ ສັນຍາ​ວ່າ​ດ້ວຍ​ເຂດ​ການ​ຄ້າ​ເສລີ​ລະຫວ່າງ​ຫວຽດນາມ ​ແລະ​ບັນດາປະ​ເທດ​ສະມາຊິກສະຫະພັນພາສີ​ສຸນ​ລະກາ​ກອນ (ສະຫະພັນລັດ​ເຊຍ, ສາທາລະນະ​ລັດເບ​ລາຣຸດຊີ ​ແລະ​ ສາທາລະນະ​ລັດກາຊັກ​ສະຖານ); ຕີ​ລາຄາຢ່າງ​ຕັ້ງໜ້າ​ຕໍ່​ການ​ຜັນ​ຂະຫຍາຍ​ບັນຊີ​ລາຍ​ຊື່​ບັນດາ​ໜ້າ​ທີ່​ບຸລິມະສິດ ​ໃນ​ຫານ​ພົວພັນ​ຮ່ວມ​ມື​ລະຫວ່າງ​ສອງ​ປະ​ເທດ, ກໍ່​ຄື​ຜົນ​ຂອງ​ກອງ​ປະຊຸມ​ຄະນະ​ກຳມະການ​ຮ່ວມ​ມື​ລະຫວ່າງ​ລັດຖະບານ​ສອງ​ປະ​ເທດ ຄັ້ງ​ທີ 17 ຢູ່​ນະຄອນ ​ວະ​ລາ​ດີ​ໂວ​ສະ​ຕົກ ​ໃນ​ຕົ້ນ​ເດືອນກັນຍາ 2014.

ທ່ານເລຂາ​ທິການ​ໃຫຍ່​ຫງວຽນ​ຝູຈ້ອງ ​ແລະ ທ່ານ​ປະທານາທິບໍດີ ວ.ປູ​ຕີນ ​ໄດ້​ເປັນ​ເອກະ​ພາບ​ກັນ​ວາ​ງບັນດາ​ມາດ​ຕະການ​ອັນ​ລະອຽດ ​ເພື່ອ​ແນ​ໃສ່​ຍູ້​ແຮງ​ການ​ພົວພັນ​ມິດຕະພາບ ການ​ຮ່ວມ​ມື​ລະຫວ່າງ​ສອງ​ປະ​ເທດ. ສອງ​ຝ່າຍ​ເຫັນ​ດີ​ເປັນ​ເອກະ​ພາບ​ວ່າ ຕ້ອງ​ເສີມ​ຂະຫຍາຍ​ທ່າ​ໄດ້​ປຽບ​ຂອງ​ຕົນ​ຢ່າງ​ສຸດ​ຂີດ ​ເພື່ອຍົກ​ລວມຍອດ​ມູນ​ຄ່າ​ການ​ຄ້າ​ສອງ​ຝ່າຍ​ຂຶ້ນ​ເປັນ 7 ຕື້​ໂດ​ລາ​ສະຫະລັດ​ໃນ​ປີ 2015 ​ແລະ 10 ຕື້​ໂດ​ລາ​ສະຫະລັດ​ໃນ​ປີ 2020; ຍູ້​ແຮງ​ການ​ເຈລະຈາສັນຍາ​ການ​ຄ້າ​ເສລີ​ລະຫວ່າງ​ຫວຽດນາມ ​ແລະ​ສະຫະພັນພາສີ​ສຸນ​ລະກາ​ກອນ ​ເພື່ອ​ສຳ​ເລັດ​ສິ້ນ​ສຸດ​ການ​ເຈລະຈາ​ແລະ​ເຊັນ​ຊື່​ຫຍໍ້​ໃນ​ສັນຍາ​ນີ້​ໃນ​ທ້າຍ​ປີ 2014 ​ແລະ ລົງ​ນາມ​ເປັນ​ທາງ​ການ​ໃນ​ຕົ້ນ​ປີ 2015.

ສອງ​ຝ່າຍ​ຢືນຢັນ​ສືບ​ຕໍ່​ການ​ຮ່ວມ​ມື​ໃນ​ບັນດາຂົງ​ເຂດຂຸດ​ຄົ້ນ ​ແລະ​ປຸງ​ແຕ່ງ​ແຮ່​ທາດ, ປະດິດ​ເຄື່ອງ​ຈັກ, ​ເຊື້ອ​ເພີງ, ພະລັງງານ ​ແລະ​ບັນດາ​ຂົງ​ເຂດ​ອື່ນ; ​ເນັ້ນ​ໜັກ​ເຖິງ​ການ​ບຸລິມະສິດຂະຫຍາຍການ​ຮ່ວມ​ມື​ໃນ​ຂົງ​ເຂດ​ພະລັງງານ ດ້ວຍ​ຈຸດ​ໜັກ​ໃຈກາງ​ແມ່ນ​ການ​ຮ່ວມ​ມື​ດ້ານ​ນ້ຳມັນ​ອາຍ​ແກ໊ດ ​ແລະ​ໄຟຟ້າ​ປະລະມານູ.

ການ​ນຳ​ທັງ​ສອງ​ໄດ້​ຕີ​ລາຄາ​ສູງ​ການ​ຮ່ວມ​ມື​ໃນ​ຂົງ​ເຂດ​ນ້ຳມັນ​ອາຍ​ແກ໊ດ; ​ເປັນ​ເອກະ​ພາບ​ກັນ​ຊຸກຍູ້​ການ​ປະຕິບັດ​ ບັນດາ​ໂຄງການທີ່​ມີ​ຢູ່​ໃນ​ປັດ​ຈຸ​ບັນ ​ແລະ ​ເລີ່ມດຳ​ເນີນ​ບັນດາ​ໂຄງການ​ໃໝ່, ສ້າງ​ເງື່ອນ​ໄຂ​ອຳນວຍ​ຄວາມ​ສະດວກ ​ໃຫ້​ບັນດາ​ບໍລິສັດ​ນ້ຳມັນ​ອາຍ​ແກ໊ດ​ແຫ່ງ​ລັດ ຂອງ​ສອງ​ປະ​ເທດທີ່​ເຄື່ອນ​ໄຫວ​ໃນ​ດິນ​ແດນ​ຂອງ​ກັນ​ແລະ​ກັນ; ຕັດສິນຕົກລົງ​ເພີ່ມ​ທະວີ​ການ​ຮ່ວມ​ມື​ໃນ​ການ​ຄົ້ນຄວ້າຢັ້ງ​ເບິ່ງ ​ແລະ​ຂຸດ​ຄົ້ນ​ນ້ຳມັນ​ອາຍ​ແກ໊ດ ຢູ່​ໄຫຼ່​ທະວີບ​ຫວຽດນາມ ສອດຄ່ອງ​ກັບ​ກົດໝາຍ​ສາກົນ, ​ໃນ​ນັ້ນ​ມີອະ​ນຸ​ສັນຍາ​ສະຫະ​ປະຊາ​ຊາດວ່າ​ດ້ວຍ​ກົດໝາຍ​ທະ​ເລ ປີ 1982; ​ເປັນ​ເອກະ​ພາບ​ກັນ​ຍູ້​ແຮງ​ການ​ເຈລະຈາ ​ເພື່ອບັນລຸຂໍ້​ຕົກລົງ​ກ່ຽວ​ກັບ​ການ​ເປີດ​ກວ້າງ ​ແລະ​ຍົກ​ລະດັບ​ທັນ​ສະ​ໄໝ​ໃຫ້​ໂຮງງານ​ກັ່ນ​ຕອງ​ນ້ຳມັນ ຢູງກວັດ ຂອງຫວຽດນາມ.

​ໃນ​ຂົງ​ເຂດ​ໄຟຟ້າ​ປະລະມານູ, ສະຫະພັນ​ລັດ​ເຊຍ​ຢືນຢັນ​ສືບ​ຕໍ່​ຊ່ວຍ​ເຫຼືອ​ຫວຽດນາມ​ກໍ່ສ້າງພະນັກງານ ​ແລະ​ຍົກ​ສູງ​ຄວາມ​ສາມາດ​ໃຫ້​ແກ່​ນັກວິຊາການ, ນັກວິທະຍາສາດ ​ແລະ​ພະນັກງານບໍລິຫານ ​ໃນ​ຂົງ​ເຂດ​ນຳ​ໃຊ້​ພະລັງງານ​ປະລະມານູ​ເພື່ອ​ຈຸດປະສົງ​ສັນຕິພາບ; ​ເຫັນ​ດີ​ເປັນ​ເອກະ​ພາບ​ຊຸກຍູ້​ການ​ຮ່ວມ​ມື​ກໍ່ສ້າງ​ໂຮງງານ​ໄຟຟ້າ​ປະລະມານູ ນິງທ້ວນ ໝາຍ​ເລກ 1 ດ້ວຍ​ທິດ​ນຳ: ນຳ​ໃຊ້​ເຕັກ​ໂນ​ໂລ​ຢີທັນ​ສະ​ໄໝ, ຮັບປະກັນ​ຄວາມ​ປອດ​ໄພຢ່າງ​ເດັດ​ຖານ, ມີ​ປະສິດທິຜົນ ​ແລະ​ຄຸນະພາບ​ສູງ​ສຸດ; ຕັດສິນ​ຕົກ​ລົງ​ຍູ້​ແຮງ​ການ​ປະຕິບັດ​ໂຄງການ​ກໍ່ສ້າງ​ສູນ​ວິທະຍາສາດ ​ແລະ ​ເຕັກ​ໂນ​ໂລ​ຢີປະລະມານູ​ຢູ່​ຫວຽດນາມ.

ສອງ​ຝ່າຍ​ຕີ​ລາຄາ​ສູງ​ການ​ຮ່ວມ​ມື​ໃນ​ຂົງ​ເຂດ​ການ​ປ້ອງ​ກັນ​ປະ​ເທດ ​ແລະ ​ເຕັກນິກ​ການ​ທະຫານ ຊຶ່ງ​​ແມ່ນ​ຂົງ​ເຂດ​ຮ່ວມ​ມື​ທີ່​​ເປັນມູນ​ເຊື້ອ, ມີ​ບົດບາດ​ສຳ​ຄັນ, ມີ​ລະດັບ​ຄວາມ​ເຊື່ອ​ຖື​ສູງ ​ແລະ​ມີ​ປະສິດທິ​ຜົນ​ລະຫວ່າງ​ສອງ​ປະ​ເທດ, ສອງ​ຄ່ອງ​ກັບຂໍ້​ກຳນົດ​ຕ່າງໆ​ຂອງ​ກົດໝາຍ​ສາກົນ.

ສອງ​ຝ່າຍ​ຕົກລົງ​ເປີດ​ກວ້າງ​ການ​ຮ່ວມ​ມື​ໃນ​ຂົງ​ເຂດ​ກະສິກຳ, ສິນ​ໃນ​ນ້ຳ ​ແລະ ການ​ປ່າ​ໄມ້, ການ​ຜະລິດ​ປະສົມ​ອຸດສາຫະກຳ​ກະສິກຳ; ​ເພີ່ມ​ທະວີການ​ຮ່ວມ​ມື​ດ້ວຍ​ຫຼາຍ​ຮູບ​ແບບ​ໃນ​ຂົງ​ເຂດ​ການ​ເງິນ​ ສິນ​ເຊື່ອ; ຮ່ວມ​ມື​ໃນ​ຂົງ​ເຂດ​ການ​ສຶກສາ, ວິທະຍາສາດ ​ແລະ​ເຕັກ​ໂນ​ໂລ​ຢີ; ຮ່ວມ​ມື​ໃນ​ບັນດາ​ຂົງ​ເຂດ​ວັດທະນາ​ທຳ, ກິລາ, ການທ່ອງທ່ຽວ ​ແລະ ການສັງ​ສັນ​ລະຫວ່າງ​ປະຊາຊົນ​ສອງ​ປະ​ເທດ.

ການ​ນຳ​ຂອງ​ສອງ​ປະ​ເທດ​ໄດ້​ເຫັນ​ດີ​ເປັນ​ເອກະ​ພາບສືບ​ຕໍ່​ສ້າງ​ເງື່ອນ​ໄຂ​ອຳນວຍ​ຄວາມ​ສະດວກ​ໃຫ້​ພົນລະ​ເມືອງ​ຂອງ​ຫວຽດນາມ ​ແລະ ຂອງ​ລັດ​ເຊຍ ດຳລົງ​ຊີວິດ, ​ເຮັດ​ວຽກ ​ແລະ ຮ່ຳຮຽນ​ໃນ​ດິນ​ແດນ​ຂອງ​ກັນ​ແລະ​ກັນ, ສອງ​ຄ່ອງ​ກັບ​ກົດໝາຍ​ຂອງ​ແຕ່ລະ​ປະ​ເທດ, ບົນ​ຈິດ​ໃຈ​ມິດຕະພາບ ​ແລະ​ສອດຄ່ອງ​ກັບ​ສາຍພັວພັນຄູ່​ຮ່ວມ​ຍຸດ​ທະ​ສາດ​ຮອບດ້ານ​ຫວຽດນາມ-ລັດ​ເຊຍ.

ທ່ານເລຂາ​ທິການ​ໃຫຍ່​ຫງວຽນ​ຝູຈ້ອງ ​ແລະ ທ່ານ​ປະທານາທິບໍດີ ວ.ປູ​ຕີນ ​ໄດ້​ແລກປ່ຽນ​ແລະ​ບັນລຸ​ເຖິງ​ຄວາມ​ເຫັນ​ດີ​ເປັນ​ເອກະ​ພາບ​ສູງ ກ່ຽວ​ກັບ​ບັນດາ​ບັນຫາ​ສາກົນ ​ແລະ​ພາກ​ພື້ນ​ທີ່​ສອງ​ຝ່າຍ​ຕ່າງ​ກໍ່​ສົນ​ໃຈ; ຢືນຢັນ​ສື​ນຕໍ່​ເພີ່ມ​ທະວີ​ການ​ປະສານ​ສົມທົບ​ກັນ​ຢ່າງ​ແໜ້ນ​ແຟ້ນ ຢູ່​ທີ່​ເວທີ​ສາກົນ​ຕ່າງໆ ​ແນ​ໃສ​ກໍ່ສ້າງລະບຽບ​ໂລກ​ໃໝ່​ທີ່​ມີ​ຫຼາຍ​ຂົ້ວ, ສະ​ເໝີ​ພາບ, ປະຊາທິປະ​ໄຕ, ອີງ​ໃສ່​ຄວາມ​ສັກສິດ​ສູງ​ສຸດ​ຂອງ​ກົດໝາຍສາກົນ, ​ເຄົາລົບ​ນັບຖື​ອຳນາດ​ອະທິປະ​ໄຕ ​ແລະຜົນ​ປະ​ໂຫຍ​ດຊອບ​ດ້ວຍ​ກົດໝາຍ​ຂອງ​ທຸກໆ​ປະ​ເທດ ດ້ວຍ​ບົດບາດ​ເປັນ​ເຈົ້າພາ​ທາງ​ຂອງ​ອົງການສະຫະ​ປະຊາ​ຊາດ ຊຶ່ງ​ເປັນ​ກົນ​ໄກສາກົນ​​ໃນ​ການຮັກສາ​ສັນຕິພາບ ​ແລະ ຄວາມ​ສະຫງົບ​​ໃນ​ໂລກ.

ທ່ານເລຂາ​ທິການ​ໃຫຍ່​ຫງວຽນ​ຝູຈ້ອງ ສະ​ແດງ​ຄວາມ​ພ້ອມ​ຂອງ​ຫວຽດນາມ​ ​ສະໜັບສະໜູນ​ລັດ​ເຊຍ​ເພີ່ມ​ທະວີ​ບົດບາດ​ໃນ​ບັນດາ​ບັນຫາ​ຮັບປະກັນ​ສັນຕິພາບ, ສະຖຽນ​ລະ​ພາບ, ຄວາມ​ສະຫງົບ ​ແລະ​ການ​ຮ່ວມ​ມື​ຢູ່​ພາກ​ພື້ນ​ອາຊີ - ປາຊີ​ຟິກ ​ແລະ ​ຢູ່​ອາຊີ​ຕາ​ເວັນ​ອອກສຽງ​ໃຕ້.

ບັນດາ​ການ​ນຳ​ລັດ​ເຊຍ​ໃຫ້​ຄຳ​ໝັ້ນ​ສັນຍາ​ສະໜັບສະໜູນ​ຫວຽດນາມອອກ​ສະໝັກ​ຮັບ​ເລືອກ​ຕັ້ງ​ເປັນສະມາຊິກ​ຄະນະ​ມົນຕີ​ເສດຖະກິດ​ແລະ​ສັງຄົມ ​ແຫ່ງ​ສະຫະ​ປະຊາ​ຊາດ (ECOSOC) ສະ​ໄໝປີ 2016-2018 ​ແລະ ​ເປັນສະມາຊິກ​ບໍ່​ຖາ​ວອນ ຂອງ​ຄະນະ​ມົນຕີ​ຄວາມ​ໝັ້ນຄົງແຫ່ງ​ສະຫະ​ປະຊາ​ຊາດ ສະ​ໄໝ​ປີ 2020-2021.

ກ່ຽວ​ກັບ​ບັນຫາການ​ພິພາດດ້ານ​ດິນ​ແດນ​ຢູ່​ພາກພື້ນອາຊີ-ປາຊີ​ຟິກ, ​ໃນ​ນັ້ນ​ມີ​ບັນຫາ​ທະ​ເລ​ຕາ​ເວັນ​ອອກ, ສອງ​ຝ່າຍ​ເນັ້ນ​ໜັກ​ວ່າ​ ຕ້ອງ​ໄດ້​ແກ້​ໄຂ​ດ້ວຍ​ສັນ​ຕິ​ວິທີ, ບໍ່​ໃຊ້ກຳລັງ​ອາວຸດ ຫຼື​ນາບ​ຂູ່​ໃຊ້​ກຳລັງ​ອາວຸດ, ບົນ​ພື້ນຖານ​ກົດໝາຍ​ສາກົນ, ສອດຄ່ອງ​ກັບ​ກົດບັດສະຫະ​ປະຊາ​ຊາດ ​ແລະ ອະ​ນຸ​ສັນຍາ​ສະຫະ​ປະຊາ​ຊາດວ່າ​ດ້ວຍ​ກົດໝາຍ​ທະ​ເລ ປີ 1982, ​ແນ​ໃສ່​ຮັກສາ​ສັນຕິພາບ, ສະຖຽນ​ລະ​ພາບ, ​ເສລີພາບ, ຄວາມ​ສະຫງົບ ​ແລະ​ປອດ​ໄພ​ໃນ​ການ​ເດີນ​ທະ​ເລ​ຢູ່​ໃນ​ພາກ​ພື້ນ; ສອງ​ຝ່າຍ​ສະໜັບສະໜູນ​ການ​ປະຕິບັດ DOC ຢ່າງ​ຄົບ​ຖ້ວນ​ແລະ​ມີ​ປະສິດທິ​ຜົນ ​ແລະ​ກ້າວ​​ໄປເຖິງ​ການ​ຮັບຮອງ​ຜ່ານ COC ​ໂດຍ​ໄວ.

ກ່ອນ​ນັ້ນ, ຢູ່​ທຳ​ບຽບປະທານາທິບໍດີ ທີ່​ນະຄອນ ​ໂຊ​ຈີ, ທ່ານເລຂາ​ທິການ​ໃຫຍ່​ຫງວຽນ​ຝູຈ້ອງ ​ແລະ ທ່ານ​ປະທານາທິບໍດີ ວ.ປູ​ຕີນ ​ໄດ້​ດຳ​ເນີນ​ການ​ພົບ​ປະ​ຫາລື​ວົງ​ແຄບ.

ສຳ​ເລັດສິ້ນ​ສຸດ​ການ​ພົບ​ປະ​ຫາລື, ທ່ານເລຂາ​ທິການ​ໃຫຍ່​ຫງວຽນ​ຝູຈ້ອງ ​ແລະ ທ່ານ​ປະທານາທິບໍດີ ວ.ປູ​ຕີນ ​ໄດ້​ເປັນ​ສັກຂີ​ພະຍານ​ພິທີ​ລົງ​ນາມ​ໃນ​ ເອກະສານ​ການ​ຮ່ວມ​ມືລະຫວ່າງ​ສອງ​ປະ​ເທດ 9 ສະບັບ ​ແລະ ຂໍ້​ຕົກລົງ​ການ​ຮ່ວມ​ມືດ້ານນ້ຳມັນ​ອາຍ​ແກ໊ດ ບາງ​ສະບັບ.

ຕໍ່​ຈາກ​ນັ້ນ, ທ່ານເລຂາ​ທິການ​ໃຫຍ່​ຫງວຽນ​ຝູຈ້ອງ ​ແລະ ທ່ານ​ປະທານາທິບໍດີ ວ.ປູ​ຕີນ ​ໄດ້​ພົບ​ປະ​ກັບ​ນັກ​ຂ່າວ​ຂອງ​ສອງ​ປະ​ເທດ ​ເພື່ອ​ແຈ້ງຂ່າວ​ກ່ຽວ​ກັບ​ຜົນສຳ​ເລັດ​ອັນ​ດີງາມ​ຂອງ​ການ​ພົບ​ປະ​ຫາລື.

* ກ່ອນນັ້ນ, ຢູ່​ທີ່​ນະຄອນ​ໂຊ​ຈີ, ທ່ານເລຂາ​ທິການ​ໃຫຍ່​ຫງວຽນ​ຝູຈ້ອງ ​ໄດ້​ພົບ​ປະ​ກັບ​ທ່ານ ​ເດີມີ​ຕຼີ ​ເມ​ດ​ເວ​ເດ​ບ ນາຍົກລັດຖະມົນຕີ ປະທານ​ພັກ ປະ​ເທດ​ລັດ​ເຊຍ​ເອກະ​ພາບ ​ເພື່ອ​ແລກປ່ຽນ​ບັນດາ​ເນື້ອ​ໃນ​ການ​ຮ່ວມ​ມື​ລະຫວ່າງ​ສອງ​ປະ​ເທດ.

ສຳ​ເລັດ​ການຢ້ຽມ​ຢານ, ສອງ​ຝ່າຍ​ໄດ້​ອອກ​ຖະ​ແຫຼ​ງການ​ຮ່ວມ ກ່ຽວ​ກັບການ​ສືບ​ຕໍ່​ເພີ່ມ​ທະວີ​ການ​ພົວພັນ​ຄູ່​ຮ່ວມ​ຍຸດ​ທະ​ສາດ​ຮອບດ້ານລະຫວ່າງ​ຫວຽດນາມ ​ແລະ ສະຫະພັນ​ລັດ​ເຊຍ./.

ສັງ​ລວມ​ໂດຍ: ຫງວຽນ​ດຶກ

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ