ວັນອັງຄານ, 22/10/2019
ຫວຽດນາມ ແລະ ໄທ ເພີ່ມທະວີການຮ່ວມມືຮອບດ້ານ
9/12/2014 9:7' ສົ່ງ ພິມ
ທ່ານນາຍົກລັດຖະມົນຕີ ຫງວຽນເຕິນຢຸງ ແລະ ທ່ານນາຍົກລັດຖະມົນຕີ ປຣະຢຸດ ຈັນໂອຊາ (ພາບ: TTXVN)

ຫຼັງ​ຈາກ​ພິທີ​ຕ້ອນຮັບ​ເປັນ​ທາງ​ການ​ຢ່າງ​ສົມ​ກຽດ, ທ່ານ​ນາຍົກລັດຖະມົນຕີ ຫງວຽນ​ເຕິ​ນຢຸງ ​ໄດ້​ພົບ​ປະ​ຫາລື​ກັບທ່ານນາຍົກລັດຖະມົນຕີ ປຣະຢຸດ ຈັນ​ໂອຊາ.

​ໂດຍ​ຕາງໜ້າ​ລັດຖະບານ ​ແລະ ປະຊາຊົນ​ຫວຽດນາມ, ທ່ານ​ນາຍົກລັດຖະມົນຕີ ຫງວຽນ​ເຕິ​ຍຢຸງ ໄດ້​ສະ​ແດງ​ຄວາມຊົມ​ເຊີຍຢ່າງ​ສຸດ​ອົກ​ສຸດ​ໃຈ​ຕໍ່ ທ່ານນາຍົກລັດຖະມົນຕີ ປຣະຢຸດ ຈັນ​ໂອຊາ ​ແລະ ພັນ​ລະ​ຍາ ນຳພາຄະນະ​ຜູ້​ແທນ​ຂັ້ນ​ສູງ​ລັດຖະບານ​ແຫ່ງລາຊະ​ອານາຈັກ​ໄທ ມາ​ຢ້ຽມຢາມ​ປະ​ເທດ​ຫວຽດນາມ​ຢ່າງ​ເປັນ​ທາງ​ການ. ທ່ານ​ນາຍົກລັດຖະມົນຕີ ຫງວຽນ​ເຕິນຢຸງ ຕີ​ລາຄາ​ສູງ​ຕໍ່​ການ​ທີ່ທ່ານນາຍົກລັດຖະມົນຕີ ປຣະຢຸດ ຈັນ​ໂອຊາ ​ໄດ້​ເລືອກ​ເອົາ​ຫວຽດນາມ​ເປັນ​ປະ​ເທດ​​ເພື່ອມາ​ຢ້ຽມຢາມ​ເປັນ​ທາງ​ການ ​ພາຍຫຼັງ​ເຂົ້າ​ຮັບ​ຕຳ​ແໜ່​ງ​ນາ​ຍົກ​ລັດຖະມົນຕີ​ ແຫ່ງ​ລາຊະ​ອານາຈັກ​ໄທ; ຖື​ວ່າ​ນີ້​ເປັນ​ການສະ​ແດງ​ອອກ​ຢ່າງ​ມີ​ຊີວິດ​ຊີວາຂອງ​ສາຍ​ພົວພັນ​ຄູ່​ຮ່ວ​ມຍຸດ​ທະ​ສາດ​ລະຫວ່າ​ງຫວຽດນາມ ແລະ ​ໄທ.

ທ່ານນາຍົກລັດຖະມົນຕີ ປຣະຢຸດ ຈັນ​ໂອຊາ ສະ​ແດງ​ຄວາມ​ປິ​ຕິຊົມຊື່ນທີ່​ໄດ້ນຳພາຄະນະ​ຜູ້​ແທນ​ຂັ້ນ​ສູງ​ລັດຖະບານ​ ແຫ່ງລາຊະ​ອານາຈັກ​ໄທ ມາ​ຢ້ຽມຢາມ​ປະ​ເທດ​ຫວຽດນາມ​ຢ່າງ​ເປັນ​ທາງ​ການ; ທ່ານ​ສະ​ແດງຄວາມ​ຂອບ​ໃຈ​ຢ່າງ​ຈິງ​ໃຈ ຕໍ່​ລັດຖະບານ​ແລະ​ປະຊາຊົນ​ຫວຽດນາມ ທີ່​ໃຫ້ການ​ຕ້ອນຮັບ​ຢ່າງ​ອົບ​ອຸ່ນ, ສົມ​ກຽດ.

ສອງ​ຝ່າຍ​ຮູ້ສຶກພຶງ​ພໍ​ໃຈກ່ຽວ​ກັບ​ການ​ຮ່ວມ​ມື​ລະຫວ່າງ​ສອງ​ປະ​ເທດ​ໃນ​ທຸກ​ຂົງ​ເຂດ​ທີ່​ຂະຫຍາຍຕົວ​ຢ່າງ​ຈົບງາມ, ນັບ​ມື້​ນັບ​ໄດ້​ເປີດ​ກວ້າງ ​ແລະ ​ມີ​ປະສິດທິ​ຜົນ, ພິ​ເສດ​ແມ່ນ​ ນັບ​ແຕ່​ເມື່ອ​ສອງ​ປະ​ເທດ​ສ້າງ​ຕັ້ງ​ສາ​ຍພົວພັນ​ຄູ່​ຮ່ວມ​ຍຸດ​ທະ​ສາດ ​ໃນ​ໂອກາດທີ່​ທ່ານ​ເລຂາທິການ​ໃຫຍ່​ ຫງວຽນ​ຝູຈ້ອງ ​ໄປ​ຢ້ຽມຢາມ​ປະ​ເທດ​ໄທ​ໃນ​​ເດືອນ​ມິຖຸນາ 2013.

ສອງ​ຝ່າ​ຍເຫັນ​ດີ​ເປັນ​ເອກະ​ພາບ​ຈະ​ປະສານ​ສົມທົບ​ກັນ​ຢ່າງ​ແໜ້ນ​ແຟ້ນ, ສືບ​ຕໍ່​ເພີ່ມ​ທະວີ​ການ​ແລກປ່ຽນ​ຄະນະ​ຜູ້​ແທນ​ຂັ້ນ​ສູງ, ກໍ່​ຄື​ຜັນ​ຂະຫຍາຍ​ເປັນ​ຢ່າງ​ດີ​ບັນດາ​ກົນ​ໄກຮ່ວມ​ມື​ສອງ​ຝ່າຍ​ທີ່​ສຳຄັນ​ຄື ປະຊຸມ​ຄະນະ​ລັດຖະບານ​ຮ່ວມ​ກັນ, ຄະນະ​ກຳມະການ​ຮ່ວມ​ມື​ສອງ​ຝ່າຍ​ຫວຽດນາມ ແລະ ​ໄທ; ​ເປັນເອກະ​ພາບ​ກັນ​ຊີ້​ນຳບັນດາ​ກະຊວງ, ຂະ​ແໜງ​ການ, ທ້ອງ​ຖິ່ນ​ຂອງ​ສອງ​ຝ່າຍ ​ໃນ​ການ​ປະຕິບັດ​ບັນດາ​ຂໍ້​ຕົກລົງ​ຂອງ​ຂັ້ນ​ສູງ​ສອງ​ປະ​ເທດ​​ ໃຫ້​ໄດ້​ເປັນ​ຢ່າງ​ດີ; ກວດຄືນ, ປັບປຸງ​ເພີ່ມ​ເຕີນ ບູລະນະ​ບັນດາ​ກົນ​ໄກ ນະ​ໂຍບາຍ​ການ​ຮ່ວມ​ມື​ທີ່​ມີ​ຢູ່​ໃນ​ປັດຈຸບັນ, ​ເຊັນ​ຂໍ້​ຕົກລົງ​ການ​ຮ່ວມ​ມື​ໃໝ່​ຕາມ​ທິດສົ່ງ​ເສີມ ​ແລະ ອຳ​ນວຍ​ຄວາມ​ສະດວກ​ເພື່ອ​ຊຸກຍູ້​ການ​ລົງທຶນ ​ແລະ ການ​ຄ້າ​ລະຫວ່າງ​ສອງ​ປະ​ເທດ, ສູ້​ຊົນ​ຍົກ​ລວມຍອດ​ມູນ​ຄ່າ​ການ​ຄ້າ​ລະຫວ່າງ​ສອງ​ປະ​ເທດ​ຂຶ້ນ​​ໃຫ້​ບັນລຸ 15 ຕື້​ໂດລາ​ສະຫະລັດ ​ໃນ​ປີ 2020.

ຫວຽດນາມ​ຕີ​ລາຄາ​ສູງ​ຄວາມ​ມານະ​ພະຍາຍາມ​ຂອງ​ໄທ ​ໃນ​ການ​ປະສານງານ​ການ​ພົວພັນ​ອາ​ຊຽນ - ຈີນ ​ໃນ​ເວລາ​ທີ່​ຜ່ານ​ມາ, ປະກອບສ່ວນ​ຮັກສາ​ຄວາມ​ສາມັກ​ຄີ ​ແລະ ຄວາມ​ຄິດເຫັນຮ່ວມກັນ ຂອງ​ອາ​ຊຽນ ​ໃນ​ບັນຫາ​ທະ​ເລ​ຕາ​ເວັນ​ອອກ. ສອງ​ຝ່າຍ​ເຫັນ​ດີ​ເປັນ​ເອກະ​ພາບ​ສືບ​ຕໍ່​ປະສານ​ສົມທົບ​ກັນ​ຢ່າງ​ຕັ້ງໜ້າ ​ເພື່ອ​ປະກອບສ່ວນ​ແກ້​ໄຂ​ການ​ພິພາດ​ດ້ວຍ​ສັນຕິ​ພິທີ, ສອດຄ່ອງ​ກັບ​ກົດໝາຍ​ສາກົນ, ສົນທິສັນຍາ​ສະຫະ​ປະຊາ​ຊາດ​ວ່າ​ດ້ວຍ​ກົດໝາຍ​ທະ​ເລ​ປີ 1982; ປະຕິບັດ DOC ຢ່າງ​ຄົບ​ຖ້ວນ ​ແລະ ​ມີ​ປະສິດທິ​ຜົນ, ​ເຈລະຈາ​ກ່ຽວ​ກັບ COC ຢ່າງ​ມີ​ເນື້ອ​ແທ້​ໂດຍ​ໄວ.

ສອງ​ຝ່າຍ​ສະ​ແດງ​ຄວາມ​ພຶງ​ພໍ​ໃຈ ​ແລະ ​ເປັນ​ເອກະ​ພາບ​ປະສານ​ສົມທົບ​ກັນ​ຢ່າງ​ແໜ້​ນແຟ້ນ ​ແລະ ມີ​ປະສິດທິ​ຜົນ​ກວ່າ​ອີກ ​ໃນ​ການ​ແລກປ່ຽນ​ຂໍ້​ມູນ​ຂ່າວສານ ​ແລະ ການ​ເຄື່ອນ​ໄຫວ​ໃນ​ບັນດາ​ເວທີ​ປາ​ໄສ​ພາກ​ພື້ນ ​ແລະ​ສາກົນ.

ທ່ານນາຍົກລັດຖະມົນຕີ ປຣະຢຸດ ຈັນ​ໂອຊາ ຖື​ເປັນ​ກຽດ​ເຊື້ອ​ເຊີນ​ທ່ານ​ນາຍົກລັດຖະມົນຕີ ຫງວຽນ​ເຕິ​ນຢຸງ ມາ​ຮ່ວມ​ກອງ​ປະຊຸມ​ສຸດ​ຍອດ​ບັນດາ​ປະ​ເທດ​ອະນຸ​ພາກພື້ນ​ແມ່ນ້ຳຂອງ​ເປີດ​ກວ້າງ (GMS) ​ໃນ​ເດືອນ​ທັນວາ 2014 ​ແລະ​ໄປ​ຢ້ຽມຢາມ​ປະ​ເທດ​ໄທ​ຢ່າງ​ເປັນ​ທາງ​ການ, ​​ເປັນ​ປະທານ​ຮ່ວມ​ກອງ​ປະຊຸມ​ຄະນະ​ລັດຖະບານ​ຮ່ວມ ຄັ້ງ​ທີສາມ ປີ 2015. ທ່ານ​ນາຍົກລັດຖະມົນຕີ ຫງວຽນ​ເຕິ​ນຢຸງ ​ໄດ້​ສະ​ແດງ​ຄວາມ​ຂອບ​ໃຈ​ ແລະ ຍິນ​ດີ​ຮັບ​ຄຳ​ເຊີນ. ​ເວລາ​ລະອຽດ​ຂອງ​ການ​ຢ້ຽມຢາມ​ຈະ​ໄດ້​ຕົກລົງ​ກັນ​ໂດຍ​ຜ່ານ​ເສັ້ນທາງ​ການ​ທູດ.

​ພາຍຫຼັງ​ການ​ພົບ​ປະ​ຫາລື, ທັງ​ສອງ​ນາຍົກລັດຖະມົນຕີ​ໄດ້​ເປັນ​ສັກຂີ​ພິຍານ​ ໃນ​ພິທີການ​ລົງ​ນາມ​ເອກະສານ​ການ​ຮ່ວມ​ມື​ 3 ສະບັບ.

ສອງ​ຝ່າຍປະສານ​ສົມທົບ ​ແລະ ສະໜັບສະໜູນ​ກັນ​ໃນ​ບັນດາ​ເວທີ​ປາ​ໄສສາກົນ

​ໃນ​ວັນ​ດຽວ​ກັນ, ຢູ່​ທີ່​ທຳນຽບປະທານ​ປະ​ເທດ, ທ່ານ​ປະທານ​ປະ​ເທດ​ແຫ່ງ ສສ ຫວຽດນາມ ​ເຈືອງ​ເຕິ​ນຊາງ​ ໄດ້​ໃຫ້ການ​ຕ້ອນຮັບ ທ່ານປຣະຢຸດ ຈັນ​ໂອຊາ ນາຍົກລັດຖະມົນຕີ ​ແຫ່ງ​ລາຊະ​ອານາຈັກ​ໄທ.

​ໃນ​ການ​ຕ້ອນຮັບ, ທ່ານ​ປະທານ​ປະ​ເທດ​ໄດ້​ຕີ​ລາຄາ​ສູງ​ຜົນສຳ​ເລັດ​ຂອງ​ການ​ພົບ​ປະ​ຫາລື​ລະຫວ່າງ ທ່ານນາຍົກລັດຖະມົນຕີ ປຣະຢຸດ ຈັນ​ໂອຊາ ​ແລະ ທ່ານ​ນາຍົກລັດຖະມົນຕີ ຫງວຽນ​ເຕິ​ນຢຸງ; ຢັ້ງຢືນ​ຫວຽດນາມ​ໃຫ້​ຄວາມ​ສຳຄັນ ​ແລະ ກຽມ​ຄວາມ​ພ້ອມ​ເພີ່ມ​ທະວີ​ການ​ຮ່ວມ​ມື​ກັບປະ​ເທດ​ໄທ; ຈະ​ສ້າງ​ເງື່ອນ​ໄຂ​ອຳນວຍ​ຄວາມ​ສະດວກ​ ໃຫ້​ບັນດາ​ໂຄງການ​ຮ່ວມ​ມື​ລະຫວ່າງ​ບັນດາ​ກະຊວງ, ຂະ​ແໜງ​ການ ​ແລະ ວິ​ສາ​ຫະກິດ​ຂອງ​ສອງ​ປະ​ເທດ ​​ບັນລຸ​ປະສິດທິ​ຜົນ.

ທ່ານ​ປະທານ​ປະ​ເທດ​ກໍໄດ້​ເຫັນ​ດີ​ກັບ​ຂໍ້​ສະ​ເໜີ​ຂອງທ່ານນາຍົກລັດຖະມົນຕີ ປຣະຢຸດ ຈັນ​ໂອຊາ ກ່ຽວ​ກັບ​ການ​ເປີດ​ກວ້າງ​ການ​ຮ່ວມ​ມື​ລະຫວ່າງ​ບັນດາ​ປະ​ເທດ​ອາ​ຊຽນ ​ໃນ​ບັນດາ​ຂົງ​ເຂດ​ທີ່​ມີ​ກຳລັງ​ບົ່ມ​ຊ້ອນ, ມີ​ທ່າ​ແຮງ, ​ແລະ​ກໍ​ໄດ້​ສະ​ແດງ​ຄວາມ​ເຊື່ອ​ໝັ້ນ​ວ່າ ດ້ວຍ​ບົດບາດຜູ້​ປະສານ​ງານຢູ່​ໃນ​ບັນດາ​ເວທີ​ປາ​ໄສ​ພາກ​ພື້ນ ​ໄທ​ຈະ​ປະກອບສ່ວນ​ແກ້​ໄຂ​ບັນຫາ​ຕ່າງໆ​ທີ່​ຍັງ​ຄົງ​ຄ້າງ ​ເພື່ອ​ກໍ່ສ້າງ​ປະຊາ​ຄົມ​ອາ​ຊຽນ​ໃຫ້​ມີການ​ເຊື່ອນ​ຕໍ່​ກັນ.

ທ່ານປຣະຢຸດ ຈັນ​ໂອຊາ ນາຍົກລັດຖະມົນຕີ​ແຫ່ງ​ລາຊະ​ອານາຈັກ​ໄທ ຍົກ​ໃຫ້​ເຫັນ​ແຈ້ງວ່າ ​ໃນ​ສະພາບ​ການ​​ໂລກ​ແລະ​ພາກ​ພື້ນ​ມີ​ການ​ຜັນ​ປ່ຽນ​ຫຼາຍ ດັ່ງ​ນັ້ນ​​ເພີ່ມ​ທະວີ​ການ​ຮ່ວມ​ມື​ລະຫວ່າງ​ບັນດາ​ສະມາຊິກ​ອາ​ຊຽນ, ພິ​ເສດ​ແມ່ນ​ລະຫວ່າງ​ໄທ ​ແລະ ຫວຽດນາມ ຈຶ່ງມີ​ຄວາມ​ຈຳ​ເປັນ​ທີ່​ສຸດ. ທ່ານນາຍົກລັດຖະມົນຕີ​ຕີ​ລາຄາ​ສູງ​ຕໍ່​ການ​ທີ່​ຫວຽດນາມ​ໄດ້​ສ້າງ​ເງື່ອນ​ໄຂ​ອຳນວຍ​ຄວາມ​ສະດວກ ​ໃຫ້​ບັນດາ​ວິ​ສາ​ຫະກິດ​ໄທ ດຳ​ເນີນ​ການ​ເຄື່ອນ​ໄຫວ​ໃນ​ບັນດາ​ຂົງ​ເຂດນ້ຳມັນ​ເຊື້ອ​ເພີງ, ຂຸດ​ຄົ້ນ​ສິນ​ໃນ​ນ້ຳ, ລົງທຶນ​ເຮັດການ​ທຸລະ​ກິດ​ຢູ່​ຫວຽດນາມ.

ທ່ານນາຍົກລັດຖະມົນຕີ​ ປຣະຢຸດ ຈັນ​ໂອຊາ ກ່າວ​ວ່າ ສອງ​ປະ​ເທດ ​ໄທ ​ແລະ ຫວຽດນາມ ຕ້ອງ​ສົມທົບ​ກັນຢ່າງ​ແໜ້ນ​ແຟ້ນ ​ເພື່ອ​ສ້າງ​ບັນດາ​ສາຍ​ການທ່ອງທ່ຽວລຽນ​ຕິດ​ລະຫວ່າງ​ສອງ​ປະ​ເທດ; ສະ​ເໜີ​ໃຫ້​ສອງ​ປະ​ເທດ​ເພີ່ມ​ທະວີ​ການ​ເຊື່ອນຕໍ່ບັນດາ​ເສັ້ນທາງ​ບົກ, ທາງ​ທະ​ເລ​ທີ່​ມີ​ຢູ່​ແລ້ວ ​ເພື່ອ​ຂຸດ​ຄົ້ນ​ໃຫ້​ມີ​ປະສິດທິ​ຜົນ.

ທ່ານນາຍົກລັດຖະມົນຕີ​ ປຣະຢຸດ ຈັນ​ໂອຊາ ​ເນັ້ນ​ວ່າ ດ້ວຍ​ພື້ນຖານ​ການ​ພົວພັນ​ມິດຕະພາບອັນ​ເປັນ​ມູນ​ເຊື້ອທີ່​ມີຢູ່​ແລ້ວ ​ໄທ ​ແລະ ຫວຽດນາມ ຈະ​ປະສານ​ສົມທົບ​ກັນ​ເປັນ​ຢ່າງ​ດີ ​ແລະ ສະໜັບສະໜູນຊຶ່ງກັນ​ແລະ​ກັນ ​ໃນ​ບັນດາ​ເວທີ​ປາໄສ​ສາກົນ.

​ເພີ່ມ​ທະວີ​ການ​ແບ່ງປັນ​ບົດຮຽນ​ກ່ຽວ​ກັບວຽກງານ​ນິຕິບັນຍັດ ​ແລະ ການ​ຕິດຕາມ​ກວດກາ

​ໃນ​ວັນ​ດຽວ​ກັນ ຄື​ວັນ​ທີ 27 ພະຈິກ, ຢູ່​ທີ່​ສຳນັກງານ​ສະພາ​ແຫ່ງ​ຊາດ, ທ່ານ​ຫງວຽນຊິງ​ຮຸ່ງ ປະທານ​ສະພາ​ແຫ່ງ​ຊາດ ​ແຫ່ງ ສສ ຫວຽດນາມ ​ໄດ້​ຕ້ອນຮັບ​ທ່ານ ປຣະຢຸດ ຈັນ​ໂອຊາ ນາຍົກລັດຖະມົນຕີ​ແຫ່ງລາຊະ​ອານາຈັກ​ໄທ.

​ໃນ​ການ​ຮ່ວມ​ມື​ລະຫວ່າງ​ສະພາ​ແຫ່ງ​ຊາດ​ຂອງ​ສອງ​ປະ​ເທດ, ທ່ານ​ປະທານ​ສະພາ​ແຫ່ງ​ຊາດ ຫງວຽນ​ຊິງ​ຮຸ່ງ ​ແລະ ​ທ່ານນາຍົກລັດຖະມົນຕີ​ ປຣະຢຸດ ຈັນ​ໂອຊາ ​ໄດ້​ເຫັນ​ດີ​ເປັນ​ເອກະ​ພາບ​ຈະ​ເພີ່ມ​ທະວີ​ການ​ຮ່ວມ​ມືກັນ​ໃນ​ການ​ແລກປ່ຽນ​ຄະນະ​ຜູ້​ແທນ​ຂັ້ນ​ຕ່າງໆ ກໍ​ຄື​ໃນ​ການ​ແບ່ງປັນ​ບົດຮຽນ​ກ່ຽວ​ກັບ​ວຽກງານນິຕິບັນຍັດ ​ແລະ​ການ​ຕິດຕາມ​ກວດກາ.

ສອງ​ຝ່າຍ​ສືບ​ຕໍ່​ສະໜັບສະໜູນ​ຊຶ່ງ​ກັນ​ແລະ​ກັນ​ ໃນ​ຂອບ​ເວທີ​ປາໄສສະຫະພັນ​ລັດຖະສະພາ​ ແບບທະວິ​ພາຄີ ​ແລະ ພະຫຸ​ພາຄີ. ສະພາ​ແຫ່ງ​ຊາດ​ຂອງ​ສອງ​ປະ​ເທດ​ເພີ່ມ​ທະວີ​ການ​ຕິດຕາມ​ກວດກາ ​ເພື່ອ​ໃຫ້ການ​ປະຕິບັດ​ຂໍ້​ຕົກລົງ​ຮ່ວມ​ມື​ລະຫວ່າງ​ສອງ​ລັດຖະບານ, ​ເປັນ​ຕົ້ນ​ແມ່ນ​ບັນດາ​ໂຄງການ​ຄົມມະນາຄົມ, ກະສິກຳ, ການ​ລົງທຶນ ບັນລຸ​ປະສິດທິ​ຜົນ​ສູງ, ປະກອບສ່ວນ​ຮັບ​ໃຊ້​ໃຫ້​ແກ່​ຜົນ​ປະ​ໂຫຍ​ດຂອງ​ປະຊາຊົນ​ແຕ່ລະ​ປະ​ເທດ ​ແລະ ​ເພີ່ມ​ທະວີ​ຄວາມ​ເຫັນ​ດີ​ເຫັນ​ພ້ອມ​ກັນ ສາມັກຄີ​ກັນ​ໃນປະຊາ​ຄົມ​ອາ​ຊຽນ.

​ໃນ​ໂອກາດ​ນີ້, ຜ່ານ​ທ່ານ​ນາຍົກລັດຖະມົນຕີ ປຣະຢຸດ ຈັນ​ໂອຊາ, ທ່ານ​ປະທານ​ສະພາ​ແຫ່ງ​ຊາດ​ ຫງວຽນ​ຊິງ​ຮຸ່ງ ຖື​ເປັນ​ກຽດ​ເຊີນ​ການ​ນຳລັດຖະສະພາ ​ແຫ່ງລາຊະ​ອານາຈັກ​ໄທ ມາຫວຽດນາມຮ່ວມ​ກອງ​ປະຊຸມ​ໃຫຍ່ສະມັດຊາລັດຖະສະພາລະ​ຫວ່າງ​ປະ​ເທດ​​ໃນ​ໂລກ ຄັ້ງ​ທີ 132 (IPU - 132) ທີ່​ຈະ​ຈັດ​ຂຶ້ນ​ຢູ່​ນະຄອນ​ຮ່າ​ໂນ້ຍ ​ໃນລະດູບານ​ໃໝ່​ປີ 2015./.

ສັງ​ລວມ​ໂດຍ: ຮບ

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ