ວັນອາທິດ, 18/8/2019
ກອງປະຊຸມສະໄໝສາມັນເທື່ອທີ 8 ສະພາແຫ່ງຊາດຊຸດທີ XIII ແຫ່ງສສ ຫວຽດນາມ ໄດ້ສຳເລັດໂດຍພື້ນຖານ ລະບຽບວາລະການປະຊຸມທີ່ໄດ້ວາງໄວ້
10/12/2014 15:23' ສົ່ງ ພິມ
ວາລະອັດກອງປະຊຸມສະໄໝສາມັນເທື່ອທີ 8 ສະພາແຫ່ງຊາດຊຸດທີ XIII (ພາບ: TTXVN)

ກອງ​ປະຊຸມ​ສະ​ໄໝ​ສາມັນ​ເທື່ອ​ທີ 8 ສະພາ​ແຫ່ງ​ຊາດ​ຊຸດ​ທີ XIII ເປັນ​ກອງ​ປະຊຸມ​ສຸດ​ທ້າຍ​ໃນ​ປີ 2014 ​ແລະ ​ກໍ່​ເປັນ​ກອງ​ປະຊຸມ​ທີ​ສອງ​ແຫ່ງ​ການ​ຜັນ​ຂະຫຍາຍ​ລັດຖະທຳ​ມະ​ນູນສະບັບ​ປັບປຸງ ດັ່ງ​ນັ້ນ​ວຽກ​ງານ​ນິຕິບັນຍັດ​ຂອງ​ສະພາ​ແຫ່ງ​ຊາດ ຈຶ່ງສືບ​ຕໍ່​ໄດ້​ຮັບ​ຄວາມ​ເອົາ​ໃຈ​ໃສ່​ເປັນ​ພິ​ເສດ​. ​ໃນ​ກອງ​ປະຊຸມ​ຄັ້ງ​ນີ້, ສະພາ​ແຫ່ງ​ຊາດ ​ໄດ້​ໃຊ້ 2/3 ຂອງ​ເວລາ​ທັງ​ໝົດ ​ເພື່ອ​ພິຈາລະນາ​ປັບປຸງ ​ເພີ່ມ​ເຕີມ​ເອກະ​ສາ​ກົດໝາຍ ​ແລະ ປະກາດ​ໃຊ້​ເອກະ​ສາ​ກົດໝາຍ​ສະບັບ​ໃໝ່ ​ແນ​ໃສ່​ນຳ​ເອົາ​ຂໍ້​ກຳນົດ​ຕ່າງໆ​ຂອງ​ລັດຖະທຳ​ມະນູນ​ສະບັບ​ປັບປຸງ​ເຂົ້າ​ໃນ​ຊີວິດສັງຄົມ, ສ້າງ​ໃຫ້​ມີ​ການ​ຫັນປ່ຽນ​ຢ່າງ​ກວ້າງຂວາງ​ເລິກ​ເຊິ່ງ ​ແລະ ຕັ້ງໜ້າ​ໃນ​ບັນດາ​ຂົງ​ເຂດ​ຊີວິດ​ສັງຄົມ​ທັງ​ໝົດ. ​ໃນກອງ​ປະຊຸມເທື່ອ​​ນີ້​ ​ຮ່າງ​ກົດໝາຍຕ່າງໆ ​ທີ່ສະພາ​ແຫ່ງ​ຊາດ​ພິຈາລະນາ ຮັບຮອງ​ເອົາ ​ແລະ ​ປະກອບ​ຄວາມ​ຄິດ​ຄວາມ​ເຫັນ ​ແມ່ນມີຈຳນວນຫຼາຍ​ທີ່​ສຸດ​ທຽບ​ກັບບັນດາ​ກອງ​ປະຊຸມ​ສະ​ໄໝ​ສາມັນຄັ້ງ​ກ່ອນ ຂອງສະພາ​ແຫ່ງ​ຊາດ​ຊຸດ​ທີ XIII.

ປະຕິບັດ​ໜ້າ​ທີ່​ຕິດຕາມ​ກວດກາ​ສູງ​ສຸດ, ສະພາ​ແຫ່ງ​ຊາດ​ໄດ້​ພິຈາລະນາ​ລາຍ​ງານ​ວຽກ​ງານ​ຂອງ​ຄະນະ​ກຳມະການ​ປະຈຳສະພາ​ແຫ່ງ​ຊາດ, ສະພາ​ບັນດາ​ເຜົ່າ ​ແລະ ບັນດາ​ຄະນະ​ກຳມາ​ທິການ​ຂອງສະພາ​ແຫ່ງ​ຊາດ, ປະທານ​ສານ​ປະຊາຊົນ​ສູງ​ສຸດ, ​ໄອ​ຍະ​ການ​ປະຊາຊົນ​ສູງ​ສຸດ; ພິຈາລະນາ​ລາຍ​ງານຂອງ​ຄະນະ​ກຳມະການ​ສູນ​ກາງ​ແນວ​ໂຮມ​ປະ​ເທດ​ຊາດ​ຫວຽດນາມ ກ່ຽວ​ກັບ​ການ​ສັງ​ລວມຄວາມ​ຄິດ​ເຫັນ ຂໍ້​ສະ​ເໜີ​ແນະ​ຂອງ​ຜູ້​ປ່ອນ​ບັດ​ເລືອກ​ຕັ້ງ, ກ່ຽວ​ກັບ​ວຽກ​ງານ​ສືບຮູ້​ຄວາມ​ປາຖະໜາ​ຂອງ​ປະຊາຊົນ ​ແລະ ພົບ​ປະ​ກັບ​ພົນ​ລະ​ເມືອງ; ພິຈາລະນາ​ບັນດາລາຍ​ງານຂອງ​ລັດຖະບານ​ ກ່ຽວ​ກັບວຽກງານ​ປ້ອງ​ກັນ​ແລະຕ້ານ​ການ​ສໍ້​ລາດ​ບັງ​ຫຼວງ, ວຽກ​ງານ​ປະຕິບັດ​ຄະດີ​ທີ່​ສານ​ໄດ້​ປະກາດ​ໂທດ​ແລ້ວ, ວຽກ​ງານ​ປ້ອງ​ກັນ ຕ້ານ​ການລະ​ເມີດ​ກົດໝາຍ ​ແລະ ອາ​ຊະ​ຍາ​ກຳ, ວຽກ​ງານ​ປ້ອງ​ກັນ​ປະ​ເທດ ​ປ້ອງ​ກັນ​ຄວາມ​ສະຫງົບ, ວຽກ​ງານ​ການ​ຕ່າງປະ​ເທດ ປີ 2014; ການ​ປະຕິບັດ​ບັນດາ​ມະຕິ​ຂອງສະພາ​ແຫ່ງ​ຊາດ, ຂໍ້​ສະຫລຸບ​ຂອງ​ຄະນະ​ກຳມະການ​ປະຈຳສະພາ​ແຫ່ງ​ຊາດ ກ່ຽກັບ​ການ​ຖາມບັນຫາ​ແລະ​ຕອບ​ຄຳ​ຖາມ ​ໃນ​ກອງ​ປະຊຸມສະພາ​ແຫ່ງ​ຊາດ. ນອກ​ນັ້ນ, ສະພາ​ແຫ່ງ​ຊາດກໍ່​ໄດ້ພິຈາລະນາ​ລາຍ​ງານຂອງ​ຄະນະ​ກຳມະການ​ປະຈຳສະພາ​ແຫ່ງ​ຊາດ ກ່ຽວ​ກັບ​ຜົນ​ຂອງ​ການ​ຕິດຕາມ​ກວດກາ​ບັນຫາ​ສະ​ເພາະ “ການ​ປະຕິບັດ​ການຈັດ​ວາງ​ໂຄງ​ປະກອບ​ເສດຖະກິດ​ຄືນ​ໃໝ່ ​ໃນ​ຂົງ​ເຂດລົງທຶນ, ວິ​ສາ​ຫະກິດ​ແຫ່ງ​ລັດ ​ແລະ ລະບົບ​ທະນາຄານ ຕາມ​ມະຕິ​ສະບັບ​ທີ 10/2011/QH13 ຂອງສະພາ​ແຫ່ງ​ຊາດ ວ່າ​ດ້ວຍ​ແຜນການ​ພັດທະນາ​ເສດຖະກິດ - ສັງ​ຄົນ 5 ປີ 2011-2015”.

ສືບ​ຕໍ່​ປະຕິບັດມະຕິ​ສະບັບ​ທີ 35/2012/QH13 ຂອງສະພາ​ແຫ່ງ​ຊາດ ວ່າ​ດ້ວຍ​ການ​ເອົາ​ຄະ​ແນນ​ສຽງ​ໄວ້​ວາງ​ໃຈ, ລົງ​ຄະ​ແນນ​ສຽງ​ໄວ້​ວາງ​ໃຈ​ຕໍ່​ຜູ້​ດຳລົງ​ຕຳ​ແໜ່​ງ​ໂດຍສະພາ​ແຫ່ງ​ຊາດ, ສະພາ​ປະຊາຊົນ​ເລືອກ​ຕັ້ງຂຶ້ນ ຫຼື​ອະນຸມັດຮັບຮອງ, ​ໃນ​ກອງ​ປະຊຸມ​ສະ​ໄໝ​ສາມັນ​ເທື່ອ​ນີ້, ສະພາ​ແຫ່ງ​ຊາດ​ໄດ້​ດຳ​ເນີນ​ການ​ລົງ​ຄະ​ແນນ​ສຽງ​ໄວ້​ວາງ​​ໃຈ​ຕໍ່​ກັບ​ຜູ້​ດຳລົງ​ຕຳ​ແໜ່​ງປະຈຳການ 50 ຄົນ. ນີ້​ແມ່ນ​ເທື່ອ​ທີ​ສອງ​ທີ່ສະພາ​ແຫ່ງ​ຊາດ ປະຕິບັດ​ສິດ​ຕິດຕາມ​ກວດກາ​ສູງ​ສຸດ​ ກ່ຽວ​ກັບ​ວຽກ​ງານ​ບຸກຄະລາ​ກອນ. ຜົນ​ຂອງ​ການ​ລົງ​ຄະ​ແນນ​ສຽງ​ຖືກ​ປະກາດ​ເປັນ​ທາງ​ການ​ໃນລະບົບ​ສື່​ມວນ​ຊົນ ​ເພື່ອ​ໃຫ້​ປະຊາຊົນ​ຊາບ​ແລະ​ຕິດຕາມ​ກວດກາ.

ກ່ຽວ​ກັບ​ການ​ຊັກຖາມ​ແລະ​ຕອບ​ຄຳຊັກ​ຖາມ, ສະພາ​ແຫ່ງ​ຊາດ​ໄດ້​ໃຊ້​ເວລາ​ເຄິ່ງວັນ​ເພື່ອ​ຮັບ​ຟັງ​​ແລະ​ພິຈາລະນາລາຍ​ງານ ກ່ຽວ​ກັບການ​ປະຕິບັດ​ບັນດາມະຕິຂອງສະພາ​ແຫ່ງ​ຊາດ ວ່າ​ດ້ວຍ​ການຊັກຖາມ​ແລະ​ຕອບ​ຄຳຊັກ​ຖາມ​ໃນ​ກອງ​ປະຊຸມສະພາ​ແຫ່ງ​ຊາດ ​ແລະ​ໃນການ​ປະຊຸມ​ຄະນະ​ກຳມະການ​ປະຈຳສະພາ​ແຫ່ງ​ຊາດ; ດຳ​ເນີນ​ການ​ຊັກຖາມ​ໂດຍ​ກົງ​ຕໍ່​ທ່ານ​ລັດຖະມົນຕີ​ວ່າການ​ກະຊວງ​ອຸດສາຫະກຳ​ການ​ຄ້າ, ​ລັດຖະມົນຕີ​ວ່າການ​ກະຊວງພາຍ​​ໃນ, ​ລັດຖະມົນຕີ​ວ່າການ​ກະຊວງຄົມມະນາຄົມ​ຂົນ​ສົ່ງ, ​ລັດຖະມົນຕີ​ວ່າການ​ກະຊວງ​ແຮງ​ງານ ນັກຮົບ​ຜູ້​ເສຍ​ອົງຄະ ​ແລະ ສັງຄົມ. ທ່ານ​ນາຍົກລັດ​ຖະມົນຕີ ຫງວຽນ​ເຕິ​ນຢຸງ ​ໄດ້​ລາຍ​ງານ​ເພີ່ມ​ເຕີມ​ບາງ​ບັນຫາ ​ແລະ ຕອບ​ຄຳ​ຊັກຖາມ​ຂອງ​ສະມາຊິກສະພາ​ແຫ່ງ​ຊາດ; ບັນດາ​ລັດຖະມັນ​ຕີ ຫົວໜ້າ​ຂະ​ແໜງ​ການ​ອື່ນ​ກໍ່​ໄດ້​ເຂົ້າ​ຮ່ວມ​ການ​ອະທິບາຍ ທຳ​ຄວາມ​ກະຈ່າງ​ແຈ້ງ​ຕື່ມ​ອີກ​ກ່ຽວກັບບາງ​ບັນຫາທີ່​ກ່ຽວຂ້ອງ. ຫຼັງ​ຈາກນັ້ນ, ສະພາ​ແຫ່ງ​ຊາດ​ໄດ້​ຮັບຮອງ​ຜ່ານ​ມະຕິ​ຕົກລົງ​ວ່າ​ດ້ວຍການ​ຊັກຖາມ​ແລະ​ຕອບ​ຄຳຊັກ​ຖາມ, ຮຽກຮ້ອງ​ໃຫ້​ບັນດາ​ລັດຖະມົນຕີ, ຫົວໜ້າ​ຂະ​ແໜງ​ການ ຕ້ອງ​ເຂັ້ມ​ງວດ​ໃນ​ການຄົ້ນຄວ້າ​ຮັບ​ເອົາ​ຄວາມ​ຄິດ​ຄວາມເຫັນທີ່​ເໝາະ​ສົມ ​ຂອງ​ສະມາຊິກສະພາ​ແຫ່ງ​ຊາດ, ​ຮີບແກ້​ໄຂ​ຜ່ານ​ຜ່າ​ຂໍ້​ຈຳກັດ ​ຄວາມ​ຂາດ​ຕົກ​ບົກພ່ອງ, ຜັນ​ຂະຫຍາຍ​ປະຕິບັດ​ບັນດາ​ໜ້າ​ທີ່​ທີ່​ຂຶ້ນ​ກັບ​ຄວາມ​ຮັບຜິດຊອບ​ຂອງ​ຕົນ, ຂອງ​ຂະ​ແໜງການ​ຕົນ ​ແລະ ລາຍ​ງານ​ຕໍ່ສະພາ​ແຫ່ງ​ຊາດ​ໃນ​ກອງ​ປະຊຸມ​ຄັ້ງໜ້າ.

​ໃນ​ກອງ​ປະຊຸມ, ສະພາ​ແຫ່ງ​ຊາດ​ໄດ້​ພິຈາ​ລະ​ນາ ຕັດສິນ​ຕົກລົງ​ບັນດາ​ບັນຫາ​ສຳຄັນ ​ກ່ຽວ​ກັບ​ເສດຖະກິດ - ສັງຄົມ, ງົບປະມານ​ແຫ່ງ​ລັດ; ​ໂຄງການ​ປ່ຽນ​ແປງ​ໃໝ່​ຫຼັກສູດ, ປຶ້ມ​ຫຼັກສູດ​ການ​ຮຽນ​ການ​ສອນ​ສາມັນ​ສຶກສາ; ​ແຜນ​ນະ​ໂຍບາຍ​ລົງທຶນ​ກໍ່ສ້າງ​ສະໜາມ​ບິນ​ສາກົນ ລອງ​ແທ່ງ.

ກ່ຽວ​ກັບ​ແຜນ​ນະ​ໂຍບາຍ​ລົງທຶນ​ກໍ່ສ້າງ​ສະໜາມ​ບິນ​ສາກົນ ລອງ​ແທ່ງ, ສະພາ​ແຫ່ງ​ຊາດສະ​ເໜີ​ໃຫ້​ລັດຖະບານ​ສືບ​ຕໍ່​ໄຈ້​ແຍກ, ຄົ້ນຄວ້າ​ຄວາມ​ຄິດ​ຄວາມ​ເຫັນ​ຂອງ​ສະ​ມາຊິກ​ສະພາ​ແຫ່ງຊາດ, ປັບປຸງ​ບູລະນະ​ໂຄງການ. ພາຍຫຼັງກອງ​ປະຊຸມຄັ້ງນີ້, ບັນດາ​ອົງການ​ທີ່​ກ່ຽວຂ້ອງ​ຈະ​ຈັດ​ຕັ້ງ​ບັນດາ​ກອງ​ປະຊຸມ​ສຳ​ມະ​ນາ, ຄົ້ນຄວ້າ​ທາ​ບທາມ​ຄວາມ​ຄິດ​ເຫັນ​ຂອງ​ຜູ້​ຊ່ຽວຊານ; ກະຊວງ​ຄົມມະນາຄົມ​ຂົນ​ສົ່ງ​ຈະ​ມີ​ລາຍ​ງານ​ອະທິບາຍ, ທຳ​ຄວາມ​ກະຈ່າງ​ແຈ້ງ ​ກ່ຽວ​ກັບ​ບັນດາ​ເນື້ອ​ໃນທີ່​ສະມາຊິກສະພາ​ແຫ່ງ​ຊາດ ​ໄດ້​ຍົກ​ຂຶ້ນມາ​ໃນ​ວາລະ​ການປະຊຸມ​ພິຈາລະນາ​ຕ່າງໆ ​ເພື່ອ​ລາຍ​ງານ​ໃຫ້ສະພາ​ແຫ່ງ​ຊາດ ພິຈາລະນາ, ຮັບຮອງ​ຜ່ານ​ໃນ​ກອງ​ປະຊຸມ​ສະ​ໄໝ​ສາມັນ​ຄັ້ງໜ້າ.

ກ່າວ​ຄຳ​ປາ​ໄສ​ໃນວາລະອັດ​ກອງ​ປະຊຸມ, ທ່ານປະທານ​ສະພາ​ແຫ່ງ​ຊາດ ຫງວຽນ​ຊິ​ຮຸ່ງ ຊີ້​ແຈ້ງວ່າ ກອງ​ປະຊຸມ​ສະ​ໄໝ​ສາມັນ​ເທື່ອ​ທີ 8 ​ໄດ້​ສຳ​ເລັດ​ຜົນ, ສ້າງ​ຄວາມ​ປະທັບໃຈ​ອັນ​ຈົບ​ງານ​ໃນ​ແນວ​ຄິດ​ຈິດ​ໃຈ​ຂອງ​ປະຊາຊົນ ​ແລະ ຜູ້​ປ່ອນ​ບັດ​ເລືອກ​ຕັ້ງ​ທົ່ວ​ປະ​ເທດ ກ່ຽວ​ກັບ​ນ້ຳ​ໃຈ​ສາມັກຄີ, ການ​ເຮັດ​ວຽກ​​ແບບປະຊາທິປະ​ໄຕ ມີ​ສະຕິ​ປັນຍາ ດ້ວຍ​ຄວາມ​ຮັບຜິດຊອບສູງ ຂ​ອງບັນດາ​ທ່ານສະມາຊິກສະພາ​ແຫ່ງ​ຊາດ; ກ່ຽວ​ກັບ​ຄວາມ​ເຂັ້ມ​ງວດ​ໃນ​ການ​ຮັບ​ເອົາ​ຄວາມຄິດຄວາມ​ເຫັນ ຂໍ້​ສະ​ເໜີ​ແນະ ​ຂອງ​ຜູ້​ປ່ອນ​ບັດ​ເລືອກ​ຕັ້ງ ​ແລະ ຂອງ​ສະມາຊິກສະພາ​ແຫ່ງ​ຊາດ. ສະພາ​ແຫ່ງ​ຊາດ​ໄດ້​ພິຈາລະນາ ​ແລະ​ຕັດສິນ​ຕົກລົງ​ບັນດາ​ເນື້ອ​ໃນ​ສຳຄັນ​ຂອງ​ປະ​ເທດ​ຊາດ ​ກໍ່​ຄື​ບັນດາ​ບັນຫາ​ຈຳ​ເປັນຮີບ​ດ່ວນ, ຕອບ​ສະໜອງ​ຄວາມ​ມຸ່ງ​ມາດ​ປາຖະໜາ​ຂອງ​ຜູ້​ປ່ອນ​ບັດ​ເລືອກ​ຕັ້ງ ​ແລະ ສະມາຊິກສະພາ​ແຫ່ງ​ຊາດ.

ສະພາ​ແຫ່ງ​ຊາດກຳນົດ ​ແລະ ຮຽກຮ້ອງ​ໃຫ້​ປະຕິບັດ​ຈຸດໝາຍ​ສັງ​ລວ​ມຂອງ​ປີ 2015 ຄື​ ຕ້ອງ​ສືບ​ຕໍ່​ຮັກສາ​ສະຖຽນ​ລະ​ພາບ​ຂອງ​ເສດຖະກິດ​ມະຫາ​ພາກ, ສຸມ​ໃສ່​ແກ້​​ໄຂ​ຄວາມ​ຫຍຸ້ງຍາກ​ໃນ​ການ​ຜະ​ລິດ ທຸລະ​ກິດ; ຜັນ​ຂະຫຍາຍ​ບັນດາ​ການ​ບຸກທະລຸ​ຍຸດ​ທະ​ສາດ​ຢ່າງຮີບ​ດ່ວນ ​ແລະ​ມີ​ປະສິດທິ​ຜົນ; ຍົກ​ສູງ​ຄຸນ​ນະພາ​ບ ປະ​ສິດທິ​ຜົນ ​ແລະ ກຳລັງ​ແກ່ງ​ແຍ້​ງຂອງ​ຜະລິດ​ຕະພັນ ຂອງ​ວິສາ​ຫະກິດ ​ແລະ ຂອງ​ລະບົບ​ເສດຖະກິດ; ຍົກ​ສູງ​ປະສິດທິ​ຜົນ​ຂອງ​ການ​ລົງທຶນ​ພາກ​ລັດ, ຮັບປະກັນ​ໃຫ້​ໜີ້​ສິນ​ຫຼວງ ໜີ້​ສິນ​ລັດຖະບານ ໜິ້ສິນ​ຕ່າງປະ​ເທດ​ຂອງ​ຫວຽດນາມ​ຢູ່​ໃນ​ລະດັບ​ປອດ​ໄພ; ຍູ້​ແຮງ​ການ​ປະຕິ​ຮູບ​ດ້ານ​ການ​ບໍລິຫານ ປະຕິ​ຮູບການ​ຍຸດຕິ​ທຳ, ປ້ອງ​ກັນ​ແລະ​ຕ້ານ​ການ​ສໍ້​ລາດ​ບັງ​ຫຼວງ, ປະຕິບັດ​ການ​ປະຢັດ, ຕ້ານ​ການ​ຟຸມ​ເຟືອຍ; ຍົກ​ສູງ​ປະ​ສິດທິ​ຜົນ​ຂອງ​ວຽກ​ງານ​ການ​ຕ່າງປະ​ເທດ ​ແລະ​ການ​ຮ່ວມ​ມື​ສາກົນ; ​ເພີ່ມ​ທະວິ​ກຳລັງ​​ແຮງຂອງ​ການ​ປ້ອງ​ກັນ​ປະ​ເທດ ປ້ອງ​ກັນ​ຄວາ​ງສະຫງົບ​ຂອງ​ປະ​ເທດ​ຊາດ, ປົກ​ປັກ​ຮັກສາ​ເອກະລາດ ອຳນາດ​ອະທິປະ​ໄຕຂອງ​ຊາດ ຄວາມສະຫງົບ​ດ້ານ​ການ​ເມືອງ ຄວາມ​​ເປັນ​ລະບຽບ​ລຽບລ້ອຍ ປອດ​ໄພ​ສັງຄົມ ​ໃຫ້ໄດ້​ຢ່າງ​ໝັ້ນຄົງ.

ທ່ານປະທານ​ສະພາ​ແຫ່ງ​ຊາດ ກໍ​ໄດ້​ຖື​ເປັນ​ກຽດ​ສະ​ເໜີ​ນຳ​ບັນດາ​ສະມາຊິກ​ສະ​ພາ​ແຫ່ງ​ຊາດ ຈົງ​ຍາດ​ແຍ້​ງ​ເວລາ​ ​ເພື່ອລາຍ​ງານ​ຜົນ​ຂອງ​ກອງ​ປະຊຸມ​ ໃຫ້​ຜູ້​ປ່ອນ​ບັດ​ເລືອກ​ຕັ້ງ​ທົ່ວ​ປະ​ເທດ ​ຊາບ​ຢ່າງ​ທັນ​ການ, ພ້ອມ​ກັນ​ນັ້ນ​ກໍ​ສືບ​ຕໍ່​ປົວ​ແປງ ປ່ຽນ​ແປງ​ໃໝ່​ເນື້ອ​ໃນ ຮູບ​ການ​ພົບ​ປະ​ກັບ​ຜູ້​ປ່ອນ​ບັດ​ເລືອກ​ຕັ້ງ ​ແລະ ຕິດຕາມ​ກວດກາ​ຢ່າງ​ແໜ້ນ​ແຟ້ນຕໍ່​ການ​ປະຕິບັດ​ຂໍ້​ສະ​ເໜີ​ແນະ​ຕ່າງໆ ຂອງ​ຜູ້​ປ່ອນ​ບັດ​ເລືອກ​ຕັ້ງ.

ປະ​ເທດ​ຊາດກຳລັງ​ຢືນ​ຢູ່​ຕໍ່ໜ້າ​ໂອກາດ ສິ່ງ​ທ້າ​ທາຍ ​ແລະ ​ໂຊກ​ດີ​ໃໝ່, ສະພາ​ແຫ່ງ​ຊາດ​ເຊື່ອ​ໝັ້ນ​ວ່າ ດ້ວຍ​ຄວາມ​​ເປັນ​ເອກະ​ພາບ ຮ່ວມ​ແຮງ​ຮ່ວມ​ໃຈ​ຂອງ​ທົ່ວ​ພັກ ທົ່ວ​ປວງ​ຊົນ ທົ່ວ​ກອງທັບ, ຫວຽດນາມ​ຈະ​ຜ່ານ​ຜ່າ​ຄວາມ​ຫຍຸ້ງຍາກ​ທຸກ​ຢ່າງ, ປະຕິບັດ​ແຜນການ​ພັດທະນາ​ເສດຖະກິດ - ສັງຄົມ ປີ 2015 ​ແລະ 5 ປີ 2011-2015 ຢ່າງ​ສຳ​ເລັດ​ມີ​ໄຊ, ສ້າງ​ທ່າ​ແລະ​ກຳລັງ​ແຮງ​ໃໝ່​ເພື່ອ​ໃຫ້​ປະ​ເທດຊາດ​ສືບ​ຕໍ່​ຂະຫຍາຍຕົວຢ່າງ​ໄວ ​ແລະ​ໝັ້ນ​ທ່ຽງ​ໃນ​ຊຸມ​ປີ​​ໜ້າ./.

ສັງ​ລວມ​ໂດຍ: ĐN

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ