ວັນອາທິດ, 18/8/2019
ຮົງກາລີຮັບຮູ້ເສດຖະກິດຕະຫຼາດອັນຄົບຖ້ວນ ຂອງຫວຽດນາມ
19/12/2014 8:28' ສົ່ງ ພິມ
ທ່ານປະທານປະເທດ ເຈືອງເຕິນຊາງ ແລະ ທ່ານປະທານາທິບໍດີ ອາເດີ ຈານົດ. (ພາບ: TTXVN)

ໃນ​ເວລາຢູ່​ຢ້ຽມຢາມ​ຫວຽດນາມ, ທ່ານປະທານາທິບໍດີ​ ອາ​ເດີ ຈາ​ນົດ ​ໄດ້​ພົບ​ປະ​ຫາລື​ກັບທ່ານປະທານ​ປະ​ເທດ ​ເຈືອງ​ເຕິ​ນຊາງ; ພົບ​ປະ​ສົນທະນາ​ກັບ​ທ່ານ​ປະທານ​ສະພາ​ແຫ່ງ​ຊາດ ຫງວຽນ​ຊິງ​ຮຸ່ງ, ທ່ານ​ນາຍົກລັດ​ຖະມົນຕີ ຫງວຽນ​ເຕິ​ນຢຸ໊ງ.

ຢູ່​ທີ່​ການ​ພົບ​ປະ​ກັບ​ການ​ນຳ​ຂັ້ນ​ສູງ​ຂອງ​ຫວຽດນາມ, ສອງ​ຝ່າ​ຍ​ໄດ້​ແຈ້ງ​ໃຫ້​ກັນຊາ​ບກ່ຽວ​ກັບ​ສະພາບ​ການ​ຂອງ​ແຕ່ລະ​ປະ​ເທດ; ສະ​ແດງ​ຄວາມ​ພຶງ​ພໍ​ໃຈ​ກ່ຽວ​ກັບ​ການ​ພົວພັນ​ມິດຕະພາບ​ອັນ​ຈົບງາມລະຫວ່າງ​ສອງ​ປະ​ເທດ​ໃນ​ເວລາ​ທີ່​ຜ່ານ​ມາ; ຢືນຢັນຄວາມ​ເອົາ​ໃຈ​ໃສ່​ເປັນ​ສຳຄັນ​ເຖິງ​ການ​ພັດທະນາ​ການ​ພົວພັນມິດຕະພາບ​ອັນ​ເປັນ​ມູນ​ເຊື້ອ ​ແລະ ການ​ຮ່ວ​ມມື​ຫຼາຍ​ດ້ານ​ລະຫວ່າງ​ສອງ​ປະ​ເທດ.

ສອງ​ຝ່າຍ​ເປັນ​ເອກະ​ພາບຈະ​ສົມທົບ​ກັນຈັດ​ຕັ້ງ​​ການ​ເຄື່ອນ​ໄຫວຕ່າງໆໃນ​ປີ 2015 ​ເພື່ອ​ສະ​ເຫຼີມສະຫຼອງວັນ​ສ້າງ​ຕັ້ງ​ການ​ພົວພັນ​ທາງ​ການ​ທູດ​ ລະຫວ່າງ​ສອງ​ປະ​ເທດ​ຄົບຮອບ 65 ປີ​ ເຊັ່ນ ງານ​ວາງສະ​ແດງ​ຮູບ​ພາບ, ສັບປະດາ​ສາຍຮູບ​ເງົາ, ​ແລກປ່ຽນ​ຄະນະ​ສິລະ​ປະກຳ ​ແນ​ໃສ່​ເພີ່ມ​ທະວີ​ຄວາມ​ເຂົ້າ​ໃຈ​ຊຶ່ງ​ກັນ​ແລະ​ກັນ; ​ເປັນ​ເອກະສັນ​ກັນເພີ່ມ​ທະວີ​ການ​ຮ່ວມ​ມືດ້ານ​ການ​ສຶກສາ - ກໍ່ສ້າງ, ​ໃນ​ຂົງ​ເຂດ​ຮ່ວມ​ມື​ທີ່​ມີ​ມູນ​ເຊື້ອ​ລະຫວ່າງ​ສອງ​ປະ​ເທດ, ກໍ່​ຄື​ຮ່ວມ​ມື​ໃນ​ບັນດາ​ຂົງ​ເຂດ​ການ​ພັດທະນາ, ວິທະຍາສາດ - ​ເຕັກ​ນິກ, ປ້ອງ​ກັນ​ຄວາມ​ສະຫງົບ ປ້ອງ​ກັນ​ປະ​ເທດ, ຊັບພະຍາກອນ​ທຳ​ມະ​ຊາດ - ສິ່ງ​ແວດ​ລ້ອມ, ສາທາລະນະ​ສຸກ, ກະສິກຳ...

ສອງ​ຝ່າຍ​ເປັນ​ເອກະສັນ​ຊຸກຍູ້​ການ​ພົວພັນ​ຮ່ວມ​ມື​ລະຫວ່າງ​ສອງ​ອົງການ​ນິຕິບັນຍັດ​ຍິ່ງກວ່າ​ອີກ; ຍົກ​ສູງ​ປະສິດທິ​ຜົນ​ການ​ເຄື່ອນ​​ໄຫວ​ ຂອງ​ຄະນະ​ກຳມະການ​ຮ່ວມ​ລັດຖະບານ ​ເພື່ອ​ປະຕິບັດ​ບັນດາ​ຂໍ້​ຕົກລົງ ​ແລະ​ຄຳ​ໝັ້ນ​ສັນຍາ​ຕ່າງໆ ​ລະຫວ່າງ​ສອງ​ປະ​ເທດ​ໃຫ້​ປະກົດ​ເປັນ​ຈິງ​ໂດຍ​ໄວ.

ຫວຽດນາມ​ສະ​ເໜີ​ໃຫ້ ຮົງກາລີ​ສະໜັບສະໜູນ, ຊຸກ​ຍູ້​ເພື່ອ​ສຳ​​ເລັດ​ການ​ເຈລະຈາ ​ແລະ ​ເຊັນ​ສັນຍາ​ການ​ຄ້າ​ເສລີ​ຫວຽດນາມ - ອີ​ຢູ ​ໂດຍ​ໄວ.

ສອງ​ຝ່າຍກໍ່​ໄດ້​ແລກປ່ຽນ​ກ່ຽວ​ກັບ​ບາງ​ບັນຫາ​ສາກົນ ​ແລະ ພາກ​ພື້ນ​ທີ່​ທັງ​ສອງ​ຝ່າຍ​ມີ​ຄວາມ​ສົນ​ໃຈ, ​ໃນ​ນັ້ນ​ມີ​ບັນຫາ​ທະ​ເລ​ຕາ​ເວັນ​ອອກ; ​ເປັນ​ເອກະສັນ​ກັນ​ໃຫ້​ທັດສະນະ​ວ່າ ທຸກການ​ພິພາດຊ່ວງ​ຊີງ​ກັນຄວນ​ໄດ້​ແກ້​ໄຂ​ດ້ວຍ​ສັນຕິ​ວິທີ, ບົນ​ພື້ນຖານ​ກົດໝາຍ​ສາກົນ, ​ເປັນ​ຕົ້ນ​ແມ່ນ ​ອະນຸ​ສັນຍາ​ສະຫະ​ປະຊາ​ຊາດ​ວ່າ​ດ້ວຍ​ກົດໝາຍ​ທະ​ເລ ປີ 1982, ຖະ​ແຫຼງການ​ກ່ຽວ​ກັບ​ການປະພຶດຂອງ​ບັນດາ​ຝ່າຍ​ຢູ່​ທະ​ເລ​ຕາ​ເວັນ​ອອກ (DOC)  ​ແລະ ສ້າງປະມວນ​ຂໍ້​ກຳນົດ​ກ່ຽວ​ກັບການປະພຶດ (COC) ຂຶ້ນ​ໂດຍ​ໄວ.

​ໃນ​ຂອບ​ການ​ຢ້ຽມຢາມ, ຢູ່​ທີ່​ຮ່າ​ໂນ້ຍ, ທ່ານປະທານາທິບໍດີ​ ​ອາ​ເດີ ຈາ​ນົດ ພ້ອມ​ກັບ​ຄະນະ​ຜູ້​ແທນ​ຂັ້ນ​ສູງ​ແຫ່ງ​ລັດຮົງ​ກາລີ ​ໄດ້​ວາງ​ພວງມາລາ​ທີ່​ອະນຸສາວະລີ​ວິລະ​ຊົນຜູ້ເສຍສະຫຼະ​ຊີວິດ​ເພື່ອ​ຊາດ; ​ເຂົ້າ​ຮ່ວມ​ກອງ​ປະຊຸມ​ວົງມົນ​ກ່ຽວ​ກັບ​ແຫຼ່ງນ້ຳ ​ແລະ ວິທີ​ແກ້​ໄຂ, ພົບ​ປະ​ກັບ​ສະມາຄົມ​ມິດຕະພາບ​ຫວຽດນາມ - ຮົງ​ກາລີ.

ທ່ານປະທານາທິບໍດີ​ຮົງ​ກາລີ ​ໄດ້​ພົບປະ​ກັບ​ ທ່ານຫງວຽນ​ເຖຖາວ​ ປະທານ​ຄະນະ​ກຳມະການ​ປະຊາຊົນ​ນະຄອນ​ຮ່າ​ໂນ້ຍ, ທ່ານ ເລ ຮວ່າງ​ກວັນ ປະທານ​ຄະນະ​ກຳມະການ​ປະຊາຊົນ​ນະຄອນ​ໂຮ່ຈີ​ມິນ​, ທ່ານ​ ດຣ. ​ເຈິ່ນ​ ເຖ ງອກ ເລຂາຄະນະ​ພັກ​ແຂວງ​ຕ່ຽນຢາງ ​ແລະ ​ໄປ​ຢາມ​ໂບຮານ​ສະຖານ​ບາງ​ແຫ່ງ​ຢູ່ ຮ່າ​ໂນ້ຍ, ນະຄອນ​ໂຮ່ຈີ​ມິນ ​ແລະ ຕຽນ​ຢ່າງ.

​ໃນການ​ຢ້ຽມຢາມ, ສອງ​ຝ່າຍ​ໄດ້​ລົງ​ນາມ​ໃນ​ເອກະສານ​ການ​ຮ່ວມ​ມື​ບາງ​ສະບັບ ກ່ຽວກັບການ​ກະສິກຳ, ອຸດສາຫະກຳ, ສື່​ຂ່າວ​ໂທລະ​ຄົມມະນາຄົມ, ຮ່ວມ​ມື​ທາງ​ດ້ານ​ວຽກ​ງານຫຼັກ​ຊັບ.../.

ສັງ​ລວມ​ໂດຍ PV

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ