ວັນອາທິດ, 18/8/2019
ການຢ້ຽມຢາມ ສ.ເກົາຫຼີ ຢ່າງເປັນທາງການ ຂອງທ່ານນາຍົກລັດຖະມົນຕີ ແຫ່ງ ສສ.ຫວຽດນາມ ສຳເລັດຜົນຢ່າງຈົບງາມ
4/1/2015 11:23' ສົ່ງ ພິມ
ທ່ານນາງ ພັກ ກຶນຮະເຢ ປະທານາທິບໍດີ ແຫ່ງ ສ.ເກົາຫຼີ ຕ້ອນຮັບທ່ານ ຫງວຽນເຕິນຢຸງ ນາຍົກລັດຖະມົນຕີແຫ່ງ ສສ.ຫວຽດນາມ (ພາບ: TTXVN)

ກອງ​ປະຊຸມ​ສຸດ​ຍອດ​ເພື່ອ​ສະ​ເຫຼີ​ມສະຫຼອງ​ກາ​ນພົວພັນ​ຄູ່​ຮ່ວມ ອາ​ຊຽນ - ສ.​ເກົາຫຼີ ຄົບຮອບ 25 ປີ ພາຍ​ໃຕ້​ຫົວ​ຂໍ້ “ສ້າງ​ຄວາມ​ເຊື່ອ​ຖື, ສ້າງ​ຄວາມ​ສົມບູນ​ພູມ​ສຸກ” ​ໄດ້​ດຳ​ເນີນ​ໄປ​ດ້ວຍ​ຜົນສຳ​ເລັດ​ອັນ​ສຳຄັນ ​ແລະ​ຈົບງາມ​ຫຼາຍ​ຢ່າງ...

ກ່າວ​ຄຳ​ປາ​ໄສ​ທີ່​ກອງ​ປະຊຸມ, ທ່ານນາ​ຍົກ​ລັດຖະມັນ​ຕີ ຫງວຽນ​ເຕິ​ນຢຸງ ຕີ​ລາຄາ​ສູງ​ຕໍ່​ການ​ພົວພັນອາ​ຊຽນ - ສ.​ເກົາຫຼີ ທີ່​ຂະຫຍາຍຕົວ​ນັບ​ມື້​ນັບ​ຮອບດ້ານ ມີ​ເນື້ອ​ແທ້​ແລະ​ມີ​ປະສິດທິ​ຜົນ; ທ່ານຢືນຢັນ​ວ່າ​ ຄຽງ​ຂ້າງ​ກັບ​ຄວາມ​ໃກ້ຊິດຕິດ​ແທດ​ກັນ​ດ້ານພູມ​ສາດ​ ​ປະຫວັດສາດ ​ແລະ ຄວາມ​ຄ້າຍຄື​ກັນ​ດ້ານ​ວັດທະນະ​ທຳສັງຄົມ​ນັ້ນ ມີ​ສາ​ເຫດ​ອັນ​ສຳຄັນ​ໜຶ່ງ​ທີ່​ປະກອບ​ສ່ວນ​ເຂົ້າ​ໃນ​ຜົນສຳ​ເລັດ​ຂອງ​ການ​ພົວພັນ​ໃນ 25 ປີ​ທີ່​ຜ່ານ​ມາ ຄື​ຄວາມ​ເຊື່ອ​ຖື​ການ​ເມືອງ ​ແລະ ຄວາມມຸ້ງ​ໝັ້ນ​ໃນ​ສັນຕິພາບ ສະ​ຖຽນລະ​ພາບ ​ແລະ​ການ​ຮ່ວມ​ມື​ເພື່ອ​ຄວາມ​ພັດທະນາ​ຂອງອາ​ຊຽນ ​ແລະ ສ.​ເກົາຫຼີ.

ທ່ານນາ​ຍົກ​ລັດຖະມັນ​ຕີ ຫງວຽນ​ເຕິ​ນຢຸງ ​ເນັ້ນ​ວ່າ ອາ​ຊຽນ ​ແລະ ສ.​ເກົາຫຼີ ຕ້ອງການ​ເພີ່ມ​ທະວີ​ການ​ຮ່ວມ​ມື ​ແລະ​ສະໜັບສະ​ໜູນ​ຊຶ່ງ​ກັນ​ແລະ​ກັນ ​ໃນ​ການ​ຮັກສາ​ສັນຕິພາບ ສະຖຽນ​ລະ​ພາບ ​ແລະ​ຄວາມ​ສະຫງົບ​ຢູ່​ໃນ​ພາກ​ພື້ນ ​ໂດຍ​ຜ່ານ​ບັນດາ​ກົນ​ໄກ​ຮ່ວມ​ມື​ທີ່​ມີ​ຢູ່​ໃນ​ປັດຈຸບັນຂອງ​ອາ​ຊຽນ; ປັບປຸງ​ການ​ຮ່ວມ​ມື​ດ້ານ​ເສດຖະກິດ​ຢ່າງ​ບໍ່​ຢຸດ​ຢັ້ງ ​ໂດຍ​ຜ່ານ​ການ​ຍົກ​ລະດັບ​ສັນຍາ​ການ​ຄ້າ​ເສລີ ອາ​ຊຽນ ​- ສ.​ເກົາຫຼີ ​ແລະ​ ດຳ​ເນີນການ​ເຈລະຈາ​ສັນຍາ​ວ່າ​ດ້ວຍ​ຄູ່​ຮ່ວມ​ເສດຖະກິດ​ຮອບດ້ານຢູ່​ພາກ​ພື້ນ (RCEP) ​ໃຫ້​ສຳ​ເລັດ​ສິ້ນ​ສຸດຖືກຕ້ອງ​ຕາມ​ກຳນົດ​ເວລາໃນປີ 2015; ຍູ້​ແຮງ​ການ​ເຊື່ອມ​ຕໍ່​ທັງ​ສາມ​ດ້ານ ​ໂຄງ​ສ້າງ​ພື້ນຖານ, ລະບຽບ​ກົດໝາຍ ​ແລະ ຜູ້​ຄົນ; ​ແລະ​ເພີ່ມ​ທະວີ​ການ​ຮັບ​ມື​ກັບ​ສິ່ງ​ທ້າ​ທາຍ​ຕໍ່​ຄວາມ​ສະຫງົບ​ບໍ່​ເປັນ​ແບບ​ດັ້ງ​ເດີມ​ທີ່​ພວມ​ເກີດ​ຂຶ້ນ, ​ເປັນ​ຕົ້ນ​ແມ່ນຢູ່​ອະນຸ​ພາກ​ພື້ນ​ແມ່​ນ້ຳຂອງ.

ກ່ຽວ​ກັບ​ບັນດາ​ບັນຫາ​ພາກ​ພື້ນ, ທ່ານນາ​ຍົກ​ລັດຖະມັນ​ຕີ ຫງວຽນ​ເຕິ​ນຢຸງ ຢືນຢັນ​ວ່າ ​ເມື່ອ​ໃດ​ມີ​ຄວາມ​ເຊື່ອ​ຖື​ໄວ້​ວາງ​ໃຈ​ກັນ ພວກ​ເຮົາ​ຈຶ່ງ​ສາມາດຮັກສາ​ສັນຕິພາບ ສະຖຽນ​ລະ​ພາບ ​ແລະ ຄວາມ​ສະຫງົບ​ໃນ​ພາກ​ພື້ນ​ໄດ້​ຢ່າງ​ມັ້ນຄົງ.

ທ່ານນາ​ຍົກ​ລັດຖະມັນ​ຕີ ຫງວຽນ​ເຕິ​ນຢຸງ ​ເນັ້ນ​ເຖິງ​ສະພາບການ​ຜັນ​ປ່ຽນ​ຢ່າງ​ສັບສົນ​ຢູ່​ທະ​ເລ​ຕາ​ເວັນ​ອອກ​ໃນ​ເວລາ​ທີ່​ຜ່ານ​ມາ​ມໍ່ໆ​ນີ້ ຊຶ່ງ​ໃຫ້​ເຫັນ​ຄວາມ​ຈຳ​ເປັນ​ຕ້ອງ​ໜ່ວງ​ໜ່ຽວ​ຮັກສາ​ສັນຕິພາບ ສະຖຽນ​ລະ​ພາບ ​ແລະ​ຄວາມ​ສະຫງົບປອດ​ໄພ​ໃນ​ການ​ເດີນ​ທະ​ເລ​ຢູ່​ໃນ​ພາກ​ພື້ນ; ບັນດາ​ຝ່າຍ​ທີ່​ກ່ຽວຂ້ອງທຸກ​ຝ່າຍ​ລ້ວນ​ແຕ່​ຕ້ອງ​ປະຕິບັດ​ຕາມ​ກົດໝາຍ​ສາກົນ, ​ໃນ​ນັ້ນ​ມີ​ອະນຸ​ສັນຍາ​ສະຫະ​ປະຊາ​ຊາດວ່າ​ດ້ວຍ​ກົດໝາຍ​ທະ​ເລ​ປີ 1982, ປະຕິບັດຖະ​ແຫຼງການ​ວ່າ​ດ້ວຍ​ການ​ປະພຶດ​ຂອງ​ບັນດາ​ຝ່າຍ​ຢູ່​ທະ​ເລ​ຕາ​ເວັນ​ອອກ ​(DOC) ຢ່າງ​ຄົບ​ຖ້ວນແລະເຂັ້​ມງວດ ​ແລະ ພ້ອມ​ກັນ​ເຈລະຈາ​ເພື່ອ​ບັນລຸ​​ໄດ້​ປະມວນ​ຂໍ້​ກຳນົດວ່າ​ດ້ວຍ​ການ​ປະພຶດ​ຂອງ​ບັນດາ​ຝ່າຍ​ຢູ່​ທະ​ເລ​ຕາ​ເວັນ​ອອກ (COC) ​ໂດຍ​ໄວ. 

​ໃນ​ການ​ຢ້ຽມຢາມ ສ.​ເກົາຫຼີ ຄັ້ງ​ນີ້, ທ່ານນາ​ຍົກ​ລັດຖະມັນ​ຕີ ຫງວຽນ​ເຕິ​ນຢຸງ ​ໄດ້​ພົບ​ປະ​ຫາລື​ກັບປະທານາທິບໍດີ ພັກ ກຶນຮະ​ເຢ, ພົບ​ປະ​ກັບ​ທ່ານ​ນາ​ຍົກ​ເທດສະມົນຕີ​ນະຄອນ ບູຊາ​ນ, ຢາມ​ເຂດ​ອຸດສາຫະກຳ​ເສລີ ບູຊາ​ນ - ຈີນ​ເຮ, ​ເປັນ​ປະທານ​ການ​ສົນທະນາ​ກັບ​ບັນດາຜູ້ອຳນວຍການວິສາ​ຫະກິດຂອງ ສ.​ເກົາຫຼີ, ຕ້ອນຮັບ​ຜູ້ນຳກຸ່ມບໍລິສັດ​ເສດ​ຖະກິດ​ໃຫຍ່​ຫຼາຍ​ກຸ່ມ​ຂອງ ສ.​ເກົາຫຼີ ​ແລະ​ຜູ້ນຳ​ຂອງ​ບາງ​ອົງການ​ຈັດ​ຕັ້ງ​ມິດຕະພາບ ສ.​ເກົາຫຼີ - ຫວຽດນາມ...

​ໃນ​ການ​ພົບ​ປະ​ຫາລື​ກັບປະທານາທິບໍດີ ພັກ ກຶນຮະ​ເຢ, ພາຍ​ໃຕ້​ບັນຍາກາດ​ມິດຕະພາບ ​ເປີດ​ອົກ​ເປີດ​ໃຈ ​ແລະ​ເຊື່ອ​ຖື​ຊຶ່ງ​ກັນ​ແລະ​ກັນ, ສອງ​ຝ່າຍ​ໄດ້​ປຶກສາ​ຫາລື​ກັນ ​ແລະ ​ໄດ້​ເປັນ​ເອກະ​ພາບ​ຢ່າງ​ສູງ​ກ່ຽວ​ກັບ​ບັນດາ​ທິດ​ທາງ​ໃຫຍ່ ​ແລະ ບັນດາ​ມາ​ຕະການອັນ​ລະອຽດ​ເພື່ອ​ຊຸກຍູ້​ແລະ​ເພີ່ມ​ທະວີ​ການ​ພົວພັນ​ຄູ່​ຮ່ວມຮ່ວມມື​ຍຸດ​ທະ​ສາດຫວຽດນາມ - ສ.​ເກົາຫຼີ ​ໃນ​ເວລາ​ຕໍ່ໜ້າ​ໃຫ້​ເລິກ​ເຊິ່ງຍິ່ງ​ກວ່າ​ອີກ: ​ເປັນ​ເອກະສັນ​ກັນ​ດຳ​ເນີນ​ຢ່າງ​ເປັນ​ປະຈຳການ​ຢ້ຽມຢາມ ພົບ​ປະ​ຂັ້ນ​ສູງ, ​ເປີດ​ກວ້າງ​ການ​ຮ່ວມ​ມື​ກັນລະຫວ່າງບັນດາ​ກະຊວງ​ ຂະ​ແໜງການ ທ້ອງ​ຖິ່ນ, ​ເສີມ​ຂະຫຍາຍ​ປະສິດທິ​ຜົນ​ຂອງ​ບັນດາ​ກົນ​ໄກ​ການ​ສົນທະນາ ​ແລະ ຮ່ວມ​ມື.

ລັດຖະບານ ສ.​ເກົາຫຼີ ຢືນຢັນສືບຕໍ່ຖືວ່າຫວຽດນາມເປັນຄູ່ຮ່ວມມືສຳຄັນອັນດັບໜຶ່ງໃນນະໂຍບາຍ ODA ແລະ ບຸລິມະສິດໃຫ້ບັນດາໂຄງການໃນຂົງເຂດທີ່ສຳຄັນເຊັ່ນ ໂຄງສ້າງພື້ນຖານ, ການເຕີບໂຕສີຂຽວ, ພັດທະນາແຫຼ່ງບຸກຄະລາກອນ. ບັນດາວິສາຫະກິດຂອງ ສ.​ເກົາຫຼີ ກໍ່ສະແດງຄວາມສົນໃຈ ແລະ ຄວາມປາຖະໜາເປີດກວ້າງການເຄື່ອນໄຫວລົງທຶນ ທຸລະກິດຢູ່ຫວຽດນາມ, ພ້ອມກັນນັ້ນກໍ່ມຸ່ງຫວັງລັດຖະບານຫວຽດນາມສືບຕໍ່ປົວແປງສິ່ງແວດລ້ອມແຫ່ງການລົງທຶນໃຫ້ສະດວກດີກວ່າອີກ, ຂະຫຍາຍລະບົບໂຄງສ້າງພື້ນຖານ...

ສອງຝ່າຍກໍ່ໄດ້ຢືນຢັນວ່າຈະປະສານສົມທົບກັນຢ່າງແໜ້ນແຟ້ນໃນການປົກປັກຮັກສາຜົນປະໂຫຍດອັນຊອບທຳ ຂອງປະຊາຊົນແຕ່ລະປະເທດທີ່ຢູ່ປະເທດນັ້ນ ໃນສະພາບທີ່ຈຳນວນຄົນຫວຽດນາມຢູ່ ສ.​ເກົາຫຼີ ແລະຄົນ ສ.​ເກົາຫຼີ ຢູ່ຫວຽດນາມພວມເພີ່ມຂຶ້ນເປັນ 130.000 ຄົນ. ການ​ທີ່​ສອງ​ປະ​ເທດປະກາດ​ເປັນ​ທາງ​ການ ກ່ຽວກັບຄວາມສຳເລັດສິ້ນສຸດການເຈລະຈາສັນຍາການຄ້າເສລີ ຫວຽດນາມ - ສ.​ເກົາຫຼີ (VKFTA) ນັ້ນ ​ແມ່ນ​ຜົນສຳ​ເລັດ​ອັນ​ພົ້ນ​ເດັ່ນ​ຂອງ​ການ​ຢ້ຽມຢາມ ​ແລະ ​ເປັນ​ເຫດການ​ທີ່​ມີ​ຄວາມ​ໝາຍ​ສຳຄັນ​ທີ່​ສຸດຂອງ​ການ​ພົວພັນ​ຫວຽດນາມ - ສ.​ເກົາຫຼີ. 

ສັນຍາການຄ້າເສລີ ຫວຽດນາມ - ສ.​ເກົາຫຼີ ສະບັບ​ນີ້​ເປັນ​ສັນຍາ​ຮຸ້ນ​ໃໝ່​ດ້ວຍ​ລະດັບ​ສັນຍາ​ກວ້າງຂວາງ ​ເລິກ​ເຊິ່ງ, ມັນ​ມີ​ຄວາມ​ໝາຍ​ສຳຄັນ​ຕໍ່​ກັບ​ການ​ຊຸກຍູ້​ການ​ຄ້າ​ສອງ​ຝ່າຍ​ໃຫ້​ບັນລຸ​ໄດ້​ເປົ້າ​ໝາຍ 70 ຕື້​ໂດ​ລາ​ສະຫະລັດ​ໃນ​ປີ 2020, ອຳນວຍ​ເງື່ອນ​ໄຂ​ຄວາມ​ສະດວກ​ໃຫ້​ສິນຄ້າ​ຫວຽດນາມ​ອາດ​ຈະ​ແກ່ງ​ແຍ້​ງ​ໄດ້​ດີກ​ວ່າອີກ​ຢູ່​ໃນ​ຕະຫຼາດ​ຂອງ ສ.​ເກົາຫຼີ, ​ເປັນ​ຕົ້ນ​ແມ່ນ​ໃນ​ບັນດາ​ຂົງ​ເຂດ​ກະ​ເສດ​ຕະພັນ, ສິນ​ໃນ​ນ້ຳ, ສິ່ງ​ທໍ​ເຄື່ອງ​ຕັດຫຍິບ… 

ສັນຍາ​ກໍ່​ຈະ​ຊ່ວຍ​ຊຸກຍູ້​ການ​ລົງທຶນ​ຂອງ​ບັນດາ​ວິ​ສາ​ຫະກິດ ສ.​ເກົາຫຼີ ​ເຂົ້າ​ລົງທຶນ​ຢູ່​ຫວຽດນາມ, ສົ່ງ​ເສີມ​ການຖ່າຍ​ຖອດ​ເຕັກ​ໂນ​ໂລ​ຢີ ​ແນ​ໃສ່​ຍົກ​ສູງ​ລະດັບ ​ແລະ ຄວາມ​ສາມາດ​ຜະລິດ, ຜ່ານ​ສິ່ງ​ດັ່ງກ່າວ​ເພື່ອສ້າງ​ກຳລັງ​ແລະ​ໂອກາດ​ໃໝ່​ໃຫ້​ແກ່​ການ​ຮ່ວມ​ມື​ດ້ານ​ເສດຖະກິດ​ລະຫວ່າງ​ສອງ​ປະ​ເທດ, ປະກອບສ່ວນ​ຂະ​ຫຍາຍການ​ພົວພັນ​ຄູ່​ຮ່ວມ​ຮ່ວມ​ມື​ຍຸດ​ທະ​ສາດ​ລະຫວ່າງ​ສອງ​ປະ​ເທດ​ຂຶ້ນ​ສູ່ລະດັບ​​ໃໝ່./.

ສັງ​ລວມ​ໂດຍ: GB

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ