ວັນອາທິດ, 18/8/2019
ຄວາມສຳເລັດສິ້ນສຸດການເຈລະຈາ ສັນຍາການຄ້າເສລີລະຫວ່າງ ຫວຽດນາມ ແລະ ສະຫະພັນພາສີສຸລະກາກອນ
27/1/2015 10:23' ສົ່ງ ພິມ
ພິທີລົງນາມໃນຖະແຖງການຮ່ວມ ກ່ຽວກັບການສຳເລັດສິ້ນສຸດການເຈລະຈາ ສັນຍາການຄ້າເສລີລະຫວ່າງ ຫວຽດນາມ ແລະ ສະຫະພັນພາສີສຸລະກາກອນ. (ພາບ: VGP)

ເຂົ້າ​ຮ່ວມ​ພິທີ​ລົງ​ນາມ​ມີ ​ທ່ານ​ຫງວຽນ​ເຕິ​ນຢູງ ນາຍົກລັດຖະມົນຕີ, ທ່ານ​ຫວູຮຸຍ​ຮ່ວາງ ລັດຖະມົນຕີ​ກະຊວງ​ອຸດສາຫະກຳ​ການ​ຄ້າ​ຫວຽດນາມ ​ແລະ ທ່ານ​ອານ​ເດຣ ອາ. ສະ​ແລັບ​ແຍບ ລັດຖະມົນຕີ​ກະຊວງ​ການ​ຄ້າ ຄະນະ​ກຳມາ​ທິການ​ເສດຖະກິດ​ອາຊີ - ​ເອີຣົບ, ຫົວ​ໜ້າ​ຄະນະ​ເຈລະຈາ​ຝ່າຍສະຫະພັນ​ພາສີ​ສຸລະກາກອນ.

​ໂດຍ​ໄດ້​ເລີ່​ມຕົ້ນ​ຢ່າງ​ເປັນ​ທາງ​ການ​ຢູ່​ຮ່າ​ໂນ້ຍ ຫວຽດນາມ ​ແຕ່​ວັນ​ທີ 28 ມີ​ນາ 2013, ພາຍຫຼັງ​ການເຈລະຈາ​ເປັນທາງການ 8 ຄັ້ງ ​ແລະ ການ​ປະຊຸມ​ຂັ້ນ​ນັກວິຊາການ​ຫຼາຍ​ຄັ້ງ, ສອງ​ຝ່າຍ​ໄດ້​ເປັນ​ເອກະ​ພາບ​ໂດຍ​ພື້ນຖານ​ ກ່ຽວ​ກັບ​ເນື້ອ​ໃນ​ຂອງ​ສັນຍາທີ່​ມີ​ຂອບ​ເຂດ​ຮອບດ້ານ ລະດັບ​ຄຳ​ໝັ້ນ​ສັນຍາ​ສູງ ​ແລະ ຮັບປະກັນ​ຄວາມ​ສົມ​ດູ​ນທາງ​ດ້າຜົນ​ປະ​ໂຫຍ​ດ, ມີ​ການ​ຄິດ​ໄລ່​ເຖິງ​ເງື່ອນ​ໄຂອັນ​ລະອຽດ​ ຂອງ​ແຕ່ລະ​ຝ່າຍ.

ສັນຍາ​ກວມ​ດ້ວຍ​ບັນດາ​ເນື້ອ​ໃນ​ຕົ້ນຕໍ​ກ່ຽວ​ກັບ​ການ​ຄ້າ​ສິນ​ຄ້າ, ການ​ຄ້າ​ບໍລິການ, ການ​ລົງທຶນ, ກຳມະສິດ​ພູມ​ປັນຍາ, ບັນດາ​ມາດ​ຕະການ​ຮັກສາ​ອະນາ​ໄມ​ຄວາມ​ປອດ​ໄພດ້ານ​ສະບຽງ​ອາຫານ ​ແລະ ກວດ​ພະຍາດ​ສັດ​ພືດ, ຫຼັກການ​ຖິ່ນ​ກຳ​ເນີ​ດຂອງ​ສິນ​ຄ້າ, ສ້າງຄວາມ​ສະ​ດວດ​ທາງ​ດ້ານ​ພາສີ​ສຸລະກາກອນ, ການປ້ອງ​ກັນ​ການ​ຄ້າ, ຮົ້ວ​ເຕັກນິກ​ໃນ​ການ​ຄ້າ, ​ເຕັກ​ໂນ​ໂລ​ຢີ​ເອ​ເລັກ​ໂຕຣນ​ໃນ​ການ​ຄ້າ, ການ​ແກ່ງ​ແຍ້​ງ, ນິ​ຕິ​ທຳ ​ແລະ ລະບຽບ​ກົດໝາຍ.

ຝ່າຍສະຫະພັນ​ພາສີ​ສຸລະກາກອນໄດ້ໃຫ້ປະໂຫຍດແກ່ຫວຽດນາມທາງດ້ານພາສີຜ່ານດ່ານ, ສ້າງໂອກາດສົ່ງນອກໃໝ່ທີ່ສຳຄັນ ຕໍ່ກັບ​ບັນດາ​ປະ​ເພດ​ສິນ​ຄ້າ​ທີ່​ຫວຽດນາມ​ມີ​ຜົນ​ປະ​ໂຫຍ​ດອັນ​ພື້ນຖານ​ເຊັ່ນ ຜະລິດ​ຕະພັນ​ກະສິກຳ, ບັນດາ​ປະ​ເພດ​ສິນ​ໃນ​ນ້ຳ ​ແລະ ສິນຄ້າ​ອຸດສາຫະກຳ​ຄື ສິ່ງ​ທໍ ​ເຄື່ອງ​ຕັດຫຍິບ ​ເກີບ​ເຄື່ອງ​ໜັງ ​ແລະ ​ເຄື່ອງ​ໄມ້​ເຄື່ອງເຟີ​ນິ​ເຈີ.

ຝ່າຍ​ຫວຽດນາມ​ເຫັນ​ດີ​ເປີດ​ປະຕູ​ຕະຫຼາດຕາມ​ກຳນົດ​ຂັ້ນ​ຕອນ​ໃຫ້ສະຫະພັນ​ພາສີ​ສຸລະກາກອນ ຕໍ່​ກັບ​ຜະລິດ​ຕະພັນ​ການ​ລ້ຽງສັດ​ບາງ​ປະ​ເພດ, ສິນຄ້າ​ອຸດສາຫະກຳ​ບາງ​ປະ​ເພດ ກວມ​ດ້ວຍ​ເຄື່ອງ​ຈັກ ​ເຄື່ອງ​ປະກອບ ພາຫະນະ​ຂົນ​ສົ່ງ. ບັນດາ​ປະ​ເພດ​ສິນຄ້າ​ເຫຼົ່າ​ນີ້​ ລ້ວນ​ແຕ່​ບໍ່​ແກ່ງ​ແຍ້​ງກັບ​ສິນຄ້າຂອງ​ຫວຽດນາມ, ​ແຕ່​ກົງ​ຂ້າມ ມັນປະກອບສ່ວນ​ເຮັດ​ໃຫ້​ຕະຫຼາດ​ການ​ບໍລິ​ໂພ​ກພາຍ​ໃນ​ປະ​ເທດ​ມີ​ຄວາມ​ຫຼາກ​ຫຼາຍ​ຕື່ມ​ອີກ.

ຄຳ​ໝັ້ນ​ສັນຍາ​ອື່ນໆ​ກ່ຽວ​ກັບ​ການ​ບໍລິການ, ການ​ລົງທຶນ, ກຳມະສິດ​ພູມ​ປັນຍາ, ການ​ແກ່ງ​ແຍ້​ງ, ການ​ປ້ອງ​ກັນ​ການ​ຄ້າ, ການ​ແກ້​ໄຂຄວາມ​ພິພາດ​ດ້ານ​ການ​ຄ້າ, ການ​ຮັກສາ​ອະນາ​ໄມ​ຄວາມ​ປອດ​ໄພດ້ານ​ສະບຽງ​ອາຫານ ​ແລະ ກວດ​ພະຍາດ​ສັດ​ພືດ, ຮົ້ວ​ເຕັກນິກ​ໃນ​ການ​ຄ້າ,... ລ້ວນ​ແຕ່​ໄດ້​ເປັນ​ເອກະ​ພາບ​ກັນ​ບົນ​ພື້ນຖານ​ຂໍ້​ກຳນົດ​ຕ່າງໆ​ຂອງ​ອົງການ​ການ​ຄ້າ​ໂລກ, ຮັບປະກັນ​ຄວາມ​ສົມ​ດູ​ນທາງ​ດ້ານ​ຜົນ​ປະ​ໂຫຍ​ດ, ສອດຄ່ອງ​ກັບຂໍ້​ກຳນົດ​ກົດໝາຍພາຍ​ໃນ​ປະ​ເທດ ກ່ຽວ​ກັບ​ຂົງ​ເຂດ​ທີ່​ກ່ຽວຂ້ອງ​ ແລະ ບໍ່​ສົ່ງ​ຜົນ​ກະທົບ​ເຖິງ​ການ​ເຈລະຈາ​ອື່ນ​ຂອງ​ຫວຽດນາມ​ໃນ​ປັດຈຸບັນ.

ສະຫະພັນ​ພາສີ​ສຸລະກາກອນເປັນຕະຫຼາດສົ່ງນອກອັນເປັນມູນເຊື້ອຂອງຫວຽດນາມ, ມີ​ຂະໜາດ​ການ​ບໍລິ​ໂພ​ກອຸປະ​ໂພ​ກ​ກວ້າງ​ໃຫຍ່​ ທີ່ກວມ​ດ້ວຍ 170 ລ້ານ​ຄົນ ​ແລະ ​ກຳລັງ​ພັດທະນາ, ມີ​ກຳລັງ​ຄວາມ​ສາມາດ​ບົ່ມ​ຊ້ອນ ​ແລະ ທ່າ​ແຮງ​ດ້ານ​ອຸດສາຫະກຳ, ວິທະຍາສາດ - ​ເຕັກນິກ.

​ໃນ​ເວລາ​ທີ່​ຜ່ານ​ມາ​ມໍ່​ນີ້, ການ​ລົງທຶນ​ຂອງ​ຫວຽດນາມ​ເຂົ້າສະຫະພັນພາສີສຸລະກາກອນ ກໍ່ມີຄວາມເຕີບໂຕຢ່າງຈະແຈ້ງ. ດ້ານ​ອື່ນ, ສຳລັບສະຫະພັນ​ພາສີ​ສຸລະກາກອນ, ສັນຍາ​ນີ້​ແມ່ນ​ສັນຍາ​ການ​ຄ້າ​ເສລີ​ທຳ​ອິດ​ທີ່​ສະຫະພັນ​ລົງ​ນາມ​ກັບປະ​ເທດ​ນອກ. ດັ່ງ​ນັ້ນ, ສອງ​ຝ່າຍ​ໄດ້​ຢືນຢັນ​ອີກ​ເທື່ອ​​ເຖິງຄວາມ​ສຳຄັນ​ຂອງການ​ລົງ​ນາມ​​ສັນຍາ ຊຶ່ງ​ເປັນ​ເຄື່ອງມື​ອັນ​ສຳຄັນ​ເພື່ອ​ປະກອບສ່ວນຊຸກຍູ້​ການ​ພົວພັນ​ຮ່ວມ​ມື ​ແລະ ປັບປຸງ​ພັດທະນາ​ການ​ຄ້າ ການ​ລົງທຶນ​ບົນ​ພື້ນຖານ​ຕ່າງ​ຝ່າຍ​ຕ່າງ​ໄດ້​ຮັບ​ຜົນ​ປະ​ໂຫຍ​ດ.

ຄາດ​ຄະ​ເນ​ວ່າ, ສອງ​ຝ່າຍ​ຈະ​ສຳ​ເລັດ​ບັນດາ​ບັນຫາ​ເຕັກນິກ​ທີ່​ຍັງ​ເຫຼືອ ​ແລະ ​ແກ້​ໄຂ​ລະບຽບ​ການ​ພາຍ​ໃນ​ທີ່​ຈຳ​ເປັນ​ໃຫ້​ຮຽບຮ້ອຍ ​ເພື່ອລົງ​ນາມ​ສັນຍາຢ່າງ​ເປັນ​ທາງ​ການ​ໃນ​ລະຫວ່າງ​ຕົ້ນ​ປີ 2015.

ໃນ​ວັນດຽວ​ກັນນີ້​ ຄື​ວັນ​ທີ 15 ທັນວາ, ຢູ່​ສູນ​ປະຊຸມ​​ແຂວງ​ກຽນ​ຢາງ ທີ່ເ​ມືອງ​ເກາະຝູກັວກ, ທ່ານ​ນາຍົກລັດຖະມົນຕີ ຫງວຽນ​ເຕິ​ນຢູງ ​ໄດ້​ໃຫ້​ກຽດ​ຕ້ອນຮັບ ທ່ານ​ ອາ. ສະ​ແລັບ​ແຍບ ລັດຖະມົນຕີ​ກະຊວງ​ການ​ຄ້າ ຄະນະ​ກຳມາ​ທິການ​ເສດຖະກິດ​ອາຊີ - ​ເອີຣົບ, ຫົວໜ້າ​ຄະນະ​ເຈລະຈາສັນຍາ​ການ​ຄ້າ​ເສດ​ລີ​ລະຫວ່າງສະຫະພັນ​ພາສີ​ສຸລະກາກອນ ລັດ​ເຊຍ-​ເບ​ລາຣຸດຊີ-ກາ​ຊັກ​ສະຖານ ກັບຫວຽດນາມ.

ທ່ານ​ນາຍົກລັດຖະມົນຕີ ຫງວຽນ​ເຕິ​ນຢູງ ຕີ​ລາຄາ​ສູງ​ຕໍ່​ຄວາມ​ມາ​ນະພະ​ຍາ​ຍາມ​ຂອງ​ຄະນະ​ເຈລະຈາ​ທັງ​ສອງ ຊຶ່ງ​ບົນ​ພື້ນຖານ​ຈິດ​ໃຈ​ກໍ່ສ້າງ ​ແລະ​ ຄວາມ​ເຂົ້າ​ໃຈ​ຊຶ່ງ​ກັນ​ແລະ​ກັນ ​ໄດ້​ສຳ​ເລັດ​ສິ້ນ​ສຸດ​ໂດຍ​ພື້ນ​ຖານ ການ​ເຈລະຈາ​ສັນຍາ​ການ​ຄ້າ​ເສລີ​ຮຸ້ນ​ໃໝ່​ແລະ​ຮອບດ້ານ ລະຫວ່າງ​ຫວຽດນາມ ​ແລະ ສະຫະພັນພາສີສຸລະກາກອນ. ທ່ານ​ນາຍົກລັດຖະມົນຕີສະ​ເໜີ​ໃຫ້​ທັງ​ສອງ​ຝ່າຍ​ຈົ່ງ​ຕັ້ງໜ້າ, ​ເຮັດ​ວຽກ​ງານ​ທີ່​ຍັງ​ເຫຼືອ​ໃຫ້​ແລ້ວ​ໂດຍ​ໄວ, ​ແກ້​ໄຂ​ລະບຽບ​ການ​ພາຍ​ໃນ​ໃຫ້​ສຳ​ເລັດ​ຮຽບຮ້ອຍ​ ເພື່ອ​ຈະ​ລົງ​ນາມ​ສັນຍາ​ໃນ​ຕົ້ນ​ປີ 2015.

ການ​ລົງ​ການ ​ແລະ ປະຕິບັດ​ສັນຍາ​ສະບັບ​ນີ້​ແມ່ນ​ບາດກ້າວ​ໃໝ່ທີ່​ສຳຄັນ, ນຳ​ເອົາ​ການ​ພົວພັນ​ອັນ​ເປັນ​ມູນ​ເຊື້ອ ​ແລະມິດຕະພາບ​ອັນ​ຈົບງາມ​ລະຫວ່າງ​ຫວຽດນາມກັບ ລັດເຊຍ, ເບລາຣຸດຊີ, ກາຊັກສະຖານ ຂຶ້ນສູ່ລະດັບໃໝ່, ຮ່ວມ​ມື​ແໜ້ນ​ແຟ້ນ ​ແລະ ​ຊ່ວຍ​ເຫຼືອ​ຊຶ່ງ​ກັນ​​ພ້ອມ​ກັນ​ພັດທະນາ.

ທ່ານ​ນາຍົກລັດຖະມົນຕີ ​ເຊື່ອ​ໝັ້ນ​ວ່າ ພ້ອມ​ກັບ​ການ​ພົວພັນ​ການ​ເມືອງ ​ເສດຖະກິດ ການ​ຄ້າ ການ​ລົງທຶນ, ສັນຍາ​ສະບັບ​ນີ້​ຍັງ​ເປັນ​ເງື່ອນ​ໄຂ​ເພື່ອ​ໃຫ້​ຫວຽດນາມ ​ແລະ ສະຫະພັນ​ພາສີ​ສຸລະກາກອນ ເພີ່ມທະວີການຮ່ວມມືໃນຫຼາຍຂົງເຂດອື່ນອີກຄື ການສຶກສາ-ກໍ່ສ້າງ, ວິທະຍາສາດ-ເຕັກນິກ ວັດທະນະທຳ...; ພ້ອມ​ກັນ​ນັ້ນ ກໍ່​ເປີດ​ກວ້າງ​ເທສະ​ແຫ່ງ​ການ​ຮ່ວມ​ມື ​ແລະ ຕະຫຼາດ ​ໃຫ້​ແກ່​ບັນດາ​ປະ​ເທດ​ພາຄີ​ຂອງ​ສັນຍາ.

ທ່ານ​ນາຍົກລັດຖະມົນຕີ ຫງວຽນ​ເຕິ​ນຢູງ ຢືນຢັນ​ນະ​ໂຍບາຍ​ສະ​ເໝີ​ຕົ້ນ​ສະ​ເໝີ​ປາຍ​ຂອງ​ຫວຽດນາມ​ແມ່ນ ​ໃຫ້​ຄວາມ​ສຳຄັນ, ມຸ່ງ​ຫວັງ, ​ເຮັດ​ຈົນ​ສຸດ​ຄວາມ​ສາມາດ​ຂອງ​ຕົນ ​ເພື່ອ​ພ້ອມ​ກັນ​ກັບ ລັດເຊາ, ເບລາຣຸດຊີ, ກາຊັກສະຖານ ເພີ່ມທະວີການພົວພັນຮ່ວມມືຕົວຈິງ ມີປະສິດທິຜົນ ພ້ອມກັນຂະຫຍາຍຕົວວັດທະນາຖາວອນ ໃຫ້ສົມຄູ່ກັບການພົວພັນກໍ່ຄືຄວາມປາຖະໜາຂອງການນຳສອງຝ່າຍ.

ທ່ານ​ນາຍົກລັດຖະມົນຕີ ກໍ່​ໄດ້​ສະ​ແດງ​ຄວາມ​ຂອບ​ອົກ​ຂອບ​ໃຈ​ຕໍ່​ການ​ສະໜັບສະໜູນ ຊ່ວຍ​ເຫຼືອ​ອັນ​ໃຫຍ່​ຫຼວງ​​ແລະປະ​ເສີດ ຂອງລັດເຊຍ, ເບລາຣຸດຊີ, ກາຊັກສະຖານ ຕໍ່ກັບປະຊາຊົນຫວຽດນາມ ໃນຊຸມປີແຫ່ງການຕໍ່ສູ້ຍາດເອົາເອກະລາດແຫ່ງຊາດ ແລະຮ່ວມປະເທດຊາດເປັນເອກະພາບກ່ອນໜ້ານີ້ ກໍ່ຄືໃນການສ້າງສາພັດທະນາປະເທດໃນຕໍ່ມາ.

​ໃນ​ການ​ຕ້ອນຮັບ, ທ່ານ​ ອາ. ສະ​ແລັບ​ແຍບ ລັດຖະມົນຕີ​ກະຊວງ​ການ​ຄ້າ ຄະນະ​ກຳມາ​ທິການ​ເສດຖະກິດ​ອາຊີ - ​ເອີຣົບ ​ເນັ້ນ​ວ່າ ການສຳ​ເລັດ​ສິ້ນ​ສຸດ​ໂດຍ​ພື້ນຖານ​ການ​ເຈລະຈາ​ສັນຍາ​ການ​ຄ້າ​ເສລີ​ນີ້ ຄຽງ​ຂ້າງ​ຄວາມ​ມານະ​ພະຍາຍາມ​ຂອງ​ບັນດາ​ຜູ້​ຊ່ຽວຊານ​ການ​ເຈລະຈາ ​ຍັງ​ມີ​ປັດ​ໃຈ​ອັນ​ສຳຄັນ​ທີ່​ສຸດ​ຄື ຄວາມ​ສະໜັບສະໜູນ​ດ້ານ​ການ​ເມືອງ​ອັນ​ໃຫຍ່​ຫຼວງ​ຂອງ​ການ​ນຳ​ຂັ້ນ​ສູງ​ສອງ​ຝ່າຍ, ພິ​ເສດ ສັນຍາ​ນີ້​ມີ​ຄວາມ​ໝາຍ​ທີ່​ສຸດ​ ເມື່ອ​ມັນ​ໄດ້​ປະກາດ​ຖະ​ແຫຼ​ງເລີ່​ມຕົ້ນການ​ເຈ​ລາ​ຈາ ​ແລະ ສຳເລັດ​ສິ້ນ​ສຸດ​ການ​ເຈລະຈາ​ລ້ວນ​ແຕ່​ຢູ່​ຫວຽດນາມ.

ທ່ານລັດຖະມົນຕີ ອາ. ສະ​ແລັບ​ແຍບ ​ເຊື່ອ​ໝັ້ນ​ວ່າ ສັນຍາ​ການ​ຄ້າ​ເສດ​ລີ​ສະບັບ​ນີ້​ເມື່ອ​ມີ​ຄວາມ​ສັກສິດ ມັນ​ຈະ​ສ້າງ​ໃຫ້​ມີ​ເທສະ​ຮ່ວມມື​ອັນ​ກວ້າງຂວາງ ​ແລະ ​ເຄື່ອງມື​ຮ່ວມ​ມື​ທີ່​ມີ​ປະສິດທິ​ຜົນ ​ລະ​ຫວ່າງສະຫະພັນ​ພາສີ​ສຸລະກາກອນ ແລະ ຫວຽດນາມ ຍ້ອນວ່າຫວຽດນາມແມ່ນປະເທດອາຊີ - ປາຊີຟິກ ປະເທດດຽວທີ່ເຂົ້າຮ່ວມທັງໝົດທຸກຂະບວນວິວັດການເຊື່ອມສຳພັນ ແລະ ເຊື່ອມຈອດພາກພື້ນ; ​ໃນ​ເວລາ​ນັ້ນ ນັບ​ແຕ່​ວັນ​ທີ 1 ມັງກອນ 2015, ສະຫະພັນ​ພາສີ​ສຸລະກາກອນຈະປ່ຽນເປັນສະຫະພັນເສຖະກິດອາຊີ - ເອີຮົບ ດ້ວຍການເຂົ້າຮ່ວມຕື່ມອີກຂອງອາກເມນີ ແລະ ກຽກກິດສະຖານ. ຂະ​ບວນວິວັດ​ການ​ນີ້​ຈະ​ຊ່ວຍ​​ໃຫ້ຫວຽດນາມ​ກາຍເປັນ​ຂົວ​ຕໍ່​ລະຫວ່າງ​ສອງ​ພູມີພາກ​ເສດຖະກິດ​ທີ່​ໃຫຍ່ ​ແລະ ສຳຄັນ​ຂອງ​ໂລກ.

ທ່ານ​ລັດຖະມົນຕີ​ ອາ. ສະ​ແລັບ​ແຍບ ກໍ່​ເຊື່ອ​ໝັ້ນ​ວ່າ ການ​ເຊັນ​ສັນຍາ​ການ​ຄ້າ​ເສລີ​ຈະຊ່ວຍ​ໃຫ້​ມູນ​ຄ່າ​ການ​ຄ້າ​ສອງ​ຝ່າຍ​ຫວຽດນາມ ​ແລະ ລັດ​ເຊຍ​ ສາມາດ​ບັນລຸ​​ໄດ້ 10 ຕື້​ໂດ​ລາ​ສະຫະລັດ ​ກ່ອນ​ປີ 2020; ພ້ອມ​ກັນ​ນັ້ນ, ​ເປັນ​ເຄື່ອງມື​ເພື່ອ​ປະຕິບັດ​ຢ່າງ​ມີ​ປະສິດທິ​ຜົນ ບັນດາ​ໂຄງການ​ບຸລິມະສິດ​ຂອງ​ສອງ​ປະ​ເທດ ທີ່​ການນຳສອງ​ຝ່າຍ​ໄດ້​ເປັນ​ເອກະ​ພາບ​ກັນ./.

ສັງ​ລວມ​ໂດຍ: PV

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ