ວັນອາທິດ, 18/8/2019
ທ່ານ ຫງວຽນເຕິນຢູງ ນາຍົກລັດຖະມົນຕີແຫ່ງ ສສ. ຫວຽດນາມ ເຂົ້າຮ່ວມກອງປະຊຸມສຸດຍອດ ອະນຸພາກພື້ນແມ່ນ້ຳຂອງເປີດກວ້າງ ຄັ້ງທີ 5
28/1/2015 8:43' ສົ່ງ ພິມ
ບັນດາທ່ານຜູ້ນຳ ທີ່ເຂົ້າຮ່ວມກອງປະຊຸມສຸດຍອດຈີເອັມເອັດ ຄັ້ງທີ 5.

ຈີ​ເອັມ​ເອັດໄດ້ຮັບການສ້າງຕັ້ງຂຶ້ນແຕ່ປີ 1992. ນັບແຕ່ປີ 1993 ຮອດປີ 2013, ຈີ​ເອັມ​ເອັດໄດ້ຮັບການລົງທຶນເປັນຈຳນວນ 60 ຕື້​ໂດ​ລາ​ສະຫະລັດ, ໃນນັ້ນ, ບັນດາຄູ່ຮ່ວມພັດທະນາ ປະກອບສ່ວນເປັນຈຳນວນ 12 ຕື້​ໂດ​ລາ​ສະຫະລັດ ລວມມີ 69 ໂຄງການໃຫຍ່ທີ່ໄດ້ສຳເລັດແລ້ວ, ຕົ້ນຕໍແມ່ນ​ໃນ​ຂົງ​ເຂດຄົມມະນາຄົມ, ພະລັງງານ. ໃນປັດຈຸບັນ, ຈີ​ເອັມ​ເອັດ ພວມປະເຊີນໜ້າກັບສິ່ງທ້າທາຍອັນໃຫຍ່ຫຼວງຄື: ຄວາມ​ແຕກ​ໂຕນກັນດ້ານການພັດມະນາ ລະຫວ່າງບັນດາປະເທດ, ລະດັບການເຊື່ອມໂຍງສາກົນ, ບັນຫາສິ່ງແວດລ້ອມ ແລະ ການປ່ຽນແປງດິນຟ້າອາກາດ...

ກອງປະຊຸມຄັ້ງນີ້ດຳ​ເນີນ​ພາຍ​ໃຕ້​ຫົວ​ຂໍ້: “ຄວງ​ມຸ່ງ​ໝັ້ນ​ໃນ​ການ​ພັດທະນາ​ແບບ​ຍືນ​ຍົງ ​ແລະ ມີ​ສ່ວນ​ຮ່ວມ​ຂອງ​ທຸກ​ພາກສ່ວນ​ໃນ​ອະນຸ​ພາກ​ພື້ນ​ແມ່​ນ້ຳຂອງ”. ກ່າວປາໄສ​ໄຂ​ກອງປະຊຸມ, ທ່ານປຣະຍຸດ ຈັນ​ໂອຊາ ນາຍົກລັດຖະມົນຕີ​ແຫ່ງ​ລາຊະ​ອານາຈັກ​ໄທ ໄດ້ເນັ້ນເຖິງຄວາມບຸລິມະສິດການຜັນຂະຫຍາຍ ແຜນການເຄື່ອນໄຫວປະຕິບັດ ຂອບການລົງທຶນອະນຸພາກພື້ນ (RIF) ໄລຍະ 2012 – 2022 ອັນ​ປະກອບ​ດ້ວຍ 92 ໂຄງການໃຫຍ່ ທີ່ມີຈຳນວນທຶນ 30 ຕື້​ໂດ​ລາ​ສະຫະລັດ ເພື່ອຍູ້ແຮງການກໍ່ສ້າງ​ໂຄງ​ສ້າງພື້ນຖານຄົມມະນາຄົມ, ຊຸກຍູ້ການຮ່ວມມືເສດຖະກິດ ການຄ້າ ການລົງທຶນ ແລະ ເຊື່ອມຕໍ່ພົນລະເມືອງ 320 ລ້ານຄົນ​ໃນ​ອະນຸພາກພື້ນ; ວາງ 7 ຂົງເຂດອັນສຳຄັນອອກ​ມາ ເພື່ອປະຕິບັດການເຊື່ອມຕໍ່ ຈີ​ເອັມ​ເອັດ, ລວມມີ: ເຊື່ອມຕໍ່ການຂົນສົ່ງ; ເຊື່ອມຕໍ່​ໂຄງ​ສ້າງພື້ນຖານຄົມມະນາຄົມ; ການຈໍລະ​ຈອນສິນຄ້າຂ້າມຊາຍແດນ; ນຳ​ສົ່ງກະແສໄຟຟ້າ; ຮ່ວມມືດ້ານເສດຖະກິດ ທຶນຮອນ ການເງິນ; ຊຸກຍູ້ການລົງທຶນຂອງບັນດາວິສາຫະກິດຂະໜາດກາງ ແລະ ຂະໜາດນ້ອຍ; ຮ່ວມມືໃນການຮັບມືກັບສິ່ງທ້າທາຍດ້ານສິ່ງແວດລ້ອມ, ໄພທຳມະຊາດ.

ບົດກ່າວປາໄສຂອງບັນດາການນຳ ຈີ​ເອັມ​ເອັດ ລ້ວນແຕ່ເນັ້ນເຖິີງປັດໃຈເຊື່ອມຕໍ່​ໂຄງສ້າງພື້ນຖານ ແລະ ສ້າງ​ຄວາມສະດວກດ້ານການຄ້າ ຊຶ່ງ​ຖື​ວ່າເປັນບັນດາເງື່ອນໄຂທີ່ສຳຄັນ ເພື່ອຊຸກຍູ້ການຮ່ວມມື ຈີ​ເອັມ​ເອັດ ແລະ ສ້າງຕັ້ງປະຊາຄົມ ຈີ​ເອັມ​ເອັດ ໃນອະນາຄົດ. ທ່ານນາຍົກລັດຖະມົນຕີ ທອງສິທຳມະວົງ ໄດ້ໃຫ້ທັດສະນະວ່າ ຄວນມີການບຸລິມະສິດລົງທຶນກໍ່ສ້າງບັນດາເສັ້ນທາງຄົມມະນາຄົມ ແລະ ຫັນມັນເປັນບັນດາແລວທາງເສດຖະກິດ ພ້ອມກັນ​ນັ້ນ​ກໍ່ລົບລ້າງສິ່ງກີດຂວາງການຈໍລະຈອນສິນຄ້າ ແລະ ຄົນຂ້າມຊາຍແດນ. ທ່ານປະທານາທິບໍດີ ​ເທັ​ເຊັນ ໃຫ້ຮູ້ວ່າ ມຽນມາໄດ້ກຽມຄວາມພ້ອມໃຫ້​ແກ່ບັນດາໂຄງການເຊື່ອມ​ໂຍງຄົມມະນາຄົມ ໃນທັງສອງແລວທາງ ຕາເວັນອອກ - ຕາເວັນຕົກ ແລະ ແລວທາງທິດໃຕ້,​ ​ເຊື່ອມຕໍ່ປະເທດມຽນມາ, ໄທ, ລາວ ​ແລະ ຫວຽດນາມ; ເຊື່ອມຕໍ່ມະຫາສະມຸດອິນເດຍ ກັບມະຫາສະມຸດປາຊີຟິກ. ທ່ານນາຍົກລັດຖະມົນຕີກຳປູເຈຍ ກໍ່ໄດ້ເນັ້ນເຖິງການຮ່ວມມື ເພື່ອຮັບມືກັບການປ່ຽນແປງດິນຟ້າອາກາດ, ການຮັບປະກັນແຫຼ່ງນ້ຳ ແລະ ສະເໜີ​ໃຫ້ບັນດາປະເທດ ຈີ​ເອັມ​ເອັດ ລົງ​ນາມສັນຍາກ່ຽວກັບການຂົົນສົ່ງຂ້າມຊາຍແດນໂດຍໄວ.

ຕອບສະໜອງຄວາມຕ້ອງການ ແລະ ຄຳຮຽກຮ້ອງຂອງບັນດາປະເທດ ຈີ​ເອັມ​ເອັດ ທີ່ຂຶ້ນກັບອາຊຽນ, ທ່ານຫຼີ ເຄີ້ສຽງ ນາຍົກລັດຖະມົນຕີ​ແຫ່ງ ສປ.ຈີນ ກໍ່​ໄດ້​ໃຫ້ຄຳໝັ້ນສັນຍາທີ່ແຂງແຮງກ່ຽວກັບບ້ວງ​ເງິນຊ່ວຍ​ເຫຼືອ 5 ຕື້​ໂດ​ລາ​ສະຫະລັດໃຫ້ແກ່ຈີ​ເອັມ​ເອັດ ໃນປີ 2015, ຕົ້ນຕໍ່ແມ່ນໃຫ້ການລົບລ້າງຄວາມອຶດຫີວ ແລະ ຫລຸດຜ່ອນຄວາມທຸກຍາກ. ພ້ອມກັນນັ້ນ ກໍ່ຍັງມີ 1 ຕື້​ໂດ​ລາ​ສະຫະລັດໃຫ້ແກ່ໂຄງການເຊື່ອມຕໍ່, 10 ຕື້​ໂດ​ລາສະຫະລັດໃຫ້ກອງທຶນພັດະນາ ອາຊຽນ ແລະ 11 ຕື້​ໂດ​ລາ​ສະຫະລັດໃຫ້ 26 ໂຄງການຮ່ວມມືອະນຸພາກພື້ນ ແມ່ນ້ຳຂອງເປີດກ້ວາງ. ນາຍົກລັດຖະມົນຕີ ຫຼີ ເຄີ້ສຽງ ໄດ້ຢືນຢັນ​ໃຫ້ສຳຄັນ​ແກ່ການພົວພັນກັບອາຊຽນ ແລະ ບັນດາປະເທດໃນອະນຸພາກພື້ນແມ່ນ້ຳຂອງ ແລະ ໃຫ້ທັດສະນະວ່າ ຢາກໄດ້ຮັບການພັດທະນາ ຕ້ອງມີສັນຕິພາບ ແລະ ສະຖຽມລະພາບ.

ກ່າວປາໄສທີ່ກອງປະຊຸມ, ທ່ານນາຍົກລັດຖະມົນຕີ ຫງວຽນເຕິນຢູງ ເນັ້ນເຖິງຂໍ້ໃຫຍ່ຈຳນວນໜຶ່ງ ໃນການຮ່ວມມືອະນຸພາກພື້ນ. ຕາມນັ້ນ, ທີໜຶ່ງ ຕ້ອງຮັບປະກັນຄວາມດຸ່ນດ່ຽງລະຫວ່າງ ສາມປັດໃຈ ເສດຖະກິດ-ມະນຸດ-ສິ່ງແວດລ້ອມ ໃນການຮ່ວມມືຈີ​ເອັມ​ເອັດ. ໃນໄລຍະທີ່ຈະມາເຖິງ, ຈີ​ເອັມ​ເອັດ ຕ້ອງ: ຊຸກຍູ້ບັນດາ​ແຜນ​ງານ/ໂຄງການກ່ຽວກັບສິ່ງແວດລ້ອມ ແລະ ພັດທະນາມະນຸດ; ​ເອົາ​ໃຈ​ໃສ່​ເຖິງການຊ່ວຍໜູນ​ໃຫ້ບັນດາປະເທດສະມາຊິກ ຫັນໄປສູ່ຕົວແບບຈະເລີນເຕີບໂຕສີຂຽວ; ຟື້ນຟູການຮ່ວມມື ແລະ ແບ່ງປັນບົດຮຽນ ລະຫວ່າງບັນດາປະເທດ ໃນວຽກງານຄຸ້ມຄອງແຫຼ່ງນ້ຳຢູ່ຕົວເມືອງ ຊົນນະບົດ ແລະ ນ້ຳປະປາ.

ທີສອງ, ມີຄວາມຈິງໃຈແລະ​ເຊື່ອຖື​ຊຶ່ງ​ກັນ​ແລະ​ກັນໃນການຮ່ວມມື ລະຫວ່າງບັນດາປະເທດສະມາຊິກ ເພື່ອສ້າງນ້ຳໃຈປະຊາຄົມ ຈີ​ເອັມ​ເອັດ, ກໍ່ສ້າງການພົວພັນຢ່າງໝັ້ນຄົງຍາວນານ. ເພີ່ມທະວີການສົນທະນາ ຢ່າງມີເນື້ອແທ້ ລະຫວ່າງບັນດາສະມາຊິກ ຈີ​ເອັມ​ເອັດ ນັບທັງກ່ຽວກັບກາລະໂອກາດກໍ່ຄືສິ່ງທ້າທາຍ, ທັງຈຸດຄ້າຍຄືກັນ ກໍ່ຄືຄວາມແຕກຕ່າງກັນ.

ທີສາມ, ບັນດາປະເທດອະນຸພາກພື້ນແມ່ນ້ຳຂອງຕ້ອງຍາດແຍ່ງທ່າແຮງຂອງຄູ່ຮ່ວມພັດທະນາ ແລະ ລະດົມແຫຼ່ງພະລັອື່ນ​ອີກໃຫ້ແກ່ບັນດາໂຄງການຈີ​ເອັມ​ເອັດ.

ທີສີ່, ຄຽງຄູ່ກັບການຮ່ວມມືລະຫວ່າງບັນດາລັດຖະບານ, ທ່ານນາຍົກລັດຖະມົນຕີ ຫງວຽນເຕິນຢູງ ຫວັງວ່າຂອບເຂດວິສາຫະກິດ ແລະ ກຳລັງຊາວໜຸ່ມຈະເຂົ້າຮ່ວມໃນການຮ່ວມມື ຈີ​ເອັມ​ເອັດ ຢ່າງຕັ້ງໜ້າ.

ສຳເລັດກອງປະຊຸມ, ບັນດາການນຳ ຈີ​ເອັມ​ເອັດ ໄດ້ເປັນເອກະພາບກັນ: ປະຕິບັດຂອບການລົງທຶນອະນຸ​ພາກ​ພື້ນ (RIF) ໄລຍະ 2014 – 2018; ຕິດ​ແໜ້ນການຮ່ວມມື ຈີ​ເອັມ​ເອັດ ກັບແຜນຍຸດທະສາດການພັດທະນາ ຂອງແຕ່ລະປະເທດ; ປະຕິບັດ​ແຜນຍຸດທະສາດ ແລະ ​ແຜນ​ງານ ກ່ຽວກັບບັນດາແລວທາງເສດຖະກິດ ຈີ​ເອັມ​ເອັດ; ກໍ່ສ້າງ​ແຜນ​ງານສັງລວມ ກ່ຽວກັບສ້າງຄວາມສະດວກໃຫ້ແກ່ການຄົມມະນາຄົມ ແລະ ການຄ້າ; ຊຸກຍູ້ການພັດທະນາຂອງວິ​ສາ​ຫະກິດ, ພິເສດແມ່ນວິສາຫະກິດຂະໜາດກາງ ແລະ ຂະໜາດນ້ອຍ; ເພີ່ມທະວີການຮ່ວມມືໃນຂົງເຂດສິ່ງແວດລ້ອມ, ພິເສດແມ່ນໃນການຮັບມືກັບການປ່ຽນແປງດິນຟ້າອາກາດ ໄພທຳມະຊາດ, ອະນຸລັກຮັກສາ ແລະ ພັດທະນາຢ່າງມີປະສິດທິຜົນ ບັນດາແຫຼ່ງຊັບພະຍາກອນທຳມະຊາດໃນອະນຸພາກພື້ນ.

ບັນດາການນຳ ຈີ​ເອັມ​ເອັດ ກໍ່ໄດ້ແລກປ່ຽນກ່ຽວກັບຄວາມສາມາດການຮ່ວມມືລະຫວ່າງ ຈີ​ເອັມ​ເອັດ ກັບຄວາມຄິດລິເລີ່ມອະນຸພາກພື້ນອື່ນ ແລະ ການລະດົນແຫຼ່ງພະລັງ ໃຫ້ແກ່ບັນດາໂຄງການ ໃນຂອບການລົງທຶນອະນຸພາກພື້ນ (RIF).

ກອງປະຊຸມໄດ້ຮັບຮອງເອົາບົດຖະແຫຼງການຮ່ວມ ທີ່ມີ 30 ຂໍ້ ແລະ ປະກາດ​ເປີດ​ເຜີຍເອກະສານຕ່າງໆ​ເຊັ່ນ: ແຜນການປະຕິບັດຂອບການລົງທຶນອະນຸພາກພື້ນ (RIF) ໄລຍະ 2014 – 2018; ເອກະສານກ່ຽວກັບ​ການສ້າງຕັ້ງສູນປະສານງານໄຟຟ້າອະ​ນຸ​ພາກ​ພື້ນ (RPCC); ເອກະສານກ່ຽວກັບ​ການສ້າງຕັ້ງສະມາ​ຄົມ​ທາງລົດໄຟ ຈີ​ເອັມ​ເອັດ; ບົດລາຍງານທົທວນຄືນຍຸດທະສາດການ​ຄົມມະນາຄົມ ຈີ​ເອັມ​ເອັດ (2006-2015). ກອງປະຊຸມກໍ່ໄດ້ເປັນເອກະສັນກັນຈະຈັດກອງປະຊຸມສຸດຍອດ ຈີ​ເອັມ​ເອັດ ຄັ້ງທີ່ 6 ທີ່ປະເທດຫວຽດນາມ ໃນປີ 2017.

ໃນ​ວາລະກອງປະຊຸມສຸດຍອດ ຈີ​ເອັມ​ເອັດ ຄັ້ງນີ້, ໃນວັນທີ 19 ທັນວາ ກໍ່ໄດ້ມີການ​ເຄື່ອນ​ໄຫວ​ຂອງເວທີຕ່າງໆຄື: ເວທີປາ​​ໄສ​ການລົງທຶນ ຈີ​ເອັມ​ເອັດ, ເວທີປາ​ໄສ​ການທຸລະກິດ ຈີ​ເອັມ​ເອັດ, ເວທີຊາວໜຸ່ມ, ກອງປະຊຸມບັນດາຄູ່ຮ່ວມພັດທະນາທີ່ມີການເຂົ້າຮ່ວມຂອງຜູ້ແທນບັນດາວິສາຫະກິດ ບັນດານັກລົງທຶນ ເຈົ້າໜ້າທີ່ອາວຸໂສ ຈີ​ເອັມ​ເອັດ ຜູ້ແທນຊາວໜຸ່ມບັນດາປະເທດ ຈີ​ເອັມ​ເອັດ ແລະ ທະນາຄານພັດທະນາອາຊີ.

ພົບປະຫາລື​ກັບນາຍົກລັດຖະມົນຕີ​ແຫ່ງ​ລາຊະ​ອານາຈັກໄທ  

ໃນຕອນເຊົ້າວັນທີ 20 ທັນວາ, ທ່ານນາຍົກລັດຖະມົນຕີ ຫງວຽນເຕິນຢູງ ໄດ້ພົບປະຫາລືສອງ​ຝ່າຍກັບທ່ານ ປຣະຍຸດ ຈັນ​ໂອຊາ ນາຍົກລັດຖະມົນຕີ​ແຫ່ງ​ລາຊະ​ອານາຈັກ​ໄ.

​ໃນ​ການພົບປະຫາລື​, ທ່ານ​ນາຍົກລັດຖະມົນຕີທັງສອງ ​ໄດ້ສະ​ແດງ​ຄວາມ​ຮູ້ສຶກພຶງ​ພໍ​ໃຈກ່ຽວ​ກັບ​ການ​ພັດທະນາຂອງສາຍພົວພັນມິດຕະພາບ​ແບບປະເທດບ້ານໃກ້ເຮືອນຄຽງ ແລະ ຄູ່ຮ່ວມຍຸດທະສາດຫວຽດນາມ - ໄທ; ເປັນເອກະພາບກັນຈະປະສານສົບທົບຊີ້ນຳປະຕິບັດ ບັນດາຂໍ້ຕົກລົງທີ່ບັນລຸໄດ້ ໃນການຢ້ຽມຢາມຢ່າງເປັນທາງການຫວຽດນາມ ຂອງທ່ານນາຍົກລັດຖະມົນຕີ ປຣະຍຸດ ຈັນ​ໂອຊາ (ໃນເດືອນພະຈິກປີ 2014), ໃນນັ້ນ, ມີການຈັດຕັ້ງກອງປະຊຸມຄະນະລັດຖະມົນຕີຮ່ວມ ຄັ້ງທີ 3 ແລະ ຊຸກຍູ້ການພົວພັນຮ່ວມມືສອງຝ່າຍໃນທຸກຂົງເຂດ.

ຕອນເຊົ້າໃນວັນດຽວກັນ, ທ່ານນາຍົກລັດຖະມົນຕີ ຫງວຽນເຕິນຢູງ ໄດ້ຮ່ວມພິທີເປີດຕົວສາຍ​ການບິນ ​ໄທຫວຽດ​ເຈັທ, ຕ້ອນຮັບ​ທ່ານ​ປະທານ​ສະມາຄົມ​ມິດຕະພາບ​ໄທ - ຫວຽດນາມ ປຣະຈວບ ​ໄຊ​ຍະ​ສານ, ທ່ານ ວິໂກຣມ ກຣະມະດິດ ​ປະທານສະພາບໍລິຫານກຸ່ມບໍລິສັດອາມາຕາ (AMATA), ຕ້ອນຮັບທ່ານ ປີ​ຢາ​ສະຫວັສ​ຕິ ອຳຣານັນ ປະທານບໍລິສັດ ປຕທ. ຈຳກັດ (ມະຫານຊົນ) (PTT PUBLIC COMPANY LIMITED), ຕ້ອນຮັບ​ການ​ນຳບໍລິສັດກຸ່ມ​ເຊັນທຣັນ​ ຈຳກັດ (CENTRAL GROUP) ແລະ ຢ້ຽມຢາມພະນັກງານສະຖານທູດຫວຽດນາມທີ່ປະເທດໄທ./.

                                                ສັງລວມໂດຍ: ຫງວຽນດຶກ

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ