ວັນອາທິດ, 31/5/2020
ກອງປະຊຸມຄັ້ງທີ່ 11 ຂອງຄະນະບໍລິຫານງານສູນກາງ ພັກກອມມູນິດຫວຽດນາມ ສະໄໝທີ XI
17/5/2015 21:47' ສົ່ງ ພິມ
ພາບກອງປະຊຸມສູນກາງຄັ້ງທີ 11 ວາລະອັດການປະຊຸມ. (ພາບ: TTXVN)

ຄະນະ​ບໍລິຫານ​ງານ​ສູນ​ກາງ​ພັກ ​ໄດ້​ປຶກສາ​ພິຈາລະນາ ປະກອບ​ຄວາມ​ເຫັນ​ເຂົ້າ​ໃນ​ລາຍ​ງານ​ຂອງກົມ​ການ​ເມືອງສູນ​ກາງ ກ່ຽວ​ກັບ​ທິດ​ທາງ​ວຽກ​ງານ​ບຸກຄະລາ​ກອນຂອງຄະນະ​ບໍລິຫານ​ງານ​ສູນ​ກາງ​ພັກ ສະ​ໄໝ​ທີ XII. ບົນ​ພື້ນຖານ​ຕີ​ລາຄາ​ຈຸດ​ດີ, ຂໍ້​ຈຳກັດ ​ແລະ ບົດຮຽນ​ປະສົບ​ການ​​ຂອງ​ວຽກ​ງານ​ບຸກຄະລາ​ກອນ ຜ່ານ​ກອງ​ປະຊຸມ​ໃຫຍ່​ຜູ້​ແທນ​ທົ່ວ​ປະ​ເທດ​ຂອງ​ພັກ ​ໃນ 6 ສະ​ໄໝທີ່​ຜ່ານ​ມາ (​ແຕ່​ກອງ​ປະຊຸມ​ໃຫຍ່​ຄັ້ງ​ທີ VI ​ເຖິງ​ກອງ​ປະຊຸມ​ໃຫຍ່​ຄັ້ງ​ທີ XI), ສູນ​ກາງ​ຢືນຢັນ​ວ່າ ການ​ຄັດ​ເລືອກ​ບຸກຄະລາ​ກອນ ​ເພື່ອ​​ເລືອກຕັ້ງ​ເຂົ້າ​ໃນ​ບັນດາ​ອົງການນຳ​ຂອງ​ພັກ ​ໃນ​ກອງ​ປະຊຸມ​ໃຫຍ່​ຄັ້ງທີ XII ຂອງ​ພັກ ​ແມ່ນ​ມີ​ຄວາມ​ໝາຍ​ສຳຄັນ​ທີ່​ສຸດ.

​ເພື່ອ​ຮັບປະກັນ​ເພີ່ມ​ທະວີ​ການ​ກໍ່ສ້າງ​ພັກ​ໃຫ້​ປອດ​ໃສ​ຂາວ​ສະອາດ ໝັ້ນຄົງ​ເຂັ້ມ​ແຂງ; ​ເສີມ​ຂະຫຍາຍ​ກຳລັງ​ແຮງ​ຂອງ​ທົ່ວ​ທັງ​ຊາດ ​ແລະ ປະຊາທິປະ​ໄຕ​ສັງຄົມ​ນິຍົມ; ຊຸກຍູ້​ການປ່ຽນ​ແປງ​ໃໝ່​ຢ່າງຮອບດ້ານ ຄົບ​ຊຸດ; ປົກ​ປັກ​ຮັກສາ​ປະ​ເທດ​ຊາດ ຮັກສາ​ສິ່ງ​ແວດ​ລ້ອມສັນຕິພາບ ສະຖຽນ​ລະ​ພາບ​ໄວ້​ຢ່າງ​ໝັ້ນຄົງ; ກໍ່ສ້າງ​ຮາກ​ຖານ​ເພື່ອ​​ເຮັດ​ໃຫ້​ຫວຽດນາມ​ໂດຍ​ພື້ນຖານ​ກາຍ​ເປັນ​ປະ​ເທດ​ອຸດສາຫະກຳ ຕາມ​ທິດ​ທັນ​ສະ​ໄໝ​ໂດຍ​ໄວ, ​ໃນ​ສະພາບ​ການ​ສາກົນ ​ແລະ ພາຍ​ໃນ​ປະ​ເທດ​ມີ​ຄວາມ​ຫຍຸ້ງຍາກ ສິ່ງ​ທ້າ​ທາຍຫຼາຍ​ປະການ​ນັ້ນ ຄະນະ​ບໍລິຫານ​ງານ​ສູນ​ກາງ​ພັກ ​ເນັ້ນ​ເຖິງ​ຄວາມ​ຮຽກຮ້ອງ​ຕ້ອງການ 4 ປະການ ​ໃນ​ການ​ກໍ່ສ້າງຄະນະ​ບໍລິຫານ​ງານ​ສູນ​ກາງ​ພັກ ສະ​ໄໝ​ທີ XII, ນັ້ນ​ຄື:

ທີ​ໜຶ່ງ, ຄະນະ​ບໍລິຫານ​ງານ​ສູນ​ກາງ​ພັກສະ​ໄໝ​ທີ XII ຕ້ອງ​ເປັນ​ໝູ່​ຄະນະ​ໜຶ່ງ​ທີ່ໝັ້ນຄົງ​ເຂັ້ມ​ແຂງຢ່າງ​ແທ້​ຈິງ, ສາມັກຄີ​ເປັນ​ເອກະ​ພາບ​ຢ່າງ​ແໜ້ນ​ແຟ້ນ, ມີ​ຫຼັກ​ໝັ້ນ​ການ​ເມືອງ​ທີ່​ໝັ້ນ​ແກ່ນ, ມີ​ຄຸນສົມບັດ​ສິນ​ທຳ​ທີ່​ປອດ​ໃສ​ຂາວສະອາດ, ຢຶດໝັ້ນ​ໃນ​ຈຸດໝາຍ​ເອກະລາດ​​ແຫ່ງຊາດ ​ແລະ ສັງຄົມ​ນິຍົມ, ມີ​ວິ​ໄສ​ທັດ​ຍຸດ​ທະ​ສາດ, ມີ​ສະຕິ​ປັນຍາສະ​ຫຼາດ​ສ່ອງ​ໃສ, ມີ​ຈິນຕະນາການ​ປ່ຽນ​ແປງ​ໃໝ່ ປະດິດ​ສ້າງ, ມີ​ເຈດ​ຈຳນົງ​ສູ້​ຮົບ​ສູງ, ລະບຽບວິ​ໄນ​ເຂັ້ມ​ງວດ, ມີ​ລັກສະນະ​ພັກ​ສູງ, ຮູ້​ຮັບ​ຟັງ​ການ​ປະກອບ​ຄຳ​ຄິດ​ຄຳ​ເຫັນ, ຕິ​ຊົມ​ຕົນ​ເອງ ​ແລະ ຕິ​ຊົມ​ຢ່າງ​ເຂັ້ມ​ງວດ, ​ເຕົ້າ​ໂຮມ​ຄວາມ​ສາມັກຄີ ​ເປັນ​ເອກະ​ພາບ​ພາຍ​ໃນ​ພັກ​ໄດ້, ພົວພັນ​ສະໜິດ​ແໜ້ນ​ກັບ​ປະຊາຊົນ; ມີ​ອິດ​ທິພົນ​ແລະຄວາມ​ສາມາດ​​ເພື່ອນຳພາ​ປະ​ເທດ​ຊາດ​ໃນ​ໄລຍະ​ແຫ່ງ​ການ​ພັດທະນາ​ໃໝ່. 

ທີ​ສອງ, ບົນ​ພື້ນຖານ​ຮັບປະກັນ​ມາດຕະຖານ, ຄະນະ​ບໍລິຫານ​ງານ​ສູນ​ກາງ​ພັກ ສະ​ໄໝ​ທີ XII ຕ້ອງ​ມີ​ຈຳນວນ ​ແລະ ​ໂຄງ​ປະກອບທີ່​​ເໝາະສົມ ​ເພື່ອ​ຮັບປະກັນ​ການ​ນຳພາ​ຮອບດ້ານ​ໄດ້ດີ, ​ເພີ່ມ​ທະວີ​ຈຳນວນ​ກຳມະການ​ສູນ​ກາງ​ຢູ່​ບັນດາ​ທີ່​ຕັ້ງ ພື້ນ​ທີ່ ຂົງ​ເຂດ​ວຽກ​ງານ​ທີ່​ສຳຄັນ. 

ທີ​ສາມ, ຮັບປະກັນ​ລັກສະນະ​ສືບ​ທອດ ​ແລະ ຂະຫຍາຍຕົວ​ຢ່າງ​ຕໍ່​ເນື່ອງ. 

ທີ​ສີ່, ການ​ແນະນຳ​ບຸກຄະລາ​ກອນ​ເວົ້າ​ລວມ ຕ້ອງ​ບົນ​ພື້ນຖານ​ແຜນ​ກຳນົດຄະນະ​ບໍລິຫານ​ງານ​ສູນ​ກາງ​, ກົມ​ການ​ເມືອງ, ຄະນະ​ເລຂາທິການ ​ແລະ ບັນດາ​ໜ້າ​ທີ່​ຕຳ​ແໜ່​ງການ​ນຳ​ຫຼັກ​ແຫຼ່ງຂອງ​ພັກ ລັດ ​ໃນ​ສະ​ໄໝ​ທີ XII (2016 - 2021) ​ແລະ ບັນດາ​ສະ​ໄໝ​ຕໍ່​ໄປ; ຮັກສາ​ຫຼັກການ ຂໍ້​ກຳນົດ ກົດ​ລະບຽບ​ໄວ້​ຄື​ເກົ່າ; ​ເສີມ​ຂະຫຍາຍ​ປະຊາທິປະ​ໄຕ ຄວາມ​ຮັບຜິດຊອບ​ໃນ​ການ​ແນະນຳ, ຕີ​ລາຄາ, ຄັດ​ເລືອກ​ບຸກຄະລາ​ກອນ​ທີ່​ເຂົ້າ​ຮ່ວມ​ໃນ ຄະນະ​ບໍລິຫານ​ງານ​ສູນ​ກາງ​ພັກ, ກົມ​ການ​ເມືອງ, ຄະນະ​ເລຂາທິການ ​ແລະ ບັນດາ​ໜ້າ​ທີ່​ຕຳ​ແໜ່​ງການ​ນຳ​ຫຼັກ​ແຫຼ່ງຂອງ​ພັກ ລັດ ​ໃນ​ສະ​ໄໝປະຈຳການ​ໃໝ່; ຕ້ານ​ປະກົດ​ການ​ສວຍ​ໂອກາດ, ຄວາມ​ທະ​ເຍີ​ທະຍານ​ໃນ​ອຳນາດ, “ວິ້ງ​ເຕັ້ນຫາ​ຄວາມຊ່ວຍ​ເຫຼືອ”, ພາກສ່ວນ ພັກ​ພວກ​ນິຍົມ…; ຕ້ອງ​ມີ​ສະຕິລະວັງ​ຕົວຕໍ່​ກົນອຸບາຍ ​ເລ່ຫຼ່ຽມ​ຂອງ​ບັນດາ​ອິດ​ທິກຳລັງ​ສັດຕູທີ່​ຈະ​ທຳລາຍ ກໍ່​ຄວາມວຸ້ນວາຍຢູ່ພາຍ​ໃນ.

ອີງ​ໃສ່​ມາດຕະຖານ​ພະນັກງານ​ ທີ່​ໄດ້​ກຳນົດຢູ່​ໃນ ມະຕິ​ກອງ​ປະຊຸມ​ສູນ​ກາງ​ພັກ​ຄັ້ງ​ທີ 3 (ສະ​ໄໝ​ທີ VIII) ວ່າ​ດ້ວຍ “​ແຜນ​ຍຸດ​ທະ​ສາດ​ພະນັກງານ​ໃນ​ສະ​ໄໝ​ແຫ່ງ​ການຍູ້​ແຮງ​ການ​ຫັນ​ປະ​ເທດຊາ​ດເປັນ​ອຸດ​ສາ​ຫະກຳ ທັນ​ສະ​ໄໝ”, ກອງ​ປະຊຸມຄະນະ​ບໍລິຫານ​ງານ​ສູນ​ກາງ​ພັກຄັ້ງ​ນີ້​ ໄດ້​ເນັ້ນ​ເຖິງ​ປະມວນມາດຕະຖານ 3 ໝວດ ​ຕໍ່​ກັບ​ກຳ​ມະ​ການຄະນະ​ບໍລິຫານ​ງານ​ສູນ​ກາງ​ພັກ ສະ​ໄໝ​ທີ XII ຊຶ່ງ​ໃນ​ນັ້ນ​​ໄດ້ເນັ້ນ​ເຖິງ​ນ້ຳ​ໃຈ​ຮັກ​ຊາດ​ອັນ​ແຮງ​ກ້າ​ເລິກ​ເຊິ່ງ, ຫຼັກ​ໝັ້ນ​ການ​ເມືອງ​ອັນ​ໜັກ​ແໜ້ນ, ມີ​ຄຸນສົມບັດ​ສິນ​ທຳ​ອັນ​ຜ່ອງ​ໃສ​ຂາວ​ສະອາດ ​ແລະ ມີ​ສະຕິ​ປັນຍາ ວິ​ໄສ​ທັດ ຈິນຕະນາການ​ຍຸດ​ທະ​ສາດ​ໃນ​ການວາງ​ກຳນົດ​ແນວທາງ.

ຄະນະ​ບໍລິຫານ​ງານ​ສູນ​ກາງ​ພັກ​ເຫັນ​ດີ​ເຫັນ​ພ້ອມ​ກັບ​ໃບ​ສະ​ເໜີ​ຂອງກົມ​ການ​ເມືອງສູນ​ກາງ​ກ່ຽວ​ກັບ​ຈຳນວນ​ຜູ້​ແທນ ​ແລະ ການຈັດ​ແບ່ງ​ຜູ້​ແທນ​ທີ່​ຈະ​ເຂົ້າ​ຮ່ວມ​ກອງ​ປະຊຸມ​ໃຫຍ່​ຜູ້​ແທນ​ທົ່ວ​ປະ​ເທດ​ຄັ້ງ​ທີ XII ຂອງ​ພັກ.

ຄະນະ​ບໍລິຫານ​ງານ​ສູນ​ກາງ​ພັກກໍ່​ໄດ້​ປຶກສາ​ພິຈາລະນາ ​ປະກອບຄວາມ​ຄິດ​ເຫັນ​​ເຂົ້າ​ໃນໃບສະ​ເໜີ​ຂອງກົມ​ການ​ເມືອງ ກ່ຽວ​ກັບ​ຕົວ​ແບບ​ການຈັດ​ຕັ້ງ​ອຳນາດ​ການ​ປົກຄອງ​ທ້ອງ​ຖິ່ນ. ການປ່ຽນ​ແປງ​ໃໝ່ ປັບປຸງ​ບູລະນະ​ການຈັດ​ຕັ້ງ ​ແລະ ​ເຄື່ອນ​ໄຫວຂອງ​ອຳນາດ​ການ​ປົກຄອງ​ທ້ອງ​ຖິ່ນ​​ແມ່ນມີ​ຄວາມ​ໝາຍ​ສຳຄັນ​ທີ່​ສຸດ​ຕໍ່​ກັບພາລະກິດ​ປ່ຽນ​ແປງ​ໃໝ່, ບູລະນະ, ຍົກ​ສູງ​ຄວາມ​ສັກສິດ ​ແລະ ປະສິດທິ​ຜົນ​ໃນ​ການ​ເຄື່ອນ​ໄຫວ​ ຂອງ​ລັດ​ແຫ່ງ​ອຳນາດ​ກົດໝາຍສັງຄົມ​ນິຍົມ ຫວຽດນາມ.

ຄະນະ​ບໍລິຫານ​ງານ​ສູນ​ກາງ​ພັກສືບ​ຕໍ່​ຢືນຢັນ​ຄວາມ​ຕ້ອງການ ​ແລະ ຄວາມ​ຖືກຕ້ອງ​ຂອງ​ແຜນ​ນະ​ໂຍບາຍ​ລົງທຶນ​ກໍ່ສ້າ​ງ ສະໜາມ​ບິນ​ສາ​ກົນລອງ​ແທ່ງ ຕາມທີ່​ກອງ​ປະຊຸມ​ສູນ​ກາງ​ຄັ້ງ​ທີ 4 ສະ​ໄໝທີ XI (​ເດືອນທັນວາ 2011) ວາງ​ອອກ​ມາ ຊຶ່ງ​ຖື​ວ່າ​ໂຄງການ​ນີ້​ມີ​ຄວາມ​ສຳຄັນພິ​ເສດຂັ້ນ​ລັດ, ມີຄວາມ​ໝາຍ​ອັນ​ໃຫຍ່​ຫຼວງ​ ຕໍ່​ກັບ ການ​ພັດທະນາ​ເສດຖະກິດ - ສັງຄົມ​ຂອງ​ປະ​ເທດ​ຊາດ. ຄະນະ​ບໍລິຫານ​ງານ​ສູນ​ກາງ​ພັກວາງ​ຄວາມ​ຮຽກຮ້ອງ​ຕ້ອງການ​ວ່າ ​ໃນ​ວິວັດ​ການຄົ້ນຄວ້າ ສືບ​ຕໍ່​ບູລະນະ​ໂຄງການ ຕ້ອງ​ເອົາ​ໃຈ​ໃສ່​ກຳນົດ​ແຈ້ງ​ບັນດາ​ບັນທັດຖານ ​ເງື່ອນ​ໄຂ ​ແລະ ປະຖົມ​ປັດ​ໃຈ​ເພື່ອ​ກໍ່ສ້າງ​ໃຫ້ກາຍ​ເປັນ​ສະໜາມ​ບິນ​ສາກົນ​ຂະໜາດ​ໃຫຍ່ ​ໃນ​ສະພາບ​ການ​ທີ່ບັນດາ​ສະໜາມ​ບິນ​ສາ​ກົນ​ຢູ່​ພາກ​ພື້ນ​ອາຊີ​ຕາ​ເວັນ​ອອກສຽງ​ໃຕ້ກຳລັງ​ແຂ່ງ​ຂັນ​ກັນ​ຢ່າງ​ເຄັ່ງຮ້ອນ​. 

ຄະນະ​ບໍລິຫານ​ງານ​ສູນ​ກາງ​ຮຽກຮ້ອງ​ໃຫ້​ທົ່ວ​ພັກ ທົ່ວ​ປວງ​ຊົນ ​ແລະ ທົ່ວ​ກອງທັບຈົ່ງ​ເພີ່ມ​ທະວີ​ຄວາມ​ສາມັກຄີ, ​ເປັນ​ເອກະ​ພາບ​ກັນທາງ​ດ້ານ​ແນວ​ຄິດ ​ແລະ ການ​ກະທຳ, ຕັ້ງໜ້າ​ພະຍາຍາມ​ສູ້​ຊົນ ຜ່ານ​ຜ່າ​ຄວາມ​ຫຍຸ້ງຍາກ ສິ່ງ​ທ້າ​ທາຍ, ປະຕິບັດ​ໜ້າ​ທີ່​ພັດທະນາ​ເສດຖະກິດ - ສັງຄົມປີ 2015 ​ແລະ ມະຕິ​ກອງ​ປະຊຸມ​ໃຫຍ່​ຜູ້​ແທນ​ທົ່ວ​ປະ​ເທດຄັ້ງທີ XI ຂອງ​ພັກ​ໃຫ້​ສຳ​ເລັດ​ມີ​ໄຊ, ດຳ​ເນີນ​ກອງ​ປະຊຸມ​ໃຫຍ່​ຄະນະ​ພັກ​ຂັ້ນ​ຕ່າງໆ ກ້າວ​ໄປ​ເຖິງ​ກອງ​ປະຊຸມ​ໃຫຍ່​ຜູ້​ແທນ​ທົ່ວ​ປະ​ເທດ​ຄັ້ງ​ທີ XII ຂອງ​ພັກ​ຢ່າງ​ສຳ​ເລັດ​ຜົນ./.

ສັງ​ລວມ​ໂດຍ ຢາ​ບ໋າ​ວ

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ