ວັນອາທິດ, 31/5/2020
ທ່ານ ດີມີຕຣີ ແມັດເວແດັບ ນາຍົກ ລັດຖະມົນຕີແຫ່ງສະຫະພັນລັດເຊຍ ໄດ້ສຳເລັດສິ້ນສຸດການຢ້ຽມຢາມຫວຽດນາມ ຢ່າງຈົບງາມ
17/5/2015 21:51' ສົ່ງ ພິມ
ທ່ານນາຍົກລັດຖະມົນຕີ ຫງວຽນເຕິນຢຸງ ແລະ ທ່ານນາຍົກລັດຖະມົນຕີ ດີມີຕຣີ ແມັດເວແດັບ ກຳລັງເຂົ້າໃນຫ້ອງປະຊຸມ (ພາບ: TTXVN)

ໃນ​ເວລາ​ຢູ່​ຢ້ຽມຢາມ​ຫວຽດນາມ, ນາຍົກລັດຖະມົນຕີ​ແຫ່ງ​ສະຫະພັນ​ລັ​ດ​ເຊຍ ທ່ານດີ​ມີ​ຕຣີ ​​ແມັດ​ເວ​ແດັບ ​ໄດ້​ພົບ​ປະ​ປຶກສາ​ຫາລື​ກັບທ່ານ​ນາຍົກລັດຖະມົນຕີ ຫງວຽນ​ເຕິ​ນຢຸງ; ພົບ​ປະ​ກັບ​ທ່ານ​ເລ​ຂາ​ທິການ​ໃຫຍ່ ຫງວຽນ​ຝູຈ້ອງ; ຢ້ຽມ​ຄຳ​ນັບ​ທ່ານ​ປະທານ​ປະ​ເທດ ​ເຈືອງ​ເຕິ​ນຊາງ ​ແລະ ປະທານ​ສະພາ​ແຫ່ງ​ຊາດ ຫງວຽນ​ຊິງ​ຮຸ່ງ.

​ໃນ​ການ​ພົບ​ປະ​ກັບ​ບັນດາ​ການ​ນຳ​ຂັ້ນ​ສູງ​ຂອງ​ຫວຽດນາມ, ທ່າມກາງ​ບັນຍາກາດ​ແຫ່ງ​ຄວາມ​ມິດຕະພາບ ​ໄວ້​ວາງ​ໃຈ ​ແລະ ​ເຂົ້າ​ໃຈ​ຊຶ່ງ​ກັນ​ແລະ​ກັນ, ສອງ​ຝ່າຍ​ໄດ້​ແຈ້ງ​ໃຫ້​ກັນຊາ​ບກ່ຽວ​ກັບ​ສະພາບ​ການ​ການ​ເມືອງ ​ເສດຖະກິດ ສັງຄົມ ​ແລະ ນະ​ໂຍບາຍ​ການຕ່າງປະ​ເທດ​ຂອງ​ແຕ່ລະ​ປະ​ເທດ; ​ແລກປ່ຽນ​ຄວາມ​ຄິດ​ຄວາມ​ເຫັນ​ກ່ຽວ​ກັບ​ບັນດາ​ບັນຫາ​ພົວພັນ​ທະວິ​ພາຄີ, ບັນດາ​ບັນຫາ​ສາກົນ ​ແລະ ພາກ​ພື້ນ​ທີ່​ທັງ​ສອງ​ຝ່າຍ​ມີ​ຄວາມ​ສົນ​ໃຈ.

ສອງ​ຝ່າຍ​ຢືນຢັນ​ສືບ​ຕໍ່​ປະຕິບັດນະ​ໂຍບາຍ​ເພີ່ມ​ທະວີການ​ພົວພັນ​ຄູ່​ຮ່ວມ​ຍຸດ​ທະ​ສາດ​ຮອບດ້ານຫວຽດນາມ - ລັດ​ເຊຍ, ຕອບ​ສະໜອງ​ຜົນ​ປະ​ໂຫຍ​ດອັນ​ຍາວ​ນານ​ຂອງ​ປະຊາຊົນ​ສອງ​ປະ​ເທດ ກໍ່​ຄື​ສືບຕໍ່ຄວາມ​ພະຍາຍາມ​ລວມ​ ເພື່ອ​ແນ​ໃສ່ຊຸກຍູ້​ການ​ຮ່ວມ​ມື​ໃນ​ທຸກ​ຂົງ​ເຂດ.

ສອງ​ຝ່າຍ​ເຫັນ​ດີ​ເປັນ​ເອກະ​ພາບວ່າ​ຕ້ອງ​ຮັກສາ ​ແລະ ​ເພີ່ມ​ທະວີ​ການ​ແລກປ່ຽນ​ຄະນະ​ຜູ້​ແທນຂັ້ນ​ຕ່າງໆ, ​ເປັນ​ຕົ້ນ​ແມ່ນ​ຂັ້ນ​ສູງ, ​ເປີດ​ຊ່ອງ​ສາຍ​ຮ່ວມ​ມື​ຫຼາຍ​ຊ່ອງ​ຕາມ​ທາງ​ພັກ ລັດ ລັດຖະບານ ສະພາ​ແຫ່ງ​ຊາດ ບັນດາ​ອົງການຈັດ​ຕັ້ງ​ສັງຄົມ ກໍ່​ຄືລະຫວ່າງ​ທ້ອງ​ຖິ່ນ; ສືບ​ຕໍ່​ສົມທົບ​ຢ່າງ​ແໜ້ນ​ແຟ້ນ ​ແລະ ສະໜັບສະໜູນ​ຊຶ່ງ​ກັນ ​ແລະ ກັນ​ໃນ​ເວທີ​ສາກົນ.

ສອງ​ຝ່າຍກໍ່​ໄດ້​ທົບ​ທວນ​ການ​ຜັນ​ຂະຫຍາຍ​ບັນດາ​ໂຄງການ​ຈຸດ​ໜັກ​ໃຈກາງ, ສຸມ​ໃສ່​ຕີ​ລາຄາ​ຜົນສຳ​ເລັດ ​ແລະ ສິ່ງ​ຄົງ​ຄ້າງ​ໃນ​ບັນດາ​ຂົງ​ເຂດ​ຮ່ວມ​ມື, ພິ​ເສດ​ແມ່ນ​ການ​ຮ່ວມ​ມື​ດ້ານເສດຖະກິດ ການ​ລົງ​ທຶນ ການ​ຄ້າ ນ້ຳມັນ​ອາຍ​ແກ​ສ ​ໄຟ​ຟ້າ​ນິວ​ເກຼຍ ​ແລະ ​ເຕັດ​ນິກການ​ທະຫານ.

ສອງ​ຝ່າຍ​ໃຫ້​ທັດສະນະ​ວ່າ ມູນ​ຄ່າ​ການ​ຄ້າ​ສອງ​ຝ່າຍ​ໃນ​ເວລາ​ທີ່​ຜ່ານ​ມາ​ໄດ້​ຫລຸດ​ລົງ​ສ່ວນ​ໃດ​ສ່ວນ​ໜຶ່ງ ​ແລະ ​ເພື່ອ​ປົວ​ແປງ​ສະພາບ​ການ, ສອງ​ຝ່າຍ​ເຫັນ​ດີ​ເປັນ​ເອກະ​ພາບ​ວ່າ​ ບັນດາ​ກະຊວງ ຂະ​ແໜງ​ການ ວິສາຫະກິດ ຕ້ອງ​ຮີບ​ຊອກ​ຫາ​ມາດ​ຕະການ​ອັນ​ສອດຄ່ອງ​ໃຫ້​ໄດ້​ໂດຍ​ໄວ, ​ໃນ​ນັ້ນ​ມີ​ການ​ຍູ້​ແຮງການ​ລົງ​ນາມ​ເປັນ​ທາງ​ການ​ໃນ​ສັນຍາ​ການ​ຄ້າ​ເສລີ​ລະຫວ່າງຫວຽດນາມ ​ແລະ ສະຫະພັນ​ເສດຖະກິດ​ອາຊີ-​ເອີຣົບ ​ໃນ​ເຄິ່ງຕົ້ນ​ປີ 2015, ສູ້​ຊົນ​ຍົກ​ມູນ​ຄ່າ​ການ​ຄ້າ​ສອງ​ສົ້ນ​ຂຶ້ນ​ເປັນ 10 ຕື້​ໂດ​ລາ​ສະຫະລັດ​ໃນ​ປີ 2020.

ສອງ​ຝ່າຍກໍ່​ໄດ້​ສະ​ເໜີ​ໃຫ້​ທະນາຄານ​ຂອງ​ສອງ​ປະ​ເທດພ້ອມ​ກັນ​ຄົ້ນຄວ້າ​ຢ່າງ​ຕັ້ງໜ້າ ​ເພື່ອສະ​ເໜີ​ແນະ​ຄວາມ​ສາມາດ​ຊຳລະສະ​ສາງການ​ແລກປ່ຽນ​ຊື້ຂາຍ​ຕ່າງໆ ​ດ້ວຍ​ຕະກູນ​ເງິນ​ໃນ​ປະ​ເທດ ທັງ​ນີ້​ກໍ່​ເພື່ອ​ຊຸກຍູ້​ການ​ຄ້າ​ລະຫວ່າງສອງປະ​ເທດ​.

ສອງ​ຝ່າຍເຫັນ​ດີ​​ໃຫ້​ທັດສະນະ​ວ່າ ປັດຈຸບັນ​ການ​ລົງທຶນ​ສອງ​ຝ່າຍ​ຍັງບໍ່​ສົມ​ຄູ່​ກັບ​ຄວາມ​ຕ້ອງການ ​ແລະ ຄວາມ​ສາມາດ​ບົ່ມ​ຊ້ອງ​ຂອງ​​ແຕ່ລະ​ປະ​ເທດ, ຖື​ວ່າ ໜ່ວຍ​ງານ​ລວມຂັ້ນ​ສູງ​ກ່ຽວ​ກັບ​ບັນດາ​ໂຄງການ​ລົງທຶນ​ບຸລິມະສິດຫວຽດນາມ - ລັດ​ເຊຍ ​ໂດຍ​ແມ່ນ​ສອງ​ລັດຖະມົນຕີ​ວ່າການ​ກະຊວງ​ພານິດ​ເປັນ​ຜູ້ນຳ​ໜ້າ​ນັ້ນ ຕ້ອງ​ຖື​ບົດບາດ​ອັນ​ສຳຄັນ​ໃນ​ການ​ເລືອກ​ເອົາ​ຂົງ​ເຂດ​ລົງທຶນ ​ແລະ ຜັນ​ຂະຫຍາຍບັນດາ​ໂຄງການ​ທີ່​ໄດ້​ຄັດ​ເລືອກ​​ໃຫ້​​ໄດ້​ຮັບປະສິດທິ​ຜົນ.

ສອງ​ຝ່າຍຕີ​ລາຄາ​ສູງ​ຕໍ່​ການ​ທີ່​ບັນດາ​ກະຊວງ ຂະ​ແໜງ​ການ ​ແລະ ອົງການ​ທີ່​ກ່ຽວ​ຂອງ​ສອງ​ປະ​ເທດພວມ​ຜັນ​ຂະຫຍາຍ​ການ​ຮ່ວມ​ມື​ຢ່າງ​ຕັ້ງໜ້າ​ໃນ​ຂົງ​ເຂດ​ນ້ຳມັນ​ອາຍ​ແກ​ສ ​ໄຟ​ຟ້າ​ນິວ​ເກຼຍ ອຸດສາ​ຫະກຳຂຸດ​ຄົ້ນ​ແຮ່​ທາດ ກະສິກຳ...

​ໃນ​ສະພາບ​ການ​ເສດຖະກິດ​ໂລກ​ມີ​ຄວາມ​ຫຍຸ້ງຍາກ ​ແລະ ສົ່ງ​ຜົນ​ກະທົບ​ໂດຍ​ກົງ​ເຖິງ​ແຕ່ລະ​ປະ​ເທດ, ສອງ​ຝ່າຍ​ເຫັນ​ດີ​ເປັນ​ເອກະ​ພາບ​ເພີ່​ມທະວີ​ການ​ຮ່ວມ​ມື​ຢ່າງ​ແໜ້ນ​ແຟ້ນ, ຮັບປະກັນ​​ແຫຼ່ງທຶນ​ເພື່ອ​ຜັນ​ຂະຫຍາຍບັນດາ​ໂຄງການ​ພະລັງງານ, ​ໃນ​ນັ້ນ​ມີ​ບັນດາ​ໂຄງການ​ນ້ຳມັນ​ອາຍ​ແກ​ສຢູ່​ໄຫຼ່​ທະວີບ​ຂອງ​ຫວຽດນາມ ແລະ ຢູ່ລັດ​ເຊຍ ດ້ວຍ​ຈຸດປະສົງ​ເພີ່ມ​ທະວີ​ການ​ຮ່ວມ​ມື​ບໍ່​ພຽງ​ແຕ່​ໃນ​ຂົງ​ເຂດ​ສືບສວນ​ຢັ່ງ​ເບິ່ງ ​ແລະ ຂຸດ​ຄົ້ນ​ເທົ່າ​ນັ້ນ ຫາກ​ຍັງ​ເປີດ​ກວ້າງ​ອອກ​ສູ່​ຂົງ​ເຂດ​ປຸງ​ແຕ່ງ ​ແລະ ກັ່ນ​ຕອງ​ຜະລິດ​ເຄມີ​ນ້ຳມັນ​ອີກ​ນຳ.

ສອງ​ຝ່າຍຢືນຢັນ​ຊຸກຍູ້​ຜັນ​ຂະຫຍາຍການກໍ່ສ້າງ​ໂຮງງານ​ໄຟຟ້າ​ນິວ​ເກຼຍ ນິງຖ້ວນ 1 ຄື​ດັ່ງ​ທີ່​ໄດ້​ຕົກລົງ​ກັນ ​ໂດຍ​ປະຕິບັດ​ຕາມ​ທິດ​ນຳ​ຕອບ​ສະໜອງ​ຄວາມ​ຕ້ອງການ​ ຮັບປະກັນ​ຄວາມ​ສະຫງົບ ຄວາມ​ປອດ​ໄພ​ໃນ​ລະດັບ​ສູງ​ສຸດ, ​ໃນ​ນັ້ນ ປະຕິບັດ​ຖືກຕ້ອງ​ຕາມ​ຂໍ້​ກຳນົດ​ກົດໝາຍ​ຂອງຫວຽດນາມ​ກ່ຽວ​ກັບ​ການ​ລົງທຶນ​ກໍ່ສ້າງ.

ສອງ​ຝ່າຍຕີ​ລາຄາ​ສູງ​ການ​ພົວພັນ​ດ້ານ​ການ​ປ້ອງ​ກັນຊາ​ດ - ປ້ອງ​ກັນ​ຄວາມ​ສະຫງົບ​ລະຫວ່າງ​ສອງ​ປະ​ເທດ, ພິ​ເສດ​ແມ່ນ​ໃນ​ຂົງ​ເຂດ​ເຕັກນິກ​ການ​ທະຫານ ​ແລະ ກໍ່ສ້າງ​ທະ​ຫານ, ຢືນຢັນ​ສືບ​ຕໍ່​ຮ່ວມ​ມື​ກັນຢ່າງ​ແໜ້ນ​ແຟ້ນ ມີ​ປະສິດທິ​ຜົນ​ກວ່າ​ອີກ​ໃນ​ຂົງ​ເຂດ​ນີ້.

ສອງ​ຝ່າຍຊົມ​ເຊີຍບັນ​ດາ​ທ້ອງ​ຖິ່ນ​ຂອງ​ສອງ​ປະ​ເທດ​ທີ່​ພວມຮ່ວມ​ມື​ກັນ​ຢ່າງ​ຕັ້ງໜ້າ ​ແລະ ສະ​ເໜີ​ໃຫ້​ບັນດາ​ອົງການ​ທີ່​ກ່ຽວ​ຂອງ​ສອງ​ຝ່າຍ​ ຄວນ​ຜັນ​ຂະຫຍາຍ​ເນື້ອ​ໃນ​ກ່ຽວ​ກັບ​ການສ້າງ​ຕັ້ງ​ວິ​ສາ​ຫະກິດ​ຮ່ວມ​ທຸລະ​ກິດ​ໃນ​ຂົງ​ເຂດ​ປຸງ​ແຕ່ງ​ສິນ​ໃນ​ນ້ຳ ​ແລະ ປຸງ​ແຕ່ງ​ໄມ້​ຢູ່ ປຣີ​ໂມຣີ ຂຶ້ນ​ກັບ​ເຂດ​ຕາ​ເວັນ​ອອກ​ໄກ​ຂອງ​ລັດ​ເຊຍ.

ສອງ​ຝ່າຍກໍ່​ເຫັນ​ດີ​ວ່າ ຕ້ອງ​ສືບ​ຕໍ່ເປີດ​ກວ້າງ​ການ​ພົວພັນທະວິ​ພາຄີ​ໃນ​ບັນດາ​ຂົງ​ເຂດ​ອື່ນ​ອີກເຊັ່ນ ວິທະຍາສາດ-​ເຕັກ​ໂນ​ໂລ​ຢີ ສຶກສາ-ກໍ່ສ້າງ ວັນ​ທະ​ນາ​ທຳ, ​ເພີ່ມ​ທະວີການ​ໂຄສະນາ​ເຜີຍ​ແຜ່​ຄວາມ​ສາມາດ​ບົ່ມ​ຊ້ອນ​ດ້ານ​ການທ່ອງທ່ຽວ​ຂອງ​ກັນ​ແລະ​ກັນ ​ໃນ​ພາຫະນະ​ສື່​ມວນ​ຊົນ​ຂອງ​ສອງ​ປະ​ເທດ..., ປະກອບສ່ວນ​ເຮັດ​ໃຫ້ການ​ພົວພັນ​ຄູ່​ຮ່ວມ​ຍຸດ​ທະ​ສາດ​ຮອບດ້ານຫວຽດນາມ - ລັດ​ເຊຍ ​ເລິກ​ເຊິ່ງຕື່ມ​ອີກ.

ສອງ​ຝ່າຍ​ໄດ້​ແລກປ່ຽນ​ຄວາມ​ຄິດ​ຄວາມ​ເຫັນ ​ແລະ ​ເປັນ​ເອກະ​ພາບ​​ໃຫ້​ທັດສະນະວ່າ ການ​ແກ່ງ​ແຍ້​ງຊ່ວງ​ຊິງ​ກັນ​ຢູ່​ທະ​ເລ​ຕາ​ເວັນ​ອອກ ຕ້ອງ​ໄດ້​ແກ້​ໄຂ​ດ້ວຍ​ສັນຕິ​ວິທີ ບົນ​ພື້ນຖານ​ເຄົາລົບ​ກົດໝາຍ​ສາກົນ, ​ໃນ​ນັ້ນ​ມີ​ອະນຸ​ສັນຍາ​ສະຫະ​ປະຊາ​ຊາດ​ວ່າ​ດ້ວຍ​ກົດໝາຍ​ທະ​ເລ​ປີ 1982 (UNCLOS 1982), ຜັນ​ຂະຫຍາຍຖະ​ແຫຼ​ງການ​ກ່ຽວ​ກັບ​ວິທີ​ປະພຶດ​ຂອງ​ບັນດາ​ຝ່າຍ​ຢູ່​ທະ​ເລ​ຕາ​ເວັນ​ອອກ (DOC) ຢ່າງ​ຄົບ​ຖ້ວນ​ແລະ​ມີ​ປະສິດທິ​ຜົນ ​ແລະ ສ້າງ​ປະ​ມວນຂໍ້​ກຳນົດ​ກ່ຽວ​ກັບ​ວິທີ​ປະພຶດ​ຢູ່​ທະ​ເລ​ຕາ​ເວັນ​ອອກ (COC) ​​ຂຶ້ນໂດຍ​ໄວ.

​ໃນ​ການ​ຢ້ຽມຢາມ, ນາຍົກລັດຖະມົນຕີ​ແຫ່ງ​ສະຫະພັນ​ລັ​ດ​ເຊຍ ທ່ານດີ​ມີ​ຕຣີ ​​ແມັດ​ເວ​ແດັບ ​ໄດ້​ໄປ​ວາງ​ພວງມາລາ​ທີ່​ອະນຸສາວະລີ​ນັກຮົບວິລະ​ຊົນ​ທີ່​ເສຍ​ຊີວິດ; ວາງ​ພວງມາລາ​ແລະ​ໄຫວ້​ອາ​ໄລທີ່​ອະນຸສາວະລີ​ຫໍ​ສົບ​ຂອງ​ທ່ານ​ປະທານ​ໂຮ່ຈີ​ມິນ; ​ເປັນ​ສັກ​ຂິພິຍານ​ທີ່​ພິທີ​ລົງ​ນາມ​ໃນ​ເອກະສານ​ຈຳນວນ​ໜຶ່ງ​ກ່ຽວ​ກັບ​ຂົງ​ເຂດ​ພະລັງງານ ການ​ລົງທຶນ ທະນາຄານ ສາທາລະນະ​ສຸກ ​ແລະ ຄົມມະນາຄົມ​ຂົນ​ສົ່ງ; ​ເປັນ​ສັກຂີ​ພິຍານ​ທີ່​ພິທີ​ລົງ​ນາມ​ໃນ “ບົດ​ບັນທຶກ​ກ່ຽວ​ກັບ​ການ​ເປີດ​ກວ້າງ ​ແລະ ​​ເພີ່ມ​ທະວີ​ຄວາມ​ເລິກ​ເຊິ່ງຂອງການ​ພົວພັນ​ຮ່ວມ​ມື​ຮອບດ້ານ​ລະຫວ່າງ​ພັກ​ກອມ​ມູນິດ​ຫວຽດນາມ ​ແລະ ພັກ “ປະ​ເທດ​ລັດ​ເຊຍ​ເປັນ​ເອກະ​ພາບ” ​ໄລຍະ​ປີ 2015 - 2017”./.

ໂດຍ​ນັກ​ຂ່າວ TTXVN


Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ