ວັນອາທິດ, 31/5/2020
ພິທີເຊັນສັນຍາການຄ້າເສລີ ລະຫວ່າງ ຫວຽດນາມ ແລະ ສະຫະພັນເສດຖະກິດ ອາຊີ-ເອຣົບ ຢ່າງເປັນທາງການ
14/6/2015 18:33' ສົ່ງ ພິມ
ທ່ານນາຍົກລັດຖະມົນຕີ ຫງວຽນເຕິນຢຸງ ແລະ ນາຍົກລັດຖະມົນຕີ 5 ປະເທດສະມາຊິກສະຫະພັນເສດຖະກິດອາຊີ-ເອຣົບ ພ້ອມດ້ວຍການນຳຄະນະປະຈຳສະຫະພັນເສດຖະກິດອາຊີ-ເອຣົບ ໃນພິທີເຊັນສັນຍາການຄ້າເສລີລີ (ພາບ: VGP/Nhật Bắc)

ສັນຍາ​ການ​ຄ້າ​ເສລີ (FTA) ລະຫວ່າງຫວຽດນາມ ​ແລະ ສະຫະພັນ​ເສດຖະກິດ​ອາຊີ-​ເອຣົບ ​ແມ່ນ FTA ຮຸ່ນ​ໃໝ່ ທັນ​ສະ​ໄໝ ​ແລະ ຮອບດ້ານ ທີ່​ມີ​ຄວາມ​ໄຫວ​ພິບ​ອັນ​ຈຳ​ເປັນ​ຫຼາຍ​ປະການ ມີ​ລະດັບ​​ໃຫ້​ຄຳ​ໝັນສັນຍາ​ສູງ ​ແລະ ຮັບປະກັນ​ຄວາມ​ສົມ​ດູນ​ທາງ​ດ້ານ​ຜົນ​ປະ​ໂຫຍ​ດ, ຄຳນຶງ​ເຖິງ​ເງື່ອນ​ໄຂ​ລະອຽດ​ຂອງ​ແຕ່ລະ​ຝ່າຍ; ​ແມ່ນບາດກ້າວ​ບຸກທະລຸທີ່ມີ​ຄວາມ​ໝາຍຍຸດ​ທະ​ສາດ ​ໃນ​ການ​ເປີດ​ໄລຍະ​​ໃໝ່​ແຫ່ງ​ການ​ພົວພັນ​ຮ່ວມ​ມື​ລະ​ຫວ່າງ​ຫວຽດນາມ​ ແລະ ສະຫະພັນ​ເສດຖະກິດ​ອາຊີ-​ເອຣົບ ເວົ້າ​ລວມ ​ແລະ ກັບ​ແຕ່ລະ​ປະ​ເທດ​ສະມາຊິກ ​ເວົ້າ​ໂດຍ​ສະ​ເພາະ.

ພ້ອມ​ກັນ​ກັບ​ບັນດາ FTA ອື່ນ, ສັນຍາ​ສະບັບ​ນີ້ຈະ​ຊ່ວຍ​ໜູນ​ໃຫ້​ແກ່​ການ​ເປີດ​ກວ້າງ​ຕະຫຼາດສົ່ງ​ນອກ​ສິນຄ້າ ການ​ບໍລິການ ​ແລະ ການ​ລົງທຶນ​ຂອງ​ຫວຽດນາມ ​ໄປ​ທີ່ສະຫະພັນ​ເສດຖະກິດ​ອາຊີ-​ເອຣົບ, ສ້າງ​ປະຖົມ​ປັດ​ໄຈ​ອັນ​ສຳຄັນ ​ເພື່ອ​ໃຫ້​ຫວຽດນາມຍູ້​ແຮງ​ການ​ພົວພັນ​ການ​ຄ້າ ​ແລະ ການ​ລົງທຶນ ​ເຂົ້າ​ໃນ​ບັນດາ​ປະ​ເທດ​ທີ່​ຂຶ້ນ​ກັບ​ປະຊາ​ຄົມ​ບັນດາ​ປະຊາ​ຊາດ​ເອກະລາດ (SNG) ຊຶ່ງ​ຫຼາຍ​ປະ​ເທດ​ໃນຈຳນວນ​ນັ້ນພວມ​ສືບ​ຕໍ່​ສະ​ແດງ​ຄວາມ​ປະສົງ​ຢາກ​​ເປັນ​ສະມາຊິກ​ຂອງສະຫະພັນ​ເສດຖະກິດ​ອາຊີ-​ເອຣົບ.

ສັນຍາ​ສະບັບ​ນີ້​ປະກອບ​ດ້ວຍ​ບັນດາ​ໝວດ​ກ່ຽວ​ກັບ​ບັນດາ​ຂົງ​ເຂ​ດ: ການ​ຄ້າ​ສິນຄ້າ, ຫຼັກການ​ຖິ່ນ​ກຳ​ເນີ​ດ, ການ​ຄ້າ​ບໍລິການ, ການ​ລົງທຶນ, ກຳ​ທະ​ສິດ​ພູມ​ປັນຍາ, ບັນດາ​ມາດ​ຕະການ​ຮັກ​ສາ​ອານາ​ໄມ​ຄວາມ​ປອດ​ໄພ​ດ້ານ​ສະບຽງ​ອາຫານ ​ແລະ ການ​ກັກ​ກັນ​ໂລກ​ຕິດ​ຕໍ່​ໃນ​ສັດ​ພືດ (SPS), ​ເປີດ​ຄວາມ​ສາດ​ວກດ້ານ​ສຸລະກາກອນ, ການ​ປ້ອງ​ກັນ​ຮັກສາ​ການ​ຄ້າ, ຮົ້ວ​ເຕັກນິກ​ໃນ​ການ​ຄ້າ (TBT), ​ເຕັກ​ໂນ​ໂລ​ຊີ​ເອ​ເລັກ​ໂຕຣນິກ, ການ​ແຂ່ງ​ຂັນ, ນິຕິ​ທຳ ​ແລະ ລະບຽບ​ກົດໝາຍ…

ກ່ຽວກັບ​ສິນຄ້າ, ສະຫະພັນເສດຖະກິດ​ອາຊີ-​ເອຣົບ ​ໄດ້​ໃຫ້​ຄວາ​ມສະດວກ​ດີ​ແກ່ຫວຽດນາມ, ສ້າງ​ໂອກາດ​ສົ່ງ​ນອກ​ທີ່​ສຳຄັນ​ຫຼາຍ​ຢ່າງສຳລັບ​ບັນດາ​ປະ​ເພດ​ສິນຄ້າ​ທີ່​ຫວຽດນາມ​ມີ​ທ່າ​ແຮງ, ​ເຊັ່ນ​ຜະລິດ​ຕະພັນ​ກະສິກຳ ​ແລະ ສິນຄ້າ​ອຸດສາຫະກຳ (ສິ່ງ​ທໍ ​ເຄື່ອງ​ຕັດຫຍິບ, ​​ເກີບເຄື່ອງ​ໜັງ, ​ເຄື່ອງ​ໄມ້) ​ແລະ​ຜະລິດ​ຕະພັນ​ປຸງ​ແຕ່ງ​ຈຳນວນ​ໜຶ່ງ.

​ເນື້ອ​ໃນ​ອັນ​ສຳຄັນ​ໜຶ່ງ​ຂອງ​ສັນຍາ​ສະບັບ​ນີ້​ແມ່ນ ຝ່າຍສະຫະພັນ​ເສດຖະກິດ​ອາຊີ-​ເອຣົບ ຈະໝູນ​ໃຊ້​ລະດັບ​ອັດຕາ​ພາສີ 0% ສຳລັບ​ສິນຄ້າ​ຜະລິດ​ຕະພັນ​ປະມົງທຸກ​ປະ​ເພດ​ຂອງ​ຫວຽດນາມ ​ໃນ​ທັນທີ​ທັນ​ໃດ​ນັບ​ແຕ່​ເມື່ອ​ສັນຍາ​ມີ​ຄວາມ​ສັກສິດ. ພ້ອມ​ກັນ​ກັບ​ການ​ຍົກ​ເລີກ​ພາສີ​ຜ່ານ​ດ່ານ, ສອງ​ຜ່າ​ຍຈະ​ຜັນ​ຂະຫຍາຍ​ໂຄງການ​ກ່ຽວ​ກັບການ​ກັກ​ກັນ​ໂລກ​ຕິດ​ຕໍ່​ໃນ​ສັດ​ພືດ, ​ໃນ​ນັ້ນ​ມີ​ບັນດາ​ເນື້ອ​ໃນກ່ຽວ​ກັບຮັບຮູ້​ຄວາມ​ເທົ່າ​ທຽມ ຕໍ່​ກັບ​ບັນດາ​ມາດ​ຕະການ ຫຼື ລະບົບ​ການ​ຄຸ້ມ​ຄອງ ​ໃນ​ຂົງ​ເຂດ​ທີ່​ກ່ຽວຂ້ອງ; ຮັບ​ຮູ້​ຊຶ່ງ​ກັນ​ກ່ຽວ​ກັບ​ຄວາມ​ສຳນຶກ​ຕ່າງໆ ກ່ຽວ​ກັບ​ຄວາມ​ເໝາະ​ສົມ​ກັບ​ເງື່ອນ​ໄຂ​ຂອງ​ພາກ​ພື້ນ, ນຳ​ໃຊ້​ໝາກຜົນ​ຂອງ​ການກວດ​ສອບ​ບັນຊີ, ຂໍ້​ມູນ​ຂ່າວສານ​ຂອງບັນດາ​ອົງການ​ສາກົນ​; ຊຸກຍູ້​ການ​ຮ່ວມ​ມື, ຜັນ​ຂະຫຍາຍ​ຄວາມ​ຄິດ​ລິ​ເລິ່ມຕ່າງ​ໆ​ ກ່ຽວ​ກັບ​ການ​ເປີດ​ຄວາມ​ສະດວກ​ດ້ານ​ການ​ຄ້າ, ຊ່ວຍ​ເຫຼືອ​ດ້ານ​ເຕັກນິກ ​ແລະ ສ້າງ​ຕັ້ງ​ກົນ​ໄກປຶກສາ​ແລກປ່ຽນ​ທີ່​ມີ​ປະສິດທິ​ຜົນ​ລະຫວ່າງ​ສອງ​ຝ່າຍ.

ຫວຽດນາມ​ເຫັ​ນດີຈະ​ເປີດ​ປະຕູ​ຕະຫຼາດ​ຕາມ​ລຳດັບ​ໃຫ້​ແກ່​ຜະລິດ​ຕະພັນ​ການ​ລ້ຽງສັດ​ຈຳນວນ​ໜຶ່ງ ​ແລະ ສິນຄ້າ​ອຸດສາຫະກຳ​ບາງ​ປະ​ເພດ ກວມ​ດ້ວຍ​ເຄື່ອງ​ຈັກ ​ເຄື່ອງ​ປະກອບ ພາຫະນະ​ຂົນ​ສົ່ງ... ຂອງສະຫະພັນ​ເສດຖະກິດ​ອາຊີ-​ເອຣົບ. ບັນດາ​ປະ​ເພດ​ສິນຄ້າ​ນີ້​ເບິ່ງ​ລວ​ມ​ແລ້ວລ້ວນ​ແຕ່​ບໍ່​ແກ່ງ​ແຍ້​ງກັບ​ສິນຄ້າ​ຂອງ​ຫວຽດນາມ, ກົງຂ້າມ ມັນ​ຈະ​ປະກອບສ່ວນ​ເຮັດ​ໃຫ້​ຕະຫຼາດ​ພາຍ​ໃນ​ປະ​ເທດມີ​ຄວາມ​ຫຼາກ​ຫຼາຍ​ຕື່ມ​ອີກ​​.

ສຳລັບ​ບັນດາ​ປະ​ເພດ​ສິນຄ້າ​ຜະລິດ​ຕະພັນ​ກະສິກນັ້ນ ​ເຖິງ​ວ່າ​ຈະ​ຖືກ​ຝ່າຍສະຫະພັນ​ເສດຖະກິດ​ອາຊີ-​ເອຣົບ ຖື​ວ່າ​ເປັນ​ການ​ບຸລິມະສິດ ​ແລະ ຫວຽດນາມ​ກໍ່​ເຫັນ​ດີ​ຈະ​ເປີດ​ປະຕູ​ໃນ​ທັນທີ​ທັນ​ໃດ​ກໍ່ຕາມ (​ເຊັ່ນ​ນ້ຳນົມ ​ແລະ ບັນດາ​ຜະລິດ​ຕະພັນ​ຈາກ​ນ້ຳນົມ, ຜະລິດ​ຕະພັນ​ທັນ​ຍະ​ພືດ​ຈຳນວນ​ໜຶ່ງ...), ​ແຕ່​ໃນ​ສະພາບ​ການ​ປັດຈຸບັນ, ຍ້ອນການ​ຜະລິດ​ກະສິກຳ​ຂອງ​ຝ່າຍ​ເພື່ອນ​ຕົ້ນ​ຕໍ່​ແມ່ນ​ເພື່ອ​ຮັບ​ໃຊ້​ໃຫ້​ແກ່​ຄວາມ​ຕ້ອງການ​ພາຍ​ໃນ ​ແລະ ຍັງ​ບໍ່​ທັນ​ລວມສູນ​ໃຫ້​ແກ່​ການ​ສົ່ງ​ນອກ ດັ່ງ​ນັ້ນ​ຈຶ່ງຄາດ​ຄະ​ເນ​ວ່າ ​ໃນ​ເວລາ 5 ປີ​ຕົ້ນ​ແຫ່ງ​ການ​ປະຕິບັດ​ສັນຍາ ຂະ​ແໜງ​ການ​ກະສິກຳ​ຫວຽດນາມ​ຈະ​ບໍ່​ຖືກ​ຜົນ​ກະທົບ​ຢ່າງ​ຈະ​ແຈ້ງ​ຍ້ອນ​ການ​ນຳ​ເຂົ້າ​ສິນຄ້າ​ກະສິກຳ​ຈາກສະຫະພັນ​ເສດຖະກິດ​ອາຊີ-​ເອຣົບ.

​ໂດຍ​ທົ່ວ​ໄປ, ສອງ​ຝ່າຍ​ຄາດກະ​ຈະ​ອຳນວຍ​ໃຫ້​ແກ່​ກັນ ​ລະ​ດັບ​ເປີດ​ປະຕູ​ຕະຫຼາດ​ສິນຄ້າທີ່ກວມ​ປະມານ 90% ຂອງຈຳນວນ​ປະ​ເພດ​ພາສີທັງ​ໝົດ, ທຽບ​ເທົ່າ​ປະມານ​ກວ່າ 90% ຂອງມູນ​ຄ່າ​ການ​ຄ້າລະຫວ່າງ​ສອງ​ຝ່າ​ຍ.

ຕາມ​ການ​ປະ​ເມີນ​ຄ່າ​ເບື້ອງ​ຕົ້ນ​ຂອງສະຫະພັນ​ເສດຖະກິດ​ອາຊີ-​ເອຣົບ, ພາຍ​ຫຼັງ​ທີ່​ສັນຍາ​ມີ​ຄວາມ​ສັກສິດ, ມູນ​ຄ່າສິນ​ຄ້າ​ສົ່ງ​ນອກ​ນຳ​ເຂົ້າຂອງ​ສອງ​ຝ່າຍ​ຈະ​ບັນລຸ 10-12 ຕື້​ໂດ​ລາ​ສະຫະລັດ​ໃນ​ປີ 2020 (ປີ 2014 ບັນລຸ​ປະມານ 4 ຕື້​ໂດ​ລາ​ສະຫະລັດ). ຕາມ​ການ​​ຄິດ​ໄລ່​ຂອງ​ຫວຽດນາມ, ມູນ​ຄ່າ​ສິນຄ້າ​ສົ່ງ​ນອກ​ຂອງ​ຫວຽດນນາມ​ໄປ​ທີ່ສະຫະພັນ​ເສດຖະກິດ​ອາຊີ-​ເອຣົບ ຈະ​ເພີ່ມ​ຂຶ້ນ​ປະມານ 18-20% ຕໍ່​ປີ.

ບັນດາ​ເນື້ອ​ໃນ​ກ່ຽວ​ກັບ​​ກຳ​ມະ​ສິດ​ພູມ​ປັນຍາ, ​ການ​ແຂ່ງຂັນ, ການ​ພັດທະນາ​ແບບ​ຍືນ​ຍົງ... ຂອງ​ສັນຍານັ້ນ ຕົ້ນ​ຕໍ່​ມີ​ລັກສະນະ​ຮ່ວມ​ມື ​ແລະ ບໍ່​ກ້າວ​ກ່າຍ​ບັນດາ​ຄຳ​ໝັ້ນ​ສັນຍາ​ຂອງ​ຫວຽດນາມຕໍ່​ສັນຍາ​ກັບ​ອົງການ​ການ​ຄ້າ​ໂລກ ​ແລະ ບັນດາ​ສັນຍາ​ການ​ຄ້າ​ເສລີ ທີ່​ໄດ້​ເຊັນ​ກັນ​ແລ້ວ ຫຼື​ກຳລັງ​ເຈລະຈາ, ສ້າງ​​ໂຄງ​ຮ່າງ​ເພື່ອ​ໃຫ້​ສອງ​ຝ່າຍ​ອາດ​ຈະ​ພິຈາລະນາຮ່ວມ​ມື​ເລິກ​ເຊິ່ງກວ່າ​ເມື່ອເຫັນວ່າ​ເໝາະ​ສົມ.

ອາດ​ຈະ​ເວົ້າ​ໄດ້​ວ່າ, ສະຫະພັນ​ເສດຖະກິດ​ອາຊີ-​ເອຣົບ ມີ​ປະຊາກອນ 175 ກວ່າ​ລ້ານ​ຄົນ ດ້ວຍ​ຍອດ ຈີ​ດີ​ພີ​ປະມານ 2.500 ຕື້​ໂດ​ລາ​ສະຫະລັດ, ​ເຖິງ​ວ່າ​ເປັນ​ອົງການ​ເສດຖະກິດລະຫວ່າງ​ຊາດ​ທີ່​ຫາ​ກໍ່​ໄດ້​ສ້າງ​ຕັ້ງ​ຂຶ້ນ​ກໍ່ຕາມ ​ແຕ່​ກໍ່​ມີ​ບົດບາດ​ສຳຄັນ​ທີ່​ສຸດ​ຕໍ່​ກັບ​ການ​ພັດທະນາ​ຂອງ​ບາ​ງປະ​ເທດ​ທີ່​ຂຶ້ນ​ກັບ​ສະຫະພາບ​ໂຊ​ວຽດ (​ແຕ່​ກ່ອນ) ທີ່​ຫັນ​ໄປ​ສູ່​ເທສະ​ເສດຖະກິດ​ທີ່​ເປັນ​ເອກະ​ພາບ.

ການ​ເຊັນ​ສັນຍາ​ສະບັບ​ນີ້​ສືບ​ຕໍ່​ຢັ້ງຢືນ​ບົດບາດ​ເປັນ​ເຈົ້າ​ການ ຕັ້ງໜ້າ​ຂອງ​ຫວຽດນາມ​​ໃນ​ການ​ພົວພັນ​ຮ່ວມ​ມື​ຮອບດ້ານ​ກັບ​ບັນດາ​ປະ​ເທດ​ສະມາຊິກ​ສະຫະພັນ​ເສດຖະກິດ​ອາຊີ-​ເອຣົບ. ຈຸດໝາຍ​ຕົ້ນ​ຕໍ່​ຂອງ​ຫວຽດນາມ​ໃນ​ການ​ເຈລະຈາ ​ເຊັນ​ສັນຍາ​ແມ່ນ​ເພື່ອ​ແນ​ໃສ່​ສ້າງ​ໂອກາດ​ຊຸກຍູ້​ການ​ຄ້າ ການ​ບໍລິການ ການ​ລົງທຶນ, ​ເປີດ​ກວ້າງ​ຕະຫຼາດ​ການ​ຄ້າ​ສົ່ງ​ອອກ​ນຳ​ເຂົ້າ​ໃຫ້​ມີ​ຫຼາຍ​ຮູບ​ຫຼາຍ​ແບບ, ຫຼີກ​ລ່ຽງບໍ່​​ໃຫ້​ຂຶ້ນ​ກັບຕະຫຼາດ​ໃດ​ໜຶ່ງ.

ຢູ່​ທີ່​ປະ​ເທດກາ​ຊັກ​ສະຖານ, ທ່ານ​ນາຍົກລັດຖະມົນຕີ ຫງວຽນ​ເຕິ​ນຢຸງ ​ໄດ້ພົບ​ປະ​ຫາລື​ກັບ​ປະທານາທິບໍດີກາ​ຊັກ​ສະຖານ ທ່ານ​ນູຊູນ​ຕານ ນາ​ຊາ​ບາ​ແອັບ; ພົບ​ປະ​ກັບ​ນາຍົກລັດຖະມົນຕີເບ​ລາຣຸດຊີ ທ່ານອານ​ເດຼ ​ໂກ​ບີ​ອາ​ກົບ; ນາຍົກລັດຖະມົນຕີອາກ​ເມ​ນີ ທ່ານ​ໂຮ​ວິກ ອາບຣາຮາມ​ຢານ; ນາຍົກລັດຖະມົນຕີລັດ​ເຊຍ ທ່ານດີ​ທີ​ຕຣີ ​ແມັດ​ເວ​ແດັບ; ນາຍົກລັດຖະມົນຕີກາ​ຊັກ​ສະຖານ ທ່ານ​ກາຣິມ ມາ​ຊີ​ມົບ; ນາຍົກລັດຖະມົນຕີກຽກກິດ​ສະຖານ ທ່ານ​ແທມີ ຊາຣີ​ແອັບ. ທ່ານ​ນາຍົກລັດຖະມົນຕີ ຫງວຽນ​ເຕິ​ນຢຸງ ກໍ່​ໄດ້​ມີ​ການ​ພົບ​ປະ​ລວມກັບ​ນາຍົກລັດຖະມົນຕີບັນດາປະ​ເທດ​ສະມາຊິກສະຫະພັນ​ເສດຖະກິດ​ອາຊີ-​ເອຣົບ; ຕ້ອນຮັບ​ທ່ານ ວິກຕໍ ບີ ຄຣິສະ​ແຕນ​ໂກ ປະທານ​ຄະນະ​ປະຈຳການສະຫະພັນ​ເສດຖະກິດ​ອາຊີ-​ເອຣົບ

ບັນດາ​ທ່ານ​ຜູ້ນຳ​ໄດ້​ພ້ອມ​ກັນ​ແລກປ່ຽນ​ກ່ຽວ​ກັບ​ແຜນການ​ໃຫ້​ສັດຕະຍາບັນຕໍ່​ສັນຍາ​ຂອງ​ແຕ່ລະ​ຝ່າຍ ​ແລະ ທິດ​ທາງ​ຜັນ​ຂະຫຍາຍ​ສັນຍາ​ເມື່ອມັນ​ມີ​ຄວາມ​ສັກສິດ; ​ເຫັນ​ດີ​ເປັນ​ເອກະສັນ​ກັນຈະ​ຮ່ວມ​ມື​ຜັນ​ຂະຫຍາຍ​ປະຕິບັດ​ສັນຍາ​ໃຫ້​ໄດ້​ຢ່າງ​ມີ​ຜະ​ສິດທິ​ຜົນຕົວ​ຈິງ ບົນ​ຈິດ​ໃຈ​ມິດຕະພາບ, ປະກອບສ່ວນ​ເຂົ້າ​ໃນ​ການ​ພັດທະນາ​ເສດຖະກິດ-ສັງຄົມ​ຂອງ​ຫວຽດນາມ ​ແລະ ບັນດາ​ປະ​ເທດ​ສະມາຊິກສະຫະພັນ​ເສດຖະກິດ​ອາຊີ-​ເອຣົບ./.

ສັງ​ລວມ​ໂດຍ: NĐ
​ແຫຼ່ງຂ່າວ​ຂອງ: TTXVN

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ