ວັນອາທິດ, 31/5/2020
ທ່ານຫງວຽນຝູຈ້ອງ ເລຂາທິການໃຫຍ່ ພັກກອມມູນິດຫວຽດນາມ ໄປຢ້ຽມຢາມ ປະເທດສະຫະລັດອາເມຣິກາ ຢ່າງເປັນທາງການ
23/7/2015 14:56' ສົ່ງ ພິມ
ທ່ານເລຂາທິການໃຫຍ່ ຫງວຽນຝູຈ້ອງ ແລະ ທ່ານປະທານາທິບໍດີ ບາຣັກ ໂອບາມາ (ພາບ: ຕຣີຢຸງ/TTXVN)

ເຂົ້າ​ຮ່ວມ​ຄະນະ​ຜູ້​ແທນ​ຍັງ​ມີ​ບັນດາສະຫາຍ: ຕ່ອງ​ທີ້ຝອງ, ກຳມະການ​ກົມ​ການ​ເມືອງສູນ​ກາງ ຮອງ​ປະທານ​ສະພາ​ແຫ່ງ​ຊາດ; ​ເລ​ແທງ​ຫາຍ, ກຳມະການ​ກົມ​ການ​ເມືອງສູນ​ກາງ ​ເລຂາ​ຄະນະ​ພັກ​ນະຄອນ ​ໂຮ່ຈີ​ມິນ; ​ການ​ນຳ​ຂອງ​ບັນດາ​ຄະນະ ກະຊວງ ຂະ​ແໜງ​ການ ​ອົງການ​ສູນ​ກາງ. ການ​ຢ້ຽມຢາມ​ໄດ້​ດຳ​ເນີນ​ໃນລະຫວ່າງ​ໂອກາດ​ສະ​ເຫຼີ​ມສະຫຼອງວັນ​ສ້າງຕັ້ງສາຍ​ພົວພັນ​ເປັນ​ປົກກະຕິ​ລະຫວ່າງ​ສອງ​ປະ​ເທດ​ຄົບຮອບ 20 ປີ; ​ເປັນ​ໂອກາດ​ເພື່ອ​ໃຫ້​ສອງ​ຝ່າຍ​ຕີ​ລາຄາ​ການ​ພົວພັນ​ຫວຽດນາມ - ສະຫະລັດ​ອາ​ເມຣິກາ ​ໃນ 20 ປີ​ທີ່​ຜ່ານ​ມາ, ກຳນົດ​ວິ​ໄສ​ທັດ ທິດ​ທາງ​ພັດທະນາ​ການ​ພົວພັນ​ລະຫວ່າງ​ສອງ​ປະ​ເທດ​ໃນ​ເວລາ​ທີ່​ຈະ​ມາ​ເຖິງ. ​ເພາະສະ​ນັ້ນ, ກາ​ນຢ້ຽ​ມຢາມ​ໄດ້​ດຶງ​ດູດ​ເອົາ​ຄວາມ​ເອົາ​ໃຈ​ໃສ່​ເປັນ​ພິ​ເສດ​ຂອງ​ວົງ​ການ​ສື່​ມວນ​ຊົນ ພ້ອມ​ດ້ວຍ​ຫາງ​ສຽງ​ພາຍ​ໃນ ​ແລະ ຕ່າງປະ​ເທດ.

​ໃນ​ເວລາ​ຂອງ​ການ​ຢ້ຽມຢາມ, ຢູ່​ທີ່​ນະ​ຄອນ​ຫຼວງ ວໍ​ຊິງ​ເຕິ​ນ ດີ​ຊີ, ທ່ານ​ເລຂາທິການ​ໃຫຍ່ ຫງວຽນ​ຝູຈ້ອງ ​ໄດ້​ພົບ​ປະ​ຫາລື​ກັບທ່ານ​ປະທານາທິບໍດີ ບາຣັກ ​ໂອ​ບາ​ມາ; ຕ້ອນຮັບຜູ້ຕາງໜ້າ​ອົງການ​ການ​ຄ້າ ທ່ານ​ມາຍ​ເກີນ ຟຣໍ​ແມນ; ຕ້ອນ​ຮັບ​ບັນດານ​ການ​ນຳ​ຂອງ​​ສາສະໜາ​ຕ່າງໆ​ຢູ່ສະຫະລັດ​ອາ​ເມຣິກາ, ພົບ​ປະ​ກັບ​ບັນດາ​ຜູ້ຕາງໜ້າຂອງ​ຊັ້ນ​ຄົນ​ສັງຄົມ​ຫວຽດນາມ-ສະຫະລັດອາ​ເມຣິກາ ​ແລະ ບັນດາ​ສະມາຊິກ​ສະພາ​ແຫ່ງ​ຊາດ​ອາ​ເມຣິກາ. ຢູ່​ທີ່​ນະຄອນ ນິວຢອກ, ທ່ານ​ເລຂາທິການ​ໃຫຍ່ ຫງວຽນ​ຝູຈ້ອງ ​ໄດ້​ພົບ​ປະ​ຫາລືກັບ​ເລຂາທິການ​ແຫ່ງ​ສະຫະ​ປະຊາ​ຊາດ ທ່ານ​ພັນ ກີ​ມຸນ; ​ໄປ​ຢາມ​ຄອບຄົວ​ຂອງອະດີດ​ປະທານາທິບໍດີ ບິນ ຄຼີນ​ຕັນ ທີ່​ກິດ​ເຕິ​ນ ​ເຮົາ​ເຊີ; ຕ້ອນຮັບ​ຜູ້ຕາງໜ້າ​ການ​ນຳ​ຂອງ​ພັກ​ກອມ​ມູນິດ​ອາ​ເມຣິກາ ​ແລະ ພົບ​ປະ​ກັບ​ເພີ່ອມສະຫາຍ​ຝ່າຍ​ຊ້າຍ​ອາ​ເມຣິກາ; ​ໂອ້​ລົມ​ຢ່າງ​ສະໜິດສະໜົມ​ກັບ​ພີ່ນ້ອງຮ່ວມ​ຊາດ​ຊາວ​ຫວຽດນາມ ​ແລະ ນັກຮຽນນັກສຶກສາ​ຫວຽດນາມ ຢູ່​ອາ​ເມຣິກາ; ພົບ​ປະ ​ແລກປ່ຽນ​ຄວາມ​ຄິດ​ຄວາມ​ເຫັນ​ກັບວົງ​ການ​ປັນຍາ​ຊົນ​ຂອງ​ມະຫາວິທະຍາ​ໄລ ຮາວາດ...

ວັນ​ທີ່ 7 ກໍລະກົດ, ຢູ່​ທີ່​ຫ້ອງ​ເຮັດ​ວຽກ​ຮູບ​ໄຂ່​ໃນ​ທຳນຽບຊາວ, ທ່ານ​ເລຂາທິການ​ໃຫຍ່ ຫງວຽນ​ຝູຈ້ອງ ​ແລະ ທ່ານ​ປະທານາທິບໍດີ ບາຣັກ ​ໂອ​ບາ​ມາ ​ໄດ້​ດຳ​ເນີນ​ການ​ພົບ​ປະ​ຫາລື​ກັນ. ​ເຂົ້າ​ຮ່ວມ​ການ​ພົບ​ປະ​ຫາລື ທາງ​ຝ່າຍ​ອາ​ເມຣິກາ ຍັງ​ມີ​ທ່ານ​ໂຈ ​ໄບ​ເດີນ ຮອງ​ປະທານາທິບໍດີ​, ທ່ານ​ນາງ ຊູ​ຊານ ຣາຍ ຜູ້​ປຶກສາ​ຄວາມ​ໝັ້ນຄົງ​ແຫ່ງ​ຊາດ, ທ່ານ​ແຈັກ ລີ ລັດຖະມົນຕີວ່າ​ນການກະຊວງ​ການ​ເງິນ ​ແລະ ທ່ານມາຍ​ເກີນ ຟຣໍ​ແມນ ຜູ້ຕາງໜ້າ​ການ​ຄ້າ​ອາ​ເມຣິກາ. ​ໃນ​ການ​ພົບ​ປະ​ຫາລື, ການ​ນຳ​ສູງ​ສຸດ​ຂອງ​ສອງ​ປະ​ເທດ​ທີ່​ເຄີຍ​ປະ​ເຊີນ​ໜ້າ​ກັນ​ໃນ​ອະດີດ ​ແລະ ປັດຈຸ​ບັນ​ມີ​ລະບອບ​ການ​ເມືອງ​ແຕກ​ຕ່າງ​ກັນ​ນັ້ນ ໄດ້​ແລກປ່ຽນ​ຄວາມ​ຄິດ​ຄວາມ​ເຫັນຢ່າງ​ກົງ​ໄປ​ກົງມາ ​ເປີດ​ໂປ່​ງ ດ້ວຍ​ຈິດ​ໃຈ​ຕັ້ງໜ້າ ​ແລະ ກໍ່ສ້າງ ກ່ຽວ​ກັບ​ຫຼາຍ​ບັນຫາ​ສຳຄັນ​ໃນ​ການ​ພົວພັນ​ລະຫວ່າງ​ສອງ​ປະ​ເທດ, ນັບ​ທັງ​ບັນດາ​ບັນຫາ​ທີ່​ສອງ​ຝ່າຍ​ຍັງມີ​ຄວາມ​ເຫັນ​ແຕກ​ຕ່າງ​ກັນ, ບັນດາ​ບັນຫາ​ສາກົນ​ແລະ​ພາກ​ພື້ນ ທີ່​ທັງ​ສອງ​ຝ່າຍ​ມີ​ຄວາມ​ສົນ​ໃຈຮ່ວມ ຊຶ່ງ​ສະ​ແດງ​ເຖິງ​ຄວາມ​ແບ່ງປັນ ​ແລະ ຊ່ວຍ​ເພີ່ມ​ທະວີ​ຄວາມ​ເຂົ້າ​ໃຈ​ເຊິ່ງກັບ​ແລະ​ກັນ. ​ເນື້ອ​ໃນ​ຕ່າງໆ​ທີ່​ສອງ​ຝ່າຍແລກ​ປ່ຽນ​ກັນ​ນັ້ນ ​ແມ່ນ​ແທດ​ຈິງ​ທີ່​ສຸດ​ທາງ​ດ້ານ​ວິ​ໄສ​ທັດ​ການ​ພົວພັນ​ຫວຽດນາມ-ສະຫະລັດ​ອາ​ເມຣິກາ​ໃນ​ອະນາຄົດ. ພາຍຫຼັງ​ການ​ພົບ​ປະ​ຫາລື, ການ​ນຳ​ທັງ​ສອງ​ໄດ້​ຈັດການ​ປະຊຸມ​ສື່​ຂ່າວ​ຢ່າງ​ກະທັດ​ລັດ ແລະ ​ເລິກ​ເຊິ່ງ ​ຊິຶ່ງ​ໄດ້​ສ້າງ​ຄວາມ​ປະ​ທັບ​ໃຈຢ່າງ​ແຮງ​ຕໍ່​ສື່​ມວຍ​ຊົນ.

ໃນ​ເວລາ​ຂອງ​ການ​ຢ້ຽມຢາມ, ທ່ານ​ເລຂາທິການ​ໃຫຍ່ ຫງວຽນ​ຝູຈ້ອງ ​ໄດ້​ມີ​ບົດ​ປາຖະກະຖາ​ທີ່​ສຳຄັນ ​ແລະ ​ແລກປ່ຽນ​ກ່ຽວ​ກັບ​ການ​ພົວພັນ​ລະຫວ່າງຫວຽດນາມ - ສະຫະລັດ​ອາ​ເມຣິກາ ​ໃນ​ໄລຍະ​ແຫ່ງ​ການ​ພັດທະນາ​ໃໝ່, ຢູ່​ທີ່ສູນ​ຄົ້ນຄວ້າ​ຍຸດ​ທະ​ສາດ ​ແລະ ສາກົນ (CSIS); ຮ່ວມ​ການ​ສຳ​ມະ​ນາ​ກັບ​ຜູ້​ແທນ​ຂອງບັນດາ​ວິ​ສາ​ຫະກິດ​ນຳ​ໜ້າ​ຂອງ​ອາ​ເມຣິກາ; ​ເປັນ​ສັກຂີ​ພະຍານ​​ພິທີ​ລົງ​ນາມ​ໃນ​ເອກະສານ​ການ​ຮ່ວມ​ມື​ຫຼາຍ​ສະບັບ​ລະຫວ່າງ​ຫວຽດນາມ ​ແລະ ​ສະຫະລັດ​ອາ​ເມຣິກາ, ລະຫວ່າງ​ຫວຽດນາມ ​ແລະ ​ທະນາ​ຄານ​ໂລກ.

​ໃນ​ການ​ຢ້ຽມຢາມ​ຄັ້ງນີ້, ສອງ​ຝ່າຍ​ໄດ້​ຮັບຮອງ​ຜ່ານ​ຖະ​ແຫຼ​ງການ​ກ່ຽວ​ກັບ​ວິ​ໄສ​ທັດ​ລວມຂອງ​ການ​ພົວພັນ​ລະຫວ່າງ​ຫວຽດນາມ - ສະຫະລັດ​ອາ​ເມຣິກາ.

ສອງ​ຝ່າຍ​ຮັບ​ຮູ້​ບັນດາ​ບາດກ້າວ​ພັດທະນາ​ອັນ​ຕັ້ງໜ້າ ​ແລະ ຕົວ​ຈິງ​ໃນ​ຫຼາຍ​ຂົງ​ເຂດການ​ຮ່ວມ​ມື ​ໃນ 20 ປີ​ທີ່​ຜ່ານ​ມາ ນັບ​ແຕ່​ເມື່ອ​ສອງ​ປະ​ເທດ​ສ້າງ​ຕັ້ງ​ການ​ພົວພັນ​ທາງ​ການ​ທູດ​ເປັນ​ຕົ້ນ​ມາ, ​ເປັນ​ພິ​ເສດ​ແມ່ນ​ການ​ພັດທະນາ​ການ​ຮ່ວມ​ມື​ທາງ​ດ້ານ​ເສດຖະກິດ ການ​ຄ້າ, ​ແກ້​ໄຂ​ຜົນ​ຮ້າຍຕາມ​ມາ​ຂອງ​ສົງຄາມ ​ກໍ່​ຄື​ການ​ຮ່ວມ​ມື​ດ້ານ​ວິທະຍາສາດ-​ເຕັກ​ໂນ​ໂລ​ຊີ, ການ​ສຶກສາ, ສາທາລະນະ​ສຸກ, ສິ່ງ​ແວດ​ລ້ອມ, ຮັບ​ມື​ກັບ​ການ​ປ່ຽນ​ແປງ​ດິນ​ຟ້າ​ອາກາດ, ການ​ປ້ອງ​ກັນຊາ​ດ ປ້ອງ​ກັນ​ຄວາມ​ສະຫງົບ, ສິດທິ​ມະນຸດ ​ແລະ ​ເພີ່ມ​ທະວີ​ການ​ຮ່ວມ​ມື​ໃນ​ເວທີພາກ​ພື້ນ​ແລະ​ສາກົນ​ກ່ຽວ​ກັບ​ບັນດາ​ບັນຫາ​ທີ່​ສອງ​ຝ່າຍມີ​ຄວາມ​ສົນ​ໃຈ.

ສອງ​ຝ່າຍ​ຢືນຢັນ​ສືບ​ຕໍ່​ຜັນ​ຂະຫຍາ​ຍການ​ພົວພັນ​ຢ່າງ​ເລິກ​ເຊິ່ງ ຍືນ​ຍົງ ​ແລະ ມີ​ເນື້ອ​ແທ້, ບົນ​ພື້ນຖານ​ເຄົາລົບ​ນັບຖື​ກົດ​ບັດ​ສະຫະ​ປະຊາ​ຊາດ, ກົດໝາຍ​ສາກົນ ​ແລະ ລະບອບ​ການ​ເມືອງ, ​ເຄົາ​ລົບ​ນັບຖື​ເອກະລາດ ອະທິປະ​ໄຕ ​ແລະ ຜືນ​ແຜ່ນດິນ​ອັນ​ຄົບ​ຖ້ວນ​ຂອງ​ກັນແລະ​ກັນ. ສອງ​ຝ່າຍ​ໃຫ້​ຄຳ​ໝັ້ນ​ສັນຍາ​ຈະ​ຊຸກຍູ້​ຜົນ​ປະ​ໂຫຍ​ດລວມ ​ແລະ ຊຸກຍູ້ການ​ຮ່ວມ​ມື​ສອງ​ຝ່າຍ​ແລະ​ຫຼາຍ​ຝ່າຍ​ຢ່າ​ງສຸດຂີດ, ​ເພື່ອ​ຜົນ​ປະ​ໂຫຍ​ດຂອງ​ປະຊາຊົນ​ສອງ​ປະ​ເທດ, ປະກອບສ່ວນ​ເຂົ້າ​ໃນ​ການ​ຮັກສາ​ສັນ​ຕະພາບ ສະຖຽນ​ລະ​ພາບ, ການ​ຮ່ວມ​ມື ​ແລະ ຄວາມ​ວັດທະນາ​ຖາວອນ​ຢູ່​ໃນ​ພາກ​ພື້ນ​ອາຊີ - ປະ​ຊີ​ຟິກ ​ແລະ ​ໃນ​ໂລກ.

ສອງ​ຝ່າຍ​ໃຫ້​ຄຳ​ໝັ້ນ​ສັນຍາ​ຈະ​ເພີ່ມ​ທະວີ​ການ​ຮ່ວມ​ມື​ໃນ​ບັນດາ​ເວທີ​ປະ​ໄສ​ພາກ​ພື້ນ ​ແລະ ສາກົນ; ຮັບ​ຮູ້​ຄວາມ​ສຳຄັນ​ຂອງ​ສະມາຄົມ​ບັນດາ​ປະ​ເທດ​ອາ​ເຊຍ​ຕາ​ເວັນ​ອອກສຽງ​ໄຕ້ (ອາ​ຊຽນ) ທີ່​ສາມັກຄີ ໝັ້ນຄົງ​ເຂັ້ມ​ແຂງ, ຮັກສາ​ບົດບາດ​ເປັນ​ແກນ​ກາງ​ໃນ​ໂຄງ​ປະກອບ​ການ​ເມືອງ-ຄວາມ​ສະຫງົບຂອງ​ພາກ​ພື້ນ.

ສອງ​ຝ່າຍ​ສະ​ແດງ​ຄວາມ​ເປັນ​ຫ່ວງ​ເປັນໄຍກ່ຽວ​ກັບ​ເຫດການ​ທີ່​ກຳລັງ​ເກີດ​ຂຶ້ນ​ໃນເຂດ​ທະ​ເລ​ຕາ​ເວັນ​ອອກ; ສອງ​ຝ່າຍ​ເນັ້ນ​ເຖິງ​ຄວາມ​ຈຳ​ເປັນຕ້ອງ​ເຊີດ​ຊູ​ບັນດາ​ສິດ​ເສລີ​ໃນ​ການ​ເດີນ​ເຮືອ​ທະ​ເລ ​ແລະ ​ເດີນ​ອາກາດ ຊຶ່ງ​ສາກົນ​ໄດ້​ຮັບຮອງ​ແລ້ວ. ສອງ​ຝ່າຍ​ສະ​ນັບ​ສະ​ໜູນ​ການ​ແກ້​ໄຂ​ຄວາມ​ພິພາດ​ຕ່າງໆ​ດ້ວຍ​ສັນຕິ​ວິທີ ຕາມ​ກົດໝາຍ​ສາກົນ, ອະນຸ​ສັນຍາ​ສະຫະ​ປະຊາ​ຊາດ​ວ່າ​ດ້ວຍ​ກົດໝາຍ​ທະ​ເລ​ປີ 1982 (UNCLOS) ​ແລະ ຮັບ​ຮູ້​ຄວາມ​ສຳຄັນ​ຂອງ​ການ​ປະຕິບັດ​ຢ່າງ​ຄົບ​ຖ້ວນ​ເຂັ້ມ​ງວດ ຕາມຖະແຫຼງການກ່ຽວກັບວິທີການປະພຶດຂອງ​ບັນດາ​ຝ່າຍ​ຢູ່ທະເລຕາເວັນອອກ (DOC), ພ້ອມ​ກັນ​ນັ້ນ​ກໍ່​ສະ​ນັບ​ສະ​ໜູນ​ຄວາມ​ພະຍາຍາມ​ຕ່າງໆ​ທີ່​ແນ​ໃສ່​ບັນລຸ ປະມວນ​ຂໍ້​ກຳນົດ​ກ່ຽວ​ກັບການປະພຶດຢູ່ທະເລຕາເວັນອອກ (COC).

ການ​ຢ້ຽມຢາມ​ຂອງທ່ານ​ເລຂາທິການ​ໃຫຍ່ ຫງວຽນ​ຝູຈ້ອງ ​​ປະກອບສ່ວນ​ເຮັດ​ໃຫ້ການ​ພົວພັນ​ຄູ່​ຮ່ວມ​ຮອບດ້ານ​ຫວຽດນາມ - ສະຫະລັດ​ອາ​ເມຣິກາ ມີ​ຄວາມ​ອຸດົມສົມບູນ ​ເລິກ​ເຊິ່ງກວ່າ​ອີກ, ​ເປັນ​ພື້ນຖານ​ເພື່ອ​ຍົກ​ການ​ພົວພັນລະຫວ່າງ​ສອງ​ປະ​ເທດ​ຂຶ້ນ​ສູ່​ລະດັບ​ສູງ​ໃໝ່​ໃນ​ອະນາຄົດ; ວາງ​ກຳນົດ​ທິດ​ທາງ​ໃຫຍ່​ໃຫ້​ແກ່ການ​ພົວພັນ​ລະຫວ່າງ​ສອງ​ປະ​ເທດ​ຄື: ​ເພີ່ມ​ທະວີ​ການ​ຕິດ​ຕໍ່ ພົບ​ປະ​ແລກປ່ຽນ​ຂັ້ນ​ສູງ, ກໍ່ສ້າງ​ແລະ​ປັບ​ປຸງ​ຄວາມ​ເຊື່ອ​ຖື​ການ​ເມືອງ, ຊຸກຍູ້​ການ​ຮ່ວມ​ມື​ດ້ານ​ເສດຖະກິດ ການ​ຄ້າ ການ​ລົງທຶນ; ​ເປີດ​ກວ້າງ​ການ​ຮ່ວມື​ດ້ານ​ວິທະຍາສາດ ​ເຕັກ​ໂນ​ໂລ​ຊີ ການສຶກສາ-ກໍ່ສ້າງ ສາທາລະນະ​ສຸກ ສິ່ງ​ແວດ​ລ້ອມ…; ຖື​ວ່າການ​ຮ່ວມ​ມື​ດ້ານ​ການ​ປ້ອງ​ກັນຊາ​ດ-ປ້ອງ​ກັນ​ຄວາມ​ສະຫງົບ ​ເປັນ​ປັດ​ໄຈ​ເພີ່ມ​ທະວີ​ຄວາມ​ເຊື່ອ​ຖື​ການ​ເມືອງ ​ແລະ ຄຸນຄ່າ​ຍຸດ​ທະ​ສາດ​ຂອງ​ການພັວພັນ​ສອງ​ຝ່າຍ, ​ເພີ່​ມທະວີ​ການ​ຮ່ວມື​ດ້ານ​ມະນຸດສະທຳ, ການ​ພົວພັນ​ສັງ​ສັນ​ລະຫວ່າງ​ປະຊາຊົນ.

ການ​ຢ້ຽມຢາມ​ໄດ້​ສຳ​ເລັດ​ຜົນ​ຢ່າງ​ຈົບງາມ, ​ໄດ້​ຮັບ​ການ​ຊົມ​ເຊີຍ​ປະ​ເມີນ​ຄ່າ​ຈາກ​ຫາງ​ສຽງສາກົນ ວ່າການ​ຢ້ຽມຢາມ​ໄດ້​ເປັນ​ຫຼັກໝາຍ​ປະຫວັດສາດ​ໃນ​ການ​ພົວພັນ​ລະຫວ່າງ​ຫວຽດນາມ - ສະຫະລັດ​ອາ​ເມຣິກາ./.

ໂດຍ ຫງວຽນ​ດຶກ

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ