ວັນອາທິດ, 31/5/2020
ການເຄື່ອນໄຫວຂອງທ່ານຫງວຽນເຕິນຢຸງ ນາຍົກລັດຖະມົນຕີ ແຫ່ງ ສສ ຫວຽດນາມ ທີ່ປະເທດຍີ່ປຸ່ນ
28/7/2015 21:0' ສົ່ງ ພິມ
ຫົວໜ້າຄະນະຜູ້ແທນຂອງບັນດາປະເທດ ທີ່ເຂົ້າຮ່ວມກອງປະຊຸມສຸດຍອກແມ່ນ້ຳຂອງ-ຍີ່ປຸ່ນ ຄັ້ງທີ 7 (ພາບ: TTXVN)

ກອງປະຊຸມໄດ້ຈັ້ດຂຶ້ນໃນສະພາບການໆຮ່ວມມືແມ່ນ້ຳຂອງ - ຍີ່ປຸ່ນ ທີ່ນັບມື້ນັບຂະຫຍາຍຕົວ ແລະ ກາຍເປັນໜຶ່ງໃນບັນດາກົນໄກຮ່ວມມືອັນດັບໜຶ່ງ ຢູ່ອະນຸພາກພື້ນແມ່ນ້ຳຂອງ. ຍຸດທະສາດ ໂຕກຽວ 2012 ໄດ້ຮັບ​ການຜັນຂະຫຍາຍປະຕິບັດ ແລະ ບັນລຸຜົນສຳເລັດອັນສຳຄັນຫຼາຍຢ່າງ, ປະກອບສ່ວນ​ປັບປຸງການ​ສຳພັນ ແລະ ຊ່ວຍເຫຼຶອຊຶ່ງກັນແລະກັນ ລະຫວ່າງບັນດາລະບົບ​ເສດຖະກິດ ​ຂອງ​ບັນດາ​ປະ​ເທດ​ສະມາຊິກ ເພື່ອສັນຕິພາບ ແລະ ຄວາມ​ວັດທະນາຖາວອນລວມໃນພາກພື້ນ.

ຜົນງານທີ່ພົ້ນເດັ່ນຂອງກອງປະຊຸມສຸດ​ຍອດ​ແມ່​ນ້ຳຂອງ - ຍີ່ປຸ່ນ​ໃນ​ຄັ້ງນີ້ ແມ່ນການທີ່​ບັນດາ​ຜູ້ນຳ​ຫ້າ​ປະ​ເທດແມ່ນ້ຳຂອງ ​ແລະ ຍີ່ປຸ່ນ ໄດ້ຜ່ານອະນຸມັດຍຸດທະສາດ ໂຕກຽວ 2015 ດ້ວຍການກຳນົດທິດຢ່າງຈະແຈ້ງ ກ່ຽວ​ກັບການຮ່ວມມື ລະຫວ່າງບັນດາ​ປະ​ເທດ​ອະນຸ​ພາກ​ພື້ນແມ່ນ້ຳຂອງ - ຍີ່ປຸ່ນ ໃນໄລຍະ 2016 – 2018; ໃນນັ້ນເປົ້າໝາຍລວມແມ່ນຮັບປະກັນຄວາມໝັ້ນຄົງໃນພາກພື້ນ ແລະ ບັນລຸໄດ້ “ຄວາມ​ເຕີບ​ໂຕ​ຢ່າງ​ມີ​ຄຸນ​ນະພາບ” ຢູ່ອະນຸພາກພື້ນແມ່ນ້ຳຂອງ. ບັນດາການເຄື່ອນໄຫວຮ່ວມມືແມ່ນ້ຳຂອງ - ຍີ່ປຸ່ນ ຈະສຸມໃສ່ສີ່​ເສົາ​ຄ້ຳ​ແຫ່ງການຮ່ວມມືຕົ້ນຕໍ່ ດັງລຸ່ມນີ້:

ທີໜຶ່ງ, ພັດທະນາ​ໂຄງ​ສ້າງພື້ນຖານອຸດສາຫະກຳ (ຄື: ຕົວເມືອງ, ພະລັງງານ, ອຸດສາຫະກຳສະໜັບສະ​ໜູນ, ຄົມມະນາຄົມຂົນສົ່ງ, ສະໜອງນ້ຳ...) ແລະ ເພີ່ມທະວີການເຊື່ອມຕໍ່ “ແຂງ” ກ່ຽວກັບທາງບົກ ທາງລົດໄຟ ທາງທະເລ ແລະ ທາງອາກາດ ລະຫວ່າງບັນດາປະເທດຢູ່​ເຂດແມ່ນ້ຳຂອງ ກໍ່ຄື​ເຊື່ອມ​ຕໍ່ອະນຸພາກພື້ນແມ່ນ້ຳຂອງ ກັບບັນດາປະເທດອ້ອມຂ້າງ.

ທີສອງ, ພັດທະນາຊັບພະຍາກອນມະນຸດຮັບໃຊ້ອຸດສາຫະກຳ ແລະ ຍູ້ແຮງການເຊື່ອມຕໍ່ “ອ່ອນ” ກ່ຽວກັບລະບຽບກົດໝາຍ ເສດຖະກິດ ແລະ ການ​ພົວພັນ​ສັງ​ສັນປະຊາຊົນ; ສົ່ງເສີມບັນດາວິສາຫະກິດຂອງ ຍີ່ປຸ່ນ ​ໃຫ້ເປີດກ້ວາງຕາໜ່າງການຜະລິດຢູ່ພາກພື້ນ.

ທີສາມ, ພັດທະນາແບບຍືນຍົງ ມຸ່ງໄປສູ່​ການປະຕິບັດແມ່ນ້ຳຂອງຂຽວ​ໃຫ້​ປະກົດ​ເປັນ​ຈິງ ຊຶ່ງຈຸດໜັກແມ່ນ ເພີ່ມທະວີການຮ່ວມມື​ໃນ​ການປ້ອງກັນໄພພິບັດທຳມະຊາດ, ຮັບ​ມື​ກັບ​ການ​ປ່ຽນ​ແປງ​ດິນ​ຟ້າ​ອາກາດ, ຄຸ້ມຄອງ ແລະ ນຳໃຊ້ແຫຼ່ງນ້ຳຂອງແມ່ນ້ຳຂອງຢ່າງຍືນຍົງ.

ທີສີ່, ເພີ່ມທະວີການປະສານສົມທົບລະຫວ່າງການຮ່ວມມືແມ່ນ້ຳຂອງ ກັບ​ບັນດາ​ກົນ​ໄກ​ຮ່ວມ​ມື​ອື່ນ​ຢູ່​ໃນ​ພາກ​ພື້ນ, ກັບບັນດາຄູ່ຮ່ວມມື ແລະ ອົງການ​ຈັດ​ຕັ້ງ​ສາກົນທີ່​ກ່ຽວຂ້ອງ ​ເພື່ອ​ລະດົມ​ແຫຼ່ງພະລັງຢ່າງ​ມີ​ປະສິດທິ​ຜົນ ​ໃຫ້​ແກ່ການພັດທະນາຂອງອະນຸພາກພື້ນແມ່ນ້ຳຂອງ.

ໃນຖະແຫຼງການຍຸດທະສາດ ໂຕກຽວ 2015 ກ່ຽວກັບການຮ່ວມມືແມ່ນ້ຳຂອງ - ຍີ່ປຸ່ນ, ບັນດາ​ການ​ນຳ​ໄດ້​ເນັ້ນ​ເຖິງ​ຄວາມ​ສຳຄັນ​ຂອງ​ມະຫາ​ສະໝຸດ ອັນ​ເປັນຊັບສົມບັດລວມຂອງໂລກ; ຢືນຢັນຄວາມສຳຄັນ ຂອງການຮ່ວມມືຢ່າງແໜ້ນແຟ້ນກວ່າເກົ່າ ​ເພື່ອ​ຮັບ​ປະ​ກັນຄວາມ​ສະຫງົບ​ປອດ​ໄພ​ໃນ​ການ​ເດີນ​ເຮືອ​ທະ​ເລ​ຢູ່ໃນພາກພື້ນ; ເນັ້ນ​ເຖິງເລື່ອງຕ້ອງປະຕິບັດຖະແຫຼງການວ່າດ້ວຍວິທີການ​ປະພຶດ​ຂອງ​ຝ່າຍ​ຕ່າງໆ​ຢູ່​ທະ​ເລ​ຕາ​ເວັນ​ອອກ (DOC) ຢ່າງຄົບຖ້ວນ ແລະ ມີປະສິດທິຜົນ, ແລະ ບັນລຸໄດ້ປະມວນຂໍ້ກຳນົດ​ການ​ປະພຶດ​ຂອງ​ຝ່າຍຕ່າງໆຢູ່ທະເລຕາເວັນອອກ (COC) ໂດຍໄວ.

ບັນດາທ່ານຜູ້ນຳກໍ່​ໄດ້​ລື້ມຄືນເຖິງຄຳໝັ້ນສັນຍາຮັບປະກັນສິດເສລີພາບໃນການເດີນເຮືອທະເລ ແລະ ການເດີນອາກາດ, ຄວາມສະຫງົບປອດໄພ​ໃນ​ການເດີນເຮືອທະເລ, ການຂົນ​ສົ່ງ​ສິນຄ້າລຸ​ລ່ວງ​ໄປ​ດ້ວຍ​ດີ ແລະ ແກ້ໄຂຂໍ້ຂັດແຍ່ງພິພາດ​ຕ່າງໆໂດຍສັນຕິວິທີ ຕາມບັນດາຫຼັກການຂອງກົດໝາຍສາກົນ ຊຶ່ງລວມມີອະ​ນຸສັນຍາສະຫະປະຊາຊາດວ່າດ້ວຍກົດໝາຍທະເລປີ 1982 (UNCLOS 1982). ການນຳບັນດາປະເທດ ໄດ້ສະແດງຄວາມເປັນຫ່ວງເປັນໃຍ ຕໍ່ບັນດາເຫດການທີ່​ເກີດຂຶ້ນ​ໃນ​ມໍ່ໆ​ມາ​ນີ້ ຢູ່ທະເລຕາເວັນອອກ ທີ່ເຮັດໃຫ້ສະພາບການສັບສົນຂຶ້ນຕື່ມ, ທຳລາຍຄວາມໄວ້ວາງໃຈຊຶ່ງ​ກັນ​ແລະ​ກັນ ແລະ ອາດ​ຈະ​ທຳລາຍ​ສັນຕິພາບ ສະຖຽມລະພາບ ແລະ ຄວາມໝັ້ນຄົງຢູ່ພາກພື້ນອີກດ້ວຍ.

ຄະນະຜູ້ແທນຫວຽດນາມໄດ້ມີການເຂົ້າຮ່ວມຢ່າງຕັ້ງໜ້າເຂົ້າໃນຂະບວນວິວັດຂອງການກະກຽມໃຫ້​ແກ່​ກອງປະຊຸມ, ປະສານສົມທົບກັບ ຍີ່ປຸ່ນ ແລະ ບັນດາປະເທດຢູ່​ເຂດແມ່ນ້ຳຂອງ ​ໃນ​ການກໍ່ສ້າງຍຸດທະສາດ ໂຕກຽວ ຕາມທິດຊ່ວຍເຫຼືອຢ່າງສູງສຸດ ໃຫ້ແກ່ບັນດາເປົ້າໝາຍພັດທະນາເສດຖະກິດ - ສັງຄົມ ຂອງບັນດາປະເທດຢູ່​ເຂດແມ່ນ້ຳຂອງ. ຄວາມ​ຄິດ​ລິ​ເລີ່​ມຂອງຫວຽດນາມທີ່ໄດ້ສະເໜີໃນກອງປະຊຸມສຸດ​ຍອດ ແມ່ນ້ຳຂອງ - ຍີ່ປຸ່ນ ຄັ້ງທີ 6 ກ່ຽວກັບການເປີດກວ້າງການເຊື່ອມຕໍ່ອະນຸພາກພື້ນແມ່ນ້ຳຂອງ ກັບບັນດາປະເທດທີ່ອ້ອມຂ້າງ, ພິເສດແມ່ນ ກັບເຂດອາຊີອາໃຕ້ ​ໄດ້​ກາຍ​ເປັນ​ເນື້ອ​ໃນ​ສຳຄັນ​ອັນ​ໜຶ່ງ​ໃນ​ຍຸດ​ທະ​ສາດ ໂຕກຽວ 2015. ຫວຽດນາມຈະສືບຕໍ່ປະສານສົມທົບຢ່າງແໜ້ນແຟ້ນ ພ້ອມ​ກັບ​ບັນດາ​ປະ​ເທດ​ກໍ່ສ້າງ​ແຜນການ​ປະຕິບັດ​ງານ ແລະ ວິໄສທັດພັດທະນາອຸດສາຫະກຳແມ່ນ້ຳຂອງ.

ຄຽງຄູ່ກັບບັນດາການເຄື່ອນໄຫວໃນຂອບກອງປະຊຸມສຸດ​ຍອດແມ່ນ້ຳຂອງ - ຍີ່ປຸ່ນ ຄື: ​​ເຂົ້າຢ້ຽມຂ່ຳນັບເຈົ້າຊີວິດ​ຍີ່ປຸ່ນ ອະ​ກິຮີ​ໂຕະ, ພົບ​ປະ​ກັບ​ທ່ານປະທານສະພາສູງ ແລະ ສະພາຕ່ຳແຫ່ງຊາດຍີ່ປຸ່ນ, ພົບປະກັບສະຫະພັນ​ສະມາຊິກ​ລັດຖະສະພາມິດຕະພາບ ຍີ່ປຸ່ນ - ແມ່ນ້ຳຂອງ, ເຂົ້າຮ່ວມເວທີປາໄສ 5 ລະບົບເສດຖະກິດແມ່ນ້ຳຂອງ, ທ່ານນາຍົກລັດຖະມົນຕີ ຫງວຽນເຕິນຢຸງ ຍັງໄດ້ມີການພົບປະ ແລະ ເຂົ້າຮ່ວມງານລ້ຽງຕ້ອນຮັບຂອງທ່ານນາຍົກລັດຖະມົນຕີ ຊີນໂຢ ອາ​ເບະ.

ພ້ອມກັນນັ້ນ, ທ່ານນາຍົກລັດຖະມົນຕີ ຫງວຽນເຕິນຢຸງ ກໍ່ມີການພົບປະກັບວົງການການເມືອງ, ພົບປະ ແລະ ແລກປ່ຽນກັບຜູ້ນຳກຸ່ມເສດຖະກິດ ວິສາຫະກິດແຖວໜ້າຂອງຍີ່ປຸ່ນ ກວ່າ 20 ບໍລິສັດຕາມ​ລຳດັບ, ເຂົ້າຮ່ວມໃນການພົບປະສົນທະນາກ່ຽວກັບເສດຖະກິດຫວຽດນາມ - ຍີ່ປຸ່ນ.../.

ສັງລວມໂດຍ: BTV

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ