ວັນອາທິດ, 31/5/2020
ສະເຫຼີມສະຫຼອງວັນມູນເຊື້ອຂອງ ຕຳຫຼວດປະຊາຊົນຫວຽດນາມ ຄົບຮອບ 70 ປີ
31/8/2015 18:16' ສົ່ງ ພິມ
ທ່ານປະທານປະເທດ ເຈືອງເຕິນຊາງ ປະດັບຫຼຽນໄຊດາວຄຳ ຄັ້ງທີສີ່ ໃຫ້ແກ່ກຳລັງຕຳຫຼວດປະຊາຊົນຫວຽດນາມ.

ເປັນ​ກຽດ​ມາຮ່ວມພິທີ​ສະ​ເຫຼີມສະຫຼອງ ມີ​ສະຫາຍ​ເລຂາທິການ​ໃຫຍ່ ຫງວຽນ​ຝູຈ້ອງ; ບັນດາ​ສະຫາຍ​ການ​ນຳ​ພັກ-ລັດ, ອະດີດການ​ນຳ​ພັກ-ລັດ; ບັນດາ​ແມ່​ຫວຽດນາມ​ວິລະ​ຊົນ, ວິລະ​ຊົນ​ກຳລັງ​ປະກອບ​ອາວຸດ​ປະຊາ​ຊົນ, ວິລະ​ຊົນ​ອອກ​ແຮງ​ງານ​ໃນກຳລັງຕຳຫຼວດ​ປະຊາຊົນ​ ພ້ອມ​ດ້ວຍ​ພະນັກງານ, ນາຍ​ພົນ ນາຍພັນ​ແລະ ນັກຮົບຕຳຫຼວດ​ປະຊາຊົນ ຜ່ານ​ໄລຍະຕ່າງ​ໆ​ເປັນ​ຈຳນວນ​ຫຼາຍ​.

ທາງ​ດ້ານ​ແຂກ​ຕ່າງປະ​ເທດ​ທີ່​ຖືກ​ເຊີນມີ ຄະນະ​ຜູ້​ແທນ​ກະຊວງ​ມະຫາດ​ໄທ​ແຫ່ງ​ລາຊະ​ອານາຈັກ ກຳປູ​ເຈຍ ນຳ​ໂດຍ​ພະນະ​ທ່ານສົມ​ເດັດ ຊາ​ເຄັງ ຮອງ​ນາຍົກລັດຖະມົນຕີ ຄວບ​ຕຳ​ແໜ່​ງລັດຖະມົນຕີ​ວ່າການ​ກະຊວງ, ຄະນະ​ຜູ້​ແທນ​ກະຊວງປ້ອງ​ກັນ​ຄວາມ​ສະຫງົບ​ແຫ່ງ ສປປ ລາວ ນຳ​ໂດຍ​ທ່ານ ສົມ​ແກ້ວ ສີ​ລາ​ວົງ ລັດຖະມົນຕີ​ວ່າການ​ກະຊວງ. ມາ​ຮ່ວມ​ພິທີ​ສະ​ເຫຼີງ​ສະຫຼອງ​ຍັງ​ມີ ຄະນະ​ຜູ້​ແທນ​ກະຊວງຕຳຫຼວດ, ກະຊວງ​ປ້ອງ​ກັນ​ຄວາມ​ສະຫງົບ, ກະຊວງ​ມະຫາດ​ໄທ, ອົງການ​ຕຳຫຼວດ​ ຂອງ​ບັນດາ​ປະ​ເທດ: ສາທາລະນະ​ລັດ ປະຊາຊົນ ຈີນ, ສະຫະພັນ​ລັດ​ເຊຍ, ກູ​ບາ, ບຣູ​ໄນ ດາຣູຊາ​ລາມ, ສິງກະ​ໂປ, ອີນ​ໂດ​ເນ​ເຊຍ, ມຽນມາ, ​ໄທ; ພ້ອມ​ດ້ວຍ​ອົງການ​ຕຳຫຼວດ​ອາ​ຊະ​ຍາ​ກຳ​ສາກົນ ​ແລະ ພາກ​ພື້ນ.

ອ່ານ​ສຸນທອນພົດທີ່​ພິທີ​ມິດ​ຕິງ, ທ່ານ​ປະທານ​ປະ​ເທດ ​ເຈືອງ​ເຕິ​ນຊາງ ​ໄດ້​ຍົກ​ໃຫ້​ເຫັນ​ແຈ້ງວ່າ 70 ປີ​ແຫ່ງ​ການ​ກໍ່ສ້າງ ສູ້​ຮົບ​ແລະ​ເຕີບ​ໃຫຍ່, ຜົນງານ​ໃນ​ການ​ຮົບ​ຕໍ່​​ໃສ່​ໄຊຊະນະ ​ໄດ້​ເພີ່ມ​ພູນ​ຄູນ​ສ້າງມູນ​ເຊື້ອ​ອັນ​ສະຫງ່າ​ງາມ​ຂອງຕຳຫຼວດ​ປະຊາຊົນ: ​ເດັດຂາດຈົງ​ຮັກ​ພັກດີຕໍ່​ປະ​ເທດ​ຊາດ ​ແລະ ປະຊາຊົນ, ຕໍ່​ພັກ ​ແລະ ລັດ; ຜູກ​ພັນ​ແບບ​ເລືອດ​ເນື້ອກັບ​ປະຊາຊົນ, ຮັບ​ໃຊ້​ປະຊາຊົນ, ອິງ​ໃສ່​ປະຊາຊົນ​ເພື່ອ​ປະຕິບັດ​ງານ ​ແລະ ສູ້​ຮົບ; ຮ່ວມ​ມືປະສານ​ສົມທົບ​ຢ່າງ​ແໜ້ນ​ແຟ້ນກັບ ກອງທັບປະຊາຊົນ, ກັບ​ບັນດາ​ອົງການ​ປົກ​ປ້ອງ​ກົດໝາຍ ​ແລະ ບັນດາ​ຂັ້ນ ຂະ​ແໜງ​ການ, ຍົກ​ສູງ​ສະຕິ​ລະວັງ​ຕົວ, ຄວາມ​ກ້າຫານ, ສະຕິ​ປັນຍາ, ຄວາມ​ຄິດປະດິດ​ສ້າງ, ຄວາມສະຫຼາດຄ່ອງ​ແຄ້​ວ ​ໃນ​ການ​ຕໍ່ສູ້​ກັບ​ສັດຕູ ​ແລະ ອາ​ຊະ​ຍາ​ກຳ, ​ເຊີດ​ຊູ​ຈິດ​ໃຈ “​ເຄົາ​ລົບ​ນັບຖື​ກົດໝາຍ”; ບໍ່​ຢຸດ​ຢັ້ງ​ໃນ​ການ​ຝຶກ​ຝົນ​ຫຼໍ່​ຫຼອມ​ຄຸນສົມບັດ​ປະຈຳ​ຕົວ​ຂ​ອງຕຳຫຼວດ​ປະຕິວັດ ຕາມ​ຄຳ​ສັ່ງສອນ 6 ປະການ​ຂອງ​ລຸງ​ໂຮ່: ສາມັກຄີ, ​ເປັນ​ເອກະ​ພາບ, ປະຊາທິປະ​ໄຕ, ມີລະບຽບ​ວິ​ໄນ​ເຂັ້ມ​ງວດ.

ປັດຈຸບັນ, ​ໃນ​ເວລາ​ທີ່​ສະພາບ​ການ​ພາກ​ພື້ນ​ແລະ​ໃນ​ໂລກ​ຍັງ​ຜັນ​ປ່ຽນ​ຢ່າງ​ສັບສົນ; ຄວາມ​ພິພາດ​ດ້ານ​ອະທິປະ​ໄຕ​ໃນ​ທະ​ເລ ໝູ່​ເກາະ​ ພວມ​ເກີດ​ຂຶ້ນ​ຢ່າງ​ເຄັ່ງຮ້ອນ ສັບສົນ, ​ເປັນ​ການ​ນາບ​ຂູ່​ຕໍ່​​ເຂດ​ນ້ຳດິນ​ແດນ​ອັນ​ຄົບ​ຖ້ວນ​ຂອງຫວຽດນາມ. ​ໃນ​ປະ​ເທດ, ສະພາບ​ການລະ​ເມີດ​ກົດໝາຍ, ອາ​ຊະ​ຍາ​ກຳ​ມີ​ທ່າ​ອຽງ​ເພີ່ມ​ຂຶ້ນ, ຄວາມ​ປອດ​ໄພ ຄວາມ​ເປັນ​ລະບຽບ​ຮຽບຮ້ອຍສັງຄົມກໍ່ຜັນ​ປ່ຽນ​ຢ່າງ​ສັບສົນ. ​ໃນ​ສະພາບ​ການ​ດັ່ງກ່າວ, ທ່ານ​ປະທານ​ປະ​ເທດສະ​ເໜີ​ໃຫ້ກຳລັງຕຳຫຼວດ​ປະຊາຊົນ ຕ້ອງ​ເດັດດ່ຽວ​ຜ່ານ​ຜ່າ​ສິ່ງ​ຈຳກັດ ຂໍ້ຂາດ​ຕົກ​ບົກພ່ອງ, ພ້ອມ​ນັ້ນ​ກໍ່​ເປັນ​ເຈົ້າ​ການ​ປ້ອງ​ກັນ ​ແລະ ຕໍ່ສູ້​ຕ້ານການ​ກະທົບ​ຫຍໍ້​ທໍ້​ຕ່າງໆ ​ແລະ ການ​ທຳລາຍມ້າງ​​ເພຈາກ​ພາຍ​ນອກ, ບໍ່​ໃຫ້​ຖືກ​ຕົກ​ໃສ່​ທ່າ​ຮັບ, ບໍ່​ເຜີ​ຕົວ; ​ໃນ​ບໍ່​ວ່າ​ສະຖານະ​ການ​ໃດ​ກໍ່​ຕ້ອງ​ປະຕິບັດ​ເປົ້າ​ໝາຍ​: “ປົກ​ປັກ​ຮັກສາ​ເອກະລາ​ດ ອະທິປະ​ໄຕ ​ເອກະ​ພາບ ​ເຂດ​ນ້ຳ​ດິນ​ແດນ​ອັນ​ຄົບ​ຖ້ວນ​ຂອງ​ປະ​ເທດ​ຊາດ​ໄວ້​ຢ່າງ​ໝັ້ນຄົງ; ປົກ​ປັກ​ຮັກສາ​ພັກ ລັດ ປະຊາຊົນ ​ແລະ ລະບອບ​ສັງຄົມ​ນິຍົມ; ປົກ​ປັກ​ຮັກສາ​ພາລະກິດ​ການ​ປ່ຽນ​ແປງ​ໃໝ່, ຫັນ​ປະ​ເທດ​ເປັນ​ອຸດສາຫະກຳ ທັນ​ສະ​ໄໝ; ປົກ​ປັກ​ຮັກສາ​ຜົນ​ປະ​ໂຫຍ​ດຂອງ​ຊາດ; ປົກ​ປັກ​ຮັກສາ​ຄວາມ​ສະຫງົບ​ດ້ານ​ການ​ເມືອງ, ຄວາມ​ເປັນ​ລະບຽບ​ຮຽບຮ້ອຍ ຄວາມ​ປອດ​ໄພ​ສັງຄົມ ​ແລະ ວັດທະນະທຳ; ຮັກສາ​ສະຖຽນ​ລະ​ພາບ​ດ້ານ​ການ​ເມືອງ ​ແລະ ສິ່ງ​ແວດ​ລ້ອມ​ສັນຕິພາບ​ ເພື່ອ​ສ້າງສາ ພັດ​ທະ​ນາ​ປະ​ເທດ ຕາມ​ກຳນົດ​ທິດ​ສັງຄົມ​ນິຍົມ” ໃຫ້​ຈົນ​ໄດ້ ຄືທີ່​ໄດ້​ກຳນົດ​ໃນ​ມະຕິ​ຂອງ​ຄະນະ​ບໍລິຫານ​ງານ​ສູນ​ກາງ​ພັກ​ສະ​ໄໝ​ທີ XI ວ່າ​ດ້ວຍ “​ແຜນຍຸດ​ທະ​ສາດປົກ​ປັກ​ຮັກສາ​ປະ​ເທດ​ຊາດ​ໃນ​ສະພາບ​ການ​ໃໝ່”.

ທ່ານ​ປະທານ​ປະ​ເທດສະ​ເໜີ​ໃຫ້​ສືບ​ຕໍ່​ກໍ່ສ້າງກຳລັງຕຳຫຼວດ​ປະຊາຊົນຕາມ​ທິດ​ປະຕິວັດ ​ລະບຽບ​ຫຼວງ ຍອດ​ຍ້ຽມ ທັນ​ສະ​ໄໝ​ເທື່ອ​ລະ​ກ້າ​ວ, ບຸລິມະສິດ​ໃຫ້​ເຂົ້າ​ສູ່​ທັນ​ສະ​ໄໝ​ຕໍ່ບາງ​ກຳລັງ​ທີ່​ສຳຄັນ; ສືບ​ຕໍ່​ປັບປຸງ​ບູລະນະ​ກົງ​ຈັກ ຕາມ​ທິດ​ກະທັດ​ລັດ ມີ​ປະສິດທິ​ຜົນ. ສືບຕໍ່ຮັກສາ ​ເພີ່ມ​ທະວີ​ການ​ນຳພາ​ເດັດຂາດ ​ໂດຍ​ກົງກ່ຽວ​ກັບ​ທຸກ​ດ້ານ​ຂອງ​ພັກ, ການ​ຄຸ້ມ​ຄອງ​ລວມສູນ ​ເປັນ​ເອກະ​ພາບ​ຂອງ​ລັດ ຕໍ່​ກັບຕຳຫຼວດ​ປະຊາຊົນ; ຍົກ​ສູງ​ຄວາມ​ສາມາດ​ນຳພາ ​ແລະ ກຳລັງ​ສູ້​ຮົບຂອງ​ລະບົບ​ການຈັດ​ຕັ້ງ​ພັກ​ໃນ​ຕຳຫຼວດ​ປະຊາຊົນ. ກໍ່ສ້າງ​ຖັນ​ແຖວ​ພະນັກງານ ນັກຮົບຕຳຫຼວດ​ປະຊາຊົນ ທີ​ມີ​ຄວາມຈົງ​ຮັກ​ພັກດີ, ມີ​ຫຼັກ​ໝັ້ນ​ແນວ​ຄິດ​ອັນ​ໜັກ​ແໜ້ນ, ມີ​ຄຸນສົມບັດ​ປະຕິວັດ​ອັນ​ປອດ​ໃສ, ​ເຊື່ອມ​ຊືມຢ່າງ​ເລິກ​ເຊິ່ງຄຳ​ສັ່ງສອນ 6 ປະການ​ຂອງ​ລຸງ​ໂຮ່; ມີ​​ວິຊາ​ສະ​ເພາະ ວິຊາ​ຊີບລະດັບ​ສູງ, ກຳ​ແໜ້ນ​ກົດໝາຍ, ມີ​ສະຕິ​ຕໍ່​ການຈັດ​ຕັ້ງ ລະບຽບ​ວິ​ໄນ​ໃນ​ເຂັ້ມ​ງວດ, ສາມັກຄີ​ພາຍ​ໃນ​ຢ່າງ​ແໜ້ນ​ແຟ້ນ; ຄົ້ນ​ເຜີຍ ກີດ​ກັ້ນ​ກົນອຸບາຍມ້າງ​​ເພທຳລາຍ ຂອງບັນດາ​ອິດ​ທິກຳລັງ​ສັດຕູ ​ຢ່າງ​ທັນ​ການ ​ແລະ ​ເຮັດ​ໃຫ້ພວກ​ມັນຕ້ອງ​ປະລາ​ໄຊ​ລົງ, ປົກ​ປັກ​ຮັກສາ​ຄວາມ​ສະຫງົບ​ແຫ່ງ​ຊາດ​ໄວ້​ຢ່າງ​ໝັ້ນຄົງ; ຕໍ່ສູ້​ສະກັດ​ກັ້ນ ​ແລະ ຍູ້​ຖອຍ​ອາຊະຍາ​ກຳທຸກ​ປະ​ເພດ, ຮັກສາ​ຄວາມ​ເປັນ​ລະບຽບຮຽບຮ້ອຍ ຄວາມ​ປອດ​ໄພ​ສັງຄົມ, ປົກ​ປັກ​ຮັກສາ​ຊີວິດ​ການ​ເປັນ​ຢູ່​ສະຫງົບ​ສຸກ​ຂອງ​ປະຊາຊົນ.

​ໂດຍ​ຕາງໜ້າ​ຄະນະ​ພັກຕຳຫຼວດສູນ​ກາງ ​ແລະ ກະຊວງ​ຕຳຫຼວດ, ພົນ​ເອກ ​ເຈິ່ນດ້າຍ​ກວາງ ສະ​ແດງ​ຄວາມ​ຮູ້​ບຸນຄຸນ​ຢ່າງ​ເລິກ​ເຊິ່ງ ຕໍ່​ພັກ ລັດ ​ແລະ ປະຊາຊົນ, ຕໍ່​ພີ່ນ້ອງ​ສະຫາຍ; ສະ​ແດງ​ຄວາມ​ຮູ້​ບຸນຄຸນ​ຕໍ່ບັນດາ​ແມ່​ຫວຽດນາມ​ວິລະ​ຊົນ, ບັນດາ​ວິລະ​ຊົນ​ນັກຮົບ​ຜູ້​ເສຍ​ຊີວິດ ທີ່​ໄດ້​ອົງອາດ​ກ້າຫານ​ເສຍສະຫຼະ​ຊີວິດ​ເພື່ອຄວາມ​ເປັນ​ເອກະລາດ ອິດ​ສະລະ​ພາບ​ຊອງ​ປະ​ເທດ​ຊາດ, ​ເພື່ອ​ຄວາມ​ສົມບູນ​ພູມ​ສຸກ​ຂອງ​ປະຊາຊົນ; ຮຽກຮ້ອງ​ບັນດານາຍ​ພົນ ນາຍ​ພັນ ນາຍ​ແລະ​ພົນ​ຕຳຫຼວດ ນັກຮົບ ກຳມະກອນລັດຖະກອນຕຳຫຼວດ​ປະຊາຊົນທັງ​ໝົດ ຈົ່ງສືບ​ຕໍ່​ເສີມ​ຂະຫຍາຍ​ມູນ​ເຊື້ອ​ວິລະ​ຊົນ​ອັນ​ສະຫງ່າ​ງາມ, ຈົງ​ຮັກ​ພັກດີ​ຢ່າ​ງ​ເດັດຂາດ​ຕໍ່​ພັກ ລັດ ປະ​ເທດຊາ​ດ ​ແລະ ປະຊາຊົນ; ບໍ່​ລົດ​ລະ​ໃນ​ການ​ຝຶກ​ຝົນ​ຫຼໍ່​ຫຼອມ​ຫຼັກ​ໝັ້ນ​ການ​ເມືອງ​​ໃຫ້​ໜັກ​ແໜ້ນ, ​ເພີ່ມ​ພູນ​ຄູນ​ສ້າງ​ອຸດົມ​ການ​ກອມ​ມູນິດ; ​ເຊີດ​ຊູ​ຈິດ​ໃຈ​ປະຕິວັດ, ຮັດ​ແໜ້ນ​ລະບຽບ​ວິ​ໄນ, ຜ່ານ​ຜ່າ​ຄວາມ​ຫຍຸ້ງຍາກ​ລຳບາກ, ຄຽງ​ບ່າ​ຄຽງ​ໄຫຼ່​ກັບ​ກອງທັບ​ປະຊາຊົນ, ສົມທົບ​ຢ່າງ​ແໜ້ນ​ແຟ້ນ ມີ​ປະສິດທິ​ຜົນ​ກັບ​ບັນດາ​ຂັ້ນ ຂະ​ແໜງ​ການ, ຜູກ​ພັນ​ແບບ​ເລືອ​ເນື້ອ​ກັບ​ປະຊາຊົນ, ຕັດສິນ​ໃຈ​ກໍ່ສ້າງກຳລັງຕຳຫຼວດ​ປະຊາຊົນ​ໃຫ້ປອດ​ໃສ​ຂາວ​ສະອາດ, ໝັ້ນຄົງ​ເຂັ້ມ​ແຂງ, ລະບຽບ​ຫຼວງ ຍອດ​ຍ້ຽມ ທັນ​ສະ​ໄໝ​ເທື່ອ​ລະ​ກ້າວ, ກຽມ​ຄວາມ​ພ້ອມ​ເພື່ອ​ຮັບ​ແລະສຳ​ເລັດ​ເປັນ​ຢ່າງ​ດີ ທຸກ​ໜ້າ​ທີ່​ທີ່​ໄດ້​ຮັບ​ມອບ​ໝາຍ, ສົມ​ກຽດ​ກັບ​ຄວາມ​ຮັກ​ແພງ​ໄວ້​ວາງ​ໃຈ​ຂອງ​ພັກ ລັດ ​ແລະ ປະຊາຊົນ.

​ໂດຍ​ຕາງໜ້າ​ໃຫ້​ພັກ - ລັດ, ທ່ານ​ປະທານ​ປະ​ເທດ ​ເຈືອງ​ເຕິ​ນຊາງ ​ໄດ້​ໃຫ້​ກຽດ​ປະດັບ​ຫຼຽນ​ໄຊດາວ​ຄຳ ​​ຄັ້ງ​ທີ​ສີ່ - ລາງວັນ​ອັນປະ​ເສີດ​ເລີດ​ລ້ຳ​ຂອງ​ພັກ ລັດ ​ໃຫ້​ແກ່​ຕຳຫຼວດ​ປະຊາຊົນ​ຫວຽດນາມຜູ້​ພິລະ​ອາດຫານ ທີ່​ໄດ້​ມີ​ຄຸນງາມຄວາມດີ​ອັນ​ໃຫຍ່​ຫຼວງ ດີ​ເດັ່ນ​ເປັນ​ພິ​ເສດ ທີ່​ໄດ້​ປະກອບສ່ວນ​ເຂົ້າ​ໃນ​ພາລະກິດ​ປະຕິວັດ​ຂອງ​ພັກ ​ແລະ ຂອງ​ຊາດ./.

ສັງ​ລວມ​ໂດຍ ຫງວຽນ​ດຶກ

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ