ວັນອາທິດ, 31/5/2020
ການນຳພັກ-ລັດ ຫວຽດນາມ ຕ້ອນຮັບແລະເຮັດວຽກກັບ ປະທານາທິບໍດີ ແຫ່ງ ສາທາລະນະລັດ ປະຊາຊົນ ບັງກລາເທດ
1/9/2015 14:40' ສົ່ງ ພິມ
ທ່ານເລຂາທິການໃຫຍ່ພັກກອມມູນິດຫວຽດນາມ ຫງວຽນຝູຈ້ອງ ຕ້ອນຮັບປະທານາທິບໍດີ ແຫ່ງ ສາທາລະນະລັດ ປະຊາຊົນ ບັງກລາເທດ ທ່ານອັບດູນ ຮາມິດ ທີ່ມາຢ້ຽມຢາມຫວຽດນາມຢ່າງເປັນທາງການ

* ວັນ​ທີ 10​ ສິງຫາ 2015, ພາຍຫຼັງ​ພິທີ​ຕ້ອນ​ຮັບ​ຢ່າງ​ສົມ​ກຽດ​ ທີ່​ຈັດ​ຂຶ້ນ​ຢູ່​ທຳນຽບປະທານ​ປະ​ເທດ​ທີ່ ຮ່າ​ໂນ້ຍ, ທ່ານປະທານາທິບໍດີ ອັບ​ດູ​ນ ຮາ​ມິດ ​ໄດ້​ພົບ​ປະ​ຫາລື ​ແລະ ຮ່ວມ​ງານ​ລ້ຽງ​ທີ່​ທ່ານ​ປະທານ​ປະ​ເທດ​ຫວຽດນາມ ​ເຈືອງ​ເຕິ​ນຊາງ ຈັດ​ຂຶ້ນ​ຢ່າງ​ສົມ​ກຽດ.

ຢູ່​ທີ່​ການ​ພົບ​ປະ​ຫາລື, ສອງ​ຝ່າຍ​ໄດ້​ແຈ້ງ​ໃຫ້​ກັນຊາ​ບ ກ່ຽວ​ກັບ​ສະພາບ​ການ​ການ​ເມືອງ ເສດຖະກິດ-ສັງຄົມ ຂອງ​ແຕ່ລະ​ປະ​ເທດ. ທ່ານຜູ້ນຳ​ທັງ​ສອງສະ​ແດງ​ຄວາມ​ພຶງ​ພໍ​ໃຈ​ຕໍ່​ບາດກ້າວ​ຂະຫຍາຍຕົວ​ອັນ​ດີງາມ​ ຂອງ​ສາຍ​ພົວພັນ​ມິດຕະພາບ​ອັນ​ເປັນ​ມູນ​ເຊື້ອ ​ແລະ ການຮ່ວມມືຫຼາຍ​ດ້ານ​ລະຫວ່າງ​ຫວຽດນາມ - ບັງ​ກລາ​ເທດ ໃນ 40 ກວ່າ​ປີ​ທີ່​ຜ່ານ​ມາ ນັບ​ແຕ່​ເມື່ອ​ສອງ​ປະ​ເທດ​ສ້າງ​ຕັ້ງ​ຄວາມ​ພົວພັນ​ທາງ​ການ​ທູດ (ວັນ​ທີ 11 ກຸ​ມພາ 1973).

ທ່ານ​ປະທານ​ປະ​ເທດ ​ເຈືອງ​ເຕິ​ນຊາງ ​ແລະ ທ່ານປະທານາທິບໍດີ ອັບ​ດູ​ນ ຮາ​ມິດ ​ໄດ້ເປັນ​ເອກະ​ພາບກັນ ຈະ​ຍູ້​ແຮງ​ແລະ​ເຮັດ​ໃຫ້ບັນດາ​ຂົງ​ເຂດ​ຮ່ວມ​ມືທີ່​ມີ​ຢູ່​ເລິກ​ເຊິ່ງກວ່າ​ອີກ ​ແລະ ​ເປີດ​ກວ້າງການຮ່ວມມື​ໃນ​ບັນດາ​ຂົງ​ເຂດ ​ທີ່​ສອງ​ປະ​ເທດ​ມີ​ຄວາມ​ສາມາດ​ບົ່ນຊ້ອນ; ​ເປັນ​ເອກະ​ພາບ​ຊຸກຍູ້​ການ​ພົວພັນ​ດ້ານ​ການ​ເມືອງ​ລະຫວ່າງ​ຫວຽດນາມ ​ແລະ ບັງ​ກລາ​ເທດ​ໃຫ້​ແໜ້ນ​ແຟ້ນຍິ່ງ​ຂຶ້ນ; ຢືນຢັນ​ຄວາມ​ສຳຄັນ​ຂອງ​ການ​ເພີ່ມ​ທະວີ​ການ​ຢ້ຽມຢາມ ພົບ​ປະແລກປ່ຽນ​ຂັ້ນ​ສູງ, ການ​ແລກປ່ຽນ​ຄະນະ​ຜູ້​ແທນກະຊວງ ຂະ​ແໜງ​ການ ທ້ອງ​ຖິ່ນ​ຂອງ​ສອງ​ປະ​ເທດ ​ແລະ ການ​ພົວພັນ​ສັງ​ສັນ​ປະຊາຊົນ. ບົນ​ຈິດ​ໃຈ​ດັ່ງກ່າວ​ນັ້ນ, ທ່ານປະທານາທິບໍດີ ອັບ​ດູ​ນ ຮາ​ມິດ ຊົມ​ເຊີຍ​ບັນດາ​ການ​ນຳ​ຂັ້ນ​ສູງ​ຂອງ​ຫວຽດນາມ ​ໄປ​ຢາມ​ປະ​ເທດ​ບັງ​ກລາ​ເທດ​ໃນ​ເວລາ​ທີ່​ຈະ​ມາ​ເຖິງ.

ສອງ​ຝ່າຍ​ເປັນ​ເອກະ​ພາບ​ຊຸກຍູ້​ການ​ປຶກສາ​ຫາລື ​ແລກປ່ຽນ ສົນທະນາ​ກ່ຽວ​ກັບ​ນະ​ໂຍບາຍ; ຈັດ​ຕັ້ງ​ໂດຍ​ໄວ​ການ​ປະຊຸມ​ຄັ້ງ​ທີ​ສາມ ​ຄະນະ​ກຳມະການ​ຮ່ວມ​ຫວຽດນາມ - ບັງ​ກລາ​ເທດ ກ່ຽວ​ກັບ​ເສດຖະກິດ ການ​ຄ້າ ວັດທະນະທຳ ວິທະຍາສາດ-​ເຕັກ​ໂນ​ໂລ​ຊີ ​ແລະ ການ​ປຶກສາ​ການ​ເມືອງ​ຄັ້ງ​ທີ​ໜຶ່ງ​ ລະຫວ່າງສອງກະຊວງ​ການ​ຕ່າງປະ​ເທດ ​ເພື່ອ​ທົບ​ທວນ ​ແລະ ວາງ​ທິດ​ທາງ​ການ​ຮ່ວມ​ມື​ອັນ​ລະອຽດ​ ໃນ​ຊຸມ​ປີ​ຕໍ່​ໄປ; ​ເປັນ​ເອກະ​ພາບ​ເພີ່ມ​ທະວີ​ການ​ຮ່ວມ​ມື​ໃນ​ຂົງ​ເຂດ​ປ້ອງ​ກັນ​ຄວາມ​ສະຫງົບ - ປ້ອງ​ກັນ​ປະ​ເທດ ​ໂດຍ​ຜ່ານ​ການ​ແລກປ່ຽນຄະນະ​ຜູ້​ແທນ, ​ແລກປ່ຽນ​ບົດຮຽນ​ໃນ​ການ​ເຂົ້າ​ຮ່ວມ​ການ​ເຄື່ອນ​ໄຫວ​ຮັກສາ​ສັນຕິພາບຂອງ​ສະຫະ​ປະຊາ​ຊາດ, ຮ່ວມມື​ໃນ​ການ​ກັນ​ແລະ​ຕ້ານ​ອາ​ຊະ​ຍາ​ກຳ​ຂ້າມ​ຊາດ ​ແລະ ຕ້ານ​ການ​ອົບ​ພະຍົບຜິດ​ກົດໝາຍ​ໄປ​ປະ​ເທດ​ທີ​ສາມ. ສອງ​ຝ່າຍ​ເປັນ​ເອກະ​ພາບ​ເພີ່ມ​ທະວີ​ການ​​ເຄື່ອນ​ໄຫວ​ສົ່ງ​ເສີມ​ການ​ຄ້າ ການ​ລົງທຶນ, ສົ່ງ​ເສີມ​ການ​ຮ່ວມ​ມື​ໃນ​ຂົງ​ເຂດ​ເສດຖະກິດ​ເອກະ​ຊົນ, ສູ້​ຊົນ​ຍົກ​ມູນ​ຄ່າ​ການ​ຄ້າ​ສອງ​ສົ້ນ​ຂຶ້ນ ໃຫ້ບັນລຸ 1 ຕື້​ໂດ​ລາ​ສະຫະລັດ ​ໃນ​ປີ 2016; ​ເປັນ​ເອກະ​ພາບ​ອຳນວຍ​ຄວາມ​ສະດວກ​ດີ​ທີ່​ສຸດ​ໃຫ້​ແກ່​ວິ​ສາ​ຫະກິດ​ທັງ​ສອງ​ປະ​ເທດ ​ແນ​ໃສ່​ເປີດ​ກວ້າງ​ການ​ລົງທຶນ ຜະລິດ​ທຸລະ​ກິດ​ຢູ່​ໃນ​ແຕ່ລະ​ປະ​ເທດ...

ການ​ນຳ​ທັງ​ສອງ​ເປັນ​ເອກະສັນ​ກັນ​ເພີ່ມ​ທະວີ​ການ​ຮ່ວມ​ມື, ​ແບ່ງປັນ​ບົດຮຽນ ​ແລະ ​ເຕັກນິກ​ພັດທະນາ​ກະສິກຳ-ການ​ປະມົງ​ແບບ​ຍືນ​ຍົງ; ຕັ້ງໜ້າ​ຜັນ​ຂະຫຍາຍ​ຢ່າງ​ຄົບ​ຖ້ວນ​ແລະ​ມີ​ປະສິດທິ​ຜົນ ບົດ​ບັນທຶກຄວາມ​ເຂົ້າ​ໃຈ​ວ່າ​ດ້ວຍ​ການ​ຮ່ວມ​ມື​ດ້ານ​ປະມົງ​ແລະ​ລ້ຽງສັດ ​ແລະ ບົດ​ບັນທຶກຄວາມ​ເຂົ້າ​ໃຈ​ວ່າ​ດ້ວຍການ​ຮ່ວມ​ມື​ດ້ານ​ກະສິກຳ ທີ່​ໄດ້​ລົງ​ນາມ​ໃນ​ການ​ຢ້ຽມຢາມ​ຫວຽດນາມ​ຂອງນາຍົກລັດຖະມົນຕີບັງກລາ​ເທດ ທ່ານ​ເຊັກ ຮາ​ຊີ​ນີ (ປີ 2012)...

ສອງ​ຝ່າຍຕີ​ລາຄາ​ສູງ​ການ​ຮ່ວມ​ມື ​ແລະ ສົມທົບ​ກັນ​ຢ່າງ​ແໜ້ນ​ແຟ້ນຢູ່​ບັນດາ​ເວທີ​ປາ​ໄສ​ພາກ​ພື້ນ​ແລະສາກົນ, ​ເປັນ​ຕົ້ນ​ແມ່ນ​​ໃນ​ຂອບ​ຂອງ​ສະຫະ​ປະຊາ​ຊາດ, ຂະ​ບວນການ​ບໍ່​ເຂົ້າ​ຮ່ວມ​ມກຸ່ມ, ການ​ຮ່ວມ​ມື​ໃຕ້ - ​ໃຕ້, ​ເວທີ​ປະ​ໄສ​ພາກ​ພື້ນ​ອາ​ຊຽນ (ARF)… ບັນດາ​ການ​ຮ່ວມ​ມື​ພາກ​ພື້ນ ​ແລະ ອະນຸ​ພາກ​ພື້ນ.

ສອງ​ຝ່າຍຢືນຢັນ​ສະໜັບສະໜູນ​ເຊິ່ງກັນ​ແລະ​ກັນ, ສົມທົບ​ກັນ​ສະ​ເໜີ​ຂໍ້​ຄິດ​ປະດິດ​ຮ່ວມ​ໃນ​ບັນດາ​ບັນຫາ​ທີ່​ທັງ​ສອງ​ຝ່າຍ​ມີ​ຄວາມ​ສົນ​ໃຈ​ເຊັ່ນ ການ​ພັດທະນາ​ແບບ​ຍືນ​ຍົງ, ການ​ຮັບ​ມື​ກັບ​ໄພ​ທຳ​ມະ​ຊາດ, ຄວາມສະຫງົບ​ດ້ານ​ແຫຼ່ງນ້ຳ, ຄວາ​ງສະຫງົບ​ດ້ານ​ສະບຽງ​ອາຫານ ​ແລະ ຄວາ​ງສະຫງົບ​ດ້ານພະລັງງານ.

ການ​ນຳ​ທັງ​ສອງຢືນຢັນ​ເພີ່ມ​ທະວີ​ການ​ປຶກສາ​ຫາລື, ຊຸກຍູ້​ຄວາມ​ເຫັນ​ດີ​ເຫັນ​ພ້ອມ​ໃນ​ກຸ່ມ​ອາຊີ​ກ່ຽວ​ກັບ​ບັນດາ​ບັນຫາທີ່​ສອດຄ່ອງ​ກັບ​ຄວາມ​ເອົາ​ໃຈ​ໃສ່ ​ແລະ ຜົນ​ປະ​ໂຫຍ​ດຂອງ​ອາຊີ... ສອງ​ຝ່າຍ​ເນັ້ນ​ເຖິງ​ຄວາມ​ສຳຄັນ​ຂອງ​ການ​ຮັກສາ​ສັນຕິພາບ ສະຖຽນ​ລະ​ພາບ ​ແລະ ​ເຄົາລົບ​ຖັບ​ຖື​ບັນດາ​ຫຼັກການ​ອັນ​ພື້ນຖານຂອງກົດໝາຍ​ສາກົນທີ່​ໄດ້​ຮັບ​ຄວາມ​ຮັບ​ຮູ້ ​ເພື່ອ​ແກ້​ໄຂ​ຂໍ້​ພິພາດ​ຕ່າງໆ​ທຸກ​ຢ່າງ​ໂດຍ​ສັນຕິ​ວິທີ ​ແນ​ໃສ່​ຮັບປະກັນ​ຄວາມ​ປອດ​ໄພ ​ແລະ ​ເສລີພາບ​ໃນ​ການ​ເດີນ​ທະ​ເລ.

ສອງ​ຝ່າຍສະ​ແດງ​ຄວາມພຶງ​ພໍ​ໃຈກ່ຽວ​ກັບ​ການ​ແລກປ່ຽນ​ຢ່າງ​ຈິງ​ໃຈ ກົງ​ໄປ​ກົງ​ມາ ບົນ​ຈິດ​ໃຈ​ເຂົ້າ​ໃຈ​ເຊິ່ງກັນ​ແລະ​ກັນ ກໍ່​ຄືບັນດາ​ຜົນສຳ​ເລັດ​ອັນ​ສຳຄັນ​ທີ່​ບັນລຸ​ໄດ້​ໃນ​ການ​ຢ້ຽມຢາມ; ປະກອບສ່ວນ​ເຂົ້າ​ໃນ​ການ​ສືບ​ຕໍ່​ຊຸກຍູ້ຄວາມ​ພົວພັນ​ອັນ​ດີງາມ​ລະຫວ່າງ​ສອງ​ປະ​ເທດ​ໃນ​ເວລາ​ຕໍ່ໜ້າ.

* ຕອນ​ບ່າຍ​ຂອງວັນ​ທີ 10 ສິງຫາ 2015, ຢູ່​ທີ່​ສຳນັກງານ​ສູນ​ກາງ​ພັກກອມ​ມູນິດ​ຫວຽດນາມ, ທ່ານ​ເລຂາທິການ​ໃຫຍ່ ຫງວຽນ​ຝູຈ້ອງ ​ໄດ້​ຕ້ອນຮັບ​ຢ່າງ​ສະໜິດສະໜົມ ທ່ານອັບ​ດູ​ນ ຮາ​ມິດ ປະທານາທິບໍດີ ​ແຫ່ງ​ສາທາລະນະ​ລັດ ປະຊາຊົນ ບັງ​ກລາ​ເທດ, ທີ່​ພວມ​ມີ​ການ​ຢ້ຽມຢາມ​ຂັ້ນ​ລັດ​ຢູ່​ຫວຽດນາມ.

ທ່ານ​ເລຂາທິການ​ໃຫຍ່ ຫງວຽນ​ຝູຈ້ອງ ຊົມ​ເຊີຍ​ຜົນສຳ​ເລັດ​ຂອງ​ການ​ພົບ​ປະ​ສົນທະນາ ພົບ​ປະ​ຫາລື ລະຫວ່າງ​ທ່ານ​ປະທານາທິບໍດີ ກັບ​ທ່ານ​ປະທານ​ປະ​ເທດ ​ເຈືອງ​ເຕິ​ຍຊາງ ​ແລະ ບັນດາ​ການ​ນຳ​ຂັ້ນ​ສູງ​ຂອງຫວຽດນາມ; ທ່ານ​ເລຂາທິການ​ໃຫຍ່ຢືນຢັນ​ແນວທາງ​ການ​ຕ່າງປະ​ເທດ​ທີ່​ສະ​ເໝີ​ຕົ້ນ​ສະ​ເໝີ​ປາຍ​ຂອງ​ພັກ ​ແລະ ລັດ​ຫວຽດນາມ, ຍາມ​ໃດ​ກໍ່​ໃຫ້​ຄວາມ​ສຳຄັນ​ແກ່​ການ​ຮ່ວມ​ມື​ກັບ​ບັນດາ​ປະ​ເທດ​ເພື່ອນ​ມິດ​ທີ່​ເປັນ​ມູນ​ເຊື້ອ, ​ໃນ​ນັ້ນ​ມີ​ປະ​ເທດ​ບັງ​ກລາ​ເທດ.

ທ່ານ​ເລຂາທິການ​ໃຫຍ່ສະ​ແດງ​ຄວາມ​ປະສົງ​ໃຫ້​ສອງ​ປະ​ເທດ​ເພີ່ມ​ທະວີ​ກວ່າ​ອີກ​ການ​ພົວພັນ​ລະຫວ່າງ​ສອງ​ພັກ​ກຳ​ອຳນາດ, ສອງ​ສະພາ​ແຫ່ງ​ຊາດ ​ແລະ ການ​ພົວພັນ​ສັງ​ສັນ​ລະຫວ່າງ​ປະຊາຊົນ​ສອງ​ປະ​ເທດ, ພ້ອມກັນ​ນັ້ນກໍ່​ເພີ່ມ​ທະວີ​ການ​ຮ່ວມ​ມື​ໃນ​ບັນດາ​ຂົງ​ເຂດ​ເຊັ່ນ ການ​ປ້ອງ​ກັນ​ຄວາມ​ສະຫງົບ ປ້ອງ​ກັນຊາ​ດ, ​ເສດຖະກິດ ການ​ຄ້າ ການ​ລົງທຶນ, ວິທະຍາສາດ​ເຕັກນິກ, ວັດທະນະທຳ ​ແລະ ທ່ອງ​ທ່ຽວ.

ທ່ານ​ເລຂາທິການ​ໃຫຍ່ກໍ່​ສະ​ເໜີ​ໃຫ້​ສອງ​ຝ່າຍ​ເພີ່ມ​ທະວີ​ການ​ສະໜັບສະໜູນ​ເຊິ່ງກັນ​ແລະ​ກັນ ​ໃນ​ບັນດາ​ເວ​ທີ​ປາ​ໄສ​ສາກົນ ​ແລະ ພາກ​ພື້ນ; ສະ​ແດງ​ຄວາມ​ຫວັງ​ວ່າ ພາຍຫຼັງ​ການ​ຢ້ຽມຢາມ​ຫວຽດນາມ​ຄັ້ງ​ນີ້​ຂອງ​ທ່ານ​ປະທານາທິບໍດີ ການ​ພົວພັນ​ມິດຕະພາບ ການ​ຮ່ວມ​ມື​ລະຫວ່າງ​ສອງ​ປະ​ເທດ​ຫວຽດນາມ ​ແລະ ບັງ​ກລາ​ເທດ ຈະ​ມີ​ບາກ​ກ້າວ​ຂະຫຍາຍຕົວ​ໃໝ່, ​ແທດ​ຈິງ ​ແລະ ມີ​ປະສິດທິ​ຜົນກວ່າອີກ, ​ເພື່ອ​ຜົນ​ປະ​ໂຫຍ​ດຂອງ​ປະຊາຊົນ​ສອງ​ປະ​ເທດ, ​ເພື່ອ​ສັນຕິພາບ ສະຖຽນ​ລະ​ພາບ ການ​ຮ່ວມ​ມື ​ແລະ ຄວາມ​ພັດທະນາ​ຢູ່​ພາກ​ພື້ນ ​ແລະ ​ໃນ​ໂລກ...

ທ່ານປະທານາທິບໍດີ ອັບ​ດູ​ນ ຮາ​ມິດ ສະ​ແດງ​ຄວາມ​ນິຍົມ​ນັບຖື​ຕໍ່​ບັນດາ​ຜົນສຳ​ເລັດ​ອັນ​ໃຫຍ່​ຫຼວງ​ໃນ​ການ​ພັດທະນາ​ເສດຖະກິດ - ສັງຄົມ​ຂອງ​ຫວຽດນາມ; ຕີ​ລາຄາ​ສູງ​ບົດບາດ​ທີ່​ຕັ້ງ​ຂອງ​ຫວຽດນາມ​ຢູ່​ໃນ​ພາກ​ພື້ນ; ຢືນຢັນ​ຄວາມ​ປະສົງ​ຊຸກຍູ້​ສາຍ​ພົວພັນ​ມິດຕະພາບ ​ແລະ ການ​ຮ່ວມ​ມື​ກັບ​ຫວຽດນາມ​ໃນ​ຫຼາຍ​ຂົງ​ເຂດ. ທ່ານ​ປະທານາທິບໍດີ​ເນັ້ນ​ເຖິງ​ຄວາມຈຳ​ເປັນ​ ຂອງ​ການ​ເພີ່ມ​ທະວິ​ຄວາມ​ສະໜັບສະໜູນ​ເຊິ່ງກັນ​ແລະ​ກັນ ​ໃນ​ບັນດາ​ເວທີ​ປາ​ໄສ​ພາກ​ພື້ນ ສາກົນ ​ແລະ ຢູ່​ທີ່​ສະຫະ​ປະຊາ​ຊາດ; ສະ​ແດງ​ຄວາມ​ພ້ອມ​ທີ່​ຈະ​ແບ່ງປັນ​ບົດຮຽນ​ກັບ​ຫວຽດນາມ ກ່ຽວ​ກັບ​ການ​ເຂົ້າ​ຮ່ວມ​ບັນດາ​ການ​ເຄື່ອນ​ໄຫວ​ຮັກສາ​ສັນຕິພາບ​ ຂອງ​ສະຫະ​ປະຊາ​ຊາດ...

* ​ໃນຕອນ​ບ່າຍດຽວ​ກັນ ຂອງວັນ​ທີ 10 ສິງຫາ, ຢູ່​ທີ່ທຳນຽບລັດຖະບານ, ທ່ານ​ນາຍົກລັດຖະມົນຕີ ຫງວຽນ​ເຕິ​ນຢຸງ ​ໄດ້​ພົບ​ປະ​ສົນທະນາ​ກັບ​ປະທານາທິບໍດີບັງ​ກລາ​ເທດ ທ່ານອັບ​ດູ​ນ ຮາ​ມິດ.

​ໃນ​ການ​ພົບ​ປະ, ທ່ານ​ນາຍົກລັດຖະມົນຕີ ຫງວຽນ​ເຕິ​ນຢຸງ ຢືນຢັນ: “ການ​ຢ້ຽມຢາມ​ຫວຽດນາມ​ສຳ​ເລັດ​ຜົນ​ຢ່າງ​ຈົບງາມ​ຂອງ​ທ່ານ​ປະທານາທິບໍດີ ຈະ​ເປັນ​ຫຼັກ​ໝາຍ​ອັນ​ສຳຄັນ​ ທີ່ພາ​ໃຫ້ຄວາມ​ພົວພັນ​ມິດຕະພາບອັນ​ເປັນ​ມູນ​ເຊື້ອ​ຫວຽດນາມ - ບັງ​ກລາ​ເທດ ຂຶ້ນ​ສູ່​ລະດັບ​ໃໝ່, ຮອບດ້ນ, ນຳ​ເອົາ​ຜົນ​ປະ​ໂຫຍດຕົວ​ຈິງ​ມາ​ໃຫ້ການ​ພັດທະນາ​ຮ່ວມ​ຂອງ​ສອງ​ປະ​ເທດ, ສອງ​ຊາດ”...

ທ່ານ​ນາຍົກລັດຖະມົນຕີ ຫງວຽນ​ເຕິ​ນຢຸງ ​ແລະ ທ່ານປະທານາທິບໍດີ ອັບ​ດູ​ນ ຮາ​ມິດ ​ໄດ້​ພ້ອມ​ກັນ​ແລກປ່ຽນ​ກ່ຽວ​ກັບ​ບັນດາ​ທິດ​ທາງ​ໃຫຍ່ ​ແລະ ບັນດາ​ມາດ​ຕະການ​ອັນ​ລະອຽດ ​ເພື່ອຍູ້​ແຮງ​ການ​ພົວພັນ​ຮ່ວມ​ມື​ທະວິ​ພາຄີ​ໃນ​ເວລາ​ຕໍ່ໜ້າ. ສອງ​ຝ່າ​ຍ​ເປັນ​ເອກະ​ພາບ​ສູ້​ຊົນ​ຍົກ​ສູງ​ມູນ​ຄ່າ​ການ​ຄ້າ​ສອງ​ສົ້ນ​ຂຶ້ນ ຈາກ​ລະດັບ 800 ລ້ານ​ໂດ​ລາ​ສະຫະລັດ ປີ 2014 ຂຶ້ນ​ເປັນ 1 ຕື້​ໂດ​ລາ​ສະຫະລັດ ​ໃນ​ປີ 2016...

ສອງ​ຝ່າຍ​ກໍ່​ໄດ້​ເປັນ​ເອກະ​ພາບ​ຜັນ​ຂະຫຍາຍປະຕິບັດ​ຢ່າ​ງມີ​ປະສິດທິ​ຜົນ ບົດ​ບັນທຶກ​ຄວາມ​ເຂົ້າ​ໃຈ​ວ່າ​ດ້ວຍ​ການ​ຮ່ວມ​ມື​ດ້ານ​ກະສິກຳ ການ​ປະມົງ ​ແລະ ລ້ຽງສັດ; ບົດ​ບັນທຶກ​ຄວາມ​ເຂົ້າ​ໃຈ​ວ່າ​ດ້ວຍການ​ຄ້າຂາຍ​ເຂົ້າ; ​ໃຫ້​ລົງ​ລາຍ​ເຊັນ​ໂດຍ​ໄວ​ ໃນ​ຄວາມ​ຕົກລົງ​ວ່າ​ດ້ວຍ​ການ​ຮ່ວມ​ມື​ດ້ານ​ການທ່ອງທ່ຽວ ​ແລະ ​ໂຄງການ​ແລກປ່ຽນ​ວັດທະນະທຳ​ ລະຫວ່າງ​ສອງ​ປະ​ເທດ; ອຳນວຍ​ຄວາມ​ສະດວກ​ໃຫ້​ແກ່​ການ​ເຄື່ອນ​ໄຫວທ່ອງ​ທ່ຽວ ​ແລະ ຄົບ​ຄ້າ​ສະມາຄົມ​ລະຫວ່າງ​ປະຊາຊົນ ​ແລະ ວິ​ສາ​ຫະກິດ​ຂອງ​ສອງ​ປະ​ເທດ...

ທ່ານປະທານາທິບໍດີ ອັບ​ດູ​ນ ຮາ​ມິດ ​ແບ່ງປັນ​ກັບຄວາມ​ເປັນ​ຫ່ວງ​ດປັນ​ໄຍອັນ​ເລິກ​ເຊິ່ງ ຂອງ​ຫວຽດນາມ ​ແລະ ອາ​ຊຽນ ຕໍ່​ໜ້າ​ເຫດການ​ຜັນປ່ຽນ​ໃນ​ມໍ່ໆ​ນີ້​ຢູ່​ທະ​ເລ​ຕາ​ເວັນ​ອອກ; ຢືນຢັນ​ຄວາມ​ສຳຄັນ​ຂອງ​ການ​ຮັບປະກັນ​ສັນຕິພາບ ສະຖຽນ​ລະ​ພາບ ຄວາມ​ສະຫງົບ​ປອດ​ໄພ ​ແລະ ​ເສລີພາບ​ໃນ​ການ​ເດີນ​ເຮືອ ​ເດີນ​ອາກາດ ຢູ່​ທະ​ເລ​ຕາ​ເວັນ​ອອກ ກໍ່​ຄື​ການ​ແກ້​ໄຂ​ຄວາມ​ພິພາດ​ໃນ​ທະ​ເລ​ໂດ​ງອິງ​ໃສ່​ກົດໝາຍ​ສາກົນ, ​ໃນ​ນັ້ນ​ມີອະນຸສັນຍາສະ­ຫະປະ­ຊາຊາດວ່າດ້ວຍກົດ­ໝາຍທະ­ເລປີ 1982.

ທ່ານປະທານາທິບໍດີ ອັບ​ດູ​ນ ຮາ​ມິດ ກໍ່​ໄດ້​ເນັ້ນ​ເຖິງ​ຄວາມ​ຈຳ​ເປັນ​ຂອງ​ການ​ທີ່ ​ບັນດາຝ່າຍ​ກ່ຽວຂ້ອງ ​ຕ້ອງ​ປະຕິບັດ​ ຖະ­ແຫຼງ­ການກ່ຽວກັບວິ­ທີປະ­ພຶດຂອງບັນ­ດາຝ່າຍຢູ່ທະ­ເລຕາ­ເວັນອອກ (DOC) ຢ່າງ​ຄົບ​ຖ້ວນ, ກ້າວ​ໄປ​ເຖິງ​ການ​ສ້າງປະມວນຂໍ້ກຳ­ນົດກ່ຽວກັບວິ­ທີປະ­ພຶດຢູ່ທະ­ເລຕາ­ເວັນອອກ (COC) ຂຶ້ນ.

ທ່ານປະທານາທິບໍດີ ອັບ​ດູ​ນ ຮາ​ມິດ ​ເວົ້າ​ວ່າ: “ບັງ​ກລາ​ເທດ​ໃຫ້​ຄວາມ​ສຳຄັນ​ຕໍ່​ການ​ຮັກສາ​ສັນຕິພາບ ​ແລະ ສະຖຽນ​ລະ​ພາບ. ​ໃຫ້​ທັດສະນະ​ວ່າ ຄວາມ​ພິພາດ​ຕ່າງໆ​ຕ້ອງ​ໄດ້​ແກ້​ໄຂ​ໂດຍ​ຜ່ານ​ການ​ເຈລະຈາ​ສັນຕິພາບ”, “ປະຊາຊົນ​ບັງ​ກລາ​ເທດ​ເຄົາລົບ​ນັບ​ຖີຫວຽດນາມ ​ແລະ ທ່ານ​ປະທານ​ໂຮ່ຈີ​ມິນ​ທີ່​ສຸດ. ພວກ​ຂ້າພະ​ເຈົ້າ​ຊອກ​ຫາ​ໄດ້​ແຮງ​ບັນດານ​ໃຈ​ໃຫ້​ແກ່​ເສັ້ນທາງ​ປົດ​ປ່ອຍປະ​ເທດ​​ຂອງ​ຕົນ ຈາກ​ການ​ຕໍ່ສູ້​ຍາດ​ເອກະລາດ​ຂອງ​ພວກ​ເພື່ອນ”,...

* ໃນຕອນ​ບ່າຍຂອງ​ວັນດຽວ​ກັນ, ຢູ່​ທີ່​ຫໍ​ສະພາ​ແຫ່ງ​ຊາດ, ທ່ານ​ປະທານ​ສະພາ​ແຫ່ງ​ຊາດ ຫງວຽນ​ຊິງ​ຮຸ່ງ ​ໄດ້​ຕ້ອນຮັບ​ທ່ານອັບ​ດູ​ນ ຮາ​ມິດ ປະທານາທິບໍດີບັງ​ກລາ​ເທດ ຢ່າ​ງສະໜິດສະໜົມ.

* ກອ່ນນັ້ນ, ທ່ານປະທານາທິບໍດີ ອັບ​ດູ​ນ ຮາ​ມິດ ​ໄດ້​ໄປ​ໄຫວ້​ອາ​ໄລ​ທີ່​ອະນຸສາວະລີ​ຫໍ​ສົບ​ທ່ານປະທານ​ໂຮ່ຈີ​ມິນ ​ແລະ ວາງພວງມາລາ​ທີ່​ອະນຸສາວະລີ​ບັນດາ​ວິລະ​ຊົນ​ຜູ້​ເສຍ​ຊີວິດ ຢູ່​ຮ່າ​ໂນ້ຍ. ​ໃນ​ຂອບ​ການ​ຢ້ຽມຢາມ, ທ່ານປະທານາທິບໍດີ ອັບ​ດູ​ນ ຮາ​ມິດ ກໍ່​ໄດ້​ໄປ​ຢາມ​ອ່າວ​ຫ້າ​ລອງ - ​ມໍລະ​ດົກທຳ​ມະ​ຊາດ​ໂລກ ຂອງ​ຫວຽດນາມ ​ແລະ ​ໄປ​ຢາມນະຄອນ​ໂຮ່ຈີ​ມິນ.

​ເມື່ອ​ງ​ໃນ​ໂອກາດ​ການ​ຢ້ຽມຢາມ​ຂັ້ນ​ລັດ​ທີ່​ຫວຽດນາມ ຂອງ​ປະທານາທິບໍດີ ​ແຫ່ງ ສາທາລະນະ​ລັດ ປະຊາຊົນ ບັງ​ກລາ​ເທດ ທ່ານອັບ​ດູ​ນ ຮາ​ມິດ ​ແລະ ພັນ​ລະ​ຍາ, ສອງ​ປະ​ເທດ​ຫວຽດນາມ ​ແລະ ບັງ​ກລາ​ເທດ ​ໄດ້ອອກ​ຖະ​ແຫຼ​ງການ​ຮ່ວ​ມ./.

ສັງ​ລວ​ມ​ໂດຍ ​ແຂງ​ງວຽນ

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ