ວັນອາທິດ, 31/5/2020
ຫວຽດນນາມ - ມາເລເຊຍ ຍົກລະດັບການພົວພັນຮ່ວມມື ຂຶ້ນເປັນການພົວພັນຄູ່ຮ່ວມມືຍຸດທະສາດ
5/9/2015 21:23' ສົ່ງ ພິມ
ທ່ານນາຍົກລັດຖະມົນຕີມາເລເຊຍ ນາຈິກ ຣາຊັກ ຕ້ອນຮັບທ່ານນາຍົກລັດຖະມົນຕີ ຫງວຽນເຕິນຢຸງ. (ພາບ: VGP)

ໂດຍ​ຕອບ​ສະ­ໜອງ​ຄຳ​ເຊີນ​ຂອງ​ທ່ານ ນາ​ຈິກ ​ຣາຊັກ ນາ­ຍົກ­ລັດ­ຖະ­ມົນ­ຕີມາ​ເລ​ເຊຍ, ທ່ານ​ນາຍົກ​ລັດຖະມົນ­ຕີ ສສ ຫວຽດ­ນາມ ຫງວ​ຽນ​ເຕິນ​ຢຸງ ແລະ ພັນ​ລະ​ນາ ພ້ອມ​ດ້ວຍ​ຄະ­ນະ​ຜູ້​ແທນ​​ຫວຽດ­ນາມ​ ​ໄດ້ໄປ​ຢ້ຽມ­ຢາມ​ປະ­ເທດ ມາ​ເລ​ເຊຍ ຢ່າງ​ເປັນ​ທາງ​ການ.

ຍົກ​ລະ­ດັບ​ການ​ພົວ­ພັນ​ຮ່ວມ​ມື ຫວຽດ­ນາມ - ມາ​ເລ​ເຊຍ

ວັນ​ທີ 7 ສິງຫາ 2015, ໃນ​ການ​ພົບ​ປະ​ຫາລືກັບ ທ່ານ​ນາ­ຍົກ­ລັດ­ຖະ­ມົນ­ຕີ ນາ​ຈິກ ຣາຊັກ, ທ່ານ​ນາຍົກ​ລັດ­ຖະ­ມົນ­ຕີ ຫງວ​ຽນ​ເຕິນ​ຢຸງ ​ໄດ້​ສະ​ແດງ​ຄວາມ​ຊົມ­ເຊີຍ​ຢ່າງ​ສຸດ​ໃຈຕໍ່​ບັນ­ດາ​ຜົນ­ງານ​ອັນ​ສຳ­ຄັນ​ທີ່ ມາ​ເລ​ເຊຍ ບັນ­ລຸ​ໄດ້​ໃນ​ພາ­ລະ­ກິດ​ກໍ່ສ້າງ​ປະ­ເທດ; ພ້ອມກັນ​ນັ້ນ​ ກໍ່​ຕີ​ລາ­ຄາ​ສູງຕໍ່​ບັນ­ດາ​ການ​ປະ­ກອບ­ສ່ວນອັນ​ຕັ້ງ­ໜ້າ​ຂອງ ມາ​ເລ​ເຊຍ ​ໃນ​ຖາ­ນະ​ເປັນ ປະ­ທານອາ​ຊຽນ ໃນ​ປີ 2015 ແລະ ​ເປັນກຳ­ມະ­ການ​ບໍ່​ຖາ­ວອນຂອງຄະນະ​ມົນຕີ​ຄວາມ​ໝັ້ນຄົງ ​ແຫ່ງສະ­ຫະ​ປະ­ຊາ​ຊາດ ສະ­ໄໝ 2015 – 2016.

ສ່ວນ​ຕົນ​ເອງ, ທ່ານ​ນາ­ຍົກ­ລັດ­ຖະ­ມົນ­ຕີ ນາ​ຈິກ​ ຣາຊັກ ກໍ່​ໄດ້​ໃຫ້​ຄຳ​ຊົມ­ເຊີຍ​ຕໍ່​ບັນ­ດາ​ຜົນ­ສຳ­ເລັດ​ອັນ​ຮອບດ້ານ​ທີ່ຫວຽດ­ນາມ​ບັນ­ລຸ​ໄດ້​ ໃນ​ຂົງ​ເຂດ​ຕ່າງໆ, ພິ­ເສດ​ແມ່ນ​ໃນ​ສະ­ພາບ​ການ​ເສດ­ຖະ­ກິດ​ໂລກ​ມີ​ຄວາມ​ຊຸດ­ໂຊມ​ລົງ ແຕ່ປະ­ເທດ​ຫວຽດ­ນາມ ກໍ່ຍັງ​​ຮັກ­ສາ​ໄດ້​ທ່ວງທ່າ​ເຕີບ​ໂຕ​ເສດ­ຖະ­ກິດ, ໃນ​ນັ້ນ, ປີ 2015 ຄາດ​ວ່າ​ຈະ​ບັນ­ລຸ​ໄດ້ 6,5%.

ທ່ານ​ນາ­ຍົກ­ລັດ­ຖະ­ມົນ­ຕີ ນາ​ຈິກ​ ຣາ​ຊັກ ​ໄດ້​ຢືນ­ຢັນວ່າ ມາ​ເລ​ເຊຍ ​ໃຫ້​ຄວາມ​ສຳ­ຄັນຕໍ່ການ​ຮ່ວມ​ມື​ກັບ ຫວຽດ­ນາມ​ໃນຂົງ​ເຂດ​ຕ່າງໆ, ພິ­ເສດ​ແມ່ນ​ໃນ​ຂົງ​ເຂດເສດ­ຖະ­ກິດ ການ​ຄ້າ ການ​ລົງ­ທຶນ ­ທ່ອງ­ທ່ຽວ ການ​ສຶກ​ສາ ແຮງ​ງານ ການ​ປ້ອງ​ກັນ​ຊາດ-ປ້ອງ​ກັນ​ຄວາມ​ສະ­ຫງົບ,...

ຢູ່​ທີ່​ການ​ພົບ​ປະ​ຫາລື, ນາ­ຍົກ­ລັດ­ຖະ­ມົນ­ຕີ​ທັງ​ສອງ​​ໄດ້​ມີ​ການປຶກສາ​ຫາລື ແລະ ຕີ​ລາ­ຄາ​ສູງ ​ຄວາມຂະຫຍາຍ­ຕົວ​ທັງ​ລວງ​ກວ້າງແລະລວງ​ເລິກ ຂອງ​ສາຍ​ພົວ­ພັນ​ທະ­ວິ​ພາ­ຄີ ແລະ ເຫັນ​ດີ​ເປັນ​ເອ­ກະ​ພາບ​ຈະ​ເພີ່ມ​ທະ­ວີ​ການ​ຮ່ວມ​ມື​ຮອບ­ດ້ານລະຫວ່າງ​ສອງ​ປະ​ເດ​​ໃຫ້​ມີ​ການ​ຂະ­ຫຍາຍ­ຕົວ​ນັບ​ມື້​ນັບ​ກວ້າງ­ຂວາງ​ເລິກ­ເຊິ່ງ ແລະ ເໝາະ​ສົມ​ກັບ​ຄຸນ​ທາດ​ຍຸດ​ທະ​ສາດ​ທີ່ນັບ​ມື້​ນັບ​ເພີ່ມ​ຂຶ້ນ​ ຂອງ​ການ​ພົວ­ພັນ​ລະ­ຫວ່າງ​ສອງ​ປະ­ເທດ.

ທາງ​ດ້ານ​ການ­ເມືອງ, ສອງ​ຝ່າຍ​ໄດ້ເຫັນ​ດີ​ເປັນ​ເອ­ກະ​ພາບ​ຈະ​ເພີ່ມ​ທະ­ວີ​ການ​ແລກ­ປ່ຽນ​ຄະ­ນະ​ຜູ້​ແທນ​ຂັ້ນ​ສູງ, ເປີດ​ກວ້າງ​ການ​ຮ່ວມ​ມື​ໃນ​ບັນ­ດາ​ຊ່ອງ​ສາຍ​ສະ­ພາ​​ແຫ່ງ​ຊາດ, ພັກ ແລະ ເພີ່ມ​ທະ­ວີ​ການເຄື່ອນ​ໄຫວ​ພົບ​ປະ​ແລກ­ປ່ຽນ​ລະ­ຫວ່າງ​ປະ­ຊາ­ຊົນ; ເຫັນ​ດີ​ເປັນ​ເອ­ກະ​ພາບ​ຍົກ​ລະ­ດັບ​ການ​ພົວ­ພັນ​ມິດ­ຕະ­ພາບ ແລະ ຮ່ວມ​ມື​ຮອບ­ດ້ານ​ລະ­ຫວ່າງ ຫວຽດ­ນາມ - ມາ​ເລ​ເຊຍ ຂຶ້ນ​ເປັນ​ຄູ່​ຮ່ວມ​ມື​ຍຸດ​ທະ​ສາດ ແລະ ກໍ່­ສ້າງ​ໂຄງ­ການ​ປະ­ຕິ­ບັດ​ງານໄລ­ຍະ 2015 – 2018 ຂຶ້ນ​ໂດຍ​ໄວ ແນ­ໃສ່​ຜັນ​ຂະ­ຫຍາຍປະຕິບັດ​ບັນ­ດາ​ເນື້ອ​ໃນ​ກ່ຽວ​ກັບ​ການ​ພົວ­ພັນ​ຄູ່​ຮ່ວມ​ມື​ຍຸດ​ທະ​ສາດ.

ທາງດ້ານປ້ອງກັນຊາດ ແລະ ປ້ອງກັນຄວາມສະຫງົບ, ສອງຝ່າຍໄດ້ເຫັນດີເປັນເອກະພາບສ້າງກັນໄກສົນທານາກ່ຽວກັບການປ້ອງກັນຊາດຂັ້ນລັດຖະມົນຕີຊ່ວຍວ່າການຂຶ້ນໂດຍໄວ; ລົງລາຍເຊັນບົດບັນທຶກຄວາມຈຳກ່ຽວກັບກົນໄກລາດຕະເວນຮ່ວມກັນ, ມີການຕິດຕໍ່ໂດຍຜ່ານໂທລະສັບສາຍດ່ວນ; ປະສານສົມທົບໃນການຊອບຫາກູ້ໄພກູ້ຊີບ, ຕ້ານໂຈນສະຫຼັດ. ສອງຝ່າຍຢືນຢັນຈະສືບຕໍ່ປະຕິບັດຄຳໝັ້ນສັນຍາ ບໍ່ອະນຸຍາດໃຫ້ບຸກຄົນ ຫຼືການຈັດຕັ້ງໃດໃຊ້ດິນແດນຂອງຝ່າຍໜຶ່ງ ເພື່ອດຳເນີນການຕໍ່ຕ້ານລັດຖະບານຂອງອີກຝ່າຍໜຶ່ງ.

ທາງ​ດ້ານ​ເສດ­ຖະ­ກິດ, ສອງ​ຝ່າຍ​ໄດ້​ເປັນ​ເອ­ກະ​ພາບ​ກັນ​ວ່າ ການ​ຮ່ວມ​ມື​ທາງ​ດ້ານ​ເສດ­ຖະ­ກິດ - ການ​ຄ້າ​ພວມ​ເປັນ​ຈຸດ​ສະ­ຫວ່າງ​​ໃນ​ການ​ພົວ­ພັນ​ສອງ​ປະ­ເທດ (ມາ​ເລ​ເຊຍ ເປັນ​ຄູ່​ຮ່ວມ​ມື​ດ້ານ​ການ​ຄ້າ​ອັນ​ດັບ​ໜຶ່ງ ແລະ ເປັນ​ນັກ​ລົງ­ທຶນ​ໃຫຍ່​ທີ​ແປດ​ຂອງຫວຽດ­ນາມ). ເພື່ອ​ເປີດ​ກວ້າງ​ການ​ຮ່ວມ​ມື​ກວ່າ​ອີກ, ສອງ​ຝ່າຍ​​ເປັນ​ເອ­ກະ­ສັນກັນ​ຊຸກ­ຍູ້​ການ​ເຕີບ​ໂຕ​ດ້ານ​ການ​ຄ້າ​ໃນ​ຂອບ​ສັນ­ຍາ​ຄູ່​ຮ່ວມ​ມື​ຂ້າມ​ປາ​ຊີ​ຟິກ (TPP) ແລະ ປະ­ຊາ​ຄົມ​ເສດ­ຖະ­ກິດອາ​ຊຽນ, ເຊັນ​ບັນ­ທຶກ​ຄວາມ​ຈຳ​ຂັ້ນ​ລັດ­ຖະ­ບານ​ກ່ຽວ​ກັບ​ການ​ຄ້າ​ໄລ­ຍະ 2015-2020 ​ໂດຍ​ໄວ ແນ­ໃສ່​ພັດ­ທະ­ນາ​ຂົງ​ເຂດ​ນີ້​ໃຫ້​ຍືນ​ຍົງ. ສອງ​ຝ່າຍ​ກໍ່​ໄດ້​ເປັນເອ­ກະ­ສັນ​ກັນ​ຊຸກ­ຍູ້​ບັນ­ດາ​ໂຄງ­ການ​ລົງ­ທຶນໃນຂົງ​ເຂດ​ຕ່າງ​ໆ ທີ່​ເປັນ​ຂໍ​ກຸນ­ແຈ​ຄື: ນ້ຳມັນອາຍແກັສ, ອາຍແກັສ​​ແຫຼວ, ເອ​ເລັກ​ໂຕຣ​ນິກ, ເຄື່ອງ­ໃຊ້​ສອຍໃນ​ຄອບ­ຄົວ, ປຸງ​ແຕ່ງ­ອາ­ຫານ ແລະ ອື່ນໆ

 ສອງ​ຝ່າຍ​ໄດ້​ເປັນ​ເອ­ກະ­ສັນ​ກັນເພີ່ມ​ທະ­ວີ​ການ​ຮ່ວມ​ມື​ຢ່າງ​ມີ​ປະ​ສິດ­ທິ​ຜົນ​ໃນ​ບັນ­ດາ​ຂົງ​ເຂດ​ຮ່ວ​ມື​ພັດ­ທະ­ນາ​ອື່ນ​ຄື: ດ້ານ​ແຮງ​ງານ ກະ­ສິກຳ ກົດ­ໝາຍ ນ້ຳ­ມັນ​ອາຍແກັສ,...; ຕົກ­ລົງ​ເປັນ​ເອ­ກະ­ສັນ​ວ່າ ຕ້ອງ​ມີ​ກົນ​ໄກ​ຮ່ວມ​ມືຂັ້ນ​ລັດ­ຖະ­ມົນ­ຕີ​ຊ່ວຍ​ວ່າ­ການຕ່າງ­ປະ­ເທດ ເພື່ອ​ແກ້​ໄຂ​ບັນ­ດາ​ບັນ­ຫາ​ກ່ຽວ​ກັບ​ທະ­ເລ ແລະ ມະ­ຫາ​ສະ­ໝຸດ; ຮ່ວມ​ມື​ດ້ານ​ຄວາມ​ສະ­ຫງົບ​ທາງ​ທະ­ເລ; ສ້າງ­ຕັ້ງ​ລະ­ບົບ​ໂທລະ­ສັບ​ສາຍ​ດ່ວນ​ກ່ຽວ​ກັບ​ການ​ປະ­ມົງ​ຜິດ​ກົດ­ໝາຍ; ກວດ­ກາ​ລາດຕະ­ເວນ​ຮ່ວມ​ກັນ​ໃນ​ເຂດ​ທະ­ເລ ທີ່​ມີ​ເສັ້ນ​ຊາຍແດນ​ຕິດ​ກັນ ແລະ ເຂດ​ພື້ນ​ທີ່ທີ່​ທັບ​ຊ້ອນ​ກັນ; ຮັບ​ມື​ກັບ​ການ​ຮົ່່ວ​ໄຫລ​ນ້ຳ­ມັນ​ໃນ​ທະ­ເລ; ເປັນເອ­ກະ­ສັນ​ກັນ​ຈະ​ປະ­ສານ​ສົມ­ທົບ​ຢ່າງ​ແໜ້ນ​ແຟ້ນ​ ເພື່ອ​ຮັບ­ປະ­ກັນບໍ່​ໃຫ້ຊາວ​ປະ­ມົງ​​ເຮັດ​ການ​ປະ­ມົງ​ຜິດ​ກົດ­ໝາຍ, ພ້ອມ​ກັນ​ນັ້ນ​ກໍ່​ປະ­ສານ​ສົມ­ທົບ​ແກ້​ໄຂ​ການ​ລະ­ເມີດ​ກົດ­ໝາຍ​ຂອງ​ຊາວ​ປະ­ມົງ​ບົນ​ຈິດ­ໃຈ​ມິດ­ຕະ­ພາບ ແລະ ຮ່ວມ​ມື.

ແກ້​ໄຂ​ບັນ­ຫາ​ທະ­ເລ​ຕາ­ເວັນ​ອອກ​ ບົນ​ພື້ນ­ຖານ​ກົດ­ໝາຍ​ສາ­ກົນ

ນາຍົກລັດ­ຖະ­ມົນ­ຕີ​ທັງ​ສອງ​ ​ໄດ້​ແລກ­ປ່ຽນ​ຢ່າງ​ກວ້າງ­ຂວາງ ເລິກ­ເຊິ່ງ​ກ່ຽວ​ກັບ​ບັນ­ດາ​ບັນ­ຫາ​ສາ­ກົນ ແລະ ພາກ​ພື້ນ​ທີ່​ທັງ​ສອງ​ຝ່າຍ​ເອົາ­ໃຈ­ໃສ່; ນາ­ຍົກ­ລັດ­ຖະ­ມົນ­ຕີ​ທັງສອງ ​ໄດ້​ເປັນ​ເອ­ກະ­ສັນ​ກັນ​ຊຸກ­ຍູ້ ເພີ່ມ​ທະ­ວີ ຄວາມ​ສາມັກ­ຄີ, ຄວາມ​ເປັນເອ­ກະ​ພາບ​ພາຍ​ໃນ; ຮັກ­ສາ​ບົດ­ບາດ​ເປັນ­ໃຈ​ກາງ ແລະ ສຸລະສຽງ​ລວມ​ຂອງ​ອາ​ຊຽນ ຕໍ່​ບັນດາ​ບັນ­ຫາ​ໃຫຍ່ໆ ທີ່​ກ່ຽວ​ພັນ​ເຖິງ​ຄວາມ​ສະ­ຫງົບ, ຜົນ​ປະ­ໂຫຍດ​ຂອງ​ແຕ່​ລະ​ປະ­ເທດ ແລະ ຂອງ​ພາກ​ພື້ນ, ພິເສດ​ແມ່ນ​ໃນ​ການ​ສ້າງ­ຕັ້ງ​ປະ­ຊາ​ຄົມອາ​ຊຽນ ຢ່າງ​ເປັນ​ທາງ​ການ ​ໃນ​ທ້າຍ​ປີ 2015 ນີ້. ເພີ່ມ​ທະ­ວີ​ໃນ​ການ​ປະສານ​ປະ­ສົມ​ແນ­ໃສ່​ຮັບ­ປະ­ກັນ​ໃຫ້​ສັນ­ຍາ​ຄູ່​ຮ່ວມ​ມື​ຂ້າມ​ປາ​ຊີ​ຟິກ (TPP) ​ເປັນ​ສັນ­ຍາ​ອັນ​ໜຶ່ງ​ທີ່​ສົມ​ດູນ​ຜົນ​ປະໂຫຍດ, ເອົາ­ໃຈ­ໃສ່​ເຖິງ​ບັນ­ດາ​ປະ­ເທດ​ກຳ­ລັງ​ພັດ­ທະ­ນາ​ຢ່າງ​ເໝາະ​ສົມ​ຕາມ​ຄວນ.

ນາ­ຍົກ­ລັດ­ຖະ­ມົນ­ຕີ​ທັງ​ສອງ​ ​ກໍ​ໄດ້​ແບ່ງ­ປັນ​ຄວາມ​ເປັນກັງ­ວົນ​ໃຈ​ກ່ຽວ​ກັບ​ສະ­ຖາ­ນະ​ການ​ທີ່​ເກີດ​ຂຶ້ນ​ໃນ​ມໍ່ໆນີ້ຢູ່​ທະ­ເລ​ຕາ­ເວັນ​ອອກ ຊຶ່ງ​ສົ່ງ​ຜົນ​ສະ­ທ້ອນເຖິງ​ຄວາມ​ໄວ້​ເນື້ອ​ເຊື່ອ​ໃຈ ແລະ ໄວ້​ວາງ­ໃຈ ກໍ​ຄືກະທົບ​ເຖິງ​ສັນ­ຕິ­ພາບ ສະ­ຖຽນ​ລະ​ພາບ ແລະ ຄວາມ​ສະ­ຫງົບ ຂອງພາກ​ພື້ນ; ພ້ອມ​ກັນ​ນັ້ນ​ໄດ້​ຢືນ­ຢັນ​ຄືນ​ອີກ​ເທື່ອ​ໜຶ່ງ ​ເຖິງ​ຄວາມ​ສຳຄັນ​ຂອງການ​ຮັບ­ປະ­ກັນ​​ສັນ­ຕິ­ພາບ ສະ­ຖຽນ​ລະ​ພາບ ຄວາມ​ສະ­ຫງົບ​ປອດ​ໄພ ໃນ​ການ​ເດີນ​ທະ­ເລ​ແລະການ​ເດີນ​ອາກາດ ຢູ່ທະ­ເລ​ຕາ­ເວັນ​ອອກ ກໍ​ຄື​ແກ້​ໄຂ​ຂໍ້​ຂັດ​ແຍ່ງ​ບົນ​ທະ­ເລ ໂດຍ​ອີງໃສ່​ກົດ­ໝາຍ​ສາ­ກົນ, ໃນ​ນັ້ນ​ມີ​ອະນຸ­ສັນ­ຍາ​ສະ­ຫະ​ປະ­ຊາ​ຊາດວ່າ​ດ້ວຍ​ກົດ­ໝາຍ​ທະ­ເລ​ປີ 1982.

ສອງ​ຝ່າຍ​ໄດ້​ເນັ້ນ​ເຖິງ​ຄວາມ​ຈຳ­ເປັນ ​ຂອງ​ການ​ທີ່ບັນດາຝ່າຍກ່ຽວ­ຂ້ອງ​ ຕ້ອງ​ປະ­ຕິ­ບັດ​ຢ່າງ​ຄົບ​ຖ້ວນ​ຖະ­ແຫຼງ­ການ​ວ່າ​ດ້ວຍ​ການ​ປະ­ພຶດ​​ຂອງ​ຝ່າຍ​ຕ່າງໆ​ຢູ່​ທະ­ເລ​ຕາ­ເວັນ​ອອກ (DOC), ອົດທົນອົດ​ກັ້ນ ແລະ ຫລີກ­ເວັ້ນ ບໍ່​ໃຫ້​ມີ​ການ​ກະ­ທຳ​ໃດໆ ທີ່ເຮັດ​ໃຫ້​ສະ­ຖາ­ນະ​ການຢູ່​ພາກ​ພື້ນເຄັ່ງ​ຕຶງຂຶ້ນ​ຕື່ມ, ໃນ​ນັ້ນ ລວມທັງ​ການ​ບັງ­ຄັບ ຫຼື ຂົ່ມ­ຂູ່​ໃຊ້​ກຳລັງອາ­ວຸດ​ຝ່າຍ​ດຽວ​ເພື່ອ​ປ່ຽນ­ແປງ​ສະ­ພາບ​ເດີມ; ເປັນ​ເອ­ກະ­ສັນ​ກັນ ມີ​ຄວາມ​ຈຳ­ເປັນ ແລະ ຕ້ອງ​ຮີບ​ຮ້ອນ​ສ້າງ​ປະ­ມວນ​​ຂໍ້ກຳ­ນົດກ່ຽວກັບວິ­ທີປະ­ພຶດຢູ່ທະ­ເລຕາ­ເວັນອອກ (COC).

ທ່ານ​ນາ­ຍົກ­ລັດ­ຖະ­ມົນ­ຕີ ຫງວ​ຽນ​ເຕິນ​ຢຸງ ຕີ​ລາ­ຄາ​ສູງ​ຕໍ່ການ​ທີ່ ມາ​ເລເຊຍ ໄດ້​ສະ­ແດງ​ຫຼັກ​ໝັ້ນ ແລະ ປະ­ກອບ­ສ່ວນ​ຢ່າງ​ຕັ້ງ­ໜ້າ ໃນ​ຖາ­ນະເປັນ​ປະ­ເທດ​ໜຶ່ງ​ທີ່ໄດ້ປະກາດ​ຖະ­ແຫຼງ​ອຳ­ນາດ​ອະ­ທິປະ​ໄຕ​ຕໍ່​ທະເລ​ຕາເວັນອອກ​ເຊັ່ນ​ກັນ; ພິ­ເສດ​ແມ່ນ​ໃນ​ຖາ­ນະ​ເປັນ​ປະ­ທານ ອາຊຽນ​ໃນ​ປີ 2015.

ພາຍ­ຫຼັງ​ການ​ພົບ​ປະ​ຫາລື, ທ່ານ​ນາ­ຍົກ­ລັດ­ຖະ­ມົນ­ຕີ ຫງວ​ຽນ​ເຕິນ​ຢຸງ ແລະ ທ່ານ​ນາ­ຍົກ­ລັດ­ຖະ­ມົນ­ຕີ ນາຈິກ ​ຣາ​ຊັກ ໄດ້​ລົງ​ນາມ​ຖະ­ແຫຼງ­ການ​ວ່າ​ດ້ວຍ​ຂອບ​ຄູ່​ຮ່ວມ​ຍຸດ​ທະ​ສາດຫວຽດ­ນາມ - ມາ​ເລ​ເຊຍ ແລະ ເປັນສັກ­ຂີ​ພິ­ຍານ ທີ່​ພິ­ທີ​ລົງ​ນາມ​ໃນ​ເອ­ກະ­ສານ​ວ່າ​ດ້ວຍ​ການ​ຮ່ວມ​ມື 3 ສະ­ບັບ ຊຶ່ງ​ລວມ​ມີ: ອອກ​ໃບ​ອະ­ນຸ­ຍາດ​ທາງ​ດ້ານ​ຫຼັກ­ການ​ໃຫ້​ແກ່​ທະ­ນາ­ຄານ CIMB, ການ​ຮ່ວມ​ມື​ໃນ​ຂົງ­ເຂດ​ແຮງ​ງານ ແລະ ຂໍ້​ຕົກລົງ​ວ່າ​ດ້ວຍ​ກາ​ນຮ່ມມື​ລະຫວ່າງ ເປ​ໂຕຣຫວຽດ­ນາມ ແລະ ເປ​ໂຕຣ​ນາດ.

ພິ­ເສດ, ບົນ​ພື້ນ­ຖານ​ຄວາມ​ເຫັນ​ດີ​ເປັນ​ເອ­ກະ​ພາບ​ຕີ​ລາ­ຄາ​ວ່າ ໃນ​ເວ­ລາ​ທີ່​ຜ່ານ​ມາ ການ​ພົວ­ພັນ​ແບບ​ໄວ້​ເນື້ອ​ເຊື່ອ​ໃຈ, ຮ່ວມ​ມື​ຮອບ­ດ້ານ​ລະ­ຫວ່າງ​ສອງ​ປະ­ເທດ ​​ໄດ້​ຂະຫຍາຍຕົວ​ນັບ​ມື້​ນັບ​ກວ້າງ­ຂວາງ ເລິກ­ເຊິ່ງ ແລະ ມີ​ປະ​ສິດ­ທິ​ຜົນ, ນາຍົກລັດ­ຖະ­ມົນ­ຕີ​ທັງ​ສອງ ​ໄດ້​ຕົກ­ລົງ​ຍົກ​ລະ­ດັບ​ການ​ພົວ­ພັນ​ຮອບ­ດ້ານ ຫວຽດ­ນາມ - ມາ​ເລ​ເຊຍ ຂຶ້ນ​ເປັນ​ການ​ພົວ­ພັນ​ຄູ່​ຮ່ວມ​ມື​ຍຸດ​ທະ​ສາດ​ຢ່າງ​ເປັນ​ທາງ​ການ; ເຫັນ​ດີ​ເປັນ​ເອ­ກະ​ພາບ​ ມອບ​ໜ້າ­ທີ່​ໃຫ້​ແກ່​ບັນ­ດາ​ກະຊວງ, ຂະ­ແໜງ­ການ ແລະ ທ້ອງ​ຖີ່ນ​ທັງ​ສອງ​ປະ­ເທດ​ ສືບ​ຕໍ່​ປະ­ສານ​ສົມ­ທົບ​ແໜ້ນ​ແຟ້ນ ເພື່ອ​ຜັນ​ຂະ­ຫຍາຍ​ບັນດາ​ຜົນ­ສຳ­ເລັດ​ທີ່​ບັນ­ລຸ​ໄດ້​ໃນ​ການ​ຢ້ຽມ­ຢາມ ແລະ ກໍ່­ສ້າງໂຄງ­ການ​ປະ­ຕິ­ບັດງານ ໄລ­ຍະ 2015-2018 ວ່າ​ດ້ວຍ​ຜັນ​ຂະ­ຫຍາຍ​ການ​ພົວ­ພັນ​ຄູ່​ຮ່ວມ​ມື​ຍຸດ​ທະ​ສາດຫວຽດ­ນາມ - ມາ​ເລ​ເຊຍ ຂຶ້ນ​ໂດຍ​ໄວ.

ສ່ວນ​ຕົນ​ເອງ, ​ເມື່ອ​ເວົ້າ​ເຖິງ​ຄວາມ​ໝາຍ​ຂອງ​ການ​ຍົກ​ລະດັບ​ການ​ພົວພັນ​ລະຫວ່າງ​ສອງ​ປະ​ເທດ, ທ່ານ​ນາ­ຍົກ­ລັດ­ຖະ­ມົນ­ຕີ ຫງວ​ຽນ​ເຕິນ​ຢຸງ ​ໄດ້​ເນັ້ນ​ວ່າ: “ການ​ຜັນ​ຂະ­ຫຍາຍ​ສາຍ​ພົວ­ພັນ​ຄູ່​ຮ່ວມ​ມື​ຍຸດ​ທະ​ສາດ ຫວຽດ­ນາມ - ມາ​ເລ​ເຊຍ ບໍ່​ພຽງ​ແຕ່​ສ້າງ​ກຳລັງ​ປຸກ​ກະ​ຕູ້ນ​ໃໝ່​ ເພື່ອ​ເຮັດ​ໃຫ້ການ​ພົວພັນ​ຮ່ວມ​ມື​​ໃນ​ຂົງ​ເຂດ​ຕ່າງໆ ລະ­ຫວ່າງ​ສອງ​ປະ­ເທດ​​ມີ​ປະ​ສິດ­ທິ​ຜົນຍິ່ງ​ຂຶ້ນ​ເທົ່າ​ນັ້ນ ຫາກ​ຍັງ​ປະ­ກອບ­ສ່ວນ​ຢ່າງ​ຕັ້ງ­ໜ້າ​ໃຫ້​ແກ່​ປະ­ຊາ​ຄົມອາ​ຊຽນ, ຮັກ­ສາ​ສັນຕິ­ພາບ ສະ​ຖຽມ​ລະ​ພາບ ເພີ່ມ​ທະ­ວີ​ການ​ຮ່ວມ​ມື ແລະ ພັດ­ທະ­ນາ​ຢູ່​ພາກ​ພື້ນ ແລະ ໃນ​ໂລກ”./.

ສັງ​ລວມ​ໂດຍ BTV

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ