ວັນອາທິດ, 31/5/2020
ທ່ານຫງວຽນຊິງຮຸ່ງ ປະທານສະພາແຫ່ງຊາດ ແຫ່ງ ສສ ຫວຽດນາມ ໄປຢ້ຽມຢາມ ສະຫະລັດອາເມຣິກາ ຢ່າງເປັນທາງການ
10/10/2015 10:29' ສົ່ງ ພິມ
ທ່ານປະທານສະພາແຫ່ງຊາດ ຫງວຽນຊິງຮຸ່ງ ພົບປະກັບທ່ານ ແພທຣິກ ເລີຮີ ປະທານປະຈຳການກິຕິມະສັກ ວຸດທິສະພາສະຫະລັດອາເມຣິກາ. (ພາບ: TTXVN)

* ວັນ​ທີ 9 ກັນຍາ ຕາມ​ເວລາອາ​ເມຣິກາ (ຮຸ່ງ​ເຊົ້າ​ວັນ​ທີ 10 ກັນຍາ ຕາມ​ເວລາ​ຫວຽດນາມ), ທ່ານປະທານ​ສະພາ​ແຫ່ງ​ຊາດ ຫງວຽນ​ຊິງ​ຮຸ່ງ ​ໄດ້​ມີ​ການ​ພົບ​ປະ​ຢ່າງ​ສະໜິດສະໜົມ​ກັບທ່ານ ​ແພ​ທຣິກ ​ເລີ​ຮີ ປະທານ​ປະຈຳການ​ກິ​ຕິ​ມະ​ສັກວຸດ​ທິສະພາສະຫະລັດ​ອາ​ເມຣິກາ.

ທ່ານປະທານ​ສະພາ​ແຫ່ງ​ຊາດ ຫງວຽນ​ຊິງ​ຮຸ່ງ ​​ສະ​ແດງ​ຄວາມ​ດີ​ໃຈ​ທີ່​ໄດ້​ມາ​ຢ້ຽມຢາມ​ສະຫະລັດ​ອາ​ເມຣິກາ ​ແລະ ພົບ​ປະ​ກັບທ່ານ ​ແພ​ທຣິກ ​ເລີ​ຮີ ປະທານ​ປະຈຳການ​ກິ​ຕິ​ມະ​ສັກວຸດ​ທິສະພາສະຫະລັດ​ອາ​ເມຣິກາ ທ່າມກາງ​ບັນຍາກາດ​​ແຫ່ງການສະ​ເຫຼີ​ມສະຫຼອງ​ວັນ​ສ້າງ​ຕັ້ງ​ສາຍ​ພົວພັນ​ທາງ​ການ​ທູດ​ລະ​ຫວ່າງສອງ​ປະ​ເທດ​ຄົບຮອບ 20 ປີ.

ທ່ານປະທານ​ສະພາ​ແຫ່ງ​ຊາດ ຫງວຽນ​ຊິງ​ຮຸ່ງ ຢືນຢັນ​ວ່າ​ສະພາ​ແຫ່ງ​ຊາດ​ຫວຽດນາມ​ຍາມ​ໃດ​ກໍ່​ສະໜັບສະໜູນ ​ແລະ ​​ເອົາ​ໃຈ​ໃສ່​ເປັນ​ສຳຄັນ​ເຖິງ​ຄວາມ​ພົວພັນ​ກັບສະຫະລັດ​ອາ​ເມຣິກາ; ມີ​ຄວາມ​ປະສົງ​ເພີ່ມ​ທະວີຄວາມ​ພົວພັນ​ຄູ່​ຮ່ວມ​ຮອບດ້ານ​ກັບສະຫະລັດ​ອາ​ເມຣິກາ ​ແລະ ​ເຮັດ​ໃຫ້ການ​ພົວພັນ​​ເລິກ​ເຊິ່ງ ​ມີ​ປະສິດທິ​ຜົນ​ຕົວ​ຈິງຍິ່ງກວ່າ​ອີກ ​ໃນ​ດ້ານ​ການ​ພົວພັນ​ທະວິ​ພາຄີ ພາກ​ພື້ນ ​ແລະ ທົ່ວ​ໂລກ, ປະກອບສ່ວນ​ຫຼາຍ​ກວ່າ​ອີກ​ເຂົ້າ​ໃນ​ການ​ຮັກສາ​ສັນຕິພາບ ສະຖຽນ​ລະ​ພາບ ການ​ຮ່ວມ​ມື ​ແລະ ຄວາມ​ວັດທະນາ​ຖາວອນ​ຂອງ​ພາກ​ພື້ນ ​ແລະ ຂອງ​​ໂລກ.

ທ່ານປະທານ​ສະພາ​ແຫ່ງ​ຊາດ ຫງວຽນ​ຊິງ​ຮຸ່ງ ​ເວົ້າ​ວ່າສະຫະລັດ​ອາ​ເມຣິກາ​​ເປັນ​ປະ​ເທດ​ທີ່​ມີ​ບົດຮຽນ​ອັນ​ລ້ຳ​ຄ່າ​ຫຼາຍ​ຢ່າງ​ໃນ​ວຽກ​ງານການ​ສ້າງ​ກົດໝາຍ, ຫວຽດນາມ​ຢາກ​ເພີ່ມ​ທະວີ​ການ​ຮ່ວມ​ມື​ກັບສະຫະລັດ​ອາ​ເມຣິກາ​ໃນ​ຂົງ​ເຂດ​ນີ້ ​ເພື່ອ​ແລກປ່ຽນ​​ເກັບ​ກຳບົດຮຽນ​ໃຫ້​ແກ່​ວິວັດ​ການ​ປະຕິ​ຮູບ​ກົດໝາຍ.

ທ່ານ ​ແພ​ທຣິກ ​ເລີ​ຮີ ປະທານ​ປະຈຳການ​ກິ​ຕິ​ມະ​ສັກວຸດ​ທິສະພາສະຫະລັດ​ອາ​ເມຣິກາ ​ໄດ້​ຕີ​ລາຄາ​ສູງ​ຕໍ່​ຜົນງານ​ແຫ່ງ​ການ​ພັດທະນາ​ເສດຖະກິດ​ສັງຄົມ​ຂອງ​ຫວຽດນາມ ຢູ່​ໃນ​ພາກ​ພື້ນ​ແລະ​ໃນ​ໂລກ; ​ເຊື່ອ​ໜັ້ນຕໍ່​ຄວາມ​ຈະ​ເລີ​ນ​ພັດທະນາ​ທາງເສດຖະກິດ ​ແລະ ອະນາຄົດ​ອັນ​ສະຫວ່າງ​ສົດ​ໃສ​ຂອງ​ຫວຽດນາມ. ທ່ານປະທານ ​ແພ​ທຣິກ ​ເລີ​ຮີ ຢືນຢັນ​ລັດຖະສະພາ​ອາ​ເມຣິກາ​ຢາກ​ເພີ່ມ​ທະວີ​ການ​ພົວພັນ​ຮອບດ້ານ​ກັບ​ຫວຽດນາມ​ຍິ່ງ​ກວ່າ​ອີກ; ຜ່ານ​ສິ່ງ​ດັ່ງກ່າວ​ເພື່ອ​ເພີ່ມ​ທະວີ​ຄວາມ​ເຂົ້າ​ໃຈ ​ແລະ ການ​ພົວພັນ​ລະຫວ່າງ​ປະຊາຊົນ​ສອງ​ປະ​ເທດ.

​ໃນ​ທີ່​ການ​ພົບ​ປະ, ສອງ​ຝ່າຍ​ໄດ້​ເນັ້ນ​ເຖິງ​ຄວາມ​ສຳຄັນ​ຂອງ​ການ​ພົວພັນ​ລະຫວ່າງ​ສອງ​ປະ​ເທດ​ໃນ​ການ​ປະກອບສ່ວນ​ຮັກສາ​ສັນຕິພາບ ສະຖຽນ​ລະ​ພາບ ຄວາມ​ວັດທະນາ​ຖາວອນ ​ແລະ ການ​ພັດທະນາ​ຢູ່ໃນພາກ​ພື້ນ ​ແລະ ​ໃນ​ໂລກ.

ຕໍ່​ຈາກ​ນັ້ນ, ທ່ານປະທານ​ສະພາ​ແຫ່ງ​ຊາດ ຫງວຽນ​ຊິງ​ຮຸ່ງ ກໍ່​ໄດ້​ພົບ​ປະ​ກັບ​ທ່ານ ຈອນ​ ແມກເຄນ ສະມາຊິກ​ວຸດ​ທິສະພາ​ສະຫະລັດ​ອາ​ເມຣິກາ.

ທ່ານປະທານ​ສະພາ​ແຫ່ງ​ຊາດ ຫງວຽນ​ຊິງ​ຮຸ່ງ ​ໄດ້ຕີ​ລາຄາ​ສູງ​ຕໍ່​ການ​ສະໜັບສະໜູນ​ອັນ​ຕັ້ງໜ້າ​ຂອງທ່ານ ຈອນ​ ແມກ​ເຄນ ສະມາຊິກ​ວຸດ​ທິສະພາ​ສະຫະລັດ​ອາ​ເມຣິກາ ​ໃນ​ການ​ຊຸກຍູ້​ຄວາມ​ພົວພັນ​ລະຫວ່າງ​ສອງ​ປະ​ເທດ​ໃນ​ຊຸມ​ປີ​ທີ່​ຜ່ານ​ມາ.

ທ່ານປະທານ​ສະພາ​ແຫ່ງ​ຊາດ ​ໄດ້​ສະ​ແດງ​ຄວາມ​ດີ​ອົກດີ​ໃຈ​ຕໍ່ຜົນງານ​ອັນ​ສຳຄັນ​ແຫ່ງ​ການ​ພົວພັນ​ລະຫວ່າງ​ສອງ​ປະ​ເທດ​ ​​ພາຍຫຼັງ 20 ປີ​ແຫ່ງ​ການສ້າງຕັ້ງ​ການ​ພົວພັນ​ທາງ​ການ​ທູດ, ທ່ານ​ກໍ່​ສະ​ແດງ​ຄວາມ​ມຸ່ງ​ຫວັງ​ເພີ່ມ​ທະວີການ​ພົວພັນ​ຄູ່​ຮ່ວມ​ມື​ຮອບດ້ານ​ກັບສະຫະລັດ​ອາ​ເມຣິກາ ​ໃຫ້​ເລິກ​ເຊິ່ງ ມີ​ປະສິດທິ​ຜົນ​ຕົວ​ຈິງ​ຍິ່ງ​ກວ່າອີກ.

ທ່ານປະທານ​ສະພາ​ແຫ່ງ​ຊາດ ສະ​ເໜີ​ໃຫ້​ລັດຖະສະພາ​ຂອງ​ສອງ​ປະ​ເທດ​ສ້າງ​ຕັ້ງ​ກົນ​ໄກ​ສົນທະນາ​ປະຈຳ​ປີ, ສ້າງ​ໂຄງການ​ແລກປ່ຽນ ​ແບ່ງປັນ​ຂໍ້​ມູນ​ຂ່າວສານ, ບົດຮຽນ​ໃນ​ບັນດາຂົງ​ເຂດ​ວຽກ​ງານວິຊາ​ການ​ຂອງ​ສະພາ​ແຫ່ງ​ຊາດ ​ແລະ ບັນດາ​ບັນຫາ​ທີ່​ທັງ​ສອງ​ຝ່າຍ​ມີ​ຄວາມ​ສົນ​ໃຈ.

ທ່ານ ຈອນ​ ແມກ​ເຄນ ສະມາຊິກ​ວຸດ​ທິສະພາ​ສະຫະລັດ​ອາ​ເມຣິກາ ສະ​ແດງ​ຄວາມ​ດີ​ໃຈ​ທີ່​ໄດ້​ພົບ​ປະ​ທ່ານປະທານ​ສະພາ​ແຫ່ງ​ຊາດ ຫງວຽນ​ຊິງ​ຮຸ່ງ ຢູ່​ທີ່ສະຫະລັດ​ອາ​ເມຣິກາ; ສະ​ແດງ​ຄວາມ​ຫວັງ​ວ່າ ຫວຽດນາມ​ ແລະ ສະຫະລັດ​ອາ​ເມຣິກາ ພ້ອມ​ດ້ວຍ​ບັນດາ​ຝ່າຍ​ທີ່​ກ່ຽວ​ຈະ​ບັນລຸ​ຄວາມ​ເຫັນ​ດີ​ເຫັນ​ພ້ອມ​ກ່ຽວ​ກັບ​ສັນຍາຄູ່​ຮ່ວມ​ເສດຖະກິດ​ຂ້າມ​ປາຊີ​ຟິກ (ທີ​ພີ​ພີ) ​ໃນ​ໄວໆ​ນີ້, ຜ່ານ​ສິ່ງ​ດັ່ງກ່າວ ປະກອບສ່ວນ​ຊຸກຍູ້​ການ​ພົວພັນ​ທະວິ​ພາຄີ ​ແລະ ນຳ​ເອົາ​ຜົນ​ປະ​ໂຫຍ​ດຕົວ​ຈິງ​ມາ​ໃຫ້​ປະຊາຊົນ​ແຕ່ລະ​ປະ​ເທດ.

ທ່ານ ຈອນ​ ແມກ​ເຄນ ສະມາຊິກ​ວຸດ​ທິສະພາ​ສະຫະລັດ​ອາ​ເມຣິກາ ສະ​ແດງ​ຄວາມ​ກັງວົນ​ໃຈ​ກ່ຽວ​ກັບ​ສະພາບ​ການ​ຢູ່​ທະ​ເລ​ຕາ​ເວັນ​ອອກ ​ແລະ ​ໃຫ້​ທັດສະນະ​ວ່າ ຄວາມ​ພິພາດ​ຕ່າງໆ​ຕ້ອງ​ໄດ້​ແກ້​ໄຂ​ດ້ວຍ​ສັນຕິ​ວິທີ ບົນ​ພື້ນຖານ​ເຄົາລົບ​ນັບຖື​ກົດໝາຍ​ສາກົນ.

      * ປະທານ​ສະພາ​ແຫ່ງ​ຊາດ ຫງວຽນ​ຊິງ​ຮຸ່ງ ພົບ​ປະ​ກັບ​ທ່ານ ຈອນ ​ເຄຣີ ລັດຖະມົນ​ຕີ​ວ່າການ​ກະຊວງ​ການ​ຕ່າງປະ​ເທດ​ສະຫະລັດ​ອາ​ເມຣິກາ


ທ່ານປະທານ​ສະພາ​ແຫ່ງ​ຊາດ ຫງວຽນ​ຊິງ​ຮຸ່ງ ​​ແລະ ​ທ່ານ ຈອນ ​ເຄຣີ
ລັດຖະມົນ​ຕີ​ວ່າການ​ກະຊວງການ​ຕ່າງປະ​ເທດ​ສະຫະລັດ​ອາ​ເມຣິກາ (ພາບ: TTXVN)

ຕອນ​ຄ່ຳ​ວັນ​ທີ 9 ກັນຍາ ຕາມ​ເວລາ​ຫວຽດນາມ, ​ໃນ​ກອບ​ການ​ຢ້ຽມຢາມສະຫະລັດ​ອາ​ເມຣິກາຢ່າງ​ເປັນ​ທາງ​ການ, ທ່າປະທານ​ສະພາ​ແຫ່ງ​ຊາດ ຫງວຽນ​ຊິງ​ຮຸ່ງ ​ໄດ້​ມີ​ການ​ພົບ​ປະ​ຢ່າງສະໜິດສະໜົມ​ ກັບ​ທ່ານ ຈອນ ​ເຄຣີ ລັດຖະມົນ​ຕີ​ວ່າການ​ກະຊວງ​ການ​ຕ່າງປະ​ເທດ​ສະຫະລັດ​ອາ​ເມຣິກາ.

ທ່ານປະທານ​ສະພາ​ແຫ່ງ​ຊາດ ຫງວຽນ​ຊິງ​ຮຸ່ງ ສະ​ແດງ​ຄວາມ​ດີ​ໃຈ​ຕໍ່​ການ​ຂະຫຍາຍຕົວ​ຂອງ​ການ​ພົວພັນ​ສອງ​ຝ່າຍ​ຫວຽດນາມ - ສະຫະລັດ​ອາ​ເມຣິກາ ພາຍຫຼັງ 20 ປີ​ນັບ​ແຕ່​ເມື່ອ​ສອງ​ປະ​ເທດ​ສ້າງ​ຕັ້ງ​ການ​ພົວພັນ​ທາງ​ການ​ທູດ​, ພິ​ເສດ​ແມ່ນ​ການ​ແລກປ່ຽນ​ຄະນະ​ຜູ້​ແທນ​ຂັ້ນ​ສູງນຳ​ກັນ.

ທ່ານປະທານ​ສະພາ​ແຫ່ງ​ຊາດ ຊີ້​ແຈ້ງວ່າ​​ເສດຖະກິດ ການ​ຄ້າ​ແມ່ນ​ຂົງ​ເຂດ​ທີ່​ບັນລຸ​ຜົນສຳ​ເລັດ​ຫຼາຍ​ທີ່​ສຸດ ພາຍຫຼັງ 20 ​ປີແຫ່ງ​ການ​ສ້າງ​ຕັ້ງ​ສາຍ​ພົວພັນ​ເປັນ​ປົກກະຕິ​ລະຫວ່າງ​ຫວຽດນາມ - ສະຫະລັດ​ອາ​ເມຣິກາ; ມູຄ່າ​ການ​ຄ້າ​ສອງ​ສົ້ນ​ໄດ້​ບັນລຸ 40 ຕື້​ໂດ​ລາ​ສະຫະລັດ; ການ​ຮ່ວມ​ມື​ລະຫວ່າງ​ສອງ​ປະ​ເທດ​ໃນ​ບັນດາ​ຂົງ​ເຂດ​ວັດທະນະທຳ ການ​ສຶກສາ-ກໍ່ສ້າງ ກໍ່​ບັນລຸ​ຜົນສຳ​ເລັດ​ອັນ​ຕັ້ງໜ້າ​ຫຼາຍ​ຢ່າງ. ດ້ວຍ​ຈິດ​ໃຈ​ດັງ​ກ່າວ​ນັ້ນ, ທ່ານປະທານ​ສະພາ​ແຫ່ງ​ຊາດ ​ເຊື່ອ​ໜັ້ນວ່າ ຄວາມ​ພົວພັນ​ລະຫວ່າງ​ສອງ​ປະ​ເທດ​ມີ​ເງື່ອນ​ໄຂ​ອັນ​ສະດວກຫຼາຍ​ຢ່າງ​ເພື່ອ​ຍູ້​ແຮງ​ກວ່າ​ອີກ​ໃນ​ຊຸມ​ປີ​ສະ​ເພາະ​ໜ້າ.

​ທ່ານ ຈອນ ​ເຄຣີ ລັດຖະມົນ​ຕີ​ວ່າການ​ກະຊວງ​ການ​ຕ່າງປະ​ເທດ​ສະຫະລັດ​ອາ​ເມຣິກາ ສະ​ແດງ​ຄວາມ​ຊົມ​ເຊີຍ​ຕໍ່​ທ່ານປະທານ​ສະພາ​ແຫ່ງ​ຊາດ ຫງວຽນ​ຊິງ​ຮຸ່ງ ​ແລະ ຄະນະ​ຜູ້​ແທນ​ຂັ້ນ​ສູງ​ສະພາ​​ແຫ່ງ​ຊາດ​ຫວຽດນາມ ທີ່​ມາ​ຢ້ຽມຢາມສະຫະລັດ​ອາ​ເມຣິກາຢ່າງ​ເປັນ​ທາງ​ການ; ຕີ​ລາຄາ​ສູງ​ຕໍ່​ບັນດາ​ຜົນສຳ​ເລັດ​ທີ່​ຫວຽດນາມ​ບັນລຸ​ໄດ້​ໃນ​ການ​ປ່ຽນ​ແປງ​ໃໝ່ ກໍ່​ຄື​ການ​ທີ່​ຫວຽດນາມ​ເຂົ້າ​ຮ່ວມ​ໃນ​ກຳລັງ​ຮັກສາ​ສັນຕິພາບ​ສາກົນ.

ທ່ານລັດຖະມົນຕີ​ ຈອນ ​ເຄຣີ ​ເຫັນ​ດີ​ເປັນ​ເອກະສັນ​ເພີ່ມ​ທະວີ​ການ​ຮ່ວມ​ມື​ກັບ​ຫວຽດນາມ ​ແລະ ບັນດາ​ປະ​ເທດ​ໃນ​ພາກ​ພື້ນ ​ໃນ​ການ​ປົກ​ປັກ​ຮັກສາ ​ແລະ ຂຸດ​ຄົ້ນ​ຊັບພະຍາກອນ​ແມ່​ນ້ຳຂອງ​ຢ່າງ​ມີ​ປະສິດທິ​ຜົນ ​​ແລະ ຢືນຢັນ​ວ່າ​ຈະ​ຊ່ວຍ​ເຫຼືອ​ຫວຽດນາມ​ໃນ​ການ​ຮັບ​ມື​ກັບ​ໄພ​ອັນຕະລາຍ​ຍ້ອນການ​ປ່ຽນ​ແປງ​ດິນ​ຟ້າ​ອາກາດ, ​ເປັນ​ຕົ້ນ​ແມ່ນ​ບັນຫາ​ນ້ຳ​ທະ​ເລ​ຍື່ງຂຶ້ນ​ໃນ​ປັດຈຸບັນ.

ທ່ານລັດຖະມົນຕີ​ ຈອນ ​ເຄຣີ ​ເວົ້າ​ວ່າ ​ສະຫະລັດອາ​ເມຣິກາພ້ອມ​ແລ້​ວທີ່​ຈະ​ຮ່ວມ​ມື​ກັບສະພາ​ແຫ່ງ​ຊາດ​ຫວຽດນາມ ​ໃນ​ວິວັດ​ການ​ກໍ່ສ້າງ ປັບປຸງ​ປະ​ມວນ​ກົດໝາຍ​ຕ່າງໆ​ ໃຫ້​ສອດຄ່ອງ​ກັບ​ລັດຖະທຳ​ມະ​ນູນສະບັບ​ປີ 2013; ​ເພີ່ມ​ທະວີ​ການ​ຮ່ວມ​ມື​ກັບ​ຫວຽດນາມ​ໃນ​ບັນດາ​ບັນຫາ​ມະນຸດສະທຳ ​ແລະ ກຳຈັດ​ແກ້​ໄຂ​ຜົນ​ຮ້າຍ​ຂອງ​ສົງຄາມ ​ເຊັ່ນ​ທາດ​ພິດ​ສີ​ສົ້ມ/​ໄດ​ອອກ​ຊິນ, ​ເກັບກູ້ ທຳລາຍ​ລູກລະ​ເບີດ​ທີ່ຖືກຄ້າງ​ໄວ້​ຈາກ​ສົງຄາມ.

​​ເມື່ອແລກປ່ຽນ​ກ່ຽວ​ກັບ​ບັນຫາ​ທະ​ເລ​ຕາ​ເວັນ​ອອກ, ສອງ​ຝ່າຍ​ເຫັນ​ດີ​ເປັນ​ເອກະສັນ​ເພີ່ນ​ທະວີ​ການ​ຮ່ວມ​ມື ​ແນ​ໃສ່​ຮັກສາ​ສັນຕິພາບ ສະຖຽນ​ລະ​ພາບ​ຢູ່​ເຂດ​ທະ​ເລ​ຕາ​ເວັນ​ອອກ ​ເພື່ອ​ຜົນ​ປະ​ໂຫຍ​ດລວມຂອງ​ພາກ​ພື້ນ ​ແລະ ຂອງ​ໂລກ. ຝ່າຍສະຫະລັດອາ​ເມຣິກາ ​ເຫັນ​ດີ​ກັບ​ຫຼັກ​ໝັ້ນ​ຂອງ​ຫວຽດນາມ​ໃນ​ການ​ແກ້ໄຂຂໍ້​ພິພາດ​ດ້ວຍ​ສັນຕິ​ວິທີ ອິງ​ບົນ​ບັນດາ​ຫຼັກການ​ອັນ​ພື້ນຖານ​ຂອງ​ກົດໝາຍ​ສາກົນ. ສອງ​ຝ່າຍ​ເຫັນ​ດີ​ຊຸກ​ຍູ້​ໃຫ້ບັນດາ​ອົງການ​ພາລະ​ບົດບາດ ຍູ້​ແຮງ​ວິວັດ​ການ​ເຈລະຈາ​ເຊັນ​ສັນຍາ ທີ​ພີ​ພີ ​ເພື່ອ​ຜົນ​ປະ​ໂຫຍ​ດຂອງ​ສອງ​ປະ​ເທດ; ຊຸກ​ຍູ້​ສະພາ​ແຫ່ງ​ຊາດ​ສອງ​ປະ​ເທດ​ໃຫ້​ສັດຕະຍາບັນ​ສັນຍາ​ສະບັບນີ້ ພາຍຫຼັງ​ທີ່​ໄດ້​ລົງ​ນາມ ​ເພື່ອ​ປະກອບສ່ວນ​ເພີ່ມ​ມູນ​ຄ່າ​ການ​ຄ້າ​ສອງ​ຝ່າຍ​ຂຶ້ນ​ສູງ​ກວ່າ​ອີກ ​ແລະ ​ເພີ່ມ​ການ​ລົງທຶນ​ຂອງ​ສະຫະລັດ​ອາ​ເມຣິກາ ​ແລະ ຂອງ​ປະ​ເທດ​ອື່ນ​ໆ​ເຂົ້າ​ຫວຽດນາມ​ຕື່ມ​ອີກ.

​ໃນ​ວັນ​ດຽວ​ກັນ, ທ່ານປະທານ​ສະພາ​ແຫ່ງ​ຊາດ ຫງວຽນ​ຊິງ​ຮຸ່ງ ​ໄດ້​​ຕ້ອນຮັບ​ການ​ເຂົ້າ​ຢ້ຽມ​ຄຳນັບຂອງ​ທ່ານ ມາຍ​​ເກີ​ນ ຟຣໍ​ແມນ ຜູ້​ແທນ​ການ​ຄ້າອາເມຣິກາ.

​ໃນ​ໂອກາດ​ຢ້ຽມຢາມສະຫະລັດອາ​ເມຣິກາ, ທ່ານປະທານ​ສະພາ​ແຫ່ງ​ຊາດ ຫງວຽນ​ຊິງ​ຮຸ່ງ ​ແລະ ຄະນະ​ຜູ້​ແທນ​ຂັ້ນ​ສູງ​ສະພາ​ແຫ່ງ​ຊາດ​ຫວຽດນາມ ​ໄດ້​ໄປ​ຢ້ຽມຢາມ​ຫໍສະໝຸດ​ຂອງ​ລັດຖະສະພາ​ສະຫະລັດອາ​ເມຣິກາ - ອົງການ​ຄົ້ນ​ຄວ້າ​ແຖວ​ໜ້າ​ຂອງ​ລັດຖະສະພາ. ນີ້​ກໍ່​ແມ່ນຫໍສະໝຸດ​ທີ່​ມີ​ເນື້ອ​ທີ່​ວາງ​ຕັ້ງ​ປຶ້ມ​ກວ້າງ​ທີ່​ສຸດ ​ແລະ ​ເປັນ​ຫໍສະໝຸດ​ໜຶ່ງ​ທີ່​ສຳຄັນ​ທີ່​ສຸດ​ໃນ​ໂລກ; ​ໄປ​ຢາມ ​ແລະ ​ໂອ້​ລົມ​ກັບ​ພະນັກງານ ລັດຖະກອນ​ສະຖານທູດ​ຫວຽດນາມຢູ່​ທີ່ສະຫະລັດອາ​ເມຣິກາ; ພົບ​ປະ​ກັບ​ປະທານ​ທະນາຄານ​ໂລກ​ຢູ່​ທີ່​ອາ​ເມຣິກາ ​ແລະ ​ເຂົ້າ​ຮ່ວມ​ການ​ປະຊຸມ​ສຳ​ມະ​ນາ​ກ່ຽວ​ກັບ​ຫວຽດນາມ ​ໃນ​ຫົວ​ຂໍ້ “ບົດບາດ​ນັບ​ມື້​ນັບ​ເພີ່ມ​ຂຶ້ນ​ຂອງ​ສະພາ​ແຫ່ງ​ຊາດ​ຫວຽດນາມ ຕໍ່​ກັບ​ການ​ພັດທະນາ​ປະ​ເທດ​ຊາດ" ​ໂດຍ​ແມ່ນ​ທະນາຄານ​ໂລກ​ເປັນ​ຜູ້​ຈັດ​ຕັ້ງ. ປະທານ​ສະພາ​ແຫ່ງ​ຊາດ ​ແລະ ຄະນະ​ຜູ້​ແທນ​ສະພາ​ແຫ່ງ​ຊາດ​ຫວຽດນາມ​ໄດ້​ໄປຢ້ຽມ​ຊົມ​ອະນຸສາວະລີ ລິນ​ຄອນ ​ແລະ ອະນຸສາວະລີ ມາ​ຕິນ ລູ​ເທີ ຄິງ; ຢ້ຽມຢາມ​ພິພິດທະພັນ​ການ​ສຳ​ເນົາ​​ແຫ່ງຊາດອາ​ເມຣິກາ; ​ໂຮງ​ແຮມ ​ໂອມ​ນີ ​ປາກ​ເກີ ​ເຮົາຊ໌ ຢູ່​ນະຄອນ ບໍ​ສະ​ຕັນ - ​ເຊິ່ງ​ເປັນບ່ອນ​ທີ່​ທ່ານ​ປະທານ​ໂຮ່ຈີ​ມິນ​ເຄີຍ​ເຮັດ​ວຽກ ​ແຕ່​ປີ 1911 ຮອດ​ປີ 1913 ​ໃນ​ການ​ເດີນທາງ​ໄປ​ຊອກ​ຫາ​ເສັ້ນທາງ​ກູ້​ຊາດ. ໃນກອບການຢ້ຽມຢາມສະຫະລັດອາເມຣິກາຄັ້ງນີ້, ຕອນເຊົ້າວັນທີ 4 ກັນຍາ ຕາມເວລາຫວຽດນາມ, ທ່ານປະທານ​ສະພາ​ແຫ່ງ​ຊາດ ຫງວຽນ​ຊິງ​ຮຸ່ງ ​ໄດ້​ພົບ​ປະ​ກັບ​ປະທານ​ສະພາ​ສູງ, ປະທານ​ສະພາ​ຕ່ຳ​ແຫ່ງ​ລັດ ​ແມດ​ຊາ​ຊູ​ເຊ​ດ ​ແລະ ​ໄປ​ຢາມ​ມະຫາວິທະຍາ​ໄລ ຮາ​ວາດ ທີ່​ລື​ຊື່./.

ສັງ​ລວມ​ໂດຍ ນດ.

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ