ວັນອາທິດ, 31/5/2020
ປະທານປະເທດສາທາລະນະລັດ ສັງຄົມນິຍົມ ຫວຽດນາມ ເຈືອງເຕິນຊາງ ເຂົ້າຮ່ວມ ກອງປະຊຸມສຸດຍອດ ອົງການສະຫະປະຊາຊາດ ກ່ຽວກັບ ການພັດທະນາແບບຍືນຍົງ.
15/10/2015 18:50' ສົ່ງ ພິມ
ທ່ານປະທານປະເທດ ເຈືອງເຕິນຊາງ ກ່າວປາໄສທີ່ພິທີໄຂກອງປະຊຸມສຸດຍອດ ອົງການສະຫະປະຊາຊາດ ໃນວັນທີ 25 ກັນຍາ 2015. (ພາບ: TTXVN)

ໃນ​ມື້​ທຳ​ອິດ​ຂອງ​ກອງ​ປະ­ຊຸມ, ທ່ານ​ປະ­ທານ​ປະ­ເທດ ເຈືອງ​ເຕິນ​ຊາງ ໄດ້​ມີ​ບົດ​ກ່າວ​ປາ​ໄສ​ທີ່​ສຳ​ຄັັນ ໂດຍ​ໄດ້​ຍົກ​ໃຫ້​ເຫັນ​ເຖິງສິ່ງ​ທ້າທາຍ​ທີ່​ໃຫຍ່​ຫຼວງ​ຕ່າງໆ​ ທີ່​ກຳລັງ​ຂົ່ມ­ຂູ່​ສັນ­ຕິ­ພາບ ຄວາມ​ສະ­ຫງົບ​ປອດ​ໄພ ແລະ ການ​ພັດ­ທະ­ນາ​ແບບ​ຍືນ​ຍົງ ​ໃນ​ທົ່ວ​ໂລກ; ທ່ານ​ກໍ່​ໄດ້ຢັ້ງ​ຢືນ​ວ່າ ຫວຽດ­ນາມ​ຈະ​ສືບ​ຕໍ່​ສຸມ​ກຳລັງ​ແຮງ ປຸກ­ລະ­ດົມ​ບັນ­ດາ​ກະ­ຊວງ ຂະ­ແໜງ­ການ ທ້ອງ​ຖີ່ນ ແລະ ປະ­ຊາ​ຄົມ ​ເພື່ອ​ປະ­ຕິ­ບັດລະບຽບວາ­ລະ​ການ​ປະຊຸມ ຮອດປີ 2030 ແລະ ບັນ­ດາ​ເປົ້າ​ໝາຍ​ການພັດ­ທະ­ນາ​ແບບ​ຍືນ​ຍົງ ​ໃຫ້​ປະກົດ​ຜົນ​ເປັນ​ຈິງ. ອີງ​ບົນ​ພື້ນ­ຖານ​ປະ­ສົບ​ການ​ຂອງ​ຫວຽດ­ນາມ, ທ່ານປະ­ທານ​ປະ­ເທດ ໄດ້ຍົກ​ໃຫ້​ຫັນ​​ເຖິງບັນ­ດາ​ຂໍ້­ຄວາມ ແລະ ຂໍ້​ສະ­ເໜີ​ທີ່​ສຳຄັນ​ຕ່າງໆ ​ເຊັ່ນ: (1) ຮັບ­ປະ­ກັນ​ສິ່ງ­ແວ­ດລ້ອມ​ແຫ່ງ​​ສັນ­ຕິ­ພາບ ​ຄວາມ​ສະ­ຫງົບ ​ບົນ​ພື້ນ­ຖານ​ເຄົາ­ລົບ​ນັບ­ຖື​ກົດ­ໝາຍ​ສາ­ກົນ ​ເຊິ່ງ​ເປັນ​ເງື່ອນ­ໄຂ​ທີ່​ຕ້ອງ​ແກ້​ໄຂ​ກ່ອນ ເພື່ອ​ປະ­ຕິ­ບັດ​ບັນ­ດາ​ເປົ້າ​ໝາຍ​ການພັດ­ທະ­ນາ​ແບບ​ຍືນ​ຍົງ​ຢູ່​ໃນ​ທຸກໆ​ປະ­ເທດ​ ໃຫ້​ປະສົບ​ຄວາມ​ສຳ​ເລັດ; (2) ບັນ­ດາ​ປະ­ເທດ​ຕ້ອງ​ມີຄວາມ​ຕັດ­ສິນ​ໃຈ​ການ­ເມືອງ​ສູງ, ເສີມ​ຂະ­ຫຍາຍ​ກຳ­ລັງ​ພາຍ​ໃນ ແລະ ຄວາມ​ສາ­ມາດ​ບົ່ມ​ຊ້ອນ​ຂອງ​ປະ​ເທດຢ່າງ​ສຸດ​ຂີດ, ສັບຊ້ອນບັນດາ​ເປົ້າ​ໝາຍ​ການພັດ­ທະ­ນາ​ແບບ​ຍືນ​ຍົງ ເຂົ້າ​ໃນ​ບັນ­ດາ​ນະ­ໂຍ­ບາຍ ​ແຜນຍຸດ​ທະ​ສາດ​ການ​ພັດທະ­ນາ ​ເຊິ່ງ​ໃນ​ນັ້ນ​ຕ້ອງ​ຖື​ເອົາມະ­ນຸດ​ເປັນ​ໃຈ​ກາງ; (3) ຕ້ອງ​ເພີ່ມ​ທະ­ວີ​ການ​ພົວ­ພັນ​ຄູ່​ຮ່ວມ​ມື​ທົ່ວ​ໂລກ​ເພື່ອ​ການ​ພັດ­ທະ­ນາ.

ທ່ານປະ­ທານ​ປະ­ເທດ​​ໄດ້​ໃຫ້​ຄວາມ​ແນະ­ນຳກ່ຽວ​ກັບ​​ແຜນຍຸດ​ທະ​ສາດ​ແຫ່ງ​ຊາດ​ຂອງ​ຫວຽດ­ນາມ ວ່າ​ດ້ວຍ​ການ​ພັດ­ທະ­ນາ​ແບບ​ຍືນ​ຍົງ, ຂະ​ບວນ​ວິ­ວັດ​​ການຈັດ​ວາງ​ໂຄງ​ປະ­ກອບ​ເສດ­ຖະ­ກິດ​ຄືນ­ໃໝ່, ຫັນ​ປ່ຽນ​ຕົວແບບ​ການ​ເຕີບ​ໂຕ​ຢູ່​ຫວຽດ­ນາມ; ທ່ານ​ກໍ່​ໄດ້​ເນັ້ນ​ເຖິງ​ຄວາມ​ພະ­ຍາ­ຍາມ​ຂອງ​ຫວຽດ­ນາມ​ພ້ອມ​ກັບ​ບັນ­ດາ​ປະ­ເທດ ອາ​ຊຽນ ຮັກ­ສາ​ສັນ­ຕິ­ພາບ ຄວາມ​ສະ­ຫງົບ​ຢູ່​ໃນ​ພາກ​ພື້ນ​ ເພື່ອ​ສ້າງ​ສິ່ງ­ແວ­ດລ້ອມ​ອັນ​ສະ­ດວກ​ໃຫ້​ແກ່​ການ​ພັດທະ­ນາ​ແບບ​ຍືນຍົງ, ໃນ​ນັ້ນ​ມີ​ຄວາມ​ສະ­ຫງົບ ​ຄວາມ​ປອດ​ໄພ ແລະ ​ເສລີ­ພາບ​ໃນ​ການ​ເດີນ​ທະເລ ເດີນ​ອາ­ກາດ​ຢູ່​ເຂດ​ທະ­ເລ​ຕາ­ເວັນ​ອອກ.

ຄຽງ​ຄູ່ກັບ​ການ​ກ່າວ​ປາ​ໄສ​​ໃນທີ່​ປະ­ຊຸມຢ່າງ​ເປັນ​ທາງ​ການ​ຂອງ​ກອງ​ປະ­ຊຸມ​ສຸດ​ຍອດ​ຄັ້ງ​ນີ້, ທ່ານປະທານ​ປະ­ເທດ ເຈືອງ​ເຕິນ​ຊາງ ​ແລະ ຄະ­ນະ​ຜູ້​ແທນ​ຂັ້ນ​ສູງຫວຽດ­ນາມ ຍັງ​ໄດ້​ປະກອບ​ຄວາມ​ຄິດ​ຄວາມ​ເຫັນ ​ແລກປ່ຽນ​ແບ່ງ­ປັນ​ບົດ­ຮຽນ​ຢູ່ໃນຫຼາຍ​­ການປະຊຸມ ເວ­ທີ​ປາ​ໄສ​ຂັ້ນ​ສູງ ​ທີ່​ກ່ຽວ­ຂ້ອງກັບ​ເນື້ອ​ໃນ​ຂອງ​ກອງ​ປະ­ຊຸມ: ທ່ານປະ​ທານ​ປະເທດ​ ເຈືອງ​ເຕິນ​ຊາງ ​ໄດ້​ມີ​ບົດປາ​ໄສ​ສາມ​ບົດ ​ເພື່ອແບ່ງ­ປັນ​ບົດ­ຮຽນ​ແຫ່ງ​ຜົນ­ສຳ­ເລັດ​ຂອງ​ຫວຽດ­ນາມ ກ່ຽວ​ກັບ​ການ​ພັດ­ທະ­ນາ​ຊົນ­ນະ­ບົດ​ແບບ​ຍືນ​ຍົງ, ຮັບ­ປະ­ກັນ​ຄວາມ​ສະເໝີພາບ​ທາງ​ເພດ (ເປັນ​ສອງ​ໃນ 17 ເປົ້າ​ໝາຍ​ການພັດ­ທະ­ນາ​ແບບ​ຍືນ​ຍົງ ແລະ ກໍ່​ເປັນ​ບັນ­ດາ​ຂົງ­ເຂດ​ທີ່ຫວຽດ­ນາມ​ມີ​ທ່າ­ແຮງ​ແລະໄດ້ບັນລຸ​ຜົນ­ສຳເລັດ​ຫຼາຍ​ຢ່າງ). ທ່ານປະ­ທານ​ປະ­ເທດ​ກໍ່​ໄດ້​ກ່າວ​ປາ​ໄສ​ທີ່​ກອງ​ປະ­ຊຸມ​ຂັ້ນ​ສູງ​ ກ່ຽວ​ກັບ​ການ​ເຄື່ອນ​ໄຫວ​ປົກ​ປັກ​ຮັກ­ສາ​ສັນ­ຕິ­ພາບ ​ຂອງ​ອົງ­ການ​ສະ­ຫະ​ປະ­ຊາ​ຊາດ, ໃນ​ນັ້ນ ​ເພີ່ນ​ໄດ້​ປະ­ກາດຢ່າງ​ເປັນ​ທາງ​ການ​ວ່າ ຫວຽດ­ນາມ​ຈະສົ່ງ​ໂຮງ­ໝໍ​ເຄື່ອນ​ທີ່​ຂັ້ນ 2 ແລະ ກົມ​ກອງ​ສ້າງ​ແສງ ​ໄປ​ເຂົ້າຮ່ວມ​ກຳລັງ​ຮັກສາ​ສັນຕິພາບ ​ຂອງ​ສະຫະ​ປະຊາ​ຊາດ​ ໃນ​ໄວໆ​ນີ້, ພ້ອມ​ກັນ​ນັ້ນ ກໍ່​ໄດ້​ຍົກ​ໃຫ້​ເຫັນ​​ເຖິງທັດ­ສະ­ນະ​ຂອງ​ຫວຽດ­ນາມ​ ກ່ຽວ​ກັບ​ບົດບາດ ແລະ ພາ­ລະ​ກຳ​ຮັກ​ສາ​ສັນ­ຕິ­ພາບ ​ຂອງ​ສະ­ຫະ​ປະ­ຊາ​ຊາດ.

ຕາມ​ການ​ມອບ​ສິດ​ຂອງ​ປະ­ທານ​ປະ­ເທດ, ບັນ­ດາ​ກຳ­ມະ­ການ​ຂອງ​ຄະ­ນະ​ຜູ້​ແທນ​ຂັ້ນ​ສູງຫວຽດ­ນາມ ​ໄດ້​ມີ​ການ​ເຂົ້າ​ຮ່ວມ ແລະ ປະກອບ​ຄວາມ​ຄິດ​ຄວາມ​ເຫັນ​ຢູ່​ໃນ​ຫຼາຍ​ເວ­ທີ​ປາ​ໄສ​ຂອງ​ກອງ​ປະ­ຊຸມ. ການ​ເຂົ້າ​ຮ່ວມ ແລະ ປະ­ກອບ­ສ່ວນ​ຕົວ​ຈິງ​ທີ່​ຕັ້ງ­ໜ້າ​ ໃນຫຼາຍ​ຂົງ​ເຂດ​ກ່ຽວ​ກັບ​ການ​ພັດ­ທະ­ນາ​ແບບ​ຍືນ​ຍົງ ແລະ ການຮັກ​ສາສັນຕິພາບ ​ຂອງ​ປະ­ທານ​ປະ­ເທດ ແລະ ຄະ­ນະ​ຜູ້​ແທນຫວຽດ­ນາມ​ທີ່​ກອງ​ປະ­ຊຸມ ໄດ້​ຮັບ​ການ​ຕີ​ລາ­ຄາ​ສູງ​ຈາກ​ອົງ­ການ​ສະ­ຫະ​ປະ­ຊາ​ຊາດ ແລະ ປະ­ເທດ​ຕ່າງໆ. ບັນ­ດາປະ​ເທດ​ຄູ່​ຮ່ວມ​ໄດ້​ຮັັບ​ຮູ້​ວ່າ ຫວຽດນາມບໍ່​ພຽງ​ແຕ່​ເປັນ​ສັນ­ຍາ​ລັກ​ແຫ່ງ​ການ​ຕໍ່­ສູ້​ຍາດ​ເອົາ​ເອ­ກະ­ລາດ​ແຫ່ງ​ຊາດ​ເທົ່ານັ້ນ ຫາກ​ຍັງ​ເປັນ​ແບບຢ່າງ​ອັນ​ໜຶ່ງ​ກ່ຽວ​ກັບ​ການ​ພັດ­ທະ­ນາເສດ­ຖະ­ກິດ - ສັງ­ຄົມ.

ໃນ​ເວ­ລາ​ຕ້ອນ­ຮັບປະ­ທານ​ປະ­ເທດ ເຈືອງ​ເຕິນ​ຊາງ, ທ່ານ ບານ​ ກີ​ມູນ ເລ­ຂາ­ທິ­ການ​ໃຫຍ່​ອົງ­ການ​ສະຫະ​ປະ­ຊາ​ຊາດ​ ໄດ້​ຍົກ​ໃຫ້​​ເຫັນແຈ້ງ­ວ່າ ອົງ­ການ​ສະ­ຫະ​ປະ­ຊາ​ຊາດ​ຕີ​ລາ­ຄາສູງ​ວ່າ ຫວຽດ­ນາມເປັນ​ປະເທດທີ່​ມີ​ສ່ວນ​ປະ­ກອບ­ອັນ​ຕັ້ງ­ໜ້າ​ ໃນ​ການ​ເຈລ​ລະ​ຈາ​ກ່ຽວ​ກັບເອ­ກະ­ສານຂອງ​ກອງ​ປະ​ຊຸມ​ສຸດຍອດ, ​ເປັນ​ປະ​ເທດ​ທີ່ໄດ້​ໃຫ້​ຄຳ​ໝັ້ນ​ສັນ­ຍາ​ການ­ເມືອງ​ຢ່າງ​ແຂງ­ແຮງ​ ໃນ​ການ​ປະ­ຕິ­ບັດບັນ­ດາ​ເປົ້າ​ໝາຍ​ການພັດທະ­ນາ​ແບບ​ຍືນ​ຍົງ, ເປັນ​ຈຸດ​ສະ­ຫວ່າງ​​ແຫ່ງ​ການ​ຫລຸດ­ຜ່ອນ​ຄວາມ­ທຸກ​ຍາກ, ເປັນ​ໜຶ່ງ​ໃນແປດປະເທດ​ທີ່​ນຳ​ໜ້າ​ໃນ​ການ​ປະ­ຕິ­ບັດຄວາມ​ຄິດ​ລິ​ເລີ່ມ “ອົງ­ການ​ສະ­ຫະ​ປະ­ຊາ​ຊາດ​ອັນ​ໜຶ່ງອັນ​ດຽວ”.

ຢູ່ລະບຽງ​ກອງ​ປະ­ຊຸມ, ທ່ານ​ປະ­ທານ​ປະ­ເທດ ​ແລະ ຄະນະ​ຜູ້​ແທນ​ຫວຽດນາມ ​ໄດ້​ມີ​ການ​ພົບ​ປະ​ສອງ​ຝ່າຍຕ່າງໆ ​ກັບ​ຫົວ­ໜ້າ​ຄະ­ນະ​ຜູ້​ແທນ​ຂອງ​ປະ­ມານ 20 ປະ­ເທດ​ ເພື່ອ​ແລກ­ປ່ຽນ​ກ່ຽວ​ກັບ​ບັນ­ດາ​ບັນ­ຫາ​ສາ­ກົນ​ທີ່​ສອງ​ຝ່າຍ​ມີ​ຄວາມ​ສົນ­​ໃຈ ແລະ ເພີ່ມ​ທະ­ວີ​ການ​ພົວ­ພັນ​ສອງ​ຝ່າຍ, ເປັນ­ຕົ້ນ​ແມ່ນ ​ກັບ​ບັນ­ດາ​ປະເທດ​ ເຊິ່ງ​ສອງ​ຝ່າຍ​ມີ​ຄວາມ​ຮຽກ­ຮ້ອງຕ້ອງການ​ຊຸກ­ຍູ້​ການຮ່ວມ​ມື​ຕົວ​ຈິງ ທາງ​ດ້ານ​ເສດ­ຖະ­ກິດ ການ​ຄ້າ ການ​ລົງ​ທຶນ ແຕ່ຍັງ​ບໍ່​ມີ​ໂອ­ກາດ​ພົບ​ປະ​ຂັ້ນ​ສູງ.

ໃນ​ບັນ­ດາ​ການ­ເຄື່ອນ­ໄຫວ​ສອງ​ຝ່າຍ​ເຫຼົ່າ​ນີ້, ຫວຽດ­ນາມ ແລະ ບັນ­ດາ​ປະ­ເທດ​ຄູ່​ຮ່ວມໄດ້​ມີ​ການ​ເຈລະ­ຈາ​ບັນ­ດາ​ບັນ­ຫາ​ອັນ​ລະ­ອຽດ​ ເພື່​ອ​ຊຸກ­ຍູ້​ການ​ພົວ­ພັນ​ສອງ​ຝ່າຍ, ພ້ອມ​ກັນ​ນັ້ນ​ກໍ່​ເຫັນ​ດີ​ເປັນ​ເອ­ກະ​ພາບ ເພີ່ມ​ທະວີການ​ປະ­ສານ​ສົມ­ທົບ​ຢ່າງ​ແໜ້ນ​ແຟ້ນ​ ຢູ່​​ບັນ­ດາ​ເວ­ທີ​ປາ​ໄສ​ພະຫຸ​ພາຄີ, ເປັນ­ຕົ້ນ​ແມ່ນ​ຢູ່​ໃນອົງ­ການ​ສະ­ຫະ​ປະຊາ​ຊາດ. ຄະນະ​ຜູ້​ແທນ​ບັນດາ​ປະ​ເທດ​ທີ່​ໄດ້ພົບ​ປະ​ກັບ​ຄະນະ​ຜູ້​ແທນ​ຫວຽ​ດນາມ ລ້ວນ​ແຕ່​ຕີ​ລາຄາ​ສູງ​ການລົບ​ລ້າງ​ຄວາມ​ອຶດ​ຫິວ ຫລຸດຜ່ອນຄວາມ­ທຸກ​ຍາກ​ຢູ່​ຫວຽດ­ນາມ ແລະ ​ໃຫ້​ທັດ­ສະ­ນະ​ວ່າ ຍ້ອນ​ໄດ້​ຮັບຜົນ­ສຳ­ເລັດອັນ​ໃຫຍ່​ຫຼວງ​​ນັ້ນ ຫວຽດ­ນາມ​ສົມກຽດທີ່​ສຸດທີ່​ຈະ​ໄດ້ຮັບ​ເລືອກ​ຕັ້ງ​ເປັນ​ສະ­ມາ­ຊິກ​ບໍ່​ຖາ­ວອນ​ຂອງ​ອົງ­ການ​ສະ­ຫະ​ປະ­ຊາ​ຊາດ ສະ­ໄໝ 2020 - 2021. ບັນ­ດາ​ປະ­ເທດ​ກໍ່ເຊື່ອ​ໝັ້ນ​ວ່າ ຫວຽດນາມຈະ​ສືບ​ຕໍ່​ສຳ­ເລັດບັນ­ດາ​ເປົ້າ​ໝາຍ​ການພັດ­ທະ­ນາ​ແບບ​ຍືນ​ຍົງ ​ແລະ ເຂົາ­ເຈົ້າ​ກໍ່ສະ​ແດງ​ຄວາມ​ປະສົງຢາກຮ່ວມ​ມື ປະສານ​ສົມທົບ ແລະ ຊ່ວຍ­ເຫຼືອ​ຫວຽດ­ນາມ ​ໃນ​ການ​ປະຕິບັດ​ບັນ­ດາ​ເປົ້າ​ໝາຍ​ການພັດ­ທະ­ນາ​ແບບ​ຍືນ​ຍົງ​ໄລ­ຍະ​ແຕ່ນີ້​ເຖິງ​ປີ 2030.

ບັນ­ດາ​ການ­ເຄື່ອນ­ໄຫວ​ຂອງ​ທ່ານ​ປະ­ທານ​ປະ­ເທດ ເຈືອງ​ເຕິນ​ຊາງ ແລະ ຄະ­ນະ​ຜູ້​ແທນ​ຂັ້ນ​ສູງຫວຽດນາມຄັ້ງ​ນີ້ ​ໄດ້​ສະ­ແດງ​ອອກຢ່າງ​ມີຊີ­ວິດ​ຊີ­ວາ​​ເຖິງ​ນະ­ໂຍ­ບາຍ​ທີ່ເປັນ​ເຈົ້າ​ການ ແລະ ຕັ້ງ­ໜ້າ​ເຊື່ອມ​ໂຍງ​ສາ­ກົນ, ເຊີດ​ຊູ​ແນວ­ທາງ​ການ​ພົວ­ພັນ​ຕ່າງ­ປະ­ເທດ​ຂອງຫວຽດ­ນາມ ເພື່ອ​ສັນ­ຕິ­ພາບ ການຮ່ວມ​ມື ແລະ ພັດທະນາ, ເປັນ​ຄູ່​ຮ່ວມ​ມື​ທີ່​ໄວ້​ວາງ​ໃຈ​ໄດ້, ເປັນ​ສະ­ມາ­ຊິກ​ຜູ້​ມີ​ຄວາມ​ຮັບ­ຜິດ­ຊອບ​ຂອງປະຊາ​ຄົມ​ໂລກ. ຜົນສຳເລັດ​ຂອງ​ການ​ເຄື່ອນ​ໄຫວ​ພົວພັນ​ຕ່າງປະ​ເທດທີ່​ສຳ­ຄັນ​​ເຫຼົ່ານີ້ ໄດ້​ປະ­ກອບ­ສ່ວນ​ຍົກ​ສູງ​ພາບພົດ ຖານະ​ບົດ­ບາດ​ສາ­ກົນ​ຂອງ​ຫວຽດ­ນາມ, ພ້ອມ​ກັນ​ນັ້ນ ​ກໍ່​ເພີ່ມ​ທະ­ວີ​ການ​ພົວ­ພັນ​ຮ່ວມ​ມື​ຫຼາຍ​ດ້ານ ​ກັບອົງ­ການ​ສະ­ຫະ​ປະຊາ​ຊາດ ແລະ ບັນດາປະ­ເທດ ບັນ­ດາ​ຄູ່​ຮ່ວມ​ມືທີ່​ສຳຄັນ ແລະ ເພື່ອນ​ມິດ​ທີ່​ເປັນມູນ­ເຊື້ອຂອງ​ຫວຽດນາມ./.

ສັງ​ລວມ​ໂດຍ BTV

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ