ວັນອາທິດ, 31/5/2020
ທ່ານປະທານປະເທດ ເຈືອງເຕິນຊາງ ແລະ ຄະນະຜູ້ແທນຂັ້ນສູງ ແຫ່ງ ສສ.ຫວຽດນາມ ໄປຢ້ຽມຢາມ ແລະ ເຮັດວຽກ ຢູ່ປະເທດສາທາລະນະລັດ ກູບາ
17/10/2015 10:9' ສົ່ງ ພິມ
ທ່ານປະທານສະພາແຫ່ງລັດ ກູບາ ຣາອູນ ກາສະໂຕຣ ແລະ ທ່ານປະທານປະເທດ ເຈືອງເຕິນຊາງ ກວດແຖວກອງກຽດຕິຍົດ. (ພາບ: TTXVN)

ການ​ຢຽ້ມ​ຢາມ​ປະ­ເທດ ສ.ກູ​ບາ ຢ່າງ​ເປັນ​ທາງ​ການ​ຂອງທ່ານ​ປະ­ທານ​ປະ­ເທດ ເຈືອງ​ເຕິນ​ຊາງ​ ໄດ້​ດຳ​ເນີນ​ໄປໃນ​ສະ­ພາບ​ການ​ເຊິ່ງ​ທັງ​ສອງ​ປະ­ເທດ​ກຳ­ລັງ​ສະ­ເຫຼີມ­ສະ­ຫຼອງ​ວັນ​ສ້າງ­ຕັ້ງສາຍ​ພົວ­ພັນ​ທາງ​ການ​ທູດ ລະ­ຫວ່າງ ສສ.ຫວຽດ­ນາມ ແລະ ສ.ກູ​ບາ ຄົບ­ຮອບ 55 ປີ (ວັນທີ 2 ທັນ­ວາ 1960 - ວັນທີ 2 ທັນວາ 2015). ນີ້​ແມ່ນ​ການ​ສືບ​ທອດ​ມູນ­ເຊື້ອ​ການ​ພົວ­ພັນ​ສາ­ມັກ­ຄີ​ຖານ​ອ້າຍ​ນ້ອງ ຫວຽດ­ນາມ - ກູ​ບາ ທີ່ໄດ້​ຄຽງ​ບ່າ​ຄຽງ​ໄລ່​ກັນ​ໃນ​ຕະ­ຫຼອດ​ໄລ­ຍະ 55 ປີ​ທີ່​ຜ່ານ​ມາ.

ນັບ​ແຕ່​ວັນ​ສ້າງຕັ້ງ​ສາຍ​ພົວ­ພັນ​ທາງການ​ທູດລະຫວ່າສອງ​ປະ​ເທດ​ເປັນ​ຕົ້ນ​ມາ, ການ​ພົວ­ພັນ​ຮ່ວມ​ມື​ຮອບ­ດ້ານ ຫວຽດ­ນາມ - ກູ​ບາ ໄດ້​ຮັບ​ການ​ປັບ­ປຸງ ແລະ ພັດ­ທະ­ນາ​ຢ່າງ​ບໍ່​ຢຸດ​ຢັ້ງ. ກ່ຽວ​ກັບ​ການ​ຮ່ວມ​ມື​ດ້ານ​ການ­ເມືອງ - ການ​ທູດ, ສອງ​ຝ່າຍ​ໄດ້ດຳ​ເນີນ​ການ​ຢ້ຽມ­ຢາມ ​ເຮັດ​ວຽກ​ຢ່າງ​ເປັນ​ປະຈຳ ​ລະ­ຫວ່າງ​ການ​ນຳ​ຂັ້ນ​ສູງ ກະ­ຊວງ ຂະ­ແໜງ­ການ​ຕ່າງໆ ແລະ ບັນ­ດາ​ກອງ​ປະ­ຊຸມ​ປະ­ຈຳ​ປີ​ຂອງ​ຄະ­ນະ​ກຳ­ມະ­ການ​ລະຫວ່າງ​ລັດ­ຖະ­ບານ​ສອງ​ປະ­ເທດ. ອາດ​ຈະ​ນັບ​ເຖິງ​ບັນ­ດາ​ການ​ຢ້ຽມ­ຢາມ ສ.ກູ​ບາ ຂອງ​ການ​ນຳ​ປະ­ເທດ​ຫວຽດ­ນາມ ຄື: ການ​ຢ້ຽມ­ຢາມ​ຂອງທ່ານ ນົງ​ດຶກ​ແມ້ງ ເລ­ຂາ­ທິ­ການ​ໃຫຍ່​ພັກ​ກອມ​ມູ​ນິດ​ຫວຽດ­ນາມ (​ປີ 2007), ທ່ານ​ປະ­ທານ​ປະ­ເທດ ຫງວ​ຽນ​ມິງຈຽດ (​ປີ 2009), ທ່ານ​ປະ­ທານ​ສະ­ພາ​ແຫ່ງ​ຊາດ ຫງວ​ຽນ​ຟູ​ຈ້ອງ (​ປີ 2010), ທ່ານ ຫງວ​ຽນ​ຟູ​ຈ້ອງ ເລ­ຂາ­ທິ­ການ​ໃຫຍ່​ພັກ​ກອມ​ມູ​ນິດ​ຫວຽດ­ນາມ (​ປີ 2012), ທ່ານ ເລ​ຮົ່ງ​ແອງ ຜູ້ປະ­ຈຳການ​ຄະ­ນະ​ເລ­ຂາ­ທິ­ການ (​ປີ 2013) ແລະ ທ່ານ ຫງວ​ຽນ​ເຕິນ​ຢຸງ ນາ­ຍົກ­ລັດ­ຖະ­ມົນ­ຕີ (ປີ 2014). ​ທາງຝ່າຍ ກູ​ບາ, ມີ​ບັນ­ດາ​ການ​ຢ້ຽມ­ຢາມ​ປະ­ເທດ ສສ.ຫວຽດ­ນາມ​ຄື: ການ​ຢ້ຽມ­ຢາມ​ຂອງທ່ານ​ປະທານ ​ຟີ​ແດນ ກາ​ສະ​ໂ​ຄຣ (​ປີ 2003), ທ່ານ​ຮອງ​ປະ­ທານ ຣາ​ອູນ ກາ​ສະ​ໂ​ຕຣ (​ປີ 2005), ທ່ານ​ປະທານ​ສະ­ພາ​ແຫ່ງ​ຊາດ ຣີ​ກາ​ໂດ ອາ​ລາ​ກອນ (​ປີ 2007), ທ່ານ​ກຳ­ມະ­ການ​ກົມ​ການ­ເມືອງ ຮອງ​ປະ­ທານ​ຄະນະລັດຖະມົນຕີ ມາ​ຣີ​​ໂນ ມູ​ຣີນ​ໂລ ໂຈ​ເກ (​ປີ 2012), ທ່ານ​ຮອງ​ປະ­ທານ​ສະ­ພາ​ແຫ່ງ​ລັດ​ຜູ້​ທີ​ໜຶ່ງ ລັດຖະ­ມົນ­ຕີກູ​ບາ ມີ​ແກວນ ດີ​ອາດ ກາ​ເນນ (​ປີ 2013).

​ໃນ​ການ​ຢ້ຽມ­ຢາມ​ຄັ້ງ​ນີ້ ຂອງ​ທ່ານ​ປະ­ທານ​ປະ­ເທດ ເຈືອງ​ເຕິນ​ຊາງ, ສອງ​ຝ່າຍ​ໄດ້​ມີ​ການ​ພົບ​ປະຫາລື ​ເພື່ອ​ແຈ້ງ​ໃຫ້​ກັນ​ຊາບ​ກ່ຽວ​ກັບ​ສະ­ພາບ​ການ​ຂອງ​ແຕ່​ລະ​ປະ­ເທດ, ແລກ­ປ່ຽນ​ທິດທາງ ແລະ ມາດ​ຕະ­ການ​ຕ່າງໆ ​ແນ­ໃສ່​ສືບ​ຕໍ່​ເພີ່ມ​ທະ­ວີ​ສາຍ​ພົວ­ພັນ​ສາ­ມັກ­ຄີ​ຖານ​ອ້າຍ​ນ້ອງ, ການຮ່ວມ​ມື​ຮອບ­ດ້ານ​ລະ­ຫວ່າງ ຫວຽດ­ນາມ - ກູ​ບາ ກໍ່​ຄື​ແລກ­ປ່ຽນ​ກ່ຽວ​ກັບ​ບັນ­ດາ​ບັນ­ຫາ​ພາກ​ພື້ນ ແລະ ສາ­ກົນ​ທີ່​ສອງ​ຝ່າຍ​ເອົາ­ໃຈ­ໃສ່.

ການ​ຢ້ຽມ­ຢາມ​ໄດ້ດຳ​ເນີນ​ໄປ​ໃນ​ເວ­ລາທີ່​ປະເທດກູ​ບາ ກຳ­ລັງ​ມີ​ການ​ຫັນ­ປ່ຽນ​ຢ່າງ​ຕັ້ງ­ໜ້າ​ທີ່​ສຸດ. ​ໂດຍ​ຕັ້ງ​ຢູ່​ໝູ່​ເກາະ​ໜຶ່ງ​ໃນ​ເຂດ​ທະ­ເລ ​ແຄຣິບ​ບຽນ, ປະ​ເທດກູ​ບາ​ມີ​ແຮ່​ທາດ​ຫຼວງ​ຫຼາຍ, ດິນດອນ​ອຸ­ດົມ­ສົມ­ບູນ ເໝາະ​ສົມກັບ​ການ​ປູກ­ຕົ້ນ​ໄມ້​ອຸດ­ສາ­ຫະ­ກຳ ແລະ ລ້ຽງ­ສັດ​ໃຫຍ່. ປະ­ເທດກູ​ບາ ກໍ່​ມີ​ເງື່ອນ­ໄຂ​ທຳ​ມະ​ຊາດ ວັດ­ທະ­ນະ­ທຳ​​ເອື້ອອຳນ​ວຍ​ໃຫ້​ແກ່​ການ​ພັດ­ທະ­ນາ​ຂະ­ແໜງ­ການ​ທ່ອງ​ທ່ຽວ. ກອງ​ປະ­ຊຸມ​ໃຫຍ່ຄັ້ງ​ທີ VI ຂອງ​ພັກ​ກອມ​ມູ​ນິດກູ​ບາ ໃນ​ປີ 2014 ໄດ້​ຮັບ­ຮອງ​ຜ່ານ​ແນວ­ທາງ​ເສດ­ຖະ­ກິດ - ສັງ­ຄົມ​ໃໝ່​ຂອງ​ປະ­ເທດ ​ເຊິ່ງມີ​ເນື້ອ​ໃນ 311 ປະການ​ແຫ່ງ​​ຂະ​ບວນ​ວິ­ວັດ “​ການອັບ​ເດດ​ຕົວ​ແບບ​ເສດ­ຖະ­ກິດ”, ຫັນ​ເປັນ​ທາງ​ການ​ຕໍ່ບັນດາມາດຕະການ​ປະ­ຕິ​ຮູບເສດ­ຖະ­ກິດ ທີ່ໄດ້ແລະພວມ​​ໄດ້ໝູນ​ໃຊ້ ແລະ ປັບ­ປຸງ​ເພີ່ມ​ເຕີ່ມ​ມາດ​ຕະ­ການ​ໃໝ່​ຈຳ­ນວນ​ໜຶ່ງ.

ກູ​ບາ ໄດ້​ຜັນ​ຂະ­ຫຍາຍ​ນະ­ໂຍ­ບາຍ​ການ​ພົວ­ພັນ​ຕ່າງ­ປະ­ເທດ​ຢ່າງຂະ­ຫຍັນ​ຂັນ​ເຄື່ອນ, ເດັດ­ດ່ຽວ​ຕ້ານ​ລັດ­ທິ​ຈັກ­ກະ­ພັດ, ຕັ້ງ­ໜ້າ​ສະ­ໜັບ­ສະ­ໜູນ​ຂະ​ບວນ​ການ​ປະ­ຕິ­ວັດ​ປົດ​ປ່ອຍຊາດ ແລະ ເອ­ກະ­ລາດ​ແຫ່ງ​ຊາດ, ຕໍ່ສູ້​ເພື່ອ​ສັນຕິພາບ ​ເອກະລາດ​ແຫ່ງ​ຊາດ ປະ­ຊາ­ທິ­ປະ­ໄຕ ແລະ ສັງ­ຄົມ​ນິ­ຍົມ. ແຕ່​ຕົ້ນ​ທົດ​ສະ​ວັດທີ 9 ຂອງ​ສະ­ຕະ­ວັດທີ XX, ກູ​ບາ​ໄດ້​ດັດ­ແປງ​ນະ­ໂຍ­ບາຍ​ການ​ພົວ­ພັນ​ຕ່າງ­ປະ­ເທດ​​ເທື່ອ​ລະ​ກ້າວ ​ເພື່ອ​ໃຫ້​ເໝາະ​ສົມ​ກັບ​ສະ­ພາບ​ການ​ໃໝ່ ແນ­ໃສ່​ຫັນການ​ພົວພັນ​ຕ່າງປະ​ເທດເປັນ​ຫຼາຍຮູບ​ຫຼາຍ​ແບບ, ຍູ້​ແຮງ​ການ​ພົວ­ພັນ​ກັບ​ບັນ­ດາ​ປະ­ເທດ​ຢູ່ ລາ​ຕິນອາ​ເມຣິກາ ແລະ ​ແຄ​ຣິບ​ບຽນ, ພິ­ເສດ​ແມ່ນ​ການ​ພົວ­ພັນ​ຍຸດ​ທະ​ສາດ​ກັບ ເວ​ເນ​ຊູ​ເອ​ລາ. ປັດ­ຈຸ​ບັນ ກູ​ບາ ກຳ­ລັງ​ດຳ­ເນີນ​ການ​ເຈລະ­ຈາ​ເພື່ອ​ຟື້ນ​ຟູ​ການ​ພົວ­ພັນ​ເປັນ​ປົກກະຕິ ກັບສະຫະລັດອາ​ເມ​ຣິກາ ແລະ ສະ­ຫະ­ພັນ ເອີຣົບ ຢ່າງ​ຕັ້ງ­ໜ້າ ຕາມ​ຫຼັກ­ການ​ເຄົາ­ລົບ​ນັບ­ຖືເອ­ກະ­ລາດ ອະ­ທິ­ປະ​ໄຕ​ຂອງ​ກັນ. ກູ​ບາ ກໍ່​ໄດ້​ເປັນ​ເຈົ້າ​ການ, ​ເຄື່ອນ​ໄຫວ​ຢ່າງ​ຕັ້ງ­ໜ້າ​ຢູ່​ທີ່​ບັນ­ດາ​ອົງ​ການ­ຈັດ­ຕັ້ງ​ສາ­ກົນ ແລະ ເວ­ທີ​ປາ​ໄສ​ຫຼາຍ​ຝ່າຍ...

ຕໍ່ກັບຫວຽດ­ນາມ, ລັດ­ຖະ­ບານ ແລະ ປະ­ຊາ­ຊົນກູ​ບາ ​ໄດ້​ຮັບ​ຮູ້​ວ່າ ການ​ປ່ຽນ​ແປງ​ໃໝ່​ໃນ​ເວລາ​ເກືອບ 30 ປີ​ທີ່​ຜ່ານ​ມາ​ຂອງ​ຫວຽດນາມ ​ໄດ້​ບັນລຸ​ຜົນສຳ​ເລັດ​ອັນ​ຍິ່ງ​ໃຫຍ່ ແລະ ຮອບ­ດ້ານ ​ເຊິ່ງ​ໄດ້​ປົວ­ແປງ​ຊີ­ວິດ​ການ​ເປັນ​ຢູ່ດ້ານ​ວັດຖຸ ແລະ ຈິດ­ໃຈ​ຂອງ​ບັນ­ດາ​ຊັ້ນ​ຄົນ​ປະ­ຊາ­ຊົນ​​ໃຫ້​ດີ​ຂຶ້ນ​ເລື້ອຍໆ ​ແລະ ​ໄດ້​ຍົກ​ບົດບາດ​ຖາ­ນະສາ­ກົນ​ຂອງ​ຫວຽດນາມ​ໃຫ້​ສູງຂຶ້ນ. ນອກ­ຈາກນັ້ນ, ບັນ­ດາ​ບົດ­ຮຽນ​ຂອງຫວຽດ­ນາມ ທີ່​ຖອດ​ຖອນ​ມາ​ໄດ້​ຈາກ​ການ​ປ່ຽນ​ແປງ​ໃໝ່ ກໍ່­ສ້າງ ແລະ ປົກ​ປັກ​ຮັກ­ສາ​ປະ­ເທດ​ຊາດ​ນັ້ນ ກໍ່ເປັນ​ບັນ­ດາ​ບົດ­ຮຽນ​ທີ່​ປະ­ເສີດ​ສຳ­ລັບ ກູ​ບາ.

ບັນ­ດາ​ເງື່ອນ­ໄຂ​ອັນ​ສະ­ດວກ​ດັ່ງ­ກ່າວ​ນັ້ນ ໄດ້​ສ້າງ​ກຳລັງ​ແຮງ​ພັດ­ທະ­ນາ ​ໃຫ້​ແກ່​ການ​ພົວ­ພັນ​ລະຫວ່າງ​ສອງ​ປະ­ເທດ​ໃນ​ປັດ­ຈຸ​ບັນ, ພິ­ເສດ​ແມ່ນ ການ​ຮ່ວມ​ມື​ລະ­ຫວ່າງ​ສອງ​ປະ­ເທດ​ໃນ​ຫຼາຍ​ຂົງ­ເຂດ​ໃນ​ເວລາ​ທີ່​ຜ່ານ​ມາ​ໄດ້​ບັນ­ລຸ­ຜົນ​ງານ​ອັນ​ດີ­ງາມຫຼາຍ​ຢ່າງ. ກ່ຽວ​ກັບ​ດ້ານ​ເສດ­ຖະ­ກິດ - ການ​ຄ້າ, ​ມູນຄ່າ​ການ​ຄ້າ​ລະ­ຫວ່າງ​ສອງ​ປະ­ເທດ​ໄດ້​ເພີ່ມ​ຂຶ້ນ​ຕາມ​ແຕ່​ລະ​ປີ, ​ປີ 2012 ບັນລຸ 175 ລ້ານໂດ​ລາ​ສະ­ຫະ­ລັດ, ​ປີ 2014 ໄດ້​ເພີ່ມ​ຂຶ້ນ​ເປັນ​ 200 ລ້ານໂດ​ລາ​ສະ­ຫະ­ລັດ.  ສິນຄ້າ​ທີ່ຫວຽດ­ນາມ​ສົ່ງນອກ​ໄປ​ຍັງ ກູ​ບາ ­ຕົ້ນຕໍ່​ແມ່ນ​ບັນ­ດາ​ຜະ­ລິດ​ຕະ​ພັນ​ຄື ເຂົ້າສານ ແລະ ສິນ­ຄ້າ​ບໍ­ລິ­ໂພກ; ສິນຄ້າ​ທີ່​ນຳ​ເຂົ້າ​ຈາກ​ປະ­ເທດ ກູ​ບາ​ ແມ່ນ​ບັນ­ດາ​ຜະ­ລິດ​ຕະ​ພັນ​ຊີ­ວະ​ພາບ ແລະ ຢາ​ປົວ​ພະ­ຍາດ. ວິ​ສາ​ຫະ​ກິດຫວຽດ­ນາມ​ຈຳ­ນວນ​ໜຶ່ງ​ ກຳລັງ​ຊຸກ­ຍູ້ໂຄງ­ການ​ລົງ­ທຶນ​​ກໍ່­ສ້າງ​ພື້ນ­ຖານ​ໂຄງ​ລ່າງ ການ­ທ່ອງ­ທ່ຽວ, ວັດ​ສະ​ດູ​ການ​ກໍ່­ສ້າງ, ພະ​ລິດ​ຜົງ​ຊັກ... ໃນປັດຈຸ​ບັນ, ການ​ແລກ­ປ່ຽນ​ການ​ຄ້າ​ສອງ​ສົ້ນ​ລະ­ຫວ່າງຫວຽດ­ນາມ - ກູ​ບາ ກໍ່​ຍັງ​ມີ​​ຄວາມ​ສາ­ມາດບົ່ມ​ຊ້ອນຫຼວງ​ຫຼາຍ ເພື່ອ​ພັດ­ທະ­ນາ​ຢ່າງ​ແຂງ­ແຮງ​ກວ່າ​ອີກ, ສ້າງ​ໂອ­ກາດ​ອຳນວຍຫຼາຍຢ່າງ​ໃຫ້​ແກ່​ວິ​ສາ​ຫະ​ກິດ​ຫວຽດ­ນາມເຂົ້າ​ເຖິງ​ຕະ­ຫຼາດ, ຊອກ​ຫາ​ໂອ­ກາດ​ລົງ­ທຶນ​ທີ່ປະ­ເທດ ກູ​ບາ ໃນ​ບັນ­ດາ​ຂົງ­ເຂດ​ກໍ່­ສ້າງ, ຜະ­ລິດ​ອຸປະ­ກອນ​ການ​ກໍ່­ສ້າງ ແລະ ສິ​ຄ້າ​ບໍ­ລິ­ໂພກ, ພະ­ລັງ­ງານ, ອຸດ­ສາ­ຫະ­ກຳ​ປຸງ​ແຕ່ງ​ສະ­ບຽງ​ອາ­ຫານ, ການ​ຄ້າ.

ກ່ຽວ​ກັບ​ການ​ລົງ­ທຶນ, ຕໍ່­ໜ້າ​ການ​ປ່ຽນ­ແປງ​ຕ່າງໆ​ທາງ​ດ້ານ​ການ​ຄຸ້ມ​ຄອງບໍລິຫານ ເສດ­ຖະ­ກິດ ສິ່ງແວ­ດລ້ອມ​ແຫ່ງ​ການ​ລົງ­ທຶນ​ຂອງ ກູ​ບາ, ວິ​ສາ​ຫະ​ກິດຫວຽດ­ນາມ​ກໍ່​ນັບ​ມື້​ນັບ​ເອົາ­ໃຈ­ໃສ່ເຖິງ​ບັນ­ດາ​ໂຄງການ​ລົງ­ທຶນ​ຢູ່​ປະ­ເທດກູ​ບາ.

ໃນ​ການ​ຊ່ວຍ­ເຫຼືອ​ການ​ພັດ­ທະ­ນາ, ຫວຽດ­ນາມໄດ້​ຊ່ວຍ­ເຫຼືອ ກູ​ບາ ຜັນ​ຂະ​ຫ​ຍາຍ​ບັນ­ດາ​ໂຄງ­ການ​ພັດທະນາການ​ຜະ­ລິດ​ເຂົ້າຂະ­ໜາດ​ຄອບ­ຄົວ​ໄລ­ຍະ IV (2011 – 2015) ​ເຊິ່ງ​ໄດ້​ບັນ­ລຸ​ຜົນ­​ອັນ​ຕັ້ງ­ໜ້າ. ບັນ­ດາ​ໂຄງ­ການ​ຊ່ວຍ­ເຫຼືອກູ​ບາ ປູກ​ສາ­ລີ ໝາກ​ຖົ່ວ­ເຫຼືອງ ແລະ ​ລ້ຽງ​ສັດ​ນ້ຳ​ ໄດ້ສຳ​ເລັດ​ສິ້ນ​ສຸດ​ໄລ­ຍະ​ທີ​ໜຶ່ງ ແລະ ກຳ­ລັງ​ປະ­ຕິ­ບັດ​ໄລ­ຍະ​ທີ​ສອງ. ຫວຽດ­ນາມ ແລະ ກູ​ບາ ພ້ອມ​ກັນ​ຊຸກ​ຍູ້​ການ​ຮ່ວມ​ມື​ລະ­ຫວ່າງ ກຸ່ມ​ບໍລິສັດ​ໂທລະ​ຄົມ­ມະ­ນາ­ຄົມ ກອງ­ທັບຫວຽດນາມ (Viettel - ຫວຽດ​ແທວ) ແລະ ບໍ­ລິ­ສັດ​ໂທລະ​ຄົມມະນາຄົມແຫ່ງ​ລັດ ກູ​ບາ (ETECSA) ໃນ​ຂົງ​ເຂດ​ໂທລະ​ຄົມ­ມະ­ນາ­ຄົມ. ນອກ­ຈາກ​ນັ້ນ ການ​ຮ່ມມື​ລະຫວ່າງສອງ​ປະ​ເທດ​ໃນ​ຂົງ​ເຂດ​ປ້ອງ​ກັນ​ຊາດ-ປ້ອງ​ກັນ​ຄວາມ​ສະ­ຫງົບ, ການ​ສຶກ​ສາ-ກໍ່­ສ້າງ, ວັດທະນະທຳ, ການ​ແພດ-​ໂອສົດ, ວິ­ທະ­ຍາ­ສາດ-ເຕັກ­ນິກ ກໍ່​ໄດ້​ຮັບ​ການ​ເອົາ­ໃຈ­ໃສ່ ແລະ ເພີ່ມ​ທະ­ວີ​ຍິ່ງກວ່າ​ອີກ.

ການ​ໄປ​ຢ້ຽມ­ຢາມ​ປະ­ເທດ ສ.ກູ​ບາ ຂອງ​ທ່ານ​ປະ­ທານ​ປະ­ເທດຫວຽດ­ນາມ ເຈືອງ​ເຕິນ​ຊາງ ຄັ້ງ​ນີ້ ເປັນ​ໂອ­ກາດ​ເພື່ອ​ຢັ້ງຢືນອະ­ນາ​ຄົດອັນ​ດີ­ງາມ​ແຫ່ງ​ການ​ພັດທະນາ​ການ​ພົວພັນ​ລະ­ຫວ່າງ​ສອງ​ປະ­ເທດ. ຕາມ​ນັ້ນ, ການ​ນຳ​ຂັ້ນ​ສູງ​ຂອງ​ສອງ​ປະ­ເທດ​ໄດ້​ເຫັນ​ດີ​ຈະ​ສືບ​ຕໍ່​ເພີ່ມ​ທະ­ວີ​ການ​ແລກ­ປ່ຽນຄະນະ​ຜູ້​ແທນ ການພົບ​ປະ​ຢູ່​ທຸກ​ຂັ້ນ ທຸກຂະ­ແໜງ­ການ, ເນັ້ນ​ເຖິງ​ບູ​ລິ​ມະ​ສິດ​ການ​ແລກ­ປ່ຽນ​ບົດ­ຮຽນ​​ແຫ່ງ​ການ​ພັດ­ທະ­ນາ​ຢູ່​ແຕ່​ລະ​ປະເທດ ແນ­ໃສ່​ຍົກ​ສູງ​ຄວາມ​ເຂົ້າ​ໃຈ​ຊຶ່ງ​ກັນ​ແລະ​ກັນ, ປັບ­ປຸງ​ຄວາມ​ໄວ້​ເນື້ອ​ເຊື່ອ​ໃຈ​ກັນ. ຄຽງຂ້າງ​ນັ້ນ ຈະ​ສືບ​ຕໍ່​ຮັກ­ສາ ແລະ ຍົກ​ສູງ​ປະ​ສິດ­ທິ​ຜົນຂອງ​ບັນ­ດາ​ກົນ​ໄກ ຄະ­ນະ​ກຳ­ມະ­ການ​ລະ­ຫວ່າງ​ລັດ­ຖະ­ບານ, ການ​ສົນທະນາ​ຍຸດ​ທະ​ສາດ​ຂັ້ນ​ລັດ­ຖະ­ມົນ­ຕີຊ່ວຍ​ວ່າການ​ກະຊວງ​ການ​ປ້ອງ​ກັນ​ຊາດ ແລະ ການປຶກ­ສາ​ຫາ­ລື​ການເມືອງ​ຂັ້ນລັດຖະມົນຕີ​ຊ່ວຍ​ວ່າ­ການກະຊວງ​ການ​ຕ່າງ­ປະ­ເທດ; ກວດ­ຄືນ ແລະ ປັບ­ປຸງ​ບູ­ລະ­ນະຂອບ​ກົດ­ໝາຍ​ເທື່ອ​ລະ​ກ້າວ, ໃນ​ນັ້ນ​​ບູ​ລິ​ມະ​ສິດ​ຍູ້​ແຮງ​ການ​ເຈລະ­ຈາ ແລະ ເຊັນ​ສັນ­ຍາ​ການ​ຄ້າ​ສະບັບ​ໃໝ່​ໂດຍ​ໄວ ​ເພື່ອແທນ​ໃຫ້ສັນ­ຍາ​ທີ່​ໄດ້​ເຊັນ​ໃນ​ປີ 1996, ແນ­ໃສ່ອຳນວຍ​ຄວາມ​ສະ­ດວກ​ດີ​ທີ່​ສຸດ​ໃຫ້​ແກ່​​ການ­ເຄື່ອນ­ໄຫວ​ຮ່ວມ​ມື​ດ້ານ​ເສດ­ຖະ­ກິດ - ການ​ຄ້າ ແລະ ການ​ລົງ­ທຶນ.

ກ່ຽວ​ກັບ​ບັນ­ດາ​ຂົງ­ເຂດ​ຮ່ວມ​ມື​ອັນ​ລະ­ອຽດ, ການ​ນຳ​ທັງ​ສອງ​ທ່ານ​ໄດ້​ເຫັນ​ດີ​ເປັນ​ເອ­ກະ​ພາບ​ຈະ​ສືບ​ຕໍ່​ຊີ້​ນຳ​ຍົກ​ສູງ​ປະ​ສິດ­ທິ​ຜົນ​ຂອງບັນ­ດາ​ໂຄງ­ການ​ຮ່ວ​ມມື​ດ້ານ​ກະ­ສິ­ກຳ ແລະ ການ​ປະມົງທີ່​ໄດ້ ແລະ ກຳ­ລັງ​ຜັນ​ຂະ­ຫຍາຍ​ ໃນ​ເວ­ລາ​ຕໍ່​ໄປ; ສ້າງ​ຄວາມ​ສະ­ດວກ​ໃຫ້​ແກ່​ວິ​ສາ​ຫະ​ກິດ​ຂອງ​ສອງ​ປະ­ເທດ​ເຂົ້າ​ເຖິງ​ຕະ­ຫຼາດ, ກໍ່​ຄື​ຜັນ​ຂະ​ຫຍາຍ​​ໂຄງ­ການ​ຮ່ວມ​ມື​ໃນ​ບັນ­ດາ​ຂົງ­ເຂດ​ຄື ​ນ້ຳ­ມັນອາຍ​ແກັສ, ກໍ່­ສ້າງ​ພື້ນ­ຖານ​ໂຄງ​ລ່າງ​ການທ່ອງທ່ຽວ, ຜະ­ລິດ​ອຸ­ປະ­ກອນ​ກໍ່­ສ້າງ, ສິນ­ຄ້າ​ບໍ­ລິ­ໂພກ, ຄົ້ນ​ຄ້ວ​າ ແລະ ຜະ­ລິດ​ຊອບ​ແວ ​ເຄື່ອງຈັກ​ເຄື່ອງ​ປະກອບ​ການ​ໂທລະ​ຄົມ­ມະ­ນາ­ຄົມ...; ພິ­ຈາ­ລະ­ນາ​ຄວາມສາມາດສ້າງ​ຕັ້ງ​ກົນ​ໄກ​ທີ່​ເໝາະ​ສົມ​ ເພື່ອ​ເພີ່ມ​ທະ­ວີ​ການ​ຮ່ວມ​ມື​ຄົ້ນ­ຄວ້າ ທົດ​ລອງ ຜະ­ລິດ​ຢາ​ປົວ​ພະຍາດປະ­ເພດ​ຕ່າງ​ໆ ຕາມ​ທ່າ­ແຮງ​ຂອງ​ແຕ່​ລະ​ປະ­ເທດ ແລະ ບັນ­ດາ​ປະ­ເພດ​ຊີ­ວະພາບ​ທາງ​ການ​ແພດ​ລຸ່ນ​ໃໝ່; ສືບ​ຕໍ່​ເອົາ­ໃຈ­ໃສ່​ຊຸກ­ຍູ້​ການ​ຮ່ວມ​ມື​ລະ­ຫວ່າງ​ສອງ​ປະເທດ​ໃນ​ບັນ­ດາ​ຂົງ­ເຂດ​ຄື: ວັດ­ທະ­ນະ­ທຳ, ກິ­ລາ, ການ­ທ່ອງ­ທ່ຽວ, ການ​ສຶກ​ສາ-ກໍ່­ສ້າງ.

ກ່ຽວ​ກັບ​ການ​ຮ່ວມ​ມື​ຫຼາຍ​ຝ່າຍ, ສອງ​ປະ­ເທດ​ສືບ​ຕໍ່​ເພີ່ມ​ທະ­ວີການ​ປະ­ສານ​ສົມ­ທົບ ຮ່ວມ​ມື ແລະ ສະໜັບ­ສະ­ໜູນ​ເຊິ່ງ​ກັນແລະກັນ ຢູ່​ທີ່​ບັນ­ດາ​ອົງ​ການ­ຈັດ­ຕັ້ງ​ສາ­ກົນ ແລະ ເວ­ທີ​ປາ​ໄສ​ຫຼາຍ​ຝ່າຍ ແນ­ໃສ່​ປົກ​ປັກ​ຮັກ­ສາ​ຜົນ​ປະ­ໂຫຍດ​ອັນຊອບ​ທຳ, ຍົກ​ສູງ​ອິດ​ທິ​ພົນ ແລະ ຖາ­ນະ​ບົດ­ບາດ​ຂອງ​ແຕ່​ລະ​ປະ­ເທດ; ພ້ອມ​ກັນ​ນັ້ນ ປະ­ກອບ­ສ່ວນ​ເຂົ້າ​ໃນ​ການ​ຕໍ່­ສູ້​ລວມ​ເພື່ອ​ສັນ­ຕິ­ພາບ ສະ​ຖຽມ​ລະ​ພາບ ແລະ ການຮ່ວມ​ມື​ຢູ່​ສອງ​ພາກ​ພື້ນ ແລະ ໃນ​ໂລກ.

ການ​ຢ້ຽມ­ຢາມຂອງ​ທ່ານ​ປະທານ​ປະ​ເທດ ​ເຈືອງ​ເຕິ​ນຊາງ ​ແລະ​ຄະນະ​ຜູ້​ແທນ​ຫວຽດນາມ ​ໄດ້​ຮັບການຕ້ອນຮັບ​ຢ່າງ​ສົມ​ກຽດ ​ແລະ ​ດ້ວຍ​ມິດ​ຈິດ​ມິດ​ໃຈ ຄວາມ​ຮັກ​ແພງ ຄວາມເຄົາ­ລົບ​ນັບ­ຖື​ຂອງ​ລັດ­ຖະ­ບານ ແລະ ປະ­ຊາ­ຊົນກູ​ບາ ທີ່​ມີ​ຕໍ່ຫວຽດ­ນາມ ເຊິ່ງສິ່ງ​ທີ່​ສະ­ແດງ​ອອກຢ່າງມີ​ຊີ­ວິດ​ຊີ­ວາ​ກວ່າ​ໝູ່​ນັ້ນ​ແມ່ນ ​ທ່ານ​ປະທານ​ປະ­ເທດຫວຽດ­ນາມ ເຈືອງ​ເຕິນ​ຊາງ ໄດ້​ຮັບຫຼຽນ​ໄຊ ໂຈ​ເຊ ມາ­ຕີ ​ເຊິ່ງເປັນ​ລາ­ງວັນ​ອັນ​ປະ­ເສີດ​ເລີດ​ລ້ຳ​ທີ່​ສຸດຂອງ ພັກ ແລະ ລັດ​ທະ​ບານກູ​ບາ ປະດັບ​ໃຫ້ການ​ນຳ ແລະ ບູ​ລຸດ​ຜູ້ລື​ຊື່​ຕ່າງ­ປະ­ເທດ. ນີ້​ແມ່ນ​ພື້ນຖານ​ອັນ​ໝັ້ນ​ແກ່ນ​ທີ່​ປະ­ກອບ­ສ່ວນ​ເຂົ້າໃນ​ການ​ພັດ­ທະ­ນາ​ການ​ພົວ­ພັນ​ມິດ­ຕະ­ພາບ ສາ­ມັກ­ຄີຖານ​ອ້າຍ​ນ້ອງ ​ລະ­ຫວ່າງ​ສອງ​ປະ­ເທດ​ໃນ​ເວ­ລາ​ຕໍ່ໜ້າ.

ສັງ​ລວມ​ໂດຍ ​ເຟືອງ​ຈ່າ

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ