ວັນອາທິດ, 31/5/2020
ທ່ານ ສີ ຈິ້ນຜິງ ເລຂາທິການໃຫຍ່ ປະທານປະເທດ ແຫ່ງສາທາລະນະລັດ ປະຊາຊົນຈີນ ມາຢ້ຽມຢາມຂັ້ນລັດ ທີ່ສາທາລະນະລັດ ສັງຄົມນິຍົມຫວຽດນາມ
22/11/2015 20:23' ສົ່ງ ພິມ
ທ່ານເລຂາທິການໃຫຍ່ ຫງວຽນຝູຈ້ອງ ພົບປະຫາລືກັບທ່ານ ສີ ຈິ້ນຜິງ ເລຂາທິການໃຫຍ່ ປະທານປະເທດແຫ່ງ ສປ ຈີນ. (ພາບ: TTXVN)
      ໃນ​ຂອບ​ຂອງ​ການ​ຢ້ຽມຢາມ​ຫວຽດນາມ, ທ່ານ ​ສີ ຈິ້ນຜິ​ງ ເລຂາ​ທິການ​ໃຫຍ່ ປະທານ​ປະ​ເທດ​ຈີນ ​ໄດ້​ພົບ​ປະ​ຫາລື​ກັບ ​ເລຂາທິການ​ໃຫຍ່ ຫງວຽນມຝູຈ້ອງ ​ແລະ ປະທານ​ປະ​ເທດ ​ເຈືອງ​ເຕິ​ນຊາງ; ພົບ​ປະ​ກັບ ນາຍົກລັດຖະມົນຕີ ຫງວຽນ​ເຕິ​ນຢຸງ, ປະທານ​ສະພາ​ແຫ່ງ​ຊາດ ຫງວຽນ​ຊິງ​ຮຸ່ງ. ທ່ານ ສີ ຈິ້ນຜິງ ເລຂາ​ທິການ​ໃຫຍ່ ປະທານ​ປະ​ເທດ​ຈີນ ​ໄດ້​ກ່າວ​ປາ​ໄສ​ທີ່ກອງ​ປະຊຸມສະ​ໄໝສາມັນ​ເທື່ອ​ທີ 10 ສະພາ​ແຫ່ງ​ຊາດ​ຊຸດ​ທີ XIII ​ແຫ່ງ ສສ.ຫວຽດນາມ; ພົບ​ປະ​ກັບ​ຜູ້ຕາງໜ້າ​ຊາວ​ໜຸ່ມ​ສອງ​ປະ​ເທດ​ຫວຽດນາມ - ຈີນ ​ແລະ ​ເປັນ​ສັກຂີ​ພະຍານ​ໃນ​ພິທີ​ເຊັນ​ເອກະສານ​ການ​ຮ່ວມ​ມື​ຈຳນວນ​ໜຶ່ງລະຫວ່າງສອງ​ຝ່າຍ​.

ທ່ານ​ເລຂາທິການ​ໃຫຍ່ ຫງວຽນ​ຝູຈ້ອງ ປຶກສາ​ຫາລື​ກັບທ່ານ ​ສີ ຈິ້ນຜິ​ງ ເລຂາ​ທິການ​ໃຫຍ່ ປະທານ​ປະ​ເທດ​ຈີນ


ພາບ: TTXVN

ໃນ​ບັນຍາກາດ​ແຫ່ງ​ຄວາມ​ມິດຕະພາບ ຈິງ​ໃຈ ຊື່ສັດ, ກາ​ນນຳ​ຂັ້ນ​ສູງ​ຂອງ​ສອງ​ພັກ ສອງ​ປະ​ເທດ ​ໄດ້​ລົງ​​ເລິກ​ແລກປ່ຽນ​ຄວາມ​ຄິດ​ຄວາມ​ເຫັນ ​ແລະ ​ໄດ້​ບັນລຸ​ເຖິງ​ຄວາມ​ຮັບ​ຮູ້​ລວມທີ່​ສຳຄັນ ກ່ຽວ​ກັບ​ການ​ເຮັດ​ໃຫ້​ຄວາມ​ພົວພັນ​ຮ່ວມ​ມື​ລະຫວ່າງ​ສອງ​ພັກ ສອງ​ປະ​ເທດ​ມີ​ຄວາມ​ເລິກ​ເຊິ່ງຍິ່ງ​ຂຶ້ນ, ກ່ຽວ​ກັບ​ບັນດາ​ບັນຫາ​ສາກົນ​ ແລະ ພາກ​ພື້ນ​ທີ່​ທັງ​ສອງ​ຝ່າຍ​ມີ​ຄວາມ​ສົນ​ໃຈ.

ຢູ່​ທີ່​ການ​ພົບ​ປະ​ຫາລືສອງ​ຝ່າຍ​ກັບ​ເລຂາທິການ​ໃຫຍ່ ຫງວຽນ​ຝູຈ້ອງ, ທ່ານ​ເລຂາທິການ​ໃຫຍ່ ຫງວຽນ​ຝູຈ້ອງ ​ຊີ້​ແຈ້ງວ່າ: “ສອງ​ປະ​ເທດຫວຽດນາມ - ຈີນ ມີ​ແຜ່ນດິນ​ພູຜາ​ລຽນຕິດ​ກັນ, ມີນ້ຳ​ໃຈມິດຕະພາບອັນ​ເປັນມູນ​ເຊື້ອມາ​ແຕ່​ບູຮານ​ນະ​ການ, ປະຊາຊົນ​ສອງ​ປະ​ເທດ​ມີ​ຄວາມ​ພົວພັນ​ຢ່າງ​ໃກ້ຊິດ​ສະໜິດ​ແໜ້ນ​ນຳ​ກັນ. ​ໃນ​ພາລະກິດ​ການຕໍ່ສູ້ປົດ​ປ່ອຍ​ຊາດ ​ແລະ ສ້າງສາ​ສັງຄົມ​ນິຍົມຂອງ​ແຕ່ລະ​ປະ​ເທດ, ສອງ​ພັກ ສອງ​ລັດ ​ແລະ ປະຊາຊົນ​ສອງປະ​ເທດຫວຽດນາມ - ຈີນ ດ້ວຍ​ນ້ຳ​ໃຈ​ມິດ​ສະຫາຍ​ອ້າຍ​ນ້ອງ​ອັນ​ສູງ​ສົ່ງ​ທັງ​ໝົດຂອງ​ຕົນ ​ໄດ້​ໃຫ້​ຄວາມ​ສະໜັບສະໜູນ ​ແລະ ຄວາມ​ຊ່ວຍ​ເຫຼືອ​ຢ່າງ​ສຸດ​ອົກ​ສຸດ​ໃຈ ​ໃຫ້​ແກ່​ກັນ. ພວກ​ຂ້າພະ​ເຈົ້າ​ຍາມ​ໃດ​ກໍ​ກຽມ​ຄວາມ​ພ້ອມ​ຢູ່​ຢ່າງ​ສະ​ເໝີ​ຕົ້ນ​ສະ​ເໝີ​ປາຍ ພ້ອມ​ກັບ​ບັນດາ​ສະຫາຍ​ຈີນ, ຕັ້ງໜ້າພະຍາຍາມ​ຈົນ​ສຸດ​ຄວາມ​ສາມາດ​ຂອງ​ຕົນ ​ເພື່ອ​ເຮັດ​ໃຫ້​ຄວາມ​ພົວພັນ​ຄູ່​ຮ່ວມມື​ຍຸດ​ທະ​ສາດ​ຮອບດ້ານຫວຽດນາມ - ຈີນ ຂະຫຍາຍຕົວ​ຢ່າງ​ບໍ່​ຢຸດ​ຢັ້ງ ​ແລະ ເລິກ​ເຊິ່ງຍິ່ງ​ກວ່າ​ອີກ”.

ສ່ວນຢູ່​ທີ່​ການ​ພົບ​ປະ​ຫາລືສອງ​ຝ່າຍ​ກັບປະທານ​ປະ​ເທດ ​ເຈືອງ​ເຕິ​ນຊາງ, ທ່ານປະທານ​ປະ​ເທດ ​ເຈືອງ​ເຕິ​ນຊາງ ​ໄດ້​ສະ​ເໜີ​ວ່າ ​ເພື່ອ​ເພີ່ມ​ທະວີ ​ແລະ ປັບປຸງຄວາມ​ພົວພັນ​ຄູ່​ຮ່ວມ​ມື​ຍຸດ​ທະ​ສາດ​ຮອບດ້ານ​ລະຫວ່າງ​ສອງ​ປະ​ເທດ​ຍິ່ງ​ກວ່າ​ອີກ, ສອງ​ຝ່າຍ​ຕ້ອງ​ເພີ່ມ​ທະວີ​ການ​ກໍ່ສ້າງ​ຄວາມ​ເຊື່ອ​ຖື​ການ​ເມືອງ, ຊຸກຍູ້​ການ​ຮ່ວມ​ມື, ຕັ້ງໜ້າ​ຊອກ​ຫາ​ວິທີ​ທີ່​ເໝາະ​ສົມ​ເພື່ອແກ້​ໄຂບັນດາ​ບັນຫາ​ທີ່​ຍັງ​ຄົງ​ຄ້າງ, ​ເປັນ​ຕົ້ນ​ແມ່ນ​ໃນ​ບັນຫາ​ທະ​ເລ​ຕາ​ເວັນ​ອອກ ບົນ​ພື້ນຖານ​ຄວບ​ຄຸມ​ຄວາມ​ພິພາດ​ໃຫ້​ໄດ້​ດີ, ຮັກສາ​ສັນຕິພາບ ສະຖຽນ​ລະ​ພາບ​ຢູ່​ທະ​ເລ​ຕາ​ເວັນ​ອອກ, ບໍ່​ປະ​ໃຫ້​ບັນຫາ​ນີ້​ສົ່ງ​ຜົນ​ກະທົບ​ເຖິງ​ຄວາມ​ພົວພັນ​ລະຫວ່າງ​ສອງ​ປະ​ເທດ; ​ເຄົາລົບ​ນັບຖື​ຜົນ​ປະ​​ໂຫຍ​ດອັນຊອບ​ທຳ​ຂອງ​ກັນ​ແລະ​ກັນ; ປະຕິບັດ​ຢ່າງ​ເຂັ້ມ​ງວດ​ຕາມ​ຄວາມ​ຮັບ​ຮູ້​ລວມ ​ແລະ ຕາມ​ຂໍ້​ຕົກລົງ​ລະຫວ່າງ​ການ​ນຳ​ຂັ້ນ​ສູງ​ຂອງ​ສອງ​ພັກ ສອງ​ປະ​ເທດ; ຮັກສາ​ສະພາບການ​ດັ່ງ​ເດີມ, ບໍ່​ມີ​ການ​ກະທຳ​ເຮັດ​ໃຫ້​ສະພາບ​ການ​ສັບສົນ, ບໍ່​ເປີດ​ກວ້າງ​ຄວາມ​ພິພາດ ກໍ່​ຄວາມ​ເຄັ່ງ​ຕຶງ.

​ໃນ​ຄຳ​ເຫັນ​ຕອບ​ຄວາມ, ທ່ານ​ສີ ຈິ້ນ​ຜິ​ງ ເລຂາ​ທິການ​ໃຫຍ່ ປະທານ​ປະ​ເທດ​ຈີນ ​ໄດ້​ສະ​ແດງ​ຄວາມ​ເຫັນ​ດີ​ນຳ​ບັນດາ​ທິດ​ທາງ ​ແລະ ມາດ​ຕະການ​ໃຫຍ່​ ແນ​ໃສ່​ຂະຫຍາຍ​ສາຍ​ພົວພັນ​ລະຫວ່າງ​ສອງ​ພັກ ສອງ​ປະ​ເທດ ທີ່​ການ​ນຳ​ພັກ ​ແລະ ລັດ​ຫວຽດນາມສະ​ເໜີ​ອອກມາ; ​ເນັ້ນ​ວ່າ ສອງ​ປະ​ເທດ ຈີນ - ຫວຽດນາມ ມີ​ຜົນ​ປະ​ໂຫຍ​ດຮ່ວມ​ທີ່​ກວ້າງຂວາງ, ຮ່ວມ​ມື​ມິດຕະພາບ​ຍາມ​ໃດ​ກໍ່​ເປັນ​ສາຍກະ​ແສ​ຕົ້ນ​ຕໍ່​ໃນຄວາມ​ພົວພັນ​ລະຫວ່າງ​ສອງ​ປະ​ເທດ. ພັກ ລັດຖະບານ​ຈີນ​ໃຫ້​ຄວາມ​ສຳຄັນ​ແກ່​ການ​ປັບປຸງ ​ແລະ ຂະຫຍາຍ​ຄວາມ​ພົວພັນ​ຄູ່​ຮ່ວມ​ມື​ຍຸດ​ທະ​ສາດ​ຮອບດ້ານ ຈີນ - ຫວຽດນາມ.


          ປະທານ​ປະ​ເທດ ​ເຈືອງ​ເຕິ​ນຊາງ ພົບ​ປະ​ຫາລື​ກັບທ່ານ ​ສີ ຈິ້ນ​ຜິ​ງ ເລຂາ​ທິການ​ໃຫຍ່ ປະທານ​ປະ​ເທດ​ຈີນ

ພາບ: TTXVN

ຫັນ​ຄືນ​ເບິ່ງ​ເສັ້ນທາງ​ແຫ່ງ​ການ​ພັດທະນາ​ສາຍ​ພົວພັນ​ລະຫວ່າງ​ສອງ​ພັກ ສອງ​ປະ​ເທດ​ໃນ 65 ທີ່​ຜ່ານ​ມາ ນັບ​ແຕ່​ເມື່ອຫວຽດນາມ - ຈີນ ສ້າງສາ​ຍພົວພັນ​ທາງ​ການ​ທູດ​ເປັນ​ຕົ້ນ​ມາ, ສອງ​ຝ່າຍ​​ເຫັນ​ດີເປັນ​ເອກະສັນ​ວ່າ, ຄວາມ​ມິດຕະພາບຫວຽດນາມ - ຈີນ ​ໂດຍ​ແມ່ນ​ທ່ານ​ປະທານ ​ໂຮ່ຈີ​ມິນ, ທ່ານ​ປະທານ ​ເໝົາ ​ເຈີ​ຕຸ​ງ ພ້ອມ​ດ້ວຍ​ບັນດາ​ການ​ນຳ​ຜູ້​ອາວຸ​ໂສ ​ໄດ້​ກໍ່​ຕັ້ງ​ແລະ​ເພີ່ມ​ພູນ​ຄູນ​ສ້າງ​ຂຶ້ນມາ​ນັ້ນ ​ແມ່ນ​ຊັບ​ສົມບັດ​ຮ່ວມອັນ​ລ້ຳ​ຄ່າ​ຂອງ​ປະຊາຊົນ​ສອງ​ປະ​ເທດ ​ເຊິ່ງຕ້ອງ​ໄດ້​ຮັກສາ ສືບ​ທອດ ​ແລະ ​ເສີມ​ຂະ​ຫວາຍ; ປະຕິບັດ​ເປັນ​ຢ່າງ​ດີ​ ທິດ​ນຳ “​ເພື່ອນ​ບ້ານ​ມິດຕະພາບ, ຮ່ວມ​ມື​ຮອບດ້ານ, ມີ​ສະຖຽນ​ລະ​ພາບ​ຍາວ​ນາມ, ຫັນ​ສູ່​ອະນາຄົດ” ​ແລະ ຈິດ​ໃຈ “​ເພື່ອນ​ບ້ານ​ດີ, ​ເພື່ອ​ມິດ​ດີ, ສະຫາຍ​ດີ, ຄູ່​ຮ່ວມ​ດີ”. ຕໍ່ໜ້າ​ບັນດາ​ຜົນສຳ​ເລັດ​ອັນ​ໃຫຍ່​ຫຼວງ ທີ່ມີ​ຄວາມ​ໝາຍ​ປະຫວັດສາດ​ຂອງ​ແຕ່ລະ​ປະ​ເທດ ​ໃນ​ກິດຈະການ​ກໍ່ສ້າງ​ສັງຄົມ​ນິຍົມທີ່​ສອດຄ່ອງ​ກັບ​ສະພາບ​ການ​ຂອງ​ແຕ່ລະ​ປະ​ເທດ, ສອງ​ຝ່າຍ​ເຫັນ​ດີ​ເປັນ​ເອກະສັນ​ເພີ່ມ​ທະວີ​ການ​ພົວພັນ​ຕິດ​ຕໍ່ ​ແລະ ​ແລກປ່ຽນ​ບົດຮຽນ​ນຳ​ກັນ, ຊຸກຍູ້ພາລະກິດ​ການ​ປ່ຽນ​ແປງ​ໃໝ່​ຂອງ​ຫວຽດນາມ ​ແລະ ພາລະ​ກິດການປະຕິ​ຮູບ ​ເປີດ​ປະຕູປະ​ເທດຂອງ​ຈີນ ​ໃຫ້​ຂະຫຍາຍຕົວ​ຢ່າງ​ບໍ່​ຢຸດ​ຢັ້ງ, ສ້າງ​ກຳລັງ​ຊີວິດ​ໃໝ່​ໃຫ້​ແກ່​ພາລະກິດ​ການ​ກໍ່ສ້າງ​ສັງຄົມ​ນິຍົມຂອງ​ແຕ່ລະ​ປະ​ເທດ. ຫວຽດນາມ​ເຊື່ອ​ໝັ້ນ​ວ່າ, ພາຍ​ໃຕ້ການ​ນຳພາ​ຂອງ​ພັກ​ກອມ​ມູນິດຈີນ, ປະຊາຊົນ​ຈີນຈະ​ຊຸກຍູ້​ຢ່າງ​ກົມ​ກຽວ ການ​ກໍ່ສ້າງສັງຄົມມັ່ງ​ຄັ່ງ​ຮອບດ້ານ, ລົງ​ເລິກ​ປະຕິ​ຮູບ​ຢ່າງຮອບດ້ານ, ຄຸ້ມ​ຄອງ​ບໍລິຫານ​ປະ​ເທດ​ຕາມ​ກົດໝາຍ​ຮອບດ້ານ, ຄຸ້ມ​ຄອງ​ພັກ​ຢ່າງ​ເຂັ້ມ​ງວດ​ຮອບດ້ານ, ປະຕິບັດ​​ເປົ້າ​ໝາຍ​ກໍ່ສ້າງລັດ​ທັນ​ສະ​ໄໝ​ສັງຄົມ​ນິຍົມ ທີ່​ຮັ່ງມີ​ເຂັ້ມ​ແຂງ ປະຊາທິປະ​ໄຕ ສີວິ​ໄລ ກົມກຽວ ​ໄດ້ຢ່າງ​ສຳ​ເລັດ​ມີ​ໄຊ. ຝ່າຍ​ຈີນ ອວຍພອນ​ໃຫ້​ພັກ​ກອມ​ມູນິດ​ຫວຽດນາມ ຈັດ​ຕັ້ງ​ກອງ​ປະຊຸມ​​ໃຫຍ່​ຜູ້​ແທນ​ທົ່ວ​ປະ​ເທດຄັ້ງ​ທີ XII ​ໃນ​ຕົ້ນ​ປີ 2016 ຢ່າງ​ສຳ​ເລັດ​ຜົນ; ສະ​ແດງ​ຄວາມ​ເຊື່ອ​ໝັ້ນ​ວ່າ, ພາຍ​ໃຕ້​ການ​ນຳພາ​ຂອງ​ພັກ​ກອມ​ມູນິດ​ຫວຽດນາມ, ປະຊາຊົນ​ຫວຽດນາມ​ຈະ​ປະຕິບັດ​ບັນດາ​ເປົ້າ​ໝາຍ​ທີ່​ວາງ​ອອກ​ມາ​ຢ່າງ​ສຳ​ເລັດ​ມີ​ໄຊ, ກໍ່ສ້າງ​ປະ​ເທດ​ຫວຽດນາມ​ໃຫ້​ກາຍ​ເປັນ​ປະ​ເທດສັງຄົມ​ນິຍົມ, ປະຊາຊົນ​ຮັ່ງມີ, ປະ​ເທດ​ຊາດ​ເຂັ້ມ​ແຂງ, ມີ​ປະຊາທິປະ​ໄຕ ຍຸດຕິ​ທຳ ສີວິ​ໄລ.

ຫວຽດນາມ ​ແລະ ຈີນ ລ້ວນ​ແຕ່​ຢູ່​ໃນ​ໄລຍະ​ແຫ່ງ​ການ​ພັດທະນາ​ເສດຖະກິດ - ສັງຄົມ​ທີ່​ສຳຄັນ, ສອງ​ຝ່າຍ​ຖື​ວ່າ ການ​ຂະຫຍາຍຕົວ​ຂອງ​ປະ​ເທດ​ນີ້ ​ເປັນ​ໂອກາດ​ອຳນວຍ​ໃຫ້​ແກ່​ການ​ພັດທະນາ​ຂອງ​ປະ​ເທດ​ນັ້ນ. ການ​ສືບ​ຕໍ່ດຳນີນ​ການ​ຕິດ​ຕໍ່​ພົບ​ປະ​ຂັ້ນ​ສູງ​ຢ່າງ​ເປັນ​ປະຈຳ ລະຫວ່າງ​ສອງ​ພັກ ສອງ​ລັດ; ​ເສີນ​ຂະຫຍາຍ​ເປັນ​ຢ່າງ​ດີ​ ບົດບາດ​ປະສານ​ງານ​ສັງ​ລວມ ຂອງຄະນະ​ກຳມະການ​ຊີ້​ນຳ​ການ​ຮ່ວມ​ມື​ສອງ​ຝ່າຍຫວຽດນາມ - ຈີນ, ສຸມ​ໃສ່​ຊຸກຍູ້​ເປີດ​ກວ້າງ​ການ​ຮ່ວມ​ມື​ໃນ​ບັນດາ​ຂົງ​ເຂດ ວິທະຍາສາດ-​ເຕັກ​ໂນ​ໂລຊີ ວັດທະນະທຳ ການສຶກສາ ການທ່ອງ​ທ່ຽວ… ​ໃນ​ໄລຍະ​ເວລາ​ຕໍ່ໜ້າ​ຈະສືບ​ຕໍ່​ໄດ້​ຮັບ​ການ​ຜັນ​ຂະຫຍາຍ​ຢ່າງ​ຕັ້ງໜ້າ​ກວ່າ​ອີກ. ພິເສດ, ​ໃນ​ບັນຫາ​ທະ​ເລ​ຕາ​ເວັນ​ອອກ, ສອງ​ປະ​ເທດ​ເປັນ​ເອກະສັນ​ກັນ​ແລກປ່ຽນ​ຢ່າງ​ຈິງ​ໃຈ ຊື່ສັດ​ກ່ຽວ​ກັບ​ບັນດາ​ບັນຫາ​ທີ່​ຍັງ​ຄົງ​ຄ້າງ; ​ເນັ້ນ​ໜັກ​ເຖິງ​ການ​ປະຕິບັດ​ຕາມ​ຢ່າງ​ເຂັ້ມ​ງວດ ຕາມ​ບັນດາ​ຄວາມ​ຮັບ​ຮູ້​ລວມທີ່​ສຳຄັນ​ທີ່​ບັນລຸ​ໄດ້​ລະຫວ່າງ​ການ​ນຳ​ຂັ້ນ​ສູງ​ຂອງ​ສອງ​ພັກ ສອງ​ປະ​ເທດ. ຕາມ​ນັ້ໜ, ປະຕິບັດ​ຢ່າງ​ເຂັ້ມ​ງວດ “ຂໍ້​ຕົກລົງ​ກ່ຽວ​ກັບ​ບັນດາ​ຫຼັກການ​ພື້ນຖານທີ່​ຊີ້​ນຳ​ແກ້​ໄຂ​ບັນຫາເທິງ​ທະເລຫວຽດນາມ - ຈີນ”, ນຳ​ໃຊ້​ເປັນ​ຢ່າງ​ດີ​ ກົນ​ໄກ​ເຈລະຈາ​ຂັ້ນ​ລັດຖະບານ​ກ່ຽວ​ກັບ​ຊາຍ​ແດນຫວຽດນາມ - ຈີນ. ສອງ​ຝ່າຍ​ເຫັນ​ດີ​ເປັນ​ເອກະ​ພາບ​ພ້ອມ​ກັນ​ຄວບ​ຄຸມ​ຄວາມ​ພິພາດ​ບົນ​ທະ​ເລ​ໃຫ້​ດີ, ປະຕິບັດ​ຖະ​ແຫຼ​ງການ​ກ່ຽວ​ກັບ​ວິທີການ​ປະ​ພຶກ​ຂອງ​ບັນດາ​ຝ່າຍ​ຢູ່​ທະ​ເລ​ຕາ​ເວັນ​ອອກ (DOC) ຢ່າງ​ຄົບ​ຖ້ວນ​ແລະມີ​ປະສິດທິ​ຜົນ, ຊຸກຍູ້​ເພື່ອບັນລຸ​​ໄດ້ປະມວນ​ຂໍ້​ກຳນົດກ່ຽວ​ກັບ​ການ​ປະພຶດ​ຂອງ​ບັນດາ​ຝ່າຍ​ຢູ່​ທະ​ເລ​ຕາ​ເວັນ​ອອກ (COC) ​ໂດຍ​ໄວ ບົນ​ພື້ນຖານ​ເຈລະຈາ​ເປັນ​ເອກະ​ພາບ, ບໍ່​ມີ​ການ​ກະທຳ​ກໍ່​ຄວາມ​ສັບສົນ ​ເປີດ​ກວ້າງ​ການ​ພິພາດ​; ​ແກ້​ໄຂ​ບັນຫາ​ທີ່​ເກີດ​ຂຶ້ນ​ໃຫ້​ໄດ້​ຢ່າງ​ທັນ​ການ ​ເໝາະ​ສົມ, ຮັກສາ​ສັນຕິພາບ ສະຖຽນ​ລະ​ພາບ​ຢູ່​ທະ​ເລ​ຕາ​ເວັນ​ອອກ ​ແລະ ຄວາມ​ພົວພັນຫວຽດນາມ - ຈີນ.

​ໃນ​ເວລາ​ຂອງ​ການ​ຢ້ຽມຢາມ, ສອງ​ຝ່າຍ​ໄດ້​ລົງ​ນາມ​ໃນ​ບັນດາ​ເອກະສານ​ການ​ຮ່ວມ​ມື ​ເຊັ່ນ: “ແຜນການຮ່ວມ​ມື​ກໍ່ສ້າງ​ພະນັກງານລະຫວ່າງ​ພັກ​ກອມ​ມູນິດ​ຫວຽດນາມ ​ແລະ ພັກ​ກອມ​ມູນິດຈີນ ​ໄລ​ຍະ 2016 - 2020”, “ສັນຍາ​ວ່າ​ດ້ວຍ​ເຮືອ​ກຳປັ່ນ​ແລ່ນ​ໃນ​ເຂດ​ໄປມາ​ເສລີຢູ່​ປາກ​ນ້ຳ ບັກ​ລວັນ ລະຫວ່າງ​ລັດຖະບານ​ແຫ່ງ​ສາທາລະນະ​ລັດສັງຄົມ​ນິຍົມຫວຽດນາມ ​ແລະ ລັດຖະບານ​ແຫ່ງສາທາລະນະ​ລັດ​ປະຊາຊົນ​ຈີນ”, “ສັນຍາ​ວ່າ​ດ້ວຍ​ການ​ຮ່ວມ​ມື​ປົກ​ປັກ​ຮັກສາ ​ແລະ ຂຸດ​ຄົ້ນ​ຊັບພະຍາກອນ​ການທ່ອງທ່ຽວ​ທີ່​ນ້ຳຕົກຕາດ​ບ້ານ​ຢົກ (ດຶກ​ທຽນ) ລະຫວ່າງ​ລັດຖະບານ​ແຫ່ງ​ສາທາລະນະ​ລັດສັງຄົມ​ນິຍົມຫວຽດນາມ ​ແລະ ລັດຖະບານ​ແຫ່ງສາທາລະນະ​ລັດ​ປະຊາຊົນ​ຈີນ”.

ການ​ຢ້ຽມຢາມຫວຽດນາມ ຂອງທ່ານ​ ສີ ຈິ້ນ​ຜິ​ງ ເລຂາ​ທິການ​ໃຫຍ່ ປະທານ​ປະ​ເທດ​ຈີນ ​ໄດ້​ປະກອບສ່ວນ​ອັນ​ສຳຄັນ​ເຂົ້າ​ໃນ​ການ​ປັບປຸງ​ນ້ຳ​ໃຈ​ມິດຕະພາບ​ອັນ​ເປັນ​ມູນ​ເຊື້ອ, ​ເຮັດ​ໃຫ້​ຄວາມ​ພົວພັນ​ຄູ່​ຮ່ວມມື​ຍຸດ​ທະ​ສາດຮອບດ້ານ​ລະຫວ່າງຫວຽດນາມ - ຈີນ ຂະຫຍາຍຕົວ​ເລິກ​ເຊິ່ງຕື່ມ​ອີກ, ຊຸກຍູ້​ສັນຕິພາບ ສະຖຽນ​ລະ​ພາບ ​ແລ​ະ ການ​ພັດທະນາຂອງ​ພາກ​ພື້ນ ​ແລະ ​ໃນ​ໂລກ./.

ສັງ​ລວມ​ໂດຍ ​ເຟືອງຈ່າ

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ