ວັນອາທິດ, 31/5/2020
ຊຸກຍູ້ການພົວພັນ ຂຸດຄົ້ນຄວາມສາມາດຮ່ວມມື ລະຫວ່າງຫວຽດນາມ - ອິດສະລັງ
24/11/2015 18:44' ສົ່ງ ພິມ
ທ່ານປະທານປະເທດ ເຈືອງເຕິນຊາງ ແລະ ທ່ານໂອລາຟູ ຣາດນາ ກຼີມເຊີນ ປະທານາທິບໍດີອິດສະລັງ ກວດແຖວກອງກຽດຕິຍົດ ກອງທັບປະຊາຊົນຫວຽດນາມ. (ພາບ: ຫງວຽນຄາງ/TTXVN)

ໃນ​ຂອບ​ຂອງ​ການ​ຢ້ຽມຢາມ​ຄັ້ງ​ນີ້, ທ່ານ​ປະທານາທິບໍດີ ໂອລາ​ຟູ ຣາດນາ ກຼີມ​ເຊີນ ​​ໄດ້​ພົບ​ປະ​ຫາລື​ກັບ​ທ່ານ​ປະທານ​ປະ​ເທດ ​ເຈືອງ​ເຕິ​ນຊາງ; ຢ້ຽມ​ຄຳນັບ​ທ່ານ​ເລຂາທິການ​​ໃຫຍ່ ຫງວຽນ​ຝູຈ້ອງ; ພົບ​ປະ​ກັບ​ທ່ານ​ນາຍົກລັດຖະມັນ​ຕີ ຫງວຽນ​ເຕິ​ນຢຸງ; ຢ້ຽມ​ຄຳນັບ​ທ່ານປະທານ​ສະພາ​ແຫ່ງ​ຊາດ ຫງວຽນ​ຊິງ​ຮຸ່ງ; ພົບ​ປະ​ກັບ​ທ່ານ​ ເລຮ່ວາງ​ກວັນ ປະທານ​ຄະນະ​ກຳມະການ​ປະຊາຊົນ ​ນະຄອນ​ໂຮ່ຈີ​ມິ​ນ.

​ໃນ​ທີ່​ການ​ພົບ​ປະ​ຫາລື ​ແລະ ການ​ຢ້ຽມ​ຄຳນັບ​ຂັ້ນ​ສູງ​ເຫຼົ່າ​ນັ້ນ, ການ​ນຳ​ຂອງ​ທັງ​ສອງ​ຝ່າຍ​ໄດ້​ສະ​ແດງ​ຄວາມ​ເຊື່ອ​ໝັ້ນ​ວ່າ ການ​ຢ້ຽມຢາມ​ຫວຽດນາມ​ຂອງ​ທ່ານ​ປະທານາທິບໍດີ ອິດ​ສະ​ລັງ ​ໃນ​ຄັ້ງນີ້​ ແມ່ນ​ຂີດ​ໝາຍ​ໃໝ່​ໃນ​ການ​ສ້າງ​ກຳລັງ​ໝູນ ຊຸກ​ຍູ້​ການ​ພົວພັນ​ຮ່ວມ​ມື​ ລະຫວ່າງ​ສອງ​ປະ​ເທດ ​ໃນຂົງ​ເຂດຕ່າງ​ໆ​ ໃຫ້​ຂະຫຍາຍຕົວ​ຢ່າງ​ແຂ​ງແຮງ​ໃນ​ໄລ​ຍາ​ເວລາ​ຕໍ່ໜ້າ. ສອງ​ຝ່າຍ​ໄດ້​ແລກປ່ຽນ​ກ່ຽວ​ກັບ ​ການ​ເພີ່ມ​ທະວີ​ການ​ພົວພັນ​ຕິດ​ຕໍ່ແລກປ່ຽນ​ ໃນ​ຂັ້ນ​ຕ່າງໆ​ທຸກ​ຂັ້ນ, ກ່ຽວ​ກັບ​ຄວາມຕ້ອງການ​ກວດຄືນ ​ແລະ ມີ​ຂໍ້​ຕົກລົງ​ຮ່ວມ​ມື​ຫຼາຍ​ກວ່າ​ອີກ ​ໃນ​ບັນດາ​ຂົງ​ເຂດ​ຮ່ວມ​ມືອັນ​ລະອຽດ; ຊ່ວຍ​ເຫຼືອ​ບັນດາ​ວິ​ສາ​ຫະກິດ​ຂອງ​ສອງ​ປະ​ເທດ ​ໃນ​ການ​ຊອກ​ຮູ້​ໂອກາດເ​ປີດ​ການ​ທຸລະ​ກິດ ​ແລະ ​ເຊື່ອມ​ຕໍ່​ການ​ທຸລະ​ກິດ, ​ເປັນ​ຕົ້ນ​ແມ່ນ​ໃນ​ບັນດາ​ຂົງ​ເຂດ​ທີ່​ອິດສະ​ລັງມີ​ທ່າ​ແຮງ ​ແລະ ຫວຽດນາມ​ມີ​ຄວາມ​ຕ້ອງການ, ​ເຊັ່ນ​ການ​ປະມົງ ​ແລະ ປຸງ​ແຕ່ງ​ຜະລິດ​ຕະພັນທະ​ເລ, ພະລັງງານ​ທົດ​ແທນ; ຄົ້ນຄວ້າ​ຄວາມ​ສາມາດ​ເຈ​ລະ​ຈາ ​ແລະ ​ເຊັນ​ເອກະສານ​ການ​ຮ່ວມ​ມື​ດ້ານ​ຕ່າງໆ​ ເຊັ່ນ ສຶກສາ-ກໍ່ສ້າງ, ຊ່ວຍ​ຫວຽດນາມ​ກໍ່ສ້າງ​ຜູ້​ຊ່ຽວຊານກ່ຽວ​ກັບ​ຜະລິດ​ຕະພັນທະ​ເລ ພະລັງງານ ສິ່ງ​ແວດ​ລ້ອມ; ພ້ອມ​ກັນ​ນັ້ນ​ກໍແລກ​ປ່ຽນ​ບົດຮຽນ​ປະສົບ​ການ ກ່ຽວ​ກັບ​ການ​ຍູ້​ແຮງ​ສະ​ວັດ​ດີກາ​ນສັງຄົມ, ຄວາມ​ສະ​ເໝີ​ພາບ​ທາງ​ດ້ານເພດ, ​ການເບິ່ງ​ແຍງ​ດູ​ແລ​ເດັກນ້ອຍ ​ແລະ ຄົນ​ພິການ ​ຢູ່​ຫວຽດນາມ.

ກ່ຽວ​ກັບ​ບັນຫາ​ທະ​ເລ​ຕາ​ເວັນ​ອອກ, ການ​ນຳ​ຂອງ​ສອງ​ປະ​ເທດ​ ໄດ້​ແບ່ງປັນ​ຄວາມ​ເປັນ​ຫ່ວງ​ເປັນ​ໄຍກ່ຽວ​ກັບ​ເຫດການ​ທີ່​ເກີດ​ຂຶ້ນ​ໃນ​ມໍ່ໆ​ນີ້, ​ແລະ​ໄດ້​ເນັ້ນ​ເຖິງ​ຄວາມ​ຈຳ​ເປັນ​ຕ້ອງ​ແກ້​ໄຂຄວາມ​ພິພາດ​ດ້ວຍ​ສັນຕິ​ວິທີ, ສອດ​ຄ່ອງ​ກັບ​ກົດໝາຍ​ສາກົນ, ກົດ​ບັດ​ສະຫະ​ປະຊາ​ຊາດ ​ແລະ ພິ​ເສດ​​ແມ່ນ ສົນທິສັນຍາ​ຂອງ​ສະຫະ​ປະຊາ​ຊາດ​ກ່ຽວ​ກັບ​ກົດໝາຍ​ທະ​ເລ ປີ 1982, ກໍ່​ຄື​ການ​ທີ່​ບັນດາ​ຝ່າຍ​ກ່ຽວຂ້ອງ​ຄວນ​ຕ້ອງ​ຕົກລົງ​ກັນ​ໂດຍ​ໄວ​ໃນ "ປະ​​ມວນຂໍ້​ກຳນົດ​ກ່ຽວ​ກັບ​ການ​ປະພຶດ​ຂອງ​ບັນດາ​ຝ່າຍ​ຢູ່​ທະ​ເລ​ຕາ​ເວັນ​ອອກ (COC)" ທີ່​ມີ​ລັກສະນະ​ຜູກ​ມັດ, ຖື​ວ່າ​ນີ້​ເປັນ​ແບບ​ວິທີ​ທີ່​ມີ​ຜົນ​ສັກສິດ ​ເພື່ອ​ຮັບປະກັນ​ສັນຕິພາບ ສະຖຽນ​ລະ​ພາບ ຄວາມ​ສະຫງົບ ຄວາມ​ປອດ​ໄພ ​ແລະ ​ເສລີພາບ​ ໃນ​ການ​ເດີນ​ທະ​ເລ ​ເດີນ​ອາກາດ ​ແລະ ການ​ແລກປ່ຽນ​ການ​ຄ້າ ​ຢູ່​ທະ​ເລ​ຕາ​ເວັນ​ອອກ. ​ໂດຍເປັນປະ​ເທດທີ່​ມີ​ເຂດ​ທະ​ເລ, ສອງ​ຝ່າຍ​ກໍ່ໄດ້​ແລກປ່ຽນ​ກ່ຽວ​ກັບ​ການຮ່ວມມື​ ໃນ​ການ​ຮັບ​ມື​ຢ່າງ​ມີ​ປະສິດທິ​ຜົນ ກັບການ​ປ່ຽນ​ແປງ​ດິນ​ຟ້າ​ອາກາດ ​ແລະ ການ​ຍຶ່ງຂຶ້ນຂອງ​ນ້ຳ​ທະ​ເລ, ກໍ່​ຄື​ໃນ​ການ​ປົກ​ປັກ​ຮັກສາ​ຊັບພະຍາກອນ​ທຳ​ມະ​ຊາດ ​ແລະ ສິ່ງ​ແວດ​ລ້ອມ ນິ​ເວດ​ວິທະຍາ... ສອງ​ຝ່າຍ​ເປັນ​ເອກະ​ພາບ​ໃຫ້​ທັດສະນະ​ວ່າ ຕ້ອງ​ສຳ​ເລັດ​ສິ້ນ​ສຸດ​ການ​ເຈລະຈາ​ໂດຍ​ໄວ​ ກ່ຽວ​ກັບສັນຍາ​ການ​ຄ້າ​ເສລີ​ ກັບ​ສະຫະພັນ​ເອຣົບ (ອີ​ຢູ), ກໍ່​ຄື​ກັບກຸ່ມ​ການ​ຄ້າ​ເສລີ​ເອີຣົບ ​ແລະ ກັບ​ອິດສະ​ລັງ.

ຫວຽດນາມ ແລະ ອິດ​ສະ​ລັງ ​ໄດ້​ສ້າງ​ຕັ້ງ​ການ​ພົວພັນ​ທາງ​ການ​ທູດ​ແຕ່​ວັນ​ທີ 5 ສິງຫາ 1973. ສອງ​ປະ​ເທດ​ໄດ້​ຮັກສາ​ການ​ພົວພັນ​ສອງ​ຝ່າຍ​ຢ່າງ​ຕັ້ງໜ້າ. ຫວຽດນາມ ​ແລະ ອິດ​ສະ​ລັງ ​ໄດ້​ແລກປ່ຽນບັນດາ​ຄະນະ​ຜູ້​ແທນ​ຂັ້ນ​ສູງ, ສ້າງ​ກຳລັງ​ຊຸກ​ດັນ​ອັນ​ແຂງ​ແຮງ​ ໃຫ້​ແກ່​ການ​ພັດທະນາ​ການ​ພົວພັນ​ສອງ​ຝ່າຍ, ທີ່​ຜ່ານ​ມາ​ມໍ່​ນີ້​ແມ່ນ​ການ​ຢ້ຽມຢາມ​ຫວຽດນາມ​ ຂອງນາຍົກລັດຖະມົນຕີ ອິດສະ​ລັງ ທ່ານ​ເດ​ວິດ ອົດ​ເຊີນ ​ໃນ​ເດືອນ ​ເມສາ 2002 ​ແລະ ການ​ຢ້ຽມ​ຢານອິດ​ສະ​ລັງ ຂອງ​ທ່ານ​ຮອງ​ນາຍົກລັດຖະມົນຕີ ຮ່ວາງຈຸ​ງຫາຍ ​ໃນ​ເດືອນ ກັນຍາ 2011. ສອງ​ຝ່າຍ​ໄດ້​ມີ​ການ​ຮ່ວມ​ມື​ຢ່າງ​​ແໜ້ນ​ແຟ້ນ ​ແລະ ມີ​ປະສິດທິ​ຜົນ ຢູ່​ໃນ​ບັນດາ​ເວທີ​ປາ​ໄສ​ພາກ​ພື້ນ ​ແລະ ສາກົນ.

ມາ​ເຖິງ​ປັດຈຸບັນ, ການ​ພົວພັນ​ດ້ານ​ການ​ຄ້າ​ລະຫວ່າງ​ຫວຽດນາມ ​ແລະ ອິດ​ສະ​ລັງ ຍັງ​ຢູ່​ໃນລະ​ດັບ​ຕ່ຳ, ມູນ​ຄ່າ​ການ​ຄ້າ​ລະຫວ່າງ​ສອງ​ປະ​ເທດ​ຍັງ​ໜ້ອຍ, ບໍ່​ສົມ​ຄູ່​ກັບ​ການ​ພົວພັນ​ດ້ານ​ການ​ເມືອງ​ອັນ​ດີງາມ​ ລະຫວ່າງ​ສອງ​ປະ​ເທດ. ປີ 2014, ມູນ​ຄ່າ​ການ​ຄ້າ​ສອງ​ສົ້ນ​ບັນລຸ 6 ລ້ານ​ໂດ​ລາ​ສະຫະລັດ ​ແລະ ມູນ​ຄ່າ​ການ​ຄ້າ​ໃນ​ຫົກ​ເດືອນ​ຕົ້ນ​ປີ 2015 ບັນລຸ​ໄດ້​ຫຼາຍ​ກວ່າ 9 ລ້ານ​ໂດ​ລາ​ສະຫະລັດ. ຫວຽດນາມ​ສົ່ງ​ນອກ​ສິນຄ້າ​ຕ່າງ​ໆເຊັ່ນ ​ເຄື່ອງ​ໄມ້ ​ເຄື່ອງ​ຕັດຫຍິບ ສິ່ງ​ທໍ ຜັກ​ໝາກ​​ໄມ້… ​ໄປ​ຍັງອິດ​ສະ​ລັງ. ​ໃນ​ເວລາ​ນັ້ນ, ອິດ​ສະ​ລັງ ສົ່ງ​ນອກ​ວັດຖຸ​ອຸປະກອນ ​ເຄື່ອງ​ຈັກ ​ແລະ ​ເຄື່ອງ​ທະ​ເລ​ ມາ​ຍັງ​ຫວຽດນາມ. ອິດ​ສະ​ລັງ ຍັງ​ບໍ່​ມີ​ການ​ລົງທຶນ​ໂດຍ​ກົງ​ຢູ່​ຫວຽດນາມ, ​ແຕ່​ກໍ່​ໄດ້​ຊຸກຍູ້​ການ​ຮ່ວມ​ມື​ກັບ​ຫວຽດນາມ​ທາງ​ດ້ານ​ການ​ປະມົງ ​ໂດຍ​ຜ່ານ​ບັນດາ​ໂຄງການ​ຂອງ​ອົງການ​ສະຫະ​ປະຊາ​ຊາດ. ສອງ​ຝ່າຍ​ໄດ້​ເຊັນ​ສັນຍາ​ວ່າ​ດ້ວຍ​ການ​ຫຼີກ​ລ່ຽງການ​ເກັບພາສີຊ້ອນ, ສັນຍາ​ວ່າ​ດ້ວຍ​ການ​ສົ່ງ​ເສີມ ​ແລະ ປົກ​ປ້ອງ​ການ​ລົງທຶນ, ສັນຍາ​ຂົນ​ສົ່ງ​ທາງ​ອາ​ກາດ ​ແນ​ໃສ່​ອຳນວຍ​ຄວາມ​ສະດວກ​ໃຫ້​ແກ່​ວິ​ສາ​ຫະກິດ​ຂອງ​ສອງ​ປະ​ເທດ. ຊຸມ​ຊົນ​ຊາວ​ຫວຽດນາມ​ຢູ່ ອິດ​ສະ​ລັງ ມີ​ປະມານ 1.000 ຄົນ ​ເຊິ່ງມີ​ຊີວິດ ​ແລະ ມີວຽກ​ເຮັດ​ງານ​ທຳ​ເປັນ​ປົກກະຕິ, ​ເຄົາລົບ​ນັບຖື​ກົດໝາຍ​ຂອງ​ອິດສະ​ລັງ, ນັບ​ມື້​ນັບ​ເຈືອ​ຈານ​ເຂົ້າ​ເປັນ​ຢ່າງ​ດີ​ໃນ​ສັງຄົມ​ປະ​ເທດ​ພື້ນ​ບ້ານ, ກາຍ​ເປັນ​ຂົວ​ຕໍ່​ເພີ່ມ​ທະວີ​ການ​ພົວພັນ​ສອງ​ຝ່າຍ.

ກາ​ຢ້ຽມຢາມ​ຂັ້ນ​ລັດ​ທີ່​ຫວຽດນາມ​ ຂອງທ່ານ​ປະທານາທິບໍດີ ໂອລາ​ຟູ ຣາດນາ ກຼີມ​ເຊີນ ​​ເປັນ​ການ​ຊຸກຍູ້ອີກ​ຄັ້ງ​ໜຶ່ງ​ເພື່ອ​ພັດທະນາ​ການ​ຮ່ວມ​ມື, ຂຸດ​ຄົ້ນ​ທ່າ​ແຮງ ​ແລະ ຄວາມ​ສາມາດ​ບົ່ງ​ຊ້ອນ​​ແຫ່ງ​ການ​ຮ່ວມ​ມື​ລະຫວ່າງ​ສອງ​ປະ​ເທດ ​ໃນ​ບັນດາ​ຂົງ​ເຂດ​ເຊັ່ນ: ​ເສດຖະກິດ, ວິທະຍາສາດ-​ເຕັກ​ໂນ​ໂລ​ຊີ, ການ​ສຶກສາ…; ສ້າງ​ເງື່ອນ​ໄຂ​ອຳນວຍ​ໃຫ້​ວິ​ສາ​ຫະກິດ​ຂອງ​ສອງ​ຝ່າຍ ຊອກ​ຫາ​ການ​ຮ່ວມ​ມື ​ແລະ ​ເພີ່ມ​ທະວີ​ການ​ຮ່ວມ​ມື​ດ້ານ​ການ​ຄ້າ ການ​ລົງທຶນ; ຊຸກຍູ້​ເພື່ອ​ສຳ​ເລັດ​ສິ້ນ​ສຸດ​​ໂດຍ​ໄວການ​ເຈລະຈາ​ສັນຍາ​ການ​ຄ້າ​ເສລີ​ລະຫວ່າງ​ຫວຽດນາມ ​ແລະ ກຸ່ມ​ການ​ຄ້າ​ເສລີ​ເອີຣົບ (EFTA); ​ເພີ່ມ​ທະວີ​ການ​ຮ່ວມ​ມື​ລະຫວ່າງ​ສອງ​ປະ​ເທດ ​ໃນ​ບັນດາ​ເວທີ​ປາ​ໄສ​ສາກົນ ທີ່​ສອງ​ປະ​ເທດ​ເປັນ​ສະມາຊິກ; ພ້ອມ​ກັນ​ນັ້ນ​ກໍ່​ແລກປ່ຽນ​ກ່ຽວ​ກັບ​ບັນດາ​ບັນຫາ​ສາກົນ ​ແລະ ພາກ​ພື້ນ​ທີ່​ສອງ​ຝ່າຍ​ມີ​ຄວາມ​ສົນ​ໃຈ.

​ໃນ​ການ​ຢ້ຽມຢາມ​ຫວຽດນາມ​ຄັ້ງ​ນີ້, ທ່ານ​ປະທານາທິບໍດີ ໂອລາ​ຟູ ຣາດນາ ກຼີມ​ເຊີນ ​ແລະ ພັນ​ລະ​ຍາ ພ້ອມ​ດ້ວຍ​ບັນດາ​ສະມາຊິກ​ໃນ​ຄະນະ​ຜູ້​ແທນ​ອິດສະ​ລັງ ​ໄດ້​ໄປວາງ​ພວງມາລາ​ແລະ​ໄຫວ້​ອາ​ໄລ​ທີ່​ອະນຸສາວະລີ​ຫໍ​ສົບ​ຂອງ​ທ່ານ​ປະທານ​ໂຮ່ຈີ​ມິນ ​ແລະ ວາງ​ພວງມາລາ​ທີ່​ອະນຸສາວະລີບັນດາ​ວິລະ​ຊົນ​ທີ່​ໄດ້​ເສຍ​ສະລະ​ຊີ​ວິດເພື່ອ​ຊາດ./.

​ໂດຍ ທູ່​ຍລີງ

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ