ວັນອາທິດ, 31/5/2020
ທ່ານປະທານສາພາແຫ່ງຊາດຮົງກາລີ ໂກເວີ ລາຊະໂລ ມາຢ້ຽມຢາມປະເທດຫວຽດນາມ ຢ່າງເປັນທາງການ
30/11/2015 9:25' ສົ່ງ ພິມ
ທ່ານປະທານສະພາແຫ່ງຊາດ ຫງວຽນຊິງຮູ່ງ ຕ້ອນຮັບທ່ານ ໂກເວີ ລາຊະໂລ ປະທານສະພາແຫ່ງຊາດຮົງກາລີ. (ພາບ: TTXVN)

ທ່ານປະ­ທານ​ສະ­ພາ​ແຫ່ງ​ຊາດ ຫງວ​ຽນ​ຊິງ​ຮູ່ງ ໄດ້​ກ່າວ​ຄຳ​ອວຍ­ພອນ​ໄຊ​ອັນ​ປະ­ເສີດຕໍ່​ທ່ານປະ­ທານ​ສະ­ພາ​ແຫ່ງ​ຊາດ ​ແລະ ຄະນະ​ຜູ້​ແທນ​ຂັ້ນສູງສະພາ​ແຫ່​ງຊາ​ດຮົງ​ກາ­ລີ ​ທີ່​ໄດ້​ມາ​ຢາມ​ປະ­ເທດຫວຽດ­ນາມ ຢ່າງ​ເປັນ​ທາງ​ການ; ສະ­ແດງ​ຄວາມ​ເຊື່ອ​ໝັ້ນ​ວ່າ ການ​ຢ້ຽມ­ຢາມ​ຄັ້ງ​ນີ້​ຈະ​ສ້າງ​ຫຼັກ​ໝາຍ​ໃໝ່​ ໃນ​ການ​ພົວ­ພັນ​ຮ່ວມ​ມື​ລະ­ຫວ່າງ​ອົງ​ການ​ນິ­ຕິ­ບັນ­ຍັດ ແລະ ປະຊາ­ຊົນ​ທັງ​ສອງ​ປະ­ເທດ. ທ່ານປະ­ທານ​ສາ​ພາ​ແຫ່ງ​ຊາດ ຫງວ​ຽນ​ຊິງ​ຮູ່ງ ໄດ້​ຢືນ­ຢັນ​ວ່າ ສະ­ພາ​ແຫ່ງ​ຊາດ ແລະ ປະ­ຊາ­ຊົນຫວຽດ­ນາມ ​ຍາມ​ໃດ​ກໍ່​ຈົດ​ຈຳ​ໄວ້​ຕະ­ຫຼອດ ​ແລະ ຮູ້​ບູນ​ຄຸນ​ຢ່າງເລິກ­ເຊິ່ງ ​ຕໍ່​ລັດແລະປະ­ຊາ­ຊົນຮົງ​ກາ­ລີ ທີ່​ໄດ້​ສະ­ໜັບ­ສະ­ໜູນ ​ແລະ ຊ່ວຍ­ເຫຼືອຫວຽດ­ນາມ ໃນ​ການ​ຕໍ່­ສູ້​ຍາດ​ເອົາ​ເອ­ກະ­ລາດ​ແຫ່ງ​ຊາດ ​ໃນ​ເມື່ອ​ກ່ອນ ກໍ່​ຄື​ໃນ​ພາ­ລະ­ກິດ​ສ້າງສາພັດ­ທະ­ນາ​ປະ­ເທດ ​ໃນປັດຈຸບັນ. ທ່ານປະ­ທານ​ສະ­ພາ​ແຫ່ງ​ຊາດ ຫງວ​ຽນ​ຊິງ​ຮູ່ງ ເນັ້ນວ່າ ສະ­ພາ​ແຫ່ງ​ຊາດຫວຽດ­ນາມຍາມ​ໃດ​ກໍ່​ສະໜັບສະໜູນ ​ແລະ ອຳ­ນວຍ​ຄວາມ​ສະດວກ​ທຸກ​ຢ່າງ ​ເພື່ອ​ແນ­ໃສ່​ຍູ້​ແຮງ​ການ​ພົວ­ພັນ​ຮ່ວມ​ມື​ກັບ ​ບັນ­ດາ​ປະເທດ​ເພື່ອນ​ມິດທີ່​ເປັນ​ມູນ­ເຊື້ອ, ໃນ​ນັ້ນ​ມີຮົງ​ກາ­ລີ.

ທ່ານປະ­ທານ​ສະ­ພາ​ແຫ່ງ​ຊາດ ຫງວ​ຽນ​ຊິງ​ຮູ່ງ ໄດ້​ສະ​ແດງ​ຄວາມ​ຂອບ­ໃຈ​​ຢ່າງຈິງ​ໃຈ​ຕໍ່ ສະ­ພາ​ແຫ່ງ​ຊາດຮົງ​ກາ­ລີ ທີ່​ໄດ້​ໃຫ້​ສັດ­ຕະ­ຍາ­ບັນ​ສັນ­ຍາ​ຂອບ​ຄູ່​ຮ່ວມ​ ແລະ ການຮ່ວມ​ມື​ຮອບ­ດ້ານ ຫວຽດ­ນາມ - ອີ​ຢູ (PCA); ຫວັງ​ວ່າ ສະ­ພາ​ແຫ່ງ​ຊາດຮົງ​ກາ­ລີ ຈະ​ສະ­ໜັບ­ສະ­ໜູນ​ຊຸກ­ຍູ້​ການ​ລົງ​ນາມ​​ໃນສັນ­ຍາ​ການ​ຄ້າ​ເສລີ ລະຫວ່າງຫວຽດ­ນາມ - ອີ​ຢູ (EFTA).

ສ່ວນ​ທ່ານປະ­ທານ​ສະ­ພາ​ແຫ່ງ​ຊາດຮົງ​ກາ­ລີ ໂກ​ເວີ ລາຊະ​ໂລ ໄດ້​ສະ­ແດງ​ຄວາມ​ປິ­ຕິ​ຊົມ­ຊື່ນ​ທີ່​ໄດ້​ມາ​ຢ້ຽມ­ຢາມປະ­ເທດຫວຽດ­ນາມ, ເນັ້ນ​​ເຖິງການ​ພົວ­ພັນ​ມິດ­ຕະ­ພາບ​ທີ່​ມີ​ແຕ່​ດົນ​ນານ ​ແລະ ການຮ່ວມ​ມື​ໃນ​ຫຼາຍ​ດ້ານ ລະ­ຫວ່າງຫວຽດ­ນາມ - ຮົງ​ກາ­ລີ, ຕີ​ລາ­ຄາ​ສູງ​ການ​ແລກ­ປ່ຽນ​ຄະ­ນະ​ຜູ້​ແທນ​ ລະ­ຫວ່າງ​ສອງ​ປະເທດ​ ທີ່​ໄດ້​ປະຕິບັດ​ເປັນ​ປົກ­ກະ­ຕິ, ພິ­ເສດແມ່ນ ​ຜົນ­ສຳ­ເລັດ​ອັນ​ດີ­ງາມ ​ຂອງ​ການ​ປະ­ຕິ­ບັດ​ຂໍ້​ຕົກ­ລົງ​ຮ່ວມ​ມື ລະ­ຫວ່າງ​ສະພາ​ແຫ່ງ​ຊາດຫວຽດ­ນາມ ແລະ ສະ­ພາ​ແຫ່ງ​ຊາດຮົງ​ກາ­ລີ ທີ່​ໄດ້​ລົງ​ນາມ​ໃນ​ປີ 2009 ​ເຊິ່ງໄດ້​ນຳ​ເອົາ​ການ​ພົວພັນລະຫວ່າງ​ສອງ​ປະ­ເທດ ​ແລະ ການ​ພົວພັນ​ລະຫວ່າ​ງສອງສະ­ພາ​ແຫ່ງ​ຊາດ ​ຂຶ້ນ​ສູ່​ລະ­ດັບ​ສູງ​ໃໝ່.

​ທ່ານປະທານ​ສະພາ​ແຫ່ງ​ຊາດ ໂກ​ເວີ ລາຊະ​ໂລ ​ໄດ້​ຢືນ­ຢັນນະ​ໂຍບາຍບຸ​ລິ​ມະ​ສິດ​ໃນ​ການ​ພົວ­ພັນ​ຕ່າງປະ­ເທດ​ຂອງຮົງ​ກາ­ລີ ແມ່ນຫັນ​ໄປ​ທາງ​ທິດ­ຕາ­ເວັນ­ອອກ, ​ໃນ​ນັ້ນ​ມີຫວຽດ­ນາມ ເພື່ອ​​ເຊື່ອມ​ຕໍ່​ກັບ​ຄູ່​ຮ່ວມເສດຖະ­ກິດ​ໃໝ່ ​ພາຍ­ຫຼັງ​ວິ​ກິດການ​ດ້ານການເງິນ​ຢູ່ ເອີຣົບ, ​ແລະ ໃຫ້​ຮູ້​ວ່າ ຮົງ​ກາ­ລີຢາກ​ໄດ້​ພ້ອມ​ກັບ ຫວຽດ­ນາມ ແບ່ງ­ປັນ​ບົດ­ຮຽນ​ໃນ​ການ​ກໍ່­ສ້າງ ແລະ ­ປະ​ຕິ​ຮູບ​ກົດ­ໝາຍ, ຍູ້​ແຮງ​ການ​ຮ່ວມ​ມື​ລະ­ຫວ່າງ ບັນ­ດາ​ຄະນະ​ກຳ­ມາທິ­ການ ອົງ­ການ​ຂອງສະ­ພາ​ແຫ່ງ​ຊາດ ແລະ ປະ­ສານ​ສົມ­ທົບກັນ​ ໃນ​ບັນ­ດາ​ເວ­ທີ​ປາ​ໄສ ລັດ​ຖະ​ສະພາ​ສາ­ກົນ ຄື: ສະ­ຫະ­ພັນ​ລັດ​ຖະ​ສະ­ພາ​ສາ­ກົນ (IPU), ວົງ​ຄະ­ນະ​ຍາດ​ພາ­ສາ​ຝລັ່ງ. ທ່ານໂກ​ເວີ ລາ​ຊະ​ໂລ ກໍ່​ໄດ້​ສະ­ເໜີ​ວ່າ ສະ­ພາ​ແຫ່ງ​ຊາດ​ທັງ​ສອງ​ຝ່າຍ​ກໍ່​​ອາດຈະສ້າງ­ຕັ້ງ​ບັນ­ດາ​ເວ­ທີ​ປາ​ໄສ​ ໂດຍ​ຜ່ານບັນດາ​ກຸ່ມ​ສະ­ມາ­ຊິກ​ສະ­ພາ ເພື່ອ​ແລກ­ປ່ຽນ​ບົດ­ຮຽນ​ໃນ​ວຽກ​ງານດ້ານ​ຕ່າງໆ.

​ໂດຍ​ເຫັນດີ​ກັບ​ຄຳ​ສະ­ເໜີ​ເປີດ​ກວ້າງ​ການ​ພົວ­ພັນ​ຮ່ວມ​ມືລະ­ຫວ່າງ​ສະ­ພາ​ແຫ່ງ​ຊາດ ແລະ ປະ­ຊາ­ຊົນ ສອງ​ປະ­ເທດ ​ຂອງ​ທ່ານປະ­ທານ​ສະ­ພາ​ແຫ່ງ​ຊາດ ຫງວ​ຽນ​ຊິງ​ຮູ່ງ, ທ່ານໂກ​ເວີ ລາຊະ​ໂລ ໄດ້​ໃຫ້​ຮູ້​ວ່າ ໃນ​ແຕ່​ລະ​ປີ ຮົງ​ກາ­ລີ​ຈະ​ສະໜອງ​ທຶນ​ສຶກສາ​ໃຫ້​ນັກ­ຮຽນ​ຫວຽດ­ນາມ 100 ຄົນ ​ມາ​ຮຽນ​ຢູ່ຮົງ​ກາ­ລີ. ຄຽງ​ຄູ່​ກັນ​ນັ້ນ, ຮົງ​ກາ­ລີ ກໍ່​ຢາກ​​ເປີດ​ກວ້າງ​ການ​ຮ່ວມ​ມື​ກັບຫວຽດ­ນາມ ໃນ​ຂົງ­ເຂດ​ກະ­ສິ­ກຳ, ການ​ຄຸ້ມ​ຄອງ​ຊັບ​ພະ​ຍະ​ກອນ​ນ້ຳ, ດູ​ແລ​ສຸຂະ​ພາບ​ຂອງ​ປະ­ຊາ­ຊົນ ແລະ ການ​ພັດ­ທະ­ນາ​ແບບ​ຍືນ​ຍົງ.

​ໃນທີ່​ການ​ພົບ​ປະ​ຫາລື, ສອງ​ຝ່າຍ​ໄດ້​ເຫັນ​ດີ​ເປັນ​ເອ­ກະ​ພາບ​ເພີ່ມ​ທະ­ວີ​ການແລກ­ປ່ຽນ​ບົດ­ຮຽນ ກ່ຽວກັບການປັບປຸງ​ບູ­ລະ­ນະລະ­ບົບ​ກົດ­ໝາຍ ​ໃນ​ສະ­ພາບ​ການ​ເຊື່ອມ​ໂຍງ​ສາ­ກົນ; ​ເປັນເອ­ກະ​ພາບ​ກັນ​ຈະ​ຊຸກຍູ້ການ­ເຄື່ອນ­ໄຫວສັງ​ສັນ​ປະ­ຊາ­ຊົນ, ເລັ່ງລັດການ​ຮ່ວມ​ມື​ ໃນ​ຂົງ­ເຂດ​ວັດ­ທະ­ນະ­ທຳ ການ­ທ່ອງ­ທ່ຽວ ແນໃສ່​ເພີ່ມ​ທະ­ວີ​ຄວາມ​ເຂົ້າ​ອົກ​ເຂົ້າ­ໃຈ​ກັນ ​ລະຫວ່າງ​ປະ­ຊາ­ຊົນສອງ​ປະ​ເທດ ເພື່ອ​ຜົນ​ປະ­ໂຫຍດ​ຂອງ​ແຕ່​ລະ​ຝ່າຍ.

ທ່ານ​ເລ­ຂາ­ທິ­ການ​ໃຫຍ່ ຫງວ​ຽນຝູ​ຈ້ອງ ຕ້ອນ­ຮັບທ່ານ​ປະ­ທານ​ສະ­ພາ​ແຫ່ງ​ຊາດຮົງກາລີ

ໃນ​ຕອນ​ບ່າຍ​ວັນ​ທີ 9 ພະ­ຈິກ 2015, ທີ່ສຳ­ນັກ­ງານ​ສູນ​ກາງ​ພັກກອມມູນິດຫວຽດນາມ, ທ່ານ​ເລຂາທິການ​ໃຫຍ່ ຫງວ​ຽນ​ຝູຈ້ອງ ໄດ້​​ຕ້ອນ­ຮັບແລະແລກ­ປ່ຽນ​ຄຳ​ເຫັນ ​ຢ່າງ​ສະ­ໜິດ­ສະ­ໜົມ ກັບ​ທ່ານ ໂກ​ເວີ ລາຊະ​ໂລ ປະ­ທານ​ສະ­ພາ​ແຫ່ງ​ຊາດ​ ​ແຫ່ງສາ­ທາ­ລະ­ນະ​ລັດຮົງ​ກາ­ລີ ທີ່ກຳ­ລັງ​ຢ້ຽມ­ຢາມຫວຽດ­ນາມ.

ທ່ານ ໂກ​ເວີ ລາຊະ​ໂລ ໄດ້​ສະ­ແດງ​ຄວາມ​ປິ­ຕິ​ຊົມ­ຊື່ນ​ທີ່​ໄດ້​ມາ​ຢ້ຽມ­ຢາມ​ປະ­ເທດຫວຽດ­ນາມ; ໄດ້​ຕີ​ລາ­ຄາ​ສູງ​ບັນ­ດາ​ຜົນ­ງານ​ອັນ​ໃຫຍ່​ຫຼວງ ທີ່ມີ​ຄວາມ​ໝາຍ​ປະ­ຫວັດ­ສາດ​ ເຊິ່ງ​ພັກ ລັດ ແລະ ປະ­ຊາ­ຊົນ ຫວຽດນາມຍາດ​ມາ​ໄດ້ ​ໃນ​ເກືອນ 30 ປີ ແຫ່ງ​ການ​ປະ­ຕິ­ບັດ​ພາ­ລະ­ກິດ​ປ່ຽນ­ແປງ​ໃໝ່; ຕີ​ລາ­ຄາ​ສູງ​ຕໍ່​ບັນ­ດາ​ບົດ­ຮຽນ​ຂອງຫວຽດນາມ, ອິດ​ທິ​ພົນ ແລະ ພາ­ລະ​ບົດ­ບາດ​ຂອງຫວຽດ­ນາມ ໃນ​ພາກ​ພື້ນ ແລະ ໃນ​ໂລກ.

ທ່ານ​ປະ­ທານ​ກໍ່​ໄດ້ແຈ້ງ​​​ໃຫ້ທ່ານ​ເລ­ຂາ­ທິ­ການ​ໃຫຍ່ຊາບ ກ່ຽວ​ກັບບາງ​ຈຸດ​ໃຫຍ່ຂອງ​ສະພາບ​ການ​ຮົງ​ກາ­ລີ ໃນ​ເວ­ລາທີ່​ຜ່ານ​ມາ​ມໍ່​ນີ້; ກ່ຽວ​ກັນ​ຜົນ­ສຳ­ເລັດ​ຂອງ​​ການ​ພົບ​ປະ​ຫາລື ການ​ແລກປ່ຽນ​ກັບ​ບັນ­ດາ​ການ​ນຳ​ຂອງຫວຽດນາມ; ເນັ້ນ​ວ່າ ຮົງ​ກາ­ລີ​ໃຫ້​ຄວາມ​ສຳຄັນ​ແກ່​ການ​ຮ່ວມ​ມື ແລະ ຈະ​ພະຍາຍາມ​ສູ້​ຊົນ​ ເພື່ອ​ຂະຫຍາຍ​ສາຍ​ພົວ­ພັນ​ຮ່ວມ​ມື​ອັນ​ເປັນ​ມູນ­ເຊື້ອ ​ກັບຫວຽດ­ນາມ​ ໃຫ້​ໄດ້​ຮັບ​ຜົນ​ຍິ່ງກວ່າອີກ; ສືບ​ຕໍ່​ຮ່ວມ​ມື​ຢ່າງ​ແໜ້​ແຟ້ນ​ ກັບ​ສະ­ພາ​ແຫ່ງ​ຊາດຫວຽດ­ນາມ ແນ­ໃສ່​ປະ­ຕິ­ບັດ​​ບັນ­ດາ​ຂໍ້​ຕົກ­ລົງ​ທີ່​ໄດ້​ລົງ​ນາມ ໃຫ້​ມີ​ປະ​ສິດ­ທິ​ຜົນ; ຈະ​ສະ­ໜັບ­ສະ­ໜູນ​ລັດ­ຖະ­ບານຮົງ​ກາ­ລີ ສະໜອງ​ທຶນເພື່ອ​ຜັນ​ຂະ­ຫຍາຍ​ໂຄງ­ການ​ທີ່​ສຳຄັນ​ ຈຳ­ນວນ​ໜຶ່ງ​ຢູ່ຫວຽດ­ນາມ, ເປັນ­ຕົ້ນ​ແມ່ນ​ ໃນ​ບັນ­ດາ​ຂົງ­ເຂດ​ທີ່ຮົງ​ກາ­ລີມີ​ຄວາມ​ສາ­ມາດ​ບົ່ມ​ຊ້ອນ ​ແລະ ຫວຽດ­ນາມມີ​ຄວາມ​ຕ້ອງ­ການ ຄື: ເສດ­ຖະ­ກິດ ການ​ຄ້າ ສາ­ທາ­ລະ­ນະ​ສຸກ ການ​ສຶກ​ສາ ພະລັງງານ; ຊຸກ­ຍູ້​ການ​ພົວພັນລະຫວ່າງ​ສອງ​ພັກ​ທີ່​ກຳ​ອຳ­ນາດ; ເປັນ​ຂົວ​ຕໍ່​ພັດ­ທະ­ນາ​ການ​ພົວ­ພັນລະຫວ່າງ ສະ­ຫະ­ພັນເອີຣົບ (EU) ກັບຫວຽດ­ນາມ; ອວຍ­ພອນ​ໃຫ້​ກອງ​ປະ­ຊຸມ​ໃຫຍ່ຜູ້​ແທນ​ທົ່ວ​ປະ​ເທດ​ຄັ້ງ​ທີ XII ຂອງ​ພັກກອມ​ມູ​ນິດຫວຽດ­ນາມ ໄດ້​ຮັບ​ຜົນ­ສຳ­ເລັດ​ຢ່າງ​ດີ­ງາມ.

ທ່ານເລ­ຂາ­ທິ­ການ​ໃຫຍ່ ຫງວ​ຽນຝູ​ຈ້ອງ ໄດ້​ສະ​ແດງ​ຄວາມຍິນ​ດີ​ຕ້ອນ­ຮັບທ່ານໂກ​ເວີ ລາຊະ​ໂລ ປະ­ທານ​ສະ­ພາ​ແຫ່ງ​ຊາດຮົງ​ກາ­ລີ ທີ່ມາ​ຢາມ​ປະ­ເທດຫວຽດ­ນາມ, ຖື​ວ່າ​ນີ້​ເປັນ​ຂີດ​ໝາຍ​ທີ່​ສຳ­ຄັນ, ສ້າງ​ແຮງ​ກະ​ຕຸ້ນ​ໃໝ່​ໃຫ້​ແກ່​ການ​ຂະ­ຫຍາຍ­ ​ສາຍ​ພົວ­ພັນ​ມິດ­ຕະ­ພາບອັນ​ເປັນ​ມູນ­ເຊື້ອ, ການຮ່ວມ​ມື​ຫຼາຍ​ດ້ານ ​ລະຫວ່າງ​ສອງ​ປະ­ເທດ; ສະ​ແດງ​ຄວາມຂອບ​ອົກ​ຂອບ­ໃຈຕໍ່ ​ການ​ຊ່ວຍ­ເຫຼືອ ​ແລະ ຄວາມ​ສະ­ໜັບ­ສະ­ໜູນ​ອັນ​ສຸດ​ອົກ​ສຸດ​ໃຈ ​ຂອງຮົງ​ກາ­ລີ ທີ່​ມີ​ຕໍ່ຫວຽດ­ນາມ ໃນ​ພາ­ລະ­ກິດ​ປົກ​ປັກ​ຮັກ­ສາ ແລະ ສ້າງ­ສາ​ປະ­ເທດ​ຊາດ; ຕີ​ລາ­ຄາ​ສູງ​ ຕໍ່​ຄວາມ​ຕັ້ງໜ້າ​ພະ­ຍາ­ຍາມ ​ຂອງຮົງ​ກາລີ ທີ່ແນ­ໃສ່​ສ້າງ​ຄວາມ​ສະ​ຖຽມ​ລະ​ພາບ ແລະ ພັດ​ທະ­ນະ​ເສດ­ຖະ­ກິດ, ເຊື່ອມ​ໂຍງ​ພາກ​ພື້ນ ແລະ ສາ­ກົນ; ສະແດງ​ຄວາມປິ­ຕິ​ຊົມ­ຊື່ນ ​ຕໍ່​​ບາດ­ກ້າວ​ຂະ­ຫຍາຍ­ຕົວ​ອັນ​ດີງາມ ​ຂອງ​ສາຍ​ພົວພັນ​ອັນ​​ເປັນມູນ­ເຊື້ອ ລະຫວ່າງ​ສອງ​ປະ­ເທດ; ຝາກ​ຄວາມຂອບ­ອົກ​ຂອບໃຈ ມາ​ຍັງ​ສະພາ​ແຫ່ງ​ຊາດ ລັດຖະ­ບານ ແລະ ປະ­ຊາ­ຊົນຮົງ​ກາ­ລີ ທີ່ໄດ້​ອຳ­ນວຍ​ຄວາມ​ສະ­ດວກ​ ໃຫ້​ແກ່​​ຊາວຫວຽດນາມທີ່ກຳ​ລັງ​ດຳ­ລົງ​ຊີວິດ ເຮັດ​ວຽກ ແລະ ຮ່ຳ­ຮຽນຢູ່ຮົງ​ກາ­ລີ, ​ໃຫ້ພວກ​ເຂົາສືບ​ຕໍ່​​ເປັນ​ຂົວ​ຕໍ່​ທີ່​ມີ​ປະ​ສິ​ທິ​ຜົນ ​ໃຫ້​ແກ່​ການ​ພົວ­ພັນລະຫວ່າງສອງ​ປະ­ເທດ. ທ່ານ​ເລຂາທິການ​ໃຫຍ່ໄດ້​ເນັ້ນ​ວ່າ ໃນ​ການ​ປະ­ຕິ­ບັດ​ແນວ­ທາງນະ­ໂຍ­ບາຍ​ ການ​ຕ່າງປະ­ເທດ​ຂອງ​ຕົນ​ເອງ ຫວຽດ­ນາມ​ຍາມ​ໃດ​ກໍ່​ໃຫ້​ຄວາມ​ສຳ­ຄັນຕໍ່​ການ​ພົວພັນ ​ກັບ​ບັນ­ດາ​ປະ­ເທດ​ເພື່ອນມິດທີ່​ເປັນມູນ­ເຊື້ອ ໃນ​ນັ້ນ​ມີຮົງ​ກາ­ລີ; ຢືນ­ຢັນຫວຽດນາມຕັດ­ສິນ​ໃຈ​ສູ້​ຊົນ​ ເພື່ອ​ແນໃສ່​ປັບ­ປຸງ ແລະ ຂະ­ຫຍາຍ­ສາຍ​ພົວ­ພັນ​ອັນ​ດີ­ງາມ ​ລະ­ຫວ່າງ​ສອງ​ປະເທດ, ເປັນຕົ້ນ​ແມ່ນ​ລະ­ຫວ່າງ​ສອງ​ສາ​ພາ​ແຫ່ງ​ຊາດ; ຝາກ​ຄຳ​ອວຍ­ພອນ ​​ໃຫ້ປະ­ຊາ­ຊົນຮົງ​ກາ­ລີ ​ໄດ້ຮັບ­ຜົນ​ງານ​ໃໝ່ ໃນ​ພາລະ­ກິດ­ສ້າງສາ ແລະ ພັດທະ­ນາ​ປະ­ເທດ​ຊາດ.

ທ່ານນາ­ຍົກ­ລັດ­ຖະ­ມົນ­ຕີ ຫງວ​ຽນ​ເຕິນ​ຢຸງ ພົບ​ປະ​ແລກ­ປ່ຽນ​ຄວາມ​ເຫັນ​ກັບ ທ່ານປະ­ທານ​ສະພາ​ແຫ່ງ​ຊາດຮົງ​ກາ­ລີ

ໃນ​ຕອນ​ປ່າຍ​ວັນ​ທີ 9 ພະ­ຈິກ 2015, ທີ່ທຳນຽບ​ລັດ­ຖະ­ບານ, ທ່ານ​ນາ­ຍົກ­ລັດ­ຖະ­ມົນ­ຕີ ຫງວ​ຽນ​ເຕິນ​ຢຸງ ​ໄດ້​ມີ​ການ​ພົບ​ປະ​ແລກ­ປ່ຽນ​ຄວາມ​ເຫັນ​ກັບ​ທ່ານ ໂກ​ເວີ ລາຊະ​ໂລ ປະ­ທານ​ສະ­ພາ​ແຫ່ງ​ຊາດ​ຮົງ​ກາລີ.

ທ່ານ​ນາ­ຍົກ­ລັດ­ຖະ­ມົນ­ຕີ ຫງວ​ຽນ​ເຕິນ​ຢຸງ ສະ​ແດງ​ຄວາມ​ຍິນ​ດີ​ຕ້ອນ­ຮັບ ທ່ານປະ­ທານ​ສະ­ພາ​ແຫ່ງ​ຊາດຮົງ​ກາ­ລີ ໂກ​ເວີ ລາຊະ​ໂລ ທີ່ມາ​ຢາມ​ປະ­ເທດຫວຽດ­ນາມ​ຢ່າງ​ເປັນ​ທາງ​ການ; ໄດ້​ຕີ​ລາ­ຄາ​ສູງ​ຜົນ­ສຳເລັດ​ຂອງການພົບ​ປະ​ຫາລື ລະ­ຫວ່າງ​ປະ­ທານ​ສະ­ພາ​ແຫ່ງ​ຊາດ​ທັງ​ສອງ​; ພ້ອມ​ທັງ​ສະ­ແດງ​ຄວາມ​ເຊື່ອ​ໝັ້ນ​ຕໍ່​ການ​ຢ້ຽມຢາມ​ ຂອງ​ທ່ານ​ປະ­ທານ​ສະ­ພາ​ແຫ່ງ​ຊາດ​ ຈະເປັນ​ການ​ປະ­ກອບ­ສ່ວນ​ອັນ​ສຳ­ຄັນ​ ເຂົ້າ​ໃນ​ການ​ຊຸກ­ຍູ້​ການ​ພົວພັນ​ອັນດີ​ງາມ ​ລະ­ຫວ່າງ​ສອງ​ປະ­ເທດ​ເວົ້າ​ລວມ ກໍ່​ຄື​ການ​ພົວ­ພັນ​ລະ­ຫວ່າງ​ສະ­ພາ​ແຫ່ງ​ຊາດ​ທັງ​ສອງ. ທ່ານ​ນາຍົກລັດຖະມົນ­ຕີ ຫງວ​ຽນ​ເຕິນ​ຢຸງ ກໍ່​ໄດ້ສະ​ແດງ​ຄວາມ​ຂອບ­ໃຈຕໍ່ຮົງ​ກາ­ລີ ທີ່ໄດ້​ໃຫ້​ທຶນ​ຊ່ວຍ­ເຫຼືອ​ພັດທະນາ​ເປັນ​ທາງ​ການ (ODA) ແກ່​ໂຄງ­ການ​ກໍ່­ສ້າງ​ໂຮງໝໍເນື້ອງອກ ເກີ່ນ​ເທີ ແລະ ໂຄງການ​ສະ­ໜອງ​ນ້ຳ​ສະ­ອາດ ແມ່­ນ້ຳ​ແດງ; ພ້ອມ​ນັ້ນ​ກໍ່​ໄດ້​ສະ­ເໜີ​ໃຫ້ສອງ​ຝ່າຍ​ປະ­ສານ​ສົມ­ທົບກັນ​ຢ່າງ​ແໜ້ນ​ແຟ້ນ​ ໃນ​ການ​ຜັນ​ຂະ­ຫຍາຍ​ໂຄງ­ການ​ເຫຼົ່າ​ນີ້. ທ່ານນາຍົກລັດ­ຖະ­ມົນ­ຕີ​ ກໍ່​ໄດ້​ສະ­ເໜີ​ໃຫ້ຮົງ​ກາ­ລີ ສືບ​ຕໍ່­ໃຫ້​ທຶນສຶກສາ​ຕື່ມ​ອີກ ແລະ ສ້າງ​ຄວາມ​ສະ­ດວກ​ໃຫ້​ແກ່​ນັກ​ສຶກ​ສາຫວຽດ­ນາມ ທີ່​ຮຽນ​ຢູ່ປະ­ເທດ​ຮົງ​ກາລີ; ສືບ​ຕໍ່​ສະ­ໜັບ­ສະ­ໜູນ​ ວົງ​ຄະ­ນະ​ຍາດ​ຊາວຫວຽດ­ນາມຢູ່ຮົງ​ກາ­ລີ ມີ​ຊີ­ວິດ​​ເປັນ​ປົກ­ກະ­ຕິ, ​ເຈືອ​ຈານ​ເຂົ້າ​ກັບ​ສັງຄົມຮົງ​ກາລີ­ເປັນ​ຢ່າງ​ດີ. ຄຽງ​ຄູ່​ກັນ​ນັ້ນ ທ່ານນາຍົກລັດ­ຖະ­ມົນ­ຕີ​ ກໍ່​ສະ­ເໜີ​ໃຫ້ຮົງ​ກາ­ລີຮັບ­ຮອງຫວຽດນາມ ເປັນປະເທດມີ​ລະ­ບົບ​ເສດຖະ­ກິດ​ຕະ­ຫຼາດ​ສົມ­ບູນ ກໍ່ຄືສະໜັບສະໜູນຕໍ່ການ​ລົງ​ນາມ​ໂດຍ​ໄວ​ ໃນ​ສັນ­ຍາ​ການ​ຄ້າ​ເສລີ ລະ­ຫວ່າງຫວຽດ­ນາມ ແລະ ສະຫະພາບເອີຣົບ (EU).

ທ່ານປະ­ທານ​ສະ­ພາ​ແຫ່ງ​ຊາດຮົງ​ກາ­ລີ ໄດ້​ສະ­ແດງ​ຄວາມ​ປະ​ທັບ​ໃຈ​ຕໍ່​ບັນ­ດາ​ຜົນ­ງານ​ການ​ພັດ­ທະ­ນາ​ຂອງຫວຽດ­ນາມ ກໍ່​ຄື​ຖາ­ນະ​ບົດ­ບາດ​ທີ່ນັບ​ມື້​ນັບ​ເພີ່ມ​ຂຶ້ນຂອງຫວຽດ­ນາມ ໃນ​ເວ­ທີ​ສາ­ກົນ; ເນັ້ນ​ວ່າ ຮົງ​ກາ­ລີ ​ໃຫ້​ຄວາມ​ສຳ­ຄັນ​ເປັນ​ພິ­ເສດ ​ຕໍ່ການ​ພົວ­ພັນ​ກັນຫວຽດ­ນາມ ແລະ ຈະ​ປະ­ກອບ­ສ່ວນ ​ໃຫ້­ຄວາມຊ່ວຍເຫຼືອແກ່ການ​ພັດທະ­ນາ​ ຂອງ​ຫວຽດນາມ. ທ່ານປະ­ທານ​ສະ­ພາ​ແຫ່ງ​ຊາດ ໂກ​ເວີ ລາ​ຊະ​ໂລ ໄດ້​ໃຫ້​ຄຳ​ເຫັນ​ວ່າ: “ຮົງ​ກາ­ລີຍາມ​ໃດ​ກໍ່​ຖື​ເອົາ ຫວຽດ­ນາມເປັນ​ຄູ່​ຮ່ວມ​ທີ່​ສຳ­ຄັນ ​ຂອງ​ຕົນ​ ​ຢູ່​​ໃນພາກ​ພື້ນ; ບໍ່​ພຽງ​ແຕ່​ໃນ​ອະ​ດີດ​ຕະ­ການ ​ໃນປັດ­ຈຸ­ບັນ​ເທົ່ານັ້ນ ຫາກ​ຍັງ​ໃນ​ອະ­ນາ­ຄົດອີກດ້ວຍ”. ທ່ານປະ­ທານ​ສະ­ພາ​ແຫ່ງ​ຊາດ ໂກ​ເວີ ລາ​ຊະ​ໂລ ຢືນ­ຢັນ​ວ່າ ສະ­ພາ​ແຫ່ງ​ຊາດຮົງ​ກາ­ລີ ຍາມ​ໃດ​ກໍ່​ສະ­ໜັບ­ສະ­ໜູນ​ ການ​ເພີ່ມ​ທະ­ວີການ​ຮ່ວມ​ມື​ທີ່​ມີ​ປະ​ສິດ­ທິ​ຜົນ ​ລະ­ຫວ່າງສອງ​ປະ­ເທດ​ໃນຂົງ­ເຂດຕ່າງໆ, ເປັນຕົ້ນ​ແມ່ນ ເສດ­ຖະ­ກິດ ການ​ຄ້າ ການ​ລົງ­ທຶນ ການ​ສຶກ​ສາ-ກໍ່­ສ້າງ ສາ­ທາ­ລະ­ນະ​ສຸກ ​ໂອສົດ ກະ­ສິ­ກຳ. ທ່ານ​ໄດ້​ໃຫ້​ຮູ້​ວ່າ ລັດ­ຖະ­ບານຮົງ​ກາ­ລີ ໄດ້​ຮັບ­ຮອງ​ແຫຼ່ງ​ທຶນ​ຊ່ວຍ​ເຫຼືອ​ພັດ­ທະ­ນາ​ເປັນ​ທາງ​ການ (ODA) ໃຫ້​ແກ່​ໂຄງ­ການ​ໂຮງ­ໝໍເນື້ອງ​ອກ ເກີ່ນ​ເທີ ແລະ ໂຄງ­ການ​ສະ­ໜອງ​ນ້ຳ​ສະ­ອາດ ແມ່­ນ້ຳ​ແດງ ເພື່ອ​ຜັນ​ຂະຫຍາຍ​ການກໍ່­ສ້າງ​ໃນ​ຕົ້ນ​ປີ 2016. ທ່ານປະ­ທານ ໂກ​ເວີ ລາ​ຊະ​ໂລ ໃຫ້​ຮູ້​ວ່າ ລັດ​ຖະບານຮົງ​ກາ­ລີ​ຈະຊ່ວຍເຫຼືອຫວຽດ­ນາມໃນ​ຂົງ­ເຂດສຶກ​ສາ-ກໍ່­ສ້າງ ແລະ ໃຫ້​ຄຳ​ໝັ້ນ​ສັນ­ຍາ​ຈະ​ສະໜອງ​ທຶນ​ສຶກສາ​ໃຫ້ແກ່​ນັກ​ສຶກ​ສາຫວຽດ­ນາມ 100 ທຶນ​ຕໍ່​ປີ. ທ່ານກໍ່​ໄດ້​ຢືນ­ຢັນ​ວ່າ ​ໃນ​ຖາ­ນະ​ເປັນ​ສະ­ມາ­ຊິກອີ​ຢູ ຮົງກາລີຈະ​ເຮັດ​ຈົນ​ສຸດ​ຄວາມ​ສາ­ມາດຂອງ​ຕົນ ເພື່ອ​ຊຸກ­ຍູ້​ການ​ພົວ­ພັນ​ອັນ​ດີ­ງາມ ​ລະ­ຫວ່າງຫວຽດ­ນາມ ແລະ ອີ​ຢູ.

ໃນ​ການ​ຢ້ຽມ­ຢາມຫວຽດ­ນາມຄັ້ງ​ນີ້, ທ່ານ​ປະ­ທານ​ສາ​ພາ​ແຫ່ງ​ຊາດຮົງ​ກາ­ລີ ໂກ​ເວີ ລາຊະ​ໂລ ​ໄດ້ໄປ​ຢ້ຽມ​ຊົມ​ສະ­ຖານ­ທີ່​ປະ​ຫວັດ​ສາດ ວັດ­ທະ­ນະ­ທຳ ທ່ອງ​ທ່ຽວ​ຈຳ­ນວນ​ໜຶ່ງ​ ຢູ່ນະຄອນຮ່າ​ໂນ້ຍ ​ແຂວງກວ໋າງ​ນິງ, ດ່າ​ໜັງ, ກວ໋າງ​ນາມ ແລະ ນະ­ຄອນໂຮ່​ຈີມິນ./.

ສັງ​ລວມ​ໂດຍ ຫງວຽນ​ດຶກ

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ