ວັນອາທິດ, 31/5/2020
ຍູ້ແຮງການພົວພັນຄູ່ຮ່ວມທົ່ວໂລກ ເພື່ອການພັດທະນາແບບຍືນຍົງ ແລະ ຜົນປະໂຫຍດລວມ ຂອງມະນຸດຊາດທັງໝົດ*
9/12/2015 10:53' ສົ່ງ ພິມ
ທ່ານປະທານປະເທດ ເຈືອງເຕິນຊາງ ເຂົ້າຮ່ວມແລະກ່າວປາໄສ ທີ່ພິທີໄຂກອງປະຊຸມສຸດຍອດ ຂອງອົງການສະຫະປະຊາຊາດ ເພື່ອຮັບຮອງເອົາ ລະບຽບວາລະການປະຊຸມ 2030 ເພື່ອການພັດທະນາແບບຍືນຍົງ. (ພາບ: TTXVN)

ກ່ອນ​ໜ້າ​ນີ້ 15 ປີ, ພວກ​ເຮົາ​ໄດ້​ຮັບຮອງ​ເອົາ​ຖະ​ແຫຼ​ງການ ແລະ ເປົ້າໝາຍ​ການພັດທະນາ​ສະຫັດ​ສະ​ວັດ 8 ​ເປົ້າ​ໝາຍ ສຳລັບ​ໄລຍະ 2000 - 2015. ມື້​ນີ້, ພວກ​ເຮົາຮູ້ສຶກ​​ເພີງພໍ​ໃຈ​ທີ່​ເຫັນ​ວ່າ ​ເສດຖະກິດ​ໂລກ​​ໄດ້​ຮັບ​ການ​ປັບປຸງ ​ເຖິງ​ວ່າ​ຍັງ​ມີ​ຄວາມ​ສ່ຽງ​ຫຼາຍ​ຢ່າງ​ກໍ​ຕາມ, ການ​ປະຕິບັດ​ບັນດາເປົ້າໝາຍການ​ພັດທະນສະຫັດ​ສະ​ວັດຢູ່ຫຼາຍປະເທດໄດ້ຮັບຜົນງານທີ່ໜ້າພໍໃຈ, ປະກອບ​ສ່ວນ​ແກ້​ໄຂປົວ​ແປງ​ຊີວິດ​ຄວາມ​ເປັນ​ຢູ່​ຂອງ​ຫຼາຍ​ລ້ານ​ຄົນ​ໃຫ້​ດີ​ຂຶ້ນ. ​ແຕ່​ວ່າ, ​ໃນ​ໂລກ​ຍັງ​ມີ​ປະຊາຊົນ​ຫຼາຍກວ່າ​ໜຶ່ງ​ຕື້​ຄົນ ​ຕ້ອງດຳລົງຊີວິດ​ໃນ​ຄວາມທຸກ​ຍາກ; ເປົ້າໝາຍ​ການພັດທະນາ​ສະຫັດ​ສະ​ວັດຫຼາຍ​ເປົ້າ​ໝາຍ ​ຍັງ​ບໍ່​​ບັນລຸ​ເຖິງຜົນສຳ​ເລັດ​ຄື​ດັ່ງ​ຄວາມ​ປະສົງ. ສິ່ງ​ທ້າ​ທາຍ​ຕ່າງໆ​ກ່ຽວ​ກັບ​ຄວາມທຸກ​ຍາກ, ​ໂລຄາ​ພະຍາດ, ຄວາມ​ອະ​ຍຸດຕິ​ທຳ​ທາງ​ສັງຄົມ, ​ແຫຼ່ງຊັບພະຍາກອນ​ຖືກ​ບົກ​ແຫ້ງ, ສິ່ງ​ແວດ​ລ້ອມ​ຖືກ​ທຳລາຍ, ການ​ປ່ຽນ​ແປງ​ຂອງ​ດິນ​ຟ້າ​ອາກາດ, ການ​ປະ​ທະ​ກັນ​, ການວິ​ກິດ, ສະພາບ​ໃຊ້ຄວາມ​ຮຸນ​ແຮງ, ຄວາມ​ວຸ່ນວາຍປັ່ນປວນ ​ຄວາມເຄັ່ງ​ຕຶງ​​ເກີດ​ຂຶ້ນຢູ່​ຫຼາຍ​ແຫ່ງ ພວມ​ຄຸກ​ຄາມ​ຢ່າງ​ຮ້າຍ​ແຮງ​ຕໍ່ສັນຕິພາບ ຄວາມ​ໝັ້ນຄົງ ​ແລະ ການ​ພັດທະນາ​ແບບ​ຍືນ​ຍົງ ​ໃນ​ຂອບ​ເຂດ​ທົ່ວ​ໂລກ.

ພວກ​ເຮົາມາ​ໂຮມ​ປະຊຸມ​ຢູ່​ນີ້​ເພື່ອສະ​ແດງ​ຄຳ​ໝັ້ນ​ສັນຍາ ​ແລະ ສະໜັບສະໜູນຢ່າງ​ແຂງ​ແຮງຕໍ່​ລະບຽບ​ວາລະ​ການ​ປະຊຸມ​ທົ່ວ​ໂລກ​ ກ່ຽວ​ກັບ​ການ​ພັດທະນາ​ທີ່​ມີ​ລັກສະນະ​ບາດ​ລ້ຽວອັນ​ສຳຄັນ. ​ເອກະສານ “ຫັນປ່ຽນ​ໂລກ​ຂອງ​ພວກ​ເຮົາ: ລະບຽບວາລະ​ການ​ປະຊຸມ 2030 ​ເພື່ອການ​ພັດທະນາ​ແບບ​ຍືນ​ຍົງ” ທີ່​ມີ 17 ​ເປົ້າ​ໝາຍ ​ແລະ 169 ຄາດໝາຍ​ສູ້​ຊົນສະ​ເພາະນັ້ນ ​ໄດ້​ວາງ​ວິ​ໄສ​ທັດ​ຍຸດ​ທະ​ສາດ​ໃໝ່, ສ່ອງ​ແສງ​ເຖິງຄວາມ​ມຸ່ງ​ມາດ​ປາຖະໜາ​ລວມຂອງມະນຸດຊາດ ທີ່​ຢາກ​ໄດ້​ດຳລົງ​ຊີວິດ​ຢູ່​ໃນ​ໂລກ​ທີ່​ມີ​ສັນຕິພາບ ຄວາມ​ສະຫງົບ ຄວາຍຸດຕິ​ທຳ ​ສະອາດສົດ​ໃສ​ແລະ​ຂຽວງາມ; ສ້າງ​ຂອບ ​ແລະ ກຳນົດ​ທິດ​ໃໝ່​ ໃຫ້​ທຸກໆ​ປະ​ເທດ​ໃນ​ໂລກ​ເພື່ອພ້ອມ​ກັນ​ຮັບ​ມື​ກັບ​ສິ່ງ​ທ້າ​ທາຍ​ລວມ ​ໃນ​ສາມ​ເສົາ​ຄ້ຳ​ຕົ້ນຕໍ​ຄື ​ເສດຖະກິດ ສັງຄົມ ​ແລະ ສິ່ງ​ແວດ​ລ້ອມ.

ຫວຽດນາມ​ສະໜັບສະໜູນ ​ແລະ ​ໃຫ້​ຄຳ​ໝັ້ນ​ສັນຍາ ຈະ​ນຳ​ໃຊ້​ແຫຼ່ງພະລັງ​ທີ່​ຈຳ​ເປັນທັງ​ໝົດ, ລະດົມ​ທຸກໆ​ກະຊວງ ຂະ​ແໜງ​ການ ທ້ອງ​ຖິ່ນ ອົງການ​ຈັດ​ຕັ້ງ ຊຸມ​ຊົນ ​ແລະ ປະຊາຊົນ ​ເພື່ອປະຕິບັດ​ລະບຽບ​ວາລະ​ການ​ປະຊຸມ 2030 ​ແລະ​ບັນດາ​ເປົ້າ​ໝາຍ​ການ​ພັດທະນາ​ແບບ​ຍືນ​ຍົງ​ທັງ​ໝົດ ໃຫ້​ສຳ​ເລັດ​ຜົນ. ພ້ອມ​ກັນ​ນັ້ນ, ພວກ​ຂ້າພະ​ເຈົ້າ​ຢາກ​ເນັ້ນ​ສາມ​ບັນຫາ​ດັ່ງ​ນີ້:

ທີ​ໜຶ່ງ, ສັນຕິພາບ ​ແລະ ການ​ພັດທະນາ​ຍາມ​ໃດກໍ່​ຕິດ​ແໜ້ນ​ນຳ​ກັນ. ບັນດາ​ເປົ້າ​ໝາຍ​ການ​ພັດທະນາ​ແບບ​ຍືນ​ຍົງ ບໍ່​ອາດ​ຈະ​ປະກົດຜົນ​ເປັນ​ຈິງ​ໄດ້​ໃນ​ເງື່ອນ​ໄຂ​ສົງຄາມ ​ໃນຄວາມ​ວຸ່ນວາຍ​ປັ່ນ​ປວນ​​ແລະການ​ປະ​ທະ​ກັນ. ພວກ​ເຮົາ​ພຽງ​ແຕ່​ສາມາດ​ເຕົ້າ​ໂຮມ​ບັນດາ​ແຫຼ່ງພະລັງ​ອັນ​ຈຳ​ເປັນ​ໃຫ້​ແກ່​ການ​ພັດທະນາ​ໄດ້ ​ໃນ​ສິ່ງ​ແວດ​ລ້ອມ​ແຫ່ງ​ສັນຕິພາບ ສະຖຽນ​ລະ​ພາບ. ດັ່ງ​ນັ້ນ, ຮັບປະກັນ​ສິ່ງ​ແວດ​ລ້ອມ​ແຫ່ງ​ສັນຕິພາບ ຄວາມ​ສະຫງົບ ບົນ​ພື້ນຖານ​ເຄົາລົບ​ນັບຖື​ກົດໝາຍ​ສາກົນ ​ເປັນ​ເງື່ອນ​ໄຂ​ຕັດສິນ​ເບື້ອງ​ຕົ້ນ​ ເພື່ອປະຕິບັດບັນດາ​ເປົ້າ​ໝາຍ​ການ​ພັດທະນາ​ແບບ​ຍືນ​ຍົງ ຢ່າງ​ສຳ​ເລັດຜົນ. ພວກ​ເຮົາ​ຕ້ອງ​ຊຸກຍູ້​ການ​ແກ້​ໄຂຢ່າງເໝາະ​ສົມ ​ຄວາມ​ພິພາດ ການ​ປະ​ທະ​ກັນ​ຕ່າງໆ​ດ້ວຍ​ສັນຕິ​ວິທີ, ຕ້ອງ​ອົດທົນ​ອົດ​ກັ້ນ​ບໍ່​ໃຊ້​ອາວຸດ ຫຼື​ນາບ​ຂູ່​ໃຊ້​ກຳລັງອາວຸດ, ຕ້ອງ​ເພີ່ມ​ທະວີ​ການ​ຮ່ວມ​ມື​ແບບ​ສະ​ເໝີ​ພາບ ຕ່າງ​ຝ່າຍ​ຕ່າງ​ມີ​ຜົນ​ປະ​ໂຫຍດ ລະຫວ່າງ​ບັນດາ​ປະຊາ​ຊາດ​ນຳ​ກັນ.

ທີ​ສອງ, ​ເປັນ​ປະ​ເທດ​ທີ່​ໄດ້​ບັນ​ລຸ ​ແລະ ບັນລຸ​ໄດ້​ກ່ອນ​ກຳນົດ​ເວລາ ຫຼາຍເປົ້າໝາຍ​ການພັດທະນາ​ສະຫັດ​ສະ​ວັດ, ຫວຽດນາມ​ໃຫ້​ທັດສະນະ​ວ່າ ​ເພື່ອ​ປະຕິບັດລະບຽບວາ­ລະ​ການ​ປະຊຸມ 2030 ກ່ຽວ​ກັບ​ການ​ພັດທະນາ ​ໃຫ້​ປະກົດຜົນ​ເປັນ​ຈິງນັ້ນ ​ແຕ່ລະ​ປະ​ເທດ​ກ່ອນ​ອື່ນ​ໝົດ​ຕ້ອງ​ມີ​ຄວາມ​ຕັດສິນ​ໃຈ​ການ​ເມືອງ​ສູງ, ເສີມ​ຂະຫຍາຍ​ກຳລັງ​ພາຍ​ໃນ ​ແລະ ຄວາມ​ສາມາດ​ບົ່ມ​ຊ້ອນ​ຂອງ​ປະ​ເທດ​ຢ່າງ​ສຸດ​ຂີດ, ​ຖືເອົາທັດສະນະ​ການ​ພັດທະນາ​ແບບ​ຍືນ​ຍົງ​ ເປັນ​ທິດ​ທາງ​ທີ່​ເປັນ​ປະຈຳ ຍາວ​ນານ, ​ແລະ ສັບ​ຊ້ອນບັນດາເປົ້າໝາຍການ​ພັດທະນາ​ແບບ​ຍືນ​ຍົງ ​ເຂົ້າ​ໃນ​ທຸກ​ແຜນຍຸດ​ທະ​ສາດ ​ແລະ ​ໂຄງການ​ແຫ່ງ​ຊາດ, ​ໃນ​ນັ້ນ ​ຍາມໃດກໍ່ຕ້ອງຕັ້ງ​ມະນຸດຢູ່​ໃນ​ທີ່​ຕັ້ງ​ໃຈກາງ, ສອດຄ່ອງ​ກັບ​ເງື່ອນ​ໄຂ ສະພາບ​ການ​ອັນລະອຽດ​ຕົວ​ຈິງ ຂອງ​ແຕ່ລະ​ປະ​ເທດ. ຫວຽດນາມ​ໄດ້ ​ແລະ ພວມ​ຕັ້ງໜ້າ​ປະຕິບັດ​ແຜນ​ຍຸດ​ທະ​ສາດ​ກ່ຽວ​ກັບການ​ພັດທະນາ​ແບບ​ຍືນ​ຍົງ ​ໄລຍະ 2011 - 2020. ພວກ​ຂ້າພະ​​ເຈົ້າ​ໃຫ້​ຄຳ​ໝັ້ນ​ສັນຍາ​ຈະ​ຍູ້​ແຮງ​ການຈັດ​ວາ​ງ​ໂຄງ​ປະກອບ​ເສດຖະກິດ​ຄືນ​ໃໝ່, ຫັນປ່ຽນ​ຕົວ​ແບບ​ການ​ເຕີບ​ໂຕ ​ເພື່ອ​ແນ​ໃສ່​ຍົກ​ສູງ​ຄຸນ​ນະພາ​ບ ປະສິດ​ທິຜົນ​ເສດຖະກິດ, ຮັບປະກັນ​ຄວາມ​ຍຸດຕິ​ທຳ​ທາງ​ສັງຄົມ, ປະຢັດ​ແຫຼ່ງຊັບພະຍາກອນ​ຫຼາຍ​ທີ່​ສຸດ ​ແລະ ປົວ​ແປງ​ສິ່ງ​ແວດ​ລ້ອມ ຮັບ​ມື​ກັບ​ການ​ປ່ຽນ​ແປງ​ດິນ​ຟ້າ​ອາກາດ.

ທີ​ສາມ, ຄວາມ​ຈຳ​ເປັນ​ຕ້ອງ​ເພີ່ມ​ທະວີ​ການ​ພົວພັນ​ຄູ່​ຮ່ວມ​ທົ່ວ​ໂລກ ​ເພື່ອ​ການ​ພັດທະນາ​ແບບ​ຍືນ​ຍົງ, ​ໃນ​ນັ້ນ ອົງການສະຫະ​ປະຊາ​ຊາດ, ບັນດາ​ອົງການ​ຈັດ​ຕັ້ງ​ສາກົນ​ ຖື​ບົດບາດ​ຊຸກຍູ້ ​ແລະ ປະສານ​ງານ​ທີ່​ສຳຄັນ. ​ຂ້າພະ​ເຈົ້າ​ຂໍ​ຮຽກຮ້ອງ​​ບັນດາ​ປະ​ເທດ​ຈະ​ເລີ​ນພັດທະນາ ຈົ່ງ​ສະ​ແດງ​ຄວາມ​ຮັບຜິດຊອບ ​ແລະ ບົດບາດ​ນຳ​ໜ້າ​​ ໃນ​ການ​ຊ່ວຍ​ເຫຼືອ​ໃຫ້​ບັນດາ​ປະ​ເທດ​ກຳລັງ​ພັດທະນາ ປະຕິບັດບັນດາ​ເປົ້າ​ໝາຍ​ການ​ພັດທະນາ​ແບບ​ຍືນ​ຍົງ, ພິ​ເສດ​ແມ່ນ ​ໃຫ້​ການ​ຊ່ວຍ​ເຫຼືອ​ຍົກ​ສູງ​ກຳລັງ​ຄວາມ​ສາມາດ, ມອບ​ໂອນ​ເຕັກ​ໂນ​ໂລ​ຊີ, ສ້າງ​ເງື່ອນ​ໄຂ​ອຳນວຍ​ຄວາມ​ສະດວກ​ໃນ​ການ​ຄ້າ​ພານິດ, ການ​ເຂົ້າ​ເຖິງ​ແຫຼ່ງທຶນ​ຕ່າງໆ... ຕາງໜ້າ​ປະຊາຊົນ​ຫວຽດນາມ, ຂ້າພະ​ເຈົ້າ​ຂໍ​ສະ​ແດງ​ຄວາມ​ຂອບ​ໃຈຕໍ່​ທຸກໆ​ປະ​ເທດ ບັນດາ​ອົງການ​ຈັດ​ຕັ້ງ​ສາກົນ ທີ່​ໄດ້​ຊ່ວຍ​ເຫຼືອຫວຽດນາ​ພັດທະນາ​ເສດຖະກິດ-ສັງຄົມ ​ແລະ ປະຕິບັດ​ບັນດາເປົ້າໝາຍ​ການພັດທະນາ​ສະຫັດ​ສະ​ວັດ ​ໃນ​ເວລາ​ທີ່​ຜ່ານ​ມາ. ຫວຽດນາມ​ຫວັງວ່າ ຈະ​ສືບ​ຕໍ່​ໄດ້ຮັບການ​ຮ່ວມ​ມື ຊ່ວຍ​ເຫຼືອອັນ​ລ້ຳ​ຄ່າ​ດັ່ງກ່າວ ​ໃນ​ວິວັດ​ການ​ປະຕິບັດລະບຽບວາ­ລະ​ການ​ປະຊຸມ 2030 ກ່ຽວ​ກັບ​ການ​ພັດທະນາ​ແບບ​ຍືນ​ຍົງ.

ຫວຽດນາມ​ພ້ອມ​ກັບ​ບັນດາ​ປະ​ເທດ​ສະມາຊິກ ອາ​ຊຽນ ພວມ​ມານະ​ພະຍາຍາມ​ເພື່ອສຳ​ເລັດ​ການ​ກໍ່​ສ້າງ​ປະຊາ​ຄົມ ອາ​ຊຽນ ​ໃນ​ທ້າຍ​ປີ 2015 ​ແນ​ໃສ່​ກໍ່ສ້າງ​ອາຊີ​ຕາ​ເວັນ​ອອກສຽງ​ໃຕ້​ໃຫ້​ກາຍ​ເປັນ ພາກ​ພື້ນ​ແຫ່ງ​ສັນຕິພາບ ສະຖຽນ​ລະ​ພາບ ການ​ຮ່ວມ​ມື ​ແລະ ຈະ​ເລີ​ນ​ຖາວອນ. ຫວຽດນາມ​ກໍ່​ພວມ​ມານະ​ພະຍາຍາມ​ພ້ອມກັນ​ກັບ​ບັນດາ​ປະ​ເທດ​ອາ​ຊຽນ ​ແລະ ບັນດາ​ປະ​ເທດ​ທີ່​ກ່ຽວຂ້ອງ ຮັກສາ ​ແລະ ປັບປຸງ​ສັນ​ຕິ​ພາບ ຄວາມ​ສະຫງົບ​ຢູ່​ໃນ​ພາກ​ພື້ນ ​ເພື່ອ​ແນ​ໃສ່​ສ້າງ​ສິ່ງ​ແວດ​ລ້ອມ​ທີ່​ສະດວກ​ດີ​ໃຫ້​ແກ່​ການ​ພັດທະນາ​ແບບ​ຍືນ​ຍົງ, ​ໃນ​ນັ້ນ​ມີ​ຄວາມ​ສະຫງົບ ຄວາມ​ປອດ​ໄພ ​ແລະ ​ເສລີພາບ​ໃນ​ການ​ເດີນ​ທະ​ເລ ​ເດີນ​ອາກາດ​ຢູ່​ທະ​ເລ​ຕາເວັນອອກ ​ເຊິ່ງ​ເປັນ​ເສັ້ນທາງ​ຕົ້ນຕໍ​ທີ່​ເຊື່ອມ​ຕໍ່ລະຫວ່າງອາ​ຊຽນ ກັບບັນດາ​ປະ​ເທດ ​ແລະ ພາກ​ພື້ນ​ອື່ນໆ​ໃນ​ໂລກ. ພວກ​ຂ້າພະ​ເຈົ້າ​ຕັ້ງ​ໝັ້ນ​ໃນ​ແຜນ​ນະ​ໂຍບາຍ​ອັນ​ສະ​ເໝີ​ຕົ້ນ​ສະ​ເໝີ​ປາຍ ກ່ຽວ​ກັບ​ການ​ແກ້​ໄຂ​ຂໍ້​ພິພາດ​ຕ່າງໆ​ຢູ່​ທະ​ເລ​ຕາ​ເວັນ​ອອກ​ດ້ວຍ​ສັນຕິ​ວິທີ ບົນ​ພື້ນຖານ​ເຄົາລົບ​ນັບຖືກົດ­ໝາຍ​ສາກົນ ​ໃນ​ນັ້ນ​ມີອະນຸ​ສັນຍາ​ສະ­ຫະ​ປະ­ຊາ​ຊາດ​ວ່າ​ດ້ວຍ​ກົດ­ໝາຍ​ທະ­ເລປີ 1982 (UNCLOS), ປະຕິບັດ​ຖະ­ແຫຼງ­ການ​ກ່ຽວ​ກັບ​ວິ­ທີ​ປະ­ພຶດ​ຂອງ​ບັນ­ດາ​ຝ່າຍ​ຢູ່​ທະ­ເລ​ຕາ­ເວັນ​ອອກ (DOC) ຢ່າງ​ເຂັ້ມ​ງວດແລະຄົບ​ຖ້ວນ, ​ແລະ ຊຸກຍູ້​ເພື່ອ​ບັນລຸປະມວນ​ຂໍ້​ກຳ­ນົດ​ກ່ຽວ​ກັບ​ວິ­ທີ​ປະ­ພຶດ ຂອງ​ບັນດາ​ຝ່າຍ​ຢູ່​ທະ­ເລ​ຕາ­ເວັນ​ອອກ (COC) ​ໂດຍ​ໄວ.​​ ​

ຂ້າພະ​ເຈົ້າ​ເຊື່ອ​ໝັ້ນ​ວ່າ, ດ້ວຍ​ຄວາມ​ຕັດສິນ​ໃຈ ​ແລະ ຄຳ​ໝັ້ນ​ສັນຍາ​ການ​ເມືອງ​ອັນ​ໜັກ​ແໜ້ນ, ພວກ​ຂາ​ພະ​ເຈົ້າ​ຈະ​ປະຕິບັດລະບຽບວາ­ລະ​ການ​ປະຊຸມ 2030 ກ່ຽວ​ກັບ​ການ​ພັດທະນາ​​ແບບ​ຍືນ​ຍົງ​ ຢ່າງ​ສຳ​ເລັດ​ມີ​ໄຊ ​ເພື່ອ​ຜົນ​ປະ​ໂຫຍ​ດລວມຂອງ​ມະ​ນຸດ​ຊາດ​ທັງໝົດ, ​ເພື່ອ​ຊີວິດ​ອັນ​ປອດ​ໄພ​ແລະຈົບງາມ​ ໃຫ້​ແກ່​ຄົນ​ຮຸ່ນ​ນີ້ ​ແລະ ຄົນຮຸ່ນລຸນ​ຫຼັງ. ຫວຽດນາມ​ໃຫ້​ຄຳ​ໝັ້ນ​ສັນຍາ​ຈະ​ປະກອບສ່ວນ​ອັນ​ຕັ້ງໜ້າ, ມີ​ຄວາມ​ຮັບຜິດຊອບ​ເຂົ້າ​ໃນ​ຄວາມ​ມານະ​ພະຍາຍາມ​ລວມ ​ເພື່ອ​ບໍ່​ໃຫ້​ບຸກຄົນ​ຜູ້​ໃດ ປະ​ເທດ​ໜຶ່ງ​ໃດ​ຖືກ​ຕົກ​ທ້າຍ​ຖອຍຫຼັງ​ໃນ​ວິວັດທະນາ​ການ​ນີ້./.

ຂຽນ​ໂດຍ ​ເຈືອງ​ເຕິ​ນຊາງ
ກຳມະການ​ກົມ​ການ​ເມືອງ, ປະທານ​ປະ​ເທດແຫ່ງ ສສ.ຫວຽດນາມ

----------------------------------
* ຫົວ​ຂໍ້​ໂດຍ​ວາລະສານ​ກອມ​ມູນິດ​ແຕ່ງ.

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ